អាមេរិក៖ ក្រុមហ៊ុន Apple បានប្រកាសផ្តល់ប្រាក់រង្វាន់ចំនួន ១លានដុល្លារចំពោះអ្នកណា ដែលមានសមត្ថភាពអាចលួចចូល ឬ Hack ចូលក្នុងប្រព័ន្ធ Apple Intelligence (AI) ថ្មីរបស់ខ្លួនបាន នេះបើយោងតាមការចុះផ្សាយរបស់បណ្តាញសារព័ត៌មាន Daily Mail កាលពីយប់ថ្ងៃទី២៥ ខែតុលា។ ការប្រកាសផ្តល់ប្រាក់រង្វាន់នេះត្រូវបានធ្វើឡើងដើម្បីបញ្ជាក់ថា ប្រព័ន្ធ AI ថ្មីមួយ ដែលក្រុមហ៊ុន Apple ទើបដាក់ឱ្យប្រើប្រាស់ពិតជាមានសុវត្ថិភាព ១០០% ពោលគឺគ្មានអ្នកណាម្នាក់អាច Hack ចូលទៅប្រើប្រាស់បានគ្មានការអនុញ្ញាតនោះទេ។ សូមបញ្ជក់ជូនថា ប្រព័ន្ធ Apple Intelligence​ គឺជាប្រព័ន្ធថ្មីមួយ ដែលក្រុមហ៊ុនបច្ចេកវិទ្យាខ្នាតយក្សរបស់អាមេរិក Apple បានដាក់ឱ្យប្រើប្រាស់នៅក្នុងទូរស័ព្ទ iPhone 16

ប្រេស៊ីល៖ ទីបំផុតទៅក្រុមហ៊ុនរុករករ៉ែដ៏ធំមួយនៅលើពិភពលោកគឺក្រុមហ៊ុន BHP បានយល់ព្រមបង់ប្រាក់សងជំងឺចិត្តទៅកាន់រដ្ឋាភិបាលនៃប្រទេសប្រេស៊ីលហើយ ជុំវិញករណីដែលក្រុមហ៊ុនបានធ្វើឱ្យទំនប់ទឹក Mariana បានបាក់​ក្នុងអំឡុងពេលធ្វើប្រតិបត្តិការណ៍រុករករ៉ែ។ គួររម្លឹកជូនថា រឿងរ៉ាវចម្រូងចម្រាសនេះបានកើតឡើងតាំងតែពីឆ្នាំ២០១៥ ម្លេះ ហើយក្នុងរយៈពេលជិត ១០ឆ្នាំកន្លងមកនេះ ការប្តឹងផ្តល់តាមប្រព័​ន្ធតុលាការក៏បានកើតមានជាបន្តបន្ទាប់ផងដែរ ខណៈសាលក្រមចុងក្រោយដែលទាំងភាគីរងគ្រោះនិងភាគីបង្កហេតុត្រូវទទួលយកទៅអនុវត្តនោះ ទើបត្រូវបានធ្វើឡើងកាលពីពេលថ្មីៗនេះដោយតុលាការកំពូលនៅក្នុងទីក្រុងឡុងដ៏ ប្រទេសអង់គ្លេស។ បើយោងតាមការចុះផ្សាយរបស់បណ្តាញសារព័ត៌មាន BBC ដែលបានចុះផ្សាយនៅក្នុងថ្ងៃសៅរ៍ ទី២៦ ខែតុលានេះបានបញ្ជាក់ថា គឺនៅថ្ងៃម្សិលមិញនេះតំណាងរបស់ក្រុមហ៊ុនរុករករ៉ៃ BHP បានចុះហត្ថលេខាជាមួយរដ្ឋាភិបាលប្រទេសស៊ីលជាផ្លូវការហើយក្នុងការយល់ព្រមបង់ប្រាក់សងជំងឺចិត្តចំនួន ៣០ពាន់លានដុល្លារ ខណៈនាពេលកន្លងមករដ្ឋាភិបាលប្រេស៊ីលធ្លាប់ប្តឹងទាមទារប្រាក់សំណងរហូតដល់ ៤៧ពាន់លានដុល្លារឯណោះ។ សូមបញ្ជាក់ជូនថា​ ទំនប់ទឹក Mariana គឺជាទំនប់ទឹកដ៏ធំនិងសំខាន់បំផុតមួយស្ថិតនៅភាគខាងត្បូងប្រទេសប្រេស៊ីល ហើយនៅពេលដែលទំនប់ទឹកបានបាក់ គឺវាបានបណ្តាលឱ្យមានមនុស្សចំ​នួន ១៩នាក់ត្រូវស្លាប់បាត់បង់ជីវិត បង្កឱ្យមានទឹកជំនន់ដែលបានបំផ្លាញផ្ទះរបស់ប្រជាពលរដ្ឋនិងប្រព័ន្ធហេដ្ឋារចនាសម្ព័ន្ធសាធារណៈជាច្រើន បណ្តាលឱ្យមានភក់និងសារធាតុពុលត្រូវហូរចូលទៅក្នុងទឹកទន្លេ តំបន់ព្រៃ

ហ្វីលីពីន៖ គិតត្រឹមថ្ងៃសៅរ៍ ទី២៦ ខែតុលានេះ កោះ Luzon ដែលស្ថិតនៅតំបន់ភាគខាងជើងប្រទេសហ្វីលីពីនបានរងការវាយប្រហារដោយព្យុះត្រូពិច Trami អស់រយៈពេល ៣ថ្ងៃមកហើយ ខណៈឥទ្ធិពលរបស់ព្យុះនៅមិនទាន់ថយចុះនៅឡើយទេ។ ស្របពេលដែរព្យុះនៅតែបន្តបណ្តាលឱ្យមានភ្លៀងធ្លាក់ ទឹកជំនន់ និងបានបញ្ហាបាក់ដីនោះ តួលេខជនរងគ្រោះក៏បន្តកើនឡើងយ៉ាងខ្ពស់គួរឱ្យកត់សម្គាល់ផងដែរ។ របាយការណ៍ចុងក្រោយដែលបានចុះផ្សាយដោយបណ្តាញសារព័ត៌មាន Channel News Asia បានឱ្យដឹងថា គិតត្រឹមយប់ថ្ងៃទី ២៥ ខែតុលា តួលេខអ្នកស្លាប់ដោយសារឥទ្ធិពលរបស់ត្រូពិច Trami បានកើនឡើងរហូតដល់ ៧៦នាក់ ខណៈពលរដ្ឋមួយចំនួនកំពុងតែបាត់ខ្លួន។ ជុំវិញករណីមានមនុស្សកំពុងបាត់ខ្លួននេះ អាជ្ញាធរហ្វីលីពីននៅមិនទាន់អាចបញ្ជាក់ពីចំនួនច្បាស់លាស់នៅឡើយទេ ខណៈក្រុមអ្នកជួយសង្គ្រោះកំពុងដុតដៃដុតជើងស្វែងរកអ្នកបាត់ខ្លួនទាំងនោះហើយ។ គួរបញ្ជាក់ជូនថា​ក្រៅតែពីបានបណ្តាលឱ្យមានអ្នកស្លាប់និងបាត់ខ្លួនហើយ ឥទ្ធិពលរបស់ព្យុះត្រូពិច Trami ក៏បានបណ្តាលឱ្យពលរដ្ឋប្រមាណជា ២០ម៉ឺននាក់ផ្សេងទៀតត្រូវជម្លៀសខ្លួនចេញពីផ្ទះសម្បែងទាំងបង្ខំផងដែរ ដើម្បីគេចចេញពីគ្រោះថ្នាក់ផ្សេងៗដែលអាចកើតឡើងដោយយថាហេតុ៕

ហ្វីលីពីន៖ យ៉ាងហោចណាស់មានពលរដ្ឋហ្វីលីពីនចំនួន ១៤នាក់បន្ថែមទៀតបានស្លាប់បាត់បង់ជីវិតដោយសារតែឥទ្ធិពលរបស់ត្រូពិច Trami នេះបើយោងតាមការចុះផ្សាយរបស់បណ្តាញសារព័ត៌មាន Channel New Asia នៅក្នុងថ្ងៃសុក្រ ទី២៥ ខែតុលា។ ដូចនេះ គិតត្រឹមពេលនេះគឺតួលេខសរុបនៃអ្នកដែលស្លាប់បាត់បង់ជីវិតដោយសារឥទ្ធិពលរបស់ព្យុះត្រូពិច Trami នៅហ្វីលីពីនបានកើនឡើងដល់ ៤០នាក់ហើយ។ ក្រៅតែពីមានការកើតឡើងចំពោះតួលេខអ្នកស្លាប់បាត់បង់ជីវិតហើយ តួលេខអ្នកដែលបានជម្លៀសខ្លួនចេញពីផ្ទះទាំងបង្ខំវិញក៏មានការកើនឡើងគួរឱ្យកត់សម្គាល់ផងដែរ ពោលគឺកើនឡើងពីខ្ទង់ ១៥០,០០០នាក់នៅក្នុងថ្ងៃម្សិលមកដល់ចំនួន ១៩៣,០០០នាក់នៅក្នុងថ្ងៃទី២៥នេះ។ គួររម្លឹកជូនថា ព្យុះត្រូពិច Trami ដែលជាព្យុះដ៏មានគ្រោះថ្នាក់មួយ បានធ្វើដំណើរទៅដល់កោះ Luzon ភាគខាងជើងហ្វីលីពីនអស់រយៈពេល ២ថ្ងៃមកហើយ ខណៈឥទ្ធិពលរបស់ព្យុះបានកំពុងតែបង្កឱ្យមានភ្លៀងធ្លាក់យ៉ាងខ្លាំង ទឹកជំនន់ និងបញ្ហាបាក់ដីផងដែរ៕ អត្ថបទ៖ ភក្តី ប្រភព៖ Channel New Asia

សៀវភៅអក្សរសិល្ប៍ដ៏កម្រមួយក្បាលមានចំណងជើងថា “The Little Prince” នឹងត្រូវបានដាក់ក្នុងតម្លៃរហូតដល់ ១,២៥លានដុល្លារ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី២៥ ខែតុលា។ សៀវភៅដែលនឹងត្រូវបានដាក់លក់នេះគឺជាប្រភេទសៀវភៅច្បាប់ចម្លង ដែលមានការអនុញ្ញាតឱ្យបោះពុម្ភជាផ្លូវការពីសំណាក់ម្ចាស់កម្មសិទ្ធបញ្ញា។ ប្រភពខាងលើបញ្ជាក់ថា សៀវភៅអក្សរសិល្ប៍ “The Little Prince” គឺជាប្រភេទអក្សរសិល្ប៍សម្រាប់កុមារ​ ត្រូវបាននិពន្ធនៅក្នុងអំឡុងឆ្នាំ ១៩៤០ ដោយលោក Antoine de Saint-Exupéry ដែលជាកវីនិពន្ធដ៏ល្បីមួយរូបនៅលើពិភពលោក។ តាមគម្រោងគឺសៀវភៅតម្លៃរាប់លានមួយក្បាលនឹងត្រូវដាក់លក់នៅក្នុងកម្មវិធីមហោស្រពសិល្បៈ Abu Dhabi (Abu Dhabi Art Festival) ដែលនឹងរៀបចំឡើងនៅក្នុងប្រទេសអេមីរ៉ាតអារ៉ាប់រួមនៅក្នុងខែវិច្ឆិកាខាងមុខនេះ។

