កូរ៉េខាងត្បូង៖ អាជ្ញាធរសុខាភិបាលនៃប្រទេសកូរ៉េខាងត្បូងបានរកឃើញករណីដំបូងនៃអ្នកជំងឺម្នាក់ ដែលបានស្លាប់បាត់បង់ជីវិតដោយសារមេរោគដ៏កាចសាហាវបំផុតមួយ ដោយមេរោគនោះបានស៊ីខួក្បាលរបស់ជនរងគ្រោះឡើងសុះមុនពេលអ្នកជំងឺត្រូវផុតដង្ហើមស្លាប់។ បើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃអង្គារ ទី២៧ ខែធ្នូនេះបានបញ្ជាក់ថា មេរោគដ៏កម្រនេះមានឈ្មោះថា Naegleria fowleri (នេគ្លីរៀ ហ្វូឡេរី) ខណៈមេរោគប្រភេទធ្លាប់ត្រូវបានគេរកឃើញម្តងនៅអាមេរិក កាលពីឆ្នាំ ១៩៣៧។ ប្រភពខាងលើបានបន្តថា ករណីទីមួយនៃអ្នកជំងឺដែលបានឆ្លងមេរោគ Naegleria fowleri ​នៅក្នុងប្រទេសកូរ៉េខាងត្បូងគឺត្រូវបានរកឃើញចំពោះបុរសម្នាក់ ដែលមានអាយុជាង ៥០ឆ្នាំ មានប្រវត្តិធ្លាប់មកស្នាក់នៅក្នុងប្រទេសថៃរយៈពេល​ ៤សប្តាហ៍ និងបានត្រលប់ទៅដល់ប្រទេសកូរ៉េខាងត្បូងវិញកាលពីថ្ងៃទី ១០ខែធ្នូ ហើយក្រោយពីបានទៅដល់ប្រទេសកំណើតវិញគឺរូបគាត់បានផ្តើមចេញរោគសញ្ញានៃការឆ្លងមេរោគ Naegleria fowleri តែម្តង។ បើតាមក្រុមវេជ្ជបណ្ឌិតកូរ៉េខាងត្បូងបានបញ្ជាក់ថា អាការៈរបស់ជនរងគ្រោះគឺស្រដៀងគ្នាស្ទើរតែ ៩៩,៦%

ហ្វីលីពីន៖ ទឹកជំនន់ដ៏អាក្រក់មួយបានវាយប្រហារប្រទេសហ្វីលីពីនកាលពីថ្ងៃទី ២៥ ខែធ្នូម្សិលមិញនេះ ពោលគឺចំថ្ងៃបុណ្យណូអែលដែលជាថ្ងៃបុណ្យដ៏សប្បាយរីករាយមួយសម្រាប់ពលរដ្ឋដែលជាអ្នកកាន់សាសនាកាតូលិក។ នៅចំពោះស្ថានភាពគ្រោះថ្នាក់នេះពលរដ្ឋហ្វីលីពីនមួយចំនួនមិនមានឱកាសអបអរក្នុងពិធីបុណ្យណូអែលឡើយ ផ្ទុយទៅវិញពួកគេត្រូវបង្ខំចិត្តធ្វើការជម្លៀសខ្លួនចេញពីផ្ទះជាបន្ទាន់ដើម្បីរក្សាអាយុជីវិតរបស់ពួកគេ។ បើយោងតាមទីភ្នាក់ងារគ្រប់គ្រងគ្រោះមហត្តរាយហ្វីលីពីនបានបញ្ជាក់ថា គិតត្រឹមពេលនេះគឺមានពលរដ្ឋហ្វីលីពីនប្រមាណជា ៤៦,០០០នាក់ហើយដែលបង្ខំចិត្តជម្លៀសខ្លួនទៅកាន់កន្លែងមានសុវត្ថិភាពជាបណ្តោះអាសន្ន។ ជាងនេះទៅទៀតបើយោងតាមការចុះផ្សាយរបស់បណ្តាញសារព័ត៌មាន The Strait Times បានបញ្ជាក់ថា មានពលរដ្ឋហ្វីលីពីនចំនួន ២នាក់ត្រូវបានរាយការណ៍ថា បានលង់ទឹកស្លាប់ ខណៈពលរដ្ឋចំនួន ៩នាក់ផ្សេងទៀតកំពុងតែបាត់ខ្លួន៕ អត្ថបទ៖ ភក្តី ប្រភព៖ The Strait Times

