តៃវ៉ាន់៖ អតីតយោធាជើងអាកាសតៃវ៉ាន់ម្នាក់ត្រូវតុលាការកាត់ទោសឲ្យជាប់ពន្ធនាគាររយៈពេល ២០ឆ្នាំជុំវិញករណីលួចផ្តល់ការសម្ងាត់ឲ្យទៅប្រទេសចិន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី២៧ ខែតុលានេះ។ អតីតយោធាតៃវ៉ាន់រូបនេះមានឈ្មោះថា Liu ហើយរូបគាត់ត្រូវបានគេរកឃើញថា បានផ្តើមមានទំនាក់ទំនងដោយសម្ងាត់ជាមួយរដ្ឋាភិបាលចិនចាប់តាំងពីអំំឡុងឆ្នាំ ២០១៣មកម្ល៉េះ។ ប្រភពខាងលើបានបន្តថា នៅក្នុងរយៈពេលប៉ុន្មានឆ្នាំចុងក្រោយនេះ វរសេនីយ៍ឯក Liu ថែមទាំងបានព្យាយាមបញ្ចុះបញ្ចូលយោធាតៃវ៉ាន់ចំនួន ៥នាក់ផ្សេងទៀតឲ្យចូលធ្វើការងារចារកម្មឲ្យរដ្ឋាភិបាលចិនជាមួយគាត់ផងដែរ ហើយអ្នកទាំង ៥នាក់នោះក៏ត្រូវបានតុលាការតៃវ៉ាន់កាត់ទោសឲ្យជាប់ពន្ធនាគារផងដែរ ដោយពួកគេត្រូវជាប់ពន្ធនាគារក្នុងរយៈពេលផ្សេងៗគ្នាចាប់ពី ៦ខែ រហូតដល់ជិត ២០ឆ្នាំ។ គួរបញ្ជាក់ជូនថា រឿងរ៉ាវចម្រូងចម្រាសនៃការលួចធ្វើចារកម្មរវាងតៃវ៉ាន់និងចិនបានផ្តើមកើតមានចាប់តាំងពីឆ្នាំ ១៩៤៩ម្លេះ ពោលគឺជាពេលដែលចិនដីគោកនិងកោះតៃវ៉ាន់ផ្តើមមានការបែកបាក់គ្នា៕ អត្ថបទ៖ ភក្តី ប្រភព៖ The Strait

កូរ៉េខាងត្បូង៖​ តារាចម្រៀងដ៏ល្បីល្បាញរបស់កូរ៉េខាងត្បូងគឺលោក G-Dragon ដែលជាសមាជិកក្រុម BIGBANG ម្នាក់ផងនោះកំពុងស្ថិតក្រោមការស៊ើបអង្កេតជុំវិញករណីប្រើប្រាស់គ្រឿងញៀន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃព្រហស្បតិ៍​ ទី២៦ ខែតុលានេះ។ យ៉ាងណាក្តី ភ្នាក់ងារប៉ូលិសកូរ៉េខាងត្បូងបានបដិសេដមិនទាន់ធ្វើការបញ្ជាក់លម្អិតអំពីករណីខាងលើនេះនៅឡើយទេ ដ្បិតសំណុំរឿងកំពុងស្ថិតក្រោមការតាមដាន។ ចំពោះក្រុមហ៊ុន YG Entertainment ដែលជាក្រុមហ៊ុនគ្រប់គ្រងលើក្រុមចម្រៀង BIGBANG វិញក៏បានបដិសេដមិនធ្វើការបកស្រាយអ្វីឡើយចំពោះករណីនេះ ដោយក្រុមហ៊ុនបានបញ្ជាក់ថា កុងត្រារបស់តារាចម្រៀងរូបនេះជាមួយនឹងក្រុមហ៊ុនបានអស់សុពលភាពតាំងពីខែមិថុនាមកម្លេះ។ គួររម្លឹកជូនថា នេះមិនមែនជាលើកទីមួយនោះទេ ដែលលោក G-Dragon មានការពាក់ព័ន្ធក្នុងករណីប្រើប្រាស់គ្រឿងញៀន ដោយកាលពីឆ្នាំ ២០១១ កន្លងទៅ តារាចម្រៀង Rap ដែលមានឈ្មោះពិតថា Kwon Ji-yong រូបនេះក៏ត្រូវបានគេប្រទះឃើញជក់កញ្ឆានៅក្រៅក្លឹបរាត្រីមួយកន្លែងនៅក្នុងប្រទេសជប៉ុនផងដែរ៕

