ឥណ្ឌា៖ អាជ្ញាធរសុខាភិបាលនៃប្រទេសឥណ្ឌាបានប្រកាសពីការរកឃើញអ្នកឆ្លងជំងឺកូវីដ-១៩ថ្មីចំនួន ៦០៥ករណីដោយគិតត្រឹមរយៈពេល ២៤ម៉ោងចុងក្រោយនេះ ពោលគឺពេញមួយថ្ងៃនៃថ្ងៃចន្ទ ទី៨ ខែមករា នេះបើយោងតាមការចុះផ្សាយរបស់បណ្តាញសារព័ត៌មាន Times of India នៅព្រឹកថ្ងៃអង្គារ ទី៩​ ខែមករា។ មេរោគនៃជំងឺកូវីដ-១៩ ដែលកំពុងតែបង្កការរាតត្បាតជាថ្មីនៅក្នុងប្រទេសឥណ្ឌានោះគឺជាមេរោគបំប្លែងខ្លួនប្រភេទ JN.1។ ប្រភពខាងលើបានបន្តថា នៅក្នុងចំណោមអ្នកឆ្លងថ្មីខាងលើនេះគឺមានអ្នកឆ្លងចំនួន ៤ករណីជាករណីធ្ងន់ធ្ងររហូតត្រូវស្លាប់បាត់បង់ជីវិត ហើយនៅក្នុងចំណោមអ្នកស្លាប់ទាំង ៤នាក់នោះទៀតសោធគឺជាក្រុមអ្នកជំងឺដែលមានអាយុចន្លោះពី ៤៨ឆ្នាំ រហូតដល់ ៨១ឆ្នាំ។ គួរបញ្ជាក់ជូនថា ទីតាំងដែលកំពុងមានការរាតត្បាតជំងឺកូវីដ-១៩ នៅក្នុងប្រទេសឥណ្ឌានៅពេលនេះគឺមានចំនួន ១២រដ្ឋ ដូចជានៅក្នុង រដ្ឋ Karnataka, រដ្ឋ Kerala,

ជប៉ុន៖ ជាងមួយសប្តាហ៍ក្រោយទទួលរងនូវការវាយប្រហារយ៉ាងធ្ងន់ធ្ងរពីគ្រោះរញ្ជួយដីកម្រិត ៧,៦រ៉ិចទ័រ អាជ្ញាធរជប៉ុនហាក់នៅមិនទាន់អាចដោះស្រាយបញ្ហាដែលបង្កឡើងដោយគ្រោះធម្មជាតិមួយនេះបានទាំងស្រុងនៅឡើយទេ ហើយតួលេខអ្នកស្លាប់និងអ្នកបាត់ខ្លួនបានបន្តកើនឡើងគួរឲ្យកត់សម្គាល់។ យោងតាមការចុះផ្សាយរបស់បណ្តញសារព័ត៌មាន The Strait Time នៅរសៀលថ្ងៃចន្ទ ទី៨ ខែមករានេះបានបញ្ជាក់ថា គិតត្រឹមពេលនេះតួលេខអ្នកស្លាប់បាត់បង់ជីវិតបានកើនឡើងរហូតដល់ ១៦៨នាក់ ខណៈតួលេខនេះមានត្រឹម ១០០នាក់ប៉ុណ្ណោះកាលពីចុងសប្តាហ៍កន្លងទៅ។ ដោយឡែកចំពោះតួលេខអ្នកកំពុងបាត់ខ្លួនវិញក៏បានកើនឡើងផងដែរ ពោលគឺកើនឡើងពីខ្ទង់ជាង ២០០នាក់កាលពីចុងសប្តាហ៍កន្លងទៅ មកដល់ចំនួន ៣២៣នាក់ដោយគិតត្រឹមពេលចុះផ្សាយនេះ។ ការកើនឡើងនៃចំនួនអ្នកបាត់ខ្លួននេះគឺដោយសារតែនាពេលកន្លងមកពលរដ្ឋរងគ្រោះមួយចំនួនខកខានមិនបានរាយការណ៍អំពីករណីបាត់សមាជិកក្នុងគ្រួសារពួកគាត់ទៅកាន់អាជ្ញាធរនោះទេ ដ្បិតអ្នកខ្លះបានរងរបួសធ្ងន់ធ្ងររហូតសន្លប់បាត់បង់ស្មារតី អ្នកខ្លះបានជាប់នៅក្រោមគំនរបាក់បែក ឬបានជម្លៀសខ្លួនទៅដល់ទីតាំងណាមួយឆ្ងាយពីអាជ្ញាធរមូលដ្ឋាន។ តាមការសន្និដ្ឋានពលរដ្ឋដែលកំពុងបាត់ខ្លួនទាំងអស់នោះមានសង្ឃឹមតិចតួចណាស់ក្នុងការនៅរស់រានមានជីវិត ព្រោះហេតុការណ៍រញ្ជួយដីបានកើតឡើងតាំងតែពីថ្ងៃទី១ ខែមករាម្លេះ ហើយរហូតមកទល់នឹងពេលនេះបើពួកគេត្រូវជាប់នៅក្រោមគំនរបាក់បែកក៏ពួកគេត្រូវប្រឈមនឹងការស្លាប់ដោយគ្មានអាហារទទួលទានដែរ៕ អត្ថបទ៖ ភក្តី ប្រភព៖ The Strait Time

ហ្វីលីពីន៖ ត្រីសាឌីនរាប់សិបតោនបានអណ្តែតមកលើឆ្នេរសមុទ្រក្នុងក្រុង Maasim ខេត្ត Sarangani ប្រទេសហ្វីលីពីនយ៉ាងកម្របំផុត នេះបើយោងតាមការចុះផ្សាយរបស់បណ្តាញសារព័ត៌មាន B World Online។ ត្រីបានអណ្តែតមកកាន់ឆ្នេរតាំងតែពីល្ងាចថ្ងៃអាទិត្យម្ល៉េះ ខណៈពលរដ្ឋហ្វីលីពីនជាច្រើនរយនាក់បាននាំគ្នាទៅចាប់យកត្រីទាំងនោះយ៉ាងងាយស្រួលបំផុតដោយមិនចាំបាច់ប្រើវិធីនេសាទអ្វីឡើយ ពោលគឺគ្រាន់តែទៅកើបយកត្រីទាំងនោះដាក់ក្នុងធុង និងស្បោងជាការស្រេច។ ប្រភពខាងលើបានបន្តថា ពលរដ្ឋម្នាក់ៗអាចប្រមូលបានត្រីទាំងនោះក្នុងចន្លោះពី ២០-៣០គីឡូក្រាមសម្រាប់យកទៅធ្វើជាអាហារ ហាលងៀត ឬអាហារកែច្នៃផ្សេងៗ។ បើតាមក្រុមអ្នកជំនាញផ្នែកជលផលបានពន្យល់ថា បាតុភូតខាងលើនេះអាចបណ្តាលមកពីការផ្លាស់ប្តូរសីតុណ្ណភាពនៅក្នុងទឹកសមុទ្រយ៉ាងឆាប់រហ័ស ការប្រែប្រួសទិសដៅទឹករលក រួមជាមួយនឹងបញ្ហាខ្វះខាតប្លង់តុងសម្រាប់ចិញ្ចឹមពួកវាផង ទើបពួកគេត្រូវងាប់ និងអណ្តែតមកកាន់ឆ្នេរយ៉ាងកកកុញដូចនេះ។ យ៉ាងណាក្តី សម្រាប់ពលរដ្ឋហ្វីលីពីនមួយចំនួនបាននាំគ្នាជឿថា វត្តមានរបស់ត្រីសាឌីនទាំងនេះ គឺជា​សារប្រទានពរពីព្រះជាម្ចាស់ ពោលគឺជាពរជ័យពីព្រះជាម្ចាស់សម្រាប់នៅក្នុងឆ្នាំថ្មីនេះ៕ អត្ថបទ៖ ភក្តី ប្រភព៖ B World Online

