ទាហានថៃដែលបានបាញ់សម្លាប់មនុស្ស ៣០នាក់ នៅក្រុង Nakhon Ratchasima កាន់កាប់កាំភ្លើងក្នុងដៃ ៥ដើម

ថៃ៖ អគ្គមេបញ្ជាការកងទ័ពលោកឧត្តមសេនីយ៍ Apirat Kongsompong បានប្រាប់សន្និសីទសារព័ត៌មាននៅព្រឹកថ្ងៃអង្គារនេះថា ខ្មាន់កាំភ្លើង Jakrapanth Thomma ដែលបានបាញ់សម្លាប់មនុស្ស ៣០នាក់ អំឡុងពេលបាញ់ប្រហារនៅក្នុងទីក្រុងនគររាជសីមា ឬខូរ៉ាត (Nakhon Ratchasima) កាលពីចុងសប្តាហ៍កន្លងទៅ មានកាន់កាប់កាំភ្លើងដែលបានចុះបញ្ជីស្របច្បាប់ចំនួន ៥ ក្នុងនោះរួមមាន កាំភ្លើងដៃ (pistol) ៣ដើម, កាំភ្លើងវែង (rifle) ១ដើម និងកាំភ្លើងខ្លី (shotgun) ១ដើម។ កាំភ្លើងទាំង ៥ដើម ត្រូវបានទិញក្រោមកម្មវិធីលក់អាវុធ (welfare gun) របស់កងទ័ព។

លោកឧត្តមសេនីយ៍បានបន្ថែមដែរថា កម្មវិធីនេះគួរកាត់ចោលវិញ ដោយសារវាគ្មានហេតុផលអ្វីត្រូវឱ្យទាហានមានអាវុធផ្ទាល់ខ្លួនឡើយ ព្រោះថានៅពេលបម្រើការងារនឹងមានកាំភ្លើងឱ្យកាន់ស្រាប់ហើយ។ ម៉្យាងទៀតការទិញកាំភ្លើងដោយមន្រ្តីកងទ័ព ត្រូវតែមានការត្រួតពិនិត្យតឹងរឹងជាងមុន ហើយការអនុញ្ញាតឱ្យកាន់កាប់កាំភ្លើងផ្ទាល់ខ្លួន ត្រូវតែផ្តល់ឱ្យដោយឧត្តមសេនីយកងទ័ព មិនមែនត្រឹមជាវរសេនីយ៍ឯកទេ។ កម្មវិធីលក់អាវុធត្រូវបានអនុវត្តយ៉ាងទូលំទូលាយដោយភ្នាក់ងារអនុវត្តច្បាប់ និងកងកម្លាំងប្រដាប់អាវុធទាំងបីក្នុងប្រទេសថៃ ដើម្បីឱ្យបុគ្គលិករបស់ពួកគេទិញអាវុធដោយមិនគិតពន្ធ ហើយដែលជាទូទៅមានកម្រិតទាបជាងតម្លៃទីផ្សារពាក់កណ្តាល។ ទាំងនេះវាអាចពន្យល់យើងបានថា ហេតុអ្វី Jakrapanth Thomma អាចមានលទ្ធភាពទិញកាំភ្លើង ៥ដើម៕

អត្ថបទ៖ លីដា