អាមេរិក៖ ក្រុមហ៊ុនផលិតយន្តហោះ​ Boeing នឹងកាត់បន្ថយបុគ្គលិកចំនួន ១៧,០០០នាក់ ឬស្មើនឹង ១០% នៃកម្លាំងពលកម្មសរុបរបស់ក្រុមហ៊ុននៅទូទាំងពិភពលោក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍ ទី១២ ខែតុលា។ ទន្ទឹមនឹងបង្ហាញអំពីគម្រោងកាត់បន្ថយបុគ្គលិកក្នុងចំនួនដ៏ច្រើននេះ ក្រុមហ៊ុន Boeing ក៏បានប្រកាសព​ន្យាពេលនៃការដាក់សម្ពោធយន្តហោះជំនាន់ថ្មីប្រភេទ Boeing 777X ទៅឆ្នាំក្រោយផងដែរ។ ប្រភពខាងលើបានបន្តថា ការប្រកាសអំពីផែនការធំៗចំនួន ២ ខាងលើនេះត្រូវបានធ្វើឡើងក្រោយក្រុមហ៊ុនផលិតយន្តហោះដ៏ធំមួយនេះបានខាតបង់អស់ប្រមាណជា ៥ពាន់លានដុល្លារ បើគិតត្រឹមត្រីមាសទី៣ នៅក្នុងឆ្នាំ២០២៤នេះ។ គួររម្លឹកជូនថា បញ្ហាហិរញ្ញវត្ថុដែលក្រុមហ៊ុនផលិតយន្តហោះ Boeing បានជួបប្រទះនៅពេលនេះគឺវាបានបង្កឡើងដោយសារបញ្ហាចម្រូងចម្រាសមួយដែលបានបន្តអូសបន្ថាយអស់រយៈពេលជាច្រើនខែមកហើយ ដែលបញ្ហានោះគឺជាការនាំគ្នាធ្វើបាតុកម្មពីសំណាក់ក្រុមកម្មករនៅតំបន់ West Coast

អាមេរិក៖ តួលេខអ្នកបាត់បង់ជីវិតដោយសារឥទ្ធិពលរបស់ព្យុះ Milton ក្នុងរដ្ឋផ្លរីដា សហរដ្ឋអាមេរិក បានកើនឡើងដល់ ១៦នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍ ទី១២ ខែតុលា។ យ៉ាងណាក្តី ព្យុះ Milton មិនបានធ្វើឱ្យសម្ពាធទឹកសមុទ្រឡើងខ្ពស់នោះទេ ដូចនេះវាមិនបានបង្កឱ្យមានរលកយក្សឬគ្រោះថ្នាក់ផ្សេងៗចេញពីសមុទ្របន្ថែមទៀតនោះទេ។ បើតាមអាជ្ញាធរអាមេរិកបានបញ្ជាក់ថា គិតត្រឹមពេលនេះឥទ្ធិរបស់ព្យុះបានថយចុះច្រើនហើយ ខណៈអាជ្ញាធរក៏បានជួលជុលបណ្តាញភ្លើងជូនពលរដ្ឋជិត ២លាននាក់ ដែលបានរស់ដោយគ្មានភ្លើងអគ្គិសនីប្រើប្រាស់អស់ពេល ២ថ្ងៃកន្លងទៅនេះរួចវិញហើយដែរ។ បើទោះជាយ៉ាងនេះក្តី ទាំងអាជ្ញាធរអាមេរិកនិងពលរដ្ឋជាច្រើននឹងត្រូវចំណាយពេលជាច្រើនថ្ងៃបន្ថែមទៀតសម្រាប់ដោះស្រាយបញ្ហាមួយចំនួនដូចជា រៀបចំផ្ទះសម្បែងឡើងវិញ ជួលជុលផ្ទះ អគារ និងផ្លូវមួយចំនួនឡើងវិញផងដែរ៕ អត្ថបទ៖ ភក្តី ប្រភព៖ The Strait

