កាលពីពេលថ្មីៗនេះ លោក ឃឹម ហ្វីណង់ ដែលជាអភិបាលនៃគណៈអភិបាលស្រុកបន្ទាយស្រី បានបង្ហោះរៀបរាប់ប្រាប់ពី សួនផ្កាអ័រគីដេព្រៃដំបូងគេ និង តែមួយគត់នៅក្នុងប្រទេសកម្ពុជា ដែលមានឈ្មោះថា “សួនកេសរកូលព្រៃ” ហើយសួនផ្កាមួយនេះស្ថិតនៅក្នុងស្រុកបន្ទាយស្រី ខេត្តសៀមរាបផ្ទាល់តែម្តង។ អភិបាលស្រុកវ័យក្មេងរូបនេះ បានរៀបរាប់ប្រាប់នៅលើ Facebook របស់លោកថា៖

“#ទៅលេងបន្ទាយស្រី សូមណែនាំអោយស្គាល់សួនផ្កាអ័រគីដេព្រៃដំបូងគេនិងតែមួយគត់នៅក្នុងប្រទេសកម្ពុជា៖ “សួនកេសរកូលព្រៃ” នៃមជ្ឈមណ្ឌលស្រាវជ្រាវនិងអភិរក្សកេសរកូល សុខ អាន ភ្នំគូលែន។ សួននេះស្ថិតនៅជាប់នឹងជើងភ្នំគូលែននៃស្រុកបន្ទាយស្រី ក្បែរទីតាំងលក់សំបុត្រឡើងទៅលើភ្នំ។ សោកស្តាយដែលខ្ញុំទៅមិនចំពេល ហើយផ្កាភាគច្រើនត្រូវបានយកទៅតាំងពិព៌ណអស់មួយចំនួនធំនៅភ្នំពេញ។ បើមានឱកាស សង្ឃឹមថាពុកម៉ែបងប្អូនទាំងអស់គ្នានឹងអញ្ជើញមកទស្សនាកំសាន្ត ជាពិសេសនាំយុវជននិងកុមារតូចៗមកអោយបានស្គាល់ពីប្រភេទផ្កាកេសរកូលព្រៃនេះផង។”