វៀតណាម៖ រូបភាពមួយសន្លឹកដែលបង្ហាញថា មានស្រ្តីម្នាក់បានអង្គុយ​នៅក្នុងពោងទាំងកំពុងស្លៀកពាក់ឈុតជាក្រមុំកំពុងទទួលបានការចាប់អារម្មណ៍យ៉ាងខ្លាំងនៅក្នុងបណ្តាញសង្គមនៃប្រទេសវៀតណាម។ បើយោងតាមការចុះផ្សាយរបស់បណ្តាញសារព័ត៌មាន The Thaiger បានបញ្ជាក់ថា សកម្មភាពក្នុងរូបភាពមួយសន្លឹកនេះមិនមែនជាការសម្តែងឡើយ តែវាជាទិដ្ឋភាពជាក់ស្តែងក្នុងពិធីមង្គលការ ដែលបានរៀបចំឡើងក្នុងក្រុងមួយស្ថិតនៅភាគខាងត្បូងប្រទេសវៀតណាមកាលពីប៉ុន្មានថ្ងៃមុននេះ។ យ៉ាងណាក្តី អត្តសញ្ញាណរបស់កូនកំលោះនិងកូនក្រមុំ ដែលបានសម្រេចរៀបការទាំងមានទឹកលិចនោះមិនត្រូវបានគេបង្ហាញជាសាធារណៈឡើយ។ ប្រភពខាងលើបានបន្តថា តំបន់ភាគខាងត្បូងប្រទេសវៀតណាមកំពុងទទួលរងសម្ពាធទឹកភ្លៀងយ៉ាងខ្លាំង ដែលបង្កឲ្យមានទឹកជន់លិចតំបន់សំខាន់ៗជាច្រើន រួមទាំងក្នុងទីក្រុងផងដែរ។ ដោយសារតែជំនន់ទឹកភ្លៀងបានជន់លិចឆាប់រហ័សខ្លាំងពេក ទើបគេមិនអាចលុបចោលពិធីមង្គលការខាងលើនេះឲ្យ​បានទាន់ពេលវេលានោះទេ ហើយដើម្បីការពារឈុតកូនក្រមុំកុំឲ្យទទឹកនោះ ការដាក់ឲ្យ​គាត់អង្គុយនៅក្នុងពោងជាជម្រើសល្អបំផុត៕ រូបតំណាង អត្ថបទ៖ ភក្តី ប្រភព៖ The Thaiger

ប៉ាគីស្ថាន៖ ព្យុះមូសុងដ៏កំណាចមួយកំពុងបង្កការគំរាមគំហែងដល់ប្រទេសប៉ាគីស្ថានយ៉ាងខ្លាំង នេះបើយោងតាម​ការចុះផ្សាយរបស់បណ្តាញសារព័ត៌មាន The Strait Time នៅរសៀលថ្ងៃសុក្រ ទី៧ ខែកក្កដានេះ។ ព្យុះដែលបានកើតមានឡើងតាំងពីថ្ងៃទី ២៥ ខែមិថុនាមក បានបង្កឲ្យមានភ្លៀងធ្លាក់ខ្លាំងជាច្រើនថ្ងៃបន្តបន្ទាប់គ្នា​ រហូតធ្វើឲ្យតំបន់ខ្លះត្រូវប្រឈមនឹងបញ្ហាបាក់ស្រុតដីយ៉ាងឆាប់រហ័សនិងបង្កឲ្យមានទឹកជំនន់ផងដែរ។ ប្រភពខាងលើបានបន្តថា បាតុភូតធម្មជាតិដ៏ធ្ងន់ធ្ងរនេះបានបណ្តាលឲ្យមានពលរដ្ឋប៉ាគីស្ថានចំនួន ៥០នាក់បានស្លាប់បាត់បង់ជីវិត បើគិតចាប់តាំងពីថ្ងៃទី ២៥ ខែមិថុនារហូតមកទល់នឹងពេលនេះ។ បើតាមអាជ្ញាធរប៉ាគីស្ថានបានបញ្ជាក់ថា បរិមាណទឹកភ្លៀងដែលបានធ្លាក់ចុះមកក្នុងរយៈពេលប៉ុន្មានសប្តាហ៍ចុងក្រោយនេះ គឺមានទំហំស្មើនឹង ៧០-៨០% នៃបរិមាណទឹកភ្លៀងសរុបប្រចាំឆ្នាំនៅក្នុងប្រទេសប៉ាគីស្ថាន ហើយ​បរិមាណទឹកភ្លៀងនេះគឺគ្រប់គ្រាន់អាចធ្វើការស្រោចស្រពផលដំណាំរបស់ប្រជាកសិករប៉ាគីស្ថានបានប្រមាណជា ២លាននាក់ផងដែរ។ យ៉ាងណាក្តី ដោយសារតែភ្លៀងបានធ្លាក់មកយ៉ាងគំហុកនោះគឺវាមិនបានផ្តល់ផលប្រយោជន៍ដល់ផលដំណាំរបស់ប្រជាពលរដ្ឋនោះទេ៕ អត្ថបទ៖ ភក្តី ប្រភព៖ The Strait Time

ថៃ៖ អាជ្ញាធរក្រុងបាងកកគ្រោងធ្វើបច្ចុប្បន្នភាពក្នុងប្រព័ន្ធការងាររដ្ឋបាលរបស់ខ្លួន​ ដើម្បីពន្លឿនការផ្តល់ជូនសេវាសាធារណៈមួយចំនួនទៅកាន់ប្រជាពលរដ្ឋឲ្យបានឆាប់រហ័សជាងមុន នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅព្រឹកថ្ងៃសុក្រ ទី៧ ខែកក្កដានេះ។ បើតាមរបាយការណ៍របស់អាជ្ញាធរក្រុងបាងកកបានបង្ហាញថា ចាប់តាំងពីខែមករារហូតមកដល់ខែមិថុនានេះ គឺមានពលរដ្ឋចំនួន ៧០,០០០នាក់បានមកស្នើសុំធ្វើអត្តសញ្ញាណប័ណ្ណ និងមានពលរដ្ឋចំនួន ៤០០,០០០នាក់បានមកស្នើសុំសេវាចុះបញ្ជីផ្ទះ។  នៅក្នុងរបាយការណ៍ដដែលនេះបានបង្ហាញទៀតថា ៥២%ក្នុងចំណោមពលរដ្ឋទាំងអស់ខាងលើនេះ បានចំណាយពេលច្រើនជាង ១៥នាទីក្នុងពេលមកសុំសេវាធ្វើអត្តសញ្ញាណប័ណ្ណ ឬចុះបញ្ជីផ្ទះ ហើយពួកគេត្រូវឈរតម្រង់ជួរយ៉ាងយូរនៅក្រៅការិយាល័យរដ្ឋបាលមូលដ្ឋានក្នុងខណ្ឌចំនួន ៥០ផ្សេងគ្នា។ ផ្អែកលើទិន្នន័យក្នុងរបាយការណ៍ខាងលើនេះ អាជ្ញាធរក្រុងបាងកកបានរកឃើញទៀតថា ភាពយឺតយ៉ាវក្នុងការផ្តល់សេវាសាធារណៈទាំងនោះគឺបណ្តាលមកពីខ្វះខាតបច្ចេកវិទ្យាទំនើបក្នុងការបំពេញការងាររបស់មន្ត្រីនៅតាមមូលដ្ឋាន។ តាមផែនការគឺអាជ្ញាធរក្រុងបាងកកនឹងធ្វើបច្ចុប្បន្នភាពក្នុងការងាររដ្ឋបាលគ្រប់ផ្នែកទាំងអស់ ដើម្បីពន្លឿនការផ្តល់សេវាសាធារណៈជូនពលរដ្ឋម្នាក់ៗមិនឲ្យលើសពី ១៥នាទីនោះទេ៕ អត្ថបទ៖ ភក្តី ប្រភព៖ បាងកកប៉ុស្តិ៍

