អាមេរិក៖ តុលាការកំពូលអាមេរិកបានចេញសេចក្តីសម្រេចអនុញ្ញឱ្យរដ្ឋបាលរបស់លោក ដូណាល់ ត្រាំ អាចដកហូតសិទ្ធពិសេសសម្រាប់ជួយការពារជនអន្តោប្រវេសន៍វេណេស៊ុយអេឡាពីការនិរទេសខ្លួនហើយ នេះបើយោងតាមការចុះផ្សាយរបស់បណ្តាញសារព័ត៌មាន VN Express នៅក្នុងថ្ងៃទី៤ ខែតុលា។ សេចក្តីសម្រេចនេះគឺជាការបើកផ្លូវឱ្យរដ្ឋបាលរបស់លោក ដូណាល់​ ត្រាំ អាចធ្វើការនិរទេសជនអន្តោប្រវេសន៍វេណេស៊ុយអេឡាជាង ៣៥០,០០០នាក់ចេញពីទឹកដីអាមេរិក។ សូមបញ្ជាក់ជូនថា សិទ្ធពិសេសសម្រាប់ការពារជនអន្តោប្រវេសន៍វេណេស៊ុយអេឡានោះមានឈ្មោះថា Temporary Protected Status (TPS) ដែលរដ្ឋាភិបាលអាមេរិកបានផ្តល់ជូនពលរដ្ឋវេណេស៊ុយអេឡាជាច្រើនឆ្នាំមកហើយ ពោលគឺតាំងតែពីមុនពេលដែលលោក ដូណាល់​ ត្រាំ ចូលកាន់តំណែងជាប្រធានាធិបតីអាមេរិកម្លេះ។​ យ៉ាងណាក្តី កាលពីអំឡុងខែឧសភាកន្លងទៅ រដ្ឋបាលរបស់លោក ដូណាល់​ ត្រាំ បានស្នើឱ្យអាជ្ញាធរអាមេរិកដកសិទ្ធនេះមកវិញ ដើម្បីបើកផ្លូវប៉ូលិសអាមេរិកអាចអនុវត្តវិធានការបណ្តេញជនអន្តោប្រវេសន៍វេណេស៊ុយអេឡាចេញពីទឹកដីអាមេរិក៕ អត្ថបទ៖ ភក្តី

វៀតណាម​៖ តួលេខអ្នកស្លាប់បាត់បង់ជីវិតដោយសារតែឥទ្ធិពលរបស់ព្យុះទីហ្វុង Bualoi បានកើនឡើងដល់ចំនួន ៥១នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី៣ ខែតុលា។ ទន្ទឹមគ្នានេះក៏នៅមានពលរដ្ឋវៀតណាមចំនួន ១៤នាក់ផ្សេងទៀតកំពុងតែបាត់ខ្លួនផងដែរ។ ប្រភពខាងលើបានបន្តថា ក្រៅតែពីបានគំរាមគំហែងដល់អាយុជីវិតមនុស្សហើយ ព្យុះទីហ្វុង Bualoi ក៏បានបណ្តាលឱ្យពលរដ្ឋវៀតណាមចំនួន ១៦៤នាក់រងរបួសធ្ងន់និងស្រាល ផ្ទះរបស់ប្រជាពលរដ្ឋជាង ១០០,០០០ខ្នងបានរងនូវការខូតខាត ដីកសិកម្មជាង ១០,០០០ហិកតាបានរងនូវការបំផ្លាញ ហើយដីនៅតំបន់មួយចំនួនត្រូវបានបាក់ស្រុតយ៉ាងឆាប់រហ័ស ខណៈការខាតបង់សេដ្ឋកិច្ចជារួមអាចមានតម្លៃជាច្រើនលានដុល្លារ៕ ប្រភព៖ The Strait Time

ជប៉ុន៖ ប្រទេសជប៉ុនកំពុងប្រឈមនឹងបញ្ហាខ្វះខាតផលិតផល Asahi ដោយសារតែក្រុម Hacker បានចូលទៅរំខានដល់ប្រតិបត្តិការសំខាន់ៗរបស់ក្រុមហ៊ុន Asahi Group នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃទី៣ ខែតុលា។ ផលិតផលរបស់ក្រុមហ៊ុន Asahi ដែលអាចនឹងមានចំនួនតិចតួចនៅលើទីផ្សារនោះ រួមមានទាំងស្រាបៀរ និងតែដប ម៉ាក Asahi ជាដើម។ បើតាមតំណាងរបស់ក្រុមហ៊ុន Asahi Group បានឱ្យដឹងថា ក្រុមហ៊ុន Hacker បានចាប់ផ្តើមវាយប្រហារប្រព័ន្ធប្រតិបត្តការណ៍របស់ក្រុមហ៊ុនចាប់តាំងថ្ងៃចន្ទ ដើមសប្តាហ៍នេះម្លេះ ហើយប្រព័ន្ធប្រតិបត្តិការណ៍ដែលបានរងនូវរំខាននោះមានដូចជា ប្រព័ន្ធបញ្ជាទិញ និងប្រព័ន្ធដឹកជញ្ជូននៅតាមរោងចក្រជាច្រើននៅទូទាំងប្រទេស។ យ៉ាងណាក្តី គិតត្រឹមពេលនេះខាងក្រុមហ៊ុន Asahi កំពុងតែព្យាយាមដោយស្រាយបញ្ហាខាងលើនេះហើយ ខណៈភាពប្រក្រតីអាចនឹងវិលត្រលប់មកវិញឆាប់ៗនេះ៕ អត្ថបទ៖ ភក្តី ប្រភព៖ BBC

អាមេរិក៖ សេតវិមានអាមេរិកបានឱ្យដឹងថា ការបញ្ឈប់បុគ្គលិករបស់រដ្ឋាភិបាលសហព័ន្ធទ្រង់ទ្រាយធំនឹងត្រូវចាប់ធ្វើឡើងនៅក្នុងរយៈពេល ២ថ្ងៃទៀត នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃទី ២ ខែតុលា។ គម្រោងបឈ្ឈប់បុគ្គលិករដ្ឋាភិបាលទ្រង់ទ្រាធំនេះត្រូវបានធ្វើឡើងដើម្បីឆ្លើយតបទៅនឹងបញ្ហានៅចំពោះមុខ ពោលគឺការបិទរដ្ឋាភិបាលជាបណ្តោះអាសន្ន។ គួរបញ្ជាក់ជូនថា កាលពីថ្ងៃទី១ ខែតុលាម្សិលមិញនេះ ស្ថាប័នរដ្ឋសហព័ន្ធអាមេរិកបានប្រកាសបិទទ្វារលែងដំណើរ​ជាបណ្តោះអាសន្ន​ ដោយសារតែវិបត្តិ​គ្មានថវិកា​ចំណាយ ហើយវិបត្តិ​នៃការគ្មានថវិកា​ចំណាយនេះទៀតសោធ គឺបង្កឡើងដោយសារតែគណបក្សធំៗទាំង២ នៅ​សភាខុនហ្ក្រេស ខ្វែងគំនិតគ្នាក្នុងការអនុម័តច្បាប់ថវិកា​ជាតិ​។ សូមរម្លឹកជូនថា កាលពីអាណត្តិមុនរបស់លោកដូណាល់ ត្រាំ ពោលគឺនៅខែ​ធ្នូ ឆ្នាំ​២០១៨ សហរដ្ឋអាមេរិក​ក៏បានជួប​វិបត្តិបិទរដ្ឋាភិបាលជាបណ្តោះអាសន្នម្តងដែរ ដោយពេលនោះរយៈពេលនៃការបិទរដ្ឋាភិបាលអូសបន្លាយអស់ ៣៥ថ្ងៃ៕ អត្ថបទ៖ ភក្តី ប្រភព៖ BBC  

ហ្វីលីពីន៖ តួលេខអ្នកស្លាប់បាត់បង់ជីវិតដោយសារគ្រោះរញ្ជួយដីនៅហ្វីលីពីនបានកើនឡើងដល់ ៦៩នាក់ហើយ​ នេះបើយោងតាមតាមការចុះផ្សាយរបស់បណ្តាញសារព័ត៌មាន Channel News Asia នៅរសៀលថ្ងៃទី១ ខែតុលា។ ដោយឡែកចំនួនអ្នករងរបួសវិញគឺគិតត្រឹមពេលនេះមានចំនួន ១៤៧នាក់ ដោយនៅក្នុងនោះក៏មានមួយចំនួនកំពុងស្ថិតនៅក្នុងស្ថានភាពធ្ងន់ធ្ងរផងដែរ។ របាយការណ៍ចុងក្រោយរបស់អាជ្ញាធរហ្វីលីពីនបានបង្ហាញថា មានអគារចំនួន ២២កន្លែងបានរងនូវការបំផ្លាញទាំងស្រុង ខណៈគិតត្រឹមពេលនេះប្រតិបត្តិការណ៍ជួយសង្គ្រោះជនរងគ្រោះនៅមិនទាន់បិទបញ្ចប់នៅឡើយទេ។ សូមបញ្ជាក់ជូនថា កាលពីយប់មិញនេះគ្រោះរញ្ជួយដីកម្រិត ៦,៩រ៉ិចទ័រ បានវាយប្រហារទីក្រុង Cebu របស់ប្រទេសហ្វីលីពីននៅម៉ោងប្រមាណជា ១០យប់ ហើយវាក៏ជាករណីកម្រមួយចំពោះទីក្រុងដែលមានប្រជាពលរដ្ឋកំពុងរស់នៅជាង ៩០,០០០នាក់នេះផងដែរ៕ អត្ថបទ៖ ភក្តី ប្រភព៖ Channel News Asia

អាមេរិក៖ លោកប្រធានាធិបតីអាមេរិក ដូណាល់ ត្រាំ បានឱ្យដឹងថា សាកលវិទ្យាល័យ Harvard នឹងត្រូវ​បង់ប្រាក់សំណងចំនួន ៥០០លានដុល្លារ ដើម្បីដោះស្រាយបញ្ហាជាមួយនឹងរដ្ឋាភិបាលអាមេរិក នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី១ ខែតុលា។ ទន្ទឹមគ្នានេះ សាកលវិទ្យាល័យក៏នឹងត្រូវដំណើរការជាប្រភេទសាលាពាណិជ្ជកម្មផងដែរ។ ប្រភពខាងលើបានបន្តថា នៅក្នុងនាមជាសាលាពាណិជ្ជកម្ម សាកលវិទ្យាល័យ Harvard អាចបង្រៀនមុខវិជ្ជាមួយចំនួនដូចជា មុខវិជ្ជាទាក់ទងនឹងបច្ចេកវិទ្យា AI គ្រឿងម៉ាស៊ីន និងមុខវិជ្ជាបែបពាណិជ្ជកម្មផ្សេងៗទៀត។ គួរកត់សម្គាល់ថា រឿងរ៉ាវចម្រូងចម្រាសរវាងសាកលវិទ្យាល័យ Harvard ជាមួយនឹងរដ្ឋាភិបាលអាមេរិកបានកើតឡើងជាច្រើនខែមកហើយ​ ដោយអាជ្ញាធរអាមេរិកបានរកឃើញថា សាកលវិទ្យាល័យ Harvard ជាប្រភពបង្កើតឱ្យមានចលនាគាំទ្រក្រុមប៉ាឡេស្ទីនក្នុងសង្គ្រាមជាមួយអ៊ីស្រាអែល បង្កើតឱ្យមានការតវ៉ាលើបញ្ហាអាកាសធាតុ ឬការរើសអើងក្នុងទម្រង់ផ្សេងៗ ដែលជាសុទ្ធតែជាករណីធំៗប្រឆាំងទៅនឹងច្បាប់ឬបទបញ្ជារបស់រដ្ឋាភិបាលអាមេរិកក្រោមការដឹកនាំរបស់លោក