ចិន៖ ទីភ្នាក់ងារអវកាសចិន (The Chinese Manned Space Agency) បានប្រកាសទទួលបានជោគជ័យក្នុងការបាញ់បង្ហោះយានអវកាសនៅក្នុងបេសកកម្មថ្មីមួយ នេះបើយោងតាមការចុះផ្សាយរបស់បណ្តាញសារព័ត៌មាន South China Morning Post នៅព្រឹកថ្ងៃព្រហស្បតិ៍ ទី២៦ ខែតុ​លានេះ។ យានថ្មីនេះមានឈ្មោះថា Shenzhou-17 ឬ  “Divine Vessel” ខណៈបេសកកម្មនេះគឺជាបេសកកម្មបញ្ជូនមនុស្សទៅកាន់ទីអវកាសលើកទី ១២ហើយរបស់ប្រទេសចិន។ ប្រភពខាងលើបានបន្តថា យាន Shenzhou-17 ​ត្រូវបានបាញ់បង្ហោះចេញពីស្ថានីយ៍អវកាស Jiuquan Satellite Launch Centre ដែលស្ថិតនៅភាគខាងលិចប្រទេសចិននៅម៉ោង ១១ និង ១៤នាទីព្រឹកមិញនេះ ខណៈនៅក្នុងយានអវកាសនោះមានផ្ទុកដោយក្រុមអាកាសយានិកចំនួន

អង្គការសហប្រជាជនជាតិ (UN) បានចោទប្រកាន់ថា ការវាយប្រហារពីសំណាក់កងកម្លាំងអ៊ីស្រាអែលនៅតំបន់ហ្គាហ្សាគឺជាសកម្មភាពបំពានទៅនឹងច្បាប់អន្តរជាតិ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី២៥ ខែតុលានេះ។ ការចោទប្រកាន់នេះត្រូវបានធ្វើឡើងដោយលោក Antonio Guterres អគ្គលេខាធិការអង្គការសហប្រជាជាតិនៅក្នុងកិច្ចប្រជុំមួយដែលមានការចូលរួមពីណាក់មេដឹកនាំនៃប្រទេសធំៗ​ជាច្រើនផងដែរ។ លោក Antonio Guterres បានថ្លែងបញ្ជាក់ថា៖ “ខ្ញុំ​មាន​ការ​ព្រួយ​បារម្ភ​យ៉ាង​ខ្លាំង​ចំពោះសកម្មភាព​រំលោភ​បំពាន​ច្បាប់​មនុស្សធម៌​អន្តរជាតិ​ដែល​កំពុង​កើតមាននៅតំបន់ហ្គាហ្សា ហើយកិច្ចឈប់បាញ់រវាងភាគីខាងសងខាងគួរតែត្រូវធ្វើឡើងជាបន្ទាន់”។ អគ្គលេខាធិការអង្គការសហប្រជាជាតិរូបនេះបានបន្តថា គិតចាប់តាំងពីថ្ងៃផ្តើមមានការប្រយុទ្ធគ្នាមក ពោលគឺនៅក្នុងថ្ងៃទី ៧ ខែតុលារហូតមកទល់នឹងពេលនេះជំលោះរវាងក្រុមហាម៉ាសនិងអ៊ីស្រាអែលហាក់មិនមានភាពថយចុះទាល់តែសោះ ផ្ទុយទៅវិញភាពតានតឹងនឹងកាន់តែមានខ្ពស់ជាងនេះបន្ថែមទៀត ប្រសិនបើអ៊ីស្រាអែលបន្តសកម្មភាពវាយប្រហារនៅតំបន់ហ្គាហ្សាតាមផែនការដែលពួកគេបានគ្រោងទុក៕ អត្ថបទ៖ ភក្តី ប្រភព៖ The Strait Time  

