អៀរឡង់៖ មនុស្សចំនួន ១២នាក់បានរងរបួសក្រោយយន្តហោះដឹកអ្នកដំណើរមួយគ្រឿងបានជួបប្រទះនូវបញ្ហារលាក់យ៉ាងខ្លាំងក្នុងអំឡុងពេលហោះហើរ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃចន្ទ ទី២៧​ ខែឧសភានេះ។ យន្តហោះដែលបានជួបបញ្ហាខាងលើនេះគឺជាយន្តហោះដឹកអ្នកដំណើរប​ស់ក្រុមហ៊ុនអាកាសចរណ៍ Qatar Airways  ដែលមានទិសដៅហោះធ្វើដំណើរចេញពីប្រទេសកាតាឆ្ពោះទៅកាន់ប្រទេសអៀរឡង់។ ប្រភពខាងលើបានបន្តថា ជើងហោះហើរខាងលើនេះមានលេខ QR017 ប្រតិបត្តិការណ៍ដោយយន្តហោះម៉ាក Boeing 787 ហើយយន្តហោះបានជួបប្រទេសបញ្ហានៅក្នុងអំឡុងពេលហោះហើរកាត់ប្រទេសតួគី។ ក្រោយមកយន្តហោះក៏បានសូមធ្វើការចុះចតជាបន្ទាន់នៅក្នុងព្រលានយន្តហោះអន្តរជាតិ Dublin Airport ដោយសារមានអ្នកដំណើរចំនួន ៦នាក់ និងក្រុមអ្នកបម្រើការងារនៅលើយន្តហោះចំនួន ៦នាក់បានរងរបួស។ គួររម្លឹកជូនថា កាលពីប៉ុន្មានថ្ងៃមុននេះយន្តហោះរបស់ក្រុមហ៊ុនអាកាសចរណ៍ Singapore Airline មួយគ្រឿងក៏បានជួបប្រទះនូវហេតុការណ៍ដូចនេះគ្នាផងដែរ ហើយពេលនោះមានអ្នកដំណើរម្នាក់បានស្លាប់បាត់បង់ជីវិត និងជាច្រើននាក់បានរងរបួសធ្ងន់ធ្ងរ៕ អត្ថបទ៖

ហ្វីលីពីន៖ កោះ Luzon របស់ប្រទេសហ្វីលីពីនកំពុងទទួលរងនូវការគំរាមគំហែងដោយខ្យល់ព្យុះក្នុងកម្រិតដ៏គ្រោះថ្នាក់មួយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time កាលពីយប់ថ្ងៃអាទិត្យ ទី២៦ ខែឧសភានេះ។ ឥទ្ធិពលរបស់ព្យុះបានកំពុងតែបង្កឱ្យមានខ្យល់បក់បោកនិងភ្លៀងធ្លាក់យ៉ាងខ្លាំងរហូតធ្វើឱ្យតំបន់មួយចំនួនត្រូវបានជន់លិចដោយជំនន់ទឹកភ្លៀងផងដែរ។ ប្រភពខាងលើបានបន្តថា នៅចំពោះមុខស្ថានភាពដ៏គ្រោះថ្នាក់នេះអាជ្ញាធរហ្វីលីពីនបានសម្រេចធ្វើការជម្លៀសពលរដ្ឋប្រមាណជា ៨,០០០នាក់ជាបន្ទាន់​ ខណៈពលរដ្ឋជាច្រើនពាន់នាក់ផ្សេងទៀតកំពុងតែរស់នៅដោយគ្មានភ្លើងអគ្គិសនីប្រើប្រាស់។ យ៉ាងណាក្តី រហូតមកទល់នឹងពេលនេះនៅមិនទាន់មានពលរដ្ឋហ្វីលីពីនណាម្នាក់បានរងគ្រោះថ្នាក់ធ្ងន់ធ្ងរ ឬត្រូវស្លាប់បាត់បង់ជីវិតដោយសារគ្រោះធម្មជាតិនេះនៅឡើយទេ៕ អត្ថបទ៖ ភក្តី ប្រភព៖ The Strait Time  

