កូរ៉េខាងត្បូង៖ អាជ្ញាធរកូរ៉េខាងត្បូងបានចេញសេចក្តីណែនាំឲ្យពលរដ្ឋខ្លួនមានការប្រុងប្រយ័ត្នអំពីបញ្ហាអាកាសធាតុជាលើកដំបូងនៅក្នុងឆ្នាំនេះក្រោយមានការព្យាករណ៍ថា សីតុណ្ហភាពនៅតាមតំបន់សំខាន់ៗមួយចំ​នួននឹងកើនឡើងក្នុងកម្រិតដ៏ខ្ពស់ នេះបើយោងតាមការចុះផ្សាយរបស់បណ្តាញសារព័ត៌មាន​ The Strait Time។ តំបន់ដែលអាចនឹងរងសម្ពាធខ្ពស់ពីបញ្ហារលកកម្តៅនោះមានដូចជា នៅក្នុងទីក្រុងសេអ៊ូល និងនៅតំបន់ភាគខាងកើតនៃខេត្ត Gyeonggi។ បើតាមអាជ្ញាធរកូរ៉េខាងត្បូងបានបញ្ជាក់ថា សីតុណ្ហភាពនៅក្នុងតំបន់ទាំង​ ២ខាងលើនេះបានកើនឡើងក្នុងកម្រិតខ្ពស់ជាង ៣៣អង្សាសេក្នុងរយៈពេល ២ថ្ងៃជាប់គ្នាមកហើយ ខណៈកម្តៅអាចនឹងបន្តកើនឡើងខ្ពស់ជាងនេះ និងបន្តកើតមានក្នុងរយៈពេលជាច្រើនថ្ងៃបន្ថែមទៀតផងដែរ។ បើតាមរបាយការណ៍របស់អាជ្ញាធរកូរ៉េខាងត្បូងបានបង្ហាញថា ចាប់តាំងពីថ្ងៃទី ២០ ខែឧសភាមកដល់សប្តាហ៍នេះ មានពលរដ្ឋកូរ៉េខាងត្បូងចំនួន ៨៦នាក់ហើយ ដែលបានធ្លាក់រងគ្រោះដោយសាររលកកម្តៅ ហើយនៅក្នុងនោះក៏មានពលរដ្ឋម្នាក់ត្រូវបានរាយការណ៍ថា បានស្លាប់បាត់បង់ជីវិតផងដែរ៕ អត្ថបទ៖ ភក្តី ប្រភព៖  The Strait Time

ថៃ៖ ទីផ្សារលក់រថយន្តអគ្គិសនីនៅក្នុងប្រទេសថៃបានកើនឡើងយ៉ាងគំហុកក្នុងរយៈពេល ៥ខែដំបូងនៅក្នុងឆ្នាំ ២០២៣នេះ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅព្រឹកថ្ងៃសៅរ៍ ទី១៧ ខែមិថុនានេះ។​ បើតាមនាយកដ្ឋានដឹកជញ្ជូនផ្លូវគោកថៃបានបញ្ជាក់ថា មានរថយន្តអគ្គិសនីចំនួន ៣២,៤៥០គ្រឿងត្រូវបានលក់ដាច់អស់ បើគិតពីខែមករារហូតមកដល់ខែឧសភានេះ។ អាជ្ញាធរថៃបានបញ្ជាក់ថា បើសិនធ្វើការប្រៀបធៀបពីកំណើននៃតម្រូវការរថយន្តអគ្គិសនីនេះទៅនឹងរយៈពេលដូចគ្នាកាលពីឆ្នាំមុន គឺមានការកើនឡើងយ៉ាងខ្ពស់ ពោលគឺបានកើនឡើងរហូតដល់ ៤៧៤,៤៣%ឯណោះ។ គួរបញ្ជាក់ជូនថា ដើម្បីលើកទឹកចិត្តឲ្យពលរដ្ឋខ្លួនងាកមកប្រើប្រាស់រថយន្តអគ្គិសនី រដ្ឋាភិបាលថៃបានសម្រេចកាត់បន្ថយការបង់ពន្ធផ្លូវរហូតដល់ ៨០% សម្រាប់រថយន្តអគ្គិសនីគ្រប់ប្រភេទក្នុងរយៈពេលមួយឆ្នាំ៕  អត្ថបទ៖ ភក្តី ប្រភព៖ បាងកកប៉ុស្តិ៍

