ឥណ្ឌូណេស៊ី៖ យ៉ាងហោចណាស់មានមនុស្សចំនួន ៨នាក់ ដែលពាក់ព័ន្ធនឹងការធ្វើបាតុកម្មនៅឥណ្ឌូណេស៊ីត្រូវបានរាយការណ៍ថា បានស្លាប់បាត់បង់ជីវិត នេះបើយោងតាមការចុះផ្សាយរបស់បណ្តាញសារព័ត៌មាន South China Morning Post នៅក្នុងរសៀលថ្ងៃទី២ ខែកញ្ញា។ ជាមួយគ្នានេះ ក៏មានមនុស្សចំនួន ២០នាក់ផ្សេងទៀតកំពុងតែបាត់ខ្លួនផងដែរ។ ដោយឡែកចំពោះក្រុមបាតុករ ដែលត្រូវបានប៉ូលិសចាប់ខ្លួនវិញគឺមានប្រមាណជា ១,២៤០នាក់ ខណៈចលនាធ្វើបាតុកម្មរបស់ប្រជាពលរដ្ឋនៅមិនទាន់ថយចុះនៅឡើយទេ។ សូមបញ្ជាក់ជូនថា បាតុកម្មហិង្សាប្រឆាំងនឹងប៉ូលិសឥណ្ឌូណេស៊ីផ្តើមកើតឡើងតាំងតែពីថ្ងៃទី ២៥ខែសីហាម្លេះ ហើយបាតុកម្មបានកើតឡើងក្រោយមានករណីប៉ូលិសបើករថយន្តបុកអ្នករត់ម៉ូតូឌុបម្នាក់​ស្លាប់ និងស្របពេលដែលប្រជាពលរដ្ឋនៅទីក្រុងហ្សារតាកាខឹងនឹងរដ្ឋាភិបាល ដែលបានសម្រេចផ្តល់ប្រាក់ឧបត្ថម្ភ​ ចំនួន​ ៥០លាន​រូពី (៣, ០៣៤ ដុល្លារ) សម្រាប់​ឱ្យ​សមាជិកសភា​​ក្រុមប្រឹក្សា​ក្រុង​ជួល​ផ្ទះស្នាក់នៅ ខណៈប្រាក់ឧបត្ថម្ភ​នេះគឺស្មើនឹងប្រហែល ១០ដង​ នៃប្រាក់​ខែ​អប្បរមារបស់ប្រជាពលរដ្ឋនៅក្នុងទីក្រុងហ្សារតាកា៕

វៀតណាម៖ ប្រទេសវៀតណាមនៅក្នុងថ្ងៃទី២ ខែកញ្ញា បានប្រារព្ធទិវាបុណ្យឯករាជ្យជាតិ ដោយមានការរៀបចំក្បួនព្យុហយាត្រាយោធាទ្រង់ទ្រាយធំបំផុតមួយ នេះបើយោងតាមការចុះផ្សាយរបស់បណ្តាញសារព័ត៌មាន VN Express។ គួរកត់សម្គាល់ថា ទិវាបុណ្យឯករាជ្យជាតិនៅក្នុងឆ្នាំ២០២៥នេះ គឺជាខួបលើក៨០ ដែលវៀតណាមបានប្រកាសឯករាជ្យរបស់ខ្លួនពីនឹមអាណានិគមបារាំង។ ប្រភពខាងលើបានបន្តថា នៅក្នុងក្បួនព្យុហយាត្រាយោធាខាងលើនេះ វៀតណាមបានបង្ហាញអាវុធទំនើបៗរបស់ខ្លួនជាច្រើន ដោយនៅក្នុងនោះរួមមានរថក្រោះ មីស៊ីល ឧទ្ធម្ភាគចក្រ និងយន្ដហោះចម្បាំង និងមានការចូលរួមពីសំណាក់ទាហានវៀតណាមរាប់ពាន់នាក់ និងយោធាមកពីចិន រុស្ស៉ី រួមទាំងបណ្ដាប្រទេស ដែលជាសម្ព័ន្ធមិត្តមួយចំនួនទៀតផងដែរ។ ជាមួយគ្នានេះ នៅតាមដងផ្លូវក្នុងរដ្ឋធានីហាណូយ មានមនុស្សរាប់ម៉ឺននាក់បានប្រមូលផ្ដុំគ្នា ហើយភាគច្រើននៃពួកគេបានពាក់អាវយឺតពណ៌ក្រហម និងកាន់ទង់ជាតិវៀតណាម ដែលជាការបង្ហាញពីស្មារតីជាតិនិយម៕ អត្ថបទ៖ ភក្តី ប្រភព៖

ស៊ូដង់៖ ព្យុះភ្លៀង និងការបាក់ដី បានវាយប្រហារភូមិមួយនៅតំបន់ភ្នំ Marra ដែលស្ថិតនៅប៉ែកខាងលិចប្រទេសស៊ូដង់យ៉ាង​ធ្ងន់ធ្ងរ និងបានបណ្តាលឱ្យមនុស្សស្លាប់អស់ជាច្រើននាក់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២ ខែកញ្ញា។ គិតត្រឹមពេលនេះតួលេខអ្នកស្លាប់មានយ៉ាងតិចណាស់គឺជាង ១,០០០នាក់។ ប្រភពខាងលើបានបន្តថា គិតត្រឹមពេលនេះប្រតិប​ត្តិការណ៍ស្វែងរកនិងជួយសង្គ្រោះជនរងគ្រោះនៅមិនទាន់បិទបញ្ចប់នៅឡើយទេ ខណៈតួលេខអ្នកស្លាប់អាចបន្តកើនឡើងបន្ថែមទៀតផងដែរ។ បើតាមលោក Abdelwahid Mohamed Nour ដែលជាប្រធានដឹកនាំនៅតំបន់កើតហេតុខាងលើបានឱ្យដឹងថា នេះគឺជាគ្រោះធម្មជាតិដ៏ធ្ងន់ធ្ងរបំផុត ដែលមិនធ្លាប់កើតមាននោះទេក្នុងរយៈពេលជាច្រើនឆ្នាំចុងក្រោយនេះ៕ អត្ថបទ៖ ភក្តី ប្រភព៖The Strait Time

អាហ្វហ្គានីស្ថាន៖ តួលេខអ្នកស្លាប់បាត់បង់ជីវិតដោយសារការរញ្ជួយដីនៅក្នុងប្រទេសអាហ្វហ្គានីស្ថាន បានកើនឡើងដល់ជាង ៨០០នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងរសៀលថ្ងៃទី ១ ខែកញ្ញា។ ដោយឡែកចំនួនអ្នករងរបួសវិញគឺបានកើនឡើងជាង ២,៨០០នាក់។ សូមបញ្ជាក់ជូនថា គ្រោះរញ្ជួយដីបានកើតឡើងនៅក្នុងកម្រិត ៦រ៉ិចទ័រ ហើយទីតាំងដែលបានរងការវាយប្រហារពីគ្រោះធម្មជាតិនេះគឺខេត្ត Kunar និងខេត្ត Nangarhar​ ដែលស្ថិតនៅភាគខាងលិច នៃប្រទេសអាហ្វហ្គានីស្ថាន។ រហូតមកទល់នឹងពេលនេះប្រតិបត្តិការណ៍ស្វែករកជននៅក្រោមគំនរបាក់បែកនៅមិនទាន់បិទបញ្ចប់នៅឡើយទេ ហើយតួលេខអ្នកស្លាប់និងអ្នករងរបួសក៏អាចបន្តកើនឡើងបន្ថែមទៀតផងដែរ៕ អត្ថបទ៖ ភក្តី ប្រភព៖ The Strait Time

