អាមេរិក៖ យ៉ាងហោចណាស់មានពលរដ្ឋអាមេរិកចំនួន ១០នាក់បានស្លាប់បាត់បង់ជីវិតដោយសារតែឥទ្ធិពលរបស់ព្យុះ Milton នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសុក្រ ទី១១ ខែតុលា។ ក្រៅតែពីបានបណ្តាលឱ្យមានអ្នកស្លាប់បាត់បង់ជីវិតហើយ ឥទ្ធិពលរបស់ព្យុះក៏បានបណ្តាលឱ្យមានពលរដ្ឋអាមេរិកជាច្រើនលាននាក់ផ្សេងទៀតកំពុងរស់នៅដោយគ្មានភ្លើងអគ្គិសនីប្រើប្រាស់ផងដែរ។ យ៉ាងណាក្តីអាជ្ញាធរអាមេរិកបានបញ្ជាក់ថា ព្យុះ Milton មិនបានធ្វើឱ្យសម្ពាធទឹកសមុទ្រឡើងខ្ពស់នោះទេ ដូននេះគឺវាមិនបានបង្កឱ្យមានមានរលកយក្សឬគ្រោះថ្នាក់ផ្សេងៗនៅចេញពីសមុទ្រនោះទេ។ ប្រភពខាងលើបានបន្តថា គិតត្រឹមពេលនេះឥទ្ធិពលរបស់ព្យុះបានថយចុះបន្តិចហើយ តែអាជ្ញាធរអាចនឹងត្រូវការពេលវេលាយូរទើបអាចដោះបញ្ហាផ្សេងៗដែលបានបង្កឡើងដោយព្យុះមួយនេះបាន ដូចជាការតបណ្តាញភ្លើងអគ្គិសនីឡើងវិញ ជួលជុលផ្លូវ ជួសជុលផ្ទះឬអគារ ដែលបានរងនូវការខូចខាតជាដើម៕ អត្ថបទ៖ ភក្តី ប្រភព៖ The Strait Time

អាមេរិក៖ ព្យុះ Milton កំពុងបង្កការគំរាមគំហែងយ៉ាងខ្លាំងនៅក្នុងតំបន់សំខាន់ៗជាច្រើនក្នុងរដ្ឋផ្លរីដា សហរដ្ឋអាមេរិក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅរសៀលថ្ងៃព្រហស្បតិ៍ ទី១០ ខែតុលា។ ព្យុះ Milton ​បានធ្វើដំណើរទៅដល់រដ្ឋផ្លរីដា កាលពីម៉ោង ៨ និង ៣០នាទីយប់មិញនេះ ដោយព្យុះមួយនេះបានបក់បោកក្នុងល្បឿនប្រមាណជា ១២០គីឡូម៉ែត្រនៅក្នុងមួយម៉ោង។ គិតត្រឹមពេលនេះ ឥទ្ធិពលរបស់ព្យុះបានបណ្តាលឱ្យមានភ្លៀងឆ្លាក់យ៉ាងខ្លាំង ហើយតំបន់មួយចំនួនបានទទួលរងសម្ពាធទឹកភ្លៀងយ៉ាងច្រើននោះ ក៏ត្រូវប្រឈមនឹងបញ្ហាបាក់ដីយ៉ាងឆាប់រហ័សបន្ថែមទៀតផងដែរ។ បើតាមអាជ្ញាធរអាមេរិកបានបញ្ជាក់ថា ឥទ្ធិពលរបស់ព្យុះបានបំផ្លាញផ្ទះអស់ជាង ១០០ខ្នង ហើយបានបង្ខំឱ្យអាជីវកម្មជាច្រើនត្រូវផ្អាកដំណើរការជាបណ្តោះអាសន្ន​ ខណៈពលរដ្ឋជាង ១,៨លាននាក់កំពុងរស់នៅដោយគ្មានភ្លើងអគ្គីសនីប្រើប្រាស់។ យ៉ាងណាក្តី ឥទ្ធិពលរបស់ព្យុះ Milton នៅមិនទាន់បង្កឱ្យពលរដ្ឋអាមេរិកណាម្នាក់បានស្លាប់បាត់បង់ជីវិត ឬរងគ្រោះថ្នាក់ធ្ងន់ធ្ងរនៅឡើយទេ៕  

ថៃ៖ រថភ្លើងអគ្គិសនីខ្នាតតូចដែលកំពុងដាក់បញ្ចូលភ្លើងមួយគ្រឿងបានឆេះ និងបង្កឱ្យមានអគ្គីភ័យឆាបឆេះយ៉ាងសន្ធោសន្ធៅនៅក្នុងប្រទេសថៃ នេះបើយោងតាមការចុះផ្សាយរបស់បណ្តាញសារព័ត៌មាន Thai Press នៅក្នុងថ្ងៃព្រហស្បតិ៍ ទី១០ ខែតុលា។ រថភ្លើងអគ្គិសនីខ្នាតតូចមួយគ្រឿងគឺជាកម្មសិទ្ធរបស់សាកលវិទ្យាល័យ Rangsit ដែលមានទីតាំងស្ថិតនៅក្នុងខេត្ត Pathum Thani ភាគកណ្តាលនៃប្រទេសថៃ។ ប្រភពខាងលើបានបន្តថា ក្រោយរថភ្លើងអគ្គិសនីបានឆេះហើយ វាក៏បានបណ្តាលឱ្យមានភ្លើងឆេះរាលដាលដល់រថយន្តដឹកអ្នកដំណើរខ្នាតតូចចំនួនមួយគ្រឿង និងរថយន្តក្រុងចំនួន ២គ្រឿង ដែលចតនៅក្បែរនោះផងដែរ ខណៈរថយន្តដឹកអ្នកដំណើរខ្នាតតូចបានផ្ទុះយ៉ាងខ្លាំងផងដែរ។ យ៉ាងណាក្តី ហេតុការណ៍នេះមិនបានបណ្តាលឱ្យមានអ្នកណាម្នាក់បានរងគ្រោះថ្នាក់នោះទេ ខណៈក្រុមអ្នកពន្លត់អគ្គីភ័យចំនួន ៣នាក់បានប្រើប្រាស់ពេលអស់ ៤០នាទី ទើបអាចពន្លត់ភ្លើងបានទាំងស្រុង៕    អត្ថបទ៖ ភក្តី ប្រភព៖ Thai Press

អាមេរិក៖ អាជ្ញាធរនៃរដ្ឋចំនួន ១៤នៅក្នុងសហរដ្ឋអាមេរិកបានដាក់ពាក្យប្តឹងក្រុមហ៊ុន TikTok ទៅកាន់តុលាការដោយបានចោទប្រកាន់ថា បណ្តាញសង្គម TikTok បានជំរុញឱ្យមានវិបត្តិសុខភាពផ្លូវចិត្តក្នុងចំណោមក្មេងជំទង់ នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃពុធ ទី៩ ខែតុលា។ នៅក្នុងពាក្យបណ្តឹងបានអះអាងថា TikTok មានមុខងារធ្វើឱ្យកុមារញៀនទៅនឹងកម្មវិធី ហើយបណ្តាញសង្គមរបស់ចិនមួយនេះក៏មានចេតនាបំភាន់សាធារណជនអំពីផលប៉ះពាល់នៃការប្រើប្រាស់ក្នុងរយៈពេលវែងផងដែរ។ ឆ្លើយតបទៅនឹងពាក្យបណ្តឹងខាងលើនេះ ក្រុមហ៊ុន TikTok បានលើកឡើងថា​ ការចោទប្រកាន់របស់អាជ្ញាធរអាមេរិកពុំមានភាពត្រឹមត្រូវនិងមានភស្តុតាងច្បាស់លាស់ឡើង