សត្វទន្សោងញី ២ក្បាល ត្រូវជនមិនស្គាល់មុខលួចបាញ់សម្លាប់ និងកូនផ្សោតអាយុ ១០ថ្ងៃ មួយក្បាលបានស្លាប់ដោយមិនដឹងមូលហេតុនៅអន្លង់ផ្សោតឈើទាល ខេត្តស្ទឹងត្រែង
យោងតាមផេក អង្គការ WWF បានរៀបរាប់ទាំងអារម្មណ៍ក្រៀមក្រំថា៖ “អង្គការ WWF ពិតជាក្រៀមក្រំខ្លាំងណាស់ចំពោះការបាត់បង់សត្វទន្សោងចំនួនពីរក្បាល និងកូនផ្សោតមួយក្បាល។ ក្នុងទិវាប្រភេទសត្វកំពុងទទួលរងគ្រោះជិតផុតពូជជាសកល អង្គការ WWF សូមជម្រុញឱ្យមានវិធានការតឹងរឹងជាងមុនដើម្បីធ្វើការការពារប្រភេទសត្វកម្រទាំងនេះកុំឱ្យបាត់បង់ទៀត។” អង្គការ WWF បានរៀបរាប់ក្នុងរបាយការណ៍ថា កូនផ្សោតអាយុ ១០ថ្ងៃ មានទម្ងន់ ១៣ kg បានប្រទះឃើញស្លាប់នៅអន្លង់ផ្សោតឈើទាល ខេត្តស្ទឹងត្រែង ប៉ុន្តែមិនដឹងមូលហេតុនៃការស្លាប់ទេ ហើយក៏គ្មានស្លាកស្នាមរបួសលើខ្លួនកូនផ្សោតនេះដែរ។
គួរបញ្ជាក់ថាកាលពីប៉ុន្មានថ្ងៃនេះមានករណីជនមិនស្គាល់មុខបាញ់ សត្វទន្សោងញី២ក្បាល នៅក្នុងព្រៃការពារភ្នំព្រេច ហើយសត្វទន្សោងនោះបានរត់មកងាប់នៅក្នុងដីក្រុមហ៊ុន លឹមរ៉ូយ៉ាល់ ដែលមានទីតាំង នៅឃុំពូជ្រៃ ស្រុកពេជ្រាដា ខេត្តមណ្ឌលគិរី កាលពីថ្ងៃទី១៣ ខែឧសភា ឆ្នាំ២០២០ ចំងាយពីផ្លូវធំប្រហែល៣០ម៉ែត្រ។ តាមការពិនិត្យជាក់ស្តែងនៅនឹងកន្លែងកើតក្រុមការងារបានឃើញសត្វទន្សោងញីចំនួន២ក្បាល បានងាប់មានសភាពហើមស្អុយ ប្រហែលជាងាប់៣ទៅ ៤ថ្ងៃមកហើយ សត្វទន្សោងដែលងាប់នេះ។ លោក កែវ សុភក៌ ប្រធានមន្ទីរបរិស្ថានខេត្តមណ្ឌលគិរី បានចាត់មន្រ្តីជំនាញចុះធ្វើការស្រាវជ្រាវ ករណីបាញ់សត្វទន្សោងនេះហើយ ដើម្បីវែកមុខរកជនដែលប្រព្រឹត្តខុសច្បាប់៕
