ឥណ្ឌូណេស៊ី៖ តួលេខអ្នកស្លាប់បាត់បង់ជីវិតដោយសារបញ្ហាទឹកជំនន់ និងបាក់ដីនៅក្នុងប្រទេសឥណ្ឌូណេស៊ីបានកើនឡើងដល់ខ្ទង់ ៨០០នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time  នៅរសៀលថ្ងៃទី៤ ខែធ្នូ។ ទន្ទឹមគ្នានេះតួលេខអ្នកបាត់ខ្លួនក៏បានកើតឡើងដល់ចំនួន ៥៦៤នាក់ផងដែរ។ នៅចំពោះមុខគ្រោះមហន្តរាយដ៏គួរឱ្យរន្ធត់នេះ រដ្ឋមន្ត្រីក្រសួងថាមពលឥណ្ឌូណេស៊ី បានប្រកាសថា នឹងដកហូតលិខិតអនុញ្ញាតរុករករ៉ែពីក្រុមហ៊ុនណា ដែលបានរំលោភទៅលើច្បាប់នៅលើកោះស៊ូម៉ាត្រា ដ្បិតសកម្មភាពរុករករ៉ែដោយគឃ្លើនរបស់ក្រុមហ៊ុនទាំងអស់នោះបានរួមចំណែកបំផ្លិចបំផ្លាញធនធានធម្មជាតិនៅលើកោះ និងធ្វើឱ្យកោះត្រូវប្រឈមនឹងគ្រោះមហន្តរាយកាន់តែធ្ងន់ធ្ងរទៅៗ៕ អត្ថបទ៖ ភក្តី ប្រភព៖ The Strait Time

ស្រីលង្កា៖ តួលេខអ្នកស្លាប់បាត់បង់ជីវិតដោយសារទឹកជំនន់នៅក្នុងប្រទេសស្រីលង្កាបានកើនឡើងដល់ចំនួន ៤៦៥នាក់ហើយ​ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី៣ ខែធ្នូ។ គួរកត់សម្គាល់ថា ទឹកជំនន់និងអមដោយបញ្ហាបាក់ដី ដែលកំពុងវាយប្រហារតំបន់សំខាន់ៗជាច្រើននៅក្នុងប្រទេសស្រីលង្កានៅពេលនេះគឺជាឥទ្ធិពលរបស់ព្យុះស៊ីក្លូនឌីតវ៉ា។ ប្រភពខាងលើបានបន្តថា ក្រៅតែពីបានបណ្តាលឱ្យមានមនុស្សត្រូវស្លាប់បាត់បង់ជីវិតអស់ជាច្រើនាក់ហើយ បញ្ហាទឹកជំនន់ដ៏ធ្ងន់ធ្ងរខាងលើនេះក៏បានធ្វើឱ្យប៉ះពាល់ និងបំផ្លាញទាំងស្រុងនូវផ្ទះរបស់ប្រជាពលរដ្ឋអស់ជាច្រើនខ្នងផងដែរ។ នៅចំពោះមុខស្ថានភាពអាសន្ននេះ អាជ្ញាធរស្រីលង្កាបានប្រកាសផ្តល់ប្រាក់ឧបត្ថម្ភដល់គ្រួសារដែលបានបាត់បង់ផ្ទះទាំងស្រុងនូវទឹកប្រាក់ចំនួន ២,៥លានរូពី (២៧,០០០ដុល្លារ) ក្នុងមួយគ្រួសារសម្រាប់សាងសង់ផ្ទះឡើងវិញ ខណៈគ្រួសារដែលត្រូវសម្អាតផ្ទះនឹងត្រូវទទួលបានប្រាក់ឧបត្ថម្ភចំនួន ២៥,០០០រូពី (៨១ដុល្លារ)ក្នុងមួយគ្រួសារ៕ អត្ថបទ៖ ភក្តី ប្រភព៖  Channel News Asia      

