ចិន៖ យ៉ាងហោចណាស់មានពលរដ្ឋចិនចំនួន ៥០នាក់បានបាត់បង់ជីវិតដោយសារមានភ្លៀងធ្លាក់យ៉ាងខ្លាំង នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃអង្គារ ទី២០ ខែសីហា។ ហេតុការណ៍អកុសលនេះបានកើតឡើងនៅក្នុងក្រុង Zixing ខេត្ត Hunan ស្ថិតនៅភូមិភាគកណ្តាលនៃប្រទេសចិន។ ប្រភពខាងលើបានបន្តថា​ ក្រៅតែបានសម្លាប់មនុស្សអស់ជាច្រើននាក់ហើយ គិតត្រឹមពេលនេះក៏នៅមានមនុស្សចំនួន ១៥នាក់ផ្សេងទៀតកំពុងតែបាត់ខ្លួនផងដែរ។ ជាងនេះទៅទៀត អាជ្ញាធរចិនក៏បានធ្វើការជម្លៀសពលរដ្ឋប្រមាណជា ៣០០,០០០នាក់ទៅកាន់កន្លែងមានសុវត្ថិភាពជាបណ្តោះអាសន្នសិនផងដែរ។ សូមបញ្ជាក់ថា ព្យុះភ្លៀងខាងលើនេះបានកើតឡើងដោយសារឥទ្ធិពលរដ្ឋរបស់ព្យុះទីហ្វុង Gaemi ខណៈក្នុងអំឡុងពេលមានភ្លៀងធ្លាក់ខ្លាំងនោះវាក៏បានបណ្តាលឱ្យមានការបាក់ដី និងខ្យល់បោកបក់យ៉ាងខ្លាំងផងដែរ៕  អត្ថបទ៖ ភក្តី ប្រភព៖ Channel News Asia

ម៉ាឡេស៊ី៖ ប្រទេសម៉ាឡេស៊ីបានសម្រេចទាញសញ្ញាព្រមានកម្រិតខ្ពស់ចំពោះករណីជំងឺអុតស្វា (Mpox) នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងរសៀលថ្ងៃចន្ទ ទី១៩ ខែសីហា។ យ៉ាងណាក្តី គិតត្រឹមពេលនេះប្រទេសម៉ាឡេស៊ីនៅមិនទាន់រកឃើញករណីមានអ្នកឆ្លងជំងឺអុតស្វានៅក្នុងប្រទេសខ្លួននៅឡើយទេ សម្រាប់នៅក្នុងករណីផ្ទុះការរាតត្បាតជាសកលជាថ្មីម្តងទៀតនេះ ឬគិតចាប់តាំងពីដើមឆ្នាំ ២០២៤ រហូតមកទល់នឹងពេលនេះ។  យ៉ា​ងណាក្តី ដើម្បីទប់ស្កាត់ការចម្លងមេរោគមកពីក្រៅប្រទេស អាជ្ញាធរម៉ាឡេស៊ីបានដាក់ចេញវិធានបន្ទាន់មួយចំនួនដូចជា ដំឡើងកាមេរ៉ា និងម៉ាស៊ីនវាស់កម្តៅនៅតាមព្រលានយន្តហោះ ដើម្បីបន្ថែមការត្រួតពិនិត្យទៅលើក្រុមអ្នកដំណើរ ហើយចំពោះអ្នកដំណើរមកពីតំបន់ដែលកំពុងមានការរាតត្បាតជំងឺអុតស្វាខ្លាំងនឹងតម្រូវធ្វើការតាមដាននិងត្រួតពិនិត្យសុខភាពខ្លួនឯងរយៈពេល ២១ថ្ងៃផងដែរ ដោយគិតចាប់ពីថ្ងៃមកដល់ទឹកដីម៉ាឡេស៊ីភ្លាម។​​ សូមបញ្ជាក់ជូនថា ក្នុងពេលបច្ចុប្បន្ននេះជំងឺអុតស្វាកំពុងរាតត្បាតខ្លាំងនៅតំបន់អាហ្វ្រិក និងបានបណ្តាលឱ្យពលរដ្ឋក្នុងសាធារណរដ្ឋប្រជាធិបតេយ្យកុងហ្គោជាង ៥០០នាក់បានបាត់បង់ជីវិត ខណៈប្រទេសស៊ុតអែតនៅតំបន់អឺរ៉ុប និងប្រទេសហ្វីលីពីននៅតំបន់អាស៊ីទើបបានប្រកាសរកឃើញករណីអ្នកឆ្លងជំងឺអុតស្វាករណីទី១ ផងដែរ៕ អត្ថបទ៖ ភក្តី

