ការសិក្សាមួយបានបង្ហាញថា មានពលរដ្ឋប្រភេទ Gen Z នៅតំបន់អាស៊ីជាងពាក់កណ្តាលកំពុងរងផលប៉ះពាល់សតិអារម្មណ៍ ឬមានអារម្មណ៍មិនល្អនៅកន្លែងបំពេញការងារបស់ពួកគេ។ បើយោងតាមការចុះផ្សាយរបស់បណ្តាញសារព័ត៌មាន National Thailand បានបញ្ជាក់ថា ការសិក្សាមួយនេះត្រូវបានធ្វើឡើងដោយក្រុមហ៊ុន AXA ដែលជាប្រភេទក្រុមហ៊ុនធានារ៉ាប់រងមានមូលដ្ឋាននៅក្នុងប្រទេសបារាំង ខណៈការសិក្សាខាងលើនេះត្រូវបានធ្វើឡើងក្រោមប្រធានបទ “សុខភាពផ្លូវចិត្ត និងសុខុមាលភាព ២០២៣”។ ប្រភពខាងលើបានបន្តថា នៅក្នុងការសិក្សារបស់ក្រុមហ៊ុន AXA ខាងលើនេះគឺគេបានផ្តោតយ៉ាងសំខាន់ទៅលើសុខភាពផ្លូវចិត្តរបស់ក្រុមបុគ្គលិក ដែលកំពុងបំពេញការងារនៅតាមក្រុមហ៊ុនក្រោយកើតមានវិបត្តិនៃការរាតត្បាតជំងឺកូវីដ-១៩។ លទ្ធផលនៃការសិក្សាបានបង្ហាញថា ក្រុមបុគ្គលិកប្រភេទ Gen Z នៅក្នុងតំបន់អាស៊ីចំនួន ៥១% កំពុងមានអារម្មណ៍មិនល្អនៅក្នុងការបំពេញការងាររបស់ពួកគេ ខណៈពួកគេក៏កំពុងត្រូវការការលើកទឹកចិត្តជាចាំបាច់ផងដែរ។ របាយការណ៍នៅក្នុងការសិក្សាក៏បានបង្ហាញផងដែរថា នៅក្នុងចំណោមប្រទេសនៅតំបន់អាស៊ីនោះគឺថៃជាប្រទេសដែលមានចំនួនពលរដ្ឋ Gen Z រងផលប៉ះពាល់សតិអារម្មណ៍ច្រើនជាងគេ។ សូមបញ្ជាក់ជូនថា Gen Z

វៀតណាម៖ ក្រុមហ៊ុន SpaceX, ក្រុមហ៊ុន Netflix ក្រុមហ៊ុន Boeing នឹងចូលរួមក្នុងបេសកកម្មធុរកិច្ចដ៏ធំមួយរបស់អាមេរិក ដែលនឹងត្រូវរៀបចំឡើងនៅក្នុងប្រទេសវៀតណាមនៅសប្តាហ៍ក្រោយនេះ។ យោងតាមការចុះផ្សាយរបស់បណ្តាញសារព័ត៌មាន The Strait Time នៅល្ងាចថ្ងៃសុក្រ ទី១៧ ខែមីនានេះបានបញ្ជាក់ថា បេសកកម្មធុរកិច្ចខាងលើនេះត្រូវបានផ្តួចផ្តើមរៀបចំឡើងដោយក្រុមប្រឹក្សាធុរកិច្ចអាមេរិក-អាស៊ាន (US-Asean Business Council) ខណៈបេសកកម្មនេះត្រូវបានគេមើលឃើញថា​ គឺជាបេសកកម្មដ៏ធំបំផុតមិនធ្លាប់មាននោះទេនាពេលកន្លងមក។ ប្រភពខាងលើបានបន្តថា ក្រៅតែពីមានការចូលរួមពីសំណាក់ក្រុមហ៊ុនល្បីៗខាងលើនេះហើយក៏នៅមានក្រុមហ៊ុនធំៗលំដាប់ពិភពលោកជាង ៥០ផ្សេងទៀត ដែលនឹងត្រូវបង្ហាញវត្តមាននៅក្នុងបេសកកម្មដ៏កម្រនេះផងដែរ។ បើតាមលោក Vu Tu Thanh ដែលជាអ្នកតំណាងឲ្យក្រុមប្រឹក្សាធុរកិច្ចអាមេរិក-អាស៊ានប្រចាំនៅក្នុងប្រទេសវៀតណាមបានបញ្ជាក់ថា​ គោលបំណងនៃការរៀបចំព្រឹត្តិការណ៍ដ៏អស្ចារ្យនេះគឺដើម្បីបង្កើតឱកាសឲ្យក្រុមហ៊ុនធំៗទាំងអស់នោះបានពិភាក្សាគ្នាអំពីលទ្ធភាពនៃការវិនិយោគនិងពង្រីកការលក់របស់ពួកគេមកកាន់ទីផ្សារនៅតំបន់អាស៊ីអាគ្នេយ៍។ គួរបញ្ជាក់ជូនថា ក្រោយពេលដែលអាមេរិកនិងចិនហាក់មានភាពតានតឹងជាមួយគ្នាកាន់តែខ្លាំងក្នុងរឿងនយោបាយនិងពាណិជ្ជកម្ម ហើយបូករួមជាមួយនឹងភាពមិនអំណោយផលក្នុងវិស័យសេដ្ឋកិច្ចក្នុងប្រទេសចិនដែលបង្កឡើងដោយវិបត្តិនៃជំងឺកូវីដ-១៩ទៀតនោះ គេបានមើលឃើញថា  ក្រុមហ៊ុនធំៗជាច្រើនបានប្តូរទិញដៅអាជីវកម្មរបស់ខ្លួនទៅកាន់ប្រទេសវៀតណាមជាបន្តបន្ទាប់

អូស្រ្តាលី៖ រដ្ឋាភិបាលនៃប្រទេសអូស្រ្តាលីសម្រេចបញ្ជាទិញមីស៊ីសម្រាប់បាញ់កម្ទេចនាវាចំនួន ២២០គ្រាប់ពីសហរដ្ឋអាមេរិក ខណៈការបញ្ជាទិញនេះត្រូវបានគេមើលឃើញថា គឺជាការបញ្ជាទិញមីស៊ីលក្នុងចំនួនដ៏ច្រើនគួរឲ្យកត់សម្គាល់មួយផងដែរ។ បើយោងទៅតាមការចុះផ្សាយរបស់បណ្តាញសារព័ត៌មាន BBC នៅថ្ងៃសុក្រ ទី១៧ ខែមីនានេះបានបញ្ជាក់ថា នៅក្នុងគម្រោងទិញមីស៊ីលខាងលើនេះគឺរដ្ឋាភិបាលអង់គ្លេសនឹងត្រូវចំណាយថវិកាចំនួន ៨៩៥លានដុល្លារ ខណៈនៅក្នុងកញ្ចប់ចំណាយនេះក៏មានបញ្ចូលទាំងការផ្តល់ជំនួយផ្នែកបច្ចេកទេសជាច្រើនដំណាក់កាលផងដែរ។ បើតាមលោក Richard Marles  រដ្ឋមន្ត្រីក្រសួងការពារជាតិអូស្រ្តាលីបានបញ្ជាក់ថា នៅក្នុងចំណោមមីស៊ីលទាំង ២២០គ្រាប់នោះគឺសុទ្ធតែជាមីស៊ីលទំនើបជំនាន់ចុងក្រោយគេបង្អស់ ខណៈនៅក្នុងនោះក៏មានបញ្ចូលទាំងមីស៊ីលប្រភេទ Tomahawk ដែលជាមីស៊ីលមានសមត្ថភាពអាចបាញ់បាននៅក្នុងរយៈចម្ងាយឆ្ងាយផងដែរ។ រដ្ឋមន្ត្រីការពារជាតិរូបនេះបានបន្តថា ចំពោះការសម្រេចបញ្ជាទិញមីស៊ីលក្នុងទំហំទឹកប្រាក់ដ៏ច្រើនសម្បើមនេះគឺត្រូវបានធ្វើឡើងនៅក្រោមហេតុផលថា ដើម្បីពង្រឹងសន្តិសុខជាតិឲ្យស្របតាមស្ថានភាពជាក់ស្តែងនៅលើពិភពលោកនាពេលបច្ចុប្បន្ននេះ៕ អត្ថបទ៖ ភក្តី ប្រភព៖ BBC