ថៃ៖ តារាសម្តែងថៃ អ្នកនាង Nana Rybena ត្រូវបានប៉ូលិសចាប់ខ្លួនហើយ ក្នុងសំណុំរឿងក្លែងបន្លំប្រាក់ ដែលធ្វើឱ្យជនរងគ្រោះជាច្រើននាក់ត្រូវខាតបង់ប្រាក់ជាង ៤០០លានបាត (ជាង ១២លានដុល្លារ) នេះបើយោងតាមការចុះផ្សាយរបស់បណ្តាញសារព័ត៌មាន The Thaiger នៅក្នុងថ្ងៃទី៣ ខែធ្នូ។ នៅក្នុងសំណុំរឿងដដែលនេះប៉ូលិសថៃក៏បានចាប់ខ្លួនប្តីរបស់តារាវ័យ ៤៥ឆ្នាំរូបនេះម្នាក់ទៀតមានឈ្មោះថា Way ផងដែរ។ បើតាមការិយាល័យស៊ើបអង្កេតកណ្តាល (Central Investigation Bureau) របស់ប្រទេសថៃបានបញ្ជាក់ថា ជនសង្ស័យទាំង ២នាក់ប្តីប្រពន្ធនេះបានធ្វើសកម្មភាពបោកបញ្ឆោតមិត្តភក្តិ និងអ្នកស្គាល់ពួកគេជាច្រើននាក់ឱ្យដាក់ប្រាក់វិនិយោគក្នុងអាជីវកម្មរបស់ពួកគាត់និងសន្យាថា ផ្តល់ប្រាក់ត្រលប់ទៅកាន់ក្រុមជនរងគ្រោះវិញក្នុងចំនួនយ៉ាងច្រើន។ យ៉ាងណាក្តី រហូតមកទល់នឹងពេលនេះក្រុមជនរងគ្រោះមិនអាចទទួលបានប្រាក់តាមការសន្យាឡើយ ហើយមានជនរងគ្រោះរងចំនួន ១៧បានសម្រេចដាក់ពាក្យប្តឹងទៅកាន់តុលារ ទើបថ្មីៗនេះមានការស៊ើបអង្កេតនិងឈានដល់ការចាបខ្លួនពួកគេតែម្តង៕ អត្ថបទ៖

ចិន៖ ប្រទេសចិនបានសម្រេចដំឡើងពន្ធលើផលិតផលសម្រាប់ពន្យាកំណើតមួយចំនួន រួម​មានថ្នាំពន្យាកំណើត ឧបករណ៍ពន្យាកំណើត និងស្រោមអនាម័យផងដែរ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២ ខែធ្នូ។ ការសម្រេចដំឡើងថ្លៃលើផលិតផលពន្យាកំណើតទាំងអស់នេះគឺត្រូវបានធ្វើឡើងដើម្បីជំរុញអត្រាកំណើត ពោលគឺលើកទឹកចិត្តឱ្យប្រជាពលរដ្ឋមានកូនឱ្យបានច្រើន។ ប្រភពខាងលើបានបន្តថា ស្ថិតនៅក្រោមការអនុវត្តច្បាប់ដំឡើងពន្ធលើផលិតផលពន្យាកំណើតថ្មីនេះ គឺគ្រប់អតិថិជនទាំងអស់នឹងបង់ថ្លៃលើអត្រាពន្ធ VAT ចំនួន ១៣% បន្ថែមទៀតលើមុខទំនិញដូចបានជម្រាបជូនខាងលើ ហើយការដំឡើងពន្ធនេះក៏ជាការដំឡើងពន្ធលើផលិតអនុគ្រោះពន្ធដ៏ខ្ពស់មិនធ្លាប់មានផងដែរ បើគិតចាប់តាំងពីឆ្នាំ ១៩៩៣មក។ សូមបញ្ជាក់ជូនថា ប្រទេសចិនបានប្រឈមនឹងបញ្ហាធ្លាក់ចុះអត្រាកំណើតជាច្រើនឆ្នាំជាប់គ្នាមកហើយ ខណៈរដ្ឋាភិបាលចិនបានព្យាយាមដាក់ចេញគោលនយោបាយថ្មីៗជាច្រើន រួមមានទាំងការផ្តល់ប្រាក់ឧបត្ថម្ភតាមចំនួនកូននៅក្នុងគ្រួសារផង ដើម្បីលើកទឹកចិត្តឱ្យពលរដ្ឋខ្លួនយកកូនឱ្យបានច្រើន៕ អត្ថបទ៖ ភក្តី ប្រភព៖ The Strait Time

