សិង្ហបុរី៖ ដើម្បីអបអរក្នុងពិធីបុណ្យចូលឆ្នាំប្រពៃណីចិនដែលនឹងឈានចូលមកដល់នៅក្នុងថ្ងៃទី១០ ខែកុម្ភៈខាងមុខនេះ​ ប្រទេសដែលមានពលរដ្ឋកាត់ចិនមួយចំនួនបានត្រៀមរៀបចំកម្មវិធីអបអរផ្សេងៗគ្នាដើម្បីឲ្យពលរដ្ឋខ្លួនទទួលបានបរិយាកាសរីករាយផងនិងដើម្បីទាក់ទាញភ្ញៀវទេសចរផងដែរ។ ជាក់ស្តែងយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃសុក្រ ទី២៦ ខែមករានេះបានឲ្យដឹង អាជ្ញាធរសិង្ហបុរីបានត្រៀមបង្ហាញរូបស្តេចនាគយ៉ាងស្រស់ស្អាតមិនធ្លាប់មាននៅពីមុខអគារ Marina Bay។ ប្រភពខាងលើបានបន្តថា ផ្ទាំងទស្សនីយភាពសេ្តចនាគដ៏កម្រនោះត្រូវបានរៀបចំឡើងដោយការប្រើប្រាស់យន្តហោះគ្មានមនុស្សបើកចំនួន ១,៥០០គ្រឿង បង្ហោះឡើងទៅលើអាកាសក្នុងពេលដំណាលគ្នានិងតម្រៀបគ្នាឲ្យចេញជារូបស្តេចនាគដោយមានពណ៌ស្រស់ស្អាតជាច្រើនចម្រុះគ្នាទៀតផង។ បើតាមអាជ្ញាធរសិង្ហបុរីបានបញ្ជាក់ថា  ផ្ទាំងទស្សនីយភាពសេ្តចនាគនេះនឹងត្រូវដាក់បង្ហាញក្នុងរយៈពេលចំនួន ៦ថ្ងៃ​ គឺនៅក្នុងថ្ងៃទី៦ ទី១០ ទី១១ ទី១៦ ទី១៧ និងថ្ងៃទី១៨​ នៃខែកុម្ភៈ ខណៈពេលវេលាដែលស្តេចនាគបង្ហាញខ្លួននោះគឺនៅម៉ោង ៨យប់ ហើយការបង្ហាញខ្លួនម្តងគឺមានរយៈពេល ១០នាទី៕  អត្ថបទ៖ ភក្តី

សិង្ហបុរី៖ រដ្ឋាភិបាលនៃប្រទេសចិននិងរដ្ឋាភិបាលនៃប្រទេសសិង្ហបុរីបានយល់ព្រមអនុវត្តវិធានការលើកលែងទិដ្ឋការគ្នាទៅវិញទៅមកក្នុងរយៈពេល ៣០ថ្ងៃ ដើម្បីអបអរពិធីបុណ្យចូលឆ្នាំប្រពៃណីចិន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី២៦​ ខែមករា។ តាមគម្រោងគឺវិធានការលើកលែងទិដ្ឋាការខាងលើនេះនឹងផ្តើមអនុវត្តចាប់ពីថ្ងៃទី៩​ ខែកុម្ភៈនេះតទៅ។ គួរបញ្ជាក់ជូនថា តាមរយៈការអនុវត្តវិធានការលើកលែងទិដ្ឋការនេះគឺមានន័យថា ពលរដ្ឋចិនអាចធ្វើដំណើរទៅកាន់ប្រទេសសិង្ហបុរីដោយមិនចាំបាច់ស្នើសុំទិដ្ឋាការជាមុននោះទេនិងអាចស្នាក់ក្នុងប្រទេសសិង្ហបុរីបានដោយស្របច្បាប់ក្នុងរយៈពេល ៣០ថ្ងៃគិតចាប់ពីថ្ងៃបានទៅដល់ប្រទេសសិង្ហបុរី