ឥណ្ឌា៖ ទារកទើបនឹងកើតចំនួន ៦នាក់បានស្លាប់បាត់បង់ជីវិតនៅក្នុងហេតុការណ៍ភ្លើងឆេះមន្ទីរពេទ្យកុមារមួយកន្លែងនៅក្នុងប្រទេសឥណ្ឌា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time។ មន្ទីរពេទ្យដែលជាកន្លែងកើតហេតុនោះមានឈ្មោះថា Vivek Vihar មានទីតាំងស្ថិតនៅក្នុងទីក្រុង New Delhi ដែលជារដ្ឋធានីនៃប្រទេសឥណ្ឌា។ ប្រភពខាងលើបានបន្តថា អគ្គិភ័យបានផ្តើមលេបត្របាក់មន្ទីរពេទ្យនៅម៉ោង​ ១១ និង ៣២នាទីយប់នៃថ្ងៃអាទិត្យ ២៦​ ខែឧសភានេះ ខណៈនៅក្នុងមន្ទីរពេទ្យមានទារកទើបនឹងកើតសរុបចំនួន ១៨នាក់។ យ៉ាងណាក្តី ទារកចំនួន ១២នាក់ត្រូវបានក្រុមអ្នកពន្លត់អគ្គីភ័យជួយសង្គ្រោះបានទាន់ពេលវេលា ហើយទារកចំនួន ៦នាក់ផ្សេងទៀតបានស្លាប់នៅក្នុងអណ្តាតភ្លើង៕ អត្ថបទ៖ ភក្តី ប្រភព៖ The Strait Time

ប៉ាពួញូហ្គីណេ៖ មនុស្សជាង ៣០០នាក់បានកប់ជាប់នៅក្រោមគំនរដីក្រោយហេតុការណ៍បាក់ដីដ៏ឆាប់រហ័សមួយបានកើតឡើង នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍ ទី២៥ ខែឧសភានេះ។ ហេតុការណ៍អកុសលនេះបានកើតឡើងនៅក្នុងភូមិមួយស្ថិតនៅប៉ែកខាងជើងនៃប្រទេសប៉ាពួញូហ្គីណេ ដែលជាដែនដីមួយនៅជិតប្រទេសអូស្រ្តាលី។ បើតាមអាជ្ញាធរប្រចាំនៅក្នុងតំបន់កើតហេតុខាងលើបានបញ្ជាក់ថា រហូតមកទល់នឹងពេលនេះក្រុមអ្នកជួយសង្គ្រោះនៅមិនទាន់អាចជីកកកាយយកមនុស្សចេញពីក្រោមគំនរដីបានគ្រប់ចំនួននៅឡើយទេ ខណៈចំនួនអ្នកស្លាប់ក៏អាចមានផងដែរ។ ប្រភពខាងលើបានបន្តថា ក្រៅតែពីបានបង្កគ្រោះថ្នាក់ដល់មនុស្សហើយហេតុការណ៍បាក់ដីខាងលើនេះ ក៏បានបំផ្លាញផ្ទះរបស់ប្រជាពលរដ្ឋអស់ចំនួន ១,១៨២ខ្នងផងដែរ៕  អត្ថបទ៖ ភក្តី ប្រភព៖ The Strait Time

ឥណ្ឌា៖ រលកកម្តៅបានបណ្តាលឱ្យពលរដ្ឋឥណ្ឌាចំនួន ៩នាក់ស្លាប់បាត់បង់ជីវិត​ នេះបើយោងតាមការចុះផ្សាយរបស់បណ្តាញសារព័ត៌មាន The Stria Time កាលពីយប់ថ្ងៃទី២៤ ខែឧសភានេះ។ ហេតុការណ៍អកុសលនេះបានកើតឡើងនៅក្នុងក្រុង Barmer រដ្ឋ​ Rajasthan ភាគខាងលិចនៃប្រទេសឥណ្ឌ ជាតំបន់មានសីតុណ្ហភាពបានកើតឡើងដល់ ៤៨,៨អង្សាសេ។ បើតាមអាជ្ញាធរឥណ្ឌាបានបញ្ជាក់ថា ជនរងគ្រោះទាំង ៩នាក់ខាងលើនេះបានស្លាប់ដោយសារបញ្ហាដាច់សរសៃរឈាមនៅក្នុងខួរក្បាលក្រោយពួកគេបានព្យាយាមធ្វើការងារនៅក្រោមកម្តៅថ្ងៃអស់រយៈពេលជាច្រើនម៉ោង។ សូមបញ្ជាក់ជូនថា ក្រុង Barmer បានប្រឈមនឹងបញ្ហារលកកម្តៅអស់រយៈពេលជាង ១ស​ប្តាហ៍មកហើយ ខណៈបញ្ហារលកកម្តៅនេះក៏បានជម្រុញឱ្យសាលារៀនមួយចំនួនត្រូវផ្អាកការសិក្សាមុនពេលកំណត់ផងដែរ៕ អត្ថបទ៖ ភក្តី ប្រភព៖ The Stria Time

វៀតណាម៖ អគ្គីភ័យបានលេបត្របាក់អគារអាផាតមិនដ៏ធំមួយយ៉ាងឆាប់រហ័សនិងបានបណ្តាលឱ្យពលរដ្ឋវៀតណាមសរុបចំនួន ១៤នាក់ត្រូវស្លាប់បាត់បង់ជីវិត នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី២៤ ខែឧសភានេះ។ ទីតាំងដែលជាកន្លែងកើតហេតុនោះគឺស្ថិតនៅកណ្តាលទីក្រុងហាណូយ ដែលជាទីក្រុងសេដ្ឋកិច្ចដ៏មានសក្តានុពលបំផុតមួយសម្រាប់ប្រទេសវៀតណាម​។ បើតាមអាជ្ញាធរវៀតណាមបានបញ្ជាក់ថា អគ្គីភ័យបានចាប់ផ្តើមឆេះនៅម៉ោង ១២ និង ៣០​នាទីយប់រំលងអាធ្រាត្រ ហើយរហូតដល់ម៉ោង ៦ និង ២០នាទីព្រឹកមិញនេះទើបគេអាចពន្លត់ភ្លើងទាំងស្រុងបាន។ ប្រភពខាងលើបានបន្តថា នៅក្នុងអំឡុងពេលភ្លើងកំពុងតែឆេះជាន់ខាងលើបំផុតរបស់អាផាតមិននោះក៏មានការផ្ទុះជាច្រើនដងផងដែរ តែគេមិនបានដឹងថា ជាការផ្ទុះអ្វីនោះទេ។ សូមបញ្ជាក់ជូនថា ក្រៅតែពីបានរកឃើញអ្នកស្លាប់ហើយហេតុការណ៍អកុសលនេះក៏បានបណ្តាលឱ្យមនុស្សចំនួន ៣នាកផ្សេងទៀតបានរងរបួសធ្ងន់ផងដែរ៕  អត្ថបទ៖ ភក្តី ប្រភព៖ The Strait Time

អាមេរិក៖ រដ្ឋកាលីហ្វ័រញ៉ា សហរដ្ឋអាមេរិកគ្រោងចំណាយប្រាក់ជាង ២០ពាន់លានដុល្លារដើម្បីសាងសង់ប្រឡាយសម្រាប់ស្តុកទឹកភ្លៀងក្រោមដីដ៏ធំមួយ នេះបើយោងតាមការចុះផ្សាយរបស់បណ្តាញសារព័ត៌មាន VN Express នៅក្នុងថ្ងៃព្រហស្បតិ៍ ទី២៣ ខែឧសភានេះ។ បើតាមលោក Gavin Newsom អភិបាលរដ្ឋកាលីហ្វ័រញ៉ាបានបញ្ជាក់ថា កាលពីឆ្នាំ២០២០កន្លងទៅការវាយតម្លៃចំពោះការសាងសង់ប្រព័ន្ធប្រឡាយទឹកក្រោមដីមួយនេះមានតម្លៃត្រឹម ១៦ពាន់លានដុល្លារប៉ុណ្ណោះ ប៉ុន្តែដោយសារបញ្ហាអតិផរណានៅសហរដ្ឋអាមេរិកបានធ្វើឱ្យតម្លៃនៃការសាងសង់ត្រូវកើនឡើងរហូតដល់ ២០,១ពាន់លានដុល្លារដោយគិតត្រឹមពាក់កណ្តាលខែឧសភាននេះ។ រូបតំណាង លោកអភិបាលរដ្ឋរូបនេះបានបន្តថា តាមគម្រោងគឺប្រឡាយទឹកក្រោមដីមួយនេះនឹងត្រូវសាងសង់ឡើងនៅក្នុងតំបន់ Delta ដោយវានឹងជួយប្រមូលយកទឹកភ្លៀងពីក្នុងទន្លេ Sacramento មកស្តុកទុកនៅពេលមានភ្លៀងធ្លាក់ខ្លាំង ឬមានព្យុះម្តងៗ។ ចំពោះទំហំរបស់វាវិញគឺប្រឡាយទឹកក្រោមដីនឹងត្រូវសាងសង់ឡើងដោយមានទទឹងប្រវែង ១១ម៉ែត្រ និងបណ្តោយប្រវែង ៧២គីឡូម៉ែត្រ ខណៈវាមានសមត្ថភាពអាចធ្វើឱ្យមានរំហូរទឹករហូតដល់ ៦១០លានលីត្រនៅក្នុងមួយម៉ោង។ នៅក្នុងរបាយការណ៍សិក្សារបស់ក្រុមអ្នកជំនាញបានបង្ហាញថា ប្រព័ន្ធប្រឡាយទឹកក្រោមដីមួយនេះនឹងមានសមត្ថភាពអាចជួយផ្គត់ផ្គង់ទឹកសម្រាប់ប្រើប្រាស់ដល់ពលរដ្ឋចំនួន ២៧លាននាក់ អាចជួយស្រោចស្រពផលដំណាំរបស់ប្រជាកសិករបានចំនួន

