អាមេរិក៖ ក្រុមហ៊ុនបច្ចេកវិទ្យាហិរញ្ញវត្ថុដ៏ធំរបស់អាមេរិក PayPal បានប្រកាសកាត់បន្ថយការងារចំនួន ២,៥០០កន្លែង នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃពុធ ទី៣១ ខែមករានេះ។ ការកាត់បន្ថយការងារចំនួន ២,៥០០កន្លែងនេះនឹងធ្វើឲ្យប៉ះពាល់ដល់កម្លាំងពលកម្មប្រមាណជា ៩%នៃកម្លាំងពលកម្មសរុបរបស់ក្រុមហ៊ុននៅជុំវិញពិភពលោក។ បើតាមលោក Alex Chriss នាយក​ប្រតិបត្តិរបស់ក្រុមហ៊ុន PayPal បានបញ្ជាក់ថា ការសម្រេចកាត់បន្ថយបុគ្គលិកដ៏ច្រើននេះគឺត្រូវបានធ្វើឡើងដោយផ្អែកលើតម្រូវការជាក់ស្តែងរបស់ក្រុមហ៊ុន ពោលគឺក្រុមហ៊ុនត្រូវការប្រើប្រាស់បុគ្គលិកតិចជាងមុន។ គួរបញ្ជាក់ជូនថា PayPal ជាក្រុមហ៊ុនពហុជាតិដ៏មានសក្តានុពលមួយមានមូលដ្ឋាននៅក្នុងរដ្ឋកាលីហ្វ័រញ៉ា សហរដ្ឋអាមេរិក​ ខណៈនៅក្នុងរយៈពេល ១២ខែចុងក្រោយនេះ ភាគហ៊ុនរបស់ក្រុមហ៊ុន PayPal បានធ្លាក់ចុះអស់ចំនួន ២០%។ សូមបញ្ជាក់ជូនថា គិតចាប់តាំងពីឆ្នាំមុនមកមានបុគ្គលិកនៅក្នុងវិស័យបច្ចេកវិទ្យាហិរញ្ញវត្ថុនៅអាមេរិកប្រមាណជា ២៦០,០០០នាក់ហើយដែលបានបាត់បង់ការងារ៕ អត្ថបទ៖ ភក្តី ប្រភព៖ BBC

អាមេរិក៖ តុលាការអាមេរិកបានសម្រេចលុបចោលកិច្ចព្រមព្រៀងដែលក្រុមហ៊ុន Tesla ត្រូវផ្តល់ប្រាក់រង្វាន់ឲ្យទៅលោក Elon Musk ចំនួន ៥៦ពាន់លានដុល្លារ នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃពុធ ទី៣១ ខែមករានេះ។ គួររម្លឹកជូនថា កិច្ចព្រមព្រៀងខាងលើនេះត្រូវបានធ្វើឡើងកាលពីឆ្នាំ២០១៨កន្លងទៅ ក្រោយមានការប្រជុំនិងពិភាក្សាយ៉ាងល្អិតល្អន់ពីសំណាក់ក្រុមប្រឹក្សាភិបាលរបស់ក្រុមហ៊ុន Tesla ។ យ៉ាងណាក្តី មានម្ចាស់ភាគហ៊ុនរបស់ក្រុមហ៊ុន Tesla ជាច្រើននាក់មិនសប្បាយចិត្តជាមួយនឹងកិច្ចព្រមព្រៀងខាងលើនេះទេ​ ហើយពួកគេបាននាំគ្នាដាក់ពាក្យបណ្តឹងទៅកាន់តុលាការរដ្ឋ Delaware ដើម្បីស្វែងរកការជួយអន្តរាគមន៍។ ក្រោយបើកការស៊ើបអង្កេតយ៉ាងស៊ីជម្រៅជុំវិញករណីដ៏រសើបមួយនេះ តុលាការសហព័ន្ធអាមេរិកក៏បានបង្គាប់ឲ្យលុបចោលកិច្ចព្រមព្រៀងផ្តល់ប្រាក់នេះចោលវិញ ដោយលោកចៅក្រម Kathaleen McCormick បានបញ្ជាក់ថា កិច្ចព្រមព្រៀងខាងលើនេះត្រូវបានធ្វើឡើងដោយមានលក្ខណៈមិនសមស្របទៅតាមច្បាប់ពាណិជ្ជកម្មនោះទេ។ ដូចនេះមានន័យថា លោកមហាសេដ្ឋី Elon Musk និងត្រូវបាត់បង់ប្រាក់អស់ចំនួន ៥៦ពាន់លានដុល្លារ​ ហើយតំណែងជាមហាសេដ្ឋីលំដាប់កំពូលលើពិភពលោករបស់គាត់ក៏ត្រូវធ្លាក់ចុះផងដែរ៕ ប្រភព៖ BBC  

ចិន៖​ ការផិតក្បត់នៅក្នុងទំនាក់ទំនងស្នេហារមែងកើតមានជារឿយៗមិនថានៅក្នុងប្រទេសណាឬប្រទេសណានោះទេ ហើយសកម្មភាពនៃការផិតក្បត់នេះទៀតសោធក៏មិនមែនបង្កឡើងដោយភាគីខាងមនុស្សប្រុសតែម្ខាងដែរ ពោលគឺពេលខ្លះភាគីខាងស្រីក៏ជាអ្នកលួចមានទំនាក់ទំនងស្នេហាជាមួយនិងជនទី៣ផងដែរ។ ចំពោះភាគីរងគ្រោះពីស្នេហាផិតក្បត់វិញពេលខ្លះក៏បានត្រឹមតែនៅស្ងៀមហួសចិត្តរកអ្វីនិយាយមិនចេញ ខណៈអ្នកខ្លះវិញបានរកវិធីសងសឹកតាមរូបភាពផ្សេងៗឲ្យសមតាមការខកចិត្តរបស់ពួកគេ។ ជាក់ស្តែងបើយោងតាមការចុះផ្សាយរបស់បណ្តាញាសារព័ត៌មាន World of Buzz នៅក្នុងថ្ងៃអង្គារ ទី៣០ ខែមករានេះបានឲ្យដឹងថា មានបុរសជាកូនកំលោះម្នាក់បានយកវីដេអូដែលបង្ហាញថា ស្រ្តីជាកូនក្រមុំរបស់គាត់កំពុងអោបថើបជាមួយបុរសម្នាក់ទៀតទៅចាក់ផ្សាយជាសាធារណៈនៅក្នុងថ្ងៃរៀបការផ្ទាល់របស់ពួកគាត់ដើម្បីបើកបង្ហាញឲ្យភ្ញៀវកិត្តិយស សាច់ញាតិ និងឪពុកម្តាយទាំងសងខាងបានដឹងច្បាស់អំពីរឿងអាស្រូវមួយនេះ។ គោលបំណងដែលបុរសជាកូនកំលោះធ្វើដូចនេះគឺគាត់ចង់ឲ្យស្រ្តីជាកូនក្រមុំបានរងនូវភាពអាម៉ាស់ចំពោះសកម្មភាពផិតក្បត់របស់នាង។ សូមបញ្ជាក់ថា រឿងរ៉ាវខាងលើនេះបានកើតឡើងនៅក្នុងប្រទេសចិន ហើយគេមិនបានដឹងពីអត្តសញ្ញាណពិតប្រាកដរបស់កូនកំលោះនិងកូនក្រមុំឡើយ ខណៈរឿងចម្រូងចម្រាសនេះកំពុងផ្ទុះការចាប់អារម្មណ៍យ៉ាងខ្លាំងនៅលើបណ្តាញសង្គមចិន៕ អត្ថបទ៖ ភក្តី ប្រភព៖ World of Buzz

