នីហ្សេរីយ៉ា៖ យ៉ាងហោចណាស់មានមនុស្សចំនួន ៦០នាក់បានស្លាប់បាត់បង់ជីវិតនៅក្នុងហេតុការណ៍លិចទូកមួយគ្រឿងនៅក្នុងរដ្ឋ Niger នៃប្រទេសនីហ្សេរីយ៉ា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី៤ ខែកញ្ញា។ ទន្ទឹមគ្នានេះ ក៏មានម​នុស្សចំនួន ១០នាក់ផ្សេងទៀតមានស្ថានភាពធ្ងន់ធ្ងរ និងកំពុងទទួលការសង្គ្រោះបន្ទាន់នៅមន្ទីរពេទ្យផងដែរ។ ប្រភពខាងលើបានបន្តថា​ ទូកដែលបានជួបគ្រោះថ្នាក់ខាងលើនេះមានផ្ទុកមនុស្សសរុបចំនួន ១០០នាក់ និងមានទិសដៅធ្វើដំណើរចេញពីតំបន់ Tungan Sule នៃស្រុក Malale ឆ្ពោះទៅកាន់តំបន់ Dugga នៃសហគមន៍ Gausawa ខណៈទូកបានលិចក្រោយធ្វើដំណើរបានពាក់កណ្តាលផ្លូវ។ សូមបញ្ជាក់ជូនថា ហេតុការណ៍លិចទូកនៅក្នុងប្រទេសនីហ្សេរីយ៉ាបានកើតឡើងជារឿយៗ ហើយមូលហេតុចម្បងដែលនាំឱ្យទូកត្រូវលិចគឺភាគច្រើនបណ្តាលមកពីការផ្ទុកអ្នកដំណើរច្រើនលើសកំណត់ស្តង់ដាសុវត្ថិភាព៕ អត្ថបទ៖ ភក្តី ប្រភព៖The Strait Time  

អាមេរិក៖ គណៈវិនិច្ឆ័យសហព័ន្ធសហរដ្ឋអាមេរិក បានកំណត់ឱ្យក្រុមហ៊ុន Google ត្រូវបង់ប្រាក់ចំនួន ៤២៥លានដុល្លារ ជុំវិញករណីបំពានសិទ្ធឯកជនរបស់អ្នកប្រើប្រាស់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី ៤ ខែកញ្ញា។ សាលក្រម​នេះ​ត្រូវបានធ្វើ​ឡើង​បន្ទាប់​ពីមាន​ការ​កាត់​ទោស​មួយនៅ​តុលាការ​សហព័ន្ធ​ក្នុង​ទីក្រុង San Francisco រដ្ឋ California។ គួរកត់សម្គាល់ថា ករណីបំពានសិទ្ធឯកជនរបស់អ្នកប្រើប្រាស់បង្កឡើងដោយក្រុមហ៊ុន Google បានកើតមានជារឿយៗ ហើយករណីបទល្មើសនេះបានកើតឡើងក្នុងទម្រង់ជាការលួចប្រមូលព័ត៌មានផ្ទាល់ខ្លួន និងចំណូលចិត្តរបស់អ្នកប្រើប្រាស់ ដើម្បីឱ្យពួកគេអាចមើលឃើញឬទទួលបានការផ្សព្វផ្សាយពាណិជ្ជកម្ម​ទាំងឡាយណា ដែលត្រូវនឹងទំនោរចិត្តរបស់ពួកគេ។ យ៉ាងណាក្តី ការលួចប្រមូលទិន្នន័យពីអ្នកប្រើប្រាស់ទាំងនេះ ត្រូវបានធ្វើឡើងដោយគ្មានការអនុញ្ញាតពីសមីខ្លួនឡើយ ហើយពេលខ្លះវាក៏បានធ្វើឱ្យប៉ះពាល់ដល់ឯកជនភាពរបស់អ្នកប្រើប្រាស់យ៉ាងខ្លាំងផងដែរ៕ អត្ថបទ៖ ភក្តី ប្រភព៖ The Strait Time

