ហ្វីលីពីន៖ ធនាគារកណ្តាលហ្វីលីពីនបានសម្រេចផ្អាកការជួញដូររូបិយប័ណ្ណបរទេសជាបណ្តោះអាសន្នដោយសារឥទ្ធិពលរបស់ព្យុះត្រូពិច Trami នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី២៣ ខែតុលា។ តាមការព្យាករណ៍ ព្យុះត្រូពិច Trami បានធ្វើដំណើរក្នុងល្បឿន ១៨០គីឡូម៉ែត្រក្នុងមួយម៉ោង និងបានវាយប្រហារតំបន់សំខាន់ៗជាច្រើននៅក្នុងខេត្ត Catanduanes ។ ក្រៅតែបានសម្រេចផ្អាកសកម្មភាពជួញដូរដូររូបិយប័ណ្ណបរទេសហើយ អាជ្ញាធរប្រចាំនៅតំបន់ងាយរងគ្រោះខាងលើនេះក៏បានសម្រេចបិទសាលារៀន និងផ្អាកការងាររដ្ឋមួយចំនួនផងដែរ ដើម្បីបញ្ចៀសគ្រោះថ្នាក់ផ្សេងៗដែលអាចកើតឡើងដោយយថាហេតុ។ គួរបញ្ជាក់ជូនថា ខេត្ត Catanduanes គឺជាដែនដីកោះមួយស្ថិតនៅភាគកណ្តាលនៃប្រទេសហ្វីលីពីន​ ហើយតាមកត្តាធម្មជាតិដែលដីកោះមួយនេះគឺងាយនឹងកើតមានគ្រោះធម្មជាតិណាស់៕ អត្ថបទ៖ ភក្តី ប្រភព៖ The Strait Time

កូរ៉េខាងត្បូង៖ អ្នកវិទ្យាសាស្រ្តកូរ៉េខាងត្បូងបានបង្កើតយន្តហោះគ្មានមនុស្សបើក (Drone) មួយប្រភេទ ដែលអាចយកទៅប្រើប្រាស់ជារទេះសម្រាប់ដឹកអីវ៉ាន់បាន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃអង្គារ ទី២២​​ ខែតុលា។ ក្រុមអ្នកវិទ្យាសាស្រ្តដែលបានបង្កើត Drone យ៉ាងពិសេសនេះ គឺជាក្រុមអ្នកវិទ្យាសាស្រ្តមកពីសាកលវិទ្យាល័យវិទ្យាសាស្ត្រ និងបច្ចេកវិទ្យាជាតិសេអ៊ូល (Seoul National University of Science and Technology)។ ប្រភពខាងលើបានបន្តថា Drone ខាងលើនេះត្រូវបានអភិវឌ្ឍក្នុងគោលបំណងសម្រាប់យកទៅប្រើប្រាស់ជាមធ្យោបាយសម្រាប់ដឹកជញ្ជូនអីវ៉ាន់ផ្សេងៗ ដោយវាបានបំពាក់ទៅដោយស្លាបកង្ហារជាច្រើន មានរាងធំ មានធ្នើរសម្រាប់ដាក់អីវ៉ាន់ មានសមត្ថភាពអាចផ្ទុកទំនិញបានច្រើនគីឡូ និងមានមុខងារអាចរក្សាកម្ពស់នៃការហោះហើរបានដោយខ្លួនឯងផងដែរ។ ចំណុចពិសេសរបស់ Drone ប្រភេទនេះគឺវាអាចផ្តល់ភាពងាយស្រួលដល់អ្នកប្រើប្រាស់ក្នុងពេលដើរទិញីអីវ៉ាន់តាមផ្សារទំនើបដោយមិនចាំបាច់ពិបាកប្រើកម្លាំងរុញ ឬត្រូវប្រើកម្លាំងខ្លាំងពេលលើកអីវ៉ាន់ដើរឡើងជណ្តើរជាដើម៕ អត្ថបទ៖