ឥណ្ឌូណេស៊ី៖ តួលេខអ្នកស្លាប់បាត់បង់ជីវិតដោយសារបញ្ហាទឹកជំនន់ និងបាក់ដីនៅក្នុងប្រទេសឥណ្ឌូណេស៊ីបានកើនឡើងដល់ចំ​នួន ៥០២នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន BBC នៅរសៀលថ្ងៃទី១ ខែធ្នូ។ ទន្ទឹមគ្នានេះតួលេខអ្នកបាត់ខ្លួនក៏បានកើតឡើងដល់ចំនួន ៥០៨នាក់ផងដែរ។ បើតាមអាជ្ញាធរឥណ្ឌូណេស៊ីបានបញ្ជាក់ថា ក្រៅពីបានបណ្តាលឱ្យមានមនុស្សជាច្រើននាក់ត្រូវស្លាប់បាត់បង់ជីវិតនិងបាត់ខ្លួនហើយ​ ជំនន់ទឹកភ្លៀងដ៏ធ្ងន់ធ្ងរនេះក៏បណ្តាលឱ្យមនុស្សជាង ២,៥០០នាក់បានរងរបួសធ្ងន់និងស្រាល ខណៈមនុស្សជាង ៨០,០០០នាក់ផ្សេងទៀតត្រូវជម្លៀសខ្លួនទៅស្នាក់នៅមជ្ឈមណ្ឌលសង្គ្រោះជាបណ្តោះអាសន្ន។ គួររម្លឹកជូនថា ទីតាំងដែលកំពុងរងការវាយប្រហារដោយគ្រោះធម្មជាតិខាងលើនេះគឺជាខេត្ត West Sumatra ដែលជាដែនដីស្ថិតនៅលើកោះស៊ូម៉ាត្រា ភាគខាងលិចនៃប្រទេសឥណ្ឌូណេស៊ី៕ អត្ថបទ៖ ភក្តី ប្រភព៖ BBC

ថៃ៖ តួលេខអ្នកស្លាប់ដោយសារបញ្ហាទឹកជំនន់នៅភាគខាងត្បូងប្រទេសថៃ បានកើនឡើងដល់ ១៧០នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia ដោយគិតត្រឹមយប់ថ្ងៃអាទិត្យ ទី៣០ ខែធ្នូ។ ទន្ទឹមគ្នានេះ មានមនុស្សចំនួន ១០២នាក់ផ្សេងទៀត ត្រូវបានរាយការណ៍ថា បានរងរបួសធ្ងន់ និងស្រាលផងដែរ។ ប្រភពខាងលើបានបន្តថាថា ក្រៅតែពីបានបណ្តាលឱ្យមានមនុស្សត្រូវស្លាប់បាត់បង់ជីវិតហើយ បញ្ហាទឹកជំនន់ខាងលើនេះក៏បានបង្កផលប៉ះពាល់ដល់ពលរដ្ឋថៃប្រមាណជា ១,៩លាននាក់ ខណៈនៅក្នុងនោះមានពលរដ្ឋប្រមាណជា ៥,០០០នាក់ត្រូវបង្ខំចិត្តធ្វើការជម្លៀសខ្លួនជាបន្ទាន់ផងដែរ។ គួររម្លឹកជូនថា​ កាលពីសប្តាហ៍មុនរដ្ឋាភិបាលថៃបានប្រកាសផ្តល់ប្រាក់ឧបត្ថម្ភចំនួន ២លានបាត (៦២,០០០ដុល្លារ) ទៅកាន់ក្រុមគ្រួសារដែលមានសមាជិកម្នាក់បានស្លាប់ដោយសារទឹកជំនន់ ដើម្បីយកទៅរៀបចំពិធីបុណ្យសព៕ អត្ថបទ៖ ភក្តី ប្រភព៖ Channel News Asia  

