ថៃ៖ នៅព្រឹកថ្ងៃព្រហស្បតិ៍ ទី១៧  ខែកុម្ភៈនេះ អាជ្ញាធរសុខាភិបាលនៃប្រទេសថៃបានប្រកាសពីការរកឃើញអ្នកឆ្លងជំងឺកូវីដ-១៩​ ចំនួន ១៧,៣៤៩នាក់ ដែលចំនួននេះគឺមានការកើនឡើងបើធៀបទៅនឹងតួលេខអ្នកឆ្លងកាលពីថ្ងៃកន្លងទៅ នេះបើយោងតាមការចុះផ្សាយរបស់បណ្តាញសារព័ត៌មាន Nation Thailand ។  ចំពោះករណីស្លាប់វិញគឺមានចំនួន ២២នាក់ ដែលចំនួននេះមានការថយចុះបន្តិចដោយកាលពីថ្ងៃម្សិលមិញនេះតួលេខអ្នកស្លាប់នៅក្នុងប្រទេសថៃមានចំនួន ២៧នាក់ឯណោះ។ បើតាមអជ្ញាធរសុខាភិបាលថៃបានបញ្ជាក់ថា ក្នុងចំណោមអ្នកឆ្លងទាំងអស់នោះគឺមានអ្នកឆ្លងចំនួន ១៧,១០៤នាក់ជាករណីឆ្លងនៅក្នុងសហគមន៍ក្នុងចំណោមពលរដ្ឋថៃ ខណៈអ្នកឆ្លងចំនួន ២៤៥នាក់ផ្សេងទៀតជាករណីនាំចូលពីក្រៅប្រទេសតាមរយៈអ្នកដំណើរអន្តរជាតិ។ គួរបញ្ជាក់ជូនថា​ គិតត្រឹមពេលនេះប្រទេសថៃបានរកឃើញអ្នកឆ្លងជំងឺកូវីដ-១៩ សរុបជាង ២,៦លាននាក់ និងស្លាប់សរុបជាង ២ម៉ឺននាក់។ ចំពោះផែនការចាក់វ៉ាក់សាំងបង្ការជំងឺកូវីដ-១៩ វិញ គឺអាជ្ញាធរសុខាភិបាលថៃបានសម្រេចការចាក់វ៉ាក់សាំងជូនពលរដ្ឋបានរួចរាល់បាន ៧០% និង ២៦%បានចាក់ដល់ដូសជម្រុញ៕ អត្ថបទ៖ ភក្តី

ថៃ៖ យោងតាមការចុះផ្សាយនៅរបស់បណ្តាញសារព័ត៌មាន បាងកកប៉ុស្តិ៍ នៅព្រឹកថ្ងៃព្រហស្បតិ៍ ទី១៧​ ខែកុម្ភៈនេះបានឲ្យដឹងថា ក្រសួងសុខាភិបាលសាធារណៈនិងក្រសួងអប់រំថៃបានសម្រេចឲ្យមានការបង្កើត “តំបន់កូវីដ” ដើម្បីអនុញ្ញាតឲ្យក្រុមសិស្សានុសិស្សដែលបានឆ្លងជំងឺកូវីដ-១៩ មានឱកាសមកប្រលងចូលរៀនតាមសាកលវិទ្យាល័យដូចបេក្ខជនប្រលងទូទៅដែរ។ បើតាមលោកវេជ្ជបណ្ឌិត Sarawut Boonsuk អនុប្រធាននាយកដ្ឋានសុខាភិបាលថៃបានឲ្យដឹងថា គ្រប់សាកលវិទ្យាល័យទាំងអស់ត្រូវបង្កើត “តំបន់កូវីដ” ឬជាប​ន្ទប់ដាច់ដោយឡែកមួយសម្រាប់ឲ្យក្រុមសិស្សានុសិស្សដែលមានការពាក់ព័ន្ធជាមួយអ្នកជំងឺកូវីដ-១៩ ឬបានឆ្លងជំងឺកូវីដ-១៩ កម្រិតស្រាលអាចទៅប្រលងក្នុងពេលដំណាលគ្នាជាមួយបេក្ខជនទូទៅដែរ។ លោកវេជ្ជបណ្ឌិតរូបនេះបានបន្តថា បន្ទប់ប្រលងពិសេសដែលគេហៅថា “តំបន់កូវីដ” នោះ នឹងទទួលបានការជួយសម្របសម្រួលពីក្រុមបុគ្គលិកសុខាភិបាល បន្ថែមពីលើក្រុមបុគ្គលិកអប់រំដែលត្រូវត្រួតពិនិត្យលើការប្រលងនោះផងដែរ។ លោកវេជ្ជបណ្ឌិតបានបញ្ជាក់ទៀតថា “តំបន់កូវីដ” នឹងត្រូវបានបែងចែកជា ៣ប្រភេទ ដោយប្រភេទទី ១សម្រាប់ក្រុមសិស្សដែលមានការសង្ស័យថាបានឆ្លងជំងឺកូវីដ-១៩ តែបានតេស្តអវិជ្ជមាន ហើយប្រភេទទី ២សម្រាប់ក្រុមសិស្សដែលមានហានិភ័យខ្ពស់ក្នុងការឆ្លងជំងឺកូវីដ-១៩

វៀតណាម៖ ក្រុមអ្នកបើកបររថយន្តដឹកទំនិញនិងក្រុមអ្នកនាំទំនិញចេញពីប្រទេសវៀតណាមឆ្ពោះទៅក្នុងប្រទេសចិនជាច្រើននាក់កំពុងប្រឈមនឹងភាពតានតឹងយ៉ាងខ្លាំងទាំងសម្ពាធការងារនិងការខាតបង់ប្រាក់ចំណូល ក្រោយអាជ្ញាធរចិនបានសម្រេចបិទច្រកទ្វារព្រំដែលមួយរយៈដើម្បីទប់ស្កាត់មេរោគជំងឺកូវីដ-១៩។ យោងតាមសេចក្តីរាយការណ៍របស់កាសែត VN Express បានឲ្យដឹងថា មានរថយន្តដឹកទំនិញកសិកម្មរបស់វៀតណាមជាង ១,៨០០គ្រឿងត្រូវបានជាប់គាំងនៅច្រកព្រំដែន Huu Nghi ដែលស្ថិតនៅក្នុងក្រុង Lang Son នៃប្រទេសវៀតណាមជាងមួយសប្តាហ៍មកហើយ ខណៈគេមិនបានដឹងច្បាស់ថា ពេលណាទើបអាជ្ញាធរចិនបើកទ្វារព្រំដែនអនុញ្ញាតឲ្យពលរដ្ឋវៀតណាមអាចនាំទំនិញទាំងនោះចូលទៅក្នុងប្រទេសចិនបាននោះទេ។ អ្នកបើកបររថយន្តដឹកទំនិញម្នាក់បានប្រាប់ឲ្យដឹងថា គាត់បានធ្វើដំណើរមកពីខេត្ត Long An ​ភាគខាងត្បូងប្រទេសវៀតណាម ដែលមានចម្ងាយប្រមាណជា ១,៨០០ គីឡូម៉ែត្រពីច្រកព្រំដែន Huu Nghi នេះ ហើយរូបគាត់បានទទួលប្រាក់ឈ្មួលប្រចាំថ្ងៃចំនួន ២០០,០០០ ដុង (៨,៨០ ដុល្លារ) ។

អាមេរិក៖ យោងតាមការចុះផ្សាយនៅក្នុងបណ្តាញសារព័ត៌មាន Daily Mail បានឲ្យដឹងថា មានស្រ្តីម្នាក់ត្រូវបានព្យាបាលឲ្យជាសះស្បើយ ១០០% ពីជំងឺអេដស៍ហើយរូបគាត់ក៏ជាស្រ្តីដំបូងបង្អស់ក្នុងពិភពលោកផងដែរ ដែលទទួលបានការព្យាបាលដ៏ពិសេសនេះ។ ស្រ្តីរូបនេះមិនត្រូវបានគេបង្ហាញអត្តសញ្ញាណពិតប្រាកដនោះទេ តែរូបគាត់ត្រូវបានក្រុមអ្នកវិទ្យាសាស្រ្តដាក់ឈ្មោះថា “អ្នកជំងឺក្រុងញូវយ៉ក” សម្រាប់នៅក្នុងបេសកកម្មព្យាបាលដ៏កម្រនេះ។ ក្រុមអ្នកវិទ្យាសាស្រ្តអាមេរិកបានប្រាប់ឲ្យដឹងថា ការព្យាបាលឲ្យស្រ្តីរូបនេះជាសះស្បើយពីជំងឺអេដស៍មិនមែនជារឿងាយស្រួលឡើយ ព្រោះវាមិនមែនជាការលេបថ្នាំឬចាក់ថ្នាំដើម្បីសម្លាប់មេរោគនៅក្នុងខ្លួនអ្នកជំងឺនោះទេ។ បើតាមអ្នកវិទ្យាសាស្រ្តម្នាក់ប្រចាំនៅក្នុងមជ្ឈមណ្ឌលវេជ្ជសាស្ត្រ Cornell ក្នុងក្រុងញូវយ៉ក បានពន្យល់ថា គេបានប្រើប្រាស់វិធីវះកាត់ផ្លាស់ប្តូរយកកោសិកាដើមចេញពីក្នុងខ្លួនអ្នកជំងឺនិងដាក់ជំនួសមកវិញនូវកោសិការបស់មនុស្សផ្សេងម្នាក់ទៀតដែលគ្មានផ្ទុកមេរោគអេដស៍។ ដើម្បីទទួលបានការព្យាបាលនេះដំបូងឡើយគេត្រូវការមានអ្នកស្ម័គ្រចិត្តបរិច្ចាគកោសិកាខ្លួនឯងជាមុនសិន ហើយជាទូទៅការបរិច្ចាគនេះត្រូវបានធ្វើឡើងដោយអ្នកជំងឺដែលដឹងថាខ្លួនជិតស្លាប់ទៅហើយ។ ក្រោយទទួលបានកោសិកាសម្រាប់ផ្លាស់ប្តូរហើយ​ គេក៏ត្រូវការពេលវេលាយូរផងដែរសម្រាប់វះកាត់ប្តូរ កោសិកាទាំងអស់នោះបន្តិចម្តងៗ ជាក់ស្តែងគេត្រូវការពេលវេលារហូតដល់ ៤ឆ្នាំ ដើម្បីផ្លាស់ប្តូរកោសិកាដែលមានផ្ទុកជំងឺអេដស៍និងមហារីកចេញពីក្នុងខ្លួនស្រ្តីអ្នកជំងឺខាងលើនេះ។ អ្នកវិទ្យាសាស្រ្តដដែលនេះក៏បានបញ្ជាក់ផងដែរថា វិធីព្យាបាលនេះមានគ្រោះថ្នាក់ខ្លាំងណាស់ចំពោះជីវិតអ្នកជំងឺ ដូចនេះក្រុមអ្នកវិទ្យាសាស្រ្តបានសម្រេចប្រើប្រាស់វិធីព្យាបាលនេះចំពោះតែអ្នកជំងឺអេដស៍ណាដែលមានបន្ថែមនូវជំងឺមហារីកកម្រិតធ្ងន់ប៉ុណ្ណោះ ព្រោះថាអ្នកជំងឺនៅក្នុងស្ថានភាពបែបនេះគឺមានហានិភ័យខ្ពស់ក្នុងការស្លាប់បាត់បង់ជីវិតរួចទៅហើយ បើទោះជាមិនធ្វើការវះកាត់ប្តូរកោសិកាក៏ដោយ។

ម៉ាឡេស៊ី៖ កាសែត បាងកកប៉ុស្តិ៍ កាលពីថ្ងៃចន្ទ ទី១៤ ខែកុម្ភៈកន្លងទៅនេះបានរាយការណ៍ថា មានយន្តហោះដឹកនាំអ្នកដំណើរមួយគ្រឿងត្រូវបង្ខំចិត្តចុះចតជាបន្ទាន់ក្រោយគេបានរកឃើញថា មានសត្វពស់មួយក្បាលកំពុងវារនៅលើយន្តហោះនោះ។ ហេតុការណ៍ដ៏កម្រនេះត្រូវបានកើតឡើងក្នុងយន្តហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍ AirAsia ខណៈដែលយន្តហោះមួយគ្រឿងនេះកំពុងដឹកអ្នកដំណើរចេញពីទីក្រុងកូឡាឡាំពួឆ្ពោះទៅកាន់ទីក្រុងតាវ ស្ថិតនៅលើកោះបូណេអូ ដែលជាតំបន់ទេសចរណ៍ដ៏មានសក្តានុពលមួយរបស់ម៉ាឡេស៊ី។ ប្រភពខាងលើបានបន្តថា សត្វពស់ដែលគេមិនស្គាល់ប្រភេទច្បាស់នោះត្រូវបានគេប្រទះឃើញវារនៅក្នុងប្រអប់អំពូលភ្លើងដែលស្ថិតនៅក្នុងកន្លែងអ្នកបើកបរ ហើយភ្លាមៗនោះក្រុមអ្នកបើកបរយន្តហោះក៏សម្រេចទាញសញ្ញាអាសន្នតែម្តង។ យន្តហោះបានចុះចតជាបន្ទាន់នៅក្នុងទីក្រុងគូឈីងដែលមានចម្ងាយប្រមាណជា ៩០០គីឡូម៉ែត្រពីទីក្រុងគោលដៅដែលយន្តត្រូវចុះចតតាមការកំណត់ទុក។ ក្រោយយន្តហោះបានធ្វើការចុះចត អ្នកដំណើរទាំងអស់ត្រូវបានប្តូរជើងហោះហើរឲ្យទៅជិះយន្តហោះមួយផ្សេងទៀតដើម្បីបន្តដំណើរ ខណៈហេតុការណ៍ដ៏កម្រក្នុងវិស័យអាកាសចរណ៍មួយនេះមិនបានបង្កគ្រោះថ្នាក់ចំពោះអ្នកណាម្នាក់នោះទេ៕ អត្ថបទ៖ ភក្តី ប្រភព៖ បាងកកប៉ុស្តិ៍

វៀតណាម៖ កាលពីថ្ងៃអង្គារ ទី១៥ ខែកុម្ភៈ ម្សិលមិញនេះរដ្ឋមន្រ្តីក្រសួងទេសចរណ៍នៃប្រទេសវៀតណាមបានស្នើឲ្យរដ្ឋាភិបាលសម្រេចបើកប្រទេសជាធម្មតាឡើងវិញដើម្បីទទួលអ្នកដំណើរអន្តរជាតិនិងលើកលែងវិធានការរឹតបន្តឹងការធ្វើដំណើរមួយចំនួនចាប់ពីថ្ងៃទី១៥ ខែមីនា ខាងមុខនេះតទៅ។ បើតាមការចុះផ្សាយនៅក្នុងបណ្តាញសារព័ត៌មាន Channel News Asia បានឲ្យដឹងថា គម្រោងបើកប្រទេសដែលរដ្ឋមន្ត្រីក្រសួងទេសចរណ៍វៀតណាមបានស្នើសុំនេះគឺត្រូវបានធ្វើឡើងមុនពេលកំណត់ចំនួន ៣ខែ ដោយនាពេលកន្លងមករដ្ឋាភិបាលវៀតណាមគ្រោងនឹងបើកប្រទេសឡើងវិញនៅអំឡុងខែមិថុនាឯណោះ។ ប្រភពខាងលើបន្តថា គម្រោងសុំបើកប្រទេសឡើងវិញរបស់រដ្ឋមន្ត្រីក្រសួងទេសចរណ៍វៀតណាមនៅពេលនេះគឺត្រូវបានធ្វើឡើងដោយយកគំរូតាមប្រទេសថៃនិងហ្វីលីពីន ដែលប្រទេសទាំង ២នេះសុទ្ធសម្រេចបើកប្រទេសឡើងវិញក្នុងបរិបទដែលមានការរាតត្បាតជំងឺកូវីដ-១៩ ប្រភេទអូមីក្រុងច្រើន តែអ្នកឈឺធ្ងន់ធ្ងរហើយត្រូវព្យាបាលនៅមន្ទីរពេទ្យមានចំនួនតិចតួច។ យ៉ាងណាក្តី នៅក្នុងសំណើនោះបានបញ្ជាក់ថាផែនការរបស់ក្រសួងទេសចរណ៍វៀតណាមនឹងត្រូវអនុវត្តចំពោះអ្នកដំណើដែលមានចាក់វ៉ាក់សាំងបង្ការជំងឺកូវីដ-១៩ រួចរាល់និងបានបង្ហាញលទ្ធផលតេស្តអវិជ្ជមានប៉ុណ្ណោះមុននឹងមកទល់ទឹកដីវៀតណាម ហើយក្រោយពេលមកដល់ប្រទេសវៀតណាមអ្នកដំណើរទាំងនោះក៏តម្រូវឲ្យធ្វើចត្តាឡីស័កចំនួន ១ថ្ងៃផងដែរ។ គួរបញ្ជាក់ជូនថា សំណើខាងលើនឹងត្រូវបញ្ជូនទៅដល់លោកនាយករដ្ឋមន្ត្រីវៀតណាមដើម្បីធ្វើការពិនិត្យនិងសម្រេចក្នុងពេលដ៏ខ្លីខាងមុខនេះ៕ អត្ថបទ៖ ភក្តី ប្រភព៖ Channel News Asia

មិចស៊ីកូ៖ សត្វបក្សីរាប់រយក្បាលបានធ្លាក់មកពីលើមេឃនិងបានបាត់បង់ជីវិតរាយប៉ាយពេញដងផ្លូវដោយមិនដឹងមូលហេតុនៅក្នុងប្រទេសមិចស៊ីកូ នេះបើយោងតាមការចុះផ្សាយរបស់បណ្តាញសារព័ត៌មាន Daily Mail កាលពីថ្ងៃចន្ទ ទី១៤ ខែកុម្ភៈ ម្សិលមិញនេះ។ ប្រភពបានបន្តថា ហេតុការណ៍នេះត្រូវបានគេប្រទះឃើញនៅតាមបណ្ដោយផ្លូវក្នុងតំបន់ Alvaro Obregon ក្រុង Cuauhtemoc នៃរដ្ឋ Chihuahua ដែលជារដ្ឋស្ថិតនៅតំបន់ភាគខាងជើងឆៀងខាងត្បូងនៃប្រទេសមិចស៊ីកូ។ សត្វបក្សីដែលបានបាត់បង់ជីវិតបន្តបន្ទាប់គ្នានោះភាគច្រើនជាប្រភេទបក្សី ដែលមានខ្លួនខ្មៅ និងក្បាលលឿន ហើយតាមការសង្កេតមើលគឺក្រុមបក្សីទាំងនេះបានធ្វើការហោះហើរចេញមកពីប្រទេសកាណាដាឆ្ពោះទៅតំបន់ភាគខាងត្បូងនៃប្រទេសមិចស៊ីកូ ដើម្បីស្វែងរកជំរកថ្មីនៅទីនោះ។ ចំពោះមូលហេតុនៃការបាត់បង់ជីវិតវិញត្រូវបានគេសន្និដ្ឋានជាបឋមថា ក្រុមបក្សីទំនងជាពុលនឹងផ្សែងដែលបានភាយចេញពីម៉ាស៊ីនកម្ដៅ ឬអាចឆក់ខ្សែភ្លើងក្នុងពេលដែលពួកវានាំគ្នាទៅទំនៅលើខ្សែភ្លើងឬបង្គោលភ្លើងណាមួយដែលមានចរន្តអគ្គិសនីឆ្លងកាត់។​ យ៉ាងណាក្តី ការសន្និដ្ឋាននេះគឺត្រូវបានធ្វើឡើងដោយគ្មានភស្តុតាងជាក់លាក់នោះ ហើយពេលនេះអាជ្ញាធរមិចស៊ិកូកំពុងធ្វើការស៊ើបអង្កេតជុំវិញករណីឲ្យបានស៊ីជម្រៅផងដែរ ដើម្បីស្វែករកឲ្យឃើញការពិតដែលបង្កសត្វបក្សីរាប់រយក្បាលត្រូវបាត់បង់ជីវិតបន្តបន្ទាប់គ្នាយ៉ាងចម្លែកដូចនេះ៕ អត្ថបទ៖ ភក្តី ប្រភព៖ Daily Mail

ឥណ្ឌូនេស៊ី៖ យោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ កាលពីថ្ងៃចន្ទ ទី១៤ ខែកុម្ភៈម្សិលមិញនេះបានឲ្យដឹងថា អាជ្ញាធរឥណ្ឌូនេស៊ីនឹងកាត់បន្ថយចំនួនថ្ងៃធ្វើចត្តាឡីស័កចំពោះអ្នកដំណើរអន្តរជាតិពី ៥ថ្ងៃ មកដល់ត្រឹម ៣ថ្ងៃប៉ុណ្ណោះ ដោយវិធានការថ្មីនេះនឹងត្រូវផ្តើមអនុវត្តនៅដើមសប្តាហ៍ក្រោយនឹងអនុវត្តចំពោះក្រុមអ្នកដំណើរដែលបានចាក់វ៉ាក់សាំងបង្ការជំងឺកូវីដ-១៩រួចរាល់ចំនួន ៣ដូស។ បើតាមលោក Luhut Panjaitan ដែលជាសមាជិកគណៈរដ្ឋមន្ត្រីទទួលបន្ទុកឆ្លើយតបជំងឺរាតត្បាតនៅកោះចាវ៉ានិងកោះបាលីបានឲ្យដឹងទៀតថា​ រដ្ឋាភិបាលឥណ្ឌូនេស៊ីក៏កំពុងពិចារណាលុបចោលវិធានការធ្វើចត្តាឡីស័កទាំងស្រុងតែម្តងនៅក្នុងខែមេសាខាងមុខនេះ។ មន្ត្រីជាន់ខ្ពស់របស់រដ្ឋាភិបាលឥណ្ឌូនេស៊ីរូបនេះបានបន្តថា គម្រោងលុបចោលការធ្វើចត្តាឡីស័កត្រូវបានធ្វើឡើងក្រោយចំនួនអ្នកឆ្លងជំងឺកូវីដ-១៩ ដែលត្រូវទៅព្យាបាលនៅមន្ទីរពេទ្យក្នុងប្រទេសឥណ្ឌូនេស៊ីបានថយចុះនៅត្រឹមកម្រិតដែលគេអាចគ្រប់គ្រងបាន ខណៈផែនការនេះក៏ត្រូវបានដាក់ចេញក្នុងគោលបំណងលើកកម្ពស់វិស័យទេសចរណ៍អន្តរជាតិផងដែរ ដ្បិតវិស័យនេះគឺជាប្រភពចំណូលដ៏សំខាន់មួយសម្រាប់សេដ្ឋកិច្ចជាតិឥណ្ឌូនេស៊ី។ គួរបញ្ជាក់ថា កាលពីថ្ងៃចន្ទ ទី១៤ ខែកុម្ភៈម្សិលមិញនេះអាជ្ញាធរសុខាភិបាលឥណ្ឌូនេស៊ីបានរកឃើញអ្នកឆ្លងជំងឺកូវីដ-១៩ជាង ៣ពាន់នាក់និងស្លាប់ជាង ១រយនាក់ប៉ុណ្ណោះ ខណៈនាពេលកន្លងតួលេខអ្នកស្លាប់ ប្រចាំថ្ងៃនៅឥណ្ឌូនេស៊ីមានរហូតដល់ខ្ទង់រាប់ពាន់ឯណោះ៕ អត្ថបទ៖ ភក្តី ប្រភព៖ បាងកកប៉ុស្តិ៍

កូរ៉េខាងត្បូង៖ យោងតាមការចុះផ្សាយរបស់បណ្តាញសារព័ត៌មាន Channel News Asia កាលពីថ្ងៃចន្ទ ទី១៤ ខែកុម្ភៈ ម្សិលមិញនេះបានឲ្យដឹងថា ប្រទេសកូរ៉េខាងត្បូងនឹងបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី៤ ជូនពលរដ្ឋខ្លួននៅចុងខែនេះហើយ។ ទន្ទឹមនឹងបើកយុទ្ធនាការចាក់វ៉ាក់សាំងដូសទី ៤ជូនពលរដ្ឋខ្លួន អាជ្ញាធរសុខាភិបាលកូរ៉េខាងត្បូងក៏បានត្រៀមផ្គត់ផ្គង់ឧបករណ៍ធ្វើតេស្តរហ័សរាប់លានផងដែរ ដើម្បីផ្តល់ភាពងាយស្រួលឲ្យប្រជាពលរដ្ឋអាចយកទៅធ្វើតេស្តបានដោយឯងនៅតាមផ្ទះក្នុងករណីសង្ស័យថាបានឆ្លងជំងឺកូវីដ-១៩ ពីអ្នកណាម្នាក់។ ប្រភពខាងលើបានបន្តថា ផែនការទាំង ២របស់អាជ្ញាធរសុខាភិបាលកូរ៉េខាងត្បូងដែលបានដាក់ចេញព្រមគ្នានេះគឺត្រូវបានធ្វើឡើងដើម្បីទប់ទល់នឹងរលកនៃការរាតត្បាតជំងឺកូវីដ-១៩ បំប្លែងខ្លួនប្រភេទអូមីក្រុងដែលកំពុងបង្កការចម្លងយ៉ាងឆាប់រហ័សនៅទូទាំងប្រទេសកូរ៉េខាងត្បូង។ សូមបញ្ជាក់ជូនថា គិតត្រឹមពេលនេះមានពលរដ្ឋកូរ៉េខាងត្បូងប្រមាណជា ៨៥% បានចាក់វ៉ាក់សាំងរួចរាល់ចំនួន ២ដូស និង ៥៥% បានចាក់រហូតដល់ដូសជម្រុញ ខណៈកូរ៉េខាងត្បូងមានពលរដ្ឋសរុបចំនួន ៥២លាននាក់៕ អត្ថបទ៖ ភក្តី ប្រភព៖ Channel

ថៃ៖ អ្នកជំនាញផ្នែកសុខភាពថៃបានធ្វើការព្រមានថា អាហារសមុទ្រមួយប្រភេទដែលកំពុងល្បីខ្លាំងនៅតាមបណ្តាញសង្គមក្នុងប្រទេសថៃអាចបង្កគ្រោះថ្នាក់ខ្លាំងចំពោះសុខភាព នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ ។ អាហារដែលកំពុងទទួលបានការពេញនិយមខ្លាំងក្នុងចំណោមពលរដ្ឋថៃនោះមានឈ្មោះថា “Squid shots” ដែលជាការញ៉ាំមឹកតូចៗទាំងរស់ដោយដាក់បន្ថែមនូវទឹកជ្រលក់មានរសជាតិហឹរដាក់នៅក្នុងកូនកែវតូចៗ។ បើតាមលោកវេជ្ជបណ្ឌិត Pakpoom Dejhasadin ដែលជាអ្នកបច្ចេកទេសវេជ្ជសាស្ត្រនៅមជ្ឈមណ្ឌលជាតិផ្តល់ឈាមនិងនៅសមាគមកាកបាទក្រហមថៃបានឲ្យដឹងថា “Squid shots” មានភាពទាក់ទាញនិងមានរសជាតិឆ្ងាញ់ តែវាក៏អាចបង្កគ្រោះថ្នាក់ចំពោះសុខភាពអ្នកទទួលទានផងដែរ ព្រោះមឹករស់ដែលគេញ៉ាំនោះអាចមានផ្ទុកនូវព្រូនប្រវែងពី ២-៥ សង់ទីម៉ែត្រ និងបាក់តេរីអាក្រក់យ៉ាងច្រើនផងដែរ។ លោកវេជ្ជបណ្ឌិតរូបនេះបានបន្តថា បាក់តេរីអាក្រក់ដែលមាននៅក្នុងមឹកនោះអាចធ្វើឲ្យអ្នកទទួលទានមានអាការៈដូចជា ក្អួត វិលមុខ ឈឺក្បាល ឈឺពោះ រាគ និងញ័រខ្លួនជាដើម ក្រោយពេលញ៉ាំបាន ១២-២៤ ម៉ោង។ លោកអ្នកអាចទស្សនាសកម្មភាពនៃការទទួលទានអាហារដែលកំពុងពេញនិយមនេះដូចក្នុងវីដេអូខាងក្រោម៖