ឥណ្ឌូនេស៊ី៖ យោងតាមការចុះផ្សាយរបស់បណ្តាញសារព័ត៌មាន Next Shark នៅព្រឹកថ្ងៃសោរ៍ ទី៣ ខែធ្នូនេះបានឲ្យដឹដថា រថយន្តដែលអាចហោះនៅអាកាសបាននឹងត្រូវគេយកទៅតេស្តសាកល្បងនៅក្នុងរដ្ឋធានីថ្មីរបស់ប្រទេសឥណ្ឌូនេស៊ីគឺទីក្រុង Nasuntara នៅក្នុងឆ្នាំ ២០២៤ខាងមុខនេះ។ រថយន្តអាចហោះបានដែលនឹងមានវត្តមាននៅលើទឹកដីនៃប្រទេសឥណ្ឌូនេស៊ីនោះគឺរថយន្តរបស់ក្រុមហ៊ុន Hyundai ដែលក្រុមហ៊ុនផលិតរថយន្តដ៏ធំរបស់ប្រទេសកូរ៉េខាងត្បូង។ បើតាមលោក Mohammed Ali Berawi អនុប្រធាននាយកដ្ឋានផ្លាស់ប្តូរបៃតងនិងឌីជីថលឥណ្ឌូនេស៊ីបានបញ្ជាក់ថា ការធ្វើតេស្តសាកល្បងរថយន្តដ៏ទំនើបចុងក្រោយនេះគឺជាផ្នែកមួយនៃគម្រោងអភិវឌ្ឍន៍វិស័យយានយន្តក្នុងរយៈពេល ១០ឆ្នាំរបស់រដ្ឋាភិបាលឥណ្ឌូនេស៊ីដែលបានដាក់ចេញនាពេលកន្លងមក ខណៈគម្រោងមួយនេះត្រូវការចំណាយប្រាក់ជាង ៣១ពាន់លានដុល្លារអាមេរិក។ លោក Mohammed Ali Berawi បានបន្តថាការចាប់ដៃគូជាមួយក្រុមហ៊ុន Hyundai នឹងជួយឲ្យ វិស័យយានយន្តនៅក្នុងប្រទេសឥណ្ឌូនេស៊ីស្ទុះទៅមុខយ៉ាងរហ័ស​ ហើយវាក៏ជាផ្នែកដ៏សំខាន់មួយសម្រាប់លើកកម្ពស់សេដ្ឋកិច្ចជាតិផងដែរ៕ អត្ថបទ៖ ភក្តី

ស្វីស៖ អង្គការសុខភាពពិភពលោកនៅថ្ងៃសុក្រ ទី២ ​ខែវិច្ឆិកានេះបានធ្វើការព្យាករណ៍ថា គិតត្រឹមពេលនេះគឺមានពលរដ្ឋប្រមាណជា ៩០%ហើយ នៃចំនួនពលរដ្ឋសរុបនៅជុំវិញពិភពលោកបានស៊ាំទៅនឹងមេរោគនៃជំងឺកូវីដ-១៩។ បើតាមលោក Tedros Adhanom Ghebreyesus ដែលជាអគ្គនាយក​អង្គការ​សុខភាព​ពិភពលោកបានពន្យល់ថា ភាពស៊ាំនេះបានកើតឡើងតាមរយៈហេតុផលសំខាន់ៗមួយចំនួនដូចជា ពលរដ្ឋបានទៅចាក់វ៉ាក់សាំងគ្រប់គ្រាន់តាមការណែនាំរបស់អាជ្ញាធរសុខាភិបាល ខណៈពលរដ្ឋខ្លះទទួលបានភាពស៊ាំជាមួយមេរោគក្រោយពេលបានឆ្លងមេរោគ។ អគ្គនាយក​អង្គការ​សុខភាព​ពិភពលោករូបនេះបានបន្តថា បើទោះជាពលរដ្ឋភាគច្រើននៅក្នុងសហគមន៍ទទួលបានភាពស៊ាំទៅនឹងមេរោគក៏ពិតមែន តែមិនមែនមានន័យថាពួកគេលែងឆ្លងមេរោគនៃជំងឺកូវីដ-១៩នោះទេ ពោលគឺពួកគេនៅតែអាចឆ្លងមេរោគបានដដែល។ យ៉ាងណាក្តី ភាពស៊ាំទៅនឹងមេរោគនឹងជួយការពារពួកគេមិនឲ្យមានអាការៈធ្ងន់ធ្ងរ ឬឈានដល់ស្លាប់បាត់បង់ជីវិតនោះទេ។ សូមបញ្ជាក់ជូនថា គិតត្រឹមពេលនេះជំងឺកូវីដ-១៩បានចម្លងទៅកាន់មនុស្សជិត ៦៥០លាននាក់ និងបានសម្លាប់មនុស្សអស់ជាង ៦,៦លាននាក់នៅជុំវិញពិភពលោក ក្នុងនោះសហរដ្ឋអាមេរិកគឺជាប្រទេសដែលមានតួលេខអ្នកឆ្លងនិងស្លាប់ដោយជំងឺកូវីដ-១៩ច្រើនជាងគេ៕ អត្ថបទ៖ ភក្តី ប្រភព៖ The Strait Times

អាមេរិក៖ ព្រឹទ្ធសភាអាមេរិកបានធ្វើការព្រមានទៅកាន់រដ្ឋាភិបាលចិនជុំវិញករណីដែលកងកម្លាំងចិនបានបង្ក្រាបដោយហិង្សាទៅលើក្រុមប្រជាពលរដ្ឋ ដែលបាននាំគ្នាចេញមកប្រឆាំងតវ៉ាជាមួយនឹងវិធានការបិទខ្ទប់កូវីដ-១៩ ដ៏តឹងរឹងរបស់អាជ្ញាធរ។ បើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃសុក្រ ទី២ ខែវិច្ឆិកានេះបានបញ្ជាក់ថា ការព្រមានរបស់សហរដ្ឋអាមេរិកត្រូវបានធ្វើឡើងដោយសមាជិកព្រឹទ្ធសភាអាមេរិកចំនួន ៤២រូប ខណៈនៅក្នុងសេចក្តីព្រមាននោះបានបញ្ជាក់ថា ការបង្រ្កាបដោយហិង្សាពីសំណាក់អាជ្ញាធរចិនទៅកាន់ពលរដ្ឋខ្លួនអាចធ្វើឲ្យទំនាក់ទំនងការទូតរវាងអាមេរិកនិងចិនត្រូវខូចខាតយ៉ាងខ្លាំងតែម្តង។ គួរបញ្ជាក់ជូនថា ក្នុងរយៈពេលជាងមួយសប្តាហ៍ចុងក្រោយនេះពលរដ្ឋចិនជាច្រើននាក់នៅតាមទីក្រុងសំខាន់ៗទូទាំងប្រទេសចិនបាននាំគ្នាចុះថ្នល់ធ្វើបាតុកម្មប្រឆាំងនឹងវិធានការបិទខ្ទប់ទីក្រុងដើម្បីទប់ស្កាត់ជំងឺកូវីដ-១៩ ដ្បិតពួកគេយល់ឃើញថា វាគឺជាវិធានការដ៏តឹងរឹងនិងត្រូវបានអនុវត្តតែក្នុងប្រទេសចិនប៉ុណ្ណោះ​ ខណៈនៅតាមប្រទេសផ្សេងៗនៅជុំវិញពិភពលោកគឺលែងមានវិធានការបែបនេះទៀតហើយ។ សូមបញ្ជាក់ផងដែរថា រដ្ឋាភិបាលចិនបានសម្រេចអនុវត្តវិធានការទប់ស្កាត់ជំងឺកូវីដ-១៩ ឲ្យស្ថិតនៅក្នុងកម្រិតសូន្យ ហើយតាមរយៈការអនុវត្តវិធានការនេះគឺអាជ្ញាធរចិនតែងធ្វើការបិទខ្ទប់ទីក្រុង ឬតំបន់ណាមួយភ្លាមៗ ក្រោយរកឃើញករណីឆ្លងថ្មីបើទោះតួជាតួលេខអ្នកឆ្លងថ្មីនោះមានចំនួនតិចតួចក៏ដោយ៕ អត្ថបទ៖ ភក្តី ប្រភព៖ The Strait Times

