អាមេរិក៖ យោងតាមការចុះផ្សាយរបស់បណ្តាញសារព័ត៌មាន Boston25 News បានឲ្យដឹងថា ប៉ូលិសជាន់ខ្ពស់អាមេរិកបានធ្វើការព្រមានជាសាធារណៈទៅកាន់ជាប្រជាពលរដ្ឋដែលមានរថយន្តផ្ទាល់ខ្លួនឲ្យចេះការពារប្រេងសាំងនៅក្នុងរថយន្តរបស់ពួកគេ​ ដ្បិតថ្មីៗនេះសកម្មភាពនៃការលួចសាំងចេញពីរថយន្តបានកើតមានឡើងជាប​ន្តបន្ទាប់។ និន្នាការដ៏កម្រនេះបានកើតឡើងក្រោយពេលតម្លៃប្រេងសាំងនៅក្នុងទីផ្សារបានហក់ឡើងយ៉ាងគំហុកនៅទូទាំងពិភពលោក ខណៈនៅអាមេរិកសាំងមួយហ្គាឡុងមានតម្លៃរហូតដល់ ៤,៣ ដុល្លារ។ បើតាមប៉ូលិសអាមេរិកបានបញ្ជាក់ថា កំណើនតម្លៃសាំងដ៏ខ្ពស់កប់ពពកនេះបានជម្រុញឲ្យមានជនខិលខូចមួយចំនួនបែកគំនិតដើរលួចសាំងចេញពីរថយន្តរបស់អ្នកដទៃ ដោយក្រុមចោរទាំងនោះបានប្រើប្រាស់ប្រដាប់បូមសាំងយ៉ាងឆាប់រហ័ស និងមានករណីខ្លះក្រុមចោរបានធ្វើការខួងបាតរថយន្តទៀតផងដើម្បីបង្ហូរយកសាំង។ ឆ្លើយតបនឹងករណីលួចសាំងចេញពីរថយន្តនេះ ប៉ូលិសអាមេរិកបានណែនាំឲ្យម្ចាស់រថយន្តគ្រប់រូបត្រូវទិញឧបករណ៍ចាក់ការពារកន្លែងធុងសាំងរថយន្ត កុំចតរថយន្តនៅក​ន្លែងស្ងាត់ឬដាច់ឆ្ងាយពីគេពេក ហើយយកល្អគួរផ្អាកជិះរថយន្តមួយរយៈសិនតែម្តងដើម្បីការពារកុំឲ្យគេលួចសាំងផង និងដើម្បីកាត់បន្ថយការចំណាយលើការចាក់សាំងរថយន្តផងដែរ៕ អត្ថបទ៖ ភក្តី ប្រភព៖ Boston25 News, abc7

ចិន៖ កាសែត បាងកកប៉ុស្តិ៍ បានរាយការណ៍ថា មានពលរដ្ឋចិនប្រមាណជា ៣០លាននាក់កំពុងស្ថិតនៅក្នុងការបិទខ្ទប់ ខណៈចំនួនអ្នកឆ្លងជំងឺកូវីដ-១៩ នៅទូទាំងប្រទេសចិនកាន់តែកើនច្រើនឡើងយ៉ាងឆាប់រហ័ស។ ប្រភពបានបន្តថា ពលរដ្ឋចិនដែលកំពុងរស់នៅក្រោមការបិទខ្ទប់នោះគឺជាក្រុមពលរដ្ឋដែលរស់នៅក្នុងទីក្រុងចំនួន ១៣កន្លែងផ្សេងគ្នា ខណៈអាជ្ញាធរសុខាភិបាលចិនកំពុងតែរៀបចំការធ្វើតេស្តទ្រង់ទ្រាយធំនៅក្នុងទីក្រុងទាំងអស់នេះផងដែរ។ គួររម្លឹកជូនថា កាលពីថ្ងៃអង្គារ ទី១៥ ខែមីនា ម្សិលមិញនេះចិនបានរកឃើញអ្នកឆ្លងជំងឺកូវីដ-១៩ ចំនួន ៥,២៨០នាក់ ដែលជាចំនួនច្រើនបំផុតមិនធ្លាប់មានសម្រាប់ប្រទេសចិននោះទេរាប់ចាប់តាំងពីពេលមានការរាតត្បាតជំងឺកូវីដ-១៩ ជាលើកដំបូងមក។ សូមបញ្ជាក់ផងដែរថា ចំនួនអ្នកឆ្លងជំងឺកូវីដ-១៩ នៅក្នុងប្រទេសចិនហាក់មិនច្រើននោះទេបើធៀបទៅនឹងបណ្តាប្រទេសធំៗផ្សេងទៀតនៅជុំវិញពិភពលោក តែសម្រាប់ប្រទេសដែលបានសម្រេចអនុវត្តវិធានការទប់ស្កាត់ការរាតត្បាតជំងឺកូវីដ-១៩ ឲ្យស្ថិតនៅកម្រិតសូន្យនោះគឺបានចាត់ទុកថាតួលេខអ្នកឆ្លងនេះជាចំនួនក៏ច្រើនមួយនិងត្រូវតែចាត់វិធានការតឹងរឹងជាប​ន្ទាន់ផងដងដែរ៕ អត្ថបទ៖ ភក្តី ប្រភព៖ បាងកកប៉ុស្តិ៍

កូរ៉េខាងត្បូង៖ ទីភ្នាក់ងារគ្រប់គ្រងនិងបង្ការជំងឺឆ្លងនៃប្រទេសកូរ៉េខាងត្បូងបានប្រកាសពីការរកឃើញអ្នកឆ្លងជំងឺកូវីដ-១៩ ចំនួន ៤០០, ៧៤១​នាក់សម្រាប់របាយការណ៍នៅក្នុងថ្ងៃពុធ ទី១៦ ខែមីនានេះ ហើយវាក៏ជាចំនួនអ្នកឆ្លងច្រើនបំផុតមិនធ្លាប់មានផងដែរបើគិតចាប់ពីមានការរាតត្បាតជំងឺកូវីដ-១៩មក។ គួររម្លឹកថា កាលពីថ្ងៃអង្គារ ទី១៥ ខែមីនា ម្សិលមិញនេះប្រទេសកូរ៉េខាងត្បូងក៏បានរកឃើញអ្នកស្លាប់ដោយជំងឺកូវីដ-១៩ ក្នុងចំនួនក៏ច្រើនបំផុតមិនធ្លាប់ផងដែរ ពោលគឺមានចំនួន ២៩៣នាក់។ បើតាមមន្ត្រីសុខាភិបាលជាន់ខ្ពស់កូរ៉េខាងត្បូងបានបញ្ជាក់ថា ក្នុងចំណោមករណីឆ្លងទាំងនោះគឺភាគច្រើនជាមេរោគប្រភេទអូមីក្រុង ហើយពេលនេះអាជ្ញាធរសុខាភិបាលក៏បានត្រៀមបង្កើនកន្លែងសង្គ្រោះអ្នកជំងឺប្រមាណជា​ ៣០%បន្ថែមទៀតផងដែរ ព្រោះតាមការព្យាករណ៍គឺនៅសប្តាហ៍បន្ទាប់នេះចំនួនជនរងគ្រោះដែលត្រូវទៅព្យាបាលនៅមន្ទីរពេទ្យនឹងកើនឡើងយ៉ាងគំហុក។ គួររបញ្ជាក់ជូនថា​ គិតត្រឹមពេលនេះគឺមានពលរដ្ឋកូរ៉េខាងជាង ៦០% បានចាក់វ៉ាក់សាំងរហូតដល់ជម្រុញ ខណៈកូរ៉េខាងត្បូងមានពលរដ្ឋសរុបប្រមាណជា ៥២លាននាក់៕ អត្ថបទ៖ ភក្តី ប្រភព៖ Channel News Asia

អាឡឺម៉ង់៖ ប្រទេសអាឡឺម៉ង់បានសម្រេចទិញយន្តហោះចម្បាំងប្រភេទ F-35 ចំនួន ៣៥គ្រឿងពីសហរដ្ឋអាមេរិក នេះបើយោងតាមការចុះផ្សាយរបស់បណ្តាញសារព័ត៌មាន CNN កាលពីថ្ងៃទី ១៥ ខែមីនាម្សិលមិញនេះ។ ការបញ្ជាទិញនេះត្រូវបានប្រកាសជាសាធារណៈដោយលោកអធិការបតី Olaf Scholz ហើយវាក៏ជាការបញ្ជាទិញគ្រឿងសភាវុធក្នុងទំហំដ៏ធំបំផុតជាលើកដំបូងសម្រាប់ប្រទេសអាឡឺម៉ង់ផងដែរ។ បើតាមរដ្ឋាភិបាលអាឡឺម៉ង់បានបញ្ជាក់ថា ការសម្រេចចិត្តទិញយន្តហោះចម្បាំងទាំងនេះគឺជាផ្នែកមួយនៃការពង្រឹងវិស័យការពារជាតិ ក្រោយពេលអាឡឺម៉ង់បានមើលឃើញពីការឈ្លានពានរបស់កងទ័ពរុស្ស៊ីទៅកាន់ប្រទេសអ៊ុយក្រែន។   លោកអធិការបតី Olaf Scholz បានឲ្យដឹងបន្ថែមថា​ យន្តហោះចម្បាំងប្រភេទ F-35 នេះនឹងត្រូវប្រើប្រាស់ជំនួយយន្តហោះចម្បាំងប្រភេទ Tornados ដែលជាយន្តហោះចម្បាំងស៊េរីចាស់ដែលអាឡឺម៉ង់ធ្លាប់ប្រើប្រាស់នាពេលកន្លងមក។​ អធិការបតី រួបនេះក៏បានបញ្ជាក់ផងដែរថា រដ្ឋាភិបាលអាឡឺម៉ង់បានសម្រេចបង្កើនការចំណាយលើវិស័យយោធាក្នុងទំហំទឹកប្រាក់ពី ៤៧ពាន់លានអឺរ៉ូក្នុងឆ្នាំ ២០២១ រហូតដល់ ១០០ពាន់លានអឺរ៉ូសម្រាប់នៅក្នុងឆ្នាំ

ចិន៖ អាជ្ញាធរសុខាភិបាលនៃប្រទេសចិនបានប្រកាសពីការរកឃើញអ្នកឆ្លងជំងឺកូវីដ-១៩ ចំនួន ៥,២៨០នាក់ សម្រាប់របាយការណ៍នៅក្នុងថ្ងៃអង្គារ ទី១៥ ខែមីនានេះ ដែលតួលេខនេះមានការកើនឡើងទ្វេដងបើធៀបទៅនឹងតួលេខអ្នកឆ្លងកាលពីថ្ងៃកន្លងទៅ។ បើតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ បានឲ្យដឹងថា តួលេខអ្នកឆ្លងកូវីដ-១៩ ខាងលើនេះគឺជាតួលេខអ្នកឆ្លងប្រចាំថ្ងៃច្រើនបំផុតមិនធ្លាប់មានសម្រាប់ប្រទេសចិនផងដែរ បើគិតចាប់តាំងពីមានការរាតត្បាតជំងឺកូវីដ-១៩ ជាលើកដំបូងមក។ នៅក្នុងរបាយការណ៍របស់អាជ្ញាធរសុខាភិបាលចិនបានបញ្ជាក់ថា តំបន់ដែលមានការរាតត្បាតខ្លាំងជាងគេនោះគឺខេត្ត Jilin ភាគខាងជើងប្រទេសចិន ដែលខេត្តមួយនេះតែម្នាក់ឯងមានតួលេខអ្នកឆ្លងរហូតដល់ទៅ ៣,០០០ករណី។ ឆ្លើយតបនឹងកំណើតនៃអ្នកឆ្លងជំងឺកូវីដ-១៩ នេះ អាជ្ញាធរចិនបានសម្រេចបិទខ្ទប់ទីក្រុងចំនួន ១១ហើយ ដោយក្នុងនោះក៏មានទាំងទីក្រុង Shenzhen ដែលជាទីក្រុងបច្ចេកវិទ្យាដ៏ធំរបស់ចិននិងមានពលរដ្ឋចំនួន ១៧លាននាក់កំពុងរស់នៅផងដែរ៕ អត្ថបទ៖ ភក្តី ប្រភព៖ Channel News Asia

សហរដ្ឋអាមេរិកបានព្រមានទៅកាន់ប្រទេសចិនឲ្យមិនឲ្យផ្តល់ជំនួយផ្នែកហិរញ្ញវត្ថុនិងយោធាទៅកាន់ ប្រទេសរុស្ស៊ីនោះទេ នេះបើយោងតាមការចុះផ្សាយនៅក្នុងបណ្តាញសារព័ត៌មាន Channel News Asia នៅព្រឹកថ្ងៃអង្គារ ទី១៥ ខែមីនានេះ។ ការព្រមានខាងលើនេះត្រូវបានធ្វើឡើងស្របពេលដែលពិភពលោកបន្តដាក់ទណ្ឌកម្មចំពោះអ្នកនយោបាយជាន់ខ្ពស់និងក្រុមមហាសេដ្ឋីរុស្ស៊ីកាន់តែច្រើននាក់បន្ថែមទៀត