អូស្រ្តាលី៖ ប្រទេសអូស្រ្តាលីនៅក្នុងថ្ងៃអង្គារ ទី២២ ខែតុលានេះ បានប្រកាសអំពីកិច្ចព្រមព្រៀងទិញគ្រឿងសព្វា​វុធពីអាមេរិកក្នុងទំហំទឹកប្រាក់រហូតដល់ ៧ពាន់លានដុល្លារអូស្រ្តាលី (៤,៧ពាន់លានដុល្លារអាមេរិក)។ យោងតាមការចុះផ្សាយរបស់បណ្តាញសារព័ត៌មាន Channel News Asia បានបញ្ជាក់ថា​ កិច្ចព្រមព្រៀងទិញគ្រឿងសព្វាវុធក្នុងទំហំទឹកប្រាក់ដ៏ច្រើននេះត្រូវបានធ្វើឡើងដោយផ្អែកតាមគោលនយោបាយពង្រឹងវិស័យយោធាដើម្បីទប់ទល់ឥទ្ធិពលរបស់ចិន ដែលរដ្ឋាភិបាលអូស្រ្តាលីបានដាក់ចេញកាលពីដើមឆ្នាំនេះ។ ប្រភពខាងលើបានបន្តថា គ្រឿងសព្វាវុធដែលបានអូស្រ្តាលីបានទិញពីសហរដ្ឋអាមេរិកនោះរួមមាន អាវុធខ្នាតតូចនិងធំជាច្រើនប្រភេទសម្រាប់ប្រើប្រាស់នៅក្នុងវិស័យកងទ័ពជើងទឹក មីស៊ីលសម្រាប់បាញ់ក្នុងរយៈចម្ងាយឆ្ងាយនិងរយៈចម្ងាយខ្លី មីស៊ីលប្រភេទ SM-6 សម្រាប់បាញ់កម្ទេចយន្តហោះចម្បាំង និងមីស៊ីលប្រភេទ SM-2 Block III C សម្រាប់បាញ់កម្ទេចនាវាចម្បាំងផងដែរ។ បើតាមលោក Richard Marles រដ្ឋមន្ត្រីក្រសួងការពារជាតិអូស្រ្តាលីបានបញ្ជាក់ថា តាមរយៈគ្រឿងសព្វាវុធទំនើបៗខាងលើនេះគឺវានឹងជួយលើកកម្ពស់វិស័យយោធាអូស្រ្តាលីឱ្យកាន់តែមានរឹងមាំថែមួយកម្រិតទៀតផងដែរ៕  អត្ថបទ៖ ភក្តី ប្រភព៖ Channel News

អង់គ្លេស៖ ក្រុមហ៊ុនរុករករ៉ែដ៏ធំមួយនៅលើពិភពលោកគឺក្រុមហ៊ុន BHP ត្រូវប្រឈមនឹងពាក្យបណ្តឹងទាមទារសំណងក្នុងទំហំទឹកប្រាក់រហូតដល់ ៤៧ពាន់លានដុល្លារ ក្រោយក្រុមហ៊ុនមួយនេះបានធ្វើឱ្យបាក់ទំនប់ទឹកដ៏ធំមួយឈ្មោះ Mariana ក្នុងប្រទេសប្រេស៊ីល នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃចន្ទ ទី២១ ខែតុលា។ សំណុំរឿងចម្រូងចម្រាសដ៏ធំនេះកំពុងត្រូវបានជំនុំជម្រេះដោយតុលាការកំពូលនៅក្នុងទីក្រុងឡុងដ៏ ប្រទេសអង់គ្លេស។ ប្រភពខាងលើបានបន្តថា ភាគជាដើមបណ្តឹងមានជាច្រើននាក់ដូចជា ពលរដ្ឋប្រេស៊ីលប្រមាណជា ៦០០,០០០នាក់ អាជ្ញាធរប្រេស៊ីលប្រចាំតំបន់ចំនួន ៤៦កន្លែង និងក្រុមហ៊ុនជាង ២,០០០ក្រុមហ៊ុន ដែលសុទ្ធតែជាភាគីបានរងផលប៉ះពាល់ពីការបាក់ទំនប់ទឹកខាងលើនេះ ខណៈផលប៉ះពាល់ទាំងនោះគឺរាប់បញ្ចូលទាំងការប៉ះពាល់ដល់បរិស្ថាន សុខភាពប្រជាពលរដ្ឋ ការប៉ះពាល់ដល់ការរស់នៅឬធ្វើអាជីវកម្ម ការបំផ្លាញនូវទ្រព្យសម្បត្តិសាធារណៈនិងឯកជន និងការខាតបង់ប្រាក់ដោយផ្ទាល់ផងដែរ។ គួររម្លឹកជូនថា រឿងរ៉ាវចម្រូងចម្រាសនេះបានកើតឡើងតាំងតែពីឆ្នាំ ២០១៥មកម្លេះ ហើយនាពេលកន្លងមក ការប្តឹងផ្តល់តវ៉ាគ្នាក៏បានបន្តកើតមានជាហូរហែដែរ តែភាគីរងគ្រោះនិងភាគីបង្កហេតុហាក់នៅមិនទាន់អាចទទួលយកការសម្របសម្រួលណាមួយបាននៅឡើយទេ

អាមេរិក៖ លោកមហាសេដ្ឋី Elon Musk បានបង្កើតកម្មវិធីផ្តល់ប្រាក់រង្វាន់រហូតដល់ ១លានដុល្លារក្នុងថ្ងៃចំពោះក្រុមពលរដ្ឋអាមេរិកនៅក្នុងរដ្ឋ Pennsylvania ដែលជារដ្ឋដ៏សំខាន់សម្រាប់ការបោះឆ្នោតថ្នាក់ជាតិនៅអាមេរិក នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃចន្ទ ទី២១ ខែតុលានេះ។ កម្មវិធីផ្តល់ប្រាក់រង្វាន់ដ៏ច្រើននេះត្រូវបានប្រកាសដោយផ្ទាល់ពីសំណាក់លោក Elon Musk កាលពីចុងសប្តាហ៍មុន និងត្រូវផ្តើមអនុវត្តចាប់ពីពេលនេះរហូតដល់ថ្ងៃទី៥ ខែវិច្ឆិកា ដែលជាថ្ងៃបោះឆ្នោតជ្រើសរើសប្រធានាធិបតីអាមេរិក។ ប្រភពខាងលើនេះបានបន្តថា កម្មវិធីផ្តល់ប្រាក់រង្វាន់នេះត្រូវបានអនុវត្តដោយភ្ជាប់ជាមួយលក្ខខណ្ឌមួយចំនួនដូចជា៖ -អនុវត្តចំពោះតែពលរដ្ឋដែលបានចុះឈ្មោះបោះឆ្នោតនៅក្នុងរដ្ឋ Pennsylvania -ពលរដ្ឋដែលចុះឈ្មោះបោះឆ្នោតក្នុងរដ្ឋខាងលើត្រូវទៅចុះហត្ថលេខាគាំទ្រញត្តិមួយដែលបានរៀបចំឡើងដោយក្រុមការងារ AmericaPAC របស់លោក Elon Musk ហើយញត្តិនេះមានខ្លឹមសារគាំទ្រឱ្យលោក Donald Trump ត្រលប់ទៅកាន់សេតវិមានវិញ -អ្នកឈ្នះរង្វាន់ជាប្រាក់ចំនួន ១លានដុល្លារនឹងត្រូវជ្រើសរើសតាមរយៈការចាប់យកឈ្មោះដោយចៃដន្យ ចេញពីបញ្ជីឈ្មោះពលរដ្ឋដែលបានទៅចុះហត្ថលេខាគាំទ្រញាតិខាងលើ -ក្នុងមួយថ្ងៃគឺមានអ្នកឈ្នះតែម្នាក់ប៉ុណ្ណោះ ហើយកម្មវិធីនឹងបន្តអនុវត្តតាមលក្ខខណ្ឌខាងលើរហូតដល់ថ្ងៃទី៥ ខែវិច្ឆិកា សូមបញ្ជាក់ជូនថា លោកមហាសេដ្ឋី Elon