ចិន៖ ទីក្រុងមួយចំនួនស្ថិតនៅភាគខាងជើងនៃប្រទេសចិនបានបំបែកកំណត់ត្រាមានសីតុណ្ហភាពខ្ពស់បំផុត នេះបើយោងតាមការចុះផ្សាយរបស់បណ្តាញសារព័ត៌មាន The Strait Time កាលពីល្ងាចថ្ងៃសុក្រ ទី១៦ ខែមិថុនាម្សិលមិញនេះ។ ទីក្រុងដែលកំពុងតែប្រឈមនឹងរលកកម្តៅក្នុងកម្រិតយ៉ាងខ្ពស់នោះមានដូចជា ទីក្រុង Shijiazhuang ទីក្រុង Zhangjiakou និងទីក្រុង Chengde ដែលស្ថិតនៅក្នុងខេត្ត Hebei។ បើតាមអាជ្ញាធរចិនបានបញ្ជាក់ថា សីតុណ្ហភាពនៅក្នុងទីក្រុងទាំង ៣ខាងលើនេះបានកើនឡើងដល់ ៤០អង្សាសេ ដែលជាកម្រិតខ្ពស់បំផុតមិនធ្លាប់មាននោះទេនាពេលកន្លងមក ខណៈទីតាំងសំខាន់ៗជាច្រើនផ្សេងទៀតនៅទូទាំងប្រទេសចិនក៏សុទ្ធតែត្រូវប្រឈមជាមួយនឹងបញ្ហារកលកម្តៅនេះផងដែរ គ្រាន់តែសីតុណ្ហភាពមិនទាន់ឡើងដល់កម្រិតបំបែកកំណត់ត្រា។ ស្របពេលដែលសីតុណ្ហភាពបានកើនឡើងខ្ពស់ ប្រទេសចិនក៏ត្រូវប្រឈមនឹងបញ្ហាមួយបន្ថែមទៀតផងដែរ គឺខ្វះខាតអគ្គិសនីសម្រាប់ផ្គត់ផ្គង់ឲ្យបានគ្រប់គ្រាន់ទៅតាមតម្រូវការប្រើប្រាស់ជាក់ស្តែង។ បើយោងតាមការព្យាករណ៍របស់ក្រុមអ្នកជំនាញចិនបានបញ្ជាក់ថា ប្រទេសចិនអាចប្រឈមនឹងបញ្ហាកើនឡើងនៃសីតុណ្ហភាពនេះក្នុងរយៈពេលជាង ២ខែទៀត ដោយគិតចាប់ពីពាក់កណ្តាលខែមិថុនានេះ៕ ប្រភព៖ The Strait Time

ម៉ិចស៊ីកូ៖ អាជ្ញាធរម៉ិចស៊ីកូបានធ្វើការជូនដំណឹងឲ្យពលរដ្ឋខ្លួនត្រូវបង្កើនការប្រុងប្រយ័ត្នចំពោះសុខភាព ក្រោយសីតុណ្ហភាពជាមធ្យមនៅក្នុងប្រទេសបានកើនឡើងដល់កម្រិតដ៏ខ្ពស់បំផុតមួយដែលមិនធ្លាប់កើតមាននាពេលកន្លងមក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសុក្រ ទី១៦ ខែមិថុនានេះ។ បើតាមអាជ្ញាធរម៉ិចស៊ីកូបានបញ្ជាក់ថា សីតុណ្ហភាពជាមធ្យមបានកើនឡើងខ្ពស់ជាង ៣០អង្សាសេ ពោលគឺបានកើតឡើងខ្ពស់ជាងសីតុណ្ហភាពជាទូទៅ ១០ សង្សាសេ។ បើយោងតាមការព្យាករណ៍បានបង្ហាញថា សីតុណ្ហភាពដ៏ក្តៅនេះនឹងបន្តកើតមាននៅក្នុងប្រទេសម៉ិចស៊ីកូក្នុងរយៈពេលចន្លោះពី ១០ ទៅ ១៥ ថ្ងៃទៀត ដោយគិតចាប់ពីពេលជូនដំណឹងនេះ ខណៈរដ្ឋចំនួន ២៣ នៅក្នុងចំណោមរដ្ឋសរុបទាំង ៣២ របស់ប្រទេសម៉ិចស៊ីកូនឹងត្រូវប្រឈមជាមួយបញ្ហារលកកម្តៅនេះខ្លាំងជាងគេ។ សូមបញ្ជាក់ជូនផងដែរនៅក្នុងឆ្នាំ ២០២៣នេះរលកកម្តៅបានផ្តាច់យកជីវិតពលរដ្ឋម៉ិចស៊ីកូអស់ចំនួន ៦នាក់ហើយ ខណៈមានពលរដ្ឋមួយចំនួនបានធ្លាក់ខ្លួនឈឺផងដែរ៕ ប្រភព៖ The Strait

