រាជធានីភ្នំពេញ៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា នៅព្រឹកថ្ងៃអង្គារ ៨កើត ខែកត្តិក ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី១ ខែវិច្ឆិកា ឆ្នាំ២០២២ នេះ សម្តេចអគ្គមហាសេនាតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញជាអធិបតីក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) ជាង៦ពាន់នាក់។

រាជធានីភ្នំពេញ៖ នៅថ្ងៃទី២៨ ខែតុលា ឆ្នាំ២០២២ បានឱ្យដឹងថា រដ្ឋាភិបាលកម្ពុជា នឹងដំឡើងប្រាក់បៀវត្សជូនមន្ត្រីរាជការ និងកម្លាំងប្រដាប់អាវុធឡើងវិញក្នុងឆ្នាំ២០២៣ នេះបើយោងតាមសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ដែលត្រូវបានកិច្ចប្រជុំពេញអង្គគណៈរដ្ឋមន្ត្រី អនុម័ត ក្រោមអធិបតីភាព សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

ទីភ្នាក់ងារសុខភាពរបស់អង្គការសហប្រជាជាតិ អង្គការសុខភាពពិភពលោក (WHO) បាននិយាយកាលពីថ្ងៃព្រហស្បតិ៍ថា ករណីជំងឺរបេង (Tuberculosis) កំពុងមានការកើនឡើងបន្ទាប់ពីការធ្លាក់ចុះជាច្រើនឆ្នាំ ដោយបានសម្លាប់មនុស្សប្រមាណ ១.៦ លាននាក់ ក្នុងឆ្នាំ២០២១ ហើយវាជាការកើនឡើង ១៤% ក្នុងរយៈពេលពីរឆ្នាំចុងក្រោយនេះ។ យោងតាមតួលេខរបស់អង្គការសុខភាពពិភពលោក ជំងឺរបេងដែលជាឃាតករឆ្លងដ៏ធំបំផុតរបស់ពិភពលោក បានឆក់យកជីវិតមនុស្សប្រមាណ ១.៥ លាននាក់ ក្នុងឆ្នាំ ២០២០ និង ១.៤ លាននាក់ ក្នុងឆ្នាំ២០១៩។ WHO បានបន្ទោសការផ្ទុះឡើងវិញនេះ ទៅលើជំងឺរាតត្បាត COVID-19 ដោយនិយាយថា វិបត្តិនេះបានជះឥទ្ធិពលយ៉ាងធំធេង ចំពោះការទទួលបានការពិនិត្យ និងព្យាបាលជំងឺនេះ។

(ភ្នំពេញ)៖ ក្រោយការដាក់អនុវត្តក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ កាលពីខែឧសភា ឆ្នាំ២០២១ កន្លងទៅ, រាជរដ្ឋាភិបាលបានចាប់ផ្តើមអនុវត្ត គោលនយោបាយគន្លឹះ ក្នុងការផ្តល់ព័ត៌មានពិតឲ្យបានគ្រប់ជ្រុងជ្រោយ និងទូលំទូលាយ ស្តីពីដំណើររបស់កម្ពុជាឆ្ពោះទៅកាន់សេដ្ឋកិច្ចឌីជីថល តាមរយៈវេបផតថល និងមធ្យោបាយផ្សព្វផ្សាយនានា។

យោងតាមការចុះផ្សាយរបស់ ក្រសួងព័ត៌មាន បានឲ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី២៩ ខែតុលា ឆ្នាំ ២០២២ នេះបានអញ្ជើញផ្តល់ស្រូវពូជ និងស្បៀងអាហារជូនប្រជាពលរដ្ឋខេត្តកំពង់ធំចំនួនជិត៧ពាន់គ្រួសារ ដែលពិធីនេះរៀបចំធ្វើឡើងនៅទីលានបាល់ទាត់ខេត្តកំពង់ធំ ។

មជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក បាននិយាយថា អ្នកដែលទទួលបានវ៉ាក់សាំងបង្ការជំងឺអុតស្វា monkeypox យ៉ាងតិចមួយដង គឺទំនងជាកាត់បន្ថយការឆ្លងបាន ១៤ដង។ CDC បានវិភាគករណីបុរសជាង ៥,៤០០ នាក់ ដែលមានអាយុចន្លោះពី ១៨ ទៅ ៤៩ឆ្នាំ ដែលត្រូវបានរាយការណ៍ ពីចុងខែកក្កដា ដល់ដើមខែកញ្ញា។ ខ្លួននិយាយថា ការចាប់ផ្តើមនៃជំងឺ ១៤ថ្ងៃ បន្ទាប់ពីការចាក់វ៉ាក់សាំងមួយដូស មានយ៉ាងហោចណាស់ប្រហែល ១/១៤ ប្រៀបនឹងក្នុងចំណោមអ្នកដែលមិនបានទទួលថ្នាំបង្ការ។ វ៉ាក់សាំងនេះត្រូវបានបង្កើតឡើងដំបូងសម្រាប់ជំងឺអុតធំ ហើយត្រូវបានគេជឿថា មានប្រសិទ្ធភាពសម្រាប់ជំងឺអុតស្វា ប៉ុន្តែ​ប្រសិទ្ធភាព​ប៉ុនណានៅមិនទាន់មានការបញ្ជាក់។

អ្នកនាំពាក្យក្រុមប្រឹក្សាកាត់បន្ថយ និងគ្រប់គ្រងហានិភ័យគ្រោះមហន្តរាយជាតិ គឺលោក Rafaelito Alejandro បាននិយាយនៅថ្ងៃសៅរ៍នេះថា ចំនួនអ្នកស្លាប់ដោយសារព្យុះត្រូពិចដ៏សាហាវ Nalgae ដែលនាំឱ្យមានទឹកជំនន់ និងការបាក់ដីនៅផ្នែកជាច្រើននៃប្រទេសហ្វីលីពីន បានកើនឡើងដល់ ៧២ នាក់ហើយ។

(ភ្នំពេញ)៖ ក្រោយពីទទួលដំណឹង តារាសម្តែងដ៏ល្បី សឿ សុធារ៉ា ជួបទុក្ខធំដោយម្ដាយរបស់អ្នកនាងបានទទួលមរណភាពកាលពីយប់ថ្ងៃទី២៨ ខែតុលា សូម្បីលុយធ្វេីបុណ្យក៏គ្មានគ្រប់គ្រាន់នោះ នៅព្រឹកថ្ងៃទី២៩ ខែតុលា ឆ្នាំ២០២២នេះ ឧកញ៉ា ខែម ប៊ុនថៃ ក៏បានប្រកាសជូនថវិកា២០០០ដុល្លារដល់ អ្នកនាង សឿ សុធារ៉ា សម្រាប់ធ្វើបុណ្យជូនម្ដាយរបស់អ្នកនាង ដែលកំពុងធ្វើឡើងនៅវត្តវិហារក្រាញ់ ផ្លូវជាតិលេខ២។

(ភ្នំពេញ) ៖ យោងតាមការចុះផ្សាយរបស់ក្រសួងព័ត៌មាន បានឱ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គ្រោងនឹងជួបពិភាក្សាជាមួយប្រធានាធិបតី អ៊ុយក្រែន តាមទូរស័ព្ទ នៅថ្ងៃទី០១ ខែវិច្ឆិកា ខណៈដែលកិច្ចពិភាក្សានេះធ្វើឡើងក្នុងបរិបទកម្ពុជាក្នុងឋានៈជាប្រធានអាស៊ាន កំពុងត្រៀមរៀបចំកិច្ចប្រជុំកំពូលអាស៊ាននៅអំឡុងខែវិច្ឆិកាឆ្នាំ២០២២។

យោងតាម ស្ថានទូតសហរដ្ឋអាមេរិកនៅកម្ពុជា បានឱ្យដឹងថា ប្រធានាធិបតីអាមេរិកលោក Joe Biden នឹងធ្វើដំណើរមកទីក្រុងភ្នំពេញ នៃប្រទេសកម្ពុជា នៅថ្ងៃទី១២ និងទី១៣ ខែវិច្ឆិកា ដើម្បីចូលរួមកិច្ចប្រជុំកំពូលប្រចាំឆ្នាំ អាមេរិក អាស៊ាន និងកិច្ចប្រជុំកំពូលអាស៊ីបូព៌ា ។ នេះបើយោងតាមសេចក្តីប្រកាសព័ត៌មានរបស់សេតវិមានចុះថ្ងៃទី២៨ ខែតុលា ឆ្នាំ២០២២។