រកឃើញទំនិញហួសកាលបរិច្ឆេទប្រើប្រាស់ ចំនួន ៣២.៥ គីឡូក្រាម ត្រូវបានមន្ត្រីសាខា ក.ប.ប ខេត្តកំពង់ឆ្នាំងធ្វើការដកហូត
- BY
- srey nuch
- June 16, 2020
(ខេត្តកំពង់ឆ្នាំង)៖ នៅថ្ងៃច័ន្ទ ១០រោច ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៥ ខែមិថុនា ឆ្នាំ២០២០ នេះមន្ត្រីសាខា ក.ប.ប ខេត្តកំពង់ឆ្នាំង ដោយមានការសហការពីមន្ត្រីមន្ទីរពាណិជ្ជកម្មខេត្ត និងគណៈកម្មការផ្សារ បានចុះត្រួតពិនិត្យស្រាវជ្រាវនិងទប់ស្កាត់ នូវទំនិញខូចគុណភាពដែលហួសកាលបរិច្ឆេទប្រើប្រាស់ ទំនិញមានប្រើប្រាស់សារធាតុគីមីហាមឃាត់ និងសំណល់ថ្នាំកសិកម្ម ដែលធ្វើឱ្យប៉ះពាល់ដល់សុខភាពអ្នកប្រើប្រាស់នៅផ្សាររមាស ស្ថិតនៅឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង ។
ក្នុងសកម្មភាពនោះ មន្ត្រីជំនាញបានជ្រើសរើសយកគំរូមួយចំនួន ដើម្បីធ្វើតេស្តរកឃើញនៅសារធាតុហាមឃាត់មានដូចជា៖ ចង្កឹះ ស្ពៃតឿ ម្អម ជីវ៉ាន់ស៊ុយ ត្រីប្រាហើម ក្បាលត្រីប្រឡាក់ ត្រីងៀត។ ជាមួយគ្នានោះមន្ត្រីជំនាញបានធ្វើការត្រួតពិនិត្យរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារផងដែរ ។
*ជាលទ្ធផលមន្ត្រីជំនាញបានរកឃើញការដាក់តាំងលក់ទំនិញហួសកាលបរិច្ឆេទប្រើប្រាស់រួមមាន៖
-ទឹកដោះគោចំនួន ២៣ ប្រអប់ ស្មើនឹង ៦.៣ គីឡូក្រាម ។
-ទឹកក្រូចចំនួន ១១ ដប ស្មើនឹង ១៧.៦ គីឡូក្រាម ។
-ស្រាយិនស៊ិន ចំនួន ២៤ ដប ស្មើនឹង ៨.៦ គីឡូក្រាម ។
សរុបទំនិញដែលមន្ត្រីជំនាញដកហូតបានសរុបចំនួន ៣២.៥ គីឡូក្រាម។
បន្ទាប់មក មន្ត្រីសាខា ក.ប.ប ខេត្តកំពង់ឆ្នាំង បានធ្វើកំណត់ហេតុដកហូត ទំនិញទាំងនោះយកទៅធ្វើការដុតកម្ទេចចោលភ្លាមៗ។ ទន្ទឹមនឹងនោះមន្ត្រីជំនាញ បានធ្វើការណែនាំដល់អាជីវករ ឱ្យយល់ដឹងនិងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ជៀសវាងបង្កផលប៉ះពាល់ដល់សុខភាពប្រជាពលរដ្ឋ នឹងអាចប្រឈមចំពោះមុខច្បាប់ថែមទៀត៕
- Share This Post: