វៀតណាម៖ អាជ្ញាធរក្រុងហាណូយគ្រោងនឹងបង្កើតគោលនយោបាយឧបត្ថម្ភពិសេសមួយ ដើម្បីគាទ្រដល់ការសិក្សាថ្នាក់បណ្ឌិតនៅក្នុងទីក្រុងខ្លួន នេះបើយោងតាមការចុះផ្សាយរបស់បណ្តាញសារព័ត៌មាន VN Express នៅក្នុងថ្ងៃទី២៧ ខែកុម្ភៈ។ តាមរយៈគោលនយោបាយនេះ អាជ្ញាធរក្រុងហាណូយក៏បានដាក់ចេញផែនការទទួលបានធនធានបណ្ឌិតចំនួន ១,០០០នាក់ក្នុងចន្លោះពីឆ្នាំ ២០២៦ ដល់ឆ្នាំ ២០៣០ ផងដែរ។ គិតត្រឹមពេលនេះគណៈកម្មាធិការប្រជាជនទីក្រុងហាណូយបានចាប់ផ្តើមស្នើសុំមតិយោបល់លើសេចក្តីព្រាងស្តីពីការបង្កើតគោលនយោបាយខាងលើនេះហើយ ខណៈគេរំពឹងថា ការអនុម័តជាផ្លូវការអាចនឹងកើតមាននៅក្នុងពេលដ៏ខ្លីខាងមុខនេះ។ ប្រភពខាងលើបានបន្តថា តាមរយៈគោលនយោបាយគាំទ្រការសិក្សាថ្នាក់បណ្ឌិតខាងលើនេះគឺអាជ្ញាធរក្រុងហាណូយនឹងជួយផ្តល់ជូននិស្សិតសិក្សាថ្នាក់បណ្ឌិត ដូចជា៖ -ប្រាក់ឧបត្ថម្ភប្រចាំខែចំនួន ១៥លានដុង (៥៧៦ដុល្លារ) -ជួយឧបត្ថម្ភចំពោះសកម្មភាពស្រាវជ្រាវផ្សេងៗ ដូចជាការបោះពុម្ពឯកសារផ្សេងៗ ការចូលរួមសិក្ខាសាលា ឬសន្និសីទ្ធ ដែលចាំបាច់ចំពោះការសិក្សាទាំងនៅក្នុងស្រុក និងក្រោប្រទេស ហើយប្រាក់ឧបត្ថម្ភចំពោះសកម្មភាពទាំងនេះគឺមានចំនួនអតិបរមារហូតដល់ ៥០លានដុង (១,៩២០ដុល្លារ) ក្នុងមួយឆ្នាំ៕

ថៃ៖ ប្រាក់ចំណូលរបស់ក្រុមហ៊ុនផលិតមីម៉ាម៉ា (MAMA) បានធ្លាក់ចុះគួរឱ្យកត់សម្គាល់ នេះបើយោងតាមការចុះផ្សាយរបស់បណ្តាញសារព័ត៌មាន The Nation Thailand នៅក្នុងថ្ងៃទី២៦ ខែកុម្ភៈ។ ក្រុមហ៊ុនផលិតនិងចែកចាយមីម៉ាម៉ានេះមានឈ្មោះផ្លូការថា Thai President Foods Public Company Limited ឬហៅកាត់ថា TFMAMA។  ប្រាក់ចំណូលរបស់ក្រុមហ៊ុន TFMAMA នៅក្នុងឆ្នាំនេះគឺមានប្រមាណជា ២៧,៦៤ពាន់លានបាត (៧៩០លានដុល្លារ) ដែលតួលេខនេះគឺមានការធ្លាក់ចុះចំនួន ១,៩៥ពាន់លានបាត (៥៥,៧លានដុល្លារ) ឬ ៦,៦១% បើធៀបទៅនឹងតួលេខឆ្នាំកន្លងទៅ។ បើគិតតែតួលេខលក់ផ្ទាល់របស់ក្រុមហ៊ុន TFMAMA វិញគឺទំហំនៃការមានការធ្លាក់ចុះចំនួន ៥,៥៦%ផងដែរ។