ខណៈការលើកលែងនេះក៏ត្រូវបានអនុវត្តដូចគ្នាចំពោះពលរដ្ឋសិង្ហបុរីក្នុងពេលធ្វើដំណើរទៅកាន់ប្រទេសចិន។ សូមបញ្ជាក់ជូនថា យោងតាមកិច្ចព្រមព្រៀងក្នុងពេលបច្ចុប្បន្ននេះគឺប្រទេសចិននិងប្រទសសិង្ហបុរីបានអនុវត្តវិធានការលើកលែងទិដ្ឋការរវាងគ្នាដែលមានរយៈពេលត្រឹមតែ ១៥ថ្ងៃប៉ុណ្ណោះ៕ អត្ថបទ៖ ភក្តី ប្រភព៖ The Strait Time

ម៉ាឡេស៊ី៖ យ៉ាង​ហោចណាស់មានបុរសជនជាតិម៉ាឡេស៊ីម្នាក់បានស្លាប់បាត់បង់ជីវិតនៅក្នុងហេតុការណ៍បាក់ដីដ៏ឆាប់រហ័សមួយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី២៦ ខែមករានេះ។ ហេតុការណ៍អកុសលនេះបានកើតឡើងនៅក្នុងតំបន់ Cameron Highlands នៃរដ្ឋ Pahang ភាគខាងលិចនៃប្រទេសម៉ាឡេស៊ី។ បើតាមលោក Ismail Abdul Ghani ជំនួយការប្រធាននាយកដ្ឋានពន្លត់អគ្គីភ័យ និងសង្គ្រោះបន្ទាន់ប្រចាំរដ្ឋ Pahang បានឲ្យដឹងថា ហេតុការណ៍បាក់ដីបានកើតឡើងនៅម៉ោង ២ និង ៥១នាទីព្រឹកមិញនេះ ពោលគឺជាម៉ោងដែលគេកំពុងតែគេងលក់យ៉ាងស្កប់ស្កល់តែម្តង។ ប្រភពខាងលើបានបន្តថា ក្រៅតែពីបានរកឃើញអ្នកស្លាប់ហើយ​គឺគិតត្រឹមពេលនេះនៅមានមនុស្សចំនួន ៤នាក់ផ្សេងទៀតកំពុងតែបាត់ខ្លួន​ ខណៈអាជ្ញាធរម៉ាឡេស៊ីបានសន្និដ្ឋានថា ពលរដ្ឋទាំង ៤នាក់នោះទំនងជាបានកប់នៅក្នុងដីទាំងរស់ ហើយគេក៏មិនរំពឹងថាពួកគេអាចនៅមានជីវិតរស់ដែរ៕ អត្ថបទ៖ ភក្តី

កូរ៉េខាងត្បូង៖ ថ្មីៗនេះនៅលើបណ្តាញសង្គមក្នុងប្រទេសកូរ៉េខាងត្បូងបានផ្ទុះការចាប់អារម្មណ៍យ៉ាងខ្លាំងចំពោះវីដេអូមួយដែលបង្ហាញថា គេអាចយកឈើចាក់ធ្មេញមួយប្រភេទទៅចម្អិនញ៉ាំបាន។ វីដេអូខ្លីដែលត្រូវបានបង្ហោះដំបូងនៅលើបណ្តាញសង្គម​ YouTube មួយនេះទទួលបានការចូលទស្សនារាប់លានដង​ក្នុងរយៈពេលដ៏ខ្លី ខណៈក្រោយបានទស្សនាវីដេអូនេះហើយមានអ្នកប្រើប្រាស់បណ្តាសង្គមជាច្រើនបានសាកល្បងយកឈឺចាក់ធ្មេញនោះទៅចម្អិនដើម្បីទទួលទានដែរ។ ជាការឆ្លើយតបទៅនឹងនិន្នាការថ្មីមួយនេះ អាជ្ញាធរសុខាភិបាលកូរ៉េខាងត្បូងបានចេញមកព្រមានកុំឲ្យពលរដ្ឋខ្លួនព្យាយាមសាកល្បងទទួលទានឈើចាក់ធ្មេញទាំងនោះទៀត នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃព្រហស្បតិ៍ ទី២៥​​ ខែមករានេះ។ បើតាមក្រសួងសុវត្ថិភាពចំណីអាហារនិងឱសថកូរ៉េខាងត្បូងបានបញ្ជាក់ថា ឈើចាក់ធ្មេញដែលកំពុងទទួលបានការចាប់អារម្មណ៍ខ្លាំងលើបណ្តាញសង្គមនោះគឺជាប្រភេទឈើចាក់ធ្មេញដែលគេធ្វើឡើងពីម្សៅពោត មានពណ៌ខៀវ ហើយវាពិតណាស់ថាគេអាចយកម្សៅពោតទៅបំពងសម្រាប់ទទួលទានបាន។ យ៉ាងណាក្តី ក្រោយពេលកែច្នៃឲ្យក្លាយជាឈើចាក់ធ្មេញរួចពុំមានស្ថាប័នជំនាញណាមួយបញ្ជាក់ថា គេអាចយកម្សៅពោតដែលកែច្នៃរួចទាំងនោះទៅទទួលទានបានឡើងវិញនោះទេ ហើយផលប៉ះពាល់យ៉ាងណានោះក៏ពុំមានការសិក្សាបញ្ជាក់ដែរ។ អ្នកជំនាញកូរ៉េខាងត្បូងបានពន្យល់ថា ឈើចាក់ធ្មេញដែលធ្វើពីម្សៅពោតត្រូវបានស្ថាប័នជំនាញទទួលស្គាល់ត្រឹមថា​ វាមានអនាម័យគ្រប់គ្រាន់សម្រាប់យកទៅចាក់ធ្មេញ ដូចគ្នាទៅនឹងការទទួលស្គាល់និងអនុញ្ញាតឲ្យប្រើប្រាស់ថង់ប្លាស្ទិក ទុយោបឺត កែវ ឬពែងជាដើម តែសម្ភារៈទាំងនេះមិនត្រូវបានគេទទួលស្គាល់ឬណែនាំឲ្យយកទៅទទួលទានឡើយ។ ដូចនេះដើម្បីរក្សាសុខភាពនិងការពារហានិភ័យផ្សេងៗសូមកុំសាកល្បងទទួលអាហារដែលគ្មានការទទួលស្គាល់ស្តង់ដារសុវត្ថិភាពពីស្ថាប័នជំនាញ៕ អត្ថបទ៖

ការសិក្សាមួយបានបង្ហាញថា ប្រទេសកូរ៉េខាងជើងកំពុងអភិវឌ្ឍបញ្ញាសិប្បនិម្មិត (Artificial Intelligence) និងការរៀនអំពីម៉ាស៊ីន (Machine Learning) យ៉ាងខ្លាំង ពោលគឺស្ថិតនៅក្នុងកម្រិតគួរឲ្យព្រួយបារម្ភមួយ។ បើយោងតាមការចុះផ្សាយរបស់បណ្តាញសារព័ត៌មាន The Strait Time បានបញ្ជាក់ថា ការសិក្សាមួយនេះត្រូវបានធ្វើឡើងដោយមជ្ឈមណ្ឌល James Martin សម្រាប់ការសិក្សាអំពីការមិនរីកសាយភាយអាវុធ ដែលមានមូលដ្ឋាននៅក្នុងរដ្ឋកាលីហ្វ័រញ៉ា​ សហរដ្ឋអាមេរិក។ នៅក្នុងការសិក្សាបានបង្ហាញថា