ថៃ៖ បុរសជនជាតិស្វីសម្នាក់បានបង្ខំចិត្តកាត់ដៃខ្លួនឯងចោលមួយកំណាត់ដើម្បីគេចចេញពីការវាយប្រហាររបស់សត្វខ្លាឃ្មុំមួយក្បាល​នៅប្រទេសថៃ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃអង្គារ​ ទី៣០ ខែមករានេះ។ បុរសជាជនរងគ្រោះមានឈ្មោះថា Stefan Specogna មានអាយុ ៣២ឆ្នាំ និងជាអ្នកធ្វើការស្ម័គ្រចិត្តឲ្យមូលនិធិការពារសត្វព្រៃមួយ​ ដែលមានមូលដ្ឋាននៅក្នុងខេត្តឈៀងមៃ ប៉ែកខាងជើងប្រទេសថៃ។ ប្រភពខាងលើបានបន្តថា នៅក្នុងថ្ងៃកើតហេតុនោះលោក Stefan Specogna បានទៅដាក់ចំណីឲ្យសត្វខ្លាឃ្មុំដែលកំពុងជាប់នៅក្នុងទ្រុងតាមធម្មតា តែជាអកុសលពេលគាត់លូកដៃចូលទៅដល់ក្នុងទ្រុងស្រាប់តែសត្វខ្លាឃ្មុំនោះបានខាំដៃរបស់គាត់ជាប់និងព្យាយាមទាញដៃនោះយ៉ាងខ្លាំងចូលទៅក្នុងទ្រុង។ ក្នុងកាលៈទេសៈបែបនេះ លោក Stefan Specogna ក៏បានបង្ខំចិត្តកាត់ដៃរបស់គាត់មួយកំណាត់ក្រោមកែងដៃចុះមកចោលតែម្តង ដ្បិតរូបគាត់គិតថាបើសត្វខ្លាឃ្មុំអាចទាញយកទាំងខ្លួនគាត់ចូលទៅក្នុងទ្រុងនោះគឺគាត់អាចនឹងត្រូវស្លាប់បាត់បង់ជីវិតតែម្តង៕ អត្ថបទ៖ ភក្តី ប្រភព៖ The Strait Time

ហុងកុង៖ វិបត្តិសេដ្ឋកិច្ចសកលនៅតែបន្តជះឥទ្ធិពលអាក្រក់ចំពោះប្រទេសជាច្រើននៅជុំវិញពិភពលោក ខណៈប្រទេសនីមួយៗអាចទទួលរងផលប៉ះពាល់ក្នុងផ្នែកផ្សេងៗគ្នា។ សម្រាប់ប្រទេសចិននិងក្រុងហុងកុងត្រូវបានគេមើលឃើញថា កំពុងប្រឈមជាមួយបញ្ហាអចលនទ្រព្យយ៉ាងខ្លាំងរហូតដល់តុលាការក្រុងហុងកុងបានបង្គាប់ឲ្យក្រុមហ៊ុនអភិវឌ្ឍន៍អចលនព្រទ្យធំបំផុតជាងគេនៅក្នុងប្រទេសចិនត្រូវចូលមកដោះស្រាយបំណុលជាបន្ទាន់ទៀតផង នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia។ ក្រុមហ៊ុនអចលនព្រទ្យធំបំផុតនៅប្រទេសចិននិងកំពុងប្រឈមជាមួយបញ្ហាបំណុលយ៉ាងច្រើនមួយនេះមានឈ្មោះថា China Evergrande Group ខណៈបំណុលសរុបដែលក្រុមហ៊ុនកំពុងជាប់ជំពាក់នោះគឺមានចំនួនជាង ៣០០ពាន់លានដុល្លារ។ ភា្លមៗក្រោយមានចំណាត់ការពីខាងតុលាការ លោក Siu Shawn ដែលជានាយកប្រតិបត្តិរបស់ក្រុមហ៊ុន China Evergrande Group បានចេញមកធ្វើការបញ្ជាក់ថា ខាងក្រុមហ៊ុននឹងចូលទៅដោះស្រាយរាល់បញ្ហាដែលកើតមានទាំងអស់ទៅតាមដំណាក់កាលនិងលទ្ធភាពដែលអាចធ្វើទៅបាន។ ដោយឡែកគម្រោងសាងសង់ផ្ទះមួយចំនួនវិញនឹងនៅតែបន្តធ្វើឡើងដដែល តែរយៈពេលនៃការបញ្ចប់អាចនឹងយឺតជាងការចុះកិច្ចសន្យា ហើយគម្រោងមួយចំនួននឹងត្រូវផ្អាកជាបណ្តោះអាសន្នរហូតដល់ក្រុមហ៊ុនមានលទ្ធភាពទើបអាចបើកការសាងសង់ឡើងវិញ៕ អត្ថបទ៖ ភក្តី ប្រភព៖ Channel News Asia  

អង់គ្លេស៖ រដ្ឋាភិបាលនៃប្រទេសអង់គ្លេសគ្រោងនឹងអនុវត្តច្បាប់រឹតបន្តឹងការលក់បារីអេឡិចត្រូនិចនៅតាមទីសាធារណៈដើម្បីការពារសុខភាពពលរដ្ឋវ័យក្មេង នេះបើយោងតាមការចុះផ្សាយរបស់បណ្តាញសារព័ត៌មាន​ The Strait Time នៅក្នុងថ្ងៃចន្ទ ទី២៩ ខែមករានេះ។ តាមគម្រោងគឺច្បាប់ថ្មីនោះនឹងគ្រប់គ្រងលើការលក់បារីអេឡិចត្រូនិចក្នុងរូបភាពដូចជា រឹតប​ន្តឹងលើក្លិនរបស់បារីអេឡិចត្រូនិច ការវេចខ្ចប់ឬរូបរាងខាងក្រៅរបស់បារីអេឡិចត្រូនិចនិងរបៀបនៃការជក់ ពោលគឺធ្វើយ៉ាងណាឲ្យបារីអេឡិចត្រូនិចក្លាយជាផលិតផលដែលគ្មានភាពទាក់ទាញសម្រាប់យុវជនវ័យក្មេង។ ជាងនេះទៅទៀតសម្រាប់ការដាក់លក់បារីអេឡិចត្រូនិចនៅតាមហាងវិញក៏ត្រូវមានការរឹតបន្តឹងដូចគ្នាផងដែរ ដោយម្ចាស់ហាងត្រូវដាក់លក់ដាច់ដោយឡែកពីកន្លែងដាក់តាំងផលិតផលប្រើប្រាស់ទូទៅសម្រាប់យុវជនវ័យក្មេង ហើយបើហាងណាហ៊ានដាក់តាំងបារីអេឡិចត្រូនិចដោយបើកចំហឬដាក់លក់អមជាមួយសម្ភារៈប្រើប្រាស់ទូទៅនោះនឹងត្រូវរងនូវការពិន័យជាប្រាក់ចំនួន ២,៥០០ផោន (៣,១៧៨ដុល្លារ)។ គួរបញ្ជាក់ជូនថា នៅក្នុងការសិក្សាមួយបានបង្ហាញថា អ្នកស្លាប់ដោយជំងឺមហារីកនៅក្នុងប្រទេសអង់គ្លេសម្នាក់ក្នុងចំណោម៤នាក់គឺបានបង្កឡើងដោយសារការជក់បារី ខណៈបើគិតជាតួលេខជាក់ស្តែងគឺមានអ្នកស្លាប់ប្រមាណជា ៨០,០០០នាក់ក្នុងមួយឆ្នាំ៕ អត្ថបទ៖ ភក្តី ប្រភព៖ The Strait Time

