ថៃ៖ ពលរដ្ឋថៃមួយចំនួនបានសម្តែងការមិនពេញចិត្តយ៉ាងខ្លាំងចំពោះលោក Dominic Williams ដែលជាឯកអគ្គរាជទូតនៃប្រទេសអង់គ្លេសប្រចាំនៅក្នុងប្រទេសកម្ពុជា ក្រោយរូបលោកបានបង្ហោះរូបភាពនំបង្អែមខ្មែរមួយសន្លឹកនៅលើប​ណ្តាញសង្គម Facebook ផ្លូវការរបស់គាត់។ យោងតាមការចុះផ្សាយរបស់បណ្តាញសារព័ត៌មាន The Thaiger បានឲ្យដឹងថា ប្រតិកម្មរបស់ពលរដ្ឋថៃបានផ្ទុះឡើងជាច្រើនថ្ងៃមកហើយ​ ខណៈពួកគេបានប្រើប្រាស់បណ្តាញសង្គមសម្រាប់ធ្វើជាវេទិកាបញ្ចេញមតិផ្ទាល់ខ្លួនរបស់ពួកគេម្នាក់ៗ។ ប្រភពខាងលើបានបន្តថា កំហឹងរបស់ពលរដ្ឋថៃបានកើតឡើងក្រោមហេតុផលថា ពួកគេគិតថានំបង្អែមដែលលោក Dominic Williams បានយកទៅបង្ហោះជាសាធារណៈនោះគឺជានំបង្អែមរបស់ថៃដែលមានតាំងពីសម័យអយុធ្យាមកម្ល៉េះ ខណៈដែលលោកឯកអគ្គរាជទូតអង់គ្លេសបានយកនំបង្អែមទាំងនោះទៅបង្ហោះដោយបញ្ជាក់ថា ជាបង្អែមរបស់ខ្មែរ។ សូមបញ្ជាក់ជូនថា នំបង្អែមដែលជាប្រធានបទចម្បងធ្វើឲ្យពលរដ្ឋថៃមិនសប្បាយចិត្តនោះមានដូចជា បាយដំណើបខ្នុរ ត្រាវកូរ ត្រាវខ្ទិះ សង់ខ្យាល្ពៅ សង់ខ្យាកាត់ អាកោខ្ទិះ  នំច័ក្កច័ន នំផ្លែអាយ​ នំទ្រាបតើយ នំសរសៃមាស និងនំជាច្រើមុខផ្សេងទៀត ដែលសុទ្ធតែជានំបុរាណរបស់ខ្មែរ និងមានវត្តមាននៅកម្ពុជាមុនសម័យអាយុធ្យារបស់ថៃទៅទៀត៕

អាមេរិក៖ ទីក្រុងវ៉ាស៊ីនតោនបានប្រកាសផ្តល់ជំនួយដែលមានតម្លៃចំនួន ៤០០លានដុល្លារបន្ថែមទៀតទៅកាន់ប្រទេសអ៊ុយក្រែន នេះបើយោងទៅតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសោរ៍ ទី៤ ខែមីនានេះ។ នៅក្នុងកញ្ចប់ជំនួយដែលមានតម្លៃ ៤០០លានដុល្លារនេះនឹងមានបញ្ចូលទាំងអាវុធ រំសេវ ហើយអ្វីដែលជាជំនួយគួរឲ្យកត់សម្គាល់នោះគឺស្ពានយុទ្ធសាស្រ្តចំនួនមួយខែ្ស។ ប្រភពខាងលើបានបន្តថា ស្ពានយុទ្ធសាស្រ្តគឺជាជំនួយថ្មីមួយដែលអាមេរិកមិនធ្លាប់បានផ្តល់ជូនអ៊ុយក្រែននោះទេចាប់តាំងពីសង្គ្រាមបានផ្ទុះឡើងអស់រយៈពេលជាង ១ឆ្នាំមក។ ការសម្រេចផ្តល់ជំនួយសម្រាប់សាងសង់ស្ពានយុទ្ធសាស្រ្តនៅពេលនេះគឺត្រូវបានធ្វើឡើងដោយផ្អែកទៅតាមស្ថានជាក់ស្តែងនៅក្នុងសមរភូមិក្នុងប្រទេសអ៊ុយក្រែន ដោយស្ពានយុទ្ធសាស្រ្តមួយនេះនឹងក្លាយជាចរន្តផ្លូវដ៏សំខាន់មួយដែលជួយឲ្យកងទ័ពអ៊ុយក្រែនអាចធ្វើការចល័តរថគ្រោះ និងរថពាសដែកបានយ៉ាងឆាប់រហ័ស៕ អត្ថបទ៖ ភក្តី ប្រភព៖ The Strait Time

ម៉ាឡេស៊ី៖ តួលេខអ្នកបាត់បង់ជីវិតនៅក្នុងគ្រោះទឹកជំនន់នៅក្នុងប្រទេសម៉ាឡេស៊ីបានបន្តកើនឡើងរហូតដល់ ៣នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅល្ងាចថ្ងៃសុក្រ ទី៣ ខែមីនាម្សិលមិញនេះ។ ទន្ទឹមនឹងតួលេខអ្នកស្លាប់បានបន្តកើនឡើង ចំនួនជនរងគ្រោះដែលត្រូវបង្ខំចិត្តធ្វើការជម្លៀសខ្លួនចេញពីផ្ទះសម្បែងរបស់ពួកគេក៏មានការកើ​នឡើងផងដែរ ពោលគឺកើនឡើងពីជាង ២ម៉ឺននាក់រហូតដល់ជាង ៣៥,០០០នាក់ហើយ។ ទីភ្នាក់ងារជាតិគ្រប់គ្រងគ្រោះមហន្តរាយម៉ាឡេស៊ីបានបញ្ជាក់ថា តួលេខជនរងគ្រោះទាំងករណីស្លាប់បាត់បង់ជីវិតនិងករណីធ្វើការជម្លៀសខ្លួនអាចបន្តកើនឡើង ដ្បិតស្ថានភាពទឹកជំនន់អាចនឹងបន្តផ្តល់ការគំរាមគំហែងកម្រិតខ្ពស់រហូតដល់ចុងសប្តាហ៍នេះ។ គួរបញ្ជាក់ជូនថា​ ទឹកជំនន់ដែលដែលគកំពុងគំរាមគំហែងរដ្ឋ Johor នៃប្រទេសម៉ាឡេស៊ីនៅពេលនេះគឺជាជំនន់ទឹកភ្លៀង ដែលបានកើតឡើងក្រោយពេលមានភ្លៀងធ្លាក់យ៉ាងជោគជាំនិងជាច្រើនថ្ងៃបន្តបន្ទាន់គ្នា។ យោងទៅតាមការព្យាករណ៍អាកាសធាតុរបស់អាជ្ញាធរម៉ាឡេស៊ីបានបញ្ជាក់ថា ចាប់ពីដើមសប្តាហ៍ក្រោយទៅគឺភ្លៀងនឹងលែងធ្លាក់ខ្លាំងទៀតហើយ ដូចនេះស្ថានភាពទឹកជំនន់ក៏អាចត្រលប់មករកភាពល្អប្រសើរវិញផងដែរ៕ អត្ថបទ៖ ភក្តី ប្រភព​៖ Channel News Asia