អាមេរិក៖ បញ្ហាអាកាសធាតុកំពុងតែគំរាមគំហែងសុវត្ថិភាពប្រជាពលរដ្ឋអាមេរិកយ៉ាងខ្លាំង នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃចន្ទ ទី២៦ ខែធ្នូនេះ។ ស្ថានភាពអាកាសធាតុទូទៅគឺសីតុណ្ហភាពបានចុះត្រជាក់ខ្លាំងនិងបន្ថែមដោយព្យុះព្រឹលទឹកកកក្នុងបរិមាណដ៏ច្រើនសម្បើម ហើយតំបន់ដែលទទួលរងសម្ពាធខ្លាំងជាងគេនោះគឺតំបន់ Buffalo ដែលស្ថិតនៅភាគខាងលិចនៃទីក្រុង New York។ បើតាមអាជ្ញាធរអាមេរិកបានបញ្ជាក់ថា គិតត្រឹមពេលនេះគឺមានពលរដ្ឋអាមេរិកចំនួន ៣១នាក់ហើយ ដែលបានស្លាប់បាត់បង់ជីវិតព្រោះតែបញ្ហាអាកាសធាតុ។ ជាងនេះទៅនេះព្យុះព្រឹលទឹកកបានធ្វើឲ្យរាំងស្ទះការធ្វើដំណើរនៅតាមដងផ្លូវសំខាន់ៗជាច្រើន និងបានកាត់ផ្តាច់ចរន្តអគ្គិសនីនៅតាមតំបន់មួយចំនួនផងដែរ។ គិតត្រឹមពេលនេះគឺមានពលរដ្ឋប្រមាណជា​ ២០០ ០០០នាក់កំពុងរស់នៅក្នុងដោយគ្មានចរន្តអគ្គិសនីប្រើប្រាស់​​ ខណៈនៅតាមតំបន់ខ្លះព្រឹលបានធ្លាក់ក្នុងកម្ពស់រហូតដល់ ២,៤​ ម៉ែត្រឯណោះ៕   អត្ថបទ៖ ភក្តី ប្រភព៖ Channel News Asia

អាមេរិក៖ យ៉ាងយោចណាស់មានពលរដ្ឋអាមេរិកប្រមាណជា ១,៥លាននាក់កំពុងរស់នៅដោយគ្មានភ្លើងអគ្គិសនីប្រើប្រាស់ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃសៅរ៍ ទី២៣ ខែធ្នូនេះ។ បញ្ហាអសកម្មនេះបានកើតឡើងក្រោយពេលដែរតំបន់សំខាន់ៗជាច្រើននៅសហរដ្ឋអាមេរិកបានរងនូវការគំរាមគំហែងដោយខ្យល់ព្យុះ ខណៈសីតុណ្ហភាពបានចុះត្រជាក់ក្នុងកម្រិងដ៏ទាបបំផុតមួយ។ ប្រភពខាងលើបានបន្តថា ទន្ទឹមនឹងភ្លើងអគ្គិសនីត្រូវបានកាត់ផ្តាច់នៅតាមតំបន់មួយចំនួនហើយ មានជើងហោះហើររាប់ពាន់ជើងត្រូវបានអាជ្ញាធរអាកាសចរណ៍អាមេរិកសម្រេចលុបចោលភ្លាមៗផងដែរមុនពេលបុណ្យណូអែលចូលមកដល់។ ជាងនេះទៅទៀតអាជ្ញាធរអាមេរិកបានព្រមាណជា នឹងមានពលរដ្ឋអាមេរិកប្រមាណជា ២៤០លាននាក់ ឬស្មើនឹង ៧០% នៃពលរដ្ឋសរុបនឹងត្រូវរស់នៅក្រោមសម្ពាធនៃហានិភ័យអាកាសធាតុ ខណៈសីតុណ្ហភាពនៅតាមតំបន់ខ្លះអាចនឹងចុះត្រជាក់រហូតដល់ -៤៨អង្សាសេ៕ អត្ថបទ៖ ភក្តី ប្រភព៖ Channel News Asia    

