ការសិក្សាមួយបង្ហាញថា នៅក្នុងក្រុង Wuhan តែមួយអាចមានអ្នកឆ្លងជំងឺរលាកសួតប្រហែល ១,៧០០នាក់

អ្នកស្រាវជ្រាវនៅមហាវិទ្យាល័យអង់គ្លេសប៉ាន់ស្មានថា មានអ្នកជំងឺរលាកសួតច្រើនជាង ១,៧០០នាក់ ដែលទាក់ទងទៅនឹងវីរុសឆ្លងវីរុសថ្មី នៅក្នុងទីក្រុង Wuhan ប្រទេសចិន។ ការផ្ទុះឡើងនៃជំងឺរលាកសួតដែលទាក់ទងទៅនឹងមេរោគថ្មី coronavirus ហាក់ដូចជាកំពុងរីករាលដាលនៅក្នុងប្រទេសចិន។ ក្រុមអ្នកជំនាញជំងឺឆ្លងមួយក្រុមនៃសាកលវិទ្យាល័យឯកជន Imperial College London បានឱ្យដឹងថា ការប៉ាន់ស្មានរបស់ពួកគេគឺផ្អែកលើកត្តាផ្សេងៗរួមមាន៖ ប្រជាជននៅតំបន់ Wuhan និងតំបន់ក្បែរនោះ ចំនួនអ្នកជំងឺនៅខាងក្រៅប្រទេសចិន និងចំនួនមនុស្សដែលធ្វើដំណើរទៅបរទេសចេញពីព្រលានយន្តហោះអន្តរជាតិទីក្រុង Wuhan ។ របាយការណ៍របស់ពួកគេនិយាយថា អាចមានច្រើនជាង ១,៧០០ ករណីនៅទីក្រុង Wuhan គិតត្រឹមថ្ងៃទី១២ ខែមករា។

របាយការណ៍នេះសង្កត់ធ្ងន់លើអាជ្ញាធរចិន ដើម្បីឱ្យពួកគេពង្រីកការស្ទង់មតិដល់អ្នកទាំងអស់ដែលបានសម្រាកព្យាបាលនៅមន្ទីរពេទ្យ ដោយសារតែជំងឺរលាកសួត និងបញ្ហាផ្លូវដង្ហើមធ្ងន់ធ្ងរនៅ Wuhan និងទីក្រុងជិតខាង។ របាយការណ៍ក៏បានលើកឡើងពីភាពចាំបាច់នៃការប្រុងប្រយ័ត្នបន្ថែមទៀតចំពោះការឆ្លងមេរោគ ដោយនិយាយថា ការចម្លងវីរុសពីមនុស្សទៅមនុស្សគឺពិតជាអាចមែន ហើយទំនងជាកើតមានច្រើនជាងអ្វីដែលយើងធ្លាប់ស្មាន។ ជាក់ស្ដែងមន្ត្រីសុខាភិបាលនៅទីក្រុង Wuhan បាននិយាយកាលពីថ្ងៃច័ន្ទថា ចំនួនអ្នកជំងឺនៅក្នុងទីក្រុងបានកើនឡើងពី ១៣៦ កាលពីចុងសប្តាហ៍មុន រហូតដល់ ១៩៨នាក់ នៅពេលនេះ។ ក៏មានអ្នកជំងឺម្នាក់ទៀតដែលបានស្លាប់ ដែលធ្វើឱ្យចំនួនអ្នកស្លាប់កើនឡើងដល់ ៣នាក់៕

អត្ថបទ៖ លីដា