វៀតណាម៖ យ៉ាងយោចមានមនុស្សចំនួន ៣នាក់បានស្លាប់បាត់បង់ជីវិតដោយសារតែឥទ្ធិពលរបស់ព្យុះទីហ្វុង Kajiki នៅតំបន់ភាគខាងត្បូង នៃប្រទេសវៀតណាម នេះបើយោងតាមការចុះផ្សាយរបស់បណ្តាញសារព័ត៌មាន VN Express នៅក្នុងថ្ងៃទី២៦ ខែសីហា។ ក្រៅតែពីបានបណ្តាល​ឱ្យមានមនុស្សត្រូវស្លាប់បាត់បង់ជីវិតហើយ ឥទ្ធិអាក្រក់របស់គ្រោះធម្មជាតិនេះក៏បានបណ្តាលពលរដ្ឋវៀតណាមចំនួន ១៣នាក់ផ្សេងទៀតបានរងរបួសធ្ងន់និងស្រាលផងដែរ។ បើតាមអាជ្ញាធរវៀតណាមបានបញ្ជាក់ថា ព្យុះទីហ្វុង Kajiki មិនត្រឹមតែបានបង្កគ្រោះថ្នាក់មនុស្សប៉ុណ្ណោះទេ តែវាក៏បានបំផ្លាញផ្ទះរបស់ប្រជាពលរដ្ឋអស់ប្រមាណជា ៦,៨០០ខ្នង បំផ្លាញផ្ទៃដីកសិកម្មរបស់ប្រជាកសិករអស់ជាច្រើនពាន់ហិចតា​ ការដឹកជញ្ជូនតាមផ្លូវគោកមួយចំនួនត្រូវបានផ្អាក ជើងហោះហើរចំនួន ៣៣ជើងត្រូវប្តូផ្លូវហោះហើរជាប​ន្ទាន់ ខណៈជើងហោះហើរចំនួន ៣៥ជើងត្រូវលុបចោលទាំងស្រុងតែម្តង។ ប្រភពខាងលើបានបន្តថា គិតត្រឹមពេលនេះឥទ្ធិពលរបស់ព្យុះទីហ្វុង Kajiki ក៏បានធ្វើឱ្យពលរដ្ឋជាង ១,៦លាននាក់កំពុងរស់នៅដោយគ្មានភ្លើងអគ្គិសនីប្រើប្រាស់ផងដែរ៕ អត្ថបទ៖ភក្តី ប្រភព៖ VN Express

អង់គ្លេស៖ យ៉ាងហោចណាស់មានមនុស្សចំនួន ៣នាក់បានស្លាប់បាត់បង់ជីវិតនៅក្នុងហេតុការណ៍ធ្លាក់ឧទ្ធម្ភាគចក្រមួយគ្រឿងនៅលើកោះ Isle of Wight ភាគខាងត្បូង​ នៃប្រទេសអង់គ្លេស នេះបើយោងតាមការចុះផ្សាយរបស់បណ្តាញសារព័ត៌មាន Reuters កាលពីយប់ថ្ងៃទី ២៥ ខែសីហា។ ក្រៅតែពីបានបណ្តាលឱ្យមានអ្នកស្លាប់ភ្លាមៗនៅកន្លែងកើតហេតុហើយ ក៏នៅមានមនុស្សម្នាក់ផ្សេងទៀតបានរបួសធ្ងន់ផងដែរ។ ប្រភពខាងលើបានបន្តថា​ ឧទ្ធម្ភាគចក្រដែលបានធ្លាក់នោះគឺជាឧទ្ធម្ភាគចក្រប្រភេទ G-OCLV ស្ថិតនៅក្រោមការគ្រប់គ្រងរបស់ក្រុមហ៊ុន Northumbria ហើយការធ្លាក់នេះបានកើតឡើងក្នុងអំឡុងពេលពេលនេះនៃការរៀនបើកបរឧទ្ធម្ភាគចក្រ។ រហូតមកទល់នឹងពេលនេះអាជ្ញាធរអង់គ្លេសនៅមិនទាន់អាចបញ្ជាក់អំពីមូលហេតុបច្ចេកទេសជាក់លាក់ ដែលបណ្តាលឱ្យឧទ្ធម្ភាគចក្រត្រូវធ្លាក់នៅឡើយទេ ហើយអត្តសញ្ញាណជនរងគ្រោះដែលបានស្លាប់និងរបួសក៏នៅមិនទាន់មានការផ្សព្វផ្សាយជាសាធារណៈដែរ៕ អត្ថបទ៖ ភក្តី ប្រភព៖  Reuters

ស៊ុយអែត៖ ប្រទេសស៊ុយអែតបានយល់ព្រមលក់យន្តហោះចម្បាំង Gripen ចំនួន ៤គ្រឿងឱ្យទៅប្រទេសថៃ នេះបើយោងតាមការចុះផ្សាយរបស់បណ្តាញសារព័ត៌មាន Reuters កាលពីយប់ថ្ងៃទី ២៥ ខែសីហា។ នៅក្នុងចំណោមយន្តហោះចម្បាំង Gripen ទាំង ៤គ្រឿងនោះរួមមានយន្តហោះចម្បាំង Gripen E ចំនួន ៣គ្រឿង និងយន្តហោះចម្បាំង Gripen F ចំនួន ១គ្រឿង ខណៈគិតត្រឹមពេលនេះប្រទេសថៃមានយន្តហោះចម្បាំង Gripen C/D ចំនួន ១គ្រឿងរួចហើយ។ ប្រភពខាងលើបានបន្តថា​ យន្តហោះចម្បាំង Gripen ទាំង ៤គ្រឿងខាលើនេះត្រូវបានផលិតឡើងដោយក្រុមហ៊ុនមានឈ្មោះថា  Saab និងមានតម្លៃសរុបចំនួន ៥,៣ពាន់លានក្រោន (ប្រហែល ៥៥៦លានដុល្លារអាមេរិក)។ បើតាមលោក Mikael Granholm ដែលជាអគ្គនាយក

វៀតណាម៖ ប្រទេសវៀតណាមគ្រោងធ្វើការជម្លៀសពលរដ្ឋជាង ៥៨៦,០០០នាក់ ដោយសារតែឥទ្ធិពលរបស់ព្យុះទីហ្វុង Kajiki នេះបើយោងតាមការចុះផ្សាយរបស់បណ្តាញសារព័ត៌មាន The Strait Time កាលពីយប់ថ្ងៃទី ២៤ ខែសីហា។ គិតត្រឹមពេលព្យុះបានធ្វើដំណើរមកទល់ទីក្រុង Sanya របស់ប្រទេសចិនហើយ ខណៈព្យុះនឹងបន្តបោកបក់ក្នុងល្បឿនយ៉ាងលឿនទៅកាន់ក្រុង Thanh Hoa ក្រុង Quang Tri ក្រុង Hue និងក្រុង Danang​ ភាគខាងត្បូងនៃប្រទេសវៀតណាម។ ប្រភពខាងលើបានបន្តថា នៅចំពោះមុខការទាញសញ្ញាអាសន្ននេះ ក្រុមហ៊ុនអាកាសចរណ៍វៀតណាមជាច្រើនក៏បានសម្រេចលុបចោលនិងពន្យាពេលជើងហោះហើរផងដែរ តួយ៉ាងក្រុមហ៊ុន Vietnam Airlines បានសម្រេចលុបចោលជើងហើរចំនួន ២២ជើងជាបន្ទាន់ ខណៈក្រុមហ៊ុន Vietjet Aviation ក៏បានសម្រេចលុបចោលជើងហោះហើរយ៉ាងច្រើនផងដែរ។