អង់គ្លេស៖ ប្រទេសអង់គ្លេសបានសម្រេចធ្វើការហាមឃាត់មិនឲ្យរដ្ឋមន្ត្រីនៅក្នុងជួររដ្ឋាភិបាលរបស់ខ្លួនយកទូរស័ព្ទនៅកន្លែងធ្វើការទៅប្រើប្រាស់បណ្តាញសង្គម TikTok ឡើយ នេះបើយោងតាមការចុះផ្សាយរបស់បណ្តាញសារព័ត៌មាន BBC នៅព្រឹកថ្ងៃសុក្រ ទី១៧ ខែមីនានេះ។ បើតាមលោក Oliver Dowden រដ្ឋមន្ត្រីទទួលបន្ទុកគណៈរដ្ឋមន្រ្តីអង់គ្លេសបានបញ្ជាក់ថា ការសម្រេចហាមឃាត់នេះគឺជាវិធានការដែលមានលក្ខណៈជាការប្រុងប្រយ័ត្ន តែវិធានការនេះនឹងត្រូវចូលជាធរមានភ្លាមៗតែម្តងក្រោយការជូនដំណឹងនេះ។ ប្រភពខាងលើបានបន្តថា ហេតុផលតែមួយគត់ដែលជម្រុញឲ្យមានការហាមឃាត់ខាងលើនេះ គឺដើម្បីរក្សាសុវត្ថិភាពទិន្នន័យរបស់រដ្ឋាភិបាលអង់គ្លេសពីការលួចតាមដានឬយកការសម្ងាត់ពីសំណាក់កម្មវិធី TikTok ដែលជាកម្មវិធីរបស់ចិន។ ភ្លាមៗក្រោយមានការជូនដំណឹងខាងលើនេះ ស្ថានទូតចិនប្រចាំនៅអង់គ្លេសបានបញ្ចេញប្រតិកម្មថា ការសម្រេចរបស់រដ្ឋាភិបាលអង់គ្លេសគឺមានលក្ខណៈជារឿងនយោបាយ​ ច្រើនជាងផ្អែកលើស្ថានភាពជាក់ស្តែង។ គួរកត់សម្គាល់ ក្រៅតែពីអង់គ្លេស ប្រទេសនូវែលសេឡង់ក៏បានសម្រេចធ្វើការហាមឃាត់មិនឲ្យមានការប្រើប្រាស់បណ្តាញសង្គម TikTok នៅក្នុងចំណោមឧករណ៍អេឡិចត្រូនិចនៅក្នុងរដ្ឋសភារបស់ខ្លួនដែរកាលពីព្រឹកមិញនេះ ខណៈការសម្រេចនោះគឺត្រូវបានធ្វើឡើងនៅក្រោមហេតុផលដូចគ្នា ពោលគឺដើម្បីរក្សាសុវត្ថិភាពទិន្នន័យរបស់រដ្ឋាភិបាល៕ អត្ថបទ៖ ភក្តី ប្រភព៖  BBC

នូវែលសេឡង់៖ រដ្ឋាភិបាលនៃប្រទេសនូវែលសេឡង់នឹងធ្វើការហាមឃាត់ការប្រើប្រាស់បណ្តាញសង្គម TikTok នៅគ្រប់ឧបរកណ៍អេឡិចត្រូនិចទាំងឡាយណាដែលត្រូវប្រើប្រាស់ជាមួយបណ្តាញអ៉ីនធឺណិតនៅក្នុងរដ្ឋសភារបស់ខ្លួន។ បើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសុក្រ ទី១៧ ខែមីនានេះបានបញ្ជាក់ថា គម្រោងធ្វើការហាមឃាត់ខាងលើនេះនឹងត្រូវផ្តើមអនុវត្តចាប់ពីចុងខែមីនានេះតទៅហើយ។ ប្រភពខាងលើបានបន្តថា ការសម្រេចធ្វើការហាមឃាត់មិនឲ្យមានការប្រើប្រាស់បណ្តាញសង្គម TikTok នៅក្នុងចំណោមឧបករណ៍អេឡិចត្រូនិចនៅក្នុងរដ្ឋសភានេះគឺត្រូវបានធ្វើឡើងនៅក្រោមហេតុផលថា ដើម្បីការពារសុវត្ថិភាពទិន្នន័យរបស់រដ្ឋាភិបាល។​ គួរបញ្ជាក់ជូនថា បណ្តាញសង្គម TikTok គឺជាកម្មសិទ្ធរបស់ក្រុមហ៊ុន​ ByteDance ដែលមានមូលដ្ឋាននៅក្នុងប្រទេសចិន​ ហើយជារឿយៗបណ្តាញសង្គមមួយនេះត្រូវបានប្រទេសជាច្រើន ពិសេសគឺអាមេរិកតែម្តង តែងចោទប្រកាន់ថា ជាបណ្តាញសង្គមចារកម្មដែលជួយលួចយកទិន្នន័យសំខាន់ៗពីអ្នកប្រើប្រាស់ដើម្បីផ្តល់ជូនឲ្យទៅរដ្ឋាភិបាលចិន៕ អត្ថបទ៖ ភក្តី ប្រភព៖ The Strait Time