ស្រីលង្កា៖ ដុំគ្រួសក្នុងតម្រងនោមដ៏ធំមិនគួរឲ្យជឿមួយក្នុងប្រវត្តិសាស្រ្តនៃវិស័យវេជ្ជសាស្រ្តត្រូវបានរកឃើញនៅក្នុងខ្លួនអ្នកជំងឺម្នាក់  នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសុក្រ ទី១៦ ខែមិថុ​នានេះ។ ហេតុការណ៍នេះបានកើតឡើងនៅក្នុងមន្ទីរពេទ្យ Colombo Army Hospital ដែលជាមន្ទីរពេទ្យយោធាធំមួយនៅក្នុងប្រទេសស្រីលង្កា​​ ខណៈអ្នកជំងឺនោះគឺជាស្រ្តីចំណាស់ម្នាក់ឈ្មោះ Canistus Coonge និងមានអាយុ ៦២ឆ្នាំ។ ប្រភពខាងលើបានបន្តថា គ្រួសក្នុងតម្រងនោមដែលបានវះកាត់ចេញពីក្នុងខ្លួនរបស់លោកស្រី Canistus Coonge នោះគឺមានប្រវែង ១៣,៣៧ សង់ទីម៉ែត្រ និងមានទម្ងន់ ៨០១ក្រាម។ បើតាមក្រុមអ្នកជំនាញក្នុងវិស័យវេជ្ជសាស្រ្តបានបញ្ជាក់ថា ដុំគ្រួសខាងលើនេះគឺមានទំហំធំជាងដុំគ្រោះធម្មតារហូតដល់ ៥ដង និងជាដុំគ្រួសធំបំផុតនៅលើពិភពលោកផងដែរគិតត្រឹមពេលបច្ចុប្បន្ននេះ។ គួរបញ្ជាក់ថា នាពេលកន្លងមកក្រុមវេជ្ជបណ្ឌិតធ្លាប់បានរកឃើញគ្រោះក្នុងតម្រងនោមក្នុងករណីកម្រមួយចំនួនដែលមានប្រវែងត្រឹម ១២

កូរ៉េខាងជើង៖ ប្រទេសកូរ៉េខាងជើងបានបាញ់មីស៊ីលចំនួន ២គ្រាប់កាលពីថ្ងៃព្រហស្បតិ៍ ទី១៥ ខែមិថុនាម្សិលមិញ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time។ មីស៊ីលដែលកូរ៉េខាងជើងបានបាញ់នោះគឺជាមីស៊ីលបាលីស្ទិកសម្រាប់បាញ់ក្នុងរយៈចម្ងាយជិត ខណៈទីតាំងដែលយោធាកូរ៉េខាងជើងបានបាញ់មីស៊ីលទៅកាន់នោះគឺតំបន់ឆ្នេរសមុទ្រភាគខាងកើត ដែលជាតំបន់នៅជាប់និងប្រទេសកូរ៉េខាងត្បូង។ ប្រភពខាងលើបានបន្តថា ការបាញ់មីស៊ីលរបស់កូរ៉េខាងជើងកាលពីថ្ងៃម្សិលមិញនេះគឺត្រូវបានធ្វើឡើងភ្លាមៗក្រោយពេលដែលប្រមុខដឹកនាំកូរ៉េខាងជើងបានធ្វើការព្រមានជាសាធារណៈជុំវិញការធ្វើសមយុទ្ធយោធារវាងកូរ៉េខាងត្បូងនិងសហរដ្ឋអាមេរិក ពោលគឺមីស៊ីលបានផ្ទុះឡើងក្រោយមានសេចក្តីព្រមានខាងលើនេះមិនបានមួយម៉ោងផងដែរ។ គួរបញ្ជាក់ជូនថា ម្សិលមិញនេះប្រទេសកូរ៉េខាងត្បូងនិងសហរដ្ឋអាមេរិកបានបើកការធ្វើសមយុទ្ធយោធារួមគ្នារយៈពេល ៥ថ្ងៃ ដោយប្រើកងទ័ពចំនួន ២,៥០០នាក់ ខណៈសមយុទ្ធយោធានោះគឺជាសមយុទ្ធប្រើគ្រាប់ពិតទៀតផង៕  អត្ថបទ៖ ភក្តី ប្រភព៖ The Strait Time

