នេប៉ាល់៖ មនុស្សចំនួន​ ៦នាក់ត្រូវបានរាយការណ៍ថា បានស្លាប់បាត់បង់ជីវិតនៅក្នុងហេតុការណ៍ធ្លាក់ឧទ្ធម្ភាគចក្រទេសចរណ៍មួយគ្រឿងនៅក្នុងប្រទេសនេប៉ាល់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃពុធ ទី១២ ខែកក្កដានេះ។ នៅក្នុងឧទ្ធម្ភាគចក្រទេសចរណ៍មួយគ្រឿងនោះមានផ្ទុកគ្រួសារអ្នកទេសចរជនជាតិម៉ិចស៊ីកូចំនួន ៥នាក់ និងអ្នកបើកបរឧទ្ធម្ភាគចក្រម្នាក់ជនជាតិនេប៉ាល់។ ប្រភពខាងលើបានបន្តថា ឧទ្ធម្ភាគចក្របានចេញដំណើរពីតំបន់ Lukla ដែលជាច្រកផ្លូវសម្រាប់ដើរឡើងទៅលើភ្នំអេវឺរេស និងមានទិសដៅហោះហើរទៅកាន់រដ្ឋធានី Kathmandu នៃប្រទេសនេប៉ាល់។ ​យ៉ាងណាក្តី ក្រោយធ្វើការហោះហើរបាន ៨នាទីស្រាប់តែឧទ្ធម្ភាគចក្របានដាច់ទំនាក់ទំនងពីក្រុមការងារអាកាសចរណ៍ ហើយបន្ទាប់មកឧទ្ធម្ភាគចក្រក៏បានធ្លាក់តែម្តង។ បើតាមអាជ្ញាធរអាកាសចរណ៍នេប៉ាល់បានឲ្យដឹងថា មូលហេតុដែលធ្វើឲ្យឧទ្ធម្ភាគចក្រធ្លាក់គឺបណ្តាលមកពីបញ្ហាអាកាសធាតុមិនអំណោយផល តែមិនមែនមកពីបញ្ហាគ្រឿងម៉ាស៊ីនរបស់ឧទ្ធម្ភាគចក្រនោះទេ។ សូមបញ្ជាក់ជូនថា គិតត្រឹមពេលនេះសាកសពរបស់ជនរងគ្រោះទាំង ៦នាក់នោះគឺត្រូវបានគេរកឃើញអស់ហើយ៕ អត្ថបទ៖ ភក្តី ប្រភព៖  The Strait

កូរ៉េខាងជើង៖ កូរ៉េខាងជើងបានព្រមានបាញ់ទម្លាក់យន្តហោះរបស់អាមេរិក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃអង្គារ ទី១១ ខែកក្កដានេះ។ ការព្រមានពីការបាញ់ទម្លាក់យន្តហោះនេះត្រូវបានធ្វើឡើងក្រោយកូរ៉េខាងជើងអះអាងថា​ យន្តហោះដែលជាឈ្លបយកការណ៍របស់អាមេរិកបានហោះឆ្លងកាត់តំបន់សមុទ្រខាងកើតដែលជាដែនដីរបស់ខ្លួនជាច្រើនដងហើយចាប់តាំងពីចុងសប្តាហ៍មក។ គួររម្លឹកជូនថា កាលពីថ្ងៃចន្ទ ទី១០ ខែកក្កដាម្សិលមិញនេះកូរ៉េខាងជើងក៏បានធ្វើការថ្តោលទោសចំពោះអាមេរិកយ៉ាងខ្លាំងផងដែរ ចំពោះសកម្មភាពដែលអាមេរិកបានបញ្ជូននាវាមុជទឹកសម្រាប់បាញ់មីស៊ីលបាលីស្ទិកទៅកាន់តំបន់ឧបទ្វីបកូរ៉េ។ ទន្ទឹមនឹងធ្វើការថ្កោលទោស កូរ៉េខាងជើងក៏បានព្រមានទៀតថា ទង្វើរបស់អាមេរិកនៅពេលនេះកំពុងតែជម្រុញឲ្យសង្គ្រាមនុយក្លេអ៊ែរជិតកើតឡើងជាការពិតហើយ៕ អត្ថបទ៖ ភក្តី ប្រភព៖ The Strait Time

ឥណ្ឌា៖ តំបន់ភាគខាងជើងនៃប្រទេសឥណ្ឌានៅតែបន្តទទួលរងការគំរាមគំហែងយ៉ាងខ្លាំងពីឥទ្ធិពលរបស់ភ្លៀងមូសុង ខណៈគ្រោះធម្មជាតិដ៏អាក្រក់នេះបានបណ្តាលឲ្យមានពលរដ្ឋឥណ្ឌាស្លាប់ចំនួន ១៤នាក់បន្ថែមទៀត នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅល្ងាចថ្ងៃចន្ទ ទី១០ ខែកក្កដានេះ។ បើធ្វើការបូកសរុបចំនួនអ្នកស្លាប់តាំងពីចុងសប្តាហ៍មុនមក គឺគិតត្រឹមពេលនេះមានពលរដ្ឋឥណ្ឌាចំនួន ២៩នាក់ហើយ ដែលបានស្លាប់បាត់បង់ជីវិតដោយសារភ្លៀងមូសុង។ គួរបញ្ជាក់ជូនថា ឥទ្ធិពលនៃភ្លៀងមូសុងបានបង្កឲ្យមានជំនន់ទឹកភ្លៀងជនលិចយ៉ាងឆាប់រហ័ស និងបានធ្វើឲ្យតំបន់មួយចំនួនត្រូវជួបប្រទះនឹងបញ្ហាបាក់ស្រុតដីយ៉ាងលឿនផងដែរ។ បញ្ហាចម្បងទាំង ២នេះក៏បានជះឥទ្ធិពលអាក្រក់មួយចំនួនទៀតទៅកាន់ពលរដ្ឋឥណ្ឌាផងដែរ ដូចជាចរាចរណ៍នៅតាមដងផ្លូវមួយចំនួនត្រូវកកស្ទះ អាជីវកម្មមួយចំនួនត្រូវបានផ្អាកជាបណ្តោះអាសន្ន ពលរដ្ឋមួយចំនួនកើតមានជំងឺ ខណៈសម្បត្តិសាធារណៈមួយចំនួនដូចជាផ្ទះ និងស្ពានមួយកន្លែងត្រូវបានបំផ្លាញ៕ អត្ថបទ៖ ភក្តី ប្រភព៖ Channel News Asia  

ថៃ៖ របាយការណ៍ចុងក្រោយមួយរបស់អាជ្ញាធរថៃស្តីពីគ្រោះថ្នាក់បាក់ស្ពានមួយកន្លែងនៅក្នុងទីក្រុងបាងកក ដែលត្រូវបានចុះផ្សាយបន្តដោយបណ្តាញសារព័ត៌មាន The Nation នៅព្រឹកថ្ងៃអង្គារ ទី១១ ខែកក្កដានេះបានឲ្យដឹងថា មូលហេតុដែលធ្វើឲ្យស្ពានបាក់ទំនងជាបណ្តាលមកពីរថយន្តស្ទូចដំណើរការខុសប្រក្រតី។ គិតត្រឹមពេលនេះហេតុការណ៍បាក់ស្ពានបានបណ្តាលឲ្យមានមនុស្សម្នាក់ស្លាប់បាត់បង់ជីវិត និង ៨នាក់ផ្សេងទៀតបានរងរបួស។ ប្រភពខាងលើបានបន្តថា នៅក្នុងចំណោមជនរងគ្រោះទាំង ៨នាក់នោះ គឺមានជនរងគ្រោះ ៤នាក់បានរងរបួសធ្ងន់ និងកំពុងព្យាបាលក្នុងបន្ទប់សង្គ្រោះបន្ទាន់នៅក្នុងមន្ទីរពេទ្យ។ ជនរងគ្រោះដែលបានស្លាប់បាត់បង់ជីវិតម្នាក់នោះគឺជាកម្មករ ដែលកំពុងធ្វើការងារនៅក្នុងការដ្ឋានសាងសង់ស្ពាននោះផ្ទាល់តែម្តង។ ក្រៅតែពីបានបង្កគ្រោះថ្នាក់ដល់មនុស្សហើយ ស្ពានដែលបានបាក់ធ្លាក់មកនោះក៏បានបង្កឲ្យមានការខូចខាតដល់រថយន្តក្រុងនិងរថយន្តរបស់អ្នកដំណើរអស់ជាច្រើនគ្រឿងផងដែរ។​ សូមបញ្ជាក់ថា ស្ពានដែលបានបាក់នេះគឺជាស្ពានបេតុង មានកម្ពស់ ២០ម៉ែត្រ មានទីតាំងស្ថិតនៅលើផ្លូវ  Lat Krabang និងបាក់ធ្លាក់មកកាលពីម៉ោង ៦ល្ងាច ថ្ងៃចន្ទ ម្សិលមិញនេះ៕ អត្ថបទ៖ ភក្តី ប្រភព៖ 

អាមេរិក៖ ជាទូទៅករណីចោរប្លន់ត្រូវបានគេចាត់ទុកជារឿងគួរឲ្យភ័យខ្លាចនិងគ្រោះថ្នាក់មួយ​ តែសម្រាប់ករណីប្លន់មួយនេះបានក្លាយជារឿងគួរឲ្យអស់សំណើចទៅវិញ ក្រោយបុរសជាចោរម្នាក់បានដើរចូលទៅក្នុងហាងធ្វើក្រចកមួយកន្លែងដើម្បីប្លន់យកប្រាក់ តែគ្មានអ្នកណាម្នាក់និយាយជាមួយគាត់ ខ្លាចគាត់ ឬផ្តល់ប្រាក់តាមការសម្លុតរបស់គាត់ឡើយ ហើយចុងក្រោយគាត់បានត្រឹមដើរចេញទៅវិញដោយគ្មានបានអ្វីសោះ ក្រៅតែពីការតាមចាប់ខ្លួនរបស់ប៉ូលិស។ បើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃចន្ទ ទី១០ ខែកក្កដាបានឲ្យដឹងថា ហេតុការណ៍ដ៏ហួសចិត្តនេះបានកើតឡើងនៅក្នុងទីក្រុង Atlanta រដ្ឋ Georgia សហរដ្ឋអាមេរិក។ តាមរយៈវីដេអូដែលថតជាប់ដោយកាមេរ៉ាសុវត្ថិភាពនៅក្នុងហាងធ្វើក្រចកឈ្មោះ Nail First ដែលជាកន្លែងកើតហេតុបានបង្ហាញថា នៅក្នុងហាងនោះមានមនុស្សស្រី ៣នាក់កំពុងអង្គុយនៅលើកៅអី និងមានបុរសម្នាក់កំពុងឈរនៅកន្លែងគិតលុយ។ បន្តិចក្រោយមក ស្រាប់តែមានបុរសម្នាក់ដើរចូលទៅក្នុងហាងដោយដៃម្ខាងបានកាន់កាតាបមួយផងនោះនិងបានស្រែកគំរាមថា គ្រប់គ្នាត្រូវប្រមូលលុយមកឲ្យគាត់។ យ៉ាងណាក្តី មនុស្សគ្រប់គ្នាដែលមានវត្តមាននៅក្នុងបន្ទប់នោះហាក់មិនតក់ស្លុតអ្វីទាល់សោះ​ ខណៈមានស្រ្តីម្នាក់បានលើកដៃនិងដើរចេញទៅក្រៅបន្ទប់។ ដោយគ្មានអ្នកណាខ្លាច និងគ្មានអ្នកនិយាយឆ្លើយឆ្លងជាមួយនោះ បុរសជាចោរក៏បានដើរចេញពីបន្ទាប់វិញយ៉ាងលឿនតែម្តង។