ឥណ្ឌូណេស៊ី៖ តួលេខអ្នកស្លាប់បាត់បង់ជីវិតដោយសារបញ្ហាទឹកជំនន់ និងបាក់ដីនៅក្នុងប្រទេសឥណ្ឌូណេស៊ីបានកើនឡើងដល់ចំ​នួន ៣០៣នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time ដោយគិតត្រឹមយប់ថ្ងៃទី២៩ វិច្ឆិកា។ ទន្ទឹមគ្នានេះក៏នៅមានមនុស្សចំនួន ២៧៩នាក់ផ្សេងទៀតកំពុតតែបាត់ខ្លួនផងដែរ។ គួររម្លឹកជូនថា ទីតាំងដែលកំពុងរងការវាយប្រហារដោយគ្រោះធម្មជាតិខាងលើនេះគឺជាខេត្ត West Sumatra ដែលជាដែនដីស្ថិតនៅលើកោះស៊ូម៉ាត្រា ភាគខាងលិចនៃប្រទេសឥណ្ឌូណេស៊ី។ បើតាមអាជ្ញាធរឥណ្ឌូណេស៊ីបានបញ្ជាក់ថា ក្រៅពីបានបណ្តាលឱ្យមានមនុស្សជាច្រើននាក់ត្រូវស្លាប់បាត់បង់ជីវិតនិងបាត់ខ្លួនហើយ​ ជំនន់ទឹកភ្លៀងដ៏ធ្ងន់ធ្ងរនេះក៏បានបង្ខំឱ្យពលរដ្ឋជាង ៨០,០០០នាក់ផ្សេងទៀតត្រូវជម្លៀសខ្លួនទៅស្នាក់នៅមជ្ឈមណ្ឌលសង្គ្រោះជាបណ្តោអាសន្នសិនផងដែរ៕ ប្រភព៖ The Strait Time

ស្រីលង្កា៖ រដ្ឋាភិបាលស្រីលង្កាបានប្រកាសដាក់ប្រទេសក្នុងគ្រាមានអាសន្ន ក្រោយជួបប្រទះនឹងបញ្ហាទឹកជំនន់ដ៏ធ្ងន់ធ្ងរមួយ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី២៩ ខែវិច្ឆិកា។ ទឹកជំនន់និងអមដោយបញ្ហាបាក់ដី ដែលកំពុងវាយប្រហារតំបន់សំខាន់ៗជាច្រើននៅក្នុងប្រទេសស្រីលង្កានៅពេលនេះ គឺជាជំនន់ទឹកភ្លៀងដែលបានបង្កឡើងដោយសារតែឥទ្ធិពលរបស់ព្យុះស៊ីក្លូនឌីតវ៉ា។ បើតាមអាជ្ញាធរស្រីលង្កាបានបញ្ជាក់ថា គិតត្រឹមពលនេះគ្រោះធម្មជាតិដ៏កម្រនេះបានបណ្តាលឱ្យពលរដ្ឋស្រីលង្កាចំនួន ១៥៣នាក់បានស្លាប់បាត់បង់ជីវិត និងមនុស្សចំនួន ១៩១នាក់ផ្សេងទៀតកំពុងបាត់ខ្លួន។ ទន្ទឹមគ្នានេះ ទឹកជំនន់ក៏បានបង្កឱ្យមានប៉ះពាល់ដល់ការរស់នៅរបស់ប្រជាពលរដ្ឋជាច្រើននាក់យ៉ាងខ្លាំងផងដែរ ដោយក្នុងនោះមានផ្ទះចំនួន ២,០០០ខ្នងត្រូវបានបំផ្លាញទាំងស្រុង ពលរដ្ឋជាង ១០៨,០០០នាក់ត្រូវ​បង្ខំចិត្តធ្វើការជម្លៀសខ្លួនចេញពីផ្ទះសម្បែងជាបន្ទាន់ ហើយត្រូវទៅស្នាក់នៅរួមគ្នានៅមជ្ឈមណ្ឌលសង្គ្រោះជាបណ្តោះអាសន្ន៕ អត្ថបទ៖ ភក្តី ប្រភព៖ Channel News Asia