ថៃ៖ លោក Rueangkrai Leekitwattana ដែលជាអតីតសមាជិកព្រឹទ្ធសភាថៃម្នាក់ បានដាក់ញត្តិទៅកាន់គណៈកម្មការរៀបចំការបោះឆ្នោត ដើម្បីស្នើសុំឱ្យមានការរំលាយគណបក្សភឿថៃរបស់លោកស្រី Paetongtarn Shinawatra នេះបើយោងតាមការចុះផ្សាយរបស់បណ្តាញសារព័ត៌មាន Nation Thailand នៅក្នុងថ្ងៃទី ១ ខែកញ្ញា។ អតីតសមាជិកព្រឹទ្ធសភារូបនេះបានបញ្ជាក់ថា ការរំលាយគណបក្សភឿថៃអាចធ្វើទៅបានរយៈសាលក្រមរបស់តុលាការធម្មនុញ្ញថៃ ដែលបានសម្រេចដកតំណែងនាយករដ្ឋមន្ត្រីថៃរបស់លោកស្រី Paetongtarn Shinawatra នាពេលកន្លងមក។  លោក Rueangkrai Leekitwattana បានបន្តថា នៅក្នុងសាលក្រមរបស់តុលាការធម្មនុញ្ញមានចំណុចមួយ ដែលប្រហែលជាអាចពាក់ព័ន្ធទៅនឹងសកម្មភាពរបស់លោកស្រី Paetongtarn ក្នុងនាមជាមេដឹកនាំបក្សភឿថៃ ហើយចំណុចនោះក៏អាចចាត់ទុកថា សកម្មកម្មភាពរបស់លោកស្រី  Paetongtarn Shinawatra គឺជាការបំពានទៅនឹងច្បាប់ស្ដីពីគណបក្សនយោបាយឆ្នាំ ដែលបានបង្កើតឡើងនៅក្នុងឆ្នាំ២០១៧ ផងដែរ។ គួរកត់សម្គាល់ថា គណៈកម្មការរៀបចំការបោះឆ្នោតថៃមិនមានសិទ្ធិក្នុងការរំលាយគណបក្សនយោបាយណាមួយឡើយ តែគណៈកម្មការនេះអាចដាក់ញត្តិទាមទារឱ្យតុលាការធម្មនុញ្ញចេញសាលក្រមរំលាយគណបក្សភឿថៃបាន៕

អាហ្វហ្គានីស្ថាន៖យ៉ាងហោចណាស់មានមនុស្សចំនួន ២០នាក់បានស្លាប់បាត់បង់បង់ជីវិតដោយសារការរញ្ជួយដីនៅក្នុងប្រទេសអាហ្វហ្គានីស្ថាន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃចន្ទ ទី១ ខែកញ្ញា។ ទីតាំងដែលបានរងការវាយប្រហារពីគ្រោះធម្មជាតិនេះគឺខេត្ត Kunar និង ខេត្ត Nangarhar​ ដែលស្ថិតនៅភាគខាងលិច នៃប្រទេសអាហ្វហ្គានីស្ថាន។ បើតាមអាជ្ញាធរអាហ្វហ្គានីស្ថានបានឱ្យដឹង គ្រោះរញ្ជួយដីបានកើតឡើងនៅក្នុងកម្រិត ៦ រ៉ិចទ័រ ហើយក្រៅតែពីបានបណ្តាលឱ្យមានមនុស្សស្លាប់ភ្លាមៗ គ្រោះរញ្ជួយដីក៏បានបណ្តាលឱ្យមនុស្សជាង ១០០នាក់ផ្សេងទៀតបានរងរបួសធ្ងន់និងស្រាលផងដែរ។ គិតត្រឹមពេលនេះប្រតិបត្តិការណ៍ស្វែងរកជនរងគ្រោះនៅក្រោមគំនរបាក់បែកនៅមិនទាន់បិទបញ្ចប់នៅឡើយទេ ខណៈអាជ្ញាធរអាហ្វហ្គានីស្ថាននៅមិនទាន់អាចបញ្ជាក់ថា មានអ្នកកំពុងបាត់ខ្លួនប៉ុន្មាននាក់នោះទេ៕ អត្ថបទ៖ ភក្តី ប្រភព៖  The Strait Time