កូរ៉េខាងជើង៖ ទីក្រុងព្យុងយ៉ាងបានធ្វើការថ្តោលទោសចំពោះសហរដ្ឋអាមេរិកយ៉ាងខ្លាំង ក្រោយអាមេរិកបានបញ្ជូននាវាមុជទឹកសម្រាប់បាញ់មីស៊ីលបាលីស្ទិកទៅកាន់ឧបទ្វីបកូរ៉េ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃចន្ទ ទី១០ ខែកក្កដានេះ។ បើតាមទីក្រុងព្យុងយ៉ាងបានអះអាងថា ទង្វើរបស់អាមេរិកបានកំពុងតែជំរុញឲ្យសង្គ្រាមនុយក្លេអ៊ែរជិតកើតឡើងជាការពិតហើយ។ បើតាមអ្នកនាំពាក្យឲ្យរដ្ឋាភិបាលកូរ៉េខាងជើងបានបញ្ជាក់ថា ការបញ្ជូននាវាដែលមានផ្ទុកនូវអាវុធនុយក្លេអ៊ែររបស់អាមេរិកនៅកាន់ឧបទ្វីបកូរ៉េនៅពេលនេះ គឺមានចេតនាចង់បង្កាច់បង្ខូច ឬទម្លាក់កំហុសឲ្យប្រទេសកូរ៉េខាងជើងថា ជាអ្នកបង្កឲ្យមានការគំរាមគំហែងដល់សន្តិសុខពិភពលោកផងដែរ។ អ្នកនាំពាក្យដដែលនេះបានបន្តទៀតថា  ថ្មីៗនេះយន្តហោះដែលជាឈ្លបយកការណ៍របស់អាមេរិកក៏បានហោះកាត់ដែនអាកាសរបស់កូរ៉េខាងជើងនៅត្រង់តំបន់សមុទ្រខាងកើតដោយគ្មានការអនុញ្ញាតផងដែរ ខណៈកូរ៉េខាងជើងមិនធានាថា នឹងគ្មានការបាញ់ទម្លាក់នោះទេ ប្រសិនបើសកម្មភាពដដែលនេះបានកើតឡើងសារជាថ្មីម្តងទៀត៕  អត្ថបទ៖ ភក្តី ប្រភព៖ The Strait Time

ជប៉ុន៖ ព្យុះភ្លៀងដ៏អាក្រក់មួយបានកំពុងតែផ្តល់ការគំរាមគំហែងយ៉ាងខ្លាំងនៅក្នុងតំបន់កោះភាគខាងត្បូងប្រទេសជប៉ុន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃចន្ទ ទី១០ ខែកក្កដានេះ។ ឥទ្ធិពលនៃព្យុះភ្លៀងបានបណ្តាលឲ្យកើតមានបញ្ហាបាក់ស្រុតដីយ៉ាងឆាប់រហ័សជាច្រើនកន្លែង និងបានបំផ្លាញសម្បត្តិសាធារណៈដូចជាអគារ និងស្ពានអស់មួយចំនួនផងដែរ។ បើយោងតាមរបាយការណ៍បឋមរបស់អាជ្ញាធរគ្រប់គ្រងគ្រោះមហន្តរាយជប៉ុនបានបញ្ជាក់ថា ក្នុងអំឡុងពេលបាក់ដីនោះបានបណ្តាលឲ្យស្រ្តីជនជាតិជប៉ុនម្នាក់អាយុជាង ៧០ឆ្នាំ ដែលកំពុងសម្ងំនៅក្នុងផ្ទះរបស់គាត់ក្នុងអាណាខេត្ត Fukuoka ត្រូវស្លាប់បាត់បង់ជីវិតផងដែរ។ នៅចំពោះមុខស្ថានភាពដ៏គ្រោះថ្នាក់នេះ អាជ្ញាធរជប៉ុនបានធ្វើការណែនាំឲ្យពលរដ្ឋខ្លួនរាប់ម៉ឺននាក់ផ្សេងទៀតត្រូវជម្លៀសខ្លួនចេញពីផ្ទះសម្បែងរបស់ពួកគេជាបណ្តោះអាសន្នសិនដើម្បីគេចចេញពីគ្រោះថ្នាក់ផ្សេងៗរហូតដល់ពេលដែលអាកាសធាតុអាចត្រលប់មករកភាពប្រក្រតីឡើងវិញ៕ អត្ថបទ៖ ភក្តី ប្រភព៖ The Strait Time

​សិង្ហបុរី៖ រដ្ឋាភិបាលនៃប្រទេសសិង្ហបុរីបានធ្វើការផ្លាស់ប្តូរដ៏ធំមួយនៅក្នុងការប្រលងថ្នាក់ជាតិ ពោលគឺប្រើប្រាស់ការប្រលងអេឡិចត្រូនិចជំនួសឲ្យការប្រលងបែបបុរាណដែលបេក្ខជនត្រូវប្រើប្រាស់ប៊ិកនិងក្រដាស នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសៅរ៍ ទី៨ ខែកក្កដានេះ។ នៅក្នុងការប្រលងអេឡិចត្រូនិចនេះគឺសិង្ហបុរីនឹងប្រើប្រាស់កុំព្យួទ័រដៃ (Laptop) សម្រាប់ឲ្យបេក្ខជនធ្វើការប្រលងលើគ្រប់វិញ្ញាសាទាំងអស់ រួមទាំងវិញ្ញាសាផ្ទាល់មាត់ផងដែរ។ បើតាមក្រសួងអប់រំសិង្ហបុរីបានបញ្ជាក់ថា  E-exam ឬការប្រលងអេឡិចត្រូនិច គឺជាជម្រើសដ៏ល្អប្រសើរមួយនៅក្នុងពេលបច្ចុប្បន្ននេះ ពោលគឺជាអំឡុងពេលដែលពិភពលោកកំពុងតែព្យាយាមប្រើប្រាស់បច្ចេកវិទ្យាមកជំនួយកម្លាំងពលកម្ម​មនុស្ស។ ការប្រលងអេឡិចត្រូនិចមិនត្រឹមតែផ្តល់ភាពងាយស្រួលសម្រាប់បេក្ខជនប្រលងនោះទេ តែវាក៏ផ្តល់ភាពងាយស្រួលក្នុងការកែវិញ្ញាសាប្រលងផងដែរ ដោយគេនឹងត្រូវការអ្នកកែវិញ្ញាសាក្នុងចំនួនតិច និងត្រូវការពេលវេលាខ្លីជាងការកែវិញ្ញាសានៅលើក្រដាសប្រលង៕ អត្ថបទ៖ ភក្តី ប្រលង៖ The Strait Time

អាមេរិក៖ អង្គការសហប្រជាជាតិ (UN) បានធ្វើការថ្កោលទោសជាថ្មីម្តងទៀតជុំវិញការឈ្លានពានពីសំណាក់កងទ័ពរុស្ស៊ីនៅក្នុងប្រទេសអ៊ុយក្រែន ក្រោយភ្លើងសង្គ្រាមបានអូសបន្លាយអស់រយៈពេល ៥០០ថ្ងៃហើយ និងគ្មានសញ្ញានៃការបិទបញ្ចប់ទាល់តែសោះ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅព្រឹកថ្ងៃសៅរ៍ ទី៨ ខែកក្កដានេះ។ នៅក្នុងរបាយការណ៍របស់បេសកកម្មឃ្លាំមើលសិទ្ធិមនុស្សរបស់អង្គការសហប្រជាជាតិបានបង្ហាញថា គិតត្រឹមពេលនេះភ្លើងសង្គ្រាមបានសម្លាប់ជនស៊ីវិលអស់ជាង​ ៩,០០០នាក់ ខណៈនៅក្នុងនោះក៏មានកុមារប្រមាណជា ៥០០នាក់ផងដែរ។ ប្រភពខាងលើបានបន្តថា ក្រៅតែពីបានសម្លាប់ជនស៊ីវិលអស់ជារាប់ពាន់ហើយ ភ្លើងសង្គ្រាមដែលបានចាប់ផ្តើមពីថ្ងៃទី ២៤ ខែកុម្ភៈ ឆ្នាំ២០២២មក បានបណ្តាលឲ្យខាតបង់សេដ្ឋកិច្ចរបស់ប្រទេសអ៊ុយក្រែនអស់រាប់ពាន់លានដុល្លារ និងបានជះឥទ្ធិអាក្រក់មួយចំនួនទៅកាន់សេដ្ឋកិច្ចពិភពលោកផងដែរ។ សូមបញ្ជាក់ជូនថា ទន្ទឹមនឹងមានការអំពាវនាវឲ្យបិទបញ្ចប់សង្គ្រាមពីសំណាក់អង្គការសហប្រជាជាតិ រដ្ឋាភិបាលអាមេរិកបានផ្តល់ជំនួយយោធានិងជំនួយសេដ្ឋកិច្ចជាបន្តបន្ទាប់ទៅកាន់ប្រទេសអ៊ុយក្រែនសម្រាប់យកទៅប្រើប្រាស់នៅក្នុងសមរភូមិ ខណៈអាមេរិកបានសន្យាថានឹងបន្តគាំទ្រប្រទេសអ៊ុយក្រែនគ្រប់បែបយ៉ាងរហូតដល់ភ្លើងសង្គ្រាមត្រូវបានបិទបញ្ចប់ទាំងស្រុង៕ អត្ថបទ៖ ភក្តី ប្រភព៖ បាងកកប៉ុស្តិ៍  

ស្វីស៖ “ពួកយើងអាចបម្រើពិភពលោកបានល្អប្រសើរជាងមនុស្ស” នេះជាពាក្យសំដីរបស់មនុស្សយន្តដើរដោយបច្ចេកវិទ្យា AI និយាយនៅក្នុងសន្និសិទ្ធរបស់អង្គការសហប្រជាជាតិ ដែលបានរៀបចំឡើងនៅក្នុងទីក្រុងហ្សឺណែវ ប្រទេសស្វីស កាលពីថ្ងៃសុក្រ ទី៧ ខែកក្កដាម្សិលមិញនេះ។ បើយោងតាមការចុះផ្សាយរបស់បណ្តាញសារព័ត៌មាន Channel News Asia បានបញ្ជាក់ថា សន្និសិទ្ធខាងលើនេះមានឈ្មោះថា​ Good Global Summit ដែលមានការចូលរួមពីសំណាក់ក្រុមអ្នកជំនាញក្នុងវិស័យបច្ចេកវិទ្យាមកពីជុំវិញពិភពលោកចំនួន ៣,០០០នាក់។ ប្រភពខាងលើបានបន្តថា គោលបំណងនៃការរៀបចំកិច្ចប្រជុំខាងលើនេះគឺដើម្បីពិភាក្សាអំពីលទ្ធភាព​នៃការទាញយកថាមពលពីបច្ចេកវិទ្យា AI ប្រកបដោយគុណភាពខ្ពស់ និងរបៀបនៃការប្រើប្រាស់បច្ចេកវិទ្យាដ៏ទំនើបនេះក្នុងការបម្រើការងារឲ្យពិភពលោកប្រកបដោយសក្តានុពលខ្ពស់បំផុត។ យ៉ាងណាក្តី ទន្ទឹមនឹងការមើលឃើញពីភាពឆ្លាតវ័យដ៏អស្ចារ្យរបស់បច្ចេកវិទ្យា AI ក្រុមអ្នកជំនាញក៏បានរម្លឹកឲ្យមានការប្រុងប្រយ័ត្នចំពោះការប្រើប្រាស់បញ្ញាសិប្បនិមិ្មត្តនេះផងដែរ ដ្បិតវានៅមិនទាន់មានសមត្ថភាពអាចយល់ពីអារម្មណ៍របស់មនុស្សបាននៅឡើយទេ បើទោះជាវាអាចធ្វើការងារគ្រប់បែបយ៉ាងតាមការកំណត់របស់មនុស្សក៏ដោយ៕ អត្ថបទ៖ ភក្តី ប្រភព៖ Channel News