អ៊ុយក្រែន៖ របាយការណ៍មួយបានបង្ហាញថា គិតត្រឹមពេលនេះគឺមានទាហានអ៊ុយក្រែនចន្លោះពី ១០,០០០នាក់ ទៅ ១៣,០០០នាក់ បានស្លាប់បាត់បង់ជីវិតនៅក្នុងភ្លើងសង្រ្គាមជាមួយនឹងប្រទេសរុស្ស៊ី។ បើតាមលោក Mykhailo Podolyak ដែលជាទីប្រឹក្សារបស់លោកប្រធានាធិបតីអ៊ុយក្រែន Volodymyr Zelensky បានបញ្ជាក់ថា តួលេខនៅក្នុងរបាយការណ៍មួយនេះគឺជាការបូកសរុបចំនួនទាហានដែលបានពលីជីវិតនៅលើសមរភូមិសង្គ្រាមដោយគិតត្រឹមចុងខែវិច្ឆិកានេះ។ នៅក្នុងរបាយការណ៍របស់អាជ្ញាធរអ៊ុយក្រែនក៏បានបង្ហាញផងដែរថា បើគិតជាមធ្យមគឺនៅក្នុងមួយថ្ងៃមានទាហានអ៊ុយក្រែនចន្លោះពី ៦០នាក់ ទៅ ១០០នាក់​បានស្លាប់បាត់បង់ជីវិត ខណៈទាហានប្រមាណជា ៥០០នាក់បានរងរបួស។ គួររម្លឹកជូនថា ការឈ្លានពានពីសំណាក់កងកម្លាំងរុស្ស៊ីនៅលើទឹកដីអ៊ុយក្រែនបានផ្តើមកើតឡើងចាប់តាំងពីថ្ងៃទី ២៤ ខែកុម្ភៈ ហើយគិតរហូតមកទល់នឹងពេលនេះគឺសង្គ្រាមបានអូសបន្លាយអស់រយៈជាងជិត ១០ ខែហើយ ខណៈគេនៅមិនទាន់មើលឃើញសញ្ញាណាមួយដែលអាចបង្ហាញពីលទ្ធភាពនៃការបិទបញ្ចប់សង្គ្រាមនៅឡើយទេ៕  អត្ថបទ៖ ភក្តី ប្រភព៖ Businessinsider

អ៊ីរ៉ង់៖ កងកម្លាំងរបស់អាជ្ញាធរអ៊ីរ៉ង់បានបាញ់សម្លាប់ពលរដ្ឋម្នាក់ ដែលបានចេញមកធ្វើការអបអរភាពបរាជ័យរបស់ក្រុមបាល់ទាត់ជម្រើសជាតិអ៊ីរ៉ង់ ដែលលេងចាញ់ក្រុមបាល់ទាត់ជម្រើសជាតិអាមេរិកនៅក្នុងព្រឹត្តិការណ៍បាល់ទាត់ពិភពលោក World Cup ២០២២ នៅក្នុងប្រទេសកាតា។ បើយោងតាមការចុះផ្សាយរបស់បណ្តាញសារព័ត៌មាន​ The Thaiger បានបញ្ជាក់ថា ជនរងគ្រោះដែលបានស្លាប់បាត់បង់ជីវិតនោះមានឈ្មោះថា Mehran Samak ភេទប្រុស អាយុ ២៧ឆ្នាំ ហើយរូបគាត់គឺជាពលរដ្ឋអ៊ីរ៉ង់ម្នាក់នៅក្នុងចំណោមពលរដ្ឋជាច្រើននាក់ផ្សេងទៀតដែលបាននាំគ្នាធ្វើសកម្មភាពអបអរសាទរខាងលើនេះ។ លោក Mehran Samak ប្រភពខាងលើបានបន្តថា តាមការពិតករណីបាញ់សម្លាប់ពលរដ្ឋយ៉ាងអាណោចអាធ័មនេះមិនមែនព្រោះតែហេតុផលគាំទ្រឬមិនគាំទ្រកីឡាជាតិតែមួយមុខនោះទេ តែករណីនេះមានការជាប់ព័ន្ធទៅនឹងចលនាប្រឆាំងតវ៉ាជាមួយរដ្ឋាភិបាល ដែលជាវិបត្តិសង្គមធំមួយនិងបានអូសបន្លាយអស់រយៈពេលជាយូរមកហើយនៅក្នុងប្រទេសអ៊ីរ៉ង់។ គួរបញ្ជាក់ជូនថា ពលរដ្ឋអ៊ីរ៉ង់ជាច្រើននាក់បាននាំគ្នាធ្វើបាតុកម្មប្រឆាំងជាមួយរដ្ឋាភិបាលចាប់តាំងពីឆ្នាំ ២០១៩ មកម្លេះ ដើម្បីទាមទារដំណោះស្រាយជុំវិញវិបត្តិប្រេងឥន្ទនៈ​ឡើងថ្លៃ បញ្ហាសង្គម និងនយោបាយមួយចំនួនផងដែរ។ គិតចាប់តាំងពីឆ្នាំ ២០១៩មកគឺមានពលរដ្ឋអ៊ឺរ៉ង់ប្រមាណជា ១