ប្រទេសកូរ៉េខាងជើងកំពុងតែអភិវឌ្ឍបញ្ញាសិប្បនិម្មិតនិងការរៀនអំពីម៉ាស៊ីនលើវិស័យសំខាន់ជាច្រើនរាប់ចាប់តាំងពីរបៀបឆ្លើយតបទៅនឹងជំងឺកូវីដ-១៩ ការការពារម៉ាស៊ីនរ៉េអាក់ទ័រនុយក្លេអ៊ែរ ការក្លែងធ្វើហ្គេមសង្គ្រាម និងរហូតដល់ការឃ្លាំមើលរបស់រដ្ឋាភិបាលទៀតផង។ បើតាមខ្លឹមសារនៅក្នុងការសិក្សាដែលត្រូវបានសរសេរឡើងដោយអ្នកនិពន្ធឈ្មោះ Kim Hyuk ក៏បានបញ្ជាក់ផងដែរថា នាពេលបច្ចុប្បន្ននេះក្រុមអ្នកស្រាវជ្រាវអំពីផ្នែកបញ្ញាសិប្បនិម្មិតកូរ៉េខាងជើងកំពុងតែធ្វើការយ៉ាងសកម្មជាមួយក្រុមអ្នកស្រាវជ្រាវអន្តរជាតិជាច្រើនរូបហើយនៅក្នុងនោះក៏មានក្រុមអ្នកស្រាវជ្រាវជនជាតិចិនផងដែរ។ គួរកត់សម្គាល់ថា ប្រសិនបើកូរ៉េខាងជើងមានសមត្ថភាពអាចប្រើប្រាស់បញ្ញាសិប្បនិម្មិតដើម្បីគ្រប់គ្រងលើការងារគ្រប់បែបយ៉ាងដូចដែរការសិក្សាបានរកឃើញមែននោះ គឺវាច្បាស់ណាស់ថាកូរ៉េខាងជើងអាចអុកឡុកពិភពលោកទាំងមូលបានយ៉ាងងាយ៕ អត្ថបទ៖ ភក្តី

ចិន៖ យ៉ាងហោចណាស់មានពលរដ្ឋចិនចំនួន ៣៩នាក់បានស្លាប់បាត់បង់ជីវិតនៅក្នុងហេតុការណ៍ភ្លើងឆេះហាងលក់ទំនិញមួយកន្លែង នេះបើយោងតាមការចុះផ្សាយរបស់បណ្តាញសារព័ត៌មាន The Strait Time។ ហេតុការណ៍អកុសលនេះបានកើតឡើងនៅម៉ោង ៣ និង ២៤នាទីរសៀលក្នុងថ្ងៃទី២៤ ខែមករានេះ ខណៈទីតាំងកើតហេតុគឺស្ថិតនៅក្នុងក្រុង Xinyu ខេត្ត Jiangxi ប៉ែកខាងជើងប្រទេសចិន។ ប្រភពខាងលើបានបន្តថា ក្រៅតែពីបានរកឃើញអ្នកស្លាប់ភ្លាមៗនៅនឹងកន្លែងកើតហេតុហើយ នៅមានជនរងគ្រោះចំនួន ៩នាក់ផ្សេងបានរងរបួសធ្ងន់ធ្ងរនិងត្រូវបញ្ជូនទៅព្យាបាលនៅមន្ទីរពេទ្យជាបន្ទាន់ផងដែរ។ រហូតមកទល់នឹងពេលនេះគេនៅមិនទាន់បានដឹងពីមូលហេតុពិតប្រាកដដែលបង្កឲ្យមានភ្លើងឆាបឆេះនៅឡើយទេ ខណៈអាជ្ញាធរចិនកំពុងបើកការស៊ើបអង្កេតដើម្បីស្វែងរកអ្នកទទួលលខុសត្រូវចំពោះករណីនេះ៕ អត្ថបទ៖ ភក្តី ប្រភព៖ The Strait Time