កូរ៉េខាងត្បូង៖ ចំនួនគ្រួសារដែលមានសមាជិកតែម្នាក់ (Single-person Household) នៅក្នុងប្រទេសកូរ៉េខាងត្បូងបានកើនឡើងជាង ១០លានគ្រួសារ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី៣០ ខែសីហា។ ការកើនឡើងចំនួនគ្រួសារដែលមានសមាជិកតែម្នាក់ជាង ១០លានករណីនេះ គឺជាកំណត់ត្រាលើកដំបូងសម្រាប់ប្រទេសកូរ៉េខាងត្បូងផងដែរ។ ប្រភពខាងលើបានបន្តថា បើធ្វើការរប្រៀបធៀបតួលេខគ្រួសារដែលមានសមាជិកតែម្នាក់ខាងលើនេះទៅនឹងតួលេខនៅក្នុងឆ្នាំ២០២០ គឺវាបានកើតឡើងចំនួន ២,៨%  ពោលគឺកើនឡើងពីចំនួនជាង ៩លានគ្រួសារមកដល់ ១០,១លានគ្រួសារ ដោយគិតត្រឹមថ្ងៃទី ៣១ ខែធ្នូ ឆ្នាំ២០២៤។ សូមបញ្ជាក់ជូនថា ស្របពេលនៃការចេញផ្សាយរបាយការណ៍ខាងលើ អាជ្ញាធរកូរ៉េខាងត្បូងក៏បានរកឃើញពីធ្លាក់ចុះនៃចំនួនពលរដ្ឋជាទូទៅផងដែរ ពោលគឺចំនួនពលរដ្ឋកូរ៉េខាងត្បូងបានធ្លាក់ចុះពី ៥១,៨លានាក់នៅក្នុងឆ្នាំ ២០២០ មកដល់ត្រឹម ៥១,២លាននាក់ដោយគិតត្រឹមចុងឆ្នាំ២០២៤៕

កូរ៉េខាងត្បូង៖ តុលាការកូរ៉េខាងត្បូងសម្រេចផ្តន្ទាទោសបុរសម្នាក់ឱ្យជាប់ពន្ធនាគាររយៈពេល ១ឆ្នាំ ក្រោយរូបគាត់បានទាត់ពលករស្រីម្នាក់ទាំងកម្រោល  នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី ៣០ ខែសីហា។ បុរសរូបនេះគឺជាពលរដ្ឋកូរ៉េខាងត្បូង មានអាយុជាង ៤០ឆ្នាំ និងជាអ្នកគ្រប់គ្រងនៅក្នុងរោងចក្រចំណីអាហារមួយកន្លែងនៅក្នុងខេត្ត Gyeonggi នៃប្រទេសកូរ៉េខាងត្បូង។ ដោយឡែកជនរងគ្រោះគឺជាពលករជនជាតិវៀតណាម ភេទស្រី មានអាយុជាង ២០ឆ្នាំ ដែលបានបានទៅធ្វើការងារនៅក្នុងរោងចក្រខាងលើនេះអស់រយៈពេលជាច្រើនឆ្នាំមកហើយ។ ប្រភពខាងលើបានបន្តថា ករណីហិង្សានេះបានកើតឡើងកាលពីថ្ងៃទី ១៩ ខែឧសភា ដោយជនបង្កហេតុបានទាត់ស្ត្រីជនរងគ្រោះជាច្រើនជើង និងបង្កឱ្យគាត់មានស្នាមជាំពេញខ្លួននិងត្រូវសម្រាកព្យាបាលអស់រយៈពេល ២សប្តាហ៍។ នៅស្ថានីយ៍ប៉ូលិស ជនបង្កហេតុបានសារភាពគាត់ពិតជាបានប្រើអំពើហិង្សាទៅកាន់ស្រ្តីជាជនរងគ្រោះពិតមែន ហើយអំពើហិង្សានោះបានកើតឡើងដោយសារតែ ស្រ្តីជាជនរងគ្រោះមិនគោរពគាត់ក្នុងនាមជាអ្នកគ្រប់គ្រង៕ អត្ថបទ៖ ភក្តី