ថៃ៖ សត្វគោមួយក្បាលត្រូវបានគេប្រទះឃើញជាប់នៅលើដើមឈើដ៏ខ្ពស់មួយដើម ខណៈសត្វគោមួយក្បាលនោះបានងាប់អស់រយៈពេលជាច្រើនថ្ងៃមកហើយ។ បើយោងតាមការចុះផ្សាយរបស់បណ្តាញសារព័ត៌មាន World of Buzz បានឲ្យដឹងថា​ ហេតុការណ៍ដ៏គួរឲ្យភ្ញាក់ផ្អើលនេះបានកើតឡើងនៅក្នុងតំបន់ Yala ភាគខាងត្បូងនៃប្រទេសថៃ។ ប្រភពខាងលើបានបន្តថា កាលពីសប្តាហ៍កន្លងទៅនេះតំបន់ខាងលើបានទទួលរងការវាយប្រហារដោយទឹកជំនន់យ៉ាងធ្ងន់ធ្ងរមួយ ដែលបណ្តាលឲ្យមានទឹកហូរគួចយកសត្វចិញ្ចឹមជាច្រើនក្បាលពីសហគមន៍រស់នៅរបស់ប្រជាពលរដ្ឋទៅកាន់តំបន់វាលទំនាបនិងតំបន់ព្រៃផងដែរ។ ជាក់ស្តែងសត្វគោមួយក្បាលដែលត្រូវជាប់នៅលើដើមឈើកម្ពស់ ២ម៉ែត្រខាងលើនេះ គឺជាសត្វគោមួយក្បាលនៅក្នុងចំណោមសត្វគោ ១៨ក្បាលដែលត្រូវហូរតាមទឹកក្នុងអំឡុងពេលមានទឹកជំនន់និងបានហូរទៅជាប់នៅចន្លោះដើមឈើ ហើយក្រោយពេលទឹកស្រកអស់វិញក៏នៅបន្តជាប់លើដើមឈើនោះតែម្តង៕ អត្ថបទ៖ភក្តី ប្រភព៖ World of Buzz

ម៉ាឡេស៊ី៖ ស្រ្តីជនជាតិម៉ាឡេស៊ីម្នាក់បានស្នើឲ្យប្តីរបស់គាត់យកប្រពន្ធថែមម្នាក់ទៀត ខណៈស្រ្តីដែលជាប្រពន្ធទី២នោះគឺជាមិត្តភក្តិល្អរបស់គាត់តែម្តង។ យោងតាមការចុះផ្សាយរបស់បណ្តាញសារព័ត៌មាន World of Buzz បានបញ្ជាក់ថា រឿងរ៉ាវដ៏កម្រនេះបានកើតឡើងនៅក្នុងតំបន់ Kampung Kolam Limbongan ក្រុង Malacca ភាគខាងត្បូងនៃប្រទេសម៉ាឡេស៊ី។ បុរសដែលមានសំណាងអាចទទួលបានប្រពន្ធថែមម្នាក់ទៀតដោយសន្តិភាពរូបនេះត្រូវបានគេឱ្យដឹងថា មានអាយុ ៣៨ឆ្នាំ បានរៀបការជាមួយប្រពន្ធទី១ អស់រយៈពេល ១២ឆ្នាំមកហើយ និងថែមទាំងមានកូន ៣នាក់អាយុចន្លោះពី ៤ដល់១១ឆ្នាំទៀតផង។ ប្រភពខាងលើបានបន្តថា វាគឺជាក្តីស្រមៃយូរមកហើយដែលស្រ្តីជាប្រពន្ធទី១ ចង់ឲ្យប្តីរបស់គាត់រៀបការជាមួយនិងមិត្តភក្តិល្អរបស់គាត់ថែមម្នាក់ទៀត ដើម្បីបានរស់នៅជុំគ្នាប្រកបដោយសុភមង្គល ហើយនៅក្នុងថ្ងៃដែលប្តីរបស់គាត់រៀបការជាមួយប្រពន្ធទី២នោះ ស្រ្តីជាប្រពន្ធទី១ ក៏បានទៅចូលរួម និងថតរូបជាមួយគ្នាយ៉ាងសប្បាយរីករាយផងដែរ៕ អត្ថបទ៖ ភក្តី ប្រភព៖ World

