អាមេរិក៖ គិតត្រឹមពេលនេះគ្រោះថ្នាក់ផ្សេងៗដែលបង្កឡើងដោយតែបញ្ហាភ្លើងឆេះព្រៃនៅតំបន់ Maui នៃកោះ Hawaii របស់សហរដ្ឋអាមេរិកនៅមិនទាន់រសាត់បាត់អស់ទាំងស្រុងនៅឡើយទេ បើទោះជាហេតុការណ៍អកុសលនេះបានកើតឡើងជាច្រើនថ្ងៃមកហើយ។ របាយការណ៍ចុងក្រោយមួយដែលត្រូវបានចុះផ្សាយដោយបណ្តាញសារព័ត៌មាន​ Channel News Asia នៅព្រឹកថ្ងៃចន្ទ ទី១៤ ខែសីហានេះបានបញ្ជាក់ថា តួលេខអ្នកស្លាប់បាត់បង់ជីវិតនៅក្នុងហេតុការភ្លើងឆេះព្រៃនិងបន្តឆេះរាលដល់ក្រុងដែលមានមនុស្សជាច្រើនកំពុងរស់នៅនេះបានកើនឡើងរហូតដល់ ៩៣នាក់ហើយ។ ទន្ទឹមនឹងបានរកឃើញចំនួនអ្នកស្លាប់មានការកើនឡើង អាជ្ញាធរអាមេរិកក៏នៅបន្តបេសកកម្មស្វែងរកអ្នកកំពុងបាត់ខ្លួនផងដែរ ដ្បិតពលរដ្ឋមួយចំនួននៅតែរាយការណ៍ថាបានបាត់សមាជិកក្នុងគ្រួសារ ហើយពួកគេជឿជាក់ថាអ្នកដែលកំំពុងបាត់ខ្លួនទាំងនោះគឺមានជីវិតនៅឡើយ។ គួររម្លឹកជូនថា ក្នុងពេលមានភ្លើងឆេះនោះមានពលរដ្ឋប្រហែល ១០០នាក់បានសម្រេចលោតចូលទឹកសមុទ្រដើម្បីគេចឲ្យផុតពីអគ្គីភ័យដ៏ឆាប់រហ័ស ហើយរហូតមកទល់នឹងពេលនេះគេនៅមិនទាន់អាចស្រង់មនុស្សចេញពីសមុទ្រមកវិញឲ្យគ្រប់ចំនួននៅឡើយទេ។ សូមបញ្ជាក់ជូនផងដែរថា ហេតុការណ៍ភ្លើងឆេះខាងលើនេះបានបណ្តាលឲ្យអគារជាង ១,៧០០កន្លែងត្រូវបានបំផ្លាញទាំងស្រុង ខណៈពលលរដ្ឋរាប់ពាន់​នាក់ត្រូវបង្ខំចិត្តធ្វើការជម្លៀសខ្លួនជាបន្ទាន់ផងដែរ៕ អត្ថបទ៖ ភក្តី ប្រភព៖ Channel News Asia

បារាំង៖ របាយការណ៍មួយរ​បស់អង្គការសុខភាពពិភពលោក​បានបង្ហាញថា តួលេខអ្នកឆ្លងជំងឺកូវីដ-១៩នៅលើពិភពលោកបានកើនឡើង ៨០% កាលពីខែមុខនេះ ខណៈពលរដ្ឋនៅជុំវិញពិភពលោកហាក់លែងសូវចាប់អារម្មណ៍ពីការវិវឌ្ឍន៍របស់ជំងឺមួយនេះទៀតហើយ។ នៅក្នុងរបាយការណ៍ដែលត្រូវបានចុះផ្សាយបន្តដោយបណ្តាញសារព័ត៌មាន The Strait Time បានបញ្ជាក់ថា មេរោគនៃជំងឺកូវីដ-១៩ក៏បានបន្តបង្កើតឲ្យមានមេរោគបំប្លែងខ្លួនគួរកត់សម្គាល់ជាច្រើនប្រភេទបន្ថែមទៀតផងដែរ។ ប្រភពខាងលើបានបន្តថា បើគិតចាប់ពីថ្ងៃទី១០ ខែកក្កដា មកដល់ថ្ងៃទី៦ ខែសីហានេះគឺគេបានរកឃើញករណីអ្នកឆ្លងជំងឺកូវីដ-១៩ថ្មីចំនួន ១,៥លាននាក់ ខណៈនៅក្នុងនោះគឺតំបន់ Western Pacific ជាតំបន់ដែលមានការរាតត្បាតថ្មីខ្លាំងជាងគេ ពោលបើគិតតែតួលេខអ្នកឆ្លងថ្មីនៅក្នុងតំបន់មួយនេះគឺមានការកើតឡើងរហូតដល់ ១៣៧%ឯណោះ។ យ៉ាងណាក្តី បើទោះជាតួលេខអ្នកឆ្លងថ្មីមានការកើនឡើងក៏ពិតមាន តែតួលេខអ្នកស្លាប់វិញគឺមានការថយចុះចំនួន ៥៧% ដោយតួលេខអ្នកស្លាប់មានត្រឹមចំនួន ២,៥០០នាក់៕  អត្ថបទ៖ ភក្តី ប្រភព៖  The Strait Time

មីយ៉ាន់ម៉ា៖ យ៉ាងហោចណាស់មានពលរដ្ឋមីយ៉ាន់ម៉ាចំនួន ៥នាក់ត្រូវបានរាយការណ៍ថាបានស្លាប់បាត់បង់ជីវិតដោយសារទឹកជំនន់និងការបាក់ដីដ៏ឆាប់រហ័សមួយ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅយប់ថ្ងៃសុក្រ ទី១១ ខែសីហា។ គ្រោះធម្មជាតិដែលកំពុងបង្កការគំរាមគំហែងនៅក្នុងប្រទេសមីយ៉ាន់នៅពេលនេះគឺត្រូវបានបង្កឡើងដោយសារតែព្យុះមូសុងមួយមេធំ ដែលរហូតមកទល់នឹងពេលនេះឥទ្ធិពលរបស់ព្យុះនៅមិនទាន់រលាយបាត់នៅឡើយទេ។ ប្រភពខាងលើបានបន្តថា ក្រៅតែពីបានរកឃើញអ្នកស្លាប់ហើយ ឥទ្ធិពលរបស់គ្រោះធម្មជាតិខាងលើនេះក៏បានបង្ខំឲ្យពលរដ្ឋមីយ៉ាន់ម៉ាជាង ៤០,០០០​នាក់ផ្សេងទៀតត្រូវជម្លៀសខ្លួនជាបន្ទាន់ផងដែរ។ គួរបញ្ជាក់ជូនផងដែរថា កាលពីអំឡុងខែឧសភាកន្លងទៅប្រទេសមីយ៉ាន់ម៉ាក៏ធ្លាប់ទទួលរងនូវការវាយប្រហារដោយព្យុះដ៏ធ្ងន់ធ្ងរមួយដែលមានឈ្មោះថា Cyclone Mocha ផងដែរ ដោយពេលនោះមីយ៉ាន់ម៉ាបានរងនូវការខូចខាតជាច្រើន ដែលជាគិតជាទំហំទឹកប្រាក់គឺមានតម្លៃប្រហែលជា ១,៥ពាន់លានដុល្លារ៕  អត្ថបទ៖ ភក្តី ប្រភព៖ Channel News Asia

រុស្ស៊ី៖ នៅថ្ងៃសុក្រ ទី១១ ខែសីហានេះ ប្រទេសរុស្ស៊ីបានបាញ់មីស៊ីលមួយគ្រាប់ទៅកាន់ឋានព្រះច័ន្ទ នេះបើយោងតាមសេចក្តីរាយការណ៍របស់បណ្តញសារព័ត៌មាន Channel News Asia។ ការបាញ់មីស៊ីលរបស់រុស្ស៊ីនៅពេលនេះត្រូវបានគេមើលឃើញថា គឺជាបេសកកម្មបាញ់មីស៊ីលទៅកាន់ទីអវកាសលើកទី ១ហើយ បើគិតក្នុងរយៈពេលជិត ៥០ឆ្នាំចុងក្រោយនេះ។ប្រភពខាងលើបានបន្តថា មីស៊ីលដែលរុស្ស៊ីបានបាញ់បង្ហោះទៅកាន់ឋានព្រះច័ន្ទនៅព្រឹកមិញនេះគឺជាមីស៊ីលប្រភេទ Luna-25 និងត្រូវបានបាញ់ចេញពីទីក្រុងម៉ូស្គូកាលពីម៉ោង ៦ និង១០នាទីព្រឹកមិញនេះ (ម៉ោងនៅកម្ពុជា) ខណៈមីស៊ីលនឹងត្រូវធ្វើដំណើរទៅដល់កន្លងព្រះច័ន្ទនៅក្នុងរយៈពេល ៥ថ្ងៃទៀត។ គួររម្លឹកជូនថា កាលពីឆ្នាំ​១៩៧៦ រុស្ស៊ីក៏ធ្លាប់មានបេសកកម្មបង្ហោះយានអវកាសទៅកាន់ទីអវកាសដែរ ហើយការបាញ់មីស៊ីលទៅកាន់ឋានព្រះច័ន្ទនៅពេលនេះក៏បានបង្ហាញថា កម្មវិធីអវកាសរបស់រុស្ស៊ីនៅតែបន្តរីកចម្រើនទៅមុខ បើទោះជារុស្ស៊ីកំពុងមានសង្គ្រាមជាមួយអ៊ុយក្រែនក៏ដោយ៕ អត្ថបទ៖ ភក្តី ប្រភព៖ Channel News Asia

អាមេរិក៖ ចំនួនជនរងគ្រោះដែលបានស្លាប់បាត់បង់ជីវិតនៅក្នុងហេតុការណ៍ភ្លើងឆេះព្រៃនៅក្នុងក្រុង Hawaiian សហរដ្ឋអាមេរិកបានកើនឡើងដល់ ៥៣នាក់ហើយ នេះបើយោងតាមរបាយការណ៍ចុងក្រោយមួយរបស់អាជ្ញាធរអាមេរិកដែលត្រូវបានចុះផ្សាយដោយបណ្តាញសារព័ត៌មាន Channel News Asia នៅព្រឹកថ្ងៃសុក្រ ទី១១ ខែសីហានេះ។ អ្វីដែលកាន់តែអាក្រក់នោះគឺអាជ្ញាធរអាមេរិកបានបញ្ជាក់ថា តួលេខអ្នកស្លាប់អាចបន្តកើនឡើងផងដែរ ដ្បិតគិតត្រឹមពេលនេះគឺនៅមានអ្នករងរបួសធ្ងន់ធ្ងរ និងអ្នកកំពុងបាត់ខ្លួនជាច្រើននាក់ផ្សេងទៀត។គួររម្លឹកជូនថា ក្រុង Hawaiian គឺជាក្រុងទេសចរណ៍ប្រវត្តិសាស្រ្តដ៏មានសក្តានុពលមួយរបស់សហរដ្ឋអាមេរិក ហើយឥទ្ធិពលរបស់ភ្លើងឆេះព្រៃបានបន្តរាលដាលនិងលេបត្របាក់ទីក្រុងមួយនេះអស់ប្រមាណជា ៨០%។ គិតត្រឹមពេលនេះអគ្គីភ័យបានបំផ្លាញអគារនៅក្នុងក្រុងអស់ជាង​១,៧០០កន្លែង ខណៈពលរដ្ឋរាប់ពាន់នាក់ត្រូវបង្ខំចិត្តធ្វើការជម្លៀសខ្លួនជាបន្ទាន់។ សូមបញ្ជាក់ជូនថា ដើម្បីគេចចេញពីអគ្គីភ័យខាងលើនេះមានពលរដ្ឋជាង ១០០នាក់បានសម្រេចលោតចូលក្នុងទឹកសមុទ្រ ខណៈគិតត្រឹមពេលនេះអាជ្ញាធរអាមេរិកទើបតែជួយស្រង់មនុស្សចេញពីក្នុងសមុទ្របានត្រឹម ៥០នាក់ប៉ុណ្ណោះ៕ អត្ថបទ៖ ភក្តី ប្រភព៖ Channel News Asia

កូរ៉េខាងត្បូង៖ រដ្ឋាភិបាលនៃប្រទេសកូរ៉េខាងត្បូងគ្រោងនឹងបង្កើតគោលនយោបាយថ្មីដើម្បីលើកកម្ពស់លើវិស័យ “ប្រព័ន្ធថែទាំវេជ្ជសាស្រ្តចំពោះសត្វចិញ្ចឹម” នេះបើយោងតាមការចុះផ្សាយរបស់បណ្តាញសារព័ត៌មាន The Strait Time​ នៅក្នុងថ្ងៃព្រហស្បតិ៍ ទី ១០ ខែសីហានេះ។ ការសម្រេចដាក់ចេញនូវគោលនយោបាយពិសេសនេះត្រូវបានធ្វើឡើងក្នុងគោលបំណងជួយកាត់បន្ថយការចំណាយរបស់ប្រជាពលរដ្ឋជាម្ចាស់សត្វចិញ្ចឹម ដែលជាមធ្យមពួកគាត់បានចំណាយប្រាក់ ៦០,០០០វ៉ុន (៤៥,៥ ដុល្លារអាមេរិក) ក្នុងមួយខែទៅលើសេវាថែទាំសុខភាពសត្វចិញ្ចឹមរបស់ពួកគាត់ជាមួយគ្លីនិកឯកជន។ប្រភពខាងលើបានបន្តថា នាពេលបច្ចុប្បន្ននេះមានពលរដ្ឋកូរ៉េខាងត្បូងចំនួន ៦,០២លាននាក់ ដែលមានសត្វចិញ្ចឹមដូចជាសត្វឆ្កែ និងសត្វឆ្មា​ ខណៈតួលេខនេះមានការកើនឡើងចំនួន ៦៥,៤% បើធៀបទៅនឹងតួលេខនៅក្នុងឆ្នាំ ២០១២ ដែលមានពលរដ្ឋកូរ៉េខាងត្បូងត្រឹម ៣,៦៤លាននាក់ប៉ុណ្ណោះមានសត្វចិញ្ចឹមផ្ទាល់ខ្លួននៅតាមផ្ទះរបស់ពួកគេ។ គួរបញ្ជាក់ជូនថា តាមគម្រោងគឺរដ្ឋាភិបាលកូរ៉េខាងត្បូងនឹងផ្តើមអនុវត្តគោលនយោបាយខាងលើនេះចាប់ពីថ្ងៃទី ១ ខែតុលាខាងមុខនេះហើយ ខណៈគម្រោងផ្តល់សេវាកម្មថែទាំវេជ្ជសាស្រ្តចំពោះសត្វចិញ្ចឹមពីសំណាក់រដ្ឋាភិបាននេះក៏មានការលើកលែងចំពោះសេវាមិនសូវមានភាពចាំបាច់មួយចំនួនផងដែរ៕ អត្ថបទ៖ ភក្តី

អាមេរិក៖ យ៉ាងហោចណាស់មានពលរដ្ឋអាមេរិកចំនួន ៦នាក់ត្រូវបានស្លាប់បាត់បង់ជីវិតនៅក្នុងហេតុការណ៍ភ្លើងឆេះព្រៃដ៏ឆាប់រហ័សមួយ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅរសៀលថ្ងៃព្រហស្បតិ៍ ទី១០ ខែសីហានេះ។ ហេតុការណ៍គ្រោះថ្នាក់ដ៏កម្រនេះបានកើតឡើងនៅក្នុងក្រុង Hawaiian ដែលជាក្រុងទេសចរណ៍ប្រវត្តិសាស្រ្តដ៏មានសក្តានុពលមួយរបស់សហរដ្ឋអាមេរិក។ ប្រភពខាងលើបានបន្តថា​ ​ក្រៅតែពីបានរកឃើញអ្នកស្លាប់ហើយ នៅពេលពលរដ្ឋចំនួន ១២នាក់ផ្សេងទៀតបានរងរបួស ខណៈនៅក្នុងនោះមានពលរដ្ឋចំនួន ២នាក់បានរងរបួសធ្ងន់ធ្ងរនិងត្រូវបញ្ជូនទៅសង្គ្រោះបន្ទាន់នៅក្នុងមន្ទីរពេទ្យផងដែរ។ នៅក្នុងប្រតិបត្តិការណ៍ជួយជនរងគ្រោះ អាជ្ញាធរអាមេរិកក៏បានជួយសង្គ្រោះពលរដ្ឋជាច្រើននាក់ចេញពីទឹកសមុទ្រផងដែរ ក្រោយពួកគេបានបង្ខំចិត្តលោតចូលក្នុងសមុទ្រដើម្បីគេចឲ្យផុតពីអគ្គីភ័យ។ គិតត្រឹមពេលនេះអគ្គីភ័យបានបំផ្លាញផ្ទះសម្បែងរបស់ប្រជាពលរដ្ឋ និងអគារអស់ជាង ២៧០កន្លែង ហើយពលរដ្ឋជាង ១២,០០០នាក់ត្រូវបានជម្លៀសខ្លនជាបន្ទាន់ផងដែរ៕ អត្ថបទ៖ ភក្តី ប្រភព៖ Channel News Asia

កូរ៉េខាងត្បូង៖ ព្យុះត្រូពិច Khanun បានកំពុងតែបង្កការគំរាមគំហែងយ៉ាងខ្លាំងនៅក្នុងទីក្រុងប៊ូសាន ដែលជាក្រុងកំពង់ផែដ៏មានសក្តានុពលមួយរបស់ប្រទេសកូរ៉េខាងត្បូង នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃព្រហស្បតិ៍ ទី១០ ខែសីហានេះ។ ឥទ្ធិពលរបស់ព្យុះបានបង្កើតឲ្យមានខ្យល់បក់បោកយ៉ាង​ខ្លាំង មានភ្លៀងធ្លាក់ក្នុងកម្រិតដ៏ច្រើន និងបង្កឲ្យមានបញ្ហាបាក់ស្រុតដីយ៉ាងឆាប់រហ័សជាច្រើនកន្លែងផងដែរ។ប្រភពខាងលើបានបន្តថា​ នៅចំពោះមុខស្ថានភាពគ្រោះថ្នាក់នេះអាជ្ញាធរនៃប្រទេសកូរ៉េខាងត្បូងបានសម្រេចបិទផ្លូវរថយន្តភ្លើងសម្រាប់ធ្វើដំណើរទៅកាន់ទីក្រុងប៊ូសានជាបណ្តោះអាសន្ន ខណៈជើងហោះហើរទៅកាន់ទីក្រុងមួយនេះចំនួន ៣៣០ជើងត្រូវបានលុបចោលជាបន្ទាន់ផងដែរ។ បន្ថែមពីលើនេះ អាជ្ញាធរកូរ៉េខាងត្បូងក៏បានធ្វើការជម្លៀសពលរដ្ឋដែលរស់ក្បែរតំបន់ឆ្នេរសមុទ្រក្នុងទីក្រុងប៊ូសានជាង​ ១០,០០០នាក់ឲ្យទៅរស់នៅក្នុងកន្លែងមានសុវត្ថិភាពជាបណ្តោះអាសន្នសិនផងដែរ ទម្រាំឥទ្ធិពលរបស់ព្យុះត្រូវរលាយបាត់ទៅវិញ៕អត្ថបទ៖ ភក្តី ប្រភព៖ Channel News Asia

អាមេរិក៖ ស្រ្តីម្នាក់ត្រូវបានត្រីឆ្លាមចេញមកខាំក្នុងអំឡុងពេលចុះទៅលេងទឹកសមុទ្រនៅក្នុងឆ្នេរ Rockaway ក្នុងទីក្រុងញូវយ៉ក សហរដ្ឋអាមេរិក ដែលនេះជាគ្រោះថ្នាក់ដ៏កម្របំផុតមិនធ្លាប់កើតមាននោះទេក្នុងរយៈពេលជាច្រើនទសវត្សរ៍ចុងក្រោយនេះ។ បើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី៩ ខែសីហានេះបានបញ្ជាក់ថា ស្រ្តីរងគ្រោះមានឈ្មោះថា Tatyana Koltunyuk អាយុ ៦៥ឆ្នាំ ហើយក្នុងអំឡុងពេលត្រូវត្រីឆ្លាមខាំនោះគឺគាត់កំពុងតែហែលទឹកលេងតែម្នាក់ឯងប៉ុណ្ណោះ។ ប្រភពខាងលើបានបន្តថា ក្រោយពេលត្រូវត្រីឆ្លាមខាំត្របាក់ លោកស្រី Tatyana Koltunyuk បានស្រែកឲ្យគេជួយ ហើយពេលនោះឆ្មាំសមុទ្រក៏បានចុះទៅធ្វើអន្តរាគមន៍ភ្លាមៗ និងអាចជួយសង្គ្រោះជីវិតគាត់បានទាល់ពេលវេលាផងដែរ។ យ៉ាងណាក្តី លោកស្រី Tatyana Koltunyuk បានរងរបួសជើងឆ្វេងយ៉ាងឆ្ងន់ធ្ងរ និងត្រូវបញ្ជូនទៅព្យាបាលជាបន្ទាន់នៅមន្ទីរពេទ្យផងដែរ។ គួរបញ្ជាក់ជូនថា តាមធម្មតានៅតំបន់ឆ្នេរសមុទ្រដែលគេបើកឲ្យសាធារណជនចុះទៅកំសាន្តនោះគឺត្រូវគេដាក់ប្រព័ន្ធត្រួតពិនិត្យ និងការពារសត្វសាហាវយ៉ាងហ្មត់ចត់ ហើយសម្រាប់នៅក្នុងសម័យដ៏ជឿនលឿននេះវាគឺជារឿងដ៏កម្របំផុត ដែលមានត្រីឆ្លាមអាចចេញមកវាយប្រហារមនុស្សដល់មាត់ឆ្នេរដូចនៅក្នុងខ្សែភាពយន្តហូលីវូដនោះ៕អត្ថបទ៖ ភក្តី

អាមេរិក៖ លោកប្រធានាធិបតីអាមេរិក​ ចូ បៃឌិន បានថ្លែងថា លោកនឹងអញ្ជើញទៅប្រទេសវៀតណាមនៅក្នុងពេលឆាប់ៗនេះ នេះបើយោងតាមការចុះផ្សាយរបស់បណ្តាញសារព័ត៌មាន​ Channel News Asia នៅព្រឹកថ្ងៃពុធ ទី៩ ខែសីហានេះ។ ការថ្លែងខាងលើនេះត្រូវបានធ្វើឡើងនៅក្នុងអំឡុងពេលដែលលោកប្រធានាធិបតីវ័យ ៨០ឆ្នាំរូបនេះបានអញ្ជើញទៅចូលរួមក្នុងកម្មវិធី​រៃអង្គាស​ប្រាក់​នយោបាយ​មួយក្នុង​រដ្ឋ New Mexico កាលពីពេលថ្មីៗនេះ។ នៅក្នុងសេចក្តីថ្លែងការនោះ លោក ចូ បៃឌិន បានបញ្ជាក់ថា គោលបំណងនៃការធ្វើដំណើររបស់គាត់ទៅកាន់ប្រទេសវៀតណាមលើកនេះគឺដើម្បីលើកកម្ពស់ទំនាក់ទំនងរវាងសហរដ្ឋអាមេរិកជាមួយនិងវៀតណាម និងក្លាយជាដៃគូយុទ្ធសាស្រ្តដ៏សំខាន់មួយ។ យ៉ាងណាក្តី សេតវិមានអាមេរិកនៅមិនទាន់បង្ហាញពីពេលវេលាជាក់លាក់នៃការធ្វើដំណើរទស្សនកិច្ចផ្លូវការមួយនេះនៅឡើយទេ ខណៈភាគីខាងវៀតណាមបានបង្ហាញនូវសេចក្តីសាទរ និងការស្វាគមន៍យ៉ាងកក់ក្តៅចំពោះវត្តមានមេដឹកនាំប្រទេសមហាអំណាចរូបនេះ៕ ប្រភព៖ Channel News Asia