ហុងកុង៖ ការសិក្សាមួយរបស់ក្រុមហ៊ុន Venturenix ដែលជាក្រុមហ៊ុនជ្រើសរើសបុគ្គលិកដ៏ធំនៅក្នុងទីក្រុងហុងកុងបានបង្ហាញថា មួយភាគបួននៃកន្លែងធ្វើការងាររបស់មនុស្សនៅក្នុងទីក្រុងហុងកុងនឹងត្រូវជំនួសដោយការប្រើប្រាស់បច្ចេកវិទ្យា AI (បញ្ញាសិប្បនិម្មិត) ដែលជាបច្ចេកវិទ្យាដ៏ទំនើបបំផុតមួយនាពេលបច្ចុប្បន្ននេះ។ ការសិក្សាដែលត្រូវបានចុះផ្សាយបន្តដោយបណ្តាញសារព័ត៌មាន បាងកកប៉ុស្តិ៍ នៅព្រឹកថ្ងៃព្រហស្បតិ៍ ទី១៥ ខែមិថុនានេះបានព្យាករណ៍ថា និន្នាការខាងលើនេះអាចនឹងកើតមាននៅទូទាំងក្រុងហុងកុងក្នុងពេលដ៏ខ្លីខាងមុខ ពោលគឺក្នុងរយៈប្រហែលជា ៥ឆ្នាំទៀត។ ការសិក្សាដដែលនេះបានបញ្ជាក់ថា កម្លាំងពលកម្មរបស់មនុស្សមួយភាគបួន ឬ ២៥% នៃកម្លាំងពលកម្មសរុបក្នុងទីក្រុងហុងកុងនោះគឺអាចស្មើនឹងកន្លែងធ្វើការងាចំនួន ៨០០,០០០កន្លែង ដូចនេះវាន័យថា នៅក្នុងរយៈពេល ៥ឆ្នាំបន្ទាប់ទៀត ពលរដ្ឋហុងកុងចំនួន ៨០០,០០០នាក់នឹងត្រូវប្រឈមនឹងការបាត់បង់ការងារ ឬត្រូវផ្លាស់ប្តូរការងារថ្មី ដ្បិតតួនាទីរបស់ពួកគេនឹងត្រូវជំនួយដោយបច្ចេកវិទ្យា AI វិញម្តង។ របាយការណ៍នៅក្នុងការសិក្សាបានបញ្ជាក់ទៀថា ក្រុមបុគ្គលិកដែលអាចប្រឈមនឹងបញ្ហាខាងលើនេះគឺភាគច្រើនជាក្រុមបុគ្គលិកក្នុងផ្នែករដ្ឋបាល និងផ្នែកសេវាកម្មអតិថិជន៕  អត្ថបទ៖

ឥណ្ឌា៖ ព្យុះស៊ីក្លូនដ៏កំណាចមួយកំពុងបង្កការគំរាមគំហែងយ៉ាងខ្លាំងនៅក្នុងប្រទេសឥណ្ឌា និងប្រទេសប៉ាគីស្ថាន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia កាលពីល្ងាចថ្ងៃពុធ ទី១៤ ខែមិថុនាម្សិលមិញនេះ។ ឥទ្ធិពលរបស់ព្យុះបានបង្កឲ្យមានខ្យល់បក់បោក និងភ្លៀងធ្លាក់យ៉ាងខ្លាំង បង្កឲ្យមានបញ្ហាបាក់ស្រុតដី និងបង្កឲ្យមានការកាត់ផ្តាច់ចរន្តអគ្គិសនីនៅក្នុងទីក្រុង Mandvi ស្ថិតនៅក្នុងរដ្ឋ Gujarat នៃប្រទេសឥណ្ឌា ​និងនៅក្នុងទីក្រុង Karachi នៃប្រទេសប៉ាគីស្ថានផងដែរ។ ប្រភពខាងលើបានបន្តថា គិតត្រឹមពេលនេះមានពលរដ្ឋនៃប្រទេសទាំង ២ខាងលើនេះជាង ១០០,០០០នាក់ហើយ ដែលត្រូវបង្ខំចិត្តធ្វើការជម្លៀសខ្លួនចេញពីផ្ទះសម្បែងរបស់ពួកគេ ដើម្បីទៅស្នាក់នៅកន្លែងមានសុវត្ថិភាពជាបណ្តោះអាសន្នសិន ខណៈរបាយការណ៍ចុងក្រោយមួយក៏បានបង្ហាញថា មានពលរដ្ឋចំនួន ៧នាក់បានស្លាប់បាត់បង់ជីវិតផងដែរ។ បើតាមក្រុមអ្នកជំនាញបានលើកឡើងថា ទំហំនៃផលប៉ះពាល់របស់ព្យុះស៊ីក្លូនទៅកាន់ប្រទេសឥណ្ឌា និងប៉ាគីស្ថានអាចមានធំជាងការជម្រាបជូនខាងលើនេះ ដ្បិតយោងតាមការព្យាករណ៍បានបង្ហាញថា ព្យុះនឹងបន្តមានឥទ្ធិពលខ្លាំងនៅក្នុងរយៈពេលជាច្រើនថ្ងៃបន្ថែមទៀតផងដែរ៕ អត្ថបទ៖ ភក្តី