ជប៉ុន៖ ថ្នាំសម្រាប់ព្យាបាលនិងការពារជំងឺគ្រុនឈាមត្រូវបានគេធ្វើតេស្តសាកល្បងនៅក្នុងខ្លួនសត្វសា្វប្រកបដោយជោគជ័យហើយ នេះបើយោងទៅតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃព្រហស្បតិ៍ ទី១៦ ខែមីនានេះ។ គួរកត់សម្គាល់ថា គ្រុនឈាមគឺជាជំងឺគ្រោះថ្នាក់មួយចម្លងតាមរយៈសត្វមូសខ្លា ខណៈជំងឺដ៏កាចសាហាវមួយនេះបានចម្លងទៅកាន់មនុស្សរាប់លាននាក់នៅជុំវិញពិភពលោកជារៀងរាល់ឆ្នាំ។ គួររម្លឹកជូនថា នាពេលកន្លងមកក្រុមអ្នកវិទ្យាសាស្រ្តបានអភិវឌ្ឍវ៉ាក់សាំងការពារជំងឺគ្រុនឈាមចំនួន ២ប្រភេទរួចមកហើយ​ តែវ៉ាក់សាំងទាំងនោះមិនត្រូវបានគេយកទៅប្រើប្រាស់ជាសាធារណៈនោះទេ ដ្បិតគេនៅមិនទាន់មានទំនុកចិត្តចំពោះសុវត្ថិភាពរបស់វ៉ាក់សាំងទាំងនោះនៅឡើយទេ។ យ៉ា​ងណាក្តី បើតាមលោក Marnix Van Loock ដែលជាប្រធានដឹកនាំក្រុមស្រាវជ្រាវវ៉ាក់សាំងរបស់ក្រុមហ៊ុន Johnson & Johnson បានបញ្ជាក់ថា គម្រោងអភិវឌ្ឍវ៉ាក់សាំងការពារជំងឺគ្រុនឈាមថ្មីនេះទទួលបានជោគជ័យក្នុងដំណាក់កាលសាកល្បងចំពោះសត្វរួចហើយ ខណៈគេរំពឹងថា វ៉ាក់សាំងផ្លូវការដែលអាចចាក់លើខ្លួនមនុស្សបាននឹងត្រូវអភិវឌ្ឍដោយជោគជ័យក្នុងពេលដ៏ខ្លីខាងមុខនេះផងដែរ៕ អត្ថបទ៖ ភក្តី ប្រភព៖ The Strait Time

ថៃ៖ ប៉ូលិសថៃគ្រោងនឹងអនុវត្តផែនការយាមផ្លែទុរេនជាលើកដំបូងបំផុតនៅក្នុងប្រវត្តិសាស្រ្តរបស់ប្រទេស នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃព្រហស្បតិ៍ ទី១៦ ខែមីនានេះ។ បើតាមអាជ្ញាធរថៃបានបញ្ជាក់ថា​ផែនការយាមកាមសុវត្ថិភាពផ្លែទុរេននេះត្រូវបានធ្វើឡើងដើម្បីឆ្លើយតបទៅនឹងពាក្យបណ្តឹងរបស់ប្រជាកសិករ ដែលបានមកប្តឹងប៉ូលិសជាបន្តបន្ទាប់គ្នាជុំវិញករណីមានចោរលួចបេះផ្លែទុរេនយ៉ាងច្រើនពីចំការរបស់ពួកគាត់។ បើតាមលោក Ariyachai Thima ដែលជាប្រធានអធិការកិច្ចប្រចាំសង្កាត់ Muang នៃក្រុង