អែលសាល់វ៉ាឌ័រ៖ យ៉ាងហោចណាស់មានមនុស្សចំនួន ១២នាក់បានស្លាប់បាត់បង់ជីវិតនៅក្នុងហេតុការណ៍រត់ជាន់គ្នានៅក្នុងកីឡដ្ឋានបាល់ទាន់មួយកន្លែង នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃចន្ទ ទី២២ ខែឧសភានេះ។ ហេតុការណ៍អកុសលនេះបានកើតឡើងនៅក្នុងការប្រកួតរវាងក្លឹបបាល់ទាត់ Allianz ដែលត្រូវលេងទល់នឹងក្លឹបបាល់ទាត់ FAS នៃក្របខណ្ឌបាល់ទាត់កំពូលក្នុងប្រទេសអែលសាល់វ៉ាឌ័រ ដែលជាប្រទេសធំមួយនៅតំបន់អាមេរិកកណ្តាល។   ក្រៅតែពីបានរកឃើញអ្នកស្លាប់ភ្លាមៗហើយ​ មានពលរដ្ឋជាង ៥០០នាក់ផ្សេងទៀតបានរងរបួស ខណៈក្នុងនោះក៏មានមនុស្ស ២នាក់បានរងរបួសធ្ងន់ធ្ងរនិងត្រូវបញ្ជូនទៅសង្គ្រោះបន្ទាន់នៅមន្ទីរពេទ្យផងដែរ។ ប្រភពខាងលើបានបន្តថា ហេតុការណ៍រត់ជាន់គ្នានេះបានកើតឡើងក្រោយពេលច្រកទ្វារមួយរបស់កីឡដ្ឋានបានដួលរលំនិងធ្វើឲ្យមនុស្សជាច្រើនព្យាយាមរត់សម្រុកចូលទៅក្នុងទីលានតាមផ្លូវតែមួយរហូតធ្វើឲ្យមានការរត់ជាន់ពីលើគ្នាតែម្តង។ គួរបញ្ជាក់ជូនថា កីឡដ្ឋានដែលជាកន្លែងកើតហេតុខាងលើនេះមានឈ្មោះថា Estadio ជាកីឡដ្ឋានបាល់ទាត់ធំបំផុតនៅតំបន់អាមេរិកណ្តាលនិងអាចផ្ទុកអ្នកទស្សនាបានរហូតដល់ ៤៤,០០០នាក់៕ អត្ថបទ៖ ភក្តី ប្រភព៖ The Strait Time

ជប៉ុន៖ ការ៉េមពិសេសមួយប្រភេទត្រូវបានដាក់លក់ក្នុងតម្លៃរហូតដល់ជាង ៦ពាន់ដុល្លារ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃចន្ទ ទី២២​ ខែឧសភានេះ។ ការ៉េមដ៏មានតម្លៃមហាសាលនេះមានឈ្មោះថា Byakuya (ជាភាសាជប៉ុន) ឫមានន័យជាខេមរភាសាថា “រាត្រីពណ៌ស” ត្រូវបានគេដាក់លក់នៅក្នុងប្រទេសជប៉ុនដោយមានតម្លៃជាក់ស្តែង ៨៨០ ០០០យេន (៦,៣៨៧ ដុល្លារ)។ ប្រភពខាងលើបានបន្តថា ការ៉េមខាងលើនេះត្រូវបានផ្សំឡើងពីគ្រឿងផ្សំដែលមានតម្លៃខ្ពស់ៗជាច្រើនប្រភេទដូចជា Edible Gold Leaves, ឈីសប្រភេទ parmigiano reggiano, Sake Lees និងស្រាប្រភេទកម្ររបស់ជប៉ុនជាដើម។ ​សូមបញ្ជាក់ជូនថា តម្លៃដ៏ខ្ពស់របស់ការ៉េមខាងលើនេះក៏ជាតម្លៃបំបែកកំណត់ពិភពលោកផងដែរ ពោលគឺគិតត្រឹមពេលនេះការ៉េម Byakuya បានទទួលកំណត់ត្រាពិភពលោក (Guinness