ហើយការចោទប្រកាន់នេះគ្រាន់តែជាផ្នែកមួយជួយគាំទ្រទៅនឹងគម្រោងហាមឃាត់កម្មវិធី TikTok ពីសំណាក់រដ្ឋាភិបាលអាមេរិកតែប៉ុណ្ណោះ។ គួររម្លឹកជូនថា រឿងរ៉ាវចម្រូងចម្រាសរវាងអាមេរិកជាមួយនិងក្រុមហ៊ុន TikTok បានកើតឡើងអស់រយៈជាយូរមកហើយ ដោយអាមេរិកតែងចោទប្រកាន់ថា TikTok ជាចារកម្មរបស់រដ្ឋាភិបាលចិន ដែលតែងតែលួចប្រមូលយកទិន្នន័យរបស់ពលរដ្ឋអាមេរិកឱ្យរដ្ឋាភិបាលចិន ខណៈអាមេរិកក៏គ្រោងនឹងអនុវត្តច្បាប់ហាមឃាត់បណ្តាញសង្គមមួយនេះមិនឱ្យដំណើរការនៅលើទឹកដីអាមេរិកនៅដើមឆ្នាំក្រោយនេះផងដែរ ប្រសិនបើក្រុមហ៊ុន TikTok មិនព្រមលក់ភាគហ៊ុនខ្លះឱ្យអាមេរិកគ្រប់គ្រងនោះទេ៕ អត្ថបទ៖ ភក្តី ប្រភព៖ 

អាមេរិក៖ ពលរដ្ឋអាមេរិកដែលកំពុងរស់នៅក្នុងរដ្ឋ Florida រាប់លាននាក់កំពុងប្រញាប់ប្រញាល់ធ្វើការជម្លៀសខ្លួនចេញពីផ្ទះសម្បែង ដើម្បីរក្សាសុវ​ត្ថិភាពពីព្យុះដ៏កំណាចមួយ ដែលមានឈ្មោះថា Milton នេះបើយោងតាមការចុះផ្សាយរបស់បណ្តាញសារព័ត៌មាន BBC នៅរសៀលថ្ងៃពុធ ទី៩​​ ខែតុលា។ តាមការព្យាករណ៍របស់អាជ្ញាធរឧតុនិយមអាមេរិកបានបញ្ជាក់ថា ព្យុះនឹងធ្វើដំណើរមកដល់ទីក្រុង Tampa ក្នុងរដ្ឋ Florida នៅយប់នេះក្នុងលឿន ២៧០គីឡូម៉ែត្រក្នុងមួយម៉ោង។ បើតាមអាជ្ញាធរអាមេរិកក៏បានព្រមានផងដែរថា ព្យុះ Milton នឹងក្លាយជាព្យុះមានឥទ្ធិដ៏អាក្រក់បំផុតមួយបើគិតក្នុងរយៈពេលជាច្រើនឆ្នាំចុងក្រោយនេះ ដែលអាចបង្កឱ្យមានគ្រោះថ្នាក់ដល់អាយុជីវិតមនុស្សផងដែរ។ គួរកត់សម្គាល់ថា វត្តមានរបស់ព្យុះ Milton បានមកដល់ទឹកដីសហរដ្ឋអាមេរិកក្នុងរយៈពេល ២សប្តាហ៍ប៉ុណ្ណោះ បន្ទាប់ពីតំបន់ភាគជើងអាមេរិកបានទទួលរងនូវការវាយប្រហារដោយផ្ទុះ Helene ដែលបានបណ្តាលឱ្យមានពលរដ្ឋស្លាប់បាត់បង់ជីវិតអស់ចំនួន ២២៥នាក់ និងបានបំផ្លាញប្រព័ន្ធហេដ្ឋារចនាសម្ព័ន្ធនៅក្នុងទីក្រុងសំខាន់មួយចំនួនអស់ជាច្រើនកន្លែងផងដែរ៕ អត្ថបទ៖ ភក្តី ប្រភព៖ BBC

ឥណ្ឌូនេស៊ី៖ ប្រទេសឥណ្ឌូនេស៊ីនឹងបើកដំណើរការផ្ទះបាយផ្តល់អាហារមិនគិតថ្លៃរាប់ពាន់កន្លែងនៅឆ្នាំ២០២៥ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃអង្គារ ទី៨​ ខែតុលា។ កម្មវិធីផ្តល់អាហារដោយមិនគិតថ្លៃនេះគឺជាគោលនយោបាយរបស់លោកប្រធានាធិបតីទើបជាប់ឆ្នោត Prabowo Subianto ដែលតាមគម្រោងគឺលោកនឹងត្រូវចូលកាន់តំណែងជាប្រធានាធិបតីនៃប្រទេសឥណ្ឌូនេស៊ីជាផ្លូវការនៅក្នុងថ្ងៃទី២០​ ខែតុលាខាងមុខនេះ។តាមផែនការគឺកម្មវិធីផ្តល់អាហារមិនគិតថ្លៃនេះនឹងត្រូវអនុវត្តជាច្រើនដំណាក់កាល ដោយនៅដើមឆ្នាំ២០២៥ ផ្ទះបាយផ្តល់អាហារមិនគិតថ្លៃនឹងត្រូវបើកដំណើរចំនួន ៥,០០០កន្លែង និងបន្តបង្កើនឡើងដល់ ៣០,០០០កន្លែងនៅក្នុងឆ្នាំ២០២៧។ ប្រភពខាងលើបានបន្តថា កម្មវិធីពិសេសនេះនឹងរួមចំណែកផ្តល់អាហារដោយមិនគិតថ្លៃដល់ពលរដ្ឋគោលដៅប្រមាណជា ៨៣លាននាក់ក្នុងមួយឆ្នាំ ដោយនៅក្នុងនោះមានទាំងស្រ្តីមានផ្ទៃពោះនិងកូនសិស្សសាលាផងដែរ ខណៈគម្រោងនេះនឹងត្រូវចំណាយប្រាក់អស់ចំនួន ២៨ពាន់លានដុល្លារនៅក្នុងមួយឆ្នាំ៕  អត្ថបទ៖ ភក្តី ប្រភព៖ The Strait Time

ឥណ្ឌូនេស៊ី៖ អាជ្ញាធរឥណ្ឌូនេស៊ីបានសម្រេចបិទគេហទំព័រលក់ទំនិញ Temu ដែលជាទីផ្សារលក់ទំនិញ Online ខ្នាតយក្សនិងកំពុងមានប្រជាប្រិយភាពខ្លាំងបំផុតមួយរបស់ចិន ដើម្បីការពារអាជីវកម្មខ្នាតតូចនិងខ្នាតមធ្យមនៅក្នុងស្រុក នេះបើយោងតាមការចុះផ្សាយរបស់បណ្តាញសារព័ត៌មាន South China Morning Post នៅក្នុងថ្ងៃអង្គារ ទី៨ ខែតុលា។ គួរកត់សម្គាល់ថា Temu គឺជាផ្សារ Online ដែលស្ថិតនៅក្រោមការគ្រប់គ្រងរបស់ក្រុមហ៊ុន PDD Holdings ហើយផ្សារ Online មួយនេះគឺជាដៃគូអាជីវកម្មជាមួយរោងចក្រជាច្រើននៅក្នុងប្រទេសចិនដោយផ្ទាល់តែម្តង។ ដោយសារតែ Temu គឺជាផ្សារលក់ទំនិញចេញពីរោងចក្រក្នុងប្រទេសចិនដោយផ្ទាល់នោះ គេបានកត់សម្គាល់ឃើញថា ទំនិញគ្រប់មុខនៅក្នុងទីផ្សារមួយនេះមានតម្លៃទាបបំផុត​ បើធៀបទៅនឹងតម្លៃទំនិញនៅតាមបណ្តាប្រទេសជាច្រើន ហើយព្រោះតែកត្តាតម្លៃដ៏ថោកនេះវាបានជម្រុញឱ្យពលរដ្ឋនៅតាមបណ្តាប្រទេសមួយចំនួនឈប់ទិញទំនិញផលិតនៅក្នុងស្រុករបស់ខ្លួន និងនាំគ្នាទិញទំនិញពី Temu យ៉ាងគំហុក។ បើតាមអាជ្ញាធរឥណ្ឌូនេស៊ីបានបង្ហាញនូវការព្រួយបារម្ភថា ទំនោរនៃការសម្រុកទិញទំនិញពី Temu ពីសំណាក់ប្រជាពលរដ្ឋរបស់ខ្លួននឹងបំផ្លាញសហគ្រាសខ្នាតតូច និងមធ្យមក្នុងស្រុកបន្តិចម្តងៗនិងអាចឈានទៅដល់ការបំផ្លាញទ្រង់ទ្រាយធំផងដែរនៅក្នុងរយៈពេលវែង។ សូមបញ្ជាក់ជូនថា

អូស្រ្តាលី៖ ក្រុមហ៊ុនអាកាសចរណ៍ Qantas បានចេញមកធ្វើការសុំទោសជាធារណៈចំពោះបញ្ហាបច្ចេកទេស ដែលនាំឱ្យមានការចាក់ផ្សាយនូវភាពយន្តបែបស៊ិចស៊ីនិងអាសអាភាសជូនអ្នកដំណើរទស្សនាពេញមួយយន្តហោះ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃអង្គារ ទី៨ ខែតុលា។ រឿងរ៉ាវចម្រូងចម្រាសនេះបានកើតឡើងតាំងតែពីសប្តាហ៍មុនម្ល៉េះ និងបានកើតឡើងចំពោះជើងហោះហើរ ដែលមានទិញដៅហោះហើរចេញពីទីក្រុងស៊ីដនី ប្រទេសអូស្រ្តាលី ឆ្ពោះទៅកាន់​ទីក្រុងតូក្យូ ប្រទេសជប៉ុន។ បើតាមអ្នកនាំពាក្យឱ្យក្រុមហ៊ុនអាកាសចរណ៍ Qantas បានប្រាប់ឱ្យដឹងថា នៅក្នុងអំឡុងពេលនៃការហោះហើរខាងលើនេះ នៅក្នុងយន្តហោះស្រាប់តែមានបញ្ហាបច្ចេកទេស ដែលធ្វើឱ្យអ្នកដំណើរទាំងអស់មិនអាចជ្រើសរើសខ្សែភាពយន្តឬវីដេអូណាមួយសម្រាប់ទស្សនាបានដោយខ្លួនឯងនោះទេ។ នៅចំពោះមុខបញ្ហានេះ ក្រុមអ្នកបម្រើការងារនៅលើយន្តហោះក៏បានសម្រេចជ្រើសរើសខ្សែភាពយន្តមួយដែលមានចំណងជើងថា “Daddio” ដែលមានការចូលរួមសម្តែងពីតារាស្រីដ៏ល្បីឈ្មោះ Dakota Johnson និងតារាសម្តែងប្រុសឈ្មោះ Sean Penn ឱ្យអ្នកដំណើរទាំងអស់បានទស្សនាដូចៗគ្នា។ យ៉ាង​ណាក្តី នៅក្នុងខែ្សភាពយន្តនេះមានលាយនូវឈុតឆាកនិងប្រើប្រាស់ពាក្យសំដីមួយចំនួនបែបអាសអាភាស ដែលវាគឺរឿងមិនសមរម្យទាល់តែសោះសម្រាប់អ្នកដំណើរភាគច្រើន ជាពិសេសនោះគឺចំពោះអ្នកដំណើរជាកុមារនិងស្រ្តីតែម្តង៕

ឥណ្ឌា៖ យ៉ាងហោចណាស់មានពលរដ្ឋឥណ្ឌាចំនួន ៥នាក់បានស្លាប់បាត់បង់ជីវិតដោយសារបញ្ហាដាច់សរសៃឈាម​ក្នុងខួរក្បាលអំឡុងពេលដែលពួកគេទៅទស្សនា “ពិព័រណ៍ទ័ពអាកាស” នេះបើយោងតាមការចុះផ្សាយរបស់បណ្តាញសារព័ត៌មាន NDTV នៅក្នុងថ្ងៃចន្ទ ទី៧ ខែតុលា។ កម្មវិធី  “ពិព័រណ៍ទ័ពអាកាស” នេះត្រូវបានរៀបចំឡើងនៅលើឆ្នេរសមុទ្រ Marina ក្នុងទីក្រុង Chennai ភាគខាងលិចនៃប្រទេសឥណ្ឌា។ ប្រភពខាងលើបានបន្តថា កម្មវិធីបង្ហាញក្បួនយន្តហោះជាច្រើនគ្រឿងនៅអាកាសមួយនេះបានទាក់ទាញពលរដ្ឋឥណ្ឌាជាង ១,៥លាននាក់ឱ្យមកចូលរួមទស្សនា ពោលគឺជាការប្រមូលផ្តុំហ្វូងមនុស្សយ៉ាងច្រើនកកកុញបំផុតមួយផងដែរ។ បន្ថែមពីលើបរិកាសដែលមានមនុស្សយ៉ាងច្រើនកកកុញគ្នាហើយ សីតុណ្ហភាពនៅតាមបណ្តោយឆ្នេរសមុទ្រ Marina បានកើនឡើងដល់ ៣៥អង្សាសេ ហើយកត្តាទាំង​ពីរនេះហើយដែលជម្រុញអ្នកចូលរួមទស្សនាចំនួន ៥នាក់ត្រូវដាច់សរសៃឈាមក្នុងខួរក្បាលស្លាប់ភ្លាមៗតែម្តង៕ អត្ថបទ៖ ភក្តី ប្រភព៖ NDTV

ថៃ៖ ខេត្តឈៀងម៉ៃដែលជាតំបន់ទេសចរណ៍ដ៏មានសក្តានុពលស្ថិតនៅប៉ែកខាងជើងប្រទេសថៃកំពុងរងការវាយប្រហារដោយសារទឹកជំនន់យ៉ាងធ្ងន់ធ្ងរ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃចន្ទ ទី៧ ខែតុលា។ ទឹកជំនន់បានកើតឡើងយ៉ាងឆាប់រហ័សក្រោយមានភ្លៀងធ្លាក់ខ្លាំងជាច្រើនថ្ងៃជាប់ៗគ្នា ហើយបានជន់លិចផ្លូវ និងហាងលក់ទំនិញជាច្រើនកន្លែងនៅក្នុងខេត្តឈៀងម៉ៃ។ បើតាមអាជ្ញាធរថៃបានបញ្ជាក់ថា​ គិតត្រឹមពេលនេះឥទ្ធិពលរបស់ទឹកជំនន់បានបណ្តាលឱ្យសត្វដំរីចំនួន ២ក្បាលត្រូវលង់ទឹកស្លាប់ មនុស្សចំនួន ៨០នាក់ត្រូវជម្លៀសខ្លួនទៅកាន់កន្លែងមានសុវត្ថិភាពជាបន្ទាន់ និងមនុស្សចំនួន ៣នាក់ស្លាប់បាត់បង់ជីវិតផងដែរ។ ប្រភពខាងលើបានបន្តថា នៅក្នុងចំណោមអ្នកស្លាប់បាត់បង់ជីវិទាំងអស់នោះរួមមាន បុរសអាយុ ៤៤ឆ្នាំម្នាក់បានស្លាប់ដោយសារឆក់ចរន្តអគ្គិសនី ស្រ្តីអាយុ ៣៣ឆ្នាំម្នាក់បានស្លាប់ដោយសារការបាក់ដី និងជនរងគ្រោះម្នាក់ទៀតស្លាប់ដោយសារលង់ទឹក៕ អត្ថបទ៖ ភក្តី ប្រភព៖  Channel News Asia