អាមេរិក៖ បុគ្គលិកម្នាក់ដែលត្រូវបានក្រុមហ៊ុន Starbucks បញ្ឈប់ពីការងារជុំវិញករណីរើសអើងជាតិសាសាន៍ត្រូវទទួលបានប្រាក់សំណងចំនួន ២៥,៦ លានដុល្លារ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃពុធ ទី១៤ ខែមិថុនានេះ។ បុគ្គលិករូបនេះមានឈ្មោះថា Shannon Phillips ​ភេទស្រី ជាអតីតប្រធានគ្រប់គ្រងតំបន់របស់ក្រុមហ៊ុន Starbucks ប្រចាំនៅក្នុងរដ្ឋ New Jersey សហរដ្ឋអាមេរិក។ គួររម្លឹកជូនថា រឿងរ៉ាវចម្រូងចម្រាសខាងលើនេះបានកើតឡើងតាំងពីឆ្នាំ ២០១៨ម្លេះ ដោយពេលនោះមានបុរសជនជាតិស្បែកខ្មៅចំនួន ២នាក់បានចូលទៅក្នុងហាងកាហ្វេ Starbucks មួយកន្លែងនៅក្នុងទីក្រុង Philadelphia នៃរដ្ឋ New Jersey ដើម្បីជួបប្រជុំជាមួយបុរសជនជាតិស្បែកសម្នាក់ ដែលមិនទាន់បានមកដល់ក្នុងហាងកាហ្វេនៅឡើយទេ។ ក្នុងអំឡុងពេលកំពុងរង់ចាំបុរសជនជាតិស្បែកសនោះ បុរសជនជនជាតិស្បែកខ្មៅទាំង ២នាក់នោះមិនទាន់ធ្វើការកម៉្មង់អ្វីសម្រាប់ញ៉ាំឡើយ ខណៈពេលនោះមានបុរសជនជាតិស្បែកខ្មៅម្នាក់ស្រាប់តែឈឺបត់ជើង

អាមេរិក៖ លោក ដូណាល់ ត្រាំ​ បានរងនូវការចោទប្រកាន់ចំនួន ៣៧ករណីជុំវិញករណីបែងចែកឯកសារថ្នាក់ជាតិសំខាន់ៗមួយចំនួនមិនត្រឹមត្រូវមុនពេលដែលរូបលោកត្រូវចាក់ចេញពីសេតវិមាននៅពេលចប់អាណត្តិ នេះបើយោងតាមការចុះផ្សាយរបស់បណ្តាញសារព័ត៌មាន The Thaiger នៅល្ងាចថ្ងៃអង្គារ ទី១៣ ខែមិថុនានេះ។ បើតាមតុលាការសហព័ន្ធអាមេរិកបានបញ្ជាក់ថា សកម្មភាពដែលត្រូវបានចាត់ទុកជាបទល្មើសរបស់អតីតប្រធានាធិបតីអាមេរិករូបនេះមានដូចជា ការលួចកាន់កាប់ លាក់បាំង និងចាត់ចែងឯកសារសំខាន់ៗមួយមិនបានត្រឹមត្រូវ។ គួរបញ្ជាក់ជូនថា លោក ដូណាល់ ត្រាំ គឺជាអតីតប្រធានាធិបតីអាមេរិកដំបូងគេ ដែលត្រូវចោទប្រកាន់នូវបទល្មើសព្រហ្មទណ្ឌជាច្រើនករណី ជាក់ស្តែងនាពេលកន្លងមកតុលាការសហព័ន្ធអាមេរិកធ្លាប់ធ្វើការចោទប្រកាន់ទៅលើរូបគាត់ចំនួន ៣៤ករណីរួចម្តងហើយជុំវិញករណីក្លែងបន្លំកំណត់ត្រាអាជីវកម្មនៅក្នុងទីក្រុងញូវយ៉ក។ ជាងនេះទៅទៀត កាលពីពេលថ្មីៗនេះលោក ដូណាល់ ត្រាំ ក៏ត្រូវប្រឈមនឹងរឿងអាស្រូវផ្លូវភេទមួយករណីជាមួយស្រ្តីម្នាក់ដែលជាអតីតតារាភាពយន្តអាសអាភាសផងដែរ៕ ប្រភព៖ The Thaiger