ហុងកុង៖ សមាជិកព្រឹទ្ធសភាអាមេរិកម្នាក់ត្រូវបានចាប់ខ្លួននៅព្រលានយន្តហោះក្នុងទីក្រុងហុងកុង ពីបទកាន់កាប់អាវុធដោយខុសច្បាប់ នេះបើយោងតាមការចុះផ្សាយរបស់បណ្តាញសារព័ត៌មាន CNN នៅក្នុងថ្ងៃអង្គារ ទី២៤ ខែតុលានេះ។ អ្នកនយោបាយអាមេរិករូបនេះមានឈ្មោះថា Jeff Wilson ត្រូវបានអាជ្ញាធរហុងកុងឃាត់ខ្លួននៅឯព្រលានយន្តហោះអន្តរជាតិហុងកុង (Hong Kong International Airport) កាលពីចុងសប្តាហ៍កន្លងទៅនេះ។ ប្រភពខាងលើបានបន្តថា អាវុធដែលអាជ្ញាធរហុងកុងបានចោទប្រកាន់ថាជាកម្មសិទ្ធរបស់លោក Jeff Wilson នោះគឺជាកាំភ្លើងខ្លីមួយដើមដែលត្រូវបានរកឃើញនៅក្នុងកាបូបយួរដៃរបស់គាត់ ហើយភ្លាមៗក្រោយការរកឃើញនោះ លោក Jeff Wilson បានបដិសេដថា លោកមិនបានដឹងថាមានកាំភ្លើងខ្លីនៅក្នុងកាបូបរបស់គាត់នោះទេ ហើយរូបលោកក៏គ្មានហេតុផលត្រូវដាក់កាំភ្លើងខ្លីតាមខ្លួនដែរ ដ្បិតអំឡុងពេលនេះលោកកំពុងមកដើរកំសាន្តនៅតំបន់អាស៊ី​អា​គ្នេ​យ៏រយៈពេល ៥សប្តាហ៍ជាមួយនិងភរិយារបស់គាត់។ យ៉ាងណាក្តី លោក Jeff Wilson នឹងត្រូវបង្ហាញខ្លួននៅតុលាការ Sha Tin Magistrates

អង់គ្លេស៖ រដ្ឋាភិបាលនៃប្រទេសអង់គ្លេសក្រោមការដឹកនាំរបស់លោកនាយករដ្ឋមន្ត្រី Rishi Sunak បានប្រកាសផ្តល់ជំនួយទៅកាន់តំបន់ហ្គហ្សាចំនួន ២០លានផោន (២៤លានដុល្លាអាមេរិក) នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃអង្គារ ទី២៤ ខែតុលានេះ។ ប្រាក់ជំនួយនេះគឺជាជំនួយមនុស្សធម៌សម្រាប់យកទៅជួយពលរដ្ឋប៉ាឡេស្ទីន ដែលកំពុងរងផលប៉ះពាល់ពីការវាយប្រហារគ្នារវាងក្រុមហាម៉ាសនិងកងកម្លាំងអ៊ីស្រាអែល។ គួរម្លឹកជូនថា កាលពីសប្តាហ៍មុនអង់គ្លេសក៏បានផ្តល់ជំនួយដូចគ្នានេះទៅកាន់តំបន់ហ្គាហ្សាចំនួន ១០លានផោន (១២លានដុល្លារអាមេរិក) ផងដែរ ដូចនេះនៅក្នុងខែតុលានេះរដ្ឋាភិបាលអង់គ្លេសនឹងត្រូវផ្តល់ប្រាក់ជំនួយសរុបចំនួន ៣០លានផោន (៣៦លានដុល្លារអាមេរិក) ទៅកាន់តំបន់ហ្គាហ្សា។ ប្រភពខាងលើបានបញ្ជាក់ថា គិតត្រឹមពេលនេះក្រុមហម៉ាសប៉ាឡេស្ទីនបានរាយការណ៍ថា បានរកឃើញអ្នកស្លាប់បាត់បង់ជីវិតអស់ជាង ៥,០០០នាក់ ខណៈតួលេខអ្នកស្លាប់បាត់បង់ជីវិតខាងភាគីអ៊ីស្រាអែលវិញគឺនៅរក្សាចំនួនជាង ១,៤០០នាក់ដដែល៕ អត្ថបទ៖ ភក្តី ប្រភព៖ Channel News