ប៉ូឡូញ៖ ប្រទេសប៉ូឡូញកំពុងចាត់វិធានការយ៉ាងបន្ទាន់មួយជុំវិញករណីមានសត្វត្រីនៅក្នុងទន្លេជាច្រើនក្បាលងាប់ជាបន្តបន្ទាប់គ្នា ដែលរហូតមកទល់នឹងពេលនេះគឺមានត្រីងាប់សរុបប្រមាណជា ៧៧តោនហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃចន្ទ ទី១៩​ ខែសីហា។ ករណីដ៏កម្រនេះបានកំពុងតែកើតឡើងនៅក្នុងទន្លេ Oder ដែលជាទន្លេដ៏ធំមួយនៅតំបន់អឺរ៉ុប និងហូរឆ្លងកាត់ប្រទេសចំនួន ២ គឺសាធារណរដ្ឋឆេក និងប្រទេសប៉ូឡូញ។ បើតាមក្រសួងអាកាសធាតុប៉ូឡូញបានឱ្យដឹងថា មូលហេតុដែលបណ្តាលឱ្យមានករណីត្រីងាប់ច្រើនដូចនេះគឺដោយសារនៅលើផ្ទៃទឹកទន្លេ Oder មានហូរទៅដោយសារាយពណ៌មាសមួយប្រភេទ ដែលមានផ្ទុកជាតិពុលចំពោះសត្វត្រីជាច្រើនប្រភេទ ខណៈសត្វរស់នៅក្នុងទឹកទន្លេមួយចំនួនទៀតក៏បានទទួលរងនូវសារពុលដែរ តែមិនដល់កម្រិតត្រូវបាត់បង់ជីវិតនោះទេ។ ប្រភពខាងលើបានបន្តថា ចំនួនត្រីដែលបានងាប់ទាំង ៧៧តោនខាងលើនេះ គឺជាតួលេខក្នុងរបាយការណ៍ ដែលគេបានធ្វើការបូកសរុបចាប់ពីថ្ងៃទី៣ ដល់ថ្ងៃទី១៦ ខែសីហាប៉ុណ្ណោះ ហើយគិតត្រឹមពេលនេះសារាយពណ៌មាសដែលជាដើមហេតុធ្វើឱ្យមានត្រីងាប់នៅមិនទាន់រសាត់អស់ពីទន្លេឡើយ ដូចនេះបរិមាណត្រីដែលត្រូវងាប់អាចបន្តកើនឡើងខ្ពស់ជាងនេះផងដែរ៕  អត្ថបទ៖

ហ្វីលីពីន៖ អាជ្ញាធរសុខាភិបាលនៃប្រទេសហ្វីលីពីន បានប្រកាសពីការរកឃើញករណីអ្នកឆ្លងជំងឺអុតស្វា​ (Mpox) ជាលើកដំបូងនៅក្នុងឆ្នាំ២០២៤ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃចន្ទ ទី១៩ ខែសីហា។ អ្នកឆ្លងជំងឺអុតស្វារូបនេះគឺជាពលរដ្ឋហ្វីលីពីន ដែលមានអាយុ ៣៣ឆ្នាំ និងមិនធ្លាប់មានប្រវត្តិធ្វើដំណើរចេញក្រៅប្រទេសឡើយ។ បើតាមលោក Albert Domingo ដែលជាអ្នកនាំពាក្យឱ្យអាជ្ញាធរសុខាភិបាលហ្វីលីពីនបានឱ្យដឹងថា គិតត្រឹមពេលនេះគេនៅមិនទាន់អាចធ្វើការបញ្ជាក់ពីប្រភេទមេរោគនៃជំងឺអុតស្វាដែលបានឆ្លងនៅក្នុងករណីខាងលើនេះនៅឡើយទេ​​ ខណៈការសិក្សាទៅលើប្រភេទមេរោគកំពុងត្រូវបានធ្វើឡើងនៅក្នុងមន្ទីរពិសោធន៍។ អ្នកនាំពាក្យរូបនេះបានបន្តថា ដោយអ្នកជំងឺគឺជាពលរដ្ឋស្រុក និងធ្លាប់មានអ្នកជំនាក់ទំនងជាមួយពលរដ្ឋមួយចំនួននោះ ក្រុមអ្នកជំនាញកំពុងបារម្ភថា មេរោគនេះក៏ទំនងជាបានចម្លងទៅកាន់អ្នកផ្សេងមួយចំនួនផ្សេងទៀតផងដែរ៕ អត្ថបទ៖ ភក្តី ប្រភព៖ The Strait Time