ជប៉ុន៖ ទីក្រុង Toyoake របស់ប្រទេសជប៉ុន គ្រោងជំរុញឱ្យប្រជាពលរដ្ឋប្រើប្រាស់ទូរស័ព្ទសម្រាប់ជាការកម្សាន្តមិនលើសពីរយៈពេល ២ម៉ោងក្នុងមួយថ្ងៃ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia។  គម្រោងខាងលើនេះត្រូវបានផ្តួចផ្តើមធ្វើឡើងក្នុងគោលបំណងលើកកម្ពស់សុខភាពទូទៅរបស់ប្រជាពលរដ្ឋ ក៏ដូចជាជួយទប់ស្កាត់ពួកគេមិនឱ្យមានជំងឺញៀននឹងទូរស័ព្ទផងដែរ។ បើតាមលោក Masafumi Koki ដែលជាអភិបាលក្រុង​ Toyoake បានលើកឡើងថា ការសម្លឹងមើលអេក្រង់ទូរស័ព្ទយូរខ្លាំងពេល គឺវានឹងបណ្តាលឱ្យកើតមានបញ្ហាសុខភាពជាច្រើនដូចជា គេងមិនលក់ ស្ត្រេស មានបញ្ហាផ្លូវចិត្ត បញ្ហាភ្នែកស្ងួត និងបញ្ហាសុខភាពរាងកាយទូទៅមួយចំនួនផងដែរ។ យ៉ាងណាក្តី អភិបាលក្រុងរូបនេះបានបញ្ជាក់ថា​ គម្រោងកំណត់រយៈពេលប្រើប្រាស់ទូរស័ព្ទខាងលើនេះមិនមែនជាច្បាប់ដែលមានការពិន័យធ្ងន់ធ្ងរនោះទេ តែវាគឺយន្តការលើកទឹកចិត្តឱ្យពលរដ្ឋកាត់បន្ថយរយៈពេលនៃការប្រើប្រាស់ទូរស័ព្ទបន្ទាប់ពីពួកគេបញ្ចប់ការងារ ឬការសិក្សាជាដើម។ យន្តការនេះអាចនឹងអនុវត្តក្នុងទម្រង់ជាការកំណត់ពេលនៃការប្រើប្រាស់របស់ប្រជាពលរដ្ឋតាមស្ថានភាពរស់នៅជាក់ស្តែងរបស់ពួកគេម្នាក់ៗ ឧទាហរណ៍ដូចជាក្មេងនៅកម្រិតបឋមសិក្សានឹងត្រូវកំណត់មិនឱ្យប្រើទូរស័ព្ទក្រោយម៉ោង ៩យប់ ហើយសិស្សនៅកម្រិតអនុវិទ្យាល័យនឹងត្រូវកំណត់មិនឱ្យប្រើទូរស័ព្ទក្រោយម៉ោង ១០យប់ជាដើម៕ អត្ថបទ៖

ម៉ាឡេស៊ី៖ ប្រទេសម៉ាឡេស៊ីនៅក្នុងថ្ងៃអាទិត្យ ទី២៤ ខែសីហា បានទទួលរងការវាយប្រហារដោយគ្រោះរញ្ជួយដីកម្រិតស្រាលរហូតដល់ទៅ ២ដង នេះបើយោងតាមការចុះផ្សាយរបស់បណ្តាញសារព័ត៌មាន​ The Strait Time។ នៅក្នុងចំណោមគ្រោះរញ្ជួយដីទាំង ២ដងនោះ គឺគ្រោះរញ្ជួយដីទី ១បានកើតឡើងនៅក្នុងកម្រិត ៤,១ រ៉ិចទ័រ និងបានកើតឡើងនៅក្នុងរដ្ឋ​ Johor នៅម៉ោង ៦ និង ១៣នាទីព្រឹក។ បន្ទាន់ម៉ោងក្រោយមក ពោលគឺនៅម៉ោងប្រហែល ៩ព្រឹក ទីតាំងដដែលនេះក៏បានកើតមានគ្រោះរញ្ជួយដីមួយបន្ថែមទៀត ដែលបានកើតឡើងនៅក្នុងកម្រិតត្រឹមតែ ២,៨ រ៉ិចទ័រប៉ុណ្ណោះ។ រហូតមកទល់នឹងពេលនេះនៅមិនទាន់មានសេចក្តីរាយការណ៍ផ្លូវការណាមួយបង្ហាញថា គ្រោះរញ្ជួយដីទាំង ២ដងនេះបានបណ្តាលឱ្យមានគ្រោះថ្នាក់ធ្ងន់ធ្ងរចំពោះពលរដ្ឋម៉ាឡេស៊ី ឬបង្កឱ្យមានរលកយក្សស៊ូណាមិនោះទេ ខណៈនៅតាមបណ្តាញសង្គមវិញពលរដ្ឋម៉ាឡេស៊ីមួយចំនួនបានឱ្យដឹងត្រឹមថា ពួកគេពិតជាទទួលបានអាមរ្មណ៍ថាមានភាពរញ្ជួយបានកើតឡើង៕

ម៉ាឡេស៊ី៖ ម៉ាឡេស៊ីបានណែនាំឱ្យពលរដ្ឋខ្លួនផ្អាកធ្វើដំណើរទៅកាន់ប្រទេសថៃ ប្រសិនបើគ្មានភារកិច្ចចាំបាច់នោះទេ នេះបើយោងតាមការចុះផ្សាយរបស់បណ្តាញសារព័ត៌មាន The Malaysia Mail ។ សេចក្តីណែនាំខាងលើនេះត្រូវបានធ្វើឡើងក្រោយមានហេតុការបំផ្ទុះគ្រាប់បែបអត្តឃាតមួយបានកើតឡើងនៅក្នុងតំបន់ Tak Bai នៃខេត្ត Narathiwat ភាគខាងត្បូងប្រទេសថៃ និងបណ្តាលឱ្យមានមនុស្សជាច្រើនបានរងរបួស។ គួរកត់សម្គាល់ថា ហេតុការណ៍បំផ្ទុះគ្រាប់បែបឬអំពើហិង្សាក្នុងទម្រង់ផ្សេងៗទល់នឹងអាជ្ញាធរប៉ូលិសនៅក្នុងខេត្ត Narathiwat មិនមែនជារឿងថ្មីឡើយ ពោលវាគឺរឿងដែលបានបន្តកើតមានជារឿយៗអស់រយៈពេលជាយូរឆ្នាំមកហើល ខណៈសកម្មភាពនេះត្រូវបានគេដឹងច្បាស់ថា គឺជាស្នាដៃរបស់ក្រុមឥស្លាមជ្រុលនិយមជាច្រើនក្រុម ដែលចិញ្ចឹមចិត្តចង់ផ្តាច់ទឹកដីពីរដ្ឋាភិបាលថៃ។ ក្រុមឥស្លាមជ្រុលនិយមដែលតែងធ្វើសកកម្មភាពបែបភេវរកម្មទាំងនោះក៏ត្រូវបានគេដឹងថា មានទំនាក់ទំនងយ៉ាងជិតស្និតជាមួយក្រុមឥស្លាមដែលមានឥទ្ធិពលមួយចំនួននៅក្នុងប្រទេសម៉ាឡេស៊ីផងដែរ៕  អត្ថបទ៖ ភក្តី ប្រភព៖ The Malaysia Mail

ឥណ្ឌូណេស៊ី៖ ក្មេងប្រុសជនជាតិឥណ្ឌូណេស៊ីម្នាក់ដែលបានធ្វើឱ្យល្បីនៅជុំវិញពិភពលោកតាមរយៈក្បាច់រាំដ៏គួរឱ្យចាប់អាមរ្មណ៍មួយនៅក្បាលទូកត្រូវបានអាជ្ញាធរខេត្ត Riau នៃប្រទេសឥណ្ឌូណេស៊ី សម្រេចតែងតាំងជា “ឯកអគ្គរដ្ឋទូតវប្បធម៌” នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃសៅរ៍ ទី២៣ ខែសីហា។ ក្មេងប្រុសដែលពោរពេញដោយទេព្យកោសល្យរូបនេះមានឈ្មោះថា Rayyan Arkan Dhika និងមានអាយុត្រឹម​ ១១ឆ្នាំប៉ុណ្ណោះ។ គួរកត់សម្គាល់ថា ក្នុងរយៈពេលប៉ុន្មានសប្តាហ៍ចុងក្រោយនេះវីដេអូរាំនៅលើក្បាលទូករបស់កុមារា Rayyan Arkan Dhika ដែលមានរយៈពេលជាង ១០វិនាទី ទទួលបានការចាប់អារម្មណ៍យ៉ាងខ្លាំងនៅក្នុងចំណោមអ្នកប្រើប្រាស់បណ្តាញសង្គមនៅជុំវិញពិភពលោក ហើយអ្នកប្រើប្រាស់បណ្តាញសង្គមទាំងនោះថែមទាំងបានព្យាយាមធ្វើត្រាប់តាមក្នុងទម្រង់ផ្សេងៗទៀតផងដែរ។ សូមបញ្ជាក់ជូនថា វីដេអូរាំនោះមានឈ្មោះថា “Aura Farming” ហើយលោកអ្នកអាចទស្សនាសកម្មភាពរាំក្នុងវីដេអូ ដូចខាងក្រោមនេះ៖ អត្ថបទ៖ ភក្តី

