ប្រទេសថៃនឹងឲ្យស៊ីម FREE ដល់អ្នកដំណើរ ឬអ្នកស្រុកដែលទើបតែមកពីបរទេស ដើម្បីតាមដានសកម្មភាពរបស់ពួកគេ
គណៈកម្មាធិការផ្សព្វផ្សាយ និងទូរគមនាគមន៍ជាតិ (NBTC) ផ្តល់ជូននូវស៊ីមកាតឥតគិតថ្លៃមួយ (មានតម្លៃដើម៤៩បាត) ដែលត្រូវបានផ្តល់ជូនដល់ជនបរទេស ក៏ដូចជាប្រជាជនថៃដែលបានធ្វើដំណើរពីក្រៅប្រទេស ដែលមានហានិភ័យខ្ពស់ពីការឆ្លងវីរុស COVID-19 ។ ប្រទេសទាំងនេះរួមមាន ប្រទេសចិន ហុងកុង កូរ៉េខាងត្បូង អ៊ីតាលី និងម៉ាកាវ (គិតត្រឹមពេលវេលានៃការផ្សព្វផ្សាយ)។ យោងតាមអគ្គលេខាធិការ NBTC លោក Thakorn Tanthasit បានឱ្យដឹងថា កម្មវិធីស្មាតហ្វូនរបស់ AoT Airports មានការទាញយកច្រើនជាង ៧,០០០ ចាប់តាំងពីវាបានចេញដំណើរការកាលពីថ្ងៃទី១២ ខែមីនា ថ្មីៗនេះ។
ស៊ីមទូរស័ព្ទនេះ គឺដំណើរការជាមួយកម្មវិធីទូរស័ព្ទរបស់ AoT Airports ផ្ទាល់តែម្តង ដោយវានឹងធ្វើការតាមដានសកម្មភាពអ្នកទាំងនោះថា ពួកគេបានធ្វើចត្តាឡីស័កខ្លួនរយៈពេល ១៤ថ្ងៃ ដែរឬអត់។ វាក៏នឹងប្រាប់ដំណឹងទៅអាជ្ញាធរប្រសិនបើអ្នកទាំងនោះ ដើរចេញពីកន្លែងនៅដាច់ដោយឡែករបស់ខ្លួន។ បន្ទាប់ពីរយៈពេល ១៤ថ្ងៃរួច Data ទាំងនោះនឹងលុបទៅវិញដោយស្វ័យប្រវត្តិ។ អាជ្ញាធរក៏ស្នើឲ្យមានការដោនឡូត App នេះគ្រប់គ្នាដែលចូលទៅប្រទេសថៃ បើមិនធ្វើតាមទេពួកគេនឹងមិនអនុញ្ញាតឲ្យចូលប្រទេសថៃនោះទេ ហើយអ្នកផ្សេងដែលចូលមកដល់ប្រទេសថៃមុនការប្រកាសនេះ ពួកគេនឹងផ្ដល់ដំណឹងឲ្យដោនឡូត App នោះដូចគ្នា៕
អត្ថបទ៖ លីដា