អង្គការសុខភាពពិភពលោក (WHO) បានព្រមានអំពីលទ្ធភាពនៃការរាតត្បាតជំងឺអុតស្វា (Mpox) នៅក្នុងតំបន់អឺរ៉ុប នេះបើយោងតាមការចុះផ្សាយរបស់បណ្តាញសារព័ត៌មាន The Strait Time កាលពីយប់ថ្ងៃទី១៦ ខែសីហា។ សេចក្តីព្រមាននេះត្រូវបានធ្វើឡើងក្រោយអាជ្ញាធរសុខាភិបាលនៃប្រទេសស៊ុតអែតបានប្រកាសពីការរកឃើញករណីអ្នកវិជ្ជមានជំងឺអុតស្វាជាលើកដំបូងក្នុងប្រទេសរបស់ខ្លួន ហើយវាក៏ជាករណីដំបូងនៅក្នុងឆ្នាំនេះផងដែ ចំពោះករណីវិជ្ជមានជំងឺអុតស្វានៅក្រៅតំបន់អាហ្វ្រិក។ សូមបញ្ជាក់ជូនថា នៅតំបន់អាហ្វ្រិកកំពុងរងការរាតត្បាតនៃជំងឺអុតស្វាយ៉ាងខ្លាំង ហើយប្រទេសដែលកំពុងប្រឈមនឹងរលកនៃរាតត្បាតនោះមានដូចជា ដំបូងបានផ្ទុះខ្លាំងនៅក្នុងសាធារណរដ្ឋប្រជាធិបតេយ្យកុងហ្គោ និងក្រោយមកបានបន្តររាតត្បាតចូលទៅកាន់ប្រទេសប៊ូរុនឌី កេនយ៉ា រវ៉ាន់ដា និងអ៊ូហ្គង់ដាជាដើម។ ប្រភពខាងលើនេះបានបន្តថា បើគិតចាប់តាំងពីដើមឆ្នាំ២០២៤ រហូតមកទល់នឹងពេលនេះ សម្រាប់នៅក្នុងសាធារណរដ្ឋប្រជាធិបតេយ្យកុងហ្គោ ដែលជាកន្លែងផ្តើមផ្ទុះការចម្លងដំបូងនោះគឺបានរកឃើញករណីអ្នកឆ្លងសរុបរហូតដល់ ១៥,៦៦៤ករណី ហើយនៅក្នុងនោះមានករណីអ្នកស្លាប់ចំនួន ៥៤៨ករណីផងដែរ៕ អត្ថបទ៖ ភក្តី ប្រភព៖ The Strait

ស្វីស៖ អ្នកដើរឡើងភ្នំចំនួន ២នាក់បានស្លាប់បាត់បង់ជីវិតក្នុងពេលព្យាយាមធ្វើដំណើរឡើងទៅលើកំពូលភ្នំ Matterhorn នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍ ទី១៧ ខែសីហា។ សូមបញ្ជាក់ជូនថា ភ្នំ Matterhorn គឺជានិមិត្តរូបនៃប្រទេសស្វីស និងជាតំបន់ទេសចរណ៍ដ៏មានសក្តានុពលមួយប្រចាំនៅតំបនអឺរ៉ុបផងដែរ។ ប្រភពខាងលើបានបន្តថា យោងតាមភស្តុតាងរជាក់ស្តែងបានអ​នុញ្ញាតឱ្យគេដឹងត្រឹមថា ជនរងគ្រោះទាំង ២នាក់បានស្លាប់ក្រោយបានធ្លាក់ពីលើភ្នំក្នុងពេលធ្វើដំណើរដល់រយៈកម្ពស់ជាង ១០០០ម៉ែត្រ ខណៈហេតុផលច្បាស់លាស់នៃការធ្លាក់នោះគឺនៅមិនទាន់មានការបញ្ជាក់នៅឡើយទេ។ យ៉ាងណាក្តី បើតាមក្រុមអ្នកជំនាញផ្នែកឡើងភ្នំជាច្រើនបានសន្និដ្ឋានថា មូលហេតុដែលជំរុញឱ្យមានការធ្លាក់នេះគឺទំនងជាបណ្តាលមកពីបញ្ហាអាកាសធាតុ ដែលបានចុះត្រជាក់ខ្លាំងនិងលឿនលើសពីការព្យាករណ៍ទុកជាមុន ដែលធ្វើឱ្យក្រុមអ្នកឡើងភ្នំមិនអាចសម្របខ្លួនបានទាន់ពេលវេលា៕ អត្ថបទ៖ ភក្តី ប្រភព៖ The Strait Time  