អាមេរិក៖ យ៉ាងហោចណាស់មានមនុស្សចំនួន ៥នាក់បានស្លាប់បាត់បង់ជីវិតនៅក្នុងហេតុការណ៍ក្រឡាប់រថយន្តក្រុងដឹកភ្ញៀវទេសចរមួយគ្រឿងនៅសហរដ្ឋអាមេរិក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍​ ទី២៣ ខែសីហា។ ហេតុការណ៍គ្រោះថ្នាក់បានកើតឡើងនៅលើផ្លូវ New York State Thruway ដែលស្ថិតនៅក្នុងតំបន់ Pembroke នៃទីក្រុង New York សហរដ្ឋអាមេរិក។ ក្រៅតែពីបានបណ្តាលឱ្យមានមនុស្សត្រូវស្លាប់បាត់បង់ជីវិតហើយ គ្រោះថ្នាក់នេះក៏បានបណ្តាលឱ្យមនុស្សជាច្រើននាក់ផ្សេងទៀតបានរងរបួសធ្ងន់និងស្រាលផងដែរ។ ប្រភពខាងលើបានបន្តថា នៅក្នុងរថយន្តក្រុងមួយគ្រឿងនេះមានផ្ទុកអ្នកភ្ញៀវទេសចរសរុបជាង ៥០នាក់ ចម្រុះជាតិសាសន៍ជាច្រើន ហើយនៅក្នុងចំណោមជនរងគ្រោះដែលបានស្លាប់នោះ គឺមានទាំងភ្ញៀវទេសចរជនជាតិចិន ហ្វីលីពីន និងឥណ្ឌា ខណៈនៅក្នុងនោះក៏មានកូនក្មេងម្នាក់ផងដែរ។ ចំពោះមូលហេតុនៃការក្រឡាប់វិញត្រូវបានអាជ្ញាធរអាមេរិកបញ្ជាក់ថា គឺដោយសារតែបញ្ហាបច្ចេកក្នុងការបើកបរនិងរថយន្ត ពោលគឺអ្នកបើកបរមិនអាចគ្រប់គ្រងរថយន្តតាមការចង់បញ្ជារបស់ខ្លួនរហូតធ្វើឱ្យរថយន្តត្រូវក្រឡាប់តែម្តង៕  អត្ថបទ៖ ភក្តី

កូរ៉េខាងជើង៖ លោក គីម ជុងអ៊ុន បានទៅលុតជង្គង់គោរពនៅចំពោះមុខរូបថតទាហានកូរ៉េខាងជើង ដែលបានបាត់បង់ជីវិតនៅក្នុងសង្រ្គាមប្រឆាំងអ៊ុយក្រែន នេះបើយោងតាមការចុះផ្សាយរបស់បណ្តាញសារព័ត៌មាន Yahoo News នៅថ្ងៃទី២២ ខែសីហា។ ជាមួយគ្នានោះ ប្រមុខដឹកនាំកូរ៉េខាងជើងក៏បានផ្តល់មេដាយកត្តិយសថ្នាក់ជាតិចំពោះក្រុមទាហានពលីទាំងនោះផងដែរ។ តាមរយៈរូបភាពជាច្រើនសន្លឹកបានបង្ហាញថា ក្រៅតែពីបានសម្តែងនូវការគោរពដល់ក្រុមទាហានពលីហើយ លោក គីម ជុងអ៊ុន ក៏បានឱបទាហាន ដែលនៅរស់រានមានជីវិតជាច្រើននាក់ផងដែរ។ គួររម្លឹកជូនថា នាពេលកន្លងមកក្រុមចារកិច្ចរបស់កូរ៉េខាងត្បូង និងប្រទេសលោកខាងលិចបានប៉ាន់ប្រមាណថា កូរ៉េខាងជើងបានបញ្ជូនទាហានច្រើនជាង ១០,០០០នាក់ ទៅកាន់តំបន់ Kursk របស់រុស្ស៊ី ដើម្បីច្បាំងដេញទ័ពអ៊ុយក្រែន ដែលបានវាយចូលតំបន់នោះ។ បើតាមក្រុងសេអ៊ូលបានប៉ាន់ស្មានថា ទាហានកូរ៉េខាងជើង ដែលបានបាត់បង់ជីវិតនោះគឺមានចំនួនប្រហែល ៦០០នាក់៕    អត្ថបទ៖