ថៃ៖ កាសែត បាងកកប៉ុស្តិ៍ ដែលជាបណ្តាញសារព័ត៌មានដ៏ធំរបស់ថៃបានរាយការណ៍នៅព្រឹកថ្ងៃចន្ទ ទី២២ ខែឧសភានេះថា មានពលរដ្ឋថៃជា​​ច្រើននាក់កំពុងរង់ចាំការបើកឲ្យចូលទស្សនាឡើងវិញនូវប្រាសាទព្រះវិហារពីសំណាក់អាជ្ញាធរកម្ពុជា។ គួរបញ្ជាក់ថា ការចង់ចូលទស្សនាប្រាសាទព្រះវិហារនៅពីសំណាក់ពលរដ្ឋថៃនៅពេលនេះគឺជាការចង់ចូលទស្សនាដោយការធ្វើដំណើរផ្ទាល់តាមចក្រព្រំដែនពីប្រទេសថៃកាន់ទីតាំងប្រាសាទដោយផ្ទាល់តែម្តង ពោលគឺចូលតាមច្រកព្រំដែនពីខេត្តស៊ីសាកេត របស់ប្រទេសថៃមកកាន់ខេត្តព្រះវិហារនៃប្រទេសកម្ពុជា។ ប្រភពខាងលើបានបន្តថា ការទទូចចង់បាននូវការអនុញ្ញាតខាងលើនេះ គឺត្រូវបានធ្វើឡើងក្នុងគោលបំណងចង់លើកកម្ពស់វិស័យទេសចរណ៍​ សេដ្ឋកិច្ច​ ក៏ដូចជាពង្រឹងទំនាក់ទំនងរវាងប្រទេសទាំង ២ ឲ្យកាន់តែមានសិទ្ធស្នាលឡើងវិញផងដែរ។ គួររម្លឹកជូនថា ច្រកព្រំដែនខាងលើនេះត្រូវបានបិទអស់រយៈពេលប្រមាណជា ១៥ឆ្នាំមកហើយ ពោលគឺចាប់ពីពេលដែលភាគថៃនិងភាគីកម្ពុជាមានជម្លោះជាមួយគ្នាចាប់តាំងពីឆ្នាំ ២០០៨ម្ល៉េះ។ គិតត្រឹមពេលនេះនៅតាមនៅតាមតំបន់ត្រួតស៊ីគ្នានៅតាមច្រកព្រំដែនខាងលើនេះគឺមានការដាក់ពង្រាយកងទ័ពនៃប្រទេសទាំង ២ រៀងរាល់ ១០-១៥ ម៉ែត្រ បើទោះជាការផ្ទុះអាវុធជាគ្នាលែងកើតមានហើយក៏ដោយ៕ អត្ថបទ៖ ភក្តី ប្រភព៖ បាងកកប៉ុស្តិ៍  

វៀតណាម៖ អាជ្ញាធរវៀតណាមគ្រោងនឹងធ្វើការផ្តាច់ភ្លើងនៅទូទាំងប្រទេស ដើម្បឆ្លើយតបនឹងតម្រូវការនៃការប្រើប្រាស់ថាមពលអគ្គិសនីជាក់ស្តែងក្រោយរលកកម្តៅបន្តកើនឡើងកាន់តែខ្ពស់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសៅរ៍ ទី២០ ខែឧសភានេះ។ គួរបញ្ជាក់ជូនថា សីតុណ្ហភាពនៅក្នុងប្រទេសវៀតណាមបានកើនឡើងដល់ ៤០អង្សាសេនារដូវក្តៅនេះ ហើយបញ្ហាធម្មជាតិនេះបានជម្រុញឲ្យតម្រូវការនៃការប្រើប្រាស់ថាមពលអគ្គិសនីនៅក្នុងប្រទេសវៀតណាមបានកើនឡើងយ៉ាងគំហុក ពោលគឺតម្រូវការមានខ្ពស់ជាងបរិមាណថាមពលអគ្គិសនីដែលអាជ្ញាធរអាចផ្គត់ផ្គង់បាន។ នៅចំពោះបញ្ហាបន្ទាន់នេះគឺអាជ្ញាធរវៀតណាមគ្រោងនឹងធ្វើការផ្តាច់ភ្លើងតាមតំបន់ជាច្រើនស្ទើរតែពេញផ្ទៃប្រទេស ដោយក្នុងនោះក៏មានទាំងការផ្តាច់ភ្លើងនៅក្នុងទីក្រុងធំៗដូចជាទីក្រុងហាណូយផងដែរ។ បើតាមអាជ្ញាធរវៀតណាមបានបញ្ជាក់ថា ការផ្តាច់ភ្លើងនឹងត្រូវធ្វើឡើងដោយការឆ្លាស់វេនគ្នាក្នុងចំណោមតំបន់គោលដៅដែលអាជ្ញាធរបានកំណត់ទុក ដោយតំបន់គោលដៅមួយអាចប្រឈមនឹកការដាច់ភ្លើងក្នុងរយៈពេល ៧ម៉ោងក្នុងមួយថ្ងៃ។ អាជ្ញាធរវៀតណាមបានបន្តថា ​គម្រោងខាងលើនេះនឹងត្រូវអនុវត្តក្នុងពេលឆាប់ៗនេះ និងបន្តអនុវត្តរហូតដល់ចុងខែឧសភានេះផងដែរ៕ អត្ថបទ៖ ភក្តី ប្រភព៖ The Strait Time

មីយ៉ាន់ម៉ា៖ តួលេខនៃជនរងគ្រោះដែលបានស្លាប់បាត់បង់ជីវិតដោយសាព្យុះស៊ីក្លូន Mocha នៅក្នុងប្រទេសមីយ៉ាន់ម៉ាបានកើនឡើងដល់ ១៤៥នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time កាលពីយប់ថ្ងៃសុក្រ ទី១៩ ខែឧសភានេះ។ ភាគច្រើននៃពលរដ្ឋដែលបានស្លាប់បាត់បង់ជីវិតនោះគឺជាពលរដ្ឋរស់នៅក្នុងភូមិ Bu Ma ក្នុងក្រុង Sittwe ភាគខាងលិច នៃប្រទេសមីយ៉ាន់ម៉ា។​ ប្រភពខាងលើបានបន្តថា នៅក្នុងចំណោមជនរងគ្រោះដែលបានស្លាប់បាត់បង់ជីវិតទាំងអស់នោះគឺមានជនរងគ្រោះចំនួន ៤នាក់ជាទាហាន ២៤នាក់គឺជាពលរដ្ឋក្នុងតំបន់​ និង១១៧នាក់ទៀតគឺជាពលរដ្ឋរ៉ូហ៊ីងយ៉ា។ គួរបញ្ជាក់ជូនថា  ឥទ្ធិពលនៃព្យុះស៊ីក្លូន Mocha បានបង្កឲ្យមានខ្យល់បោកបក់ក្នុងល្បឿនរហូតដល់ ១៩៥គីឡួម៉ែត្រក្នុងមួយម៉ោង បង្កឲ្យមានភ្លៀងធ្លាក់យ៉ាងខ្លាំង និងបានបង្កឲ្យមានការបាក់ដីជាច្រើនកន្លែង ខណៈពលរដ្ឋរាប់ម៉ឺននាក់កំពុងរស់នៅដោយគ្មានភ្លើងអគ្គិសនីប្រើប្រាស់៕ អត្ថបទ៖ ភក្តី ប្រភព៖ The Strait Time

ឥណ្ឌា៖ អាជ្ញាធរឥណ្ឌាសម្រេចដាក់ចេញគោលការណ៍ដ៏តឹងរឹងមួយចំពោះកងកម្លាំងប៉ូលិសរបស់ខ្លួនដោយតម្រូវឲ្យប៉ូលិសដែលកំពុងមានបញ្ហាធាត់លើសទម្ងន់ទាំងអស់ត្រូវធ្វើការសម្រកទម្ងន់ បើមិនដូចនោះទេពួកគេត្រូវប្រឈមនឹងការបញ្ឈប់ពីការងារតែម្តង។ យោងតាមការចុះផ្សាយរបស់បណ្តាញសារព័ត៌មាន BBC បានបញ្ជាក់ថា តាមគម្រោងគឺនៅពាក់កណ្តាលខែសីហាខាងមុខនេះ អាជ្ញាធរឥណ្ឌានឹងធ្វើការត្រួតពិនិត្យទម្ងន់ស្តងដាររបស់មន្ត្រីប៉ូលិសនៅទូទាំងប្រទេស ដូចនេះគឺវាមានរយៈពេល ៣ខែសម្រាប់ក្រុមប៉ូលិស ក្នុងការសម្រកទម្ងន់ដោយគិតចាប់ពីពេលជូនដំណឹងនេះទៅ។ ប្រភពខាងលើបានបន្តថា គោលការណ៍ខាងលើនេះត្រូវបានដាក់ចេញដើម្បីឆ្លើយតបនឹងស្ថានភាពសុខភាពរបស់មន្ត្រីប៉ូលិសនាពេលបច្ចុប្បន្ន ដែលភាគច្រើននៃពួកគាត់សុទ្ធតែមានបញ្ហាធាត់លើលទម្ងន់ ពោលគឺលើសទាំងទម្ងន់ស្តង់ដារសុខភាព និងលើសទាំងទម្ងន់ស្តង់ដារដែលបានកំណត់ដោយស្ថាប័នប៉ូលិសផងដែរ។ របាយការណ៍មួយរបស់អាជ្ញាធរឥណ្ឌាបានបង្ហាញថា ក្នុងរយៈពេល ១៨ខែចុងក្រោយនេះមានប៉ូលិសដែលមានបញ្ហាធាត់លើសទម្ងន់ជាច្រើនបានស្លាប់បាត់បង់ជីវិតដោយសារតែពួកគាត់មានជំងឺលើសឈាម និងទឹកនោមផ្អែម។ ជាងនេះទៅទៀត កាលពីប៉ុន្មានសប្តាហ៍មុននេះមានប៉ូលិសឥណ្ឌាជាង ៣០០នាក់ ត្រូវបានដាក់ឲ្យចូលនិវត្តន៍ពីការងារមុនអាយុកំណត់ ក្រោយគេបានពិនិត្យឃើញថា ក្រុមប៉ូលិសទាំងនោះជាមនុស្សញៀននឹងគ្រឿងស្រវឹងជោគជាំ និងមានរាងកាយមិនសមស្របជាប៉ូលិស៕ អត្ថបទ៖ ភក្តី ប្រភព៖ BBC

អាមេរិក៖ យោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសុក្រ ទី១៩ ខែឧសភានេះបានឲ្យដឹងថា ពលរដ្ឋអាមេរិកមួយចំនួនបាននាំគ្នាដាក់ពាក្យបណ្តឹងទៅកាន់តុលាការ ដើម្បីប្រឆាំងនឹងចំណាត់ការរបស់អាជ្ញាធររដ្ឋ Montana ដែលបានសម្រេចធ្វើការហាមឃាត់ជាផ្លូវការមិនឲ្យពលរដ្ឋប្រើប្រាស់នូវបណ្តាញសង្គម TikTok។ ពលរដ្ឋដែលជាម្ចាស់ដើមបណ្តឹងនេះគឺមានចំនួន ៥នាក់ ដែលសុទ្ធតែជាអ្នកប្រើប្រាស់បណ្តាញសង្គម TikTok យ៉ាងសកម្មក្នុងគោលបំណងស្វែងរកប្រាក់ចំណូលតាមរយៈការបង្កើតមាតិកាផ្សេងៗគ្នា។ គួរកត់សម្គាល់ថា កាលពីថ្ងៃពុធកន្លងទៅនេះ អាជ្ញាធររដ្ឋ Montana ដែលស្ថិតនៅភាគខាងលិចនៃសហរដ្ឋអាមេរិកបានសម្រេចបិទកម្មវិធី TikTok មិនឲ្យពលរដ្ឋខ្លួនអាចប្រើប្រាស់បាននោះទេក្រោមហេតុផលថា បណ្តាញសង្គមរបស់ក្រុមហ៊ុនចិនមួយនេះគឺជាចារកម្មលួចយកប្រមូលយកទិន្នន័យរបស់ពលរដ្ឋអាមេរិកដើម្បីប្រគល់ឲ្យរដ្ឋាភិបាលចិន។ សូមបញ្ជាក់ជូនផងដែរថា គិតត្រឹមពេលបច្ចុប្បន្ននេះគឺមានពលរដ្ឋអាមេរិកប្រមាណជា ១៥០លាននាក់កំពុងប្រើប្រាស់បណ្តាញសង្គម TikTok ជារៀងរាល់ថ្ងៃ ហើយក្នុងនោះក៏មានពលរដ្ឋមួយចំនួនកំពុងប្រើប្រាស់បណ្តាញសង្គមមួយនេះដើម្បីបង្កើតប្រាក់ចំណូលបានយ៉ាងច្រើនផងដែរ៕ អត្ថបទ៖ ភក្តី ប្រភព៖ The Strait Time  

ឥណ្ឌា៖ របាយការណ៍មួយបង្ហាញថា មានពលរដ្ឋឥណ្ឌាមួយចំនួនត្រូវធ្វើដំណើរជាច្រើនគីឡូម៉ែត្រដើម្បីទទួលបានទឹកស្អាតប្រើប្រាស់នៅក្នុងអំឡុងពេលនៃរដូវក្តៅនេះ។ យោងតាមរបាយការណ៍ដែលត្រូវបានចុះផ្សាយបន្តដោយបណ្តាញសារព័ត៌មាន The Strait Time នៅព្រឹកថ្ងៃសុក្រ ទី១៩ ខែឧសភានេះបានឲ្យដឹងថា ហេតុការណ៍ខាងលើនេះបានកើតឡើងនៅក្នុងភូមិដាច់ស្រយាលមួយនៅក្នុងរដ្ឋ Telamwadi ដែលមានចម្ងាយប្រមាណជា ១៥០គីឡូម៉ែត្រប៉ុណ្ណោះពីទីក្រុង Mumbai (បុមបៃ) ដែលជាទីក្រុងធំបំផុតរបស់ប្រទេសឥណ្ឌា។ ប្រភពខាងលើបានបន្តថា សីតុណ្ណភាពជាមធ្យមនៅក្នុងរដ្ឋ Telamwadi បានកើនឡើងរហូតដល់ ៤០អង្សាសេនៅក្នុងអំឡុងពេលនៃរដូវក្តៅនេះ ហើយអាកាសធាតុអាក្រក់នេះបានធ្វើឲ្យប្រភពទឹកនៅក្នុងតំបន់មួយចំនួនត្រូវរីងស្ងួតមិនអាចផ្គត់ផ្គង់តាមតម្រូវការប្រចាំថ្ងៃរបស់ពលរដ្ឋក្នុងតំបន់បាននោះទេ។ នៅចំពោះមុខស្ថានភាពមិនអំណោយផលនេះ ពលរដ្ឋឥណ្ឌាមួយចំនួនដោយមានទាំងស្រី្តនិងកុមារផង ត្រូវធ្វើដំណើរប្រមាណជា ២គីឡូម៉ែត្រពីផ្ទះរបស់ពួកគេដើម្បីទៅដងទឹកស្អាតយកមកប្រើប្រាស់ ហើយក្នុងមួយថ្ងៃៗពួកគេត្រូវធ្វើដំណើរជាច្រើនជើង ដ្បិតពួកគេពុំមានសម្ភារទំនើបសម្រាប់ដឹកទឹកក្នុងមួយជើងឲ្យបានច្រើននោះទេ៕ អត្ថប​ទ៖ ភក្តី ប្រភព៖ The Strait Time

បើទោះជាព្រឹតិ្តការណ៍ប្រកួតកីឡា SEA Games 2023 ត្រូវបានបិទបញ្ចប់ជាផ្លូវការរួចទៅហើយក្តី តែរឿងរ៉ាវសំខាន់ៗមួយចំនួនដែលបានកើតឡើងក្នុងអំឡុងពេលនៃការប្រកួតនោះនៅតែដក់ជាប់ក្នុងការចងចាំរបស់ក្រុមអ្នកគាំទ្រមិនទាន់បាត់នៅឡើយទេ។ ក្នុងចំណោមរឿងរ៉ាវសំខាន់ៗជាច្រើននោះគេបានមើលឃើញថា ករណីដែលកីឡាករបាល់ទាត់ជម្រើសជាតិថៃអាយុក្រោម ២២ឆ្នាំម្នាក់ ឈ្មោះ Jonathan Khemdee ពាក់អាវលេខ ១៧ បានធ្វើសកម្មភាពគួរកត់សម្គាល់មួយ គឺរូបគេបោះមេដាយប្រាក់ និងរូបតុក្កតាចោលមុនពេលរូបគេដើរចេញពីទីលានប្រកួតបាល់ទាត់។ សម្រាប់មហាជនទូទៅបានយល់ឃើញថា សកម្មភាពរបស់កីឡាករ Jonathan Khemdee នោះគឺជាការបង្ហាញនូវការមិនពេញចំពោះលទ្ធផលនៃការប្រកួត ដោយក្រុមជម្រើសជាតិថៃបានលេងចាញ់ក្រុមជម្រើសជាតិឥណ្ឌូនេស៊ី ហើយសកម្មភាពនោះក៏ជាការមើលងាយនិងមិនឲ្យតម្លៃចំពោះប្រទេសកម្ពុជាក្នុងនាមម្ចាស់ផ្ទះរៀបចំការប្រកួតនេះផងដែរ។ យ៉ាងណាក្តី ក្រោយមានរឿងរ៉ាវចម្រូងចម្រាស់នេះកីឡាករ Jonathan Khemdee បានបង្ហោះសារនៅលើបណ្តាញសង្គមផ្លូវការរបស់គាត់ថា រូបគាត់គ្មានចេតនាមិនផ្តល់ការគោរពដល់ការប្រកួតនោះទេ ហើយការបោះមេដាយប្រាក់និងរូបតុក្កតានោះគឺរូបគាត់គ្រាន់តែចង់ផ្តល់វាទៅឲ្យអ្នកគាំទ្រ ដែលបានមកគាំទ្រនិងលើកទឹកចិត្តដល់រូបគាត់និងក្រុមជម្រើសជាតិថៃប៉ុណ្ណោះ ដើម្បីអគុណចំពោះទឹកចិត្តអ្នកគាំទ្រទាំងនោះ៕   អត្ថបទ​៖ ភក្តី ប្រភព៖

ចិន៖ អាជ្ញាធរចិនសម្រេចពិន័យក្រុមហ៊ុនផលិតរឿងកំប្លែងមួយជាង ២លានដុល្លារ ក្រោយសមាជិកអ្នកកំប្លែងម្នាក់របស់ក្រុមហ៊ុនមួយនេះបានសម្តែងប៉ះពាល់ដល់កងទ័ពរំដោះប្រជាជនចិន (People’s Liberation Army)។​ យោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃព្រហស្បតិ៍ ទី១៨ ខែឧសភានេះបានឲ្យដឹងថា អ្នកកំប្លែងដែលបានប្រព្រឹត្តិកំហុសរូបនេះមានឈ្មោះថា Li Haoshi ដែលបានសម្តែងជាតួអង្គម្នាក់ឈ្មោះ House នៅក្នុងរឿងកំប្លែងមួយដែលបានចាក់ផ្សាយកាលពីចុងសប្តាហ៍នេះ។ នៅក្នុងឈុតឆាកសម្តែងនោះតួអង្គឈ្មោះ House បាននិយាយអំពីសត្វឆ្កែរបស់គាត់ដេញចាប់សត្វកំប្រុកដោយប្រើប្រាស់ពាក្យថា “របៀប​ធ្វើ​ការ​ងារល្អ មាន​សមត្ថភាព​ឈ្នះ​ការ​ប្រយុទ្ធ” ដែលពាក្យនេះគឺជាពាក្យស្លោកផ្លូវការរបស់កងទ័ពរំដោះប្រជាជនចិន។ សម្រាប់អាជ្ញាធរចិនបានចោទប្រកាន់ថា អ្នកកំប្លែងរូបនេះបានមើលងាយចំពោះពាក្យស្លោករបស់កងទ័ពរំដោះប្រជាជនចិនយ៉ាងខ្លាំង ពោលគឺយកពាក្យដ៏មានអត្ថន័យនេះទៅប្រើប្រាស់ជាមួយសត្វឆ្កែ។ សូមបញ្ជាក់ជូនថា ក្រុមហ៊ុនដែលនូវការពិន័យខាងលើនេះមានឈ្មោះថា Xiaoguo Culture Media ហើយទឹកប្រាក់ជាក់ស្តែងនៃការពិន័យនោះគឺមានចំនួន ១៤,៧ លានយន់ ឬស្មើនឹង