វៀតណាម​៖ តុលាការវៀតណាមនៅដើមសប្តាហ៍នេះបានសម្រេចកាត់ទោសប្រហារជីវិតមនុស្សចំនួន ៩នាក់ជុំវិញករណីរត់ពន្ធគ្រឿងញៀនចំនួន ១០៥គីឡូក្រាម នេះបើយោងតាមសេចក្តីរាយការណ៍របស់បណ្តាញសារព័ត៌មាន បាងកកប៉ុស្តិ៍។ គ្រឿងញៀនដែលក្រុមជនល្មើសបានធ្វើការរត់ពន្ធនោះគឺមានចំនួន ២ប្រភេទ រួមមាន គ្រឿងញៀនប្រភេទមេតំហ្វេតាមីន និងប្រភេទហេរ៉ូអ៊ីន។ បើតាមតុលាការវៀតណាមបានរកឃើញថា ក្រុមជនល្មើសបានរត់ពន្ធគ្រឿងញៀនទាំងអស់នេះមកពីប្រទេសឡាវ ដើម្បីយកទៅចែកចាយបន្តឲ្យឈ្មួញនៅក្នុងប្រទេសវៀតណាម ខណៈសកម្មភាពបទល្មើសបានកើតឡើងនៅក្នុងអំឡុងឆ្នាំ២០២១ ដល់ឆ្នាំ២០២២ មុនពេលប៉ូលិសជំនាញវៀតណាមអាចបំបែកសំណុំរឿងមួយនេះបាន។ សូមបញ្ជាក់ជូនថា វៀតណាមគឺជាប្រទេសដែលបានអនុវត្តច្បាប់ប្រឆាំងគ្រឿងញៀនយ៉ាងតឹងរឹងបំផុតមួយក្នុងចំណោមប្រទេសមួយចំនួននៅលើពិភពលោក ហើយការរត់ពន្ធគ្រឿងដែលមានទម្ងន់លើស ១០០គីឡូក្រាមខាងលើនេះត្រូវបានអាជ្ញាធរវៀតណាមចាត់ទុកជាករណីរត់ពន្ធគ្រឿងញៀនក្នុងទ្រង់ទ្រាយដ៏ធំមួយ៕ អត្ថបទ៖ ភក្តី ប្រភព៖ បាងកកប៉ុស្តិ៍

អាមេរិក៖ តម្លៃភាគហ៊ុនរបស់ក្រុមហ៊ុន Alibaba នៅក្នុងទីផ្សារអាមេរិកបានកើនឡើងចំនួន ៨,៦% នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី២៤ ខែមករានេះ។ ការកើននៃតម្លៃភាគហ៊ុនរបស់ក្រុមហ៊ុនខ្នាតយក្សមួយនេះគឺដោយសារតែលោក Jack Ma អតីតនាយកប្រតិបត្តិរបស់ក្រុមហ៊ុន Alibaba និងលោក Joe Tsai ដែលជានាយកប្រតិបត្តិក្រុមហ៊ុន Alibaba នាពេលបច្ចុប្បន្នបានរួមគ្នាទិញភាគហ៊ុនរបស់ក្រុមហ៊ុនដែលមានតម្លៃសរុបចំនួន ២០២លានដុល្លារ។ គួរបញ្ជាក់ជូនថា តម្លៃហ៊ុនរបស់ក្រុមហ៊ុន Alibaba បានធ្លាក់ចុះយ៉ាងគំហុកនៅក្នុងរយៈពេល ១២ខែចុងក្រោយនេះ ពោលគឺធ្លាក់ចុះរហូតដល់ ៤៣% ខណៈក្រុមហ៊ុនដែលមានមូលដ្ឋាននៅក្នុងប្រទេសចិនមួយនេះត្រូវបានគេប៉ាន់ប្រមាណថាមានតម្លៃរហូតដល់ ១៧៥ពាន់លានដុល្លារឯណោះ។ គួររម្លឹកជូនថា ភាពរង្គោះរង្គើរបស់ក្រុមហ៊ុនលក់ទំនិញ Online