ថៃ៖ ពលរដ្ឋថៃមួយចំនួនកំពុងមានការភ្ញាក់ផ្អើលយ៉ាងខ្លាំងចំពោះការរកឃើញសត្វត្រីដែលជាពូជត្រីកម្រមួយប្រភេទនៅសមុទ្រប្រទេសថៃ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍​ ទី៦ ខែមករានេះ។ ត្រីនេះមានឈ្មោះថា “Oarfish” ជាប្រភេទត្រីរស់នៅក្នុងសមុទ្រទឹកជ្រៅ និងជាទូទៅគេកម្រនឹងនេសាទវាបានដោយប្រើវិធីនេសាទដូចត្រីសាមញ្ញទូទៅណាស់។ យ៉ាងណាក្តី កាលពីពេលថ្មីៗនេះក្រុមអ្នកនេសាទសមុទ្រនៅក្នុងខេត្ត Satun ភាគខាងត្បូងប្រទេសថៃអាចចាប់បានត្រី Oarfish​ មួយក្បាលក្នុងពេលធ្វើការនេសាទនៅទឹករាក់ធម្មតា ខណៈតាមលក្ខណៈធម្មជាតិត្រីប្រភេទនេះតែងរស់នៅក្រោមបាតសមុទ្រក្នុងជម្រៅចន្លោះពី ៥០-១,០០០ម៉ែត្រ។ បើតាមជំនឿរបស់ពលរដ្ឋថៃពួកគេជឿថា​ ឲ្យមានតែត្រី Oarfish បង្ហាញខ្លួនគឺវាជាសារមួយដែលព្រះអទិទេពសមុទ្រចង់ប្រាប់ថា គ្រោះមហន្តរាយនឹងមកដល់ក្នុងពេលឆាប់ៗខាងមុខនេះ។ យ៉ាងណាក្តី បើតាមលោកសាស្រ្តាចារ្យ Thamrongnawasawat​ ប្រចាំនៅសាកលវិទ្យាល័យជលផល Kasetsart បានបញ្ជាក់ថា ដ្បិតតែការរកឃើញត្រី Oarfish គឺជារឿងកម្រ តែវាគ្រាន់តែជាលក្ខខណ្ឌតាមបែបធម្មជាតិប៉ុណ្ណោះ ហើយនាពេលកន្លងមកប្រទេសជាច្រើននៅជុំវិញពិភពលោកក៏ធ្លាប់ចាប់បានត្រីប្រភេទនេះដែរ ខណៈប្រទេសទាំងអស់នោះហាក់មិនបានជួបប្រទះនូវគ្រោះមហន្តរាយអ្វីឡើយ៕

ជប៉ុន៖ តួលេខអ្នកបាត់បង់ជីវិតដោយសារគ្រោះរញ្ជួយដីនៅក្នុងប្រទេសជប៉ុនបានកើនឡើងរហូតដល់ ១០០នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន បាងកប៉ុស្តិ៍ នៅព្រឹកថ្ងៃសៅរ៍ ទី៦ ខែមករានេះ។ ចំណែកអ្នកបាត់ខ្លួនវិញគិតត្រឹមពេលនេះគឺនៅមានចំនួន ២១១នាក់ទៀត ខណៈប្រតិបត្តិការណ៍ស្វែងរកជនរងគ្រោះនៅក្រោមគំនរបាក់បែកកំពុងបន្តធ្វើឡើងយ៉ាងសកម្ម។ នៅក្នុងរបាយការណ៍ដាច់ដោយឡែកមួយដែលត្រូវបានធ្វើឡើងដោយក្រុមហ៊ុន Karen Clark & Co (KCC) មានមូលដ្ឋាននៅសហរដ្ឋអាមេរិកបានធ្វើការវាយតម្លៃថា គ្រោះរញ្ជួយដីមួយនេះនឹងធ្វើឲ្យប្រទេសជប៉ុនត្រូវខាតបង់ប្រាក់អស់ប្រមាណជា ៦,៤ពាន់លានដុល្លារ។ គួរបញ្ជាក់ថា ប្រាក់ដែលត្រូវខាតបង់នោះគឺរួមបញ្ចូលទាំងការជួសជុលនិងសាងសង់ឡើងវិញនូវផ្ទះ អគារ និងហេដ្ឋារចនាសម្ព័ន្ធផ្សេងៗដែលបានរងនូវការខូចខាត​ ការបាត់បង់ទ្រព្យសម្បត្តិផ្សេងៗរបស់ប្រជាពលរដ្ឋ ការជួយសង្គ្រោះពលរដ្ឋរងគ្រោះតាមរយៈរូបភាពផ្សេងៗ​ និងខាតបង់ឱកាសសម្រាប់រកប្រាក់ចំណូលរបស់ប្រជាពលរដ្ឋគ្រោះផងដែរ៕ អត្ថបទ៖ ភក្តី ប្រភព៖ បាងកកប៉ុស្តិ៍  The Strait Time 

ថៃ៖ ប្រទេសថៃបានដាក់ការរំពឹងទុកថានឹងទទួលបានភ្ញៀវទេសចរមកពីប្រទេសចិនចំនួន ៨លាននាក់នៅក្នុងឆ្នាំ២០២៤ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ កាលពីល្ងាចថ្ងៃសុក្រ ទី៥ ខែមករានេះ។ ការព្យាករណ៍អំពីចំនួនភ្ញៀវទេសចរនេះត្រូវបានធ្វើឡើងក្រោយរដ្ឋាភិបាលនៃប្រទេសថៃនិងរដ្ឋាភិបាលនៃប្រទេសចិនបានចុះហត្ថលេខាលើកិច្ចព្រមព្រៀងលើកលែងទិដ្ឋការរវាងពលរដ្ឋនៃប្រទេសទាំង២ កាលពីពេលថ្មីៗនេះ។ គួរបញ្ជាក់ជូនថា​ កិច្ចព្រមព្រៀងលើកលែងទិដ្ឋការខាងលើនឹងផ្តើមមានសុពលភាពចាប់ពីថ្ងៃខែមីនាខាងមុខនេះតទៅ ហើយនៅក្នុងអំឡុងពេលនេះនៃការអនុវត្តកិច្ចព្រមព្រៀងនេះគឺពលរដ្ឋចិនអាចធ្វើដំណើរមកកាន់ប្រទេសថៃដោយមិនចាំបាច់ធ្វើការស្នើសុំទិដ្ឋការជាមុននោះទេ ខណៈពលរដ្ឋថៃក៏ទទួលបានសិទ្ធពិសេសដូចនេះផងដែរពេលចង់ធ្វើដំណើរទៅកាន់ប្រទេសចិន។ សូមរម្លឹកជូនថា កាលពីឆ្នាំកន្លងទៅប្រទេសថៃបានទទួលភ្ញៀវទេសចរអន្តរជាតិសរុបចំនួន ២៨លាននាក់ក្នុងនោះមានភ្ញៀវទេសចរចិនចំនួន ៣,៥១លាននាក់ ខណៈមុនពេលមានវិបត្តិរាតត្បាតជំងឺកូវីដ-១៩ថៃធ្លាប់ទទួលបានភ្ញៀវទេសចរអន្តរជាតិរហូតដល់ ៣៩លាននាក់ហើយនោះមានភ្ញៀវទេសចរចិនចំនួន ១១លាននាក់ផងដែរ៕ អត្ថបទ៖ភក្តី ប្រភព៖ បាងកកប៉ុស្តិ៍

ជប៉ុន៖ រដ្ឋាភិបាលនៃប្រទេសជប៉ុនបានអនុម័តកញ្ចប់ថវិកាចំនួន ៤,៧៤ពាន់លានយេន ​(៣៣លានដុល្លារ) ដើម្បីដោះស្រាយរាល់ការខូតខាតដែលបានបង្កឡើងដោយគ្រោះរញ្ជួយដី នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងរសៀលថ្ងៃសុក្រ ទី៥ ខែមករានេះ។ បើតាមលោកនាយករដ្ឋមន្ត្រីជប៉ុន Fumio Kishida បានបញ្ជាក់ថា កញ្ចប់ថវិកាខាងលើនេះនឹងត្រូវដកចេញពីកញ្ចប់ថវិកាបម្រុងប្រចាំឆ្នាំ ដែលរដ្ឋាភិបាលបានគ្រោងទុកសម្រាប់ប្រើប្រាស់ក្នុងគ្រាមានអាសន្ននិងឆ្លើយតបទៅនឹងគ្រោះមហ្តរាយផ្សេងៗ។ គួររម្លឹកជូនថា គ្រោះរញ្ជួយដីកម្រិត ៧,៦រ៉ិចទ័របានវាយប្រហារតំបន់ភាគខាងជើងប្រទេសជប៉ុនតាំងតែពីថ្ងៃទី១ ខែមករាម្លេះ​​​ ខណៈគិតត្រឹមពេលនេះហេតុការណ៍អកុសមួយនេះបានបណ្តាលឲ្យពលរដ្ឋជប៉ុនចំនួន ៩២នាក់បានស្លាប់បាត់បង់ជីវិត និងពលរដ្ឋចំនួន ២៤២នាក់ផ្សេងទៀតកំពុងតែបាត់ខ្លួន។ ដោយឡែកចំពោះអ្នករងរបួសវិញគឺមានចំនួន ៣៣០នាក់ ពលរដ្ឋជាង ៣,៣០០នាក់ត្រូវបង្ខំចិត្តជម្លៀសខ្លួនជាបន្ទាន់ ផ្ទះចំនួន ៣,០០០ខ្នងកំពុងរស់នៅដោយគ្មានភ្លើងអគ្គិសនីប្រើប្រាស់ និងផ្ទះចំនួន ៨៩,៨០០ខ្នងកំពុងរស់នៅដោយគ្មានទឹកស្អាតប្រើប្រាស់៕

ឥណ្ឌូនេស៊ី៖ យ៉ាងហោចណាស់មានពលរដ្ឋឥណ្ឌូនេស៊ីចំនួន ៤នាក់បានស្លាប់បាត់បង់ជីវិតនៅក្នុងហេតុការណ៍រថភ្លើងបុកគ្នា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសុក្រ ទី៥ ខែមករានេះ។ ហេតុការណ៍គ្រោះថ្នាក់ដ៏កម្រនេះបានកើតឡើងនៅក្នុងខេត្ត Java ដែលស្ថិតនៅប៉ែកខាងលិចនៃប្រទេសឥណ្ឌូនេស៊ី។ បើតាមលោក Mohamad Risal Wasal ដែលជាអគ្គនាយកនៃក្រសួងដឹកជញ្ជូនទទួលបន្ទុកផ្នែករថភ្លើងបានបញ្ជាក់ថា​ នៅក្នុងចំណោមជនរងគ្រោះទាំង ៤នាក់នោះគឺមានជនរងគ្រោះចំនួន ២នាក់ជាប្រតិបត្តិកររបស់រថភ្លើង ខណៈ ២នាក់ទៀតគឺជាអ្នកដំណើរ។ ក្រៅតែពីបានរកឃើញអ្នកស្លាប់ភ្លាមៗនៅនឹងកន្លែងកើតហេតុហើយ មានអ្នកដំណើរចំនួន ២២នាក់ផ្សេងទៀតបានរងរបួស ខណៈអាជ្ញាធរឥណ្ឌូនេស៊ីបានបញ្ជូនរថយន្តសង្គ្រោះបន្ទាន់ជាច្រើនគ្រឿងទៅកាន់កន្លែងកើតហេតុដើម្បីនាំយកអ្នករងរបួសទាំងអស់នោះមកព្យាបាលនៅមន្ទីរពេទ្យ៕   អត្ថបទ៖ ភក្តី ប្រភព៖ The Strait Time