Kanchanaburi ភាគខាងលិចប្រទេសប្រទេសថៃបានបញ្ជាក់ថា នៅក្នុងតំបន់គ្រប់គ្រងរបស់គាត់មានករណីចោរលួចបេះផ្លែទុរេនទ្រង់ទ្រាយធំជាច្រើនករណីនៅក្នុងរដូវប្រមូលផលដំណាំទុរេននេះ ហើយនៅក្នុងនោះមានករណីគួរឲ្យកត់សម្គាល់មួយផងដែរគឺករណីដែលចោរបានលួចបេះទុរេនមានតម្លៃសរុបរហូតដល់ ១លានបាត (២៨,៩៨៨ ដុល្លារអាមេរិក) ពីក្នុងចំការរបស់កសិករម្នាក់។ អាជ្ញាធរថៃរំពឹងថា គម្រោងខាងលើនេះនឹងរួមចំណែកយ៉ាងសំខាន់ក្នុងការទប់ស្កាត់ករណីលួចបេះទុរេន ខណៈទុរេនទាំងនោះគឺជាប្រភពចំណូលដ៏សំខាន់បំផុតរបស់ប្រជាកសិករ៕ អត្ថបទ៖ ភក្តី ប្រភព៖ The Strait Time  

ក្រុមហ៊ុនបណ្តាញសង្គម TikTok បានឲ្យដឹងកាលពីថ្ងៃពុធ ទី១៥ ខែមីនាម្សិលមិញថា សហរដ្ឋអាមេរិកបានគំរាមហាមឃាត់ក្រុមហ៊ុនរបស់ខ្លួន ប្រសិនបើ TikTok មិនព្រមលក់ភាគហ៊ុនមួយចំនួនឲ្យទៅអាមេរិកនោះទេ។ ការអះអាងនេះត្រូវបានធ្វើឡើងដោយលោក Brooke Oberwetter ជាអ្នកនាំពាក្យឲ្យក្រុមហ៊ុន ByteDance ដែលជាក្រុមហ៊ុនគ្រប់គ្រងលើកម្មវិធីបណ្តាញសង្គម TikTok។ បើតាមអ្នកនាំពាក្យរូបនេះបានបញ្ជាក់ថា  ការគំរាមនេះគឺត្រូវធ្វើឡើងដោយគណៈកម្មាធិការសម្រាប់ការវិនិយោគបរទេសនៅសហរដ្ឋអាមេរិក (CFIUS) ដែលបានទាមទារឲ្យម្ចាស់ក្រុមហ៊ុន TikTok ត្រូវលក់ភាគហ៊ុនខ្លះឲ្យទៅអាមេរិក បើមិនដូចនោះទេអាមេរិកអាចនឹងសម្រេចធ្វើការហាមឃាត់កម្មវិធីមួយនេះនៅលើទឹកដីអាមេរិកតែម្តង។ គួររម្លឹកជូនថា រឿងរ៉ាវចម្រូងចម្រាសរវាងអាមេរិកនិងក្រុមហ៊ុន TikTok បានផ្តើមកើតឡើងជាច្រើនឆ្នាំមកហើយ ដោយអាមេរិកតែងចោទប្រកាន់ថា TikTok​ ជាបណ្តាញសង្គមចារកម្មដែលបានលួចយកទិន្នន័យរបស់ពលរដ្ឋអាមេរិកសម្រាប់ផ្តល់ជូនទៅឲ្យរដ្ឋាភិបាលចិន ខណៈគិតត្រឹមពេលនេះគឺមានពលរដ្ឋអាមេរិកប្រមាណជា ១០០លាននាក់កំពុងប្រើប្រាស់ TikTok​ ។ គេនៅចាំបានថា កាលពីជំនាន់លោក Donald Trump នៅកាន់តំណែងជាប្រធានាធិបតីក៏អាមេរិកធ្លាប់ព្យាយាមហាមឃាត់បណ្តាញសង្គម TikTok ម្តងដែរ តែពេលនោះតុលាការបានច្រានចោលសំណើរសុំធ្វើការហាមឃាត់នោះ។ សូមបញ្ជាក់ជូនផងដែរថា