ចិន៖ តម្លៃរបស់ក្រុមហ៊ុន ByteDance ដែលជាក្រុមហ៊ុនគ្រប់គ្រងលើបណ្តាញសង្គម TikTok បានកើនឡើងរហូតដល់ ៥៥០ពាន់លានដុល្លារ នេះបើយោងតាមការចុះផ្សាយរបស់បណ្តាញសារព័ត៌មាន VN Express នៅក្នុងថ្ងៃទី២៥ ខែកុម្ភៈ។ ការវាយតម្លៃអំពីតម្លៃរបស់ក្រុមហ៊ុន ByteDance ខាងលើនេះ ត្រូវបានធ្វើឡើងដោយក្រុមហ៊ុនទីផ្សារមូលធនដ៏ធំនៅសហរដ្ឋអាមេរិកគឺក្រុមហ៊ុន General Atlantic។ សូមបញ្ជាក់ជូនថា ក្រុមហ៊ុន General Atlantic ក៏បានដាក់ប្រាក់វិនិយោគជាមួយក្រុមហ៊ុន ByteDance ផងដែរចាប់តាំងពីឆ្នាំ ២០១៧មក ដោយនៅពេលនោះតម្លៃរបស់ក្រុមហ៊ុន ByteDance នៅមានទំហំត្រឹម ២០ពាន់លានដុល្លារប៉ុណ្ណោះ។  យ៉ាងណាក្តី តម្លៃរបស់ក្រុមហ៊ុន ByteDance បានហក់ឡើងយ៉ាងគំហុកក្នុងរយៈពេលប៉ុន្មានឆ្នាំចុងក្រោយនេះ

ប្រេស៊ីល៖ យ៉ាងហោចណាស់មានមនុស្សចំនួន ២៣នាក់បានស្លាប់បាត់ប​ង់ជីវិតដោយសារទឹកជំនន់នៅក្នុងប្រទេសប្រេស៊ីល នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី២៥ ខែកុម្ភៈ។ ទីតាំងដែលកំពុងរងការវាយប្រហារដោយគ្រោះធម្មជាតិខាងលើនេះគឺ រដ្ឋ Minas Gerais ដែលស្ថិតនៅប៉ែកខាងត្បូង​ នៃប្រទេសប្រេស៊ីល។ បើតាមអាជ្ញាធរប្រេស៊ីលបានបញ្ជាក់ថា ក្រៅតែពីបានបណ្តាលឱ្យមានមនុស្សត្រូវស្លាប់បាត់បង់ជីវិតហើយ ទឹកជំនន់ក៏បានបណ្តាលឱ្យពលរដ្ឋប្រេស៊ីលជាង ៤៤០នាក់ត្រូវបង្ខំចិត្តធ្វើការជម្លៀសខ្លួនទៅកាន់កន្លែងសុវត្ថិភាពជាបណ្តោះអាសន្នសិនផងដែរ។ ទន្ទឹមគ្នានេះ មានមនុស្ស ៤៥នាក់កំពុងបាត់ខ្លួន​ ខណៈអាជ្ញាធរប្រេស៊ីលកំពុងដុតដៃដុតជើងតាមស្វែងរកពួកគេ បើទោះជាគេមិនសង្ឃឹមខ្ពស់ថា ពួកគេអាចមានសំណាងនៅរស់មានជីវិតក៏ដោយ៕ អត្ថបទ៖ ភក្តី ប្រភព៖ Channel News Asia

ឥណ្ឌា៖ យ៉ាងហោចណាស់មានមនុស្សចំនួន ៧នាក់បានស្លាប់បាត់បង់ជីវិតនៅក្នុងហេតុការណ៍ធ្លាក់យន្តហោះខ្នាតតូចមួយគ្រឿងនៅក្នុងប្រទេសឥណ្ឌា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២៤ ខែកុម្ភៈ។ យន្តហោះមួយគ្រឿងនេះគឺជាយន្តហោះដឹកអ្នកជំងឺ ប្រភេទ Beechcraft C90 និងស្ថិតនៅក្រោមការគ្រប់គ្រងរបស់ក្រុមហ៊ុនអាកាសចរណ៍ Redbird Airways។ បើតាមអាជ្ញាធរអាកាសចរណ៍ឥណ្ឌាបានបញ្ជាក់ថា ​​​​នៅក្នុងចំណោមជនរងដែលបានស្លាប់បាត់បង់ជីវិតទាំង ៧នាក់នោះរួមាន អ្នកបើកបរយន្តហោះចំនួន ២នាក់​, អ្នកជំងឺម្នាក់ និងមនុស្ស៤នាក់ផ្សេងទៀតគឺជាសាច់ញាតិរបស់អ្នកជំងឺ ដែលត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ។ ប្រភពខាងលើបានបន្តថា យន្តហោះមួយគ្រឿងនេះមានទិសដៅធ្វើដំណើរចេញពីរដ្ឋ Ranchi និងបានផ្លាស់ប្តូរផ្លូវហោះហើរជាបន្ទាន់ដោយសារបញ្ហាអាកាសធាតុ ហើយយន្តហោះបានធ្លាក់នៅក្នុងរដ្ឋ Jharkhand ភាគខាងលិច នៃប្រទេសឥណ្ឌា៕ អត្ថបទ៖ ភក្តី