អាមេរិក៖ សភាអាមេរិកបានអនុម័តលើគម្រោងថវិកាប្រចាំឆ្នាំរបស់កាលពីថ្ងៃសុក្រ ទី២៣ ខែធ្នូម្សិលមិញនេះ ដោយគម្រោងថវិកានោះមានតម្លៃរហូតដល់ ១,៧ ទី្រលានដុល្លារឯណោះ។ សេចក្តីអនុម័តលើគម្រោងថវិកាដ៏ច្រើនសម្បើមនេះត្រូវបានធ្វើឡើងដោយមានការបោះឆ្នោតគាំទ្រពីសមាជិកសភាអាមេរិកចំនួន ២២៥នាក់ ទល់នឹងសំឡេងអ្នកបោះឆ្នោតមិនគាំទ្រចំនួន ២០១នាក់ផងដែរ។  បើយោងតាមការចុះផ្សាយរបស់បណ្តាញសារព័ត៌មាន The Strait Times ​នៅព្រឹកថ្ងៃសោរ៍ ទី២៤ ខែធ្នូនេះបានបញ្ជាក់ថា នៅក្នុងគម្រោងថវិកាដែលសភាអាមេរិកទើបបានអនុម័តនោះគឺមានកញ្ចប់ថវិកាចំនួន ៤៥ពាន់លាននឹងត្រូវបានប្រើប្រាស់ជាជំនួយផ្សេងៗសម្រាប់ផ្តល់ទៅកាន់ប្រទេសអ៊ុយក្រែន។ បើតា​មអ្នកនាំពាក្យឲ្យវិមានកាពីតូលអាមេរិកបានបញ្ជាក់ថា កញ្ចប់ថវិកាប្រចាំឆ្នាំសម្រាប់ឆ្នាំថ្មីនេះគឺមានការកើនឡើងច្រើន ដ្បិតរដ្ឋាភិបាលអាមេរិកមានគម្រោងចំណាយលើបញ្ហាធំៗជាច្រើនផងដែរ បើធៀបទៅនឹងឆ្នាំកន្លងទៅ៕ អត្ថបទ៖ ភក្តី ប្រភព៖ The Strait Times  

រុស្ស៊ី៖ លោកប្រធានាធិបតី វ្លាឌីមៀ ពូទីន បាននិយាយថា ប្រទេសរុស្ស៊ីចង់បិទបញ្ចប់សង្គ្រាមនៅលើទឹកដីអ៊ុយក្រែន នេះបើយោងការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃសុក្រ ទី២៣ ខែធ្នូនេះ។ បើតាមប្រសាសន៍របស់ ពូទីន បានបញ្ជាក់បន្ថែមថា ការបិទបញ្ចប់សង្គ្រាមនេះប្រហែលជាមិនអាចជៀសផុតពីការស្វែងរកដំណោះតាមបែបកាទូតនោះទេ។ បុរសខ្លាំងរបស់រស្ស៊ីបានបញ្ជាក់ច្បាស់ៗថា​​ គោលដៅរបស់យើងគឺមិនមែនចង់បង្វែរស្ថានការសង្គ្រាមនោះទេ តែពិតណាស់យើងចង់បិទបញ្ចប់សង្គ្រាមតែម្តង ហើយបើអាចបិទបញ្ចប់បានកាន់តែឆាប់គឺកាន់តែល្អ។ គួរកត់សម្គាល់ថា ការថ្លែងរបស់លោកប្រធានាធិបតីរុស្ស៊ីដូចខាងលើនេះត្រូវបានធ្វើឡើងក្រោយពេលដែលលោកប្រធានាធិបតីអ៊ុយក្រែន Volodymyr Zelensky បានទៅជួបជាមួយលោកប្រធានាធិបតីអាមេរិក​ Joe Biden ដោយផ្ទាល់នៅសេតវិមានអាមេរិកបានត្រឹមមួយថ្ងៃប៉ុណ្ណោះ៕  អត្ថបទ៖ ភក្តី ប្រភព៖ The Strait Times

