អ្នកស្លាប់ដោយសារវីរុសកូរ៉ូណានៅក្នុងប្រទេសចិនកើនលើស ១,០០០នាក់ហើយ

ចំនួនអ្នកស្លាប់ដោយសារវីរុសកូរ៉ូណានៅក្នុងប្រទេសចិន បានកើនឡើងលើស ១,០០០ នាក់ បន្ទាប់ពីខេត្តហ៊ូប៉ីបានរាយការណ៍ថា មានអ្នកស្លាប់ចំនួន ១០៣នាក់ បន្ថែមទៀតកាលពីថ្ងៃចន្ទម្សិលមិញ។ មន្ត្រីចិននិយាយថា ឥឡូវនេះមានករណីដែលត្រូវបានបញ្ជាក់ជិត ៤៣,០០០ ករណី នៅទូទាំងប្រទេសហើយ ១,០១៦ នាក់ បានស្លាប់។ ទូរទស្សន៍រដ្ឋចិនបានរាយការណ៍ថា លោកប្រធានាធិបតី ស៊ី ជីនពីង បានទៅសួរសុខទុក្ខអ្នកឆ្លងវីរុសកូរ៉ូណានៅមន្ទីរពេទ្យក្រុងប៉េកាំងកាលពីថ្ងៃចន្ទ និងបានអំពាវនាវឱ្យមានវិធានការបន្ថែមទៀត ដើម្បីទប់ស្កាត់ការផ្ទុះឡើងនៃវីរុសនេះ។

ចំណែកលោក Tedros Adhanom Ghebreyesus ប្រធានអង្គការសុខភាពពិភពលោក បាននិយាយកាលពីថ្ងៃចន្ទថា ការរីករាលដាលនៃវីរុសឆ្លងរវាងមនុស្សកំពុងក្លាយជាប្រធានបទក្ដៅ។ ជាក់ស្ដែងយើងបានឃើញថាការរាលដាលឆ្លងពីមនុស្សទៅមនុស្ស ដែលគ្មានប្រវត្តិមកក្រុងវូហាន មានការកើនឡើងដូចគ្នា។ នៅប្រទេសអង់គ្លេសក៏បានប្រកាសថា វីរុសនេះគឺជាការគំរាមកំហែងយ៉ាងធ្ងន់ធ្ងរដល់សុខភាពសាធារណៈ បន្ទាប់ពីបានរាយការណ៍ពីករណីថ្មីចំនួន ៤ កាលពីថ្ងៃច័ន្ទ ដោយនាំឱ្យមានករណីនៅអង់គ្លេស ដែលបានបញ្ជាក់ដល់ ៨នាក់៕

អត្ថបទ៖ លីដា