ថៃ៖ កោះឯកជនមួយឈ្មោះកោះ Ko Kham ត្រូវបានក្រុមអ្នកអចលនព្រទ្យប្រណិតថៃប្រកាសដាក់លក់ក្នុងតម្លៃ ១,៨ពាន់លានបាត (ជាង ៥៣លា​នដុល្លារ) នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី២៥ ខែតុលា។ កោះនេះគឺជាកោះមួយនៅក្នុងចំណោមបញ្ជីកោះឯកជនដ៏ស្រស់ស្អាតទាំង ១០ នៅក្នុងប្រទេសថៃ និងមានទីតាំងស្ថិតនៅក្នុងខេត្ត Trat ភាគខាងត្បូងប្រទេសថៃ។ ប្រភពខាងលើបានបន្តថា កោះប្រណិតមួយនេះមានផ្ទៃដីសរុបចំនួន ១,៦ហិចតា ហើយតម្លៃខាងលើនេះគឺមានបញ្ជូនទាំងរមណីយដ្ឋានកំពុងតែស្ថិតនៅក្នុងដំណាក់កាលសាងសង់មួយកន្លែងផងដែរ។ ​យ៉ាងណាក្តី សម្រាប់អ្នកដែលក្លាយជាម្ចាស់កោះក្នុងពេលពេលនេះក៏មានសិទ្ធអាចលុបចោលកិច្ចសន្យាសាងសង់រមណីដ្ឋាននោះចោលផងដែរ ប្រសិនបើមិនពេញចិត្ត ឬចង់បង្កើតរមណីដ្ឋានផ្សេងទៀតតាមចិត្តស្រលាញ់របស់ខ្លួន។ គួរកត់សម្គាល់ថា ដំណឹងប្រកាសលក់កោះឯកជននេះកំពុងផ្ទុះការចាប់អារម្មណ៍យ៉ាងខ្លាំងនៅក្នុងបណ្តាញអ៊ីនធឺណិត ដ្បិតវាជាអចលនទ្រព្យតម្លៃរ៉ាប់លានដុល្លារ ដែលត្រូវបានប្រកាសដាក់លក់ក្នុងអំឡុងពេលវិស័យអចលនទ្រព្យក្នុងប្រទេសជាច្រើនកំពុងជាប់គាំង៕ អត្ថបទ៖ ភក្តី ប្រភព៖ The Strait

ថៃ៖ រដ្ឋាភិបាលថៃបានសម្រេចអនុវត្តច្បាប់យកពន្ធពីអ្នកដំណើរអន្តរជាតិហើយ ក្រោយកិច្ចពិភាក្សាលើគម្រោងដ៏ចម្រូងចម្រាសមួយនេះបានអូសបន្លាយអស់រយៈពេលជាច្រើនខែ នេះបើយោងតាមការផ្សាយរបស់បណ្តាញសារព័ត៌មាន The Strait Time នៅក្នុងថ្ងៃព្រហស្បតិ៍ ទី២៤ ខែតុលា។ តាមគម្រោងគឺការអនុម័តច្បាប់ជាផ្លូវការនឹងត្រូវធ្វើឡើងនៅដើមឆ្នាំ ២០២៥ ខណៈច្បាប់នឹងចូលជាធរមានក្នុងរយៈពេល ៦ខែបន្ទាប់មកទៀត ពោលគឺនៅពាក់កណ្តាលឆ្នាំ២០២៥។ ប្រភពខាងលើបានបន្តថា ការអនុវត្តច្បាប់យកពន្ធពីអ្នកដំណើរនេះនឹងត្រូវធ្វើឡើងជាច្រើនដំណាក់កាល ដោយនៅក្នុងដំណាក់កាលទី១ គឺច្បាប់នឹងត្រូវអនុវត្តចំពោះជនបរទេសទាំងឡាយណា ដែលបានធ្វើដំណើរមកដល់ទឹកដីថៃតាមរយៈជើងហោះហើរតែប៉ុណ្ណោះ ខណៈដំណាក់កាលទី២ គឺច្បាប់នឹងបន្តអនុវត្តចំពោះអ្នកដំណើរអន្តជាតិ ដែលបានទៅដល់ទឹកដីថៃទាំងតាមផ្លូវទឹកនិងផ្លូវគោកផងដែរ។ ចំពោះតម្លៃនៃការបង់ពន្ធវិញគឺមាន ២កម្រិត ដូចខាងក្រោម៖ ១-អ្នកដំណើរអន្តរជាតិតាមផ្លូវអាកាសត្រូវបង់ពន្ធចំនួន ៣០០បាត (៨,៩ ដុល្លារ) ២-អ្នកដំណើរអន្តរជាតិតាមផ្លូវគោកនិងផ្លូវទឹកត្រូវបង់ពន្ធចំនួន ១៥០បាត (៤,៤៥ដុល្លារ)៕  អត្ថបទ៖