ម៉ិចស៊ីកូ៖ យ៉ាងហោចណាស់មានមានពលរដ្ឋម៉ិចស៊ីកូចំនួន ៤នាក់បានស្លាប់បាត់បង់ជីវិតនៅក្នុងហេតុការណ៍បាក់ឆាកដ៏ធំមួយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃព្រហស្បតិ៍ ទី២៣ ខែឧសភានេះ។ ហេតុការណ៍អកុសលនេះបានកើតឡើងនៅក្នុងទីក្រុង San Pedro Garza Garcia រដ្ឋ Nuevo Leon ភាគខាងជើងនៃប្រទេសម៉ិចស៊ីកូ។ ប្រភពខាងលើបានបន្តថា ឆាកដែលបានបាក់ខាងលើនេះគឺជាឆាករៀបចំឡើងសម្រាប់ប្រើប្រាស់នៅក្នុងយុទ្ធនាការបោះឆ្នោតរបស់គណបក្ស Citizens’ Movement ខណៈមូលហេតុជាក់ស្តែងដែលបង្កឱ្យមានឧប្បត្តិហេតុនេះនៅមិនទាន់មានការបញ្ជាក់នៅឡើយទេ។ បើតាមអាជ្ញាធរប្រចាំនៅតំបន់កើតហេតុបានបញ្ជាក់ថា ក្រៅតែពីបានរកឃើញអ្នកស្លាប់ភ្លាមៗហើយក៏មានពលរដ្ឋជាច្រើននាក់ផ្សេងទៀតបានរងរបួសផងដែរ តែអាជ្ញាធរនៅមិនទាន់បញ្ជាក់អំពីអត្តសញ្ញាណរបស់ជនរងគ្រោះទាំងអស់នោះនៅឡើយទេ៕ អត្ថបទ៖ ភក្តី ប្រភព៖ The Strait Time