បារាំង៖ សភាបារាំងបានអនុម័តលើច្បាប់លើថ្មីមួយ ដែលអនុញ្ញាតឲ្យប៉ូសិសអាចធ្វើការតាមដានក្រុមជនសង្ស័យតាមរយៈទូរស័ព្ទដៃបាន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃព្រហស្បតិ៍ ទី៦ ខែកក្កដានេះ។ តាមរយៈច្បាប់ថ្មីនេះគឺប៉ូលិសបារាំងអាចធ្វើការតាមដានជនសង្ស័យពីចំងាយបាន​​ ពោលគឺប្រើប្រាស់ GPS នៅក្នុងទូរស័ព្ទដៃ ឬឧបករណ៍អេឡិចត្រូនិចផ្សេងៗផ្ទាល់ខ្លួនរបស់ពួកគាត់តែម្តង។ ប្រភពខាងលើបានបន្តថា ច្បាប់ថ្មីខាងលើនេះក៏បានអនុញ្ញាតឲ្យប៉ូលិសបារាំងអាចប្រើប្រាស់បច្ចេកទំនើបមួយចំនួនផ្សេងទៀតក្នុងការបំបែកសំណុំរឿងឧក្រិដ្ឋកម្មផងដែរ ដូចជាកាមេរ៉ា មីក្រូហ្វូន ឬកម្មវិធីសំខាន់ៗមួយចំនួន ដែលមាននៅក្នុងទូរស័ព្ទដៃរបស់ពួកគាត់។ បើតាមលោក Eric Dupond-Moretti ដែលជារដ្ឋមន្ត្រីក្រសួងយុត្តិធម៌បារាំងបានបញ្ជាក់ថា តាមរយៈច្បាប់ថ្មីនេះនឹងជួយសម្របសម្រួលឲ្យប៉ូលិសបារាំងងាយស្រួលក្នុងការបំបែកសំណុំរឿងឧក្រិដ្ឋកម្មផ្សេងៗប្រកបដោយប្រសិទ្ធភាពខ្ពស់ និងចំណេញពេលវេលាផងដែរ៕ អត្ថបទ៖ ភក្តី ប្រភព៖ The Strait Time  

ចិន៖ យ៉ាងហោចណាស់មានមនុស្សចំនួន ១៥នាក់ត្រូវបានរាយការណ៍ថា បានស្លាប់បាត់បង់ជីវិតក្រោយមានភ្លៀងធ្លាក់យ៉ាងខ្លាំងនៅទីក្រុង Chongqing នៃប្រទេសចិន កាលពីថ្ងៃទីពុធ ទី៥ ខែកក្កដានេះ។ បើយោងតាមរបាយការណ៍ចុងក្រោយមួយរបស់អាជ្ញាធរចិន ដែលត្រូវបានចុះផ្សាយបន្តដោយបណ្តាញសារព័ត៌មាន Channel News Asia បានបញ្ជាក់ថា ក្រៅតែពីបានរកឃើញអ្នកស្លាប់ហើយក៏នៅមានពលរដ្ឋចិនចំនួន ៤នាក់ផ្សេងទៀតកំពុងតែបាត់ខ្លួនផងដែរ។ ប្រភពខាងលើបានបន្តថា ឥទ្ធិពលនៃទឹកភ្លៀងបានបង្កឲ្យមានទឹកជនលិចផ្លូវ​សាធារណៈ និងតំបន់សំខាន់ៗមួយចំនួននៅក្នុងទីក្រុង ហើយក៏បានធ្វើឲ្យខូចខាតអគារ និងផ្ទះមួយចំនួន ខណៈជំនន់ទឹកភ្លៀងកំពុងតែផ្តល់ការរំខានដល់ពលរដ្ឋប្រមាណជា ១៣០,០០០នាក់ផ្សេងទៀតផងដែរ។ បើតាមអាជ្ញាធរចិនបានបញ្ជាក់ថា តំបន់រងគ្រោះខាងលើនេះអាចមានភ្លៀងធ្លាក់ជាច្រើនថ្ងៃបន្ថែមទៀត ខណៈទំហំនៃផលប៉ះពាល់ក៏អាចមានច្រើនជាងនេះបន្ថែមទៀតផងដែរ៕ អត្ថបទ៖ ភក្តី ប្រភព៖ Channel News Asia