ហុងកុង៖ រដ្ឋបាលក្រុងហុងបានរៀបចំពិធីកាន់ទុក្ខជាផ្លូវការរយៈពេល ៣ថ្ងៃ​ ចំពោះជនរងគ្រោះដែលបានស្លាប់បាត់បង់ជីវិតនៅក្នុងហេតុការណ៍ភ្លើងឆេះអគារដ៏គួរឱ្យរន្ធត់មួយ នេះបើយោងតាមការចុះផ្សាយរបស់បណ្តាញសារព័ត៌មាន South China Morning Post នៅក្នុងថ្ងៃទី៣០ ខែវិច្ឆិកា។ ពិធីកាន់ទុក្ខដែលត្រូវធ្វើឡើងនៅទូទាំងក្រុងហុងកុងនេះគឺត្រូវធ្វើឡើងចាប់ទីថ្ងៃសៅរ៍ ទី២៩ ខែវិច្ឆិកា រហូដល់ថ្ងៃច័ន្ទ ទី១ ខែធ្នូ។ បើតាមអាជ្ញាធរក្រុងហុងកុងបានបញ្ជាក់ថា គិតត្រឹមពេលនេះតួលេខអ្នកស្លាប់បានកើនឡើងដល់ចំនួន ១២៨នាក់ និងជាច្រើននាក់បានរងរបួសធ្ងន់និងស្រាល ខណៈមនុស្ស ១៥០នាក់ផ្សេងទៀតនៅតែបន្តបាត់ខ្លួន។ ប្រភពខាងលើបានបន្តថា ចំពោះអ្នកដែលកំពុងបាត់ខ្លួនទាំងអស់នោះគឺទំនងជាបានស្លាប់នៅក្នុងអគ្គិភ័យអស់ទៅហើយ តែដរាបណាគេនៅមិនទាន់អាចរកឃើញសាកសពពួកគេ គឺអាជ្ញាធរនៅតែចាត់ទុកថា ពួកគេកំពុងបាត់ខ្លួន និងមិនទាន់រាប់បញ្ចូលក្នុងតួលេខអ្នកស្លាប់ជាផ្លូវការនោះទេ៕ អត្ថបទ៖ ភក្តី ប្រភព៖ South China Morning

ថៃ៖ តួលេខអ្នកស្លាប់ដោយសារបញ្ហាទឹកជំនន់នៅភាគខាងត្បូងប្រទេសថៃ បានកើនឡើងដល់ ១០៤នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន Khaosod English ដោយគិតត្រឹមយប់ថ្ងៃទី២៧ ខែវិច្ឆិកា។ ទន្ទឹមគ្នានេះ រដ្ឋាភិបាលថៃបានប្រកាសផ្តល់ប្រាក់ឧបត្ថម្ភចំនួន ២លានបាត (៦២,០០០ដុល្លារ) ទៅកាន់ក្រុមគ្រួសារដែលមានសមាជិកម្នាក់បានស្លាប់ដោយសារទឹកជំនន់ ដើម្បីយកទៅរៀបចំពិធីបុណ្យសព។ បើតាមរបាយការណ៍របស់អាជ្ញាធរថៃបានបង្ហាញថា ក្រៅតែពីបានបណ្តាលឱ្យមានមនុស្សត្រូវស្លាប់បាត់បង់ជីវិតហើយ បញ្ហាទឹកជំនន់ខាងលើនេះក៏បានបង្កផលប៉ះពាល់ដល់ពលរដ្ឋថៃប្រមាណជា ១,៩លាននាក់ ខណៈនៅក្នុងនោះមានពលរដ្ឋប្រមាណជា ៥,០០០នាក់ត្រូវបង្ខំចិត្តធ្វើការជម្លៀសខ្លួនជាបន្ទាន់ផងដែរ។ នៅចំពោះមុខស្ថានភាពបន្ទាន់នេះ អាជ្ញាធរថៃបានបញ្ជូនទូកសង្គ្រោះ​ ឧទ្ធម្ភាគចក្រ និងដ្រូន ជាច្រើនគ្រឿងទៅកាន់តំបន់រងគ្រោះ ដើម្បីត្រៀមធ្វើអន្តរាគមន៍ជួយពលរដ្ឋឱ្យបានទាន់ពេលវេលា។ សូមបញ្ជាក់ជូនផងដែរថា ទឹកជំនន់ដែលកំពុងវាយប្រហារប្រទេសថៃនៅពេលនេះគឺជាទឹកជំនន់ដ៏ធ្ងន់ធ្ងរមិនធ្លាប់មាននោះទេនៅក្នុងរយៈពេល ៣០០ឆ្នាំចុងក្រោយនេះ៕ អត្ថបទ៖ ភក្តី ប្រភព៖ Khaosod English