ករណីស៊ីគ្រឿងឡាន ពេលនេះអធិការដ្ឋានស្រុកអង្គស្នួល ថាបានទទួលព័ត៌មាននេះហើយ “កំពុងស្រាវជ្រាវរឿងនេះ” ហើយជួយចេញសំណងលើការខាតបង់របស់ម្ចាស់រថយន្តខ្លះ
ក្រោយពេលដែលមានករណីគួរអោយភ្ញាក់ផ្អើលមួយ គឺមានបុរសម្នាក់ឈ្មោះថា Hok Tanghong បានរៀបរាប់ថារថយន្តរបស់ខ្លួនដែលបានរក្សាទុកនៅអធិការដ្ឋាននគរបាលស្រុកអង្គស្នួល ដើម្បីដោះស្រាយបញ្ហាគ្រោះថ្នាក់ចរាចរណ៍កាលពីឆ្នាំមុន ត្រូវបានគេស៊ីគ្រឿងខ្ទេចពេលដែលលោកមកយករថយន្តវិញ។
ករណីនេះបានធ្វើអោយកក្រើកពេញបណ្តាញសង្គម Facebook ខណៈដែលលោកស្នងការខេត្តកណ្តាល គឺលោក ឈឿន សុចិត្ត បានអោយសមត្ថកិច្ចជំនាញរបស់លោកចុះទៅសួរនាំម្ចាស់រថយន្តរួចហើយកាលពីល្ងាចមិញ នេះបើតាមការបញ្ជាក់របស់លោក ឈឿន សុចិត្ត នៅក្នុងគ្រុប តេឡេក្រាម ជាមួយអ្នកសារព័ត៌មាន។
ក្រៅពីនេះដែរលោក ផែង វណ្ណៈ បានបង្ហោះប្រាប់នៅព្រឹកនេះថា “ពាក់ព័ន្ធនឹងបញ្ហានេះ លោកអធិការនគរបាលស្រុកអង្គស្នួលបានអោយដឹងថា លោកបានទទួលព័ត៌មាននេះហើយ ហើយកំពុងស្រាវជ្រាវរឿងនេះ ។ លោកអធិការស្រុកបានអោយដឹងទៀតថា ក្នុងនាមលោកជាប្រធានអង្គភាព លោកនឹងទទួលខុសត្រូវចំពោះបញ្ហានេះ ហើយថ្ងៃនេះ កម្លាំងរបស់លោកនឹងទាក់ទងទៅម្ចាស់រថយន្ត ដើម្បីជួយសម្រួលចេញសំណងលើការខាតបង់របស់ម្ចាស់រថយន្តខ្លះ។” មហាជនរង់ចាំមើលថា តើបញ្ហាមួយនេះនឹងដោះស្រាយដោយរបៀបណា ហើយដើមហេតុមកពីអ្វីអោយពិតប្រាកដ៕