ព័រទុយហ្គាល់៖ យ៉ាង​ហោចណាស់មានមនុស្សចំនួន ១៥នាក់បានស្លាប់បាត់បង់ជីវិតនៅក្នុងហេតុការណ៍ក្រឡាប់រថយន្តភ្លើងខ្នាតមួយគ្រឿង នៅក្នុងទីក្រុង Lisbon នៃប្រទេសព័រទុយហ្គាល់ នេះបើយោងតាមការចុះផ្សាយរបស់បណ្តាញសារព័ត៌មាន​ Channel News Asia នៅក្នុងថ្ងៃពុធ ទី៤ ខែកញ្ញា។ ក្រៅតែពីបានបណ្តាលឱ្យមានមនុស្សស្លាប់បាង់បង់ជីវិតហើយ ហេតុការណ៍គ្រោះថ្នាក់នេះក៏បានបណ្តាលឱ្យមនុស្សចំនួន ១៨នាក់ផ្សេងទៀតរងរបួសផងដែរ។ រហូតមទល់នឹងពេលនេះ អាជ្ញាធរក្រុង Lisbon នៅមិនទាន់អាចបញ្ជាក់ពីមូលហេតុបច្ចេកទេសជាក់លាក់ ដែលបណ្តាលឱ្យរថយន្តភ្លើងខ្នាតតូចមួយគ្រឿងនេះត្រូវបើកធ្លាក់ផ្លូវ និងបណ្តាលឱ្យមានគ្រោះថ្នាក់ធ្ងន់ធ្ងរដូចខាងលើនេះនៅឡើយទេ ខណៈករណីគ្រោះថ្នាក់នេះគឺជាករណីកម្រមួយ។ សូមបញ្ជាក់ជូនថា រថយន្តភ្លើងខ្នាតតូច (The cable car railway) គឺមធ្យោបាយ​ធ្វើដំណើរសម្រាប់អ្នកទេសចរដ៏ពេញនិយមមួយនៅក្នុងទីក្រុង Lisbon ហើយជាមធ្យមនៅក្នុងមួយឆ្នាំគឺរថយន្តភ្លើងខ្នាតតូចនេះអាចទាក់ទាញភ្ញៀវទេសចរឱ្យមកជិះលេងកម្សាន្តប្រមាណជា ៣លាននាក់៕ អត្ថបទ៖ ភក្តី ប្រភព៖ Channel

ចិន៖ លោកប្រធានាធិបតីចិន ស៊ី ជិនពីង បានថ្លែងថា ពិភពលោកអាចប្រឈមមុខទៅនឹងជម្រើសរវាងសន្តិភាព ឬសង្រ្គាមបាន នេះបើយោងតាមការចុះផ្សាយរបស់បណ្តាញសារព័ត៌មាន Reuters នៅរសៀលថ្ងៃទី៣ ខែកញ្ញា។ ការថ្លែងខាងលើនេះត្រូវបានធ្វើឡើងនៅក្នុងអំឡុងពេល ដែលលោក ស៊ី ជិនពីង ថ្លែងសុន្ទរកថាបើកពិធីព្យុហយាត្រាយោធាដ៏ធំមួយនៅទីក្រុងប៉េកាំង។ គួរកត់សម្គាល់ថា នៅក្នុងពិធីព្យុហយាត្រាយោធារបស់ប្រទេសចិនខាងលើនេះ ក៏មានការចូលរួមពីសំណាក់ប្រមុខដឹកប្រទេសកូរ៉េខាងជើង គឺលោក គីម ជុងអ៊ុន និងលោកប្រធានាធិបតីរុស្ស៊ី​ វ៉្លាឌីមៀរ ពូទីន ផងដែរ។​ ចំណុចដែលគួរឱ្យសម្គាល់មួយទៀតថា គឺចិនបានបង្ហាញនូវអាវុធទំនើបជាច្រើន រួមមានទាំងអាវុធឡាស៊ែរ មីស៊ីលផ្លោងនុយក្លេអ៊ែរ និងដ្រូនក្រោមទឹកផងដែរ។ សូមបញ្ជាក់ជូនថា ការរៀបពិធីព្យុហយាត្រាយោធាទ្រង់ទ្រាយធំខាងលើនេះ គឺត្រូវបានរៀបចំឡើងចំខួបលើកទី ៨០