អេហ្ស៊ីប៖ អេហ្ស៊ីបបានក្លាយជាប្រទេសដែលគ្មានករណីអ្នកកើតជំងឺគ្រុនចាញ់ទាល់តែសោះ នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃចន្ទ ទី២១ ខែតុលា។ ការទទួលបាននាមជាប្រទេសដែលគ្មានជំងឺគ្រុនចាញ់នេះ គឺត្រូវបានទទួលស្គាល់ជាផ្លូវការដោយអង្គការសុខភាពពិភពលោកផងដែរ។ ប្រភពខាងលើបានបន្តថា ដើម្បីទទួលបាននាមជាប្រទេសដែលគ្មានជំងឺគ្រុនចាញ់នេះប្រទេសអេហ្ស៊ីបបានដាក់ចេញផែនការប្រយុទ្ធប្រឆាំងនិងទប់ស្កាត់ការឆ្លងទ្រង់ទ្រាយធំតាំងពី ១០០ឆ្នាំមុនម្លេះ ពោលគឺសមិទ្ធផលនៅពេលនេះជាការខិតខំប្រឹងប្រែងរបស់អេហ្ស៊ីបក្នុងរយៈពេល ១០០ឆ្នាំចុងក្រោយនេះ។ សូមបញ្ជាក់ជូនថា គ្រុនចាញ់ គឺជាជំងឺដ៏គ្រោះថ្នាក់មួយ ហើយជាមធ្យមជំងឺដែលចម្លងតាមរយៈសត្វមូសដែកគោលខាំមួយនេះ បានសម្លាប់មនុស្សប្រមាណជា ៦០០,០០០នាក់នៅក្នុងតំបន់អាហ្វ្រិកជារៀងរាល់ឆ្នាំ៕ អត្ថបទ៖ ភក្តី ប្រភព៖ BBC

កូរ៉េខាងត្បូង៖ កូរ៉េខាងជើងបានបញ្ជូនទៅកងទ័ពដែលជាកងកម្លាំងពិសេសចំនួន ១,៥០០នាក់ទៅដល់តំបន់ចុងបូព៌ារបស់រុស្ស៊ីហើយ នេះបើយោងតាមរបាយការណ៍របស់ទីភ្នាក់ងារចារកម្មកូរ៉េខាងត្បូង ដែលត្រូវបានចុះផ្សាយបន្តដោយបណ្តាញសារព័ត៌មាន Channel News Asia នៅក្នុងថ្ងៃសៅរ៍ ទី១៩ ខែតុលា។ តាមគម្រោងគឺកងកម្លាំងពិសេសកូរ៉េខាងជើងចំនួន ១,៥០០នាក់នេះនឹងត្រូវយកទៅប្រើប្រាស់សម្រាប់ការហ្វឹកហ្វឺន សម្របសម្រួលនៅមូលដ្ឋានយោធារុស្ស៊ី និងថែមទាំងអាចយកទៅដាក់ពង្រាយសម្រាប់ការប្រយុទ្ធជាមួយនិងប្រទេសអ៊ុយក្រែនផងដែរ។ ក្រៅតែពីបានបញ្ជូនកងកម្លាំងពិសេសទៅជួយគាំទ្ររុស្ស៊ីហើយ ទីភ្នាក់ងារចារកម្មជាតិរបស់កូរ៉េខាងត្បូងក៏បានឱ្យដឹងដែរថា គិតចាប់តាំងពីអំឡុងខែសីហាឆ្នាំមុនរហូតមកទល់នឹងពេលនេះ កូរ៉េខាងជើងបានបញ្ជូនកាំភ្លើងធំ មីស៊ីលផ្លោង និងគ្រាប់រ៉ុក្កែតជាបន្តបន្ទាប់យ៉ាងច្រើនទៅកាន់រុស្ស៊ីក្នុងចំ​នួនប្រមាណជា ១៣,០០០កុងតឺណឺទៅកាន់រុស្ស៊ីផងដែរ។ ប្រភពខាងបានបន្តទៀតថា បើគិតចាប់តាំងពីពេលដែលសង្គ្រាមរវាងរុស្ស៊ីនិងអ៊ុយក្រែនបានកើតឡើងមក ប្រទេសកូរ៉េខាងជើងក្រោមការដឹកនាំរបស់លោក គីម ជុងអ៊ុន បានបញ្ជូនកាំភ្លើងធំ និងគ្រាប់រ៉ុក្កែតជាងប្រាំបីលានគ្រាប់ហើយទៅឱ្យរស្ស៊ី ខណៈគ្រឿងសព្វាវុធទាំងនោះត្រូវបានបញ្ជូនទៅតាមនាវាក្នុងទម្រង់មិនបើកចំហរជាសាធារណៈនោះទេ៕ អត្ថបទ៖ ភក្តី ប្រភព៖ Channel News Asia

ចិន៖ ក្រុមហ៊ុនផលិតរថយន្តដ៏ល្បីនៅលើពិភពលោក BMW បានប្រកាសប្រមូលយករថយន្តជិត​ ៧០០,០០០គ្រឿងចូលក្នុងក្រុមហ៊ុនវិញដោយសារទើបរកឃើញថា​ រថយន្តទាំងនោះមានហានិភ័យសុវត្ថិភាពផ្នែកអគ្គីភ័យ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time កាលពីយប់ថ្ងៃសុក្រ ទី១៩ ខែតុលា។ វិធានការនេះត្រូវបានអនុវត្តសម្រាប់តែរថយន្តម៉ាក BMW ស៊េរីថ្មី ដែលកំពុងប្រើប្រាស់នៅក្នុងប្រទេសចិនប៉ុណ្ណោះ។ ប្រភពខាងលើបានបន្តថា ហេតុផលនៅក្រោយការប្រមូលយករថយន្តចូលក្នុងក្រុមហ៊ុនដើម្បីត្រួតពិនិត្យឡើងវិញនេះគឺត្រូវបានធ្វើឡើងក្រោយក្រុមអ្នកបច្ចេកទេសទើបរកឃើញថា ដុំទឹកដែលបានបំពាក់នៅក្នុងម៉ាស៊ីនរថយន្តទាំងនោះមានបញ្ហា ដែលនាំឱ្យមានភាពច្រេះដល់គ្រឿងដែកមួយចំនួន ហើយក្នុងរយៈពេលយូរភាពច្រេះនោះក៏អាចនាំឱ្យមានភ្លើងឆេះក្នុងរថយ​ន្តផងដែរ។ បើតាមនិយ័តករទីផ្សាររថយន្តចិនបានបញ្ជាក់ថា នៅក្នុងចំណោមរថយន្ត BMW ដែលត្រូវប្រមូលឱ្យក្រុមហ៊ុនត្រួតពិនិត្យឡើងវិញទាំងអស់នោះគឺរួមមានរថយន្តចំនួន ៤៩៩,៥៣៩គ្រឿងជារថយន្តដំឡើងនៅក្នុងប្រទេសចិនផ្ទាល់តែម្តង និងរថយន្តចំនួន ១៨៨,៣៧១គ្រឿងផ្សេងទៀតគឺជារថយន្តនាំចូលពីក្រៅប្រទេស៕ អត្ថបទ៖ ភក្តី ប្រភព៖ The Strait Time

អ៊ុយក្រែន៖ លោកប្រធានាធិបតីអ៊ុយក្រែន Volodymyr Zelenskyy បាននិយាយថា កូរ៉េខាងជើងកំពុងហ្វឹកហាត់ទាហានចំនួន ១០,០០០នាក់ ដើម្បីជួយប្រទេសរុស្ស៊ីក្នុងការប្រយុទ្ធជាមួយអ៊ុយក្រែន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃសុក្រ ទី១៨ ខែតុលា។ ការថ្លែងខាងលើនេះត្រូវបានធ្វើឡើងនៅក្នុងកិច្ចប្រជុំពិសេសមួយរវាងលោក Volodymyr Zelenskyy ជាមួយនឹងរដ្ឋមន្ត្រីការពារជាតិរបស់អង្គការណាតូ (NATO) កាលពីពេលថ្មីៗនេះ។ បើតាមលោកប្រធានាធិបតីអ៊ុយក្រែន Volodymyr Zelenskyy បានអះអាងថា ទាហានទាំង ១០,០០០នាក់នោះគឺបានទទួលការហ្វឹកហាត់នៅក្នុងប្រទេសកូរ៉េខាងជើង ប៉ុន្តែគិតត្រឹមពេលនេះក្រុមទាហានទាំងនោះនៅមិនទាន់បានធ្វើដំណើរទៅដល់ប្រទេសរុស្ស៊ី ឬទឹកដីអ៊ុយក្រែននៅឡើយទេ។ គួររម្លឹកជូនថា កូរ៉េខាងជើងនិងរស្ស៊ីគឺជាសម្ព័ន្ធមិត្តចាក់ទឹកមិនលិចជាមួយគ្នាអស់រយៈពេលជាយូរឆ្នាំមកហើយ ខណៈប្រទេសកុម្មុយនីស្តទាំង ២នេះតែងជួយគ្នាទៅវិញទៅមកទាំងក្នុងរូបភាពបើកចំហរនិងលាក់ការសម្ងាត់ផងដែរ។ តួយ៉ាងនាពេលកន្លងមក មានសារព័ត៌មានជាច្រើនបានរាយការណ៍ថា កូរ៉េខាងជើងបានលួចផ្តល់អាវុធយ៉ាងច្រើនជាសម្ងាត់ទៅកាន់រុស្ស៊ីសម្រាប់យកទៅប្រើប្រាស់នៅក្នុងសមរភូមិប្រយុទ្ធជាមួយអ៊ុយក្រែន៕ អត្ថបទ៖

ថៃ៖ អាជ្ញាធរថៃកំពុងបើកការពិភាក្សាជាមួយសមភាគីឡាវអំពីគម្រោងលើកលែងការបង់ថ្លៃទិដ្ឋការពេលមកដល់រវាងពលរដ្ឋនៃប្រទេសទាំង២ នេះបើយោងតាមការចុះផ្សាយរបស់បណ្តាញសារព័ត៌មាន Nation Thailand នៅក្នុងថ្ងៃសុក្រ ទី១៨ ខែតុលា។ គួរកត់សម្គាល់ថា នាពេលបច្ចុប្បន្ននេះតម្លៃទិដ្ឋការពេលមកដល់គឺមានតម្លៃ ១,០០០បាត (៣០ ដុ​ល្លារ) ដែលដំណើរត្រូវឆ្លងកាត់ព្រំដែនឡាវ-ថៃទាំងអស់ត្រូវបង់ប្រាក់នេះនៅការិយាល័យត្រួតពិនិត្យតាមចក្រព្រំដែន។ បើតាមលោក Sorawong Thienthong រដ្ឋមន្ត្រីក្រសួងទេសចរណ៍និងកីឡាថៃបានបញ្ជាក់ថា គោលបំណងនៃការលើកលែងតម្លៃទិដ្ឋាការខាងលើនេះ គឺដើម្បីលើកជំរុញនិងលើកកម្ពស់ការធ្វើដំណើរឆ្លងកាត់ប្រទេសទាំង២ ក៏ដូចជាទាក់ទាញភ្ញៀវទេសចរណ៍អន្តរជាតិឱ្យចូលមកកម្សាន្តនៅក្នុងប្រទេសថៃឱ្យបានកាន់តែច្រើនផងដែរ។ រដ្ឋមន្ត្រីរូបនេះបានបន្តថា ប្រសិនបើគម្រោងលើកលែងតម្លៃទិដ្ឋការទាំងស្រុងមិនអាចធ្វើឡើងបាននោះទេ លោកនឹងមានជម្រើសទី២ សម្រាប់ដាក់ជូនភាគីឡាវបន្ថែមទៀត គឺភាគថៃនឹងប្តូរពីការមិនយកថ្លៃទិដ្ឋាការទៅជាការផ្តល់ជូនប័ណ្ណសម្រាប់ចាយវិញ ពោលគឺអ្នកដំណើរមកពីប្រទេសឡាវទាំងអស់ត្រូវបន្តបង់ថ្លៃទិដ្ឋាការតម្លៃ ១,០០០បាតជាធម្មតា តែក្រោយបង់ប្រាក់នេះរួច ពួកគេនឹងទទួលបានប័ណ្ណដែលមានតម្លៃជាប្រាក់ ១,០០០បាត សម្រាប់យកទៅចាយនៅតាមភោជនីយដ្ឋាន សណ្ឋាគារ និងកន្លែងផ្តល់សេវាកម្សាន្តផ្សេងៗនៅក្នុងប្រទេសថៃបាន៕ អត្ថបទ៖