តៃវ៉ាន់៖ សហរដ្ឋអាមេរិកបានសម្រេចលក់អាវុធសំខាន់ៗដែលមានតម្លៃ ៦១៩ លានដុល្លារឲ្យទៅកោះតៃវ៉ាន់ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia កាលពីល្ងាចថ្ងៃព្រហស្បតិ៍ ទី២ ខែមីនាម្សិលមិញនេះ។ ការសម្រេចខាងលើនេះត្រូវបានធ្វើឡើងភ្លាមៗក្រោយតៃវ៉ាន់បានរាយការណ៍ថា ប្រទេសចិនបានធ្វើការលុកលុយដែនអាកាសរបស់តៃវ៉ាន់ជាលក្ខណៈទ្រង់ទ្រាយចំនួន ២ថ្ងៃជាប់ៗគ្នាកាលពីដើមសប្តាហ៍កន្លងទៅនេះ។ ប្រភពខាងលើបានបន្តថា នៅក្នុងចំណោមអាវុធដែលអាមេរិកបានទៅលក់ទៅឲ្យតៃវ៉ាន់នៅពេលនេះក៏មានបញ្ចូលទាំងមីស៊ីលទំនើបប្រភេទ F-16 ផងដែរ ដែលមីស៊ីលប្រភេទនេះគឺជាមីស៊ីលមានសមត្ថភាពអាចបាញ់ទម្លាក់យន្តហោះចម្បាំងបានយ៉ាងមានប្រសិទ្ធភាព។ បើតាមក្រសួងការពារជាតិតៃវ៉ាន់បានបញ្ជាក់ច្បាស់ៗថា ការសម្រេចទិញអាវុធពីអាមេរិកនៅពេលនេះគឺដើម្បីឆ្លើយតបទៅនឹងការគំរាមគំហែងនិងការដាក់សម្ពាធផ្នែកយោធាពីសំណាក់ប្រទេសចិន៕ អត្ថបទ៖ ភក្តី ប្រភព៖ Channel News Asia

ម៉ាឡេស៊ី៖ ចំនួនពលរដ្ឋម៉ាឡេស៊ីដែលត្រូវបង្ខំចិត្តធ្វើការជម្លៀសខ្លួនចេញពីផ្ទះសម្បែងដើម្បីរត់គេចពីទឹកជំនន់បានបន្តកើនឡើងរហូតដល់ជាង ២៧,០០០នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia កាលពីល្ងាចថ្ងៃព្រហស្បតិ៍ ទី២ ខែមីនាម្សិលមិញនេះ។ ដោយឡែកសម្រាប់របាយការណ៍ស្តីករណីមានអ្នកស្លាប់វិញហាក់មិនមានការប្រែប្រួលនោះទេ ពោលគឺអ្នកស្លាប់បាត់បង់ជីវិតនៅមានចំនួនម្នាក់ដដែល។ គួររម្លឹកជូនថា ទឹកជំនន់ដែលកំពុងតែវាយប្រហាររដ្ឋ Johor របស់ប្រទេសម៉ាឡេស៊ីននៅពេលនេះគឺជាជំនន់ទឹកភ្លៀង​ ដែលបានកើតឡើងក្រោយពេលមានភ្លៀងធ្លាក់យ៉ាងជោគជាំនិងជាច្រើនថ្ងៃបន្តបន្ទាប់គ្នា ខណៈតាមការព្យាករណ៍បានបង្ហាញថា តំបន់កើតហេតុខាងលើនេះនឹងត្រូវបន្តទទួលរងសម្ពាធទឹកក្នុងបរិមានយ៉ាងច្រើនបន្ថែមទៀតរហូតដល់សប្តាហ៍នេះ។ នៅចំពោះមុខស្ថានភាពបន្ទាន់នេះ អាជ្ញាធរម៉ាឡេស៊ីបានសាងសងមជ្ឈមណ្ឌលជួយជនរងគ្រោះជាច្រើនកន្លែង ដើម្បីផ្តល់កន្លែងស្នាក់នៅជាបណ្តោះអាសន្នជូនពួកគេ​ ខណៈគេបានរំពឹងថា ស្ថានភាពទឹកជំនន់អាចនឹងត្រលប់មករកភាពល្អប្រសើរវិញនៅសប្តាហ៍ក្រោយ៕ អត្ថបទ៖ ភក្តី ប្រភព៖ Channel News Asia

