កូរ៉េខាងជើងបាញ់មីស៊ីលកម្ទេចនាវាចំនួន ២គ្រាប់ ខណៈអាមេរិកនិងកូរ៉េខាងត្បូងផ្តើមធ្វើសមយុទ្ធយោធា “Freedom Shield 23”
- BY
- Pheakdey
- March 13, 2023
កូរ៉េខាងជើង៖ យោធាកូរ៉េខាងជើងបានបាញ់សាកល្បងមីស៊ីលសម្រាប់បាញ់កម្ទេចនាវាចំនួន ២គ្រាប់កាលពីថ្ងៃអាទិត្យ ទី១២ ខែមីនាម្សិលមិញ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia។ បើតាមទីភ្នាក់ងារសារព័ត៌មានកូរ៉េ (KCNA) បានបញ្ជាក់ថា មីស៊ីលចំនួន ២គ្រាប់ ដែលកូរ៉េខាងជើងបានបាញ់សាកល្បងនោះគឺត្រូវបានបាញ់ចេញពីនាវាមុជទឹក ហើយមីស៊ីលទាំងនោះមានសមត្ថភាពអាចហោះហើរបានចម្ងាយ ១,៥០០គីឡូម៉ែត្រមុននឹងផ្ទុះនៅចំណុចគោលដៅដែលគេបានកំណត់ទុក។
គួរបញ្ជាក់ជូនថា ការបាញ់សាកល្បងមីស៊ីលយុទ្ធសាស្រ្តរបស់ទីក្រុងព្យុងយ៉ាងនៅពេនេះគឺត្រូវបានធ្វើឡើងស្របពេលដែលកងយោធាអាមេរិកនិងកងយោធាកូរ៉េខាងត្បូងបានចាប់ផ្តើមបើកការធ្វើសមយុទ្ធយោធារួមគ្នាមួយ ដែលប្រទេសជាសម្ព័ន្ធមិត្តទាំង ២នេះហៅថា សមយុទ្ធ “Freedom Shield 23″។ ប្រភពខាងបន្តថា សមយុទ្ធ “Freedom Shield 23” គឺជាសមយុទ្ធយោធាបែបយុទ្ធសាស្រ្តមួយ ដែលនឹងត្រូវរៀបចំឡើងក្នុងរយៈពេល ១១ថ្ងៃ ដោយចាប់ផ្តើមនៅថ្ងៃទី ១៣ ខែមីនា និងត្រូវបិទបញ្ចប់វិញនៅក្នុងថ្ងៃទី ២៣ ខែមីនា ឆ្នាំ ២០២៣នេះ៕
ប្រភព៖ Channel News Asia
- Share This Post: