ឥណ្ឌូនេស៊ី៖ អាជ្ញាធរសុខាភិបាលនៃប្រទេសឥណ្ឌូនេស៊ីបានឲ្យដឹងកាលពីថ្ងៃពុធ ទី៣០ ខែមីនា ម្សិលមិញថា មានវ៉ាក់សាំងបង្ការជំងឺកូវីដ-១៩ ចំនួន ៩លានដូសដែលកំពុងមាននៅស្តុកក្នុងប្រទេសឥណ្ឌូនេស៊ីបានហួសកាលបរិច្ឆេតនៃការប្រើប្រាស់ហើយ។ បើយោងតាមការចុះផ្សាយនៅក្នុងបណ្តាញសារព័ត៌មាន​​ Channel News Asia  បានបញ្ជាក់ថា វ៉ាក់សាំងបង្ការជំងឺកូវីដ-១៩ ទាំង ៩លានដូសនោះគឺជាវ៉ាក់សាំងជំនួយ ដែលមានសុពលភាពនៃប្រើប្រាស់ក្នុងរយៈពេលខ្លី ពោលគឺកាលបរិច្ឆេតនៃការប្រើប្រាស់របស់ពួកវាមានរយៈពេលខ្លីតាំងពីពេលផលិតមកម្លេះ។ ប្រភពខាងលើបានបន្តថា គិតត្រឹមពេលនេះឥណ្ឌូនេស៊ីនៅមានវ៉ាក់សាំងដែលមានសុពលភាពនៃការប្រើប្រាស់ខ្លីចំនួន ១,៥លានដូសទៀត ហើយពួកវានឹងត្រូវខូចប្រើលែងកើតនៅខែក្រោយនេះផងដែរ។ ក្រោយជួបប្រទះបញ្ហាដូចបានជម្រាបជូនខាងលើនេះ អាជ្ញាធរសុខាភិបាលនៃប្រទេសឥណ្ឌូនេស៊ីបានជូនដំណឹងទៅកាន់កម្មវិធីផ្តល់វ៉ាក់សាំងសកល COVAX និងបានស្នើសុំឲ្យផ្តល់ជំនួយវ៉ាក់សាំងណាដែលមានអាយុកាលនៃការប្រើប្រាស់វែងមកកាន់ឥណ្ឌូនេស៊ី ព្រោះបើផ្តល់ជូនវ៉ាក់សាំងដែលមានអាយុកាលខ្លីគឺឥណ្ឌូនេស៊ីមិនអាចប្រើប្រាស់ទាន់ពេលវេលានោះទេ៕ អត្ថបទ៖ ភក្តី ប្រភព៖ Channel News Asia

ថៃ៖ យោងតាមការចុះផ្សាយរបស់បណ្តាញសារព័ត៌មាន The Thaiger នៅព្រឹកថ្ងៃពុធ ទី៣០ ខែមីនានេះបានឲ្យដឹងថា អាជ្ញាធរថៃបានជូនដំណឹងជាថ្មីម្តងទៀតជុំវិញការលេងបាញ់ទឹកនៅក្នុងអំឡុងពេលនៃពិធីបុណ្យចូលឆ្នាំប្រពៃណីថៃ ដែលនឹងចូលមកដល់នៅក្នុងពាក់កណ្តាលខែមេសាខាងមុខនេះ ដោយវិធានការថ្មីនេះហាក់មានលក្ខណៈធូស្រាលជាងមុនបន្តិច។ នៅក្នុងវិធានការថ្មីរបស់អាជ្ញាធរថៃបានបញ្ជាក់យ៉ាងច្បាស់ដដែលថា ហាមមិនឲ្យមានការលេងបាញ់ទឹកឬជះទឹកដាក់គ្នា ហាមមិនឲ្យលេងលាបម្សៅដាក់គ្នា និងហាមមិនឲ្យមានការប្រមូលផ្តុំជាសាធារណៈដូចអ្វីដែលពលរដ្ឋបានធ្វើក្នុងពេលកន្លងមកនោះទេ។ គណៈកម្មាធិការជំងឺឆ្លងនៅទីក្រុងបាងកកបានសម្រេចចិត្តអនុញ្ញាតឱ្យមានការលេងបាញ់ទឹកនៅក្នុងតំបន់ជាក់លាក់ ដែលបានស្នើសុំការអនុញ្ញាត ហើយអ្នករៀបចំត្រូវតែគោរពតាមវិធានការ ដែលកំណត់ដោយមជ្ឈមណ្ឌលសម្រាប់ការគ្រប់គ្រងស្ថានភាពកូវីដ-១៩ ដោយអ្នកចូលរួមត្រូវតែរក្សាគម្លាតសុវត្ថិភាព ៤ ម៉ែត្រពីគ្នា ពាក់ម៉ាស់ឲ្យបានគ្រប់គ្នា និងមិនអនុញ្ញាតឲ្យទទួលគ្រឿងស្រវឹងឡើយ។ ​ គួរបញ្ជាក់ជូនថា វិធានការរបស់អាជ្ញាធរថៃខាងលើនេះត្រូវបានដាក់ចេញក្នុងគោលបំណងទប់ស្កាត់ការរាតត្បាតជំងឺកូវីដ-១៩ ដ្បិតក្រុមអ្នកជំនាញបានព្យាករណ៍ថា ក្រោយពេលបុណ្យចូលឆ្នាំប្រពៃណីថៃរួចគឺចំនួនអ្នកឆ្លងជំងឺកូវីដ-១៩នឹងកើនឡើងខ្ពស់ ពោលគឺអាចឡើងរហូតដល់ខ្ទង់ ១០០,០០០នាក់នៅក្នុងមួយថ្ងៃ៕ អត្ថបទ៖ ភក្តី ប្រភព៖ The Thaiger

ថៃ៖ អាជ្ញាធរវៀតណាមកាលពីយប់ថ្ងៃអង្គារ ទី២៩​​ ខែមីនា ម្សិលមិញនេះបានចេញដីកាចាប់ខ្លួនឧកញ៉ាម្នាក់ជុំវិញករណីក្លែងបន្លំទីផ្សារភាគហ៊ុន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia។ លោកឧកញ៉ាដែលកំពុងត្រូវបានអាជ្ញាធរវៀតណាមតាមចាប់ខ្លួននេះមានឈ្មោះថា Trinh Van Quyet ជាម្ចាស់អាណាចក្រ FLC ដែលមានក្រុមហ៊ុនបុត្រសម្ព័ន្ធជាច្រើនដូចជា រមណីយដ្ឋានប្រណិតជាច្រើនកន្លែង ក្លឹបវាយកូនហ្គោល ក្រុមហ៊ុនអាកាសចរណ៍ Bamboo Airways និងក្រុមហ៊ុនធំៗមួយចំនួនទៀត ដែលមានសក្តានុពលផ្នែកហិរញ្ញវត្ថុយ៉ាងខ្លាំងនៅក្នុងប្រទេសវៀតណាម។ ប្រភពខាងលើបានបន្តថា កាលពីថ្ងៃទី ១០ ខែមករាកន្លងទៅ លោកឧកញ៉ាវ័យ ៤៦ឆ្នាំនិងត្រូវបានគេចាត់ទុកថាជាអ្នកមានទ្រព្យសម្បត្តិលំដាប់កំពូលម្នាក់នៅក្នុងប្រទេសវៀតណាមរូបនេះបានក្លែងបន្លំទិន្នន័យទីផ្សារភាគហ៊ុននិងលាក់បាំងព័ត៌មាននៃសកម្មភាពទីផ្សារសំខាន់ៗជាច្រើនដើម្បីរក្សាផលប្រយោជន៍ផ្ទាល់ខ្លួនរបស់គាត់ ហើយសកម្មភាពខុសឆ្គងនេះបានធ្វើឲ្យប្រទេសវៀណាមត្រូវបាត់បង់វិនិយោគិនជាច្រើននាក់​ និងបានធ្វើឲ្យប៉ះពាល់ដល់ទីផ្សារភាគហ៊ុនក្នុងប្រទេសវៀតណាមយ៉ាងធ្ងន់ធ្ងរផងដែរ។ យ៉ាងណាក្តី អាជ្ញាធរវៀតណាមនៅមិនទាន់បានបញ្ជាក់ថា បទល្មើសដែលលោក

ថៃ៖ ក្រសួងសុខាភិបាលថៃបានឲ្យដឹង​កាលពីថ្ងៃអង្គារ ទី២៩ ខែមីនាម្សិលមិញថា គិតត្រឹមពេលនេះប្រទេសថៃមានថ្នាំលេបប្រឆាំងជំងឺកូវីដ-១៩ ប្រភេទ Favipiravir  នៅក្នុងស្តុកគ្រប់គ្រា​ន់សម្រាប់ធ្វើការផ្គត់ផ្គង់ទៅតាមតម្រូវការ ខណៈអាជ្ញាធរថៃក៏កំពុងតែបញ្ជាទិញថ្នាំប្រភេទនេះជាច្រើនគ្រាប់បន្ថែមទៀតផងដែរដើម្បីទុកប្រើប្រាស់នៅក្រោយពេលបិទបញ្ចប់នៃពិធីបុណ្យសង្រ្កាន្តថៃ។ បើតាមលោក Sirikul Matevelungsun ដែលជានាយកគ្រប់គ្រងនៃស្ថាប័នឱសថស្ថានរដ្ឋថៃបានបញ្ជាក់ថា ក្នុងអំឡុងពេលនេះអាជ្ញាធរថៃបានកំពុងតែធ្វើការចែកចាយថ្នាំ Favipiravir  ចំនួន ៨០លានគ្រាប់ទៅតាមមន្ទីរពេទ្យសំខាន់ៗនៅក្នុងប្រទេសថៃ។ លោកបានបន្តថា នៅពាក់កណ្តាលខែមេសាខាងមុខនេះអាជ្ញាធរថៃនឹងធ្វើការចែកចាយថ្នាំ Favipiravir  ចំនួន ៣០លានគ្រាប់បន្ថែមទៀត ខណៈថ្នាំទាំង ៣០លានគ្រាប់នេះគឺកំពុងមានក្នុងស្តុកនៅប្រទេសថៃរួចស្រាប់ទៅហើយ។ លោក Sirikul Matevelungsun បានបន្ថែមទៀតថា ក្រោយពេលចូលឆ្នាំថៃរួចអាជ្ញាធរសុខាភិបាលក៏គ្រោងនឹងបញ្ជាទិញថ្នាំ Favipiravir ចំនួន ៧៥លានគ្រាប់បន្ថែមទៀតផងដែរ ដូចនេះហើយទើបលោកហ៊ានអះអាងថា​ ថៃមានថ្នាំលេបប្រឆាំងជំងឺកូវីដ-១៩ គ្រប់គ្រាន់ដើម្បីឆ្លើយតបនឹងតម្រូវការជាក់ស្តែងក្នុងពេលបច្ចុប្បន្ននេះ៕

ថៃ៖ អាជ្ញាធរថៃបានសម្រេចធ្វើការហាមឃាត់មិនឲ្យមានការលេងចាក់ទឹកនិងបាញ់ទឹកដាក់គ្នានៅលើដងផ្លូវ Khaosan ក្នុងក្រុងបាងកកក្នុងឱកាសនៃពិធីបុណ្យចូលឆ្នាំប្រពៃណីថៃដែលនឹងរៀបចំឡើងនៅក្នុងខែមេសាខាងមុខនេះទេ ខណៈនាពេលកន្លងមកផ្លូវដ៏មមាញឹកមួយនេះគឺជាតំបនទេសចរណ៍សម្រាប់ពលរដ្ឋថៃនិងជនបរទេសយ៉ាងមានសក្តានុពលជាទីបំផុត។ បើតាមលោក Anutin Charnvirakul ដែលជារដ្ឋមន្ត្រីក្រសួងសុខាភិបាលថៃបានបញ្ជាក់ថា ការហាមឃាត់នេះគឺត្រូវបានធ្វើឡើងក្នុងគោលបំណងទប់ស្កាត់ការររាត្បាតនៃជំងឺកូវីដ-១៩។ គួររម្លឹកជូនថា នាពេលកន្លងមកអាជ្ញាធរថៃធ្លាប់បានជូនដំណឹងមិនឲ្យពលរដ្ឋខ្លួនលេងជះទឹកនិងលាបម្សៅដាក់គ្នាម្តងរួចហើយ តែអាជ្ញាធរហាក់នៅមានភាពស្ទាក់ស្ទើរចំពោះការអនុវត្តការហាមឃាត់នេះនៅចំណុចផ្លូវ Khaosan ព្រោះតាមធម្មតាសកម្មភាពកំសាន្តនៅតំបន់នេះអាចទាក់ទាញភ្ញៀវទេសចរណ៍អន្តរជាតិបានច្រើនខ្លាំងណាស់។ បន្ថែមពីការជូនដំណឹងអំពីការហាមឃាត់ខាងលើនេះ អាជ្ញាធរថៃក៏បានអំពាវនាវឲ្យពលរដ្ឋត្រូវចេះការពារខ្លួនឲ្យបានខ្ពស់ក្នុងអំឡុងពេលនៃពិធីបុណ្យសង្ក្រាន្តថៃ ដូចជារក្សាអនាម័យឲ្យបានជាប់ជាប្រចាំ ត្រូវជួបជុំគ្នានៅកន្លែងមានខ្យល់ចេញចូលគ្រប់គ្រាន់ ត្រូវធ្វើតេស្តដោយខ្លួនឯងទាំងមុននិងក្រោយពេលបានជួបជុំសាច់ញាតិនៅតាមបណ្តាខេត្ត ហើយពលរដ្ឋវ័យចំណាស់ត្រូវប្រញាប់ទៅចាក់វ៉ាក់សាំងឲ្យបានមុនពេលដែលបុណ្យសង្រ្កាន្តចូលមកដល់៕ អត្ថបទ៖ ភក្តី ប្រភព៖ National Thailand

តាលីបង់៖ រដ្ឋាភិបាលនៃប្រទេសតាលីបង់បានចេញសេចក្តីសម្រេចមួយហាមឃាត់មិនឲ្យពលរដ្ឋជាស្រ្តីអាចធ្វើដំណើរតាមយន្តហោះបានតែម្នាក់ឯងនោះទេ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ កាលពីយប់ថ្ងៃចន្ទ ទី២៨ ខែមីនាម្សិលមិញនេះ។ យ៉ាងណាក្តីនៅក្នុងបទបញ្ជាហាមឃាត់នោះរដ្ឋាភិបាលតាលីបង់បានបញ្ជាក់ថា  ដើម្បីអាចធ្វើដំណើរតាមយន្តហោះបានគឺពលរដ្ឋតាលីបង់ជាស្រ្តីទាំងអស់ត្រូវតែរួមដំណើរជាមួយសាច់ញាតិជាបុរសយ៉ាងហោចណាស់ម្នាក់។ ប្រភពខាងលើបានបន្តថា ដើម្បីអនុវត្តសេចក្តីហាមឃាត់ខាងលើនេះឲ្យមានប្រសិទ្ធភាពរដ្ឋាភិបាលតាលីបង់បានធ្វើសេចក្តីជូនដំណឹងយ៉ាងច្បាស់លាស់ទៅកាន់ក្រុមហ៊ុនអាកាសចរណ៍ក្នុងស្រុកទាំងអស់និងកំណត់ថា ប្រសិនបើមានក្រុមហ៊ុនណាហ៊ានអនុញ្ញាតឲ្យមានស្រ្តីធ្វើដំណើរតែម្នាក់នោះគឺអាជ្ញាធរនឹងចុះទៅបិទអាជីវកម្មរបស់ក្រុមហ៊ុននោះភ្លាមតែម្តង។ អត្ថបទ៖ ភក្តី ប្រភព៖ បាងកកប៉ុស្តិ៍   

ចិន៖ យោងតាមការចុះផ្សាយរបស់បណ្តាញសារព័ត៌មាន​ Channel News Asia នៅព្រឹកថ្ងៃចន្ទ ទី២៨ ខែមីនានេះបានឲ្យដឹងថា អាជ្ញាធរចិនបានសម្រេចធ្វើការបិទខ្ទប់ទីក្រុងសៀងហៃហើយដើម្បីឆ្លើយតបនឹងរលកនៃការរាតត្បាតជំងឺកូវីដ-១៩ ខណៈសៀងហៃគឺជាមជ្ឈមណ្ឌលហិរញ្ញវត្ថុដ៏សំខាន់របស់ចិននិងមានពលរដ្ឋសរុបជាង ២៦លាននាក់កំពុងរស់នៅ។ តាមផែនការគឺទីក្រុងសៀងហៃនឹងត្រូវបិទខ្ទប់ជា ២ដំណាក់កាល ហើយក្នុងអំឡុងពេលនៃការបិទខ្ទប់នោះគឺអាជ្ញាធរចិននឹងធ្វើតេស្តទ្រង់ទ្រាយចំពោះគ្រប់ប្រជាពលរដ្ឋផងដែរ។ ប្រភពខាងលើបានបន្តថា ការបិទខ្ទប់ក្នុងដំណាក់កាលទី ១គឺអាជ្ញាធរចិននឹងបិទខ្ទប់តំបន់នៅតាមបណ្តោយទន្លេ Huangpu ក្នុងរយៈពេល ៩ថ្ងៃ ដោយគិតចាប់ពីថ្ងៃចន្ទនេះតទៅ។ ក្រោយបិទបញ្ចប់ការធ្វើតេស្តក្នុងដំណាក់កាលទី១ អាជ្ញាធរចិននឹងបន្តធ្វើការបិទខ្ទប់តំបន់ខាងលិចទន្លេ Huangpu តែការបិទខ្ទប់នេះគឺមានរយៈពេលត្រឹម ៥ប៉ុណ្ណោះ ព្រោះនៅក្នុងតំបន់នេះមានចំនួនប្រជាពលរដ្ឋដែលត្រូវធ្វើតេស្តតិចជាងនៅក្នុងតំបន់ទី ១។ ក្នុងអំឡុងពេលនៃការបិទខ្ទប់ទាំង ២ដំណាក់កាលពលរដ្ឋក្នុងក្រុងសៀងហៃទាំងអស់មិនត្រូវអនុញ្ញាតឲ្យធ្វើដំណើរចេញពីផ្ទះឡើយបើគ្មានការចាំបាច់ ខណៈអាជ្ញាធរនឹងដឹកជញ្ជូនចំណីអាហារទៅចែកជូនពលរដ្ឋដល់សហគមន៍ដែលពួកគេកំពុងរស់នៅតែម្តង៕ អត្ថបទ៖ ភក្តី ប្រភព៖ Channel News Asia

តាមការទស្សន៍ទាយរបស់លោកយាយ Baba Vanga បានបង្ហាញថា លោកប្រធានាធិបតីរុស្ស៊ី វ្ល៉ាឌីមៀ ពូទីននឹងក្លាយជាម្ចាស់នៃពិភពលោក (Lord of the World) នេះបើយោងតាមអត្ថបទសារព័ត៌មានមួយដែលបានចុះផ្សាយដោយកាសែត Daily Mail នៅព្រឹកថ្ងៃចន្ទ ទី២៨ ខែមីនានេះ។ គួររម្លឹកជូនថា លោកយាយ Baba Vanga ត្រូវបានគេចាត់ទុកថា ជាកំពូលអ្នកទស្សន៍ទាយព្រឹត្តិការណ៍ធំៗនៅលើពិភពលោក ព្រោះនាពេលកន្លងមានព្រឹត្តិការណ៍ពិភពលោកមួយចំនួនសុទ្ធតែបានកើតឡើងដូចអ្វីដែលលោកយាយបានព្យាការណ៍ទុកកាលពីជាង ៤០ឆ្នាំមុន។ លោកយាយ Baba Vanga គឺជាជនជាតិប៊ុលហ្គារី ពិការភ្នែកទាំងសងខាង ហើយរូបគាត់បានស្លាប់កាលពីឆ្នាំ ១៩៩៦ ក្នុងជន្មាយុ ៨៤ឆ្នាំ ពោលគឺមានរយៈពេល ២៦ឆ្នាំមកហើយ បើគិតមកទល់នឹងពេលនេះ។

ចិន៖ ដំណឹងទាក់ទងនឹងករណីធ្លាក់យន្តហោះដឹកអ្នកដំណើរ​នៅក្នុងប្រទេសចិននៅតែជាប្រធានបទគួរឲ្យចាប់អារម្មណ៍សម្រាប់បណ្តាញសារព័ត៌មានធំៗមួយចំនួននៅជុំវិញពិភពលោក ដ្បិតឧប្បត្តិហេតុមួយនេះបានបន្សល់ទុកនូវរឿងរ៉ាវមិនអស់ចិត្តនិងចម្ងល់ជាច្រើន។ ជាក់ស្តែងនៅព្រឹកថៃចន្ទ ទី២៨ ខែមីនានេះបណ្តាញសារព័ត៌មាន Trending in China បានរាយការណ៍ថា ប្រអប់ខ្មៅទី២ របស់យន្តហោះដែលបានធ្លាក់នោះត្រូវបានក្រុមអាកាសចរណ៍រកឃើញហើយ ពោលគឺក្រុមអ្នកស្រាវជ្រាវនៅកន្លែងកើតហេតុផ្ទាល់បានរកឃើញតាំងពីថ្ងៃអាទិត្យម្លេះ។ ក្នុងអំឡុងពេលនេះប្រអប់ខ្មៅដែលគេជឿថា ជាឧបករណ៍ផ្ទុកនូវទិន្នន័យចុងក្រោយស្តីពីការធ្លាក់យន្តហោះកំពុងត្រូវបានបញ្ជូនទៅកាន់ទីក្រុងប៉េកាំង