សិង្ហបុរី៖ ការរៀបការនិងបង្កើតគ្រួសារតូចមួយអាចជាក្តីបំណងរបស់ក្រុមយុវជនជាច្រើន តែក្តីស្រមៃមួយនេះមិនមែនជាបំណងប្រាថ្នាដ៏ចាំបាច់របស់យុវជនវ័យក្មេងនៅក្នុងប្រទេសសិង្ហបុរីនោះទេ។ ជាក់ស្តែងយោងតាមការសិក្សាមួយបានរកឃើញថា មានយុវជនសិង្ហបុរីជាង ៧០%បានគិតថា ការរៀបការមិនមែនជារឿងចាំបាច់ក្នុងជីវិតរបស់ពួកគេនោះទេ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃចន្ទ ទី២៩ ខែមករានេះ។ នៅក្នុងការសិក្សាខាងលើនេះគេបានធ្វើការស្ទង់មតិក្នុងចំណោមពលរដ្ឋសិង្ហបុរីចំនួន ២,៣៥៦នាក់ ដោយបែងចែកជា ៣ក្រុម​​ គឺក្រុមពលរដ្ឋដែលមានអាយុចន្លោះពី ២១ដល់៣៤ឆ្នាំ ក្រុមមនុស្សមានអាយុចន្លោះពី៣៥ដល់៤៩ឆ្នាំ និងក្រុមមនុស្សដែលមានអាយុចន្លោះពី៥០ទៅ៦៤ឆ្នាំ។ លទ្ធផលនៃការសិក្សា​បានបង្ហាញថា ក្រុមពលរដ្ឋវ័យក្មេងចំ​នួន ៧២% យល់ឃើញថាការរៀបការគឺមិនចាំបាច់ក្នុងជីវិតរបស់ពួកគេ ខណៈពលរដ្ឋវ័យកណ្តាលចំនួន ៦៣% និងពលរដ្ឋវ័យចំណាស់ចំនួន ៥០%ក៏បានយល់ស្របជាមួយនឹងគំនិតខាងលើនេះដែរ។ ក្នុងការសិក្សាក៏បានបង្ហាញផងដែរថា មូលហេតុដែលធ្វើឲ្យក្រុមពលរដ្ឋពលវ័យក្មេងសិង្ហបុរីគិតថាការរៀបការមិនសំខាន់នោះគឺដោយសារបញ្ហាសំខាន់ៗមួយចំនួនរួមមាន៖ -ចង់ផ្តោតលើការអភិវឌ្ឍន៍ការងារឲ្យបានល្អប្រសើរ -ចង់បង្កើតជីវិតឲ្យមានភាពឯករាជ្យមួយ

អាមេរិក៖ តុលាការអាមេរិកបានបង្គាប់ឲ្យក្រុមហ៊ុន Bayer បង់ប្រាក់ឲ្យបុរសម្នាក់ចំនួន ២,២៥ពាន់លានដុល្លារជាសំណងដែលបុរសរូបនេះបានកើតមានជំងឺមហារីកក្រោយបានប្រើប្រាស់ផលិតផលថ្នាំបាញ់ស្មៅរបស់ក្រុមហ៊ុនដ៏ធំមួយនេះ។ យោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃចន្ទ ទី២៩ ខែមករានេះបានបញ្ជាក់ថា បុរសជាជនរងគ្រោះមានឈ្មោះថា John McKivision ជាពលរដ្ឋរស់នៅក្នុងរដ្ឋ Pennsylvania សហរដ្ឋអាមេរិក។ ប្រភពខាងលើបានបន្តថា ផលិតផលថ្នាំបាញ់ខ្មៅរបស់ក្រុមហ៊ុន Bayer ដែលជាដើមហេតុបង្កឲ្យលោក John McKivision មានជំងឺមហារីកនោះគឺថ្នាំបាញ់ស្មៅម៉ាក Roundup ខណៈបុរសជាជនរងគ្រោះតែង​ប្រើប្រាស់ផលិតផលម៉ាកនេះសម្រាប់បាញ់កម្ចាត់ស្មៅនៅទីធ្លាមុខផ្ទះរបស់គាត់អស់រយៈពេលជាច្រើនឆ្នាំមុនធ្លាក់ខ្លួនមានជំងឺមហារីក។ គួរកត់សម្គាល់ថា នៅក្នុង​ប្រាក់សំណងចំ​នួន ២,២៥ពាន់លានដុល្លារនោះគឺមានប្រាក់ចំនួន ២ផ្នែកផ្សេងគ្នា ដោយទី១ប្រាក់ដែលមានចំនួន ២៥០លានដុល្លារ គឺជាសំណងសម្រាប់ផលប៉ះពាល់ដល់រាងកាយជនរងគ្រោះ និងទី២ ប្រាក់ដែលមានចំនួន ២ពាន់លានដុល្លារផ្សេងទៀតនោះគឺជាប្រាក់រង្វាន់លើកទឹកចិត្តផ្តល់ជូនជនរងគ្រោះសម្រាប់ការផ្តល់ព័ត៌មានយ៉ាងសំខាន់អំពីគ្រោះថ្នាក់នៃផលិតផលថ្នាំបាញ់ស្មៅម៉ាក Roundup

អាមេរិក៖ តុលាការសហព័ន្ធប្រចាំទីក្រុង Manhattan បានបង្គាប់ឲ្យអតីតប្រធានាធិបតីអាមេរិកលោក Donald Trump ត្រូវបង់ប្រាក់ចំនួន ៨៣,៣លានដុល្លារឲ្យទៅលោកស្រី E. Jean Carroll ជុំវិញរឿងអាស្រូវដែលមានអាយុកាលដ៏យូរអង្វែងមួយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍ ទី២៧ ខែមករានេះ។ សេចក្តីសម្រេចខាងលើនេះត្រូវបានធ្វើឡើងតបតាមពាក្យបណ្តឹងរបស់លោកស្រី E. Jean Carroll ដែលអះអាងថា លោក Donald Trump បានបំផ្លាញកេរ្តិ៍ឈ្មោះរបស់គាត់ក្នុងនាមជាអ្នកកាសែតដ៏គួរឲ្យទុកចិត្តម្នាក់តាមរយៈការបដិសេដថា លោក Donald Trump មិនបានចាប់រំលោភគាត់នោះទេ។ គួរកត់សម្គាល់ថា បច្ចុប្បន្ននេះលោកស្រី E. Jean Carroll មានអាយុ ៨០ឆ្នាំទៅហើយ ខណៈរឿងរ៉ាវចម្រូងចម្រាសខាងលើនេះបានកើតឡើងកាលពីពាក់កណ្តាលទសវត្សរ៍ឆ្នាំ១៩៩០ម្លេះ

ថៃ៖ ប៉ូលិសជំនាញថៃបានចុះបង្រ្កាបករណីលក់ម្សៅរ៉តឌីក្លែងក្លាយទ្រង់ទ្រាយធំមួយដែលមានតម្លៃជាទឹកប្រាក់ប្រមាណជា ២លានបាត (៥៦,១៣២ដុល្លារ) និងឃាត់ខ្លួនជនសង្ស័យបានចំនួន ៥នាក់ នេះបើយោងតាមការចុះផ្សាយរបស់បណ្តាញសារព័ត៌មាន Thai Press ។ ក្រុមជនសង្ស័យទាំងនោះរួមមាន លោក Kriengkrai អាយុ ៣១ឆ្នាំ កញ្ញា Natharika អាយុ ២៥ឆ្នាំ កញ្ញា Patcharee អាយុ ៤១ឆ្នាំ លោក Phiphob អាយុ ៤៦ឆ្នាំ និងអ្នកស្រី Phonthip អាយុ ៣២ឆ្នាំ។ នៅក្នុងប្រតិបត្តិការណ៍បង្ក្រាបករណីជួញដូរផលិតផលក្លែងក្លាយខាងលើនេះ ប៉ូលិសជំនាញថាបានរឹបអូសវត្ថុតាងបានជាច្រើនដូចជា ម្សៅរ៉តឌីដែលជាផលិតផលក្លែងក្លាយចំនួន ៣៣,៤០៥កញ្ចប់ សំបកកញ្ចប់សម្រាប់ច្រកម្សៅរ៉តឌីចំនួន ៣០,៨៤០កញ្ចប់