អង់គ្លេស៖ ពលរដ្ឋអង់គ្លេសប្រមាណជាកន្លះលាននាក់បាននាំគ្នាចុះថ្នល់ធ្វើកូដកម្មនៅថ្ងៃពុធ ទី១៥ ខែមីនានេះ នេះបើយោងទៅតាមការចុះផ្សាយរបស់បណ្តាញសារព័ត៌មាន The Strait Time។ ក្រុមកូដករបានធ្វើការប្រមូលផ្តុំគ្នានៅលើផ្លូវ Downing Street ដែលមានទីតាំងស្ថិតនៅក្បែរវិមានរដ្ឋសភាអង់គ្លេស ខណៈកូដកម្មនេះត្រូវបានធ្វើឡើងនៅចំថ្ងៃដែលរដ្ឋសភាអង់គ្លេសត្រូវបើកការប្រជុំដើម្បីអនុម័តលើកញ្ចប់ថវិកាប្រចាំឆ្នាំ។ ប្រភពខាងលើបានបន្តថា​ ក្រុមពលរដ្ឋដែលបានចូលរួមធ្វើកូដកម្មនោះគឺភាគច្រើនជាគ្រូបង្រៀន មន្ត្រីរាជការ និងគ្រូពេទ្យ។ ចំពោះគោលបំណងនៃការធ្វើកូដកម្មវិញគឺក្រុមកូដករចង់ទាមទារឲ្យមានការធ្វើកំណែទម្រង់លើប្រាក់សោធននិវត្តន៍ ផ្លាស់ប្តូរលក្ខខណ្ឌការងារមួយចំនួន និងទាមទារឲ្យមានការដំឡើងប្រាក់ខែរបស់ពួកគេឲ្យបានសមស្របទៅតាមកម្រិតអតិផរណានាពេលបច្ចុប្បន្ននេះផងដែរ។ ជុំវិញបញ្ហាដ៏រសើបនេះលោក Rishi Sunak នាយករដ្ឋមន្ត្រីអង់គ្លេសបានប្រាប់ឲ្យដឹងថា រដ្ឋាភិបាលកំពុងស្វែងរកដំណោះស្រាយសមស្របមួយជូនក្រុមកូដករហើយ ខណៈដំណោះស្រាយនោះនឹងត្រូវធ្វើឡើងជាច្រើនដំណាក់កាល៕ អត្ថបទ៖ ភក្តី ប្រភព៖ The Strait Tim

ការសិក្សាមួយបានបង្ហាញថា នៅក្នុងឆ្នាំ ២០២២កន្លងទៅនេះមានប្រទេសត្រឹមតែ ៦ប៉ុណ្ណោះដែលមានខ្យល់បរិសុទ្ធស្របតាមស្តង់ដារសុវត្ថិភាព ឬគុណភាពខ្យល់ស្ថិតនៅក្រោមកម្រិត PM2,5។ យោងតាមការចុះផ្សាយរបស់បណ្តាញសារព័ត៌មាន CNN បានបញ្ជាក់ថា ការសិក្សាមួយនេះត្រូវបានធ្វើឡើងដោយក្រុមហ៊ុន IQAir ដែលបានធ្វើការត្រួតពិនិត្យនិងតាមដានគុណភាពខ្យល់នៅក្នុងប្រទេសចំនួន ១៣១ នៅជុំវិញពិភពលោកយ៉ាងយកចិត្តទុកដាក់បំផុត។ នៅក្នុងរបាយការណ៍របស់ក្រុមហ៊ុន IQAir បានបង្ហាញថា ប្រទេសទាំង ៦ ដែលមានគុណភាពខ្យល់ល្អប្រសើរស្របតាមស្តង់ដារសុវត្ថិភាពនោះមានដូចជា ប្រទេសអូស្ត្រាលី ប្រទេសអេស្តូនី ប្រទេសហ្វាំងឡង់ ប្រទេសហ្គ្រេណាដា ប្រទេសអ៉ីស្លង់ និងប្រទេសនូវែលសេឡង់។ ក្រៅពីប្រទេសទាំង ៦ នេះគឺនៅមានដែនដីស្វយ័តចំនួន ៧កន្លែងផ្សេងទៀតនៅក្នុងតំបន់ប៉ាស៊ីហ្វិក និងការាបៀន ដែលត្រូវបានគេរកឃើញថា មានគុណភាពខ្យល់ល្អប្រសើរផងដែរ ដោយតំបន់ទាំងនោះមានដូចជាកោះហ្គាំនិងតំបន់ព័រតូរីកូជាដើម៕ អត្ថបទ៖