អាមេរិក៖ តុលាការឧទ្ធរណ៍អាមេរិកបានរកឃើញថា ការដំឡើងពន្ធគយភាគច្រើនរបស់លោកប្រធានាធិបតី ដូណាល់ ត្រាំ ត្រូវបានធ្វើឡើងដោយមិនស្របច្បាប់នោះទេ នេះបើយោងតាមការចុះផ្សាយរបស់បណ្តាញសារព័ត៌មាន​ The Strait Time នៅក្នុងថ្ងៃទី៣០ ខែសីហា។ យ៉ាងណាក្តី តុលាការនឹងអនុញ្ញាតឱ្យច្បាប់ដំឡើងពន្ធគយទាំងអស់នោះនៅបន្តអនុវត្តរហូតដល់ថ្ងៃទី ១៤ ខែតុលា ដើម្បីផ្តល់ឱកាសឱ្យរដ្ឋបាល លោក ដូណាល់ ត្រាំ ដាក់បណ្តឹងឧទ្ធរណ៍ទៅកាន់តុលាការកំពូល។ ឆ្លើយតបនឹងការចោទប្រកាន់ខាងលើនេះ លោក ដូណាល ត្រាំ អះអាងថា សេចក្តីសម្រេចសរបស់តុលការឧទ្ធរណ៍អាមេរិកគឺមិនត្រូវត្រឹមនោះទេ ហើយលោកនឹងដាក់ពាក្យបណ្តឹងទៅកាន់តុលាការកំពូល ដើម្បីប្រឆាំងនឹងសេចក្តីសម្រេចខាងលើនេះ និងបន្តការពារច្បាប់ដំឡើងពន្ធគយរបស់លោកគាត់។ លោក ដូណាល់ ត្រាំ បានបន្តថា

ឥណ្ឌា៖ យ៉ាងហោចណាស់មានពលរដ្ឋឥណ្ឌាចំ​នួន ៣០នាក់បានស្លាប់បាត់បង់ជីវិតដោយសារទឹកជំនន់ដ៏ឆាប់រហ័សមួយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី២៧ ខែសីហា។ ទីតាំងដែលកំពុងរងការវាយប្រហារដោយគ្រោះធម្មជាតិនេះ គឺក្រុង Jammu ដែលស្ថិតនៅតំបន់ប៉ែកខាងជើង នៃប្រទេសឥណ្ឌា។ បើតាមលោក Omar Abdullah រដ្ឋមន្រ្ដីក្រសួងដែនដី​​ នៃប្រទេសឥណ្ឌាបានឱ្យដឹងថា ទឹកជំនន់ខាងលើនេះគឺជាជំនន់ទឹកភ្លៀង ដែលបានកើតឡើងយ៉ាងឆាប់រហ័ស ក្រោយក្រុង Jammu បានទទួលរងសម្ពាធទឹកភ្លៀងធ្លាក់ក្នុងបរិមាណយ៉ាងច្រើន និងជាច្រើនថ្ងៃជាប់ៗគ្នា។ គួររម្លឹកជូនថា កាលពីសប្តាហ៍មុនតំបន់ Ladakh របស់ប្រទេសឥណ្ឌា ដែលជាដែនដីនៅព្រំដែនប្រទេសនិងនៅជិតជួរភ្នំហិមាល័យនោះក៏បានរងការវាយប្រហារដោយជំនន់ទឹកភ្លៀងដែរ ដោយពេលនោះបានបណ្តាលឱ្យមានអ្នកស្លាប់ចំនួន ៦០នាក់ និងបាត់ខ្លួន ២០០នាក់ផងដែរ៕ អត្ថបទ៖ ភក្តី ប្រភព៖ The