ហ្វីលីពីន៖ យ៉ាងហោចណាស់មានមនុស្សចំនួន ៣១នាក់បានស្លាប់បាត់បង់ជីវិតនៅក្នុងហេតុការណ៍រញ្ជួយដីដ៏ធ្ងន់ធ្ងរមួយនៅក្នុងប្រទេសហ្វីលីពីន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី១ ខែតុលា។ គ្រោះរញ្ជួយដីបានកើតឡើងក្នុងកម្រិត ៦,៩ រ៉ិចទ័រ និងបានវាយប្រហារទីក្រុង Cebu កាលយប់មិញនេះ។ ប្រភពខាងលើបានបន្តថា ក្រៅតែពីបានបណ្តាលឱ្យមនុស្សត្រូវស្លាប់បាត់បង់ជីវិតហើយ ហេតុការណ៍គ្រោះថ្នាក់នេះក៏បានបណ្តាលឱ្យមនុស្សជាង ១៤០នាក់ផ្សេងទៀតបានរងរបួសធ្ងន់និងស្រាលផងដែរ។ បើតាមអាជ្ញាធរហ្វីលីពីនបានឱ្យដឹងថា ចំពោះការខូចខាតព្រទ្យសម្បត្តិសារធារណៈក៏បានកើតឡើងមួយចំនួនដែរ ដូចជាមានអគារជាច្រើនកន្លែងត្រូវបានដួលរលំឬរងការខូចខាត ហើយចរន្តអគ្គិសនីនៅតំបន់មួយចំនួនត្រូវបានកាត់ផ្តាច់៕ អត្ថបទ៖ ភក្តី ប្រភព៖ The Strait Time

ឥណ្ឌូណេស៊ី៖ យ៉ាងហោចណាស់មានមនុស្សម្នាក់បានស្លាប់បាត់បង់ជីវិតនៅក្នុងហេតុការណ៍បាក់អគារសាលារៀនមួយកន្លែងនៅក្នុងប្រទេសឥណ្ឌូណេស៊ី នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី៣០ ខែកញ្ញា។ ទីតាំងដែលជាកន្លែងកើតហេតុខាងលើនេះគឺជាសាលាបង្រៀបសាសនាឥស្លាមមួយកន្លែង ដែលមានទីតាំងស្ថិតនៅក្នុងខេត្ត East Java ប៉ែកខាងកើតនៃប្រទេសឥណ្ឌូណេស៊ី។ ប្រភពខាងលើបានបន្តថា នៅក្នុងពេលកើតហេតុនោះគឺមានមនុស្សសរុបជាង ២០០នាក់កំពុងមានវត្តមាននៅអគារសាលារៀន ហើយភ្លាមៗក្រោយអគារបានបាក់ អាជ្ញាធរឥណ្ឌូណេស៊ីបានជួយសង្គ្រោះមនុស្សបានចំនួន ១០២នាក់ មនុស្សចំនួន ៨០នាក់បានរងរបួសនិងត្រូវបញ្ជូនទៅមន្ទីរពេទ្យជាបន្ទាន់ ខណៈគិតត្រឹមពេលនេះក៏នៅមានមនុស្សចំនួន ៣៨នាក់ផ្សេងទៀតកំពុងតែបាត់ខ្លួនផងដែរ។ បើតាមអាជ្ញាធរឥណ្ឌូណេស៊ីបានបញ្ជាក់ថា អគារបានបាត់ដោយតែនៅជាន់ទីបួន នៃអគារមានផ្ទុកមនុស្សនិងសម្ភារៈផ្សេងៗច្រើនលើសកំណត់ រហូតធ្វើឱ្យអគារទាំងមូលមិនអាចទប់នឹងទម្ងន់ដ៏ធ្ងន់នោះបាន៕ អត្ថបទ៖ ភក្តី ប្រភព៖ The Strait Time