អាមេរិក៖ សេតវិមានអាមេរិកកាលពីថ្ងៃព្រហស្បតិ៍ ទី២២ ខែធ្នូម្សិលមិញនេះបានអះអាងថា ប្រទេសកូរ៉េខាងជើងបានលក់គ្រឿងសព្វាវុធមួយចំនួនឲ្យទៅប្រទេសរុស្ស៊ីសម្រាប់ប្រើប្រាស់ក្នុងការធ្វើសង្គ្រាមជាមួយប្រទេសអ៊ុយក្រែន។ យោងទៅតាមការចុះផ្សាយរបស់បណ្តាញសារព័ត៌មាន Channel News Asia បានបញ្ជាក់ថា គ្រឿងសព្វាវុធដែលកូរ៉េខាងជើងបានលក់ឲ្យទៅរុស្ស៊ី​នោះមានដូចជាកាំភ្លើងធំ និងមីស៊ីលជាច្រើនគ្រាប់ ខណៈសកម្មភាពនៃការទិញ-លក់អាវុធដោយបំពានទៅនឹងបំរាមរបស់អង្គការសហប្រជាជាតិនេះត្រូវបានធ្វើឡើងកាលពីខែកន្លងទៅនេះ។ ប្រភពខាងលើបានបន្តថា អ្នកទទួលទិញអាវុធមកពីភាគីខាងប្រទេសរុស្ស៊ីគឺជាក្រុមទាហានឯកជន ឬគេតែងហៅថា ក្រុមទាហានស៊ីឈ្មួល មានឈ្មោះថា Wagner ដែលជាកងកម្លាំងមានសមត្ថភាពផ្នែកវាយប្រហារយ៉ាងស្ទាត់ជំនាញ។ នៅចំពោះមុខបញ្ហាខាងលើនេះ លោក John Kirby ដែលជាអ្នកនាំពាក្យផ្នែកសន្តិសុខជាតិរបស់សេតវិមានបានបញ្ជាក់ថា  សហរដ្ឋអាមេរិកនឹងបង្កើនការដាក់ទណ្ឌកម្មលើក្រុម Wagner និងប្រទេសកូរ៉េខាងជើង ដ្បិតសកម្មភាពរបស់ភាគីទាំង ២នេះគឺជាការបំពានទៅលើវិធានការរបស់ក្រុមប្រឹក្សាសន្តិសុខអង្គការសហប្រជាជាតិយ៉ាងធ្ងន់ធ្ងរ៕ អត្ថបទ៖ ភក្តី ប្រភព៖ Channel News Asia

ម៉ាឡេស៊ី៖ យ៉ាងហោចណាស់មានពលរដ្ឋម៉ាឡេស៊ីចំនួន ៥នាក់ត្រូវបានរាយការណ៍ថា បានស្លាប់បាត់បង់ជីវិតនៅក្នុងទឹកជំនន់ដ៏អាក្រក់មួយ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ ៍នៅថ្ងៃពុធ ទី២១ ខែធ្នូនេះ។ ហេតុការណ៍អកុសលនេះបានកើតឡើងនៅក្នុងរដ្ឋ Kelantan ភាគខាងជើងនៃប្រទេសម៉ាឡេស៊ី ដែលជាតំបន់កំពុងទទួលរងនូវឥទ្ធិពលពីខ្យល់ព្យុះមូសុង ពោលគឺភ្លៀងបានធ្លាក់យ៉ាងជោគជាំជាច្រើនថ្ងៃជាប់ៗគ្នាមកហើយនៅក្នុងតំបន់មួយនេះ។ ប្រភពខាងលើបានបន្តថា​ នៅក្នុងចំណោមជនរងគ្រោះដែលបានស្លាប់បាត់បង់ជីវិតទាំងអស់នោះគឺមានជនរងគ្រោះម្នាក់ជាកូនក្មេងមានអាយុត្រឹម ១៥ ខែប៉ុណ្ណោះ ដែលបានស្លាប់ព្រោះតែលង់ទឹក។ បើតាមទីភ្នាក់ងារគ្រប់គ្រងគ្រោះមហន្តរាយម៉ាឡេស៊ីបានបញ្ជាក់ថា ក្រៅតែរកឃើញជនរងគ្រោះដែលបានស្លាប់ភ្លាមៗហើយ​ ឥទ្ធិពលនៃជំនន់ទឹកភ្លៀងដ៏ឆាប់រហ័សនេះក៏បានបង្ខំឲ្យប្រជាពលរដ្ឋម៉ាឡេស៊ីប្រមាណជា ៧០,០០០ នាក់ផ្សេងទៀតត្រូវជម្លៀសខ្លួនចេញពីផ្ទះសម្បែងដើម្បីទៅស្នាក់នៅកន្លែងមានសុវត្ថិភាពជាបណ្តោះអាសន្នសិនផងដែរ។ គួររម្លឹកជូនថា នៅក្នុងខែដដែលនេះកាលពីឆ្នាំមុនតំបន់ខាងនេះក៏ធ្លាប់រងគ្រោះដោយទឹកជំនន់ម្តងដែរ ដោយពេលនោះទឹកជំនន់បានផ្តាច់យកជីវិតពលរដ្ឋម៉ាឡេស៊ីរហូតដល់ ៥០នាក់ ខណៈរាប់ពាន់នាក់ផ្សេងត្រូវបង្ខំចិត្តធ្វើការជម្លៀសខ្លួនជាបន្ទាន់៕ អត្ថបទ៖ ភក្តី ប្រភព៖​ បាងកកប៉ុស្តិ

អាមេរិក៖ រដ្ឋាភិបាលអាមេរិកនឹងផ្តល់ប្រព័ន្ធការពារដែនអាកាសដ៏ទំនើបមួយទៅកាន់ប្រទេសអ៊ុយក្រែន នេះបើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃព្រហស្បតិ៍ ទី២២ ខែធ្នូនេះ។ ប្រព័ន្ធការពារដែនអាកាសដែលជាបច្ចេកវិទ្យាចុងក្រោយរបស់អាមេរិកនេះមានឈ្មោះថា Patriot Air Defense System ដែលមានសមត្ថភាពដ៏ខ្លាំងខ្លាំដើម្បីទប់ទល់ទៅនឹងការវាយប្រហារតាមផ្លូវអាកាសពីសំណាក់កងទ័ពរុស្ស៊ី។ ប្រភពខាងលើបានបន្តថា ការផ្តល់ជូនប្រព័ន្ធការពារដែនអាកាស Patriot Air Defense System នៅពេលនេះគឺជាផ្នែកមួយនៃកញ្ចប់ជំនួយតម្លៃ ១,៨៥ ពាន់លានដុល្លារ ដែលសភាអាមេរិកទើបបានអនុម័តផ្តល់ជូនទៅកាន់ប្រទេសអ៊ុយក្រែនកាលពីពេលថ្មីៗ។ គួរបញ្ជាក់ជូនថា រដ្ឋាភិបាលអាមេរិកធ្លាប់បានផ្តល់ជំនួយទៅកាន់ប្រទេសអ៊ុយក្រែកក្នុងទំហំទឹកប្រាក់ជាង ៣០ពាន់លានដុល្លាររួចហើយចាប់តាំងពីសង្គ្រាមបានផ្ទុះឡើងមក  ហើយអាមេរិកក៏មានគម្រោងផ្តល់ជំនួយទៅកាន់ប្រទេសអ៊ុយក្រែនក្នុងរយៈពេលវែងបន្ថែមទៀតផងដែរ ពោលគឺបន្តជួយអ៊ុយក្រែនរហូតទាល់តែសង្គ្រាមត្រូវបានបិទបញ្ចប់៕ អត្ថបទ៖ ភក្តី ប្រភព៖ The Strait Times

ថៃ៖ អាជ្ញាធរថៃបានប្រកាសរកឃើញសាកសពទាហានជើងទឹកចំនួន ៦នាក់ហើយដោយគិតត្រឹមល្ងាចថ្ងៃអង្គារ ទី២០ ខែធ្នូម្សិលមិញនេះ ខណៈទាហានជាង ២០នាក់ផ្សេងទៀតនៅបន្តបាត់ខ្លួន។ គួររម្លឹកជូនថា ចំនួនអ្នកស្លាប់និងបាត់ខ្លួនខាងលើនេះគឺជាតួលេខនៃជនរងគ្រោះនៅក្នុងហេតុការណ៍លិចនាវាចម្បាំងមួយគ្រឿងរបស់ទីបញ្ជាការកងទ័ពជើងទឹកថៃ ដែលបានកើតឡើងតាំងពីយប់ថ្ងៃអាទិត្យកន្លងទៅម្លេះ។ ហេតុការណ៍អកុសលនេះបានកើតឡើងនៅតំបន់ឈូងសមុទ្រ Gulf ភាគខាងត្បូងប្រទេសថៃ ខណៈនាវាដែលបានលិចនោះជានាវា HTMS Sukhothai មានផ្ទុកមនុស្សសរុបចំនួន ១០៦នាក់ ហើយគិតត្រឹមពេលនេះគឺមានទាហានចំនួន ៧៩នាក់ត្រូវបានជួយសង្គ្រោះ ទាហានចំនួន ២១នាក់នៅបន្តបាត់ខ្លួន ខណៈសាកសពទាហានចំនួន ៦នាក់ត្រូវបានឃើញ។ ប្រភពខាងលើបានបន្តថា ប្រតិបត្តិការណ៍ស្វែងរកជនរងគ្រោះនៅតែបន្តធ្វើឡើងយ៉ាងសកម្មភាព បើទោះជាគេមិនរំពឺងថា ទាហានដែលកំពុងបាត់ខ្លួនអាចនៅរស់មានជីវិតក៏ដោយ៕ អត្ថបទ៖ ភក្តី ប្រភព៖ Channel News Asia