អ្នកប្រើប្រាស់ រថយន្ត ម៉ូតូ និងកង់៣ បង់រំលស់ ចាំបាច់ត្រូវមានឯកសារទាំងនេះដាក់តាមខ្លួន ដើម្បីទុកបង្ហាញ ពេលសមត្ថកិច្ចត្រួតពិនិត្យ
ចាប់តាំងពីថ្ងៃទី០១ ខែឧសភា ឆ្នាំ២០២០ នេះតទៅ អគ្គស្នងការនគរបាលជាតិ នឹងចាប់ផ្តើមធ្វើការរឹតបន្តឹងការអនុវត្តច្បាប់ចរាចរណ៍ផ្លូវគោក នៅទូទាំងប្រទេស ដើម្បីកាត់បន្ថយគ្រោះថ្នាក់ចរាចរណ៍ ការពារអាយុជីវិត និងទ្រព្យសម្បត្តិប្រជាពលរដ្ឋ និងកាត់បន្ថយអត្រាការស្លាប់ រងរបួស និងពិការ ដោយសារគ្រោះថ្នាក់ចរាចរណ៍។ ការរឹតបន្តឹងច្បាប់ចរាចរណ៍នេះផ្តើមសំខាន់ទៅលើការមិនគោរពច្បាប់ចរាចរណ៍នានាដូចជា បើកបរមិនមានប័ណ្ណបើកបរ ឬ ប័ណ្ណបើកបរហួសសុពលភាព, ឈៀកហួសសុពលភាព, បើកបរហួសល្បឿនកំណត់, មិនពាក់ខ្សែក្រវ៉ាត់សុវត្ថិភាព, មិនពាក់មួយសុវត្ថិភាព, មិនមានកញ្ចក់មើលក្រោយ, ដឹកលើសចំណុះ និងចំណុចជាច្រើនទៀត។ ក្នុងនោះមានការចោទសួរថា តើអ្នកទិញរថយន្ត ម៉ូតូ ឬម៉ូតូកង់៣បង់រំលស់ ត្រូវធ្វើបែបណា?
យោងតាមការបញ្ជាក់របស់ឯកឧត្តម ខៀវ កញ្ញារីទ្ធ រដ្ឋមន្ដ្រីក្រសួងព័ត៌មាន នៅលើទំព័រហ្វេសប៊ុក បានឲ្យដឹងថា “ខ្ញុំសូមផ្សាយបន្ត : សូមជំរាបជូនបងប្អូនប្រជាពលរដ្ឋដែលទិញ រថយន្ត ម៉ូតូ និង ម៉ូតូកង់៣ ( PassApp ) បង់រំលស់ !
ដេីម្បីដោះស្រាយនូវបញ្ហាប្រឈមចំពោះការប្រើប្រាស់ប័ណ្ណសំគាល់យានយន្ត (កាតគ្រី) ថតចម្លង គ្មានការបញ្ជាក់ពី អាជ្ញាធរ រងការផាកពិន័យនោះ នៅព្រឹកថ្ងៃទី២ ខែឧសភា ឆ្នាំ ២០២០ ឯកឧត្ដមនាយឧត្ដមសេនីយ៍ ហ៉ឹម យ៉ាន អគ្គស្នងការរងនគរបាលជាតិ បានណែនាំមិនអោយនគរបាលចរាចរណ៍ទូទាំងរាជធានី-ខេត្ត ធ្វើការផាកពិន័យចំពោះ ប្រជាពលរដ្ឋ ដែលប្រើប្រាស់ប័ណ្ណសំគាល់យានយន្ត (កាតគ្រី) ថតចម្លងទេ។ ប៉ុន្តែបងប្អូនប្រជាពលរដ្ឋ ដែលទិញ រថយន្ត ម៉ូតូ និង ម៉ូតូកង់៣ បង់រំលស់ ត្រូវភ្ជាប់ កិច្ចសន្យាទិញ-លក់ ដាក់ជាប់មកជាមួយ ដេីម្បីទុកបង្ហាញសមត្ថកិច្ចនៅពេល ដែលសមត្ថកិច្ចត្រួតពិនិត្យ។ ដូច្នេះសូមបងប្អូនប្រជាពលរដ្ឋ ដែលទិញ រថយន្ត ម៉ូតូ និង ម៉ូតូកង់៣ បង់រំលស់ ត្រូវយកឯកសារកិច្ចសន្យាទិញ-លក់ នៅកន្លែងបង់រំលស់ និងប័ណ្ណសំគាល់យានយន្ត (កាតគ្រី) ថតចម្លង ដាក់ជាប់ខ្លួនផង៕
អត្ថបទ៖ សេម