ម៉ាឡេស៊ី៖ ក្រុមហ៊ុន ByteDance ដែលជាក្រុមហ៊ុនគ្រប់គ្រងលើបណ្តាញសង្គម TikToK គ្រោងនឹងកាត់បន្ថយបុគ្គលិកជាង ៧០០កន្លែង ដោយក្រុមហ៊ុននឹងប្រើប្រាស់បច្ចេកវិទ្យា AI ទៅជំនួយវិញ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃសុក្រ ទី១១ ខែតុលា។ បុគ្គលិកស្ថិតនៅក្នុងគម្រោងត្រូវកាត់បន្ថយនេះ គឺជាក្រុមបុគ្គលិក ដែលកំពុងបំពេញការងារក្នុងផ្នែកផ្សេងៗជាច្រើននៅក្នុងប្រទេសម៉ាឡេស៊ី។ បើតាមតំណាងក្រុមហ៊ុន ByteDance បានបញ្ជាក់ថា ការកាត់បន្ថយបុគ្គលិកនេះត្រូវបានធ្វើឡើងក្រោមគោលការ “ការផ្លាស់ប្តូរឆ្ពោះទៅកាន់បច្ចេកវិទ្យា AI” ដែលក្រុមហ៊ុននឹងបន្តអនុវត្តគោលការណ៍នៅតាមបណ្តាសាខារបស់ក្រុមហ៊ុនក្នុងប្រទេសជាច្រើនទៀតផងដែរក្នុងពេលអនាគត។ សូមបញ្ជាក់ថា ក្រុមហ៊ុន ByteDance គឺជាក្រុមហ៊ុនបច្ចេកវិទ្យាខ្នាតយក្សមួយ ដែលមានមូលដ្ឋាននៅក្នុងទីក្រុងប៉េកាំង ប្រទេសចិន ហើយក្រុមហ៊ុនមួយនេះមានការិយាល័យរបស់ខ្លួនទៅក្នុងទីក្រុងជាង ២០០កន្លែងផ្សេងទៀតនៅតាមបណ្តាប្រទេសជាច្រើនក្នុងពិភពលោកផងដែរ៕ អត្ថបទ៖ ភក្តី ប្រភព៖

អាមេរិក៖ យ៉ាងហោចណាស់មានពលរដ្ឋអាមេរិកចំនួន ១០នាក់បានស្លាប់បាត់បង់ជីវិតដោយសារតែឥទ្ធិពលរបស់ព្យុះ Milton នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅព្រឹកថ្ងៃសុក្រ ទី១១ ខែតុលា។ ក្រៅតែពីបានបណ្តាលឱ្យមានអ្នកស្លាប់បាត់បង់ជីវិតហើយ ឥទ្ធិពលរបស់ព្យុះក៏បានបណ្តាលឱ្យមានពលរដ្ឋអាមេរិកជាច្រើនលាននាក់ផ្សេងទៀតកំពុងរស់នៅដោយគ្មានភ្លើងអគ្គិសនីប្រើប្រាស់ផងដែរ។ យ៉ាងណាក្តីអាជ្ញាធរអាមេរិកបានបញ្ជាក់ថា ព្យុះ Milton មិនបានធ្វើឱ្យសម្ពាធទឹកសមុទ្រឡើងខ្ពស់នោះទេ ដូននេះគឺវាមិនបានបង្កឱ្យមានមានរលកយក្សឬគ្រោះថ្នាក់ផ្សេងៗនៅចេញពីសមុទ្រនោះទេ។ ប្រភពខាងលើបានបន្តថា គិតត្រឹមពេលនេះឥទ្ធិពលរបស់ព្យុះបានថយចុះបន្តិចហើយ តែអាជ្ញាធរអាចនឹងត្រូវការពេលវេលាយូរទើបអាចដោះបញ្ហាផ្សេងៗដែលបានបង្កឡើងដោយព្យុះមួយនេះបាន ដូចជាការតបណ្តាញភ្លើងអគ្គិសនីឡើងវិញ ជួលជុលផ្លូវ ជួសជុលផ្ទះឬអគារ ដែលបានរងនូវការខូចខាតជាដើម៕ អត្ថបទ៖ ភក្តី ប្រភព៖ The Strait Time

