តារាសម្តែង កុំកុំ ប្រកាសបរិច្ចាគថវិកាចំនួន ១លានដុល្លារហុងកុង ជូនដល់បុគ្គលិកពេទ្យជួរមុខនៅទីក្រុង Wuhan
តារាសម្តែងហុងកុង ដ៏ល្បីឈ្មោះ Donnie Yen ដែលទស្សនិកជនកម្ពុជាស្គាល់ថាជា កុំកុំ បានប្រកាសបរិច្ចាគថវិកាចំនួន ១លានដុល្លារហុងកុង (១៨០,០០០ ដុល្លារអាមេរិក) ដល់បុគ្គលិកពេទ្យជួរមុខនៅទីក្រុង Wuhan ប្រទេសចិន ដែលជាចំណុចផ្តើមនៃការផ្ទុះឡើងនូវជំងឺរលាកសួតបង្កដោយវីរុសកូរ៉ូណាប្រភេទថ្មី COVID-19 នេះបើយោងតាមការផ្សព្វផ្សាយរបស់សារព័ត៌មាន SOUTH CHINA MORNING POST ចេញផ្សាយកាលពីថ្ងៃទី១៩ ខែកុម្ភៈ ឆ្នាំ២០២០។
នៅក្នុងវីដេអូដែលបានបង្ហោះនៅលើបណ្តាញសង្គម Weibo លោក Donnie Yen បានថ្លែងអំណរគុណដល់បុគ្គលិកពេទ្យទាំងអស់នៅក្នុងប្រទេសចិន ហើយលោកក៏បានក្រើនរំលឹកដល់អ្នកទាំងអស់គ្នាឱ្យប្រយ័ត្នប្រយែង ពាក់ម៉ាស និងលាងដៃឱ្យបានទៀងទាត់។ តារាវ័យ៥៦ឆ្នាំរូបនេះបង្ហាញជំនឿរបស់ខ្លួនថាប្រទេសចិនអាចជំនះវិបត្តិនេះដោយផ្តល់ពាក្យលើកទឹកចិត្ត។ អំពើសប្បុរសធម៌របស់តារាសម្តែងDonnie Yen ត្រូវបានផ្សព្វផ្សាយពាសពេញប្រទេសចិននិងហុងកុង ព្រមទាំងទទួលបានការកោតសរសើរយ៉ាងខ្លាំងពីអ្នកនិយមលេងអ៊ីនធឺណេត៕
ដោយ៖ ណារ៉ែន