តៃវ៉ាន់៖ អាជ្ញាធរតៃវ៉ាន់បានរាយការណ៍អំពីករណីកើតមានគ្រោះរញ្ជួយដីកម្រិត ៥,៦រ៉ិចទ័រ នៅក្នុងថ្ងៃទី២៤​ ខែកុម្ភៈ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia។ ទីតាំងដែលបានរងនូវការវាយប្រហារដោយគ្រោះធម្មជាតិនេះគឺស្រុក Yilan ដែលស្ថិតនៅតំបន់ភាគឦសាននៃកោះតៃវ៉ាន់។ បើតាមរដ្ឋបាលអាកាសធាតុតៃវ៉ាន់បានបញ្ជាក់ថា គ្រោះរញ្ជួយដីបានបង្កើតឱ្យមានភាពរំញ័រនៅក្នុងផ្ទៃដីជម្រៅប្រមាណជា ៦៦,៨គីឡូម៉ែត្រ ប៉ុន្តែរហូតមកទល់នឹងពេលនេះនៅមិនទាន់មានសេចក្តីរាយការណ៍អំពីករណីមានជនរងគ្រោះ ឬមានការខូចខាតទ្រង់ទ្រាយធំនៅឡើយទេ។ សូមរម្លឹកជូនថា កាលពីឆ្នាំ២០១៦កន្លងទៅ តំបន់ភាគខាងត្បូងកោះតៃវ៉ាន់ធ្លាប់បានរងការវាយប្រហារដោយគ្រោះរញ្ជួយកម្រិតធ្ងន់ធ្ងរម្តង ដោយពេលនោះគ្រោះរញ្ជួយដីបានកើតឡើងនៅក្នុងកម្រិត ៧,៣រ៉ិចទ័រ និងបានបណ្តាលឱ្យមានមនុស្សជាង១០០នាក់បានស្លាប់បាត់បង់ជីវិត ខណៈនៅក្នុងឆ្នាំ១៩៩៩ គ្រោះរញ្ជួយដីនៅតៃវ៉ាន់បានសម្លាប់មនុស្សអស់ជាង ២,០០០នាក់៕ អត្ថបទ៖ ភក្តី ប្រភព៖ Channel News Asia

អាមេរិក៖ ការធ្វើដំណើរតាមផ្លូវអាកាសនៅសហរដ្ឋអាមេរិកកំពុងប្រឈមនឹងបញ្ហារអាក់រអួលយ៉ាង​ខ្លាំងនៅក្នុងរយៈពេលប៉ុន្មានថ្ងៃចុងក្រោយនេះ ដ្បិតព្យុះព្រឹលទឹកកកនៅបន្តធ្លាក់ក្នុងបរិមាណយ៉ាងច្រើន។ យោងតាមការចុះផ្សារយបសបណ្តាញសារព័ត៌មាន The Strait Time នៅក្នុងថ្ងៃទី២៤ ខែកុម្ភៈបានឱ្យដឹងថា គិតត្រឹមពេលគឺមានជើងហោះហើរសរុបជាងសរុបជាង ៨,០០០ជើងហើយ ដែលត្រូវបានលុបចោលឬពន្យាពេល។ សូមបញ្ជាក់ជូនថា​ ព្យុះព្រឹលទឹកកកបាននិងកំពុងវាយប្រហាររដ្ឋធំៗចំនួន ៤របស់អាមេរិកយ៉ាងខ្លាំង ដោយក្នុងនោះមាន រដ្ឋ New York រដ្ឋ New Jersey រដ្ឋ Connecticut និងរដ្ឋ Massachusetts។ កាលពីថ្ងៃម្សិលមិញ អភិបាលរដ្ឋទាំង ៤ខាងលើនេះក៏បានប្រកាសដាក់រដ្ឋឱ្យស្ថិតនៅក្នុងស្ថានភាពអាសន្ន ហើយថែមទាំងបានប្រកាសផ្អាកសាលារៀន​និងផ្លូវសំខាន់ៗមួយចំនួនជាបណ្តោះអាសន្នសិនផងដែរ ដើម្បីការពារសុវត្ថិភាពរបស់ប្រជាពលរដ្ឋ៕ អត្ថបទ៖ ភក្តី ប្រភព៖