អាមេរិក៖ ព្យុះ Milton កំពុងបង្កការគំរាមគំហែងយ៉ាងខ្លាំងនៅក្នុងតំបន់សំខាន់ៗជាច្រើនក្នុងរដ្ឋផ្លរីដា សហរដ្ឋអាមេរិក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅរសៀលថ្ងៃព្រហស្បតិ៍ ទី១០ ខែតុលា។ ព្យុះ Milton ​បានធ្វើដំណើរទៅដល់រដ្ឋផ្លរីដា កាលពីម៉ោង ៨ និង ៣០នាទីយប់មិញនេះ ដោយព្យុះមួយនេះបានបក់បោកក្នុងល្បឿនប្រមាណជា ១២០គីឡូម៉ែត្រនៅក្នុងមួយម៉ោង។ គិតត្រឹមពេលនេះ ឥទ្ធិពលរបស់ព្យុះបានបណ្តាលឱ្យមានភ្លៀងឆ្លាក់យ៉ាងខ្លាំង ហើយតំបន់មួយចំនួនបានទទួលរងសម្ពាធទឹកភ្លៀងយ៉ាងច្រើននោះ ក៏ត្រូវប្រឈមនឹងបញ្ហាបាក់ដីយ៉ាងឆាប់រហ័សបន្ថែមទៀតផងដែរ។ បើតាមអាជ្ញាធរអាមេរិកបានបញ្ជាក់ថា ឥទ្ធិពលរបស់ព្យុះបានបំផ្លាញផ្ទះអស់ជាង ១០០ខ្នង ហើយបានបង្ខំឱ្យអាជីវកម្មជាច្រើនត្រូវផ្អាកដំណើរការជាបណ្តោះអាសន្ន​ ខណៈពលរដ្ឋជាង ១,៨លាននាក់កំពុងរស់នៅដោយគ្មានភ្លើងអគ្គីសនីប្រើប្រាស់។ យ៉ាងណាក្តី ឥទ្ធិពលរបស់ព្យុះ Milton នៅមិនទាន់បង្កឱ្យពលរដ្ឋអាមេរិកណាម្នាក់បានស្លាប់បាត់បង់ជីវិត ឬរងគ្រោះថ្នាក់ធ្ងន់ធ្ងរនៅឡើយទេ៕  

ថៃ៖ រថភ្លើងអគ្គិសនីខ្នាតតូចដែលកំពុងដាក់បញ្ចូលភ្លើងមួយគ្រឿងបានឆេះ និងបង្កឱ្យមានអគ្គីភ័យឆាបឆេះយ៉ាងសន្ធោសន្ធៅនៅក្នុងប្រទេសថៃ នេះបើយោងតាមការចុះផ្សាយរបស់បណ្តាញសារព័ត៌មាន Thai Press នៅក្នុងថ្ងៃព្រហស្បតិ៍ ទី១០ ខែតុលា។ រថភ្លើងអគ្គិសនីខ្នាតតូចមួយគ្រឿងគឺជាកម្មសិទ្ធរបស់សាកលវិទ្យាល័យ Rangsit ដែលមានទីតាំងស្ថិតនៅក្នុងខេត្ត Pathum Thani ភាគកណ្តាលនៃប្រទេសថៃ។ ប្រភពខាងលើបានបន្តថា ក្រោយរថភ្លើងអគ្គិសនីបានឆេះហើយ វាក៏បានបណ្តាលឱ្យមានភ្លើងឆេះរាលដាលដល់រថយន្តដឹកអ្នកដំណើរខ្នាតតូចចំនួនមួយគ្រឿង និងរថយន្តក្រុងចំនួន ២គ្រឿង ដែលចតនៅក្បែរនោះផងដែរ ខណៈរថយន្តដឹកអ្នកដំណើរខ្នាតតូចបានផ្ទុះយ៉ាងខ្លាំងផងដែរ។ យ៉ាងណាក្តី ហេតុការណ៍នេះមិនបានបណ្តាលឱ្យមានអ្នកណាម្នាក់បានរងគ្រោះថ្នាក់នោះទេ ខណៈក្រុមអ្នកពន្លត់អគ្គីភ័យចំនួន ៣នាក់បានប្រើប្រាស់ពេលអស់ ៤០នាទី ទើបអាចពន្លត់ភ្លើងបានទាំងស្រុង៕    អត្ថបទ៖ ភក្តី ប្រភព៖ Thai Press

អាមេរិក៖ អាជ្ញាធរនៃរដ្ឋចំនួន ១៤នៅក្នុងសហរដ្ឋអាមេរិកបានដាក់ពាក្យប្តឹងក្រុមហ៊ុន TikTok ទៅកាន់តុលាការដោយបានចោទប្រកាន់ថា បណ្តាញសង្គម TikTok បានជំរុញឱ្យមានវិបត្តិសុខភាពផ្លូវចិត្តក្នុងចំណោមក្មេងជំទង់ នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃពុធ ទី៩ ខែតុលា។ នៅក្នុងពាក្យបណ្តឹងបានអះអាងថា TikTok មានមុខងារធ្វើឱ្យកុមារញៀនទៅនឹងកម្មវិធី ហើយបណ្តាញសង្គមរបស់ចិនមួយនេះក៏មានចេតនាបំភាន់សាធារណជនអំពីផលប៉ះពាល់នៃការប្រើប្រាស់ក្នុងរយៈពេលវែងផងដែរ។ ឆ្លើយតបទៅនឹងពាក្យបណ្តឹងខាងលើនេះ ក្រុមហ៊ុន TikTok បានលើកឡើងថា​ ការចោទប្រកាន់របស់អាជ្ញាធរអាមេរិកពុំមានភាពត្រឹមត្រូវនិងមានភស្តុតាងច្បាស់លាស់ឡើង ហើយការចោទប្រកាន់នេះគ្រាន់តែជាផ្នែកមួយជួយគាំទ្រទៅនឹងគម្រោងហាមឃាត់កម្មវិធី TikTok ពីសំណាក់រដ្ឋាភិបាលអាមេរិកតែប៉ុណ្ណោះ។ គួររម្លឹកជូនថា រឿងរ៉ាវចម្រូងចម្រាសរវាងអាមេរិកជាមួយនិងក្រុមហ៊ុន TikTok បានកើតឡើងអស់រយៈជាយូរមកហើយ ដោយអាមេរិកតែងចោទប្រកាន់ថា TikTok ជាចារកម្មរបស់រដ្ឋាភិបាលចិន ដែលតែងតែលួចប្រមូលយកទិន្នន័យរបស់ពលរដ្ឋអាមេរិកឱ្យរដ្ឋាភិបាលចិន ខណៈអាមេរិកក៏គ្រោងនឹងអនុវត្តច្បាប់ហាមឃាត់បណ្តាញសង្គមមួយនេះមិនឱ្យដំណើរការនៅលើទឹកដីអាមេរិកនៅដើមឆ្នាំក្រោយនេះផងដែរ ប្រសិនបើក្រុមហ៊ុន TikTok មិនព្រមលក់ភាគហ៊ុនខ្លះឱ្យអាមេរិកគ្រប់គ្រងនោះទេ៕ អត្ថបទ៖ ភក្តី ប្រភព៖ 

អាមេរិក៖ ពលរដ្ឋអាមេរិកដែលកំពុងរស់នៅក្នុងរដ្ឋ Florida រាប់លាននាក់កំពុងប្រញាប់ប្រញាល់ធ្វើការជម្លៀសខ្លួនចេញពីផ្ទះសម្បែង ដើម្បីរក្សាសុវ​ត្ថិភាពពីព្យុះដ៏កំណាចមួយ ដែលមានឈ្មោះថា Milton នេះបើយោងតាមការចុះផ្សាយរបស់បណ្តាញសារព័ត៌មាន BBC នៅរសៀលថ្ងៃពុធ ទី៩​​ ខែតុលា។ តាមការព្យាករណ៍របស់អាជ្ញាធរឧតុនិយមអាមេរិកបានបញ្ជាក់ថា ព្យុះនឹងធ្វើដំណើរមកដល់ទីក្រុង Tampa ក្នុងរដ្ឋ Florida នៅយប់នេះក្នុងលឿន ២៧០គីឡូម៉ែត្រក្នុងមួយម៉ោង។ បើតាមអាជ្ញាធរអាមេរិកក៏បានព្រមានផងដែរថា ព្យុះ Milton នឹងក្លាយជាព្យុះមានឥទ្ធិដ៏អាក្រក់បំផុតមួយបើគិតក្នុងរយៈពេលជាច្រើនឆ្នាំចុងក្រោយនេះ ដែលអាចបង្កឱ្យមានគ្រោះថ្នាក់ដល់អាយុជីវិតមនុស្សផងដែរ។ គួរកត់សម្គាល់ថា វត្តមានរបស់ព្យុះ Milton បានមកដល់ទឹកដីសហរដ្ឋអាមេរិកក្នុងរយៈពេល ២សប្តាហ៍ប៉ុណ្ណោះ បន្ទាប់ពីតំបន់ភាគជើងអាមេរិកបានទទួលរងនូវការវាយប្រហារដោយផ្ទុះ Helene ដែលបានបណ្តាលឱ្យមានពលរដ្ឋស្លាប់បាត់បង់ជីវិតអស់ចំនួន ២២៥នាក់ និងបានបំផ្លាញប្រព័ន្ធហេដ្ឋារចនាសម្ព័ន្ធនៅក្នុងទីក្រុងសំខាន់មួយចំនួនអស់ជាច្រើនកន្លែងផងដែរ៕ អត្ថបទ៖ ភក្តី ប្រភព៖ BBC

ឥណ្ឌូនេស៊ី៖ ប្រទេសឥណ្ឌូនេស៊ីនឹងបើកដំណើរការផ្ទះបាយផ្តល់អាហារមិនគិតថ្លៃរាប់ពាន់កន្លែងនៅឆ្នាំ២០២៥ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃអង្គារ ទី៨​ ខែតុលា។ កម្មវិធីផ្តល់អាហារដោយមិនគិតថ្លៃនេះគឺជាគោលនយោបាយរបស់លោកប្រធានាធិបតីទើបជាប់ឆ្នោត Prabowo Subianto ដែលតាមគម្រោងគឺលោកនឹងត្រូវចូលកាន់តំណែងជាប្រធានាធិបតីនៃប្រទេសឥណ្ឌូនេស៊ីជាផ្លូវការនៅក្នុងថ្ងៃទី២០​ ខែតុលាខាងមុខនេះ។តាមផែនការគឺកម្មវិធីផ្តល់អាហារមិនគិតថ្លៃនេះនឹងត្រូវអនុវត្តជាច្រើនដំណាក់កាល ដោយនៅដើមឆ្នាំ២០២៥ ផ្ទះបាយផ្តល់អាហារមិនគិតថ្លៃនឹងត្រូវបើកដំណើរចំនួន ៥,០០០កន្លែង និងបន្តបង្កើនឡើងដល់ ៣០,០០០កន្លែងនៅក្នុងឆ្នាំ២០២៧។ ប្រភពខាងលើបានបន្តថា កម្មវិធីពិសេសនេះនឹងរួមចំណែកផ្តល់អាហារដោយមិនគិតថ្លៃដល់ពលរដ្ឋគោលដៅប្រមាណជា ៨៣លាននាក់ក្នុងមួយឆ្នាំ ដោយនៅក្នុងនោះមានទាំងស្រ្តីមានផ្ទៃពោះនិងកូនសិស្សសាលាផងដែរ ខណៈគម្រោងនេះនឹងត្រូវចំណាយប្រាក់អស់ចំនួន ២៨ពាន់លានដុល្លារនៅក្នុងមួយឆ្នាំ៕  អត្ថបទ៖ ភក្តី ប្រភព៖ The Strait Time

ឥណ្ឌូនេស៊ី៖ អាជ្ញាធរឥណ្ឌូនេស៊ីបានសម្រេចបិទគេហទំព័រលក់ទំនិញ Temu ដែលជាទីផ្សារលក់ទំនិញ Online ខ្នាតយក្សនិងកំពុងមានប្រជាប្រិយភាពខ្លាំងបំផុតមួយរបស់ចិន ដើម្បីការពារអាជីវកម្មខ្នាតតូចនិងខ្នាតមធ្យមនៅក្នុងស្រុក នេះបើយោងតាមការចុះផ្សាយរបស់បណ្តាញសារព័ត៌មាន South China Morning Post នៅក្នុងថ្ងៃអង្គារ ទី៨ ខែតុលា។ គួរកត់សម្គាល់ថា Temu គឺជាផ្សារ Online ដែលស្ថិតនៅក្រោមការគ្រប់គ្រងរបស់ក្រុមហ៊ុន PDD Holdings ហើយផ្សារ Online មួយនេះគឺជាដៃគូអាជីវកម្មជាមួយរោងចក្រជាច្រើននៅក្នុងប្រទេសចិនដោយផ្ទាល់តែម្តង។ ដោយសារតែ Temu គឺជាផ្សារលក់ទំនិញចេញពីរោងចក្រក្នុងប្រទេសចិនដោយផ្ទាល់នោះ គេបានកត់សម្គាល់ឃើញថា ទំនិញគ្រប់មុខនៅក្នុងទីផ្សារមួយនេះមានតម្លៃទាបបំផុត​ បើធៀបទៅនឹងតម្លៃទំនិញនៅតាមបណ្តាប្រទេសជាច្រើន ហើយព្រោះតែកត្តាតម្លៃដ៏ថោកនេះវាបានជម្រុញឱ្យពលរដ្ឋនៅតាមបណ្តាប្រទេសមួយចំនួនឈប់ទិញទំនិញផលិតនៅក្នុងស្រុករបស់ខ្លួន និងនាំគ្នាទិញទំនិញពី Temu យ៉ាងគំហុក។ បើតាមអាជ្ញាធរឥណ្ឌូនេស៊ីបានបង្ហាញនូវការព្រួយបារម្ភថា ទំនោរនៃការសម្រុកទិញទំនិញពី Temu ពីសំណាក់ប្រជាពលរដ្ឋរបស់ខ្លួននឹងបំផ្លាញសហគ្រាសខ្នាតតូច និងមធ្យមក្នុងស្រុកបន្តិចម្តងៗនិងអាចឈានទៅដល់ការបំផ្លាញទ្រង់ទ្រាយធំផងដែរនៅក្នុងរយៈពេលវែង។ សូមបញ្ជាក់ជូនថា