អាមេរិក៖ រដ្ឋាភិបាលអាមេរិកបានផ្តល់ប្រាក់ចំនួន ៦០លានដុល្លារទៅកាន់រដ្ឋ Maryland ដើម្បីសាងសង់ស្ពាន Francis Scott Key Bridge នៅក្នុងទីក្រុង Baltimore ឡើងវិញ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី២៩ ខែមីនានេះ។ ការផ្តល់ប្រាក់ខាងលើនេះត្រូវបានធ្វើឡើងតបតាមសំណើរបស់អភិបាលរដ្ឋ Maryland គឺលោក Wes Moore ខណៈរដ្ឋបាលផ្លូវ Highway សហព័ន្ធនៃក្រសួងដឹកជញ្ជូនសហរដ្ឋអាមេរិកបានអនុម័តលើសំណើនេះក្នុងរយៈពេលតែប៉ុន្មានម៉ោងប៉ុណ្ណោះ។

គួររម្លឹកជូនថា ដើម្បីទទួលបានស្ពានមួយខ្សែនេះមកវិញ អ្នកជំនាញអាមេរិកម្នាក់គឺលោកសាស្ត្រាចារ្យ Jean-Paul Rodrigue ដែលជាអ្នកជំនាញផ្នែកពាណិជ្ជកម្មដែនសមុទ្រនៅសាកលវិទ្យាល័យ Texas A&M បានព្យាករណ៍ថា គេអាចនឹងត្រូវការពេលចន្លោះពី ៣ទៅ៥ឆ្នាំអាស្រ័យទៅលើល្បឿននៃការធ្វើការងាររបស់ភាគីពាក់ព័ន្ធទាំងអស់ ខណៈកិច្ចការដ៏ធំមួយនេះនឹងតម្រូវឱ្យមានភាគីនិងក្រុមអ្នកជំនាញជាច្រើនត្រូវធ្វើការរួមគ្នា។ ដោយឡែកចំពោះប្រតិបត្តិការស្វែងរកជនរងគ្រោះវិញគឺគិតត្រឹមពេលនេះក្រុមអ្នកជួយសង្គ្រោះទើបអាចរកឃើញសាកសពជនរងគ្រោះចំនួនតែ ៤នាក់ប៉ុណ្ណោះក្នុងចំណោមជនរងគ្រោះទាំងអស់មានចំនួន ៦នាក់៕

អត្ថបទ៖ ភក្តី

ប្រភព៖ The Strait Time