ឥណ្ឌូនេស៊ីគឺជាប្រទេសដែលមានករណីវាយប្រហារពីសត្វក្រពើទៅកាន់មនុស្សជាតិច្រើនជាងគេបង្អស់នៅលើពិភពលោក ​នេះបើយោងតាមការសិក្សាមួយដែលត្រូវបានចុះផ្សាយរបស់បណ្តាញសារព័ត៌មាន BBC កាលពីចុងសប្តាហ៍នេះ។ ការសិក្សាខាងនេះត្រូវបានធ្វើឡើងដោយវិទ្យាស្ថាន International Union for Conservation of Nature (IUCN) ដែលមានមូលដ្ឋាននៅក្នុងប្រទេសស្វីស​ ខណៈទិន្នន័យនៅក្នុងការសិក្សានេះគឺត្រូវបានគេគិតក្នុងរយៈពេល ១០ឆ្នាំចុងក្រោយនេះ។ ប្រភពខាងបានបន្តថា នៅក្នុងរយៈពេលមួយទសវត្សរ៍ចុងក្រោយនេះនៅលើពិភពលោកទាំងមូលបានរកឃើញករណីវាយប្រហារដោយសត្វក្រពើចចន្លោះពី ៣,០០០ ទៅ ៤,០០០ករណី ហើយនៅក្នុងនោះមានការវាយប្រហារចំនួន ១,០០០ករណីគឺត្រូវបានរកឃើញនៅក្នុងប្រទេសឥណ្ឌូនេស៊ីតែមួយប៉ុណ្ណោះ។ នៅក្នុងរបាយការណ៍ដដែលនេះបានបញ្ជាក់ទៀតថា នៅក្នុងចំណោមការវាយប្រហារទាំង ១,០០០ករណីនៅក្នុងប្រទេសឥណ្ឌូនេស៊ីនោះគឺបានបណ្តាលឲ្យមានពលរដ្ឋចំនួន ៤៥០នាក់ត្រូវស្លាប់បាត់បង់ជីវិត ខណៈក្រៅពីនោះគឺបានរងរបួសធ្ងន់និងស្រាល៕ អត្ថបទ៖ ភក្តី ប្រភព៖ BBC

ហ្គាហ្សា៖ ក្រុមហាម៉ាសបានប្រកាសថា មានពលរដ្ឋចំនួន ៦០នាក់បន្ថែមទៀតបានស្លាប់បាត់បង់ជីវិតដោយការវាយប្រហារពីកងកម្លាំងអ៊ីស្រាអែលកាលពីយប់មិញ​ នេះបើយោងតាមការចុះផ្សាយរបស់បណ្តាញសារព័ត៌មាន​ The Strait Time នៅក្នុងថ្ងៃចន្ទ ទី២៣ ខែតុលានេះ។ ការវាយប្រហារកាលពីយប់មិញនេះគឺជាការវាយប្រហារតាមជើងអាកាស ដែលបានអូសបន្លាយតាំងតែពីយប់ថ្ងៃអាទិត្យរហូតដល់ព្រឹកព្រលឹមថ្ងៃចន្ទនេះ។ ប្រភពខាងលើបានបន្តថា​ នៅក្នុងចំណោមជនរងគ្រោះដែលស្លាប់បាត់បង់ជីវិតទាំង ៦០នាក់នោះ គឺមានជនរងគ្រោះចំនួន ១៧នាក់បានស្លាប់ក្នុងពេលដំណាលគ្នា ពោលគឺក្រោយទទួលរងនូវការវាយប្រហារតែមួយដងប៉ុណ្ណោះ។ គួរកត់សម្គាល់ថា គិតត្រឹមពេលនេះគឺក្រុមហាម៉ាសបានរកឃើញមានពលរដ្ឋស្លាប់បាត់បង់ជីវិតសរុបចំនួនជាង ៤,៦០០នាក់ ដោយក្នុងនោះក៏មានទាំងពលរដ្ឋស៊ីវិលប៉ាឡេស្ទីនផងដែរ ខណៈតួលេខពលរដ្ឋអ៊ីស្រាអែលដែលបានស្លាប់បាត់បង់ជីវិតវិញ គឺនៅមានចំ​នួនជាង ១,៤០០នាក់ដដែល៕  អត្ថបទ៖ ភក្តី ប្រភព៖ The Strait Time

អាមេរិក៖ សាកលវិទ្យល័យ Chicago ដែលមានមូលដ្ឋាននៅសហរដ្ឋអាមេរិកបានយល់ព្រមបង់ប្រាក់ចំនួន ៩៥,០០០ម៉ឺនដុល្លារទៅកាន់ក្រុមយុវជនមួយចំនួនជុំវិញករណីរើសអើងពលរដ្ឋអាស៊ី នេះបើយោងតាមការចុះផ្សាយរបស់បណ្តាញសារព័ត៌មាន Next Shark។  ក្រុមយុវជនដែលបានរងគ្រោះពីសកម្មភាពរើសអើងនេះមានចំនួនសរុប ១០៧នាក់ ខណៈពួកទាំងអស់គឺសុទ្ធតែពលរដ្ឋមានដើមកំណើតអាស៊ី។ ប្រភពខាងលើបានបន្តថា នៅក្នុងអំឡុងខែឧសភា ឆ្នាំ២០២០ ដល់ខែ សីហាឆ្នាំ ២០២១ កន្លងទៅក្រុមយុវជនអាស៊ីទាំងនេះបានព្យាយាមដាក់ពាក្យចូលបម្រើការងារនៅក្នុងមជ្ឈមណ្ឌលស្រាវស្រាវរបស់សាកលវិទ្យល័យ Chicago ជាបន្តបន្ទាប់តែពួកគេទាំងអស់ត្រូវបានបដិសេដ ហើយក្រោយមកគេរកឃើញទៀតថា​ ការបដិសេដនោះគឺត្រូវបានធ្វើឡើងក្រោមហេតុផលថា ពួកគេជាពលរដ្ឋអាស៊ីតែមិនមែនព្រោះតែពួកគេគ្មានសមត្ថភាពឡើយ។ គួររម្លឹកជូនថា នៅក្នុងអំឡុងពេលខាងលើនេះគឺជាអំឡុងពេលដែលពិភពលោកកំពុងរងគ្រោះដោយការរាតត្បាតជំងឺកូវីដ-១៩ ហើយពេលនោះក្រុមពលរដ្ឋនៅអឺរ៉ុបនិងអាមេរិកជាច្រើនបានយល់ឃើញថា ជំងឺដ៏កាចសាហាវនេះមានដើមកំណើតពីប្រទេសអាស៊ី ពោលគឺប្រទេសចិន​ ទើបធ្វើឲ្យពួកមានគំនិតអវិជ្ជមានចំពោះពលរដ្ឋអាស៊ី៕ អត្ថបទ៖ ភក្តី ប្រភព៖  Next Shark

អាមេរិក៖ លោកប្រធានាធិបតីអាមេរិក ចូ បៃឌិន បានប្រកាសឲ្យដឹងថា ជំនួយរបស់អាមេរិកនឹងត្រូវដឹកជញ្ជូនទៅដល់ទឹកដីហ្គាហ្សាក្នុងរយៈពេល ២ថ្ងៃ នេះបើយោងតាមសេចក្តីថ្លែងការពិសេសមួយដែលរូបលោកបានធ្វើឡើងនៅក្នុងសេតវិមានកាលពីយប់ថ្ងៃសុក្រម្សិលមិញ ពោលគឺមានន័យថាជំនួយអាចនឹងទៅដល់ទឹកដីហ្គាហ្សាក្នុងអំឡុងថ្ងៃអាទិត្យចុងសប្តាហ៍នេះ។ គួរបញ្ជាក់ជូនថា ជំនួយរបស់រដ្ឋាភិបាលអាមេរិកនេះគឺជាជំនួនមនុស្សធម៌សម្រាប់យកទៅជួយពលរដ្ឋប៉ាឡេស្ទីនរាប់លាននាក់ ដែលបានរងផលប៉ះពាល់ពីការប្រយុទ្ធគ្នារវាងក្រុមហាម៉ាសនិងកងកម្លាំងអ៊ីស្រាអែល តែវាមិនមែនជាការគាំទ្រចលនារបស់ក្រុមហាម៉ាសប៉ាឡេស្ទីននោះទេ។ បើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសៅរ៍ ទី២១ ខែតុលានេះបានបញ្ជាក់ថា ការដែលអាមេរិកអាចដឹកជញ្ជូនជំនួយទៅកាន់តំបន់ហ្គាហ្សាបានលឿនដូចនេះក៏ដោយសារមានការសម្របសម្រួលពីសំណាក់ប្រទេសអ៊ីស្រាអែលនិងប្រទេសអេហ្ស៊ីបផងដែរ។ ប្រភពខាងលើបានបន្តថា គិតត្រឹមពេលនេះគេបានរកឃើញមានពលរដ្ឋប៉ាឡេស្ទីនចំនួន ៤,៣១៧នាក់ បានស្លាប់បាត់បង់ជីវិត ជាច្រើនពាន់នាក់បានរងរបួស និងរាប់លាននាក់ផ្សេងទៀតកំពុងរងផលប៉ះពាល់យ៉ាងខ្លាំង ដូចជាគ្មានកន្លែងស្នាក់នៅត្រឹមត្រូវ និងគ្មានអាហារគ្រប់គ្រាន់សម្រាប់ទទួលទានជាដើម៕ អត្ថបទ៖ ភក្តី ប្រភព៖ The Strait Time