វៀតណាម​៖ មនុស្សចំនួន​ ១៩នាក់ត្រូវបានរាយការណ៍ថា បានស្លាប់បាត់បង់ជីវិតដោយសារឥទ្ធិពលរបស់ព្យុះទីហ្វុង Bualoi នៅក្នុងប្រទេសវៀតណាម នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី៣០ ខែកញ្ញា។ តួលេខអ្នកស្លាប់បាត់បង់ជីវិតនេះបានកើតឡើងគួរឱ្យកត់សម្គាល់ ពោលគឺកើនឡើងពីចំនួនម្នាក់កាលពីថ្ងៃទី២៩ មកដល់ចំនួន ១៩នាក់ ដោយគិតត្រឹមថ្ងៃទី៣០ ខែកញ្ញា។ ដោយឡែកតួលេខអ្នកបាត់ខ្លួនវិញក៏បានកើតឡើងផងដែរ ដោយនៅថ្ងៃម្សិលមិញអ្នកបាត់ខ្លួនមានត្រឹមតែ ១២នាក់ប៉ុណ្ណោះ ខណៈគិតត្រឹមថ្ងៃទី៣០ ខែកញ្ញានេះតួលេខអ្នកបាត់ខ្លួនបានឡើងរហូតដល់ចំនួន ២១នាក់។ បើអាជ្ញាធរវវៀតណាមបានបញ្ជាក់ថា ទន្ទឹមនឹងមានអ្នកស្លាប់និងបាត់ខ្លួន គ្រោះធម្មជាតិនេះក៏បានបណ្តាលឱ្យពលរដ្ឋវៀតណាមចំនួន ៨៨នាក់ផ្សេងទៀតបានរងរបួស ផ្ទះជាង ១០០,០០០ខ្នងបានរងនូវការខូតខាត ដីកសិកម្មជាង ១០,០០០ហិកតាបានរងនូវការបំផ្លាញ ហើយដីនៅតំបន់មួយចំនួនត្រូវបានបាក់ស្រុតយ៉ាងឆាប់រហ័ស៕ អត្ថបទ៖ ភក្តី ប្រភព៖ Channel News

ឥណ្ឌា៖ យ៉ាងហោចណាស់មានពលរដ្ឋឥណ្ឌាចំនួន ៣៦នាក់បានស្លាប់បាត់បង់ជីវិតនៅក្នុងហេតុការណ៍រត់ជាន់គ្នាមួយនៅក្នុងប្រទេសឥណ្ឌា នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia កាលពីយប់ថ្ងៃទី២៨ ខែកញ្ញា។ ក្រៅតែពីបានបណ្តាលឱ្យមានមនុស្សត្រូវស្លាប់បាត់បង់ជីវិតហើយ ហេតុការណ៍អកុសលនេះក៏បានបណ្តាលឱ្យមានមនុស្សចំនួន ៥០នាក់ផ្សេងទៀតបានរងរបួសផងដែរ។ ប្រភពខាងលើបានបន្តថា នៅក្នុងចំណោមជនរងគ្រោះដែលបានស្លាប់បាត់បង់ជីវិតទាំងអស់នោះក៏មានកូនក្មេងចំនួន ៨នាក់ និងស្រ្តីចំនួន ១៦នាក់ផងដែរ។ បើតាមអាជ្ញាធរឥណ្ឌាបានបញ្ជាក់ថា ហេតុការណ៍រត់ជាន់គ្នាខាងលើនេះបានកើតឡើងនៅក្នុងព្រឹត្តិការណ៍ជួបជុំគ្នាដ៏ធំមួយ ដែលបានរៀបចំឡើងដោយកំពូលតារាសម្តែងដ៏ល្បីរបស់ប្រទេសឥណ្ឌា គឺលោក Vijay ខណៈកម្មវិធីនោះគឺវេទិកានយោបាយសម្រាប់ឃោសនាគណបក្សនយោបាយរបស់លោក Vijay ផ្ទាល់តែម្តង គឺ “គណបក្ស Vijay”៕ អត្ថបទ៖ ភក្តី ប្រភព៖ Channel News Asia