ដើម្បីឲ្យក្រុមអ្នកជំនាញធ្វើការពិនិត្យ និងវិភាគរកមូលហេតុពិតប្រាកដ ដែលបង្កឲ្យយន្តហោះធ្លាក់។ គួររម្លឹកជូនថា យន្តហោះដឹកអ្នកដំណើរប្រភេទ Boeing 737-800 បានធ្លាក់កាលពីថ្ងៃចន្ទដើមសប្តាហ៍មុន ដោយធ្លាក់បុកទៅលើភ្នំមួយកន្លែងនៅតំបន់ភាគខាងត្បូងប្រទេសចិន។ នៅក្នុងយន្តហោះមានផ្ទុកមនុស្សសរុបចំនួន ១៣២នាក់ ហើយក្រុមជនរងគ្រោះទាំងអសនោះត្រូវបានជឿថាបានស្លាប់បាត់បង់ជីវិតអស់ហើយ បើទោះជាពេលនេះគេមិនបានរកឃើញសាកសពរបស់ពួកគាត់ក៏ដោយ៕ អត្ថបទ៖ ភក្តី ប្រភព៖ Trending in China  

ចិន៖ ក្រុមអាកាសចរណ៍ដែលកំពុងធ្វើប្រតិបត្តិការណ៍ស្រាវជ្រាវចំពោះឧប្បតិ្តហេតុធ្លាក់យន្តហោះដឹកអ្នកដំណើរ​ដែលបានធ្លាក់នៅលើភ្នំភាគខាងត្បូងប្រទេសចិនកាលពីដើមសប្តាហ៍នេះ បានរកឃើញសំបុត្រដ៏រំជួលចិត្តរបស់អ្នកដំណើរម្នាក់ នេះបើយោងតាមសេចក្តីរាយការណ៍របស់បណ្តាញសារព័ត៌មាន South China Morning Post នៅព្រឹកថ្ងៃសៅរ៍ ទី២៦ ខែមីនានេះ។ នៅក្នុងសំបុត្រនោះមានសំណេរជាភាសាចិន សរសេរដោយដៃ និងមានខ្លឹមសាររៀបរាប់អំពីបន្តោងខ្សែកគុជមួយប្រភេទ ដែលតាមជំនឿនិងវប្បធម៌ចិនគឺបន្តោងខ្សែកនោះនឹងជួយនាំមកនូវ សន្តិភាព សុវត្ថិភាព សំណាងល្អ និងអាយុវែងចំពោះអ្នកដែលបានពាក់វាជាប់នៅខ្លួន។ បើតាមការអះអាងរបស់ក្រុមអ្នកស្រាវជ្រាចិនបានឲ្យដឹងថា សំបុត្រមួយច្បាប់នោះជារបស់អ្នកដំណើរភេទស្រីម្នាក់ឈ្មោះ Xiang  អាយុជាង ២០ឆ្នាំ ហើយស្រ្តីរូបនេះជាអ្នកលក់ទំនិញតាមបណ្តាញអ៊ីនធឺណិតដ៏មានប្រជាប្រិយភាពម្នាក់ផងដែរ។ តាមការស្រាវជ្រាវបានបង្ហាញទៀតថា ថ្មីៗនេះស្រីជាអ្នកលក់ Online រូបនេះបានផ្តើមលក់បន្តោងគុជបែបបុរាណចិនជាច្រើនប្រភេទ ហើយខ្លឹមសារនៅក្នុងសំបុត្រដែលគេបានរកឃើញនោះគឺជាប្រយោគដែលនាងនឹងយកទៅនិយាយផ្សព្វផ្សាយអំពីបន្តោងគុជទៅកាន់អតិថិជនរបស់នាង។ តាមការសន្និដ្ឋាន ស្រ្តីជនរងគ្រោះរូបនេះទំនងជាកំពុងតែទន្ទេញខ្លឹមសារនៅក្នុងសំបុត្រនោះពេលយន្តហោះរៀបនឹងធ្លាក់ចុះ ពោលគឺនាងព្យាយាមបួងសួងបន្តោងគុជឲ្យជួយសង្គ្រោះជីវិតនាងក្នុងពេលយន្តហោះកំពុងធ្លាក់។ គួរបញ្ជាក់ថា