ប្រេស៊ីល៖ ក្រសួងកសិកម្មនៃប្រទេសប្រេស៊ីលបានឲ្យដឹងថា ប្រទេសថៃបានសម្រេចផ្អាកការនាំចូលសាច់គោពីប្រទេសស៊ីលជាបណ្តោះអាសន្នហើយក្រោយផ្ទុះករណីមានសាច់គោមានជំងឺ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសុក្រ ទី៣ ខែមីនានេះ។ ក្រៅតែពីប្រទេសថៃក៏នៅមានប្រទេសមួយចំនួនផ្សេងទៀត ដែលបានសម្រេចផ្អាកការនាំចូលសាច់គោពីប្រទេសប្រេស៊ីលជាបណ្តោះអាសន្នផងដែរ មានដូចជាប្រទេសអ៊ីរ៉ង់ ហ្ស៊កដានី និងរុស្ស៊ីជាដើម។ គួររម្លឹកជូនថា បញ្ហាចម្រូងចម្រាសខាងលើនេះបានកើតឡើងក្រោយមានករណីរកឃើញសាច់គោនៅលើទីផ្សារគឺជាសាច់របស់សត្វគោដែលមានជំងឺឆ្កួត ឬ អាចហៅថា Bovine Spongiform Encephalopathy (BSE) ខណៈសាច់គោដែលអាចបង្កឲ្យមានគ្រោះថ្នាក់ចំពោះសុខភាពទាំងនោះត្រូវបានគេដឹងថា មានប្រភពមកពីរដ្ឋ Para ភាគខាងជើងប្រទេសប្រេស៊ីល។ ជុំវិញករណីដ៏រសើបនេះ អាជ្ញាធរប្រេស៊ីលក៏កំពុងបើកការស៊ើបអង្កេតជាបន្ទាន់មួយផងដែរ ដើម្បីរកឲ្យឃើញប្រភពដើមនៃការរាតត្បាតជំងឺនៅក្នុងសាច់គោ ដ៏ដូចជាស្វែងរកអន្តរាគមន៍សម្រាប់ដោះស្រាយបញ្ហានេះឲ្យបានទាន់ពេលវេលា៕ អត្ថបទ៖ ភក្តី ប្រភព៖ 

ថៃ៖ ក្រុមហ៊ុន Tesla បានសាងសង់ស្ថានីយ៍សាកថ្មរថយន្តឆាប់រហ័សនៅក្នុងប្រទេសថៃជាលើកដំបូងហើយ ខណៈស្ថានីយ៍ដ៏ទំនើបនេះក៏ជាស្ថានីយ៍ដំបូងគេបង្អស់នៅក្នុងតំបន់អាស៊ីអាគ្នេយ៍ផងដែរ។ បើយោងទៅតាមការចុះផ្សាយរបស់ ASEAN Skyline បានបញ្ជាក់ថា ស្ថានីយ៍ថ្មីនេះត្រូវបានបង្កើតឡើងនៅឯជាន់ដាក់រថយន្តក្រោមដី នៃអគារពាណិជ្ជកម្ម CentralWorld ដែលស្ថិតនៅកណ្តាលទីក្រុងបាងកក។ ប្រភពខាងលើបានបន្តថា ស្ថានីយ៍សាកថ្មមួយកន្លែងនេះមានឈ្មោះថា First Supercharger Station ដែលមានខ្សែសម្រាប់សាកថ្មចំនួន ៩ផ្សេងគ្នា ដូចនេះគឺវាមានន័យថា​ គេអាចសាកថ្មរថយន្តបានចំនួន ៩គ្រឿងក្នុងពេលដំណាលគ្នា។ ចំណុចដែលគួរចាប់អារម្មណ៍របស់ស្ថានីយ៍សាកថ្មឆាប់រហ័សមួយនេះ គឺគេត្រូវការពេលសាកថ្មត្រឹមតែ ១៥នាទីប៉ុណ្ណោះដើម្បីអនុញ្ញាតឲ្យរថយន្តអាចធ្វើដំណើរបានក្នុងចម្ងាយរហូតដល់ ៣២២គីឡូម៉ែត្រ៕ ប្រភព៖ ASEAN Skyline អត្ថបទ៖ ភក្តី  