កូរ៉េខាងត្បូង៖ យ៉ាងហោចណាស់មានមនុស្សចំនួន ៣នាក់បានស្លាប់បាត់បង់ជីវិតនៅក្នុងហេតុការណ៍ចាក់សម្លាប់យ៉ាងកម្រោលមួយនៅក្នុងហាងលក់ភីហ្សាមួយកន្លែងក្នុងទីក្រុងសេអ៊ូល ប្រទេសកូរ៉េខាងត្បូង នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី៣ ខែកញ្ញា។ នៅក្នុងចំណោមជនរងគ្រោះទាំង ៣នាក់នោះគឺមាន ២នាក់ជាបុរស និងមានម្នាក់ជាស្រ្តី ដែលស្លាប់បាត់បង់ជីវិត ក្រោយបញ្ជូនទៅដល់មន្ទីរពេទ្យ។ បើតាមប៉ូលិសកូរ៉េខាងត្បូងបានបញ្ជាក់ថា ជនបង្កហេតុគឺជាម្ចាស់លក់ភីហ្សាខាងលើនេះផ្ទាល់តែម្តង ហើយមុនពេលដែលរូបគាត់ធ្វើសកម្មភាពយកកាំបិទទៅចាក់សម្លាប់មនុស្សយ៉ាងកម្រោលនេះ គឺរូបគាត់បានកើតមានជម្លោះជាមួយអ្នកម៉ៅការម្នាក់យ៉ាងខ្លាំង។ តាមការសន្និដ្ឋានបឋម សកម្មភាពចាក់សម្លាប់មនុស្សនេះអាចកើតឡើងដោយសារតែកំហឹងរបស់ម្ចាស់ហាង ដែលបង្កឡើងដោយសារជម្លោះរបស់គាត់ ដ្បិតគេបានមើលឃើញថា ក្រោយពេលមានជម្លោះភ្លាមៗ ជនបង្កហេតុក៏បានព្យាយាមធ្វើបាបខ្លួនឯងផងដែរ៕ អត្ថបទ៖ ភក្តី ប្រភព៖  Channel News Asia

ឥណ្ឌូណេស៊ី៖ យ៉ាងហោចណាស់មានមនុស្សចំនួន ៨នាក់ ដែលពាក់ព័ន្ធនឹងការធ្វើបាតុកម្មនៅឥណ្ឌូណេស៊ីត្រូវបានរាយការណ៍ថា បានស្លាប់បាត់បង់ជីវិត នេះបើយោងតាមការចុះផ្សាយរបស់បណ្តាញសារព័ត៌មាន South China Morning Post នៅក្នុងរសៀលថ្ងៃទី២ ខែកញ្ញា។ ជាមួយគ្នានេះ ក៏មានមនុស្សចំនួន ២០នាក់ផ្សេងទៀតកំពុងតែបាត់ខ្លួនផងដែរ។ ដោយឡែកចំពោះក្រុមបាតុករ ដែលត្រូវបានប៉ូលិសចាប់ខ្លួនវិញគឺមានប្រមាណជា ១,២៤០នាក់ ខណៈចលនាធ្វើបាតុកម្មរបស់ប្រជាពលរដ្ឋនៅមិនទាន់ថយចុះនៅឡើយទេ។ សូមបញ្ជាក់ជូនថា បាតុកម្មហិង្សាប្រឆាំងនឹងប៉ូលិសឥណ្ឌូណេស៊ីផ្តើមកើតឡើងតាំងតែពីថ្ងៃទី ២៥ខែសីហាម្លេះ ហើយបាតុកម្មបានកើតឡើងក្រោយមានករណីប៉ូលិសបើករថយន្តបុកអ្នករត់ម៉ូតូឌុបម្នាក់​ស្លាប់ និងស្របពេលដែលប្រជាពលរដ្ឋនៅទីក្រុងហ្សារតាកាខឹងនឹងរដ្ឋាភិបាល ដែលបានសម្រេចផ្តល់ប្រាក់ឧបត្ថម្ភ​ ចំនួន​ ៥០លាន​រូពី (៣, ០៣៤ ដុល្លារ) សម្រាប់​ឱ្យ​សមាជិកសភា​​ក្រុមប្រឹក្សា​ក្រុង​ជួល​ផ្ទះស្នាក់នៅ ខណៈប្រាក់ឧបត្ថម្ភ​នេះគឺស្មើនឹងប្រហែល ១០ដង​ នៃប្រាក់​ខែ​អប្បរមារបស់ប្រជាពលរដ្ឋនៅក្នុងទីក្រុងហ្សារតាកា៕