ថៃ៖ ករណីដែលយន្តហោះដឹកអ្នកដំណើររប​ស់ក្រុមហ៊ុនអាកាសចរណ៍ Singapore Airlines បានជួបបញ្ហារលាក់យ៉ាងធ្ងន់ធ្ងររហូតបណ្តាលឱ្យមានអ្នកស្លាប់បាត់បង់ជីវិតនៅតែជាប្រធានបទគួរឱ្យចាប់អារម្មណ៍មួយសម្រាប់បណ្តាញសារព័ត៌មានធំៗមួយចំនួន​ បើទោះជាហេតុការណ៍ដ៏កម្រនេះបានកើតឡើងអស់រយៈពេល២ថ្ងៃក៏ហើយក្តី។ សម្រាប់បណ្តាញសារព័ត៌មាន The Strait Time នៅក្នុងព្រឹកថ្ងៃព្រហស្បតិ៍​ ទី២៣ ខែឧសភានេះបានឱ្យដឹងថា គិតត្រឹមពេលនេះគឺមានអ្នកដំណើរដែលបានរងរបួសធ្ងន់ធ្ងរចំនួន ២០នាក់កំពុងតែស្ថិតនៅក្នុងបន្ទប់សង្គ្រោះបន្ទាន់នៅក្នុងប្រទេសថៃនៅឡើយទេ​ ខណៈអ្នកដំណើរនិងក្រុមអ្នកបម្រើការងារនៅលើយន្តហោះផ្សេងទៀតបានទៅដល់ប្រទេសសិង្ហបុរីរួចអស់ហើយ។ ប្រភពខាងលើបានបន្តថា នៅក្នុងចំណោមជនរងគ្រោះដែលកំពុងស្ថិតនៅក្នុងបន្ទប់សង្គ្រោះបន្ទាន់នោះក៏មានពលរដ្ឋជនជាតិសិង្ហបុរីចំនួន ២នាក់ផងដែរ។ គួរម្លឹកជូនថា កាលពីល្ងាចថ្ងៃទី២១ កន្លងទៅនេះយន្តហោះដឹកអ្នកដំណើររបស់ក្រុមហ៊ុន Singapore Airlines ដែលមានជើងហោះហើរលេខ​SQ321 មានផ្ទុកអ្នកដំណើរសរុបចំនួន ២១១នាក់ អ្នកបម្រើការចំនួន១៨នាក់ និងមានទិសដៅចេញពីក្រុងឡុងដ៏ ប្រទេសអង់គ្លេសឆ្ពោះមកកាន់ប្រទេសសិង្ហបានជួបប្រទះនូវបញ្ហារលាក់យ៉ាងខ្លាំងនិងកម្របំផុតមួយក្រោយយន្តហោះបានធ្វើដំណើរអស់រយៈពេល ១០ម៉ោង។ ភ្លាមៗក្រោយបានជួបប្រទះហេតុការណ៍ចម្លែកនេះ យន្តហោះបានធ្វើការចុះចតជាបន្ទាន់នៅក្នុងប្រទេសថៃ​ ខណៈមានអ្នកដំណើរជនជាតិអង់គ្លេសអាយុ៧៣ឆ្នាំម្នាក់បានស្លាប់បាត់បង់ជីវិត៕ អត្ថបទ៖

ឥណ្ឌា៖ អាជ្ញាធរឥណ្ឌាបានសម្រេចបិទសាលារៀនជាច្រើនកន្លែងជាបន្ទាន់ដើម្បីឆ្លើយតបទៅនឹងបញ្ហារលកកម្តៅ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃអង្គារ ទី២១ ខែឧសភានេះ។ វិធានការបិទសាលារៀននេះត្រូវបានអនុវត្តនៅក្នុងទីក្រុង Delhi ក្រោយសីតុណ្ហភាពនៅក្នុងក្រុងដ៏ធំមួយនេះបានកើនឡើងដល់ ៤៧,៤ អង្សាសេ។ បើតាមអាជ្ញាធរឥណ្ឌាបានបញ្ជាក់ថា ការបិទសាលារៀននៅពេលនេះគឺជាការបិទសាលារៀនមុនពេលកំណត់ ពោលគឺបិទសាលារៀនដោយបូកបន្ថែមជាមួយនឹងវិស្សមកាលប្រចាំឆ្នាំដែលនឹងចូលមកដល់នៅចុងខែឧសភានេះតែម្តង។ យ៉ាងណាក្តី គិតត្រឹមពេលនេះរលកកម្តៅកម្រិត ៤៧,៤ អង្សាសេខាងលើនេះនៅមិនទាន់បង្កឱ្យមានពលរដ្ឋឥណ្ឌាណាម្នាក់បានរងគ្រោះថ្នាក់នៅឡើយទេ ខណៈកាលពីឆ្នាំ ២០២៣ កន្លងទៅ សីតុណ្ហភាពនៅក្នុងទីក្រុងមួយបានកើនឡើងរហូតដល់កម្រិត ៤៩,២ អង្សាសេឯណោះ៕ អត្ថបទ៖ ភក្តី ប្រភព៖ The Strait Time