ខណៈដែល សកម្មភាពឈ្លានពានរបស់កងទ័ពរុស្ស៊ីទៅលើប្រទេសអ៊ុយក្រែនបានសម្លាប់មនុស្សរាប់ពាននាក់ហើយ​ បើគិតចាប់ពីពេលបើកការវាយប្រហារនៅថ្ងៃទី ២៤​ ខែកុម្ភៈមក។ នៅចំពោះមុខការឈ្លានពានចូលក្នុងប្រទេសអ៊ុយក្រែននេះ រុស្ស៊ីតែងអះអាងអំពីសកម្មភាពរបស់ខ្លួនថាជា “ប្រតិបត្តិការណ៍យោធាពិសេស” ដែលត្រូវបានធ្វើឡើងក្នុងគោលបំណងការពារប្រទេសនិងទប់ស្កាត់អំពើប្រល័យពូជសាសន៍ពីសំណាក់ប្រទេសដែលជាសត្រូវជាមួយរុស្ស៊ី។ បើទោះជាយ៉ាងនេះក៏ដោយចុះ សហរដ្ឋអាមេរិកនិងបណ្តាលប្រទេសជាសម្ព័ន្ធមិត្តបានបដិសេធចំពោះការអះអាងរបស់រុស្ស៊ីនិងបានចាត់ថាវាគ្រាន់តែជាលេសរបស់រុស្ស៊ីប៉ុណ្ណោះ ហើយជាក់ស្តែងសកម្មភាពនេះគឺជាការឈ្លានពានចូលក្នុងប្រទេសអ៊ុយក្រែនដោយខុសច្បាប់និងឃោឃៅបំផុត៕ អត្ថបទ៖ ភក្តី ប្រភព៖ Channel News Asia  

រុស្ស៊ី៖ យោងតាមការចុះផ្សាយរបស់បណ្តាញសារព័ត៌មាន Channel News Asia បានឲ្យដឹងថា កាលពីថ្ងៃចន្ទ ទី១៤ ខែមីនា ម្សិលមិញនេះ មានអ្នកប្រឆាំងនឹងសង្គ្រាមរុស្ស៊ីម្នាក់បានចេញមករំខានការផ្សាយផ្ទាល់កម្មវិធីព័ត៌មានរបស់បណ្តាញទូរទស្សន៍ Channel One ដែលជាស្ថានីយ៍ទូរទស្សន៍រដ្ឋរុស្ស៊ី។ សកម្មភាពដែលអ្នកប្រឆាំងនឹងសង្គ្រាមរុស្ស៊ីរូបនោះបានធ្វើគឺគាត់បានដើរចេញមកពីក្រោយស្ទូឌីយោនិងបានលើកបដាធំមួយដើម្បីសម្តែងនូវការប្រឆាំងចំពោះសង្គ្រាមរុស្ស៊ីនៅលើទឹកដីអ៊ុយក្រែន ខណៈកម្មវិធីព័ត៌មានមួយនេះកំពុងមានមនុស្សទស្សនារាប់លាននាក់។ នៅលើបដានោះមានសរសេរអក្សទាំងជាភាសាអង់គ្លេសនិងភាសារុស្ស៊ីដែលមានអត្ថន័យថា៖ “គ្មានសង្គ្រាម” “បញ្ឈប់សង្គ្រាម” “កុំជឿលើការឃោសនា” “ពួកគេកំពុងកុហកអ្នកនៅទីនេះ” និងពាក្យ “សកម្មភាពដែលពលរដ្ឋរុស្ស៊ីប្រឆាំងនឹងសង្គ្រាមត្រូវបានគេបិទបាំង”។ គួរបញ្ជាក់ជូនថា ឥរិយាបថខាងលើនេះត្រូវបានគេចាត់ទុកថាជាសកម្មភាពដ៏កម្រមួយដែលបានកើតឡើងនៅក្នុងស្ថានីយ៍ទូរទស្សន៍រដ្ឋរុស្ស៊ី ដ្បិតតាមធម្មតាស្ថានីយ៍មួយនេះមាននិន្នាការគាំទ្ររដ្ឋបាលរុស្ស៊ី។ ជាងនេះទៅទៀតវាក៏បានបង្ហាញអំពីការខ្វែងគំនិតគ្នាយ៉ាងដាច់ស្រឡះរវាងពលរដ្ឋរុស្ស៊ីជាមួយនឹងរដ្ឋាភិបាលរុស្ស៊ីជុំវិញការឈ្លានពានចូលក្នុងប្រទេសអ៊ុយក្រែនដែលបង្កឲ្យមានសង្គ្រាមនិងវិបត្តិយ៉ាងច្រើននៅជុំវិញពិភពលោក៕ អត្ថបទ៖ ភក្តី ប្រភព៖ Channel News Asia  