វៀតណាម៖ ប្រទេសវៀតណាមនៅក្នុងថ្ងៃទី២ ខែកញ្ញា បានប្រារព្ធទិវាបុណ្យឯករាជ្យជាតិ ដោយមានការរៀបចំក្បួនព្យុហយាត្រាយោធាទ្រង់ទ្រាយធំបំផុតមួយ នេះបើយោងតាមការចុះផ្សាយរបស់បណ្តាញសារព័ត៌មាន VN Express។ គួរកត់សម្គាល់ថា ទិវាបុណ្យឯករាជ្យជាតិនៅក្នុងឆ្នាំ២០២៥នេះ គឺជាខួបលើក៨០ ដែលវៀតណាមបានប្រកាសឯករាជ្យរបស់ខ្លួនពីនឹមអាណានិគមបារាំង។ ប្រភពខាងលើបានបន្តថា នៅក្នុងក្បួនព្យុហយាត្រាយោធាខាងលើនេះ វៀតណាមបានបង្ហាញអាវុធទំនើបៗរបស់ខ្លួនជាច្រើន ដោយនៅក្នុងនោះរួមមានរថក្រោះ មីស៊ីល ឧទ្ធម្ភាគចក្រ និងយន្ដហោះចម្បាំង និងមានការចូលរួមពីសំណាក់ទាហានវៀតណាមរាប់ពាន់នាក់ និងយោធាមកពីចិន រុស្ស៉ី រួមទាំងបណ្ដាប្រទេស ដែលជាសម្ព័ន្ធមិត្តមួយចំនួនទៀតផងដែរ។ ជាមួយគ្នានេះ នៅតាមដងផ្លូវក្នុងរដ្ឋធានីហាណូយ មានមនុស្សរាប់ម៉ឺននាក់បានប្រមូលផ្ដុំគ្នា ហើយភាគច្រើននៃពួកគេបានពាក់អាវយឺតពណ៌ក្រហម និងកាន់ទង់ជាតិវៀតណាម ដែលជាការបង្ហាញពីស្មារតីជាតិនិយម៕ អត្ថបទ៖ ភក្តី ប្រភព៖

ស៊ូដង់៖ ព្យុះភ្លៀង និងការបាក់ដី បានវាយប្រហារភូមិមួយនៅតំបន់ភ្នំ Marra ដែលស្ថិតនៅប៉ែកខាងលិចប្រទេសស៊ូដង់យ៉ាង​ធ្ងន់ធ្ងរ និងបានបណ្តាលឱ្យមនុស្សស្លាប់អស់ជាច្រើននាក់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២ ខែកញ្ញា។ គិតត្រឹមពេលនេះតួលេខអ្នកស្លាប់មានយ៉ាងតិចណាស់គឺជាង ១,០០០នាក់។ ប្រភពខាងលើបានបន្តថា គិតត្រឹមពេលនេះប្រតិប​ត្តិការណ៍ស្វែងរកនិងជួយសង្គ្រោះជនរងគ្រោះនៅមិនទាន់បិទបញ្ចប់នៅឡើយទេ ខណៈតួលេខអ្នកស្លាប់អាចបន្តកើនឡើងបន្ថែមទៀតផងដែរ។ បើតាមលោក Abdelwahid Mohamed Nour ដែលជាប្រធានដឹកនាំនៅតំបន់កើតហេតុខាងលើបានឱ្យដឹងថា នេះគឺជាគ្រោះធម្មជាតិដ៏ធ្ងន់ធ្ងរបំផុត ដែលមិនធ្លាប់កើតមាននោះទេក្នុងរយៈពេលជាច្រើនឆ្នាំចុងក្រោយនេះ៕ អត្ថបទ៖ ភក្តី ប្រភព៖The Strait Time

អាហ្វហ្គានីស្ថាន៖ តួលេខអ្នកស្លាប់បាត់បង់ជីវិតដោយសារការរញ្ជួយដីនៅក្នុងប្រទេសអាហ្វហ្គានីស្ថាន បានកើនឡើងដល់ជាង ៨០០នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងរសៀលថ្ងៃទី ១ ខែកញ្ញា។ ដោយឡែកចំនួនអ្នករងរបួសវិញគឺបានកើនឡើងជាង ២,៨០០នាក់។ សូមបញ្ជាក់ជូនថា គ្រោះរញ្ជួយដីបានកើតឡើងនៅក្នុងកម្រិត ៦រ៉ិចទ័រ ហើយទីតាំងដែលបានរងការវាយប្រហារពីគ្រោះធម្មជាតិនេះគឺខេត្ត Kunar និងខេត្ត Nangarhar​ ដែលស្ថិតនៅភាគខាងលិច នៃប្រទេសអាហ្វហ្គានីស្ថាន។ រហូតមកទល់នឹងពេលនេះប្រតិបត្តិការណ៍ស្វែករកជននៅក្រោមគំនរបាក់បែកនៅមិនទាន់បិទបញ្ចប់នៅឡើយទេ ហើយតួលេខអ្នកស្លាប់និងអ្នករងរបួសក៏អាចបន្តកើនឡើងបន្ថែមទៀតផងដែរ៕ អត្ថបទ៖ ភក្តី ប្រភព៖ The Strait Time

ថៃ៖ លោក Rueangkrai Leekitwattana ដែលជាអតីតសមាជិកព្រឹទ្ធសភាថៃម្នាក់ បានដាក់ញត្តិទៅកាន់គណៈកម្មការរៀបចំការបោះឆ្នោត ដើម្បីស្នើសុំឱ្យមានការរំលាយគណបក្សភឿថៃរបស់លោកស្រី Paetongtarn Shinawatra នេះបើយោងតាមការចុះផ្សាយរបស់បណ្តាញសារព័ត៌មាន Nation Thailand នៅក្នុងថ្ងៃទី ១ ខែកញ្ញា។ អតីតសមាជិកព្រឹទ្ធសភារូបនេះបានបញ្ជាក់ថា ការរំលាយគណបក្សភឿថៃអាចធ្វើទៅបានរយៈសាលក្រមរបស់តុលាការធម្មនុញ្ញថៃ ដែលបានសម្រេចដកតំណែងនាយករដ្ឋមន្ត្រីថៃរបស់លោកស្រី Paetongtarn Shinawatra នាពេលកន្លងមក។  លោក Rueangkrai Leekitwattana បានបន្តថា នៅក្នុងសាលក្រមរបស់តុលាការធម្មនុញ្ញមានចំណុចមួយ ដែលប្រហែលជាអាចពាក់ព័ន្ធទៅនឹងសកម្មភាពរបស់លោកស្រី Paetongtarn ក្នុងនាមជាមេដឹកនាំបក្សភឿថៃ ហើយចំណុចនោះក៏អាចចាត់ទុកថា សកម្មកម្មភាពរបស់លោកស្រី  Paetongtarn Shinawatra គឺជាការបំពានទៅនឹងច្បាប់ស្ដីពីគណបក្សនយោបាយឆ្នាំ ដែលបានបង្កើតឡើងនៅក្នុងឆ្នាំ២០១៧ ផងដែរ។ គួរកត់សម្គាល់ថា គណៈកម្មការរៀបចំការបោះឆ្នោតថៃមិនមានសិទ្ធិក្នុងការរំលាយគណបក្សនយោបាយណាមួយឡើយ តែគណៈកម្មការនេះអាចដាក់ញត្តិទាមទារឱ្យតុលាការធម្មនុញ្ញចេញសាលក្រមរំលាយគណបក្សភឿថៃបាន៕