រដ្ឋមន្ត្រីសុខាភិបាលថៃ៖ ពួកបារាំង (សំដៅដល់ពួកជាតិស្បែកស) មិនដែលងូតទឹកទេ ហើយពួកហ្នឹងគគ្រិចណាស់ ដែលងាយចម្លងវីរុសកូរ៉ូណាណាស់

រដ្ឋមន្រ្តីក្រសួងសុខាភិបាលថៃ Anutin Charnvirakul ត្រូវបានគេរាយការណ៍ថា បានសរសេរនៅក្នុងបណ្ដាញសង្គម Twitter ក្នុងន័យរើសអើងចំពោះភ្ញៀវទេសចរលោកខាងលិចចំនួន២លើក ដោយនិយាយថាពួកលោកខាងលិចមានភាព «គគ្រិច» ហើយទំនងជាអាចចម្លងវីរុសកូរ៉ូណា ច្រើនជាងជនជាតិអាស៊ី។ នៅក្នុងការបង្ហោះចំនួន ២លើក នោះបាននិយាយថា ពួកបារាំង (សំដៅដល់ពួកជាតិស្បែកស) មិនដែលងូតទឹកទេ ហើយវានឹងបង្កហានិភ័យដល់សុខភាពប្រជាជនថៃ។ ប៉ុន្តែយ៉ាងណាការសរសេរនៅក្នុងបណ្តាញសង្គម Twitter ចំនួន២ កាលពីយប់ថ្ងៃព្រហស្បតិ៍នោះ ត្រូវបានលុបចោលវិញទាំងអស់ហើយ។

គណនី anutin_c នោះធ្លាប់បានសរសេរថា៖ «ឥឡូវនេះជារដូវរងារនៅអឺរ៉ុប ដូច្នេះប្រជាជនទាំងនោះកំពុងរត់ចេញពីភាពត្រជាក់មកលេងប្រទេសថៃ។ មនុស្សជាច្រើនស្លៀកពាក់យ៉ាងកខ្វក់ ហើយមិនដែលងូតទឹកទេ។ ក្នុងនាមជាម្ចាស់ផ្ទះ យើងត្រូវតែប្រុងប្រយ័ត្ន។ ទោះបីជាពួកគេមិនឡូកឡំ ហើយបិទព្រំដែនរបស់ខ្លួនក៏ដោយ”។

សារបង្ហោះមួយទៀតសរសេរថា៖ «ថ្ងៃនេះខ្ញុំនៅឈៀងម៉ៃ។ មិនមានភ្ញៀវទេសចរចិនច្រើនទេ មានតែបារាំងប៉ុណ្ណោះ។ ប្រជាជនថៃជាង ៩០% ពាក់ម៉ាស ប៉ុន្តែអត់មានបារាំងម្នាក់ណាពាក់វាទេ។ នេះជាមូលហេតុដែលមានការឆ្លងច្រើននៅក្នុងប្រទេសរបស់ពួកគេ។ យើងត្រូវប្រយ័ត្នចំពោះជនលោកខាងលិចជាងជនជាតិអាស៊ី»។

របាយការណ៍ប្រព័ន្ធផ្សព្វផ្សាយជាច្រើនបាននិយាយថា គណនី Twitter នោះគ្រប់គ្រងដោយ Anutin Charnvirakul ផ្ទាល់។ ព្រោះថាលោករដ្ឋមន្រ្តីបានលុបចោលគណនី Facebook របស់លោកកាលពីសប្តាហ៍មុន បន្ទាប់ពីមានសេចក្តីថ្លែងការណ៍ជាច្រើនស្តីពី ថាតើអ្នកដំណើរបរទេសមកពីប្រទេសដែលមានហានិភ័យខ្ពស់នឹងត្រូវធ្វើចត្តាឡីស័ក ឬអត់។ ការបង្ហោះលើបណ្តាញសង្គម Twitter ទាំងពីរត្រូវបានលុបចោលនៅរសៀលថ្ងៃសុក្រនេះ បន្ទាប់ពីបានទាក់ទាញមតិជាច្រើនរាប់ពាន់នាក់ ដែលរិះគន់សម្ដីក្នុងន័យប្រកាន់ប្រកាន់ពូជសាសន៍របស់គាត់។

លោក Anutin កាលពីថ្មីៗនេះក៏បានធ្វើឱ្យមានការខឹងសម្បារយ៉ាងខ្លាំងម្ដងដែរ ដោយកាលនោះគាត់និយាយថា «អាបារាំង» ដែលមិនពាក់ម៉ាសគួរត្រូវបានបណ្តេញចេញពីប្រទេសថៃ ហើយក្រោយមកក៏បានសុំទោសវិញ៕

អត្ថបទ៖ លីដា
ប្រភព៖ KhaosodEnglish