កូរ៉េខាងត្បូង៖ ទីក្រុងសេអ៊ូល ប្រទេសកូរ៉េខាងត្បូង បានបំបែកកំណត់ត្រាមានសីតុណ្ហភាពពេលរាត្រីខ្ពស់បំផុតនិងវែងបំផុតមិនធ្លាប់មាននោះទេនៅក្នុងរយៈពេល ១១៧ឆ្នាំចុងក្រោយនេះ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី១៦ ខែសីហា។ សីតុណ្ហភាពដ៏ខ្ពស់បំផុតក្នុងពេលរាត្រីសម្រាប់ទីក្រុងសេអ៊ូលនោះគឺជាកម្រិតសីតុណ្ហភាព ដែលបានកើនឡើងលើសពី ២៥ អង្សាសេ ហើយសម្រាប់ប្រទេសកូរ៉េខាងត្បូង ដែលជាប្រភេទស្ថិតនៅតំបន់ត្រជាក់នោះបានហៅអាកាសធាតុពេលរាត្រីនេះថា “រាត្រីត្រូពិច”។ ប្រភពខាងលើបានបន្តថា  បរិយាកាសរាត្រីត្រពិចបានកើតមានឡើងនៅក្នុងទីក្រុងសេអ៊ូលអស់រយៈពេល​ ២៦ថៃ្ងជាប់គ្នាមកហើយ ខណៈវាគឺជាបាតុភូតរាត្រីត្រូពិច ដែលវែងបំផុតបើគិតចាប់តាំងពីឆ្នាំ១៩០៧ មក។ សូមបញ្ជាក់ជូនថា កម្រិតសីតុណ្ហភាព ដែលកើតឡើងខ្ពស់លើសពី ២៥អង្សាសេ​នៅក្នុងទីក្រុងសេអ៊ូលនោះ គឺវាបានកើតឡើងតាំងតែពីនៅន្លោះពីម៉ោង ៦ល្ងាចរហូតដល់ម៉ោង ៩ព្រឹកនៃថ្ងៃបន្ទាប់ទៀត ខណៈតាមធម្មតាសីតុណ្ហភាពនៅចន្លោះពេលនេះគួរតែចុះទៀបក្រោម២៥អង្សាសេ ឬត្រឹមខ្ទង់ជាង ១០អង្សាសេប៉ុណ្ណោះ។ យ៉ាងណាក្តី

ចិន៖ ប្រទេសចិនបានសម្រេចដាក់ចេញវិធានការទប់ស្កាត់ការចម្លងជំងឺអុតស្វា (Mpox) ពីអ្នកដំណើរអន្តរជាតិជាថ្មីម្តងទៀត នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី១៦​ ខែសីហា។ សេចក្តីសម្រេចខាងលើនេះត្រូវបានធ្វើឡើងក្រោយអង្គការសុខភាពពិភពលោក (WHO) បានសម្រេចដាក់ការរាតត្បាតនៃជំងឺអុតស្វា (Mpox) នៅលើពិភពលោកក្នុងភាពមានអាសន្នជាថ្មីម្តងទៀតផងដែរ។ យោងតាមសេចក្តីថ្លែងការណ៍ពីរដ្ឋបាលគយចិនបានបញ្ជាក់ថា ក្នុងការអនុវត្តវិធានការខាងលើនេះគឺអាជ្ញាធរចិននឹងតម្រូវឱ្យ​​ក្រុមអ្នកដំណើរទាំងអស់ ដែលបានធ្វើដំណើរមកពីតំបន់ ឬប្រទេសមានការរាតត្បាតនៃជំងឺអុតស្វា ឬមានរោគសញ្ញាគួរឱ្យសង្ស័យណាមួយត្រូវតែធ្វើការកាសប្រាប់អាជ្ញាធរចិនពេលមកដល់ទឹកដីចិនភ្លាម ដើម្បីឱ្យក្រុមអ្នកជំនាញចិនងាយស្រួលចាត់វិធានការបន្ថែមទៀតចំពោះពួកគេ។ ជាងនេះទៅទៀត គ្រប់ទំនិញ យានជំនិះ និងសូម្បីតែកុងទ័រណឺ ដែលគេប្រើសម្រាប់ផ្ទុកទំនិញផ្សេងៗមកពីក្រៅប្រទេសក៏ត្រូវឆ្លងកាត់ការសម្លាប់មេរោគដែរ ពេលមកដល់កំពង់ផែ ឬព្រលានយន្តហោះក្នុងប្រទេសចិនភ្លាម។ យ៉ាងណាក្តី គិតត្រឹមពេលនេះអាជ្ញាធរនៅមិនទាន់រកឃើញមានករណីអ្នកឆ្លងជំងឺអុតស្វានៅក្នុងចំណោមពលរដ្ឋខ្លួននៅឡើយទេ ហើយក្នុងចំណោមអ្នកដំណើរអន្តជាតិក៏មិនទាន់រកឃើញដែរ៕ អត្ថបទ៖ ភក្តី

តៃវ៉ាន់៖ គ្រោះរញ្ជួយដីកម្រិតស្រាលមួយបានកើតឡើងនៅលើកោះតៃវ៉ាន់នៅព្រឹកថ្ងៃសុក្រ ទី១៦ ខែសីហា នេះបើយោងតាមសេចក្តីរាយការណ៍របស់បណ្តាញសារព័ត៌មាន The Strait Time។ គ្រោះរញ្ជួយដីបានកើតឡើងក្នុងកម្រិត ៦,៣ រ៉ិចទ័រ និងបានកើតឡើងនៅក្នុងទីក្រុង Hualien ដែលស្ថិតនៅប៉ែកខាងកើត នៃកោះតៃវ៉ាន់។ ប្រភពខាងលើបានបន្តថា ភ្លាមៗក្រោយគ្រោះរញ្ជួយដីបានកើតឡើងគឺវាបានធ្វើឱ្យអគារជាច្រើនញ័រមួយសន្ទុះ រថភ្លើងជាច្រើនត្រូវធ្វើដំណើរក្នុងល្បឿនយឺតៗ ខណៈពលរដ្ឋមួយចំនួនក៏បានព្យាយាមអនុវត្តវិធានការសុវត្ថិភាពភ្លាមៗផងដែរ ដើម្បីការពារខ្លួនពីគ្រោះថ្នាក់ធ្ងន់ធ្ងរណាមួយ ដែលអាចកើតមានឡើងដោយយថាហេតុ។ យ៉ាងណាក្តី ហេតុការណ៍នេះមិនបានបណ្តាលឱ្យមានអ្នកណាម្នាក់រងរបួសនោះទេ ហើយការខូតខាតទ្រព្យសម្បត្តិសាធារណៈវិញក៏មានអ្វីច្រើនគួរឱ្យកត់សម្គាល់ដែរ៕ អត្ថបទ៖ ភក្តី ប្រភព៖ The Strait Time

អ៊ូហ្គង់ដា៖ តួលេខអ្នកស្លាប់បាត់បង់ជីវិតនៅក្នុងហេតុការណ៍បាក់ដីក្នុងប្រទេសអ៊ូហ្គង់ដាបានកើតឡើងដល់ចំនួន ២៦នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅក្នុងថ្ងៃព្រហស្បតិ៍ ទី១៤ ខែសីហា។ ទន្ទឹមគ្នានេះចំនួនពលរដ្ឋដែលកំពុងបាត់ខ្លួនក៏នៅមានចំនួនច្រើនដែរ ពោលគឺមានរហូតដល់ ៣៩នាក់។ គួររម្លឹកជូនថា ហេតុការណ៍អកុសលខាងលើនេះបានកើតឡើងតាំងតែពីថ្ងៃសុក្រ សប្តាហ៍មុនម្លេះ ដោយដីនៅតំបន់ចាក់សំរាមដ៏ធំមួយបានបាក់ស្រុតយ៉ាងឆាប់រហ័ស។ ប្រភពខាងលើបានបន្តថា នៅក្នុងចំណោមអ្នកកំពុងបាត់ខ្លួនទាំងអស់ខាងលើនេះគឺមានអ្នកបាត់ខ្លួនចំនួន ៣៥នាក់ជាអ្នកដើររើសសំរាម ខណៈគេមិនរំពឹងថាអ្នកបាត់ខ្លួនទាំងអស់នោះមានសំណាងអាចនៅមានជីវិតនោះទេ តែយ៉ាងណាក្តីអាជ្ញាធរអ៊ូហ្គង់ដានឹងព្យាយាមស្វែងរកពួកគេឱ្យអស់ពីលទ្ធភាព៕ អត្ថបទ៖ភក្តី ប្រភព៖ បាងកកប៉ុស្តិ៍