អាមេរិក៖ រដ្ឋចំនួន ៤នៅសហរដ្ឋអាមេរិកបានចេញបទបញ្ជាស្តីពីស្ថានភាពអាសន្នដោយសារតែឥទ្ធិពលរ​បស់ព្យុះព្រឹលទឹកកក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២៣ ខែកុម្ភៈ។ រដ្ឋទាំង ៤នោះរួមាន រដ្ឋ New York រដ្ឋ New Jersey រដ្ឋ Connecticut និងរដ្ឋ Massachusetts។ អត្ថបទ៖ ភក្តី ប្រភព៖ The Strait Time

វៀតណាម៖ យ៉ាងហោចណាស់មានមនុស្សចំនួន ៦នាក់បានស្លាប់បាត់បង់ជីវិតនៅក្នុងហេតុការណ៍ទូកបុកគ្នាជាមួយកាណូតនៅប្រទសវៀតណាម នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២៣​​ ខែកុម្ភៈ។ ហេតុការណ៍គ្រោះថ្នាក់បានកើតឡើងនៅលើបឹង Thac Ba ដែលជាតំបន់រមណីយដ្ឋានដ៏ល្បីមួយកន្លែង ស្ថិតនៅក្នុងខេត្ត Lao Cai​ ភាគពាយ័ព្យនៃប្រទេសវៀតណាម។ បើតាមអាជ្ញាធរវៀតណាមបានបញ្ជាក់ថា គ្រោះថ្នាក់បានកើតឡើងរវាងទូកដឹកអ្នកដំណើរ មួយគ្រឿងផ្ទុកមនុស្សចំនួន ២៣នាក់ និងកាណូតដឹកថ្មមួយគ្រឿង ដែលត្រូវបើដឹកជញ្ជូនថ្មឆ្លងកាត់តំបន់កើតហេតុនោះ។ ប្រភពខាងលើបានបន្តថា នៅក្នុងចំណោមជនរងគ្រោះទាំង ៦នាក់នោះក៏មានកុមារចំនួន ២នាក់ផងដែរ ហើយភាគច្រើននៃអ្នកដំណើរ គឺជាក្រុមគ្រួសារ ដែលទើបត្រលប់មកពីលេងស្រុកកំណើរវិញក្នុងឱ្យកាសបុណ្យចូលឆ្នាំចិន-វៀតណាមកន្លងទៅថ្មីៗនេះ៕ អត្ថបទ៖ ភក្តី ប្រភព៖ The

ម៉ាឡេស៊ី៖ ប្រទេសម៉ាឡេស៊ីបានរងការវាយប្រហារដោយគ្រោះរញ្ជួយដីកម្រិត ៧,១រ៉ិចទ័រ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី២៣ ខែកុម្ភៈ។ ទីតាំងដែលបានរងការវាយប្រហារដោយគ្រោះធម្មជាតិនេះគឺកោះ Borneo ដែលស្ថិតនៅក្នុងរដ្ឋ Sabah ភាគខាងជើង នៃប្រទេសម៉ាឡេស៊ី។ បើតាមអាជ្ញាធរម៉ាឡេស៊ីបានឱ្យដឹងថា គ្រោះរញ្ជួយដីបានកើតឡើងនៅម៉ោងប្រមាណជា ១២ និង ៥៧ រំលងអាធ្រាត្រ និងបានបង្កើតឱ្យ​ភាពរំញ័រនៅក្នុងផ្ទៃយ៉ាងជ្រៅផងដែរ។ យ៉ាងណាក្តី គ្រោះរញ្ជួយដីនេះមិនបានបណ្តាលឱ្យមានរលកយក្សស៊ូណាមិនោះទេ ហើយគិតត្រឹមពេលនេះក៏នៅមិនទាន់មានសេចក្តីរាយការណ៍ផ្លូវការបញ្ជាក់ថា មានជនរងគ្រោះ ឬមានអគារត្រូវដួលរលំដែរ៕ អត្ថបទ៖ ភក្តី ប្រភព៖ Channel News Asia