តៃវ៉ាន់៖ តៃវ៉ាន់បានរាយការណ៍ថា ចិនបានលុកលុយចូលក្នុងតំបន់ការពារដែនអាកាសរបស់ខ្លួនជាលក្ខណៈទ្រង់ទ្រាយធំចំនួន ២ថ្ងៃជាប់គ្នាមកហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait  Time ​នៅព្រឹកថ្ងៃព្រហស្បតិ៍ ទី២  ខែមីនានេះ។ បើតាមអាជ្ញាធរតៃវ៉ាន់បានបញ្ជាក់ថា គិតត្រឹមរយៈពេល ២ថ្ងៃចុងក្រោយនេះគឺចិនបានបញ្ជូនយន្តហោះចម្បាំងរបស់ខ្លួនចំនួន ២១គ្រឿងឲ្យហោះចូលដែនអាកាសរបស់តៃវ៉ាន់ដោយគ្មានការអនុញ្ញាតទាល់តែសោះ។ ប្រភពខាងលើបានបន្តថា យន្តហោះចម្បាំងរបស់ចិនដែលបានហោះចូលទៅដល់ទឹកដីតៃវ៉ាន់នោះមាន ២ប្រភេទ គឺប្រភេទ J-10 Fighter ចំនួន ១៧គ្រឿង និងប្រភេទ J-16 Fighter ចំនួន ៤គ្រឿង។ សម្រាប់តៃវ៉ាន់បានអះអាងថា សកម្មភា​ពរបស់ចិននៅពេលនេះគឺមិនមែនជារឿងចៃដន្យឡើយ ពោលគឺជាចេតនាយ៉ាងពិតប្រាកដរបស់ចិនដែលចង់ធ្វើការគំរាមគំហែងមកលើកោះតៃវ៉ាន់ ក៏ដូចជាធ្វើការព្រមានទៅកាន់អាមេរិកផងដែរ ដ្បិតនៅពេលនេះអាមេរិកនិងតៃវ៉ាន់កំពុងមានទំនាក់ទំនងយ៉ាងជិតស្និតជាមួយគ្នា៕ អត្ថបទ៖ ភក្តី ប្រភព៖  The Strait 

ហ្វីលីពីន៖ អាជ្ញាធរហ្វីលីពីនកំពុងដាក់ពង្រាយក្រុមអ្នករុករកនិងក្រុមអ្នកជួយជនរងគ្រោះជាច្រើននាក់​ដើម្បីតាមស្វែងរកឧទ្ធម្ភាគចក្រពេទ្យមួយគ្រឿង ដែលបានបាត់ខ្លួនតាំងពីថ្ងៃពុធ ទី១ ខែមីនាម្សិលមិញម្ល៉េះ ខណៈរហូតមកទល់នឹងពេលនេះគេនៅមិនទាន់ទទួលបានតម្រុយណាមួយអំពីឧទ្ធម្ភាគចក្រនោះទាល់តែសោះ។ បើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃព្រហស្បតិ៍ ទី២ ខែមីនានេះបានបញ្ជាក់ថា នៅក្នុងឧទ្ធម្ភាគចក្រនោះមានផ្ទុកមនុស្សចំនួន ៥នាក់ ដោយក្នុងនោះមានទាំងអ្នកជំងឺម្នាក់ផងដែរ។ ប្រភពខាងលើបានបន្តថា ឧទ្ធម្ភាគចក្រមួយគ្រឿងនេះ គឺជាឧទ្ធម្ភាគចក្ររបស់អង្គភាព Philippine Adventist Medical Aviation Services​ ដែលជាស្ថាប័នមិនរកប្រាក់ចំណូលមួយ និងតែងតែជួយសង្គ្រោះជនរងគ្រោះយ៉ាងយកចិត្តទុលដាក់បំផុតនាពេលកន្លងមក។ ការបាត់ខ្លួនកាលពីថ្ងៃម្សិលមិញនេះ គឺបានកើតឡើងនៅក្នុងអំឡុងពេលដែលឧទ្ធម្ភាគចក្រព្យាយាមដឹកអ្នកជំងឺពីតំបន់ដាច់ស្រយាលទៅកាន់មន្ទីរពេទ្យទំនើបក្នុងទីក្រុង តែសំណាងអាក្រក់ឧទ្ធម្ភាគចក្របាត់ខ្លួនពេលត្រូវហោះកាត់ឆ្នេរសមុទ្រ Sulu ភាគខាងត្បូងនៃប្រទេសហ្វីលីពីន៕ អត្ថបទ៖ ភក្តី ប្រភព៖ The Strait Time

ម៉ាឡេស៊ី៖ យ៉ាងហោចណាស់មានមនុស្សម្នាក់បានស្លាប់បាត់បង់ជីវិតដោយសារទឹកជំនន់ ដែលកំពុងតែវាយប្រហាររដ្ឋ Johor នៃប្រទេសម៉ាឡេស៊ីយ៉ាងខ្លាំងនៅក្នុងរយៈពេលប៉ុន្មានថ្ងៃចុងក្រោយនេះ។ បើយោងតាមការចុះផ្សាយរបស់បណ្តាញសារព័ត៌មាន The Strait Time នៅល្ងាចថ្ងៃពុធ ទី១ ខែកុម្ភៈនេះបានបញ្ជាក់ថា ក្រៅតែពីបានឆក់យកជីវិតពលរដ្ឋម្នាក់ហើយ ឥទ្ធិពលនៃទឹកជំនន់ក៏បានបង្ខំឲ្យពលរដ្ឋម៉ាឡេស៊ីជាង ៦,០០០នាក់ត្រូវជម្លៀសខ្លួនចេញពីលំនៅដ្ឋានរបស់ពួកគេជាបន្ទាន់ផងដែរ។ ប្រភពខាងលើបានបន្តថា ពលរដ្ឋទាំងជាង ៦,០០០នាក់នោះកំពុងស្នាក់នៅក្នុងមជ្ឈមណ្ឌលជួយជនភៀសខ្លួនជាង ៥០កន្លែងផ្សេងគ្នា ខណៈអាជ្ញាធរម៉ាឡេស៊ីក៏កំពុងតែព្យាយាមសាងសងមជ្ឈមណ្ឌលសង្គ្រោះនេះជាច្រើនកន្លែងបន្ថែមទៀតផងដែរ ដើម្បីធានាឲ្យមានកន្លែងដែលមានសុវត្ថិភាពគ្រប់គ្រាន់ចំពោះពលរដ្ឋដែលត្រូវធ្វើការជម្លៀសខ្លួនបន្ថែមទៀត។ គួរបញ្ជាក់ជូនថា ទឹកជំនន់ដែលកំពុងបង្កគ្រោះថ្នាក់នៅក្នុងប្រទេសម៉ាឡេស៊ីនៅពេលនេះគឺជាជំនន់ទឹកភ្លៀង ខណៈយោងទៅតាមការព្យាករណ៍បានបង្ហាញថា នៅក្នុងតំបន់កើតហេតុខាងលើនេះនឹងត្រូវមានភ្លៀងធ្លាក់យ៉ាងខ្លាំងបន្ថែមជាច្រើនទៀតរហូតដល់ចុងសប្តាហ៍នេះ៕ អត្ថបទ៖ ភក្តី ប្រភព៖ The Strait Time