សហរដ្ឋអាមេរិកបានអះអាងថា យ៉ាងហោចណាស់មានទាហានកូរ៉េខាងជើងចំនួន ៣,០០០នាក់ត្រូវបញ្ជូនទៅកាន់ប្រទេសរុស្ស៊ី នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃព្រហស្បតិ៍ ទី២៤ ខែតុលា។ គោលបំណងនៃការបញ្ជូនកម្លាំងទ័ពដ៏ច្រើននេះទៅកាន់រស្ស៊ីគឺដើម្បីហ្វឹកហាត់ពួកគេឱ្យមានបទពិសោធន៍ក្នុងការធ្វើសង្គ្រាមពិត និងជួយគាំទ្ររុស្ស៊ីក្នុងការធ្វើសង្គ្រាមជាមួយអ៊ុយក្រែនផងដែរ។ ប្រភពខាងលើនេះបានបន្តថា ការលូកដៃចូលនៅក្នុងភ្លើងសង្គ្រាមរវាងអ៊ុយក្រែនជាមួយរស្ស៊ីពីសំណាក់ប្រទេសកូរ៉េខាងជើងនៅពេលនេះគឺសញ្ញាដ៏គ្រោះថ្នាក់បំផុតមួយ ដ្បិតវានឹងធ្វើឱ្យសង្គ្រាមកាន់តែរីកធំឡើង ហើយមិនងាយនឹងបិទបញ្ចប់នោះទេ។ សូមរម្លឹកជូនថា កាលពីពេលថ្មីៗនេះទីភ្នាក់ងារចារកម្មជាតិរបស់កូរ៉េខាងត្បូងបានរាយការណ៍ថា ចាប់តាំងពីពេលដែលសង្គ្រាមរវាងរុស្ស៊ីនិងអ៊ុយក្រែនបានកើតឡើងមក ប្រទេសកូរ៉េខាងជើងក្រោមការដឹកនាំរបស់លោក គីម ជុងអ៊ុន បានបញ្ជូនកាំភ្លើងធំ និងគ្រាប់រ៉ុក្កែតជាងប្រាំបីលានគ្រាប់ហើយទៅឱ្យរស្ស៊ី ខណៈគ្រឿងសព្វាវុធទាំងនោះត្រូវបានបញ្ជូនទៅតាមនាវាក្នុងទម្រង់មិនបើកចំហរជាសាធារណៈនោះទេ៕ អត្ថបទ៖ ភក្តី ប្រភព៖ Channel News Asia

ហ្វីលីពីន៖ យ៉ាងហោចណាស់មានពលរដ្ឋហ្វីលីពីនចំនួន ២៦នាក់បានស្លាប់បាត់បង់ជីវិតដោយសារឥទ្ធិរបស់ព្យុះត្រូពិច Trami នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃព្រហស្បតិ៍ ទី២៤ ខែតុលា។ ក្រៅពីបានបណ្តាលឱ្យមានអ្នកស្លាប់បាត់បង់ជីវិតហើយ ឥទ្ធិពលរបស់ព្យុះត្រូពិច Trami ក៏បានបង្ខំឱ្យពលរដ្ឋប្រមាណជា ១៥០,០០០នាក់ផ្សេងទៀតត្រូវជម្លៀសខ្លួនចេញពីផ្ទះសម្បែងជាបន្ទាន់ផងដែរ។ គួររម្លឹកជូនថា ព្យុះត្រូពិច Trami ដែលជាព្យុះដ៏មានគ្រោះថ្នាក់មួយ បានធ្វើដំណើរទៅដល់កោះ Luzon ភាគខាងជើងហ្វីលីពីនកាលពីល្ងាចម្សិលមិញនេះក្នុងល្បឿនជាមធ្យមជិត ១០០គីឡូម៉ែត្រក្នុងមួយម៉ោង។ គិតត្រឹមពេលនេះឥទ្ធិពលរបស់ព្យុះត្រូពិច Trami បានបណ្តាលឱ្យមានភ្លៀងធ្លាក់យ៉ាងខ្លាំង បង្កមានទឹកជំនន់ ខណៈតំបន់មួយចំនួនដែលបានទទួលរងសម្ពាធទឹកភ្លៀងយ៉ាងជោគជាំនោះបានកំពុងតែប្រឈមនឹងការកើតមានបញ្ហាបាក់ដីបន្ថែមទៀតផងដែរ៕ អត្ថបទ៖ ភក្តី ប្រភព៖ Channel News Asia

អាឡឺម៉ង់៖ ក្រុមហ៊ុនអាកាសចរណ៍អន្តរជាតិដ៏ធំមួយរបស់ប្រទេសអាឡឺម៉ង់គឺក្រុមហ៊ុន Lufthansa បានប្រកាសបន្តផ្អាកជើងហោះហើរទៅកាន់ប្រទេសអ៊ីរ៉ង់និងប្រទេសលីបង់រហូតដល់ដើមឆ្នាំក្រោយដោយសារបញ្ហាជម្លោះនៅតំបន់មជ្ឈិមបូព៌ា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី២៣​ ខែតុលា។ គួររម្លឹកជូនថា នាពេលកន្លងមកក្រុមហ៊ុន Lufthansa ធ្លាប់បានប្រកាសពីការផ្អាកជើងហោះហើរនេះម្តងហើយ​ ដោយពេលនោះក្រុមហ៊ុនមិនបានបញ្ជាក់ពីពេលកំណត់ទេ។ យ៉ាងណាក្តី នៅក្នុងសេចក្តីប្រកាសលើកទី ២នេះ គឺខាងក្រុមហ៊ុនអាកាសចរណ៍ Lufthansa បានបញ្ជាក់អំពីរយៈជាក់លាក់នៃការផ្អាកដំណើរការជើងហោះហើរដូចខាងក្រោមនេះ៖ ១-ជើងហោះហើរចេញពីប្រទេសអាឡឺម៉ង់ទៅកាន់ទីក្រុង Tehran នៃប្រទេសអ៊ីរ៉ង់ នឹងត្រូវផ្អាកដំណើររហូតដល់ទី៣១ ខែមករា ឆ្នាំ២០២៥។ ២-ជើងហោះហើរចេញពីប្រទេសអាឡឺម៉ង់ទៅកាន់ទីក្រុង Beirut នៃប្រទេសលីបង់ នឹងត្រូវផ្អាកដំណើរការរហូតដល់ថ្ងៃទី២៨ ខែកុម្ភៈ ឆ្នាំ២០២៥។ សូមបញ្ជាក់ជូនថា បញ្ហាជម្លោះដែលជាមូលហេតុចម្បងជំរុញឱ្យមានការផ្អាកជើងហោះហើរខាងលើនេះគឺដោយសារការប្រយុទ្ធគ្នារវាងកងកម្លាំងនៃប្រទេសអ៊ីស្រាអែលជាមួយនិងក្រុមហាម៉ាសប៉ាឡេស្ទីន ហើយថ្មីៗនេះកងកម្លាំងអ៊ីស្រាអែលក៏បន្តបើកការប្រយុទ្ធគ្នាជាមួយក្រុមហេបូឡាលីបង់បន្ថែមទៀតផងដែរ៕