អាមេរិក៖ ក្រុមហ៊ុន eBay Inc នឹងកាត់បន្ថយការងារចំនួន ១,០០០កន្លែង នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃពុធ ទី២៤ ខែមករានេះ។ កម្លាំងការងារចំនួន ១,០០០កន្លែងនេះគឺស្មើនឹងកម្លាំងការងារប្រមាណជា ៩%នៃកម្លាំងការងារសរុបរបស់ក្រុមហ៊ុននៅទូទាំងពិភពលោក។ បើតាមលោក Jamie Iannone ដែលជានាយកប្រតិបត្តិក្រុមហ៊ុន eBay Inc បានបញ្ជាក់ថា ការកាត់កន្ថយចំនួនការងារនេះគឺត្រូវបានធ្វើឡើងតាមស្ថានភាពជាក់ស្តែងរបស់ក្រុមហ៊ុននាពេលបច្ចុប្បន្ន ពោលគឺក្រុមហ៊ុនមានតម្រូវការប្រើប្រាស់បុគ្គលិកតិចជាងមុនដ្បិតសកម្មភាពអាជីវកម្មរបស់ក្រុមហ៊ុនបានធ្លាក់ចុះជាងមុនផងដែរ។ គួរបញ្ជាក់ជូនថា eBay គឺជាទីផ្សារ Online ដ៏ធំមួយនៅលើពិភពលោក ដែលត្រូវបានបង្កើតឡើងនៅក្នុងឆ្នាំ១៩៩៥ មានមូលដ្ឋាននៅសហរដ្ឋអាមេរិក ហើយកាលពីខែកុម្ភៈឆ្នាំមុនក្រុមហ៊ុនខ្នាតយក្សមួយនេះក៏បានកាត់បន្ថយបុគ្គលិកចំនួន ៥០០រួចម្តងហើយដែរ៕ អត្ថបទ៖ ភក្តី

កូរ៉េខាងជើង៖ ប្រទេសកូរ៉េខាងជើងបានបាញ់មីស៊ីលកម្ទេចនាវាជាច្រើនគ្រាប់ទៅកាន់សមុទ្រលឿង នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃពុធ ទី២៤ ខែមករានេះ។ បើតាមកងយោធាកូរ៉េខាងត្បូងដែលជាអ្នកឃ្លាំមើលការបាញ់មីស៊ីលខាងលើនេះបានបញ្ជាក់ថា មីស៊ីលត្រូវបានបាញ់ជាបន្តបន្ទាប់នៅម៉ោង ៧ព្រឹកមិញនេះ ខណៈមីស៊ីលទាំងអស់ត្រូវបានបាញ់ចេញពីនាវាចម្បាំងទំនើបៗជាច្រើនគ្រឿង។ យ៉ាងណាក្តី គេមិនបានស្គាល់ច្បាស់អំពីប្រភេទនិងស៊េរីរបស់មីស៊ីលទាំងនោះទេ​ តែគេអាចកត់សម្គាល់បានថា មីស៊ីលទាំងនោះមានកម្លាំងផ្ទុះយ៉ាងខ្លាំងមិនចាញ់មីស៊ីលប្រភេទប៉ាលីស្ទិកសម្រាប់បាញ់ឆ្លងទ្វីបឡើយ។ គួរកត់សម្គាល់ថា ការបាញ់មីស៊ីលពីសំណាក់កូរ៉េខាងជើងនៅពេលនេះអាចជាសញ្ញាបង្ហាញថា ភាពតានតឹងរវាងកូរ៉េខាងជើងនិងកូរ៉េខាងត្បូងកំពុងកើនឡើងជាថ្មី​ ដ្បិតកាលពីពេលថ្មីៗនេះកូរ៉េខាងត្បូងបានសម្រេចធ្វើសមុទ្រយោធារួមគ្នាជាមួយក្រុមយោធារបស់ប្រទេសចំនួន ២ផ្សេងទៀតគឺប្រទេសជប៉ុន និងសហរដ្ឋអាមេរិក៕ អត្ថបទ៖ ភក្តី ប្រភព៖ Channel News Asia