អ្នកនាង Coco Lee ដែលជាម្ចាស់បទចម្រៀង “Before I Fall in Love” បានទទួលរមណៈភាពហើយនៅក្នុងវ័យ ៤៨ឆ្នាំ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅយប់ថ្ងៃពុធ ទី៥ ខែកក្កដានេះ។ តារាចម្រៀងនិងជាអ្នកនិពន្ធជនជាតិចិន-អាមេរិករូបនេះធ្លាប់ទទួលបានភាពល្បីល្បាញយ៉ាងខ្លាំងនៅលើពិភពលោកកាលពីអំឡុងឆ្នាំ ២០០០ តែក្រោយមករូបគាត់បានបាត់មុខពីឆាកអន្តរជាតិមួយរយៈ ខណៈបទចម្រៀង “Before I Fall in Love” របស់គាត់នៅតែមានអ្នកស្តាប់ជាញឹកញាប់រហូតមកដល់ពេលបច្ចុប្បន្ននេះ។ ប្រភពខាងលើបានបន្តថា អ្នកនាង Coco Lee បានកើតជំងឺបាក់ទឹកចិត្ត (Depression) ២-៣ឆ្នាំមកហើយ និងបានសម្រេចធ្វើអត្តឃាតខ្លួនឯងកាលពីថ្ងៃទី៣​ខែកក្កដាកន្លងទៅនេះ។

ហូឡង់៖រដ្ឋាភិបាលនៃប្រទេសហូឡង់គ្រោងនឹងធ្វើការហាមឃាត់មិនឲ្យកូនសិស្សយកទូរស័ព្ទទំនើប ថេប្លេត និងនាឡិកាឆ្លាតវៃមកក្នុងថ្នាក់រៀននោះទេ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃពុធ ទី៥ ខែកក្កដានេះ។ គម្រោងនៃការហាមឃាត់នេះត្រូវបានធ្វើឡើង​ក្រោមហេតុផលថា ឧបករណ៍អេឡិចត្រូនិចទាំងនេះបានធ្វើឲ្យប៉ះពាក់ដល់គុណភាពនៃការសិក្សារបស់កូនសិស្ស ដ្បិតពួកគេបានផ្តោតអារម្មណ៍ទៅលើកម្មវិធីកំសាន្តផ្សេងៗក្នុងឧបករណ៍អេឡិចត្រូនិចជាងមេរៀននៅក្នុងថ្នាក់។ បើតាមលោក Robbert Dijkgraaf​ ដែលជារដ្ឋមន្ត្រីក្រសួងអប់រំហូឡង់បានបញ្ជាក់ថា នៅតាមសាលារៀនក្នុងប្រទេសហូឡង់បានបំពាក់នូវសម្ភារៈសិក្សាយ៉ាងសម្បូរបែបរួចទៅហើយសម្រាប់ឲ្យក្រុមកូនសិស្សធ្វើការសិក្សានិងស្រាវជ្រាវ ដូចនេះពួកគេមិនចាំបាច់ត្រូវប្រើប្រាស់ឧបករណ៍ទំនើបៗផ្ទាល់ខ្លួនបន្ថែមទៀតនោះទេសម្រាប់ការសិក្សានៅក្នុងថ្នាក់រៀន។ រដ្ឋម​ន្ត្រីរូបនេះបានបន្តថា តាមការកត់សម្គាល់នៅពេលកន្លងមកគឺនៅពេលដែលក្រុមកូនសិស្សមានឧបករណ៍អេឡិចត្រូនិចទំនើបពេញដៃនោះ ពួកគេតែងចំណាយពេលច្រើនជាមួយការប្រើប្រាស់បណ្តាញសង្គម ហ្គេម និងការកំសាន្តផ្សេងៗ និងសូវយកចិត្តទុកដាក់ក្នុងការសិក្សានោះទេ។ យ៉ាងណាក្តី គម្រោងខាងលើនេះនឹងត្រូវដាក់ឲ្យក្រុមអាណាព្យាបាលរបស់កូនសិស្សពិនិត្យនិងយល់ព្រមជាមុនសិននៅក្នុងខែតុលា ហើយបើគ្មានអ្វីជំទាស់នោះទេគឺរដ្ឋាភិបាលហូឡង់នឹងផ្តើមអនុវត្តវិធានការខាងលើនេះចាប់ពីឆ្នាំ ២០២៤តទៅតែម្តង៕ អត្ថបទ៖ ភក្តី ប្រភព៖ The Strait Time

អាមេរិក៖​ យោងតាមរបាយការណ៍របស់មជ្ឈមណ្ឌលជាតិអាមេរិកសម្រាប់ការព្យាករណ៍បរិស្ថាន ដែលត្រូវបានចុះផ្សាយបន្តដោយបណ្តាញសារព័ត៌មាន Channel News Asia នៅព្រឹកថ្ងៃពុធ ទី៥ ខែកក្កដានេះបានឲ្យដឹងថា សីតុណ្ហភាពនៅលើពិភពលោកទាំងមូលបានកើនឡើងក្នុងកម្រិតដ៏ខ្ពស់មិនធ្លាប់មានកាលពីថ្ងៃចន្ទ ទី៣ ខែកក្កដាកន្លងទៅ។ សីតុណ្ហភាពជាមធ្យមនៅទូទាំងពិភពលោកបានកើនឡើងដល់ ១៧,០១ អង្សាសេ ខណៈកំណត់ត្រាខ្ពស់បំផុតកាលពីឆ្នាំ ២០១៦ គឺពិភពទាំងមូលធ្លាប់ប្រឈមនឹងសីតុណ្ហភាពខ្ពស់បំផុតត្រឹមកម្រិត ១៦,៩២អង្សាសេប៉ុណ្ណោះ។ ក្នុងរបាយការណ៍ខាងលើនេះក៏បានបង្ហាញពីកម្រិតសីតុណ្ហភាពខ្ពស់បំផុតនៅតាមតំបន់ធំៗមួយចំនួននៅជុំវិញពិភពលោកផងដែរ ដូចជានៅតំបន់អាហ្រ្វិកខាងជើងសីតុណ្ហភាពបានកើនឡើងជិតដល់ ៥០អង្សាសេ សីតុណ្ហភាពនៅក្នុងប្រទេសចិនបានកើនឡើងខ្ពស់ជាង ៣៥អង្សាសេ ហើយសូម្បីតែនៅតំបន់ទឹកកកអង់តាក់ទិកក៏សីតុណ្ហភាពបានកើនឡើងដល់ ៨,៧អង្សាសេដែរ ដែលជាសីតុណ្ហភាពកម្រិតខ្ពស់បំផុតមិនធ្លាប់មាននោះទេ។ បើតាមលោក Zeke Hausfather ដែលជាអ្នកវិទ្យាសាស្រ្តនៅក្នុងវិទ្យាស្ថាន Berkeley Earth បានបញ្ជាក់ថា ការកើនឡើងកម្តៅនៅលើភពផែនដីនៅពេលនេះគឺជាសញ្ញាគ្រោះថ្នាក់គួរឲ្យព្រួយបារម្ភមួយសម្រាប់ទាំងមនុស្សជាតិ និងប្រព័ន្ធអេកូឡូស៊ីផងដែរ៕ អត្ថបទ៖

ចិន៖ តើលោកអ្នកហ៊ានចំណាយប្រាក់រហូតដល់ជាង ២០០ដុល្លារដើម្បីទិញមីមកឆុងញ៉ាំនៅផ្ទះដោយខ្លួនឯងដែរឬទេ? ជាទូទៅមនុស្សភាគច្រើនប្រាកដជាមិនហ៊ានចំណាយប្រាក់យ៉ាងច្រើនដូចនេះដើម្បីទិញមីញ៉ាំនោះទេ តែសម្រាប់ពលរដ្ឋចិនមួយចំនួនវិញបានដណ្តើមគ្នាទៅទិញមីកំប៉ុងខ្នាតយក្សមួយប្រភេទដែលមានតម្លៃដ៏ខ្ពស់នេះ។ បើយោងតាមការចុះផ្សាយរបស់បណ្តាញសារព័ត៌មាន The Strait Time បានឲ្យដឹងថា ហេតុការណ៍ដ៏កម្រខាងលើបានកើតឡើងកាលពីដើមសប្តាហ៍នេះនៅក្នុងហាងលក់ទំនិញមួយកន្លែងក្នុងទីក្រុង Shenzhen ភាគខាងត្បូងប្រទេសចិន។ ប្រភពខាងលើបានបន្តថា មីកំប៉ុងខ្នាតយក្សដែលកំពុងផ្ទុះការចាប់អារម្មណ៍យ៉ាងខ្លាំងនៅក្នុងបណ្តាញសង្គមចិននេះជាផលិតផលរបស់ក្រុមហ៊ុន Sam’s Club​ ដែលត្រូវបានផលិតនិងរៀបចំឡើងយ៉ាងកម្រនិងមានចំនួនកំណត់សម្រាប់ធ្វើការដាក់លក់នៅលើទីផ្សារ។ មីកំប៉ុងយក្សត្រូវបានគេរចនាឡើងដោយមានកម្ពស់ ៤៥សង់ទីម៉ែត្រ ខណៈនៅក្នុងនោះមានផ្ទុកមីកំប៉ុងខ្នាតធម្មតាចំនួន ២៤កំប៉ុងនិងមានរសជាតិពិសេសផ្សេងៗគ្នា។ សម្រាប់តម្លៃរបស់មីកំប៉ុងយក្សវិញគឺមួយកំប៉ុងមានតម្លៃ ១,៩៩៩យន់ (២៧៧ដុល្លារ) ហើយនៅក្នុងថ្ងៃដាក់លក់នោះគេបានប្រទះឃើញមានពលរដ្ឋចិនជាច្រើនបានឈរតម្រង់ជួរគ្នាដើម្បីចូលទិញមីនៅក្នុងហាង ខណៈមីកំប៉ុងយក្សដែលមានចំនួនកំណត់ត្រឹមតែ ៥០កំប៉ុងនោះ ដែលត្រូវបានលក់ដាច់អស់ក្នុងរយៈពេលត្រឹមតែ ១៥នាទីប៉ុណ្ណោះ៕ អត្ថបទ៖ ភក្តី ប្រភព៖ The Strait Time

វៀតណាម៖កសិករវៀតណាមមួយចំនួនបានសម្រេចទៅធ្វើស្រែនៅពេលមេឃងងឹតវិញម្តង ក្រោយសីតុណ្ហភាពនៅពេលថ្ងៃបានកើនឡើងក្នុងកម្រិតដ៏ខ្ពស់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time។ ការផ្លាស់ប្តូរពេលវេលានៃការធ្វើស្រែនេះត្រូវបានគេប្រទះឃើញកំពុងកើតមានចំពោះក្រុមប្រជាកសិករ ដែលកំពុងរស់នៅក្នុងតំបន់ភាគខាងជើង និងភាគកណ្តាលនៃប្រទេសវៀតណាម ខណៈនៅពេលថ្ងៃតំបន់ទាំងនោះត្រូវប្រឈមនឹងសីតុណ្ហភាពខ្ពស់ជាង ៣៧អង្សាសេសម្រាប់រដូវក្តៅក្នុងឆ្នាំ ២០២៣នេះ។ កសិករវៀតណាមម្នាក់គឺលោក Tran Thi Lan អាយុ ៤៧ឆ្នាំបានប្រាប់ឲ្យដឹងថា​ ដើម្បីអាចគេចផុតពីរលកកម្តៅ និងអាចរក្សាទិន្នផលស្រូវរបស់គាត់ឲ្យដូចរាល់ឆ្នាំបាននោះ គាត់បានក្រោកទៅធ្វើស្រែតាំងតែពីម៉ោង ៣ព្រឹក ហើយឈប់សម្រាកនៅពេលថ្ងៃរះខ្លាំង និងត្រលប់ទៅស្រែម្តងទៀតនៅពេលល្ងាច។ ស្រដៀងគ្នានេះដែរ អ្នកស្រី Nguyen Hung Phuong អាយុ ៦២ឆ្នាំបានរៀបរាប់ថា មួយរយៈនេះក្រុមគ្រួសាររបស់តែងក្រោកទៅធ្វើស្រែនៅម៉ោង ៤ព្រឹក ហើយឈប់សម្រាកនៅម៉ោង ៩ព្រឹក និងត្រលប់ទៅស្រែម្តងទៀតនៅម៉ោង