ថៃ៖ ភ្ញៀវទេសចរជនជាតិរុស្ស៊ីរាប់ពាន់នាក់កំពុងសម្រុករកផ្លូវចាកចេញពីប្រទេសថៃដើម្បីត្រលប់ទៅប្រទេសកំណើតវិញ នេះបើយោងតាមសេចក្តីរាយការណ៍របស់អាជ្ញាធរថៃដែលបានចុះផ្សាយបន្តដោយបណ្តាញសារព័ត៌មាន Channel News Asia កាលពីថ្ងៃអាទិត្យ ទី១៣ ខែមីនា ម្សិលមិញនេះ។ ការសម្រុកចាកចេញរបស់ពលរដ្ឋរុស្ស៊ីនេះត្រូវបានកើតឡើង ខណៈពេលដែលទណ្ឌកម្មរបស់ពិភពលោកចំពោះសកម្មភាពដែលកងទ័ពរុស្ស៊ីបានចូលទៅឈ្លានពានក្នុងប្រទេសអ៊ុយក្រែនកាន់តែមានភាពធ្ងន់ធ្ងរឡើងៗនិងបានធ្វើឲ្យប៉ះពាល់ដល់ពលរដ្ឋរុស្ស៊ីជាច្រើននាក់ដែលកំពុងស្នាក់នៅក្នុងប្រទេសរុស្ស៊ីនិងក្រុមពលរដ្ឋរុស្ស៊ីដែលកំពុងដើរកំសាន្តនៅតាមបណ្តាប្រទេសមួយចំនួនផងដែរ។ បើតាមអាជ្ញាធរថៃទេសចរណ៍បានបញ្ជាក់ថា គិតត្រឹមពេលនេះគឺមានពលរដ្ឋរុស្ស៊ីចំនួន ៣,១០០ នាក់កំពុងជាប់គាំងនៅក្នុងខេត្តភូកេត ពលរដ្ឋរុស្ស៊ីចំនួន ២,០០០នាក់កំពុងជាប់នៅក្នុងខេត្តសាមុយ និងពលរដ្ឋរុស្ស៊ីជាច្រើននាក់ផ្សេងកំពុងជាប់នៅក្នុងខេត្តក្រាប៊ី ប៉ាងញ៉ា និងក្រុងបាងកក ហើយក្រុមអ្នកទេសចររុស្ស៊ីទាំងនេះសុទ្ធតែមិនអាចរកមធ្យោបាយត្រលប់ទៅប្រទេសកំណើតបានវិញ ដ្បិតប្រទេសជាច្រើនបានសម្រេចបិទចរាចរណ៍ដែនអាកាសជាមួយរុស្ស៊ីរួចអស់ហើយ។ អាជ្ញាធរទេសចរណ៍ថៃក៏បានឲ្យដឹងផងដែរថា ពេលនេះរដ្ឋាភិបាលថៃកំពុងស្វែងរកមធ្យោបាយដើម្បីជួយឲ្យពលរដ្ឋរុស្ស៊ីទាំងអស់នេះអាចត្រលប់ទៅកាន់ប្រទេសពួកគេវិញ ដែលមធ្យោបាយនោះទំនងជាការប្រើប្រាស់ជើងហោះហើរពិសេស៕ អត្ថបទ៖ ភក្តី ប្រភព៖ Channel News Asia  

រុស្ស៊ី៖ កាលពីថ្ងៃអាទិត្យ ទី១៣ ខែមីនា ម្សិលមិញនេះ ប៉ូលិសរុស្ស៊ីបានធ្វើការឃាត់ខ្លួនពលរដ្ឋជាង ៨០០ នាក់ដែលបានចុះថ្នល់ធ្វើបាតុកម្មប្រឆាំងនឹងសកម្មភាពដែលកងទ័ពរុស្ស៊ីបានឈ្លានពានចូលទៅក្នុងអ៊ុយក្រែន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia។  ចលនាធ្វើបាតុកម្មប្រឆាំងនឹងសកម្មភាពដែលកងទ័ពរុស្ស៊ីបានបើកការឈ្លានពានចូលក្នុងទឹកដីអ៊ុយក្រែននេះបានកើនឡើងរយៈពេល ៣សប្តាហ៍មកហើយ និងបានកើតឡើងនៅតាមបណ្តាទីក្រុងសំខាន់ៗក្នុងប្រទេសរុស្ស៊ីចំនួន ៣៧កន្លែងផ្សេងគ្នាផងដែរ។ យោងទៅតាមរបាយការណ៍របស់ OVD-Info ដែលជា​គម្រោង​ប្រព័ន្ធ​ផ្សព្វផ្សាយ​សិទ្ធិ​មនុស្ស​ឯករាជ្យ​ប្រចាំនៅក្នុងប្រទេស​រុស្ស៊ី​បានបង្ហាញថា គឺមានពលរដ្ឋចំនួន ៨១៧នាក់ដែលត្រូវបានប៉ូលិសរុស្ស៊ីចាប់ខ្លួនកាលពីថ្ងៃម្សិលមិញនេះ ខណៈអ្នកទៅយកព័ត៌នៅក្នុងទីក្រុងមូស្គូមួយចំនួនក៏ត្រូវបានប៉ូលិសរុស្ស៊ីបណ្តេញចេញដែរ ប្រសិនបើពួកគេមិនបានបង្ហាញកាតជាអ្នកកាសែតឲ្យបានត្រឹមត្រូវនោះ។ គួររម្លឹកជូនថា កាលពីសប្តាហ៍មុនប៉ូលិសរុស្ស៊ីបានធ្វើការបង្រ្កាបចលនាធ្វើបាតុកម្មដូចនេះគ្នាយ៉ាងចាស់ដៃ និងបានចាប់ខ្លួនពលរដ្ឋពលរដ្ឋប្រមាណជា ៥,០០០នាក់ឯណោះ៕ អត្ថបទ៖ ភក្តី ប្រភព៖ Channel News Asia

រុស្ស៊ី៖ ចាប់តាំងពីពាក់កណ្តាលយប់ថ្ងៃអាទិត្យម្សិលមិញមក ពលរដ្ឋនៅក្នុងប្រទេសរុស្ស៊ីមិនអាចចូលទៅប្រើប្រាស់បណ្តាញសង្គម Instagram  បានទៀតនោះទេ​ នេះបើយោងតាមការចុះផ្សាយនៅក្នុងបណ្តាញសារព័ត៌មាន Daily Mail ។ បញ្ហាអសកម្មនេះត្រូវបានកើតឡើងបន្ទាប់ពីក្រុមហ៊ុន Meta ដែលជាក្រុមហ៊ុនគ្រប់គ្រងបណ្តាញសង្គម Facebook និង Instagram បានប្រកាសកាលពីសប្តាហ៍មុនថា ក្រុមហ៊ុននឹងអនុញ្ញាតឲ្យអ្នកប្រើប្រាស់បណ្តាញសង្គមរបស់ខ្លួននៅក្នុងប្រទេសមួយចំនួនដូចជា រុស្ស៊ី អ៊ុយក្រែន និងប៉ូឡូញអាចបង្ហោះសារអំពាវនាវឲ្យមានអំពើហឹង្សាប្រឆាំងនឹងប្រទេសរុស្ស៊ីនិងកងកម្លាំងរុស្ស៊ីដែលកំពុងធ្វើការឈ្លានពាននៅក្នុងប្រទេសអ៊ុយក្រែនបាន។ ជាងនេះទៅទៀតក្រុមហ៊ុន ​Meta ថែមទាំងអនុញ្ញាតឲ្យបង្ហោះសារដែលមានខ្លឹមសារអំពាវអំពីការស្លាប់របស់លោកប្រធានាធិបតីរុស្ស៊ី Vladimir Putin  និងប្រធានាធិបតីបេឡារុស្សគឺលោក Alexander Lukashenko ទៀតផង។ យ៉ាងណាក្តី ការបង្ហោះសារទាំងនេះត្រូវបានអនុញ្ញាតដោយមានលក្ខខណ្ឌមួយចំនួនដូចជាកំណត់ទីតាំង គោលបំណង និងអត្តសញ្ញាណបុគ្គលគោលដៅឲ្យបានច្បាស់លាស់ ដើម្បីចៀសវាងការប៉ះពាល់ជាសាធារណៈ។ បើតាមក្រុមហ៊ុន Meta បានឲ្យដឹងថា