កូរ៉េខាងត្បូង៖ គិតត្រឹមពេលនេះបាតុកម្មតវ៉ារបស់ក្រុមអ្នកបើកបររថយន្តដឹកទំនិញធំៗនៅក្នុងប្រទេសកូរ៉េខាងត្បូងបានឈានចូលដល់ថ្ងៃទី ៨ ហើយ ខណៈដំណោះស្រាយរួមមួយរវាងរដ្ឋាភិបាលជាមួយនិងក្រុមអ្នកបើកបរនៅមិនទាន់អាចរកឃើញនៅឡើយទេ។ គួរកត់សម្គាល់ថា ហេតុផលដែលនាំឲ្យមានបាតុកម្មតវ៉ានេះកើតឡើងគឺផ្តើមចេញពីវិបត្តិនៃការឡើងថ្លៃតម្លៃប្រេងឥន្ទនៈជាសលក ដែលធ្វើឲ្យការដឹកជញ្ជូនត្រូវមានការចំណាយខ្ពស់ជាងធម្មតា ខណៈប្រាក់ឈ្មួលរបស់ក្រុមអ្នកបើកបរនៅបន្តរក្សាដូចធម្មតា។ បើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃព្រហស្បតិ៍ ទី១ ខែធ្នូនេះបានបញ្ជាក់ថា ការធ្វើបាតុកម្មរបស់អ្នកបើកបររថយន្តដឹកទំនិញទាំងអស់នេះបានធ្វើឲ្យប៉ះពាល់ដល់ចង្វាក់នៃការដឹកជញ្ជូននិងការនាំចេញផលិតរបស់ប្រទេសកូរ៉េខាងត្បូងទៅកាន់ទីផ្សារបរទេសយ៉ាងខ្លាំង ខណៈបើគិតជាទឹកប្រាក់វិញគឺការធ្វើបាតុកម្មជាង ១សប្តាហ៍នេះបានធ្វើឲ្យប្រទេសកូរ៉េខាងត្រូវខាតបង់ចំណូលពីការនាំទំនិញចេញប្រមាណជា ១,៦ លានលានវ៉ុន (ជាង ១,២ ពាន់លានដុល្លារអាមេរិក) ឯណោះ។ សូមបញ្ជាក់ជូនថា ការរាំងស្ទះក្នុងវិស័យដឹកជញ្ជូននេះក៏បានប៉ះពាល់ដល់ចង្វាក់ផលិតកម្មរបស់ក្រុមហ៊ុនបច្ចេកវិទ្យាធំៗជាច្រើនរបស់កូរ៉េខាងត្បូងផងដែរ ដ្បិតខាងក្រុមហ៊ុនត្រូវផ្អាកការផលិតរបស់ពួកគេរហូតដល់វិស័យដឹកជញ្ជូនអាចដំណើរការជាធម្មតាបានវិញ៕  អត្ថបទ៖ ភក្តី ប្រភព៖ The Strait Times

ចិន៖ ប្រទេសចិនបានបញ្ជូនយានអវកាសមួយគ្រឿងផ្ទុកដោយអាកាសយានិកចំនួន ៣នាក់ឆ្ពោះទៅកាន់ស្ថានីយអវកាសរបស់ខ្លួន នេះបើយោងតាមការចុះផ្សាយរបស់បណ្តាញសារព័ត៌​មាន The Strait Times នៅព្រឹកថ្ងៃពុធ ទី៣០ ខែវិច្ឆិកានេះ។ ការបញ្ជូនអាកាសយានិកនៅពេលនេះត្រូវបានគេមើលឃើញថា គឺជាការផ្លាស់ប្តូរអាកាសយានិកលើកទី ១របស់ចិន ខណៈវាគឺជាបេសកកម្មទី ២ ដែលចិនបានទទួលបាