វ៉េណេស៊ុយអេឡា៖ យ៉ាងហោចណាស់មានមនុស្សចំនួន ២នាក់បានស្លាប់បាត់បង់ជីវិតនៅក្នុងហេតុការណ៍មានសាឡង់ដឹកប្រេងមួយគ្រឿងបានលិចនៅប្រទេសវ៉េណេស៊ុយអេឡា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ​ ទី២៧ ខែកញ្ញា។ ក្រៅតែពីបានរកឃើញអ្នកស្លាប់ភ្លាមៗហើយ គិតត្រឹមពេលនេះក៏នៅមានមនុស្សចំនួន ៤នាក់ផ្សេងទៀតកំពុងតែបាត់ខ្លួនផងដែរ។ ប្រភពខាងលើបានបន្តថា មនុស្សដែលកំពុងបាត់ខ្លួនទាំង ៤នាក់នោះមានសង្ឃឹមនៅរស់តិចតួចបំផុត​ ដ្បិតសាឡង់ដឹកប្រេងខាងលើនេះបានជួបគ្រោះថ្នាក់ស្របពេលដែរអាកាសធាតុកំពុងស្ថិតនៅក្រោមលក្ខខណ្ឌដ៏អាក្រក់មួយ។ សូមបញ្ជាក់ជូនថា ហេតុការណ៍អកុសលខាងលើនេះបានកើតឡើងនៅក្នុងបឹងដ៏ធំមួយរបស់ប្រទេសវ៉េណេស៊ុយអេឡាមានឈ្មោះថា បឹង Maracaibo ខណៈសាឡង់ដឹកប្រេងដែលបានជួបគ្រោះថ្នាក់ខាងលើនេះគឺជាកម្មសិទ្ធរបស់ក្រុមហ៊ុន PDVSA ដែលជាក្រុមហ៊ុនរបស់រដ្ឋាភិបាលវ៉េណេស៊ុយអេឡា៕ អត្ថបទ៖ ភក្តី ប្រភព៖ The Strait Time

ឥណ្ឌា៖ យ៉ាងយោចណាស់មានពលរដ្ឋឥណ្ឌាចំនួន ៤៦នាក់បានលង់ទឹកស្លាប់ក្នុងអំឡុងពេលដែលពួកគេកំពុងគេកំពុងរៀបចំពិធីបុណ្យមួយតាមបែបសាសនាហិណ្ឌូ នេះបើយោងតាមការចុះផ្សាយរបស់បណ្តញសារព័ត៌មាន The Strait Time នៅក្នុងថ្ងៃសុក្រ​ ទី២៧ ខែកញ្ញា។ ហេតុការណ៍អកុសលនេះបានកើតឡើងនៅតាមដងទន្លេនិងបឹងជាច្រើនកន្លែងផ្សេងគ្នា ដែលស្ថិតនៅក្នុងរដ្ឋ Bihar ភាគខាងលិចនៃប្រទេសឥណ្ឌា។ ប្រភពខាងលើបានបន្តថា ពិធីបុណ្យតាមបែបសាសនាហិណ្ឌូដែលពលរដ្ឋឥណ្ឌានាំគ្នារៀបចំអបអរសាទរខាងលើនេះគឺតម្រូវពួកគេត្រូវចុះទៅងូតទឹកនៅក្នុងទន្លេឬបឹង ដែលនៅក្បែរកន្លែងរស់នៅរបស់ពួកគេដើម្បីលាងជម្រះចោលនូវបាបកម្មឬរឿងសៅហ្មងផ្សេងៗចេញពីជីវិតរបស់ពួកគេ។ យ៉ាងណាក្តី ការរៀបចំពិធីបុណ្យខាងលើនេះបានកើតឡើងស្របពេលកម្រិតទឹកទន្លេនិងបឹងកំពុងឡើងខ្ពស់និងមានសម្ពាធទឹកហូរខ្លាំង ទើបវាបានបង្កឱ្យមានអ្នកលង់ទឹកស្លាប់យ៉ាងច្រើននាក់ដូចនេះតែម្តង។ បើតាមអាជ្ញាធរឥណ្ឌាបានបញ្ជាក់ថា ជនរងគ្រោះទាំង ៤៦នាក់ខាងលើនេះបានលង់ទឹកស្លាប់នៅកន្លែងផ្សេងៗគ្នា ហើយនៅក្នុងនោះគឺមានជនរងគ្រោះចំនួន ៣៧នាក់ជាកុមារ៕ អត្ថបទ៖ ភក្តី ប្រភព៖ The Strait Time

វៀតណាម៖ ក្រុមហ៊ុន SpaceX របស់លោកមហាសេដ្ឋី Elon Musk គ្រោងបោះទុនវិនិយោគក្នុងទំហំទឹកប្រាក់ចំនួន ១៥ពាន់លានដុល្លារនៅក្នុងប្រទេសវៀតណាម នេះបើយោងតាមចុះផ្សាយបន្តដោយបណ្តាញសារព័ត៌មាន Channel News Asia នៅក្នុងថ្ងៃព្រហស្បតិ៍ ទី២៦ ខែកញ្ញា។ ការអះអាងអំពីគម្រោងវិនិយោគក្នុងទំហំទឹកប្រាក់ដ៏ច្រើននេះត្រូវបានធ្វើឡើងដោយលោក To Lam ដែលជាប្រធានាធិបតីរបស់ប្រទេសវៀតណាមផ្ទាល់តែម្តង។ ប្រភពខាងលើនេះបានបន្តថា ដំណឹងស្តីអំពីគម្រោងវិនិយោគក្នុងទំហំទឹកប្រាក់រហូតដល់ ១៥ពាន់លានដុល្លារនេះត្រូវបានធ្វើឡើងភ្លាមៗ ក្រោយលោកប្រធានាធិបតីវៀតណាម To Lam បញ្ចប់កិច្ចប្រជុំអំពីអាជីវកម្មសកលនិងកិច្ចការរដ្ឋាភិបាលជាមួយលោក Tim Hughes អនុប្រធានជាន់ខ្ពស់ក្រុមហ៊ុន SpaceX ដែលបានរៀបចំឡើងនៅក្នុងសហរដ្ឋអាមេរិក។ យ៉ាង​ណាក្តី ព័ត៌មានលម្អិតអំពីគម្រោងខាងលើនេះនៅមិនទាន់មានការបង្ហាញជូនជាសាធារណៈនៅឡើយទេ៕ ប្រភព៖ Channel News Asia

អាមេរិក៖ សហរដ្ឋអាមេរិកគ្រោងប្រកាសផ្តល់ជំនួយផ្នែកយោធាដែលមានទំហំជាទឹកប្រាក់ជាង ៨ពាន់លានដុល្លារបន្ថែមទៀតសម្រាប់ប្រទេសអ៊ុយក្រែន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២៦ ខែកញ្ញា។ ការប្រកាសអំពីគម្រោងផ្តល់ជំនួយថ្មីនេះនឹងត្រូវធ្វើឡើងនៅក្នុងពេល ដែលលោកប្រធានាធិបតីអ៊ុយក្រែន Volodymyr Zelensky អញ្ជើញធ្វើដំណើរទស្សនកិច្ចនៅក្នុងទីក្រុងវ៉ាស៊ីនតោននៅចុងខែនេះ។ ប្រភពខាងលើបានបន្តថា នៅក្នុងកញ្ចប់ជំនួយផ្នែកយោធាថ្មីនេះមិនមានអ្វីខុសប្លែកពីកញ្ចប់ជំនួយយោធាចាស់នោះទេ ពោលគឺវាមានបញ្ជូលទាំងគ្រាប់កាំភ្លើងនិងកាំភ្លើងជាច្រើនប្រភេទ និងសម្ភារៈយោធាសំខាន់ៗមួយចំនួនទៀត ស្របតាមតម្រូវការជាក់ស្តែងនៅក្នុងសមរភូមិ។ សូមបញ្ជាក់ជូនថា គិតត្រឹមពេលអមេរិកបានផ្តល់ជំនួយយោធាទៅកាន់ប្រទេសអ៊ុយក្រែនដែលមានតម្លៃសរុបរហូតដល់ ១៧៥ពាន់លានដុល្លារហើយ ខណៈអាមេរិកធ្លាប់បានសន្យាថា នឹងបន្តជួយគាំទ្រអ៊ុយក្រែនរហូតដល់ភ្លើងសង្គ្រាមត្រូវបានបញ្ចប់ទាំងស្រុង៕  អត្ថបទ៖ ភក្តី ប្រភព៖ The Strait Time

ថៃ៖ ថៃគ្រោងនឹងរៀបចំពិធីមង្គលការរវាងអ្នកស្រលាញ់ភេទដូចគ្នាទ្រង់ទ្រាយធំមិនធ្លាប់មានមួយក្រោយច្បាប់អនុញ្ញាតឱ្យអ្នកស្រ​លាញ់ភេទដូចគ្នាអាចរៀបការបានដោយស្របច្បាប់ចូលជាធរមាននៅដើមឆ្នាំ២០២៥ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅក្នុងថ្ងៃព្រហស្បតិ៍ ទី២៦​ ខែកញ្ញា។ តាមគម្រោងគឺពិធីមង្គលរវាងអ្នកស្រលាញ់ភេទដូចនេះលើកដំបូងនៅក្នុងប្រទេសថៃនឹងត្រូវរៀបចំឡើងនៅក្នុងថ្ងៃទី ២២ ខែមករា ឆ្នាំ២០២៥ ខណៈគូស្នេហ៍ដែលត្រូវចូលរួមទាំងអស់គឺមានជាង ១,០០០គូឯណោះ។ គួររម្លឹកជូនថា កាលពីថ្ងៃទី២៤ កន្លងទៅនេះ ព្រះមហាក្សត្រថៃព្រះបាទ មហា វិជ្ជរ៉ាឡុងកន បានឡាយព្រះហស្តលេខាលើសេចក្តីព្រាងច្បាប់ដែលអនុញ្ញាតឱ្យពលរដ្ឋថៃជាអ្នកស្រលាញ់ភេទដូចគ្នាអាចមានសិទ្ធរៀបការបានដោយស្របច្បាប់ហើយ ខណៈច្បាប់នេះនឹងចូលជាធរមាននៅក្នុងរយៈពេល ១២០ថ្ងៃទៀត ពោលគឺនៅដើមឆ្នាំ២០២៥។ តាមរយៈការបង្កើតច្បាប់ថ្មីនេះបានធ្វើឱ្យប្រទេសថៃក្លាយជាប្រទេសទីមួយនៅក្នុងតំបន់អាស៊ីអាគ្នេយ៍ និងជាប្រទេសទី៣៧ នៅលើពិភពលោក ដែលមានច្បាប់អនុញ្ញាតឱ្យមានការរៀបការរវាងអ្នកស្រលាញ់ភេទដូចគ្នាដូចពលរដ្ឋទូទៅដែរ៕ អត្ថបទ៖ ភក្តី ប្រភព៖ បាងកកប៉ុស្តិ៍

ថៃ៖ ទឹកជំនន់នៅតែបន្តគំរាមគំហែងតំបន់មួយចំនួននៅក្នុងប្រទេសថៃ បើទោះជាព្យុះភ្លៀងបានថយឥទ្ធិពលអស់ហើយក៏ដោយក្តី។ ជាក់ស្តែងបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ បានឱ្យដឹងថា សម្ពាធទឹកជំនន់បានបង្ខំឱ្យម្ចាស់កសិដ្ឋានចិញ្ចឹមសត្វក្រពើមួយកន្លែងសុខចិត្តសម្លាប់សត្វក្រពើដែលមាននៅក្នុងកសិដ្ឋានរបស់គាត់ចោលទាំងអស់តែម្តង ដើម្បីការងារសហគមន៍របស់គាត់។ ប្រភពខាងលើនេះបានបន្តថា ការសម្រេចសម្លាប់សត្វក្រពើនៅក្នុងកសិដ្ឋានចោលទាំងអស់នេះគឺត្រូវបានធ្វើឡើងដើម្បីការពារសុវត្ថិភាពរបស់ប្រជាពលរដ្ឋពីការវាយប្រហារដោយសត្វក្រពើ ក្នុងករណីដែលទឹកជំនន់បានជន់លិចកសិដ្ឋានទាំងមូល ដែលធ្វើឱ្យសត្វក្រពើអាចនិងរួចចេញពីកសិដ្ឋានទៅតាមទឹកជំនន់បាន។ បើតាមលោក Natthapak ដែលជាម្ចាស់កសិដ្ឋានចិញ្ចឹមក្រពើមួយកន្លែងនៅក្នុងស្រុក Muang ខេត្ត Lamphun ភាគខាងជើងនៃប្រទេសថៃបានឱ្យដឹងថា លោកបានសម្រេចសម្លាប់សត្វក្រពើអស់ជាង​ ១០០ក្បាល ដែលក្រពើខ្លះគាត់បានចិញ្ចឹមអស់រយៈពេល​១៧ឆ្នាំមកហើយ ខណៈការសម្លាប់សត្វក្រពើចោលទាំងអស់នេះបានធ្វើឱ្យគាត់ត្រូវខាតបង់ប្រាក់អស់ចំនួន ១,៤លានបាត (៤២,៨៤៨ ដុល្លារ) ផងដែរ៕ អត្ថបទ៖ ភក្តី ប្រភព៖ បាងកកប៉ុស្តិ៍

ចិន៖ ចិនបានបាញ់បង្ហោះដោយជោគជ័យនូវមីស៊ីលផ្លោងអន្តរទ្វីប (Intercontinental Ballistic Missile) ចូលទៅក្នុងមហាសមុទ្រប៉ាស៊ីហ្វិក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ​ទី២៥​ ខែកញ្ញា។ ក្រោយបាញ់សាកល្បងដោយជោគជ័យ ចិនក៏បានប្រកាសទទួលស្គាល់អំពីភាពជោគជ័យរបស់ខ្លួនជាសាធារណៈជាលើកដំបូងផងដែរ។ ប្រភពខាងលើបានបន្តថា មីស៊ីលផ្លោងអន្តរទ្វីប ឬហៅកាត់ថា ICBM ដំបូងរបស់ចិននេះត្រូវបានបាញ់សាកល្បងនៅម៉ោង ៨ និង៤៤ នាទីព្រឹក (ម៉ោងនៅក្នុងទីក្រុងប៉េកាំង) ក្នុងថ្ងៃទី២៥ ខែកញ្ញានេះ ដោយស្ថិតនៅក្រោមការគ្រប់គ្រងរបស់កងកម្លាំងរ៉ុកកែតនៃកងទ័ពរំដោះប្រជាជនចិន។ភាពជោគជ័យរបស់ចិននៅពេលនេះក៏បានបង្កើនការព្រួយបារម្ភជាលក្ខណៈអន្តរជាតិអំពីការបង្កើនសមត្ថភាពនុយក្លេអ៊ែររបស់ទីក្រុងប៉េកាំងផងដែរ៕ អត្ថបទ៖ ភក្តី ប្រភព៖ The Strait Time

ថៃ៖ ព្រះមហាក្សត្រថៃព្រះបាទ មហា វិជ្ជរ៉ាឡុងកន បានឡាយយព្រះហស្តលេខាលើសេចក្តីព្រាងច្បាប់ដែលអនុញ្ញាតឱ្យពលរដ្ឋថៃជាអ្នកស្រលាញ់ភេទដូចគ្នាអាចមានសិទ្ធរៀបការដោយស្របច្បាប់ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុថ្ងៃពុធ ទី២៥ ខែកញ្ញា។ តាមរយៈ​ច្បាប់​ថ្មីនេះ ​ ​ថៃបានក្លាយ​ជាប្រទេស​​ដំបូង​គេនៅក្នុងតំបន់អាស៊ីអាគ្នេយ៍ ដែល​យល់ព្រម​ទទួលការរៀបមង្គលការរវាង​​​អ្នក​ស្រឡាញ់​ភេទ​ដូចគ្នា​ផងដែរ។ ប្រភពខាងលើនេះបានបន្តថា ក្រោយទទួលបានការឡាយយព្រះហស្តលេខាពីសំណាក់ព្រះមហាក្សត្រថៃរួចហើយ ច្បាប់ខាងលើនេះនឹងផ្តើមមានសុពលក្នុងរយៈពេល ១២០ថ្ងៃទៀត​ ពោលគឺមានន័យថាអាពាហ៍ពិពាហ៍ដំបូងរវាងអ្នកស្រលាញ់ភេទដូចគ្នានៅក្នុងប្រទេសថៃអាចនឹងកើតមានឡើងនៅក្នុងដើមខែមករា ឆ្នាំ២០២៥។ សូមបញ្ជាក់ជូនថា ច្បាប់អនុញ្ញាតឱ្យមានការៀបការរវាងអ្នកមានភេទដូចគ្នានេះត្រូវបានបង្កើតឡើងជាលើកដំបូងនៅក្នុងប្រទេសហូឡង់នៅឆ្នាំ២០០១​ ហើយនៅក្នុងតំបន់អាស៊ីគឺតៃវ៉ាន់បានបង្កើតច្បាប់នេះនៅក្នុងឆ្នាំ២០១៩ ខណៈនៅប្រទេសនេប៉ាល់បាន​ចុះបញ្ជី​ទទួល​ស្គាល់​ការរៀបការ​ភេទដូចគ្នា​នៅ​ខែ វិច្ឆិកា ២០២៣៕ អត្ថបទ៖ ភក្តី ប្រភព៖ The Strait Time

វៀតណាម៖ ក្រុមហ៊ុនបច្ចេកវិទ្យាខ្នាតយក្សរបស់ប្រទេសកូរ៉េខាងត្បូង Samsung គ្រោងនឹងបោះទុនក្នុងទំហំទឹកប្រាក់ចំនួន ១,៨ពាន់លានដុល្លារ ដើម្បីសាងសង់រោងចក្រផលិតអេក្រង់ប្រភេទ OLED នៅក្នុងប្រទេសវៀតណាម នេះបើយោងតាមកា​រចុះផ្សាយរបស់បណ្តាញសារព័ត៌មាន Reuters នៅក្នុងថ្ងៃចន្ទ ទី២៣ ខែកញ្ញា។ តាមគម្រោងគឺការវិនិយោគខាងលើនេះនឹងត្រូវធ្វើឡើងនៅក្នុងត្រីមាសទី ៤នៃឆ្នាំ២០២៤ ខណៈទីតាំងនៃការសាងសង់រោងចក្រនេះគឺនៅក្នុងខេត្ត Bac Ninh ភាគខាងជើងនៃប្រទេសវៀតណាម។ ប្រភពខាងលើបានបន្តថា ខេត្ត Bac Ninh គឺជាទីតាំងសម្រាប់ធ្វើអាជីវកម្មខ្នាតអន្តរជាតិដ៏មានសក្តានុពលមួយ ដោយគិតត្រឹមពេលនេះខេត្ត Bac Ninh បានទទួលគម្រោងវិនិយោគពីក្រុមហ៊ុន Samsung ក្នុងទំហំទឹកប្រាក់ចំនួន ៦,៥ពាន់លានដុល្លាររួចហើយ ខណៈបើបូកទាំងគម្រោងថ្មីខាងលើនេះមួយបន្ថែមទៀតគឺទុនវិនិយោគរបស់ក្រុមហ៊ុន Samsung នៅក្នុងខេត្តមួយនេះនឹងត្រូវកើនឡើងដល់ ៨,៣ពាន់លានដុល្លារ។ សូមបញ្ជាក់ជូនថា គិតត្រឹមពេលនេះក្រុមហ៊ុន Samsung មានរោងចក្រផលិតឧបករណ៍អេឡិចត្រូនិចផ្សេងៗជាច្រើនរបស់ខ្លួនចំនួន ៦កន្លែងនៅក្នុងប្រទេសវៀតណាមទាំងមូល ហើយបើគិតជាទុនសរុបគឺមានតម្លៃជាទឹកប្រាក់ចំនួន ២២,៤ពាន់លានដុល្លារ៕ អត្ថបទ៖

កូរ៉េខាងត្បូង៖ ពលរដ្ឋកូរ៉េខាងត្បូងជាង ១,៥០០នាក់ត្រូវបង្ខំចិត្តធ្វើការជម្លៀសខ្លួនជាបន្ទាន់ដើម្បីការពារគ្រោះថ្នាក់ពីបញ្ហាភ្លៀងធ្លាក់ក្នុងកម្រិតដ៏ខ្ពស់បំផុតមួយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃចន្ទ ទី២៣ ខែកញ្ញា។ គិតត្រឹមពេលនេះព្យុះភ្លៀងបានកំពុងតែបង្កការគំរាមគំហែងយ៉ាងខ្លាំងនៅក្នុងលើកោះ Jeju ខេត្ត Chungcheong ខេត្ត Gyeongsang និងខេត្ត Gangwon ខណៈព្យុះភ្លៀងបានចាប់ផ្តើមធ្លាក់តាំងតែពីថ្ងៃទី១៩​ ខែកញ្ញាមកម្លេះ។ ប្រភពខាងបានបន្តថា គិតត្រឹមពេលនេះបញ្ហាព្យុះភ្លៀងនៅមិនទាន់បណ្តាលឱ្យមានពលរដ្ឋកូរ៉េខាងត្បូងណាម្នាក់បានស្លាប់បាត់បង់ជីវិតនៅឡើយទេ តែវាបានបង្កឱ្យមានបញ្ហាមួយចំនួនដូចជា ផ្ទះចំនួន ២៦ខ្នងបានរងនូវការបំផ្លាញ មានកប៉ាល់ដឹកអ្នកដំណើរចំនួន ៧៧ គ្រឿងត្រូវបានជាប់គាំងនៅលើផ្លូវសមុទ្រចំនួន ៥៥កន្លែងផ្សេងគ្នា ជើងហោះហើរចំនួន ១៦ ត្រូវបានលុបចោលជាបន្ទាន់ ផ្លូវចូលទៅកាន់ឧទ្យានចំនួន ២២កន្លែងត្រូវបានកាត់ផ្តាច់ ផ្លូវនៅក្រោមនៅចំនួន ៣៩ខ្សែត្រូវបានត្រូវផ្អាកដំណើរការជាបណ្តោះអាសន្ន ខណៈផ្លូវថ្នល់សំខាន់ៗចំនួន ៣៨កន្លែងត្រូវបានបិទផងដែរ៕