កូរ៉េខាងត្បូង៖ កាលពីព្រឹកមិញប្រទេសកូរ៉េខាងត្បូងបានរងនូវការវាយប្រហារដោយគ្រោះរញ្ជួយដីកម្រិត ៤,៨រ៉ិចទ័រ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី១២ ខែមិថុនា។ គ្រោះរញ្ជួយដីបានកើតឡើងនៅម៉ោង ៨ និង ២៣នាទីព្រឹកសម្រាប់ម៉ោងនៅក្នុងប្រទេសកូរ៉េខាងត្បូង ដែលត្រូវនឹងម៉ោង ៦ និង ២៣នាទីព្រឹកសម្រាប់ម៉ោងក្នុងប្រទេសកម្ពុជា។ ប្រភពខាងលើបានបន្តថា​ គ្រោះរញ្ជួយដីបានកើតឡើងទៅក្នុងតំបន់ Buan ដែលមានចម្ងាយប្រមា​ណជា ២០៥គីឡូម៉ែត្រពីទីក្រុងសេអ៊ូល។ បើតាមអាជ្ញាធរកូរ៉េខាងត្បូងបានបញ្ជាក់ថា គិតត្រឹមពេលនេះគេនៅមិនទាន់ទទួលបានរបាយការណ៍បង្ហាញថាមានពលរដ្ឋកូរ៉េខាងត្បូងណាម្នាក់បានរងគ្រោះថ្នាក់ពីហេតុកាណ៍ខាងលើនេះនៅឡើយទេ ហើយការខូចខាតហេដ្ឋារចនាសម្ព័ន្ធទ្រង់ទ្រាយធំវិញក៏មិនមានដែរ។ យ៉ាងណាក្តី ក្រោយសំឡេងស៊ឺរ៉ែនប្រាប់អំពីគ្រោះថ្នាក់នៃគ្រោះរញ្ជួយដីបានបន្លឺឡើងគឺវាបានបង្កឱ្យភាពចលាចលក្នុងចំណោមពលរដ្ឋជាច្រើននាក់ផងដែរ៕ អត្ថបទ៖ភក្តី ប្រភព៖ The Strait Time

អង់គ្លេស៖ សៀវភៅដែលមានអាយុកាលចំណាស់ជាងគេមួយក្បាលនៅលើពិភពលោក ត្រូវបានលក់ចេញក្នុងតម្លៃរហូតដល់ជាង ៣លានដុល្លារ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី១១ ខែមិថុនា។ សៀវភៅមួយក្បាលនេះ គឺជាព្រះគម្ពីរដែលនិយាយរៀបរាប់អំពីសាសនា ដែលមានចំណងជើងថា The Crosby-Schoyen Codex​ និងជាកម្មសិទ្ធិផ្ទាល់ខ្លួនរបស់អ្នកជំនួញជនជាតិន័រវេសម្នាក់ឈ្មោះលោក Martin Schoyen។ ប្រភពខាងលើបានបន្តថា សៀវភៅមួយក្បាលនេះមានអាយុកាលយ៉ាងតិចណាស់ ១,៦០០ឆ្នាំ ហើយសៀវភៅនេះត្រូវបានកសិករម្នាក់រកឃើញដោយចៃដន្យនៅក្នុងប្រទេសអេហ្ស៊ីបកាលពីឆ្នាំ ១៩៥០។ ចំពោះដំណើរការនៃការដាក់លក់សៀវភៅវិញ គឺដំបូងឡើយគេបានដាក់លក់ដេញថ្លៃនៅលើបណ្តាញអ៊ីនធឺណិតជាមួយនឹងតម្លៃចាប់ផ្តើម ១,៧លានផោន(២,១៦លានដុល្លារ) ហើយការដេញថ្លៃចុងក្រោយបំផុតត្រូវបានរៀបចំឡើងនៅក្នុងទីក្រុងឡុងដ៍ កាលពីពេលថ្មីៗនេះជាមួយនឹងតម្លៃចុងក្រោយគឺ ៣,០៦៥,០០០លានផោន (៣,៨៩៨,០០០លានដុល្លារ)៕  អត្ថបទ៖ ភក្តី ប្រភព៖ The Strait Time

ម៉ាឡេស៊ី៖ បុរសកំហូចម្នាក់ត្រូវអស់លក្ខណ៍ក្រោយទៅអុកឡុកក្នុងហាងលក់ទំនិញមួយកន្លែង ដែលមានម្ចាស់ហាងជាអតីតជើងឯកការ៉ាត់តេខ្សែក្រវ៉ាត់ខ្មៅ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី១១​ ខែមិថុនានេះ។ ហេតុការណ៍គួរឱ្យហួសចិត្តនេះបានកើតឡើងនៅម៉ោងប្រមាណជា ២យប់ ក្នុងហាងលក់ទំនិញមួយកន្លែងស្ថិតនៅក្នុងតំបន់ Seberang Jaya រដ្ឋ Penang នៃប្រទេសម៉ាឡេស៊ី។ ប្រភពខាងលើបានបន្តថា ក្នុងពេលកើតហេតុនោះបុរសដែលជាជនខិលខូចបានដើរចូលទៅក្នុងហាងទាំងមានអាការៈស្រវឹង ហើយក្រោយមកគាត់ក៏ចាប់ផ្តើមរករឿងគេឯងនៅក្នុងហាងរហូតដល់មានការប្រកែកគ្នាជាមួយនឹងម្ចាស់ហាង ដែលមានឈ្មោះថា Wu Ye Rong អាយុ ៤៩ឆ្នាំទៀតផង។ បន្ទាប់ពីប្រកែងគ្នាបានបន្តិច បុរសជាជនខិលខូចបានដើរទៅយកមួកសុវត្ថិភាពពីលើម៉ូតូមកវាយលើលោក Wu Ye Rong ហើយក្នុងនាមជាអ្នកចេះក្បាច់គុនស្រាប់លោក Wu Ye Rong ក៏បានប្រើក្បាច់ការពារខ្លួន និងវាយបកទៅវិញរហូតដល់បុរសជាជនខិលខូចបានដួលទៅលើដី។ យ៉ាងណាក្តី

ឥណ្ឌូនេស៊ី៖ តុលាការឥណ្ឌូនេស៊ីបានសម្រេចផ្តន្ទាទោសអ្នកកំប្លែងម្នាក់ឱ្យជាប់ពន្ធនាគាររយៈពេល ៧ខែ ក្រោយរូបគាត់បាននិយាយលេងសើចដែលមានន័យប្រមាថទៅលើអ្នកប្រាជ្ញឥស្លាម នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃអង្គារ ទី១១ ខែមិថុនា។ អ្នកកំប្លែងរូបនេះមានឈ្មោះថា Aulia Rakhman រស់នៅក្នុងខេត្ត Lampung ដែលស្ថិតនៅលើកោះស៊ូម៉ាត្រានៃប្រទេសឥណ្ឌូនេស៊ី។ ប្រភពខាងលើបានបន្តថា កាលពីអំឡុងខែធ្នូកន្លងទៅ លោក Aulia Rakhman បានចូលរួមក្នុងព្រឹត្តិការណ៍ធំមួយដែលមានអ្នកទស្សនាជាច្រើននាក់ ហើយពេលនោះលោក​បាននិយាយបែបលេងសើចចំពោះឈ្មោះ Muhammad (មហាម៉ាត់) ដែលជាឈ្មោះរបស់អ្នកប្រាជ្ញនិងជាស្ថាបនិកនៃសាសនាឥស្លាម។ បើតាមអាជ្ញាធរឥណ្ឌូនេស៊ីបានបញ្ជាក់ថា ទោះជាការនិយាយរបស់លោក Aulia Rakhman គឺជាការលេងសើចក៏ពិតមែន តែវាមិនមែនជារឿងដែលគួរកើតមាននោះទេ ហើយការសម្រេចផ្តន្ទាទោសចំពោះរូបគាត់គឺដើម្បីកុំឱ្យមានអ្នកផ្សេងទៀតហ៊ានយកគំរូតាមរូបគាត់ទៀត៕ អត្ថបទ៖ ភក្តី ប្រភព៖ The Strait

សិង្ហបុរី៖ ក្រុមហ៊ុនអាកាសចរណ៍ Singapore Airlines បានសម្រេចផ្តល់ប្រាក់សំណងចំនួន ១០,០០០ដុល្លារ ទៅកាន់រាល់អ្នកដំណើរដែលបានរងរបួសស្រាលក្នុងហេតុការណ៍យន្តហោះរលាក់ខ្លាំងនៅលើអាកាសនាពេលកន្លងមក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time​ នៅក្នុងថ្ងៃអង្គារ ទី១១ ខែមិថុនា។ សម្រាប់អ្នករងរបួសធ្ងន់ធ្ងរវិញគឺនឹងត្រូវបានទទួលបានប្រាក់សំណងរហូតដល់ ២៥,០០០ដុល្លារ។ គួររម្លឹកជូនថា ហេតុការណ៍គ្រោះថ្នាក់ដ៏កម្រខាងលើនេះបានកើតឡើងកាលពីថ្ងៃទី២១ ខែឧសភាកន្លងទៅនេះ ខណៈក្នុងពេលកើតហេតុនោះយន្តហោះមានផ្ទុកអ្នកដំណើរចំនួន២១១នាក់ រួមជាមួយនិងក្រុមអ្នកបម្រើការងារនៅលើយន្តហោះចំនួន១៨នាក់ផងដែរ។ នៅក្នុងហេតុការណ៍គ្រោះថ្នាក់នោះមានអ្នកដំណើរជនជាតិអង់គ្លេសអាយុ ៧៣ឆ្នាំបានស្លាប់បាត់បង់ជីវិត ហើយអ្នកដំណើរដែលបានរងរបួសធ្ងន់មួយចំនួនត្រូវសម្រាកព្យាបាលជំងឺនៅក្នុងមន្ទីរពេទ្យក្រុងបាងកក បន្ទាប់ពីយន្តហោះបានសុំធ្វើការចុះចតជាបន្ទាន់នៅក្នុងប្រទេសថៃ៕ អត្ថបទ៖ ភក្តី ប្រភព៖ The Strait Time

វៀតណាម៖ យ៉ាងហោចណាស់មានពលរដ្ឋវៀតណាមចំនួន ៣នាក់បានស្លាប់បាត់បង់ជីវិតដោយសារទឹកជំនន់ នេះបើយោងតាមការចុះផ្សាយរប​ស់បណ្តាញសារព័ត៌មាន VN Express នៅក្នុងថ្ងៃចន្ទ ទី១០ ខែមិថុនា។ ទឹកជំនន់ដែលកំពុងបង្កការគំរាមគំហែងនៅវៀតណាមក្នុងពេលនេះគឺជាជំនន់ទឹកភ្លៀងដែលបានជន់លិចយ៉ាងឆាប់រហ័ស ក្រោយវៀតណាមបានទទួលសម្ពាធទឹកភ្លៀងក្នុងបរិមាណយ៉ាងច្រើននៅក្នុងរយៈពេល ២៤ម៉ោងចុងក្រោយនេះ។ ប្រភពខាងលើបានបន្តថា ជនរងគ្រោះដែលបានស្លាប់បាត់បង់ជីវិតទាំង ៣រូបនោះគឺជាពលរដ្ឋរស់នៅក្នុងទីក្រុង Ha Giang ប៉ែកខាងជើងនៃប្រទេសវៀតណាម ជាទីកន្លែងដែលបានទទួលរងនូវសម្ពាធទឹកភ្លៀងក្នុងបរិមាណជាមធ្យមចន្លោះពី ១០០-៣០០ mm ខណៈតំបន់ខ្លះបរិមាណទឹកភ្លៀងមានរហូតដល់ ៣៤៧ mm ឯណោះ។ បើតាមអាជ្ញាធរវៀតណាមបានបញ្ជាក់ថា បរិមាណទឹកភ្លៀងនេះគឺជាបរិមាណដ៏ច្រើនបំផុតមិនធ្លាប់មាននោះទេនៅក្នុងរយៈពេល ៥៩ឆ្នាំចុងក្រោយនេះ ហើយវាបានបង្កើតឱ្យមានទឹកជំនន់កម្ពស់រហូតដល់ ២ម៉ែត្រផងដែរ។ ក្រៅតែពីបានបណ្តាលឱ្យមានមនុស្សស្លាប់ហើយ ឥទ្ធិពលរបស់ជំនន់ទឹកភ្លៀងក៏បានបង្កឱ្យមានបញ្ហាជាច្រើនផ្សេងទៀតផងដែរ ដូចជាមានតំបន់ខ្លះត្រូវប្រឈមនឹងបញ្ហាបាក់ដី ផ្លូវថ្នល់សំខាន់ៗជាច្រើនត្រូវបានកាត់ផ្តាច់ ហើយអគ្គិសនីនៅក្នុងតំបន់មួយចំនួនក៏ត្រូវកាត់ផ្តាច់ផងដែរ៕   អត្ថបទ៖

ហ្វីលីពីន៖ ប្រទេសហ្វីលីពីនបានសម្រេចធ្វើការហាមឃាត់សាច់បក្សី និងផលិតផលបសុបក្សីពីប្រទេសអូស្ត្រាលីជាបណ្តោះអាសន្ន នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍។ ការសម្រេចដ៏បន្ទាន់នេះ ត្រូវបានធ្វើឡើងក្រោយជំងឺផ្តាសាយបក្សីហាក់កំពុងតែមានការរាតត្បាតយ៉ាងខ្លាំងនៅក្នុងប្រទេសអូស្រ្តាលីក្នុងរយៈពេលជាច្រើនសប្តាហ៍ចុងក្រោយនេះ។ សូមបញ្ជាក់ជូនថា ជំងឺផ្តាសាយបក្សីដែលកំពុងបង្កការគំរាមគំហែងនៅតាមកសិដ្ឋានក្នុងប្រទេសអូស្រ្តាលីនារយៈពេលថ្មីៗនេះ មានចំនួន ៣ប្រភេទ ដូចជា ប្រភេទ H7N3, ប្រភេទ H7N9 និងប្រភេទ H5N1 ដែលសុទ្ធតែជាមេរោគបំប្លែងខ្លួន។ ឆ្លើយតបនឹងការរាតត្បាតជំងឺផ្តាសាយបក្សីទ្រង់ទ្រាយធំនេះ អាជ្ញាធរអូស្រ្តាលី បានសម្លាប់សត្វមាន់ដែលគេចិញ្ចឹមសម្រាប់យកពងអស់ជាងកន្លះលានក្បាល ខណៈជំងឺផ្តាសាយបក្សី នៅមិនទាន់បង្កគ្រោះថ្នាក់ដល់ពលរដ្ឋអូស្រ្តាលីណាម្នាក់នៅឡើយទេ៕ អត្ថបទ៖ ភក្តី ប្រភព៖ បាងកកប៉ុស្តិ៍

កូរ៉េខាងត្បូង៖ រដ្ឋាភិបាលនៃប្រទេសកូរ៉េខាងត្បូងគ្រោងនឹងបន្ថែមថ្ងៃឈប់សម្រាកសម្រាប់ “ព្យាបាលបញ្ហាគ្មានកូន” ឱ្យដល់ចំនួន ៦ថ្ងៃដើម្បីលើកទឹកចិត្តពលរដ្ឋខ្លួនសម្រេចចិត្តយកកូនឱ្យបានកាន់តែច្រើន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍ ទី៨ ខែមិថុនា។ សូមបញ្ជាក់ថា នាពេលបច្ចុប្បន្នច្បាប់ឈប់សម្រាកពិសេសដែលប្រទេសមួយចំនួនគ្មានការអនុវត្តនេះគឺមានរយៈពេលត្រឹមតែ ៣ថ្ងៃប៉ុណ្ណោះ។ ប្រភពខាងលើបានបន្តថា គម្រោងបន្ថែមថ្ងៃឈប់សម្រាកពិសេសនេះត្រូវបានធ្វើឡើងក្រោយអាជ្ញាធរកូរ៉េខាងត្បូងបានរកឃើញថា ក្រុមស្រ្តីដែលកំពុងបម្រើការងារនៅតាមក្រុមហ៊ុនជាច្រើននៅក្នុងប្រទេសកូរ៉េខាងត្បូងនៅតែខកខានមិនបានទទួលយកច្បាប់ពិសេសនេះ ព្រោះតែពេលវេលាហាក់ដូចជាខ្លីខ្លាំងពេកសម្រាប់ពួកគាត់ ឬក្រុមហ៊ុនខ្លះហាក់មិនមានការលើកចិត្តផ្សេងៗឱ្យបុគ្គលិកជាស្រ្តីទទួលបានច្បាប់នេះទេ។ តាមរយៈការបន្ថែមចំនួនថ្ងៃឈប់សម្រាកនេះអាជ្ញាធរកូរ៉េខាងត្បូងរំពឹងថា ពលរដ្ឋជាច្រើននឹងមានឱកាសសមស្របក្នុងការយកកូន ខណៈវិធានការនេះគឺជាវិធានការមួយក្នុងចំណោមវិធានការជាច្រើនដែលរដ្ឋាភិបាលបានដាក់ចេញក្នុងគោលបំណងលើកទឹកចិត្តឱ្យពលរដ្ឋខ្លួនយកកូនឱ្យបានច្រើន។ សូមបញ្ជាក់ជូនថា ការធ្លាក់ចុះអាត្រាកំណើតឬអត្រាពលរដ្ឋកើតថ្មីបានកំពុងក្លាយជាបញ្ហាចម្បងមួយនៅក្នុងសង្គមកូរ៉េខាងត្បូង ដ្បិតពលរដ្ឋកូរ៉េខាងត្បូងកាន់តែច្រើនឡើងៗហាក់លែងមានអារម្មណ៍ចង់បានកូនព្រោះបញ្ហាពិបាកចិញ្ចឹមកូន ខណៈពលរដ្ឋនៅលីវជាច្រើនក៏មិនមានគម្រោងចង់រៀបការនិងបង្កើតគ្រួសារដែរ៕ អត្ថបទ៖ ភក្តី ប្រភព៖ The Strait Time

ហាណូយ៖ អាជ្ញាធរក្រុងហាណូយបានដាក់ចេញនូវការណែនាំឱ្យមានការរឹតបន្តឹងលើសកម្មភាពជួញដូរសាច់ឆ្កែនិងសាច់ឆ្មាជាដាច់ខាត នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍ ទី៨ ខែមិថុនា។ អនុនាយកដ្ឋានបសុព្យាបាល ជលផល និងបសុពេទ្យទីក្រុងហាណូយបានបញ្ជាក់ថា​ សេចក្តីណែនាំខាងលើនេះត្រូវបានធ្វើឡើងក្នុងគោលបំណងការពារសុខភាពសាធារណៈនិងលើកកម្ពស់ក្រមសីលធម៌នៅក្នុងសង្គមផងដែរ។ ប្រភពខាងលើបានបន្តថា វិធានការតឹងរឹងដែលទីក្រុងហាណូយបានដាក់ចេញនៅពេលនេះក៏ជាផ្នែកមួយជម្រុញឱ្យមានការលុបបំបាត់សកម្មភាពទទួលទានសាច់ឆ្កែទាំងស្រុងនៅទូទាំងប្រទេសនៅពេលអនាគតផងដែរ។ គួរកត់សម្គាល់ថា វិធានការរបស់ទីក្រុងហាណូយបានលេចរូបរាងឡើងក្រោយអាជ្ញាធរសុខាភិបាលវៀតណាមបានរកឃើញករណីមានពលរដ្ឋឆ្លងជំងឺឆ្កែឆ្កួត​ចំនួន ១០២ករណី ដែលបានកើតឡើងនៅក្នុងខេត្តចំនួន ២៩ផ្សេងគ្នាកាលពីពេលថ្មីៗនេះ។ សូមបញ្ជាក់ជូនផងដែរថា សាច់ឆ្កែគឺជាអាហារដ៏ពេញនិយមមួយសម្រាប់ពលរដ្ឋវៀតណាម​អស់រយៈពេលជាយូរឆ្នាំមកហើយ ដូចនេះការលុបបំបាត់វប្បធម៌ទទួលទានសាច់ប្រភេទនេះអាចមិនមែនជារឿងងាយស្រួលឡើយ៕ អត្ថបទ៖ ភក្តី ប្រភព៖ The Strait Time  

ថៃ៖ អាជ្ញាធរថៃបានចាប់ខ្លួនជនឧក្រិដ្ឋជនជាង ១៤,០០០នាក់នៅក្នុងប្រតិបត្តិការណ៍បង្រ្កាបបទល្មើសឆបោកតាមប្រព័ន្ធ Online នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍ ទី៨ ខែមិថុនា។ ករណីឆបោកទ្រង់ទ្រាយធំនេះត្រូវបានធ្វើឡើងក្នុងរូបភាពជាច្រើនដូចជា ក្រុមជនខិលខូចបានបង្កើតមជ្ឈមណ្ឌលហៅទូរស័ព្ទ (Call Center) បង្កើតគម្រោងដាក់ប្រាក់វិនិយោគក្លែងក្លាយ និងបង្កើតគេហទំព័រលេងល្បែងដើម្បីបោកយកប្រាក់ពីសំណាក់ក្រុមអ្នកប្រើប្រាស់បណ្តាញសង្គមនៅក្នុងប្រទេសថៃ។ បើតាមលោក Siriwat Depor ដែលជាអ្នកនាំពាក្យឱ្យស្ថាប័នប៉ូលិសថៃបានបញ្ជាក់ថា ជនខិលខូចដែលត្រូវបានប៉ូលិសចាប់ខ្លួនក្នុងរយៈពេល ៧ខែចុងក្រោយនេះមានចំនួនសរុប ១៤,៨២៦នាក់ ហើយនៅក្នុងការបង្រ្កាបនេះអាជ្ញាធរថៃក៏បានធ្វើការបង្កកទ្រព្យសម្បត្តិរបស់ក្រុមឧក្រិដ្ឋជនសរុបចំនួន ៤,៥៦ពាន់លានបាត (១២៣,៩៦៣,៦៤៥ ដុល្លារអាមេរិក) ផងដែរ។ អ្នកនាំពាក្យរូបនេះបានបន្តថា គិតត្រឹមពេលនេះកិច្ចខិតខំប្រឹងប្រែងរបស់អាជ្ញាធរថៃចំពោះករណីខាងលើនេះបានផ្តល់មកវិញនូវលទ្ធផលល្អៗចំនួន៣ រួមមាន ចាប់ខ្លួនឧក្រិដ្ឋជនដែលជាមេក្លោងធំៗបានជាច្រើននាក់ បានបំផ្លាញនូវហេដ្ឋារចនាសម្ព័នឬបណ្តាញការងាររបស់ក្រុមឧក្រិដ្ឋជន និងបានរុះរើបណ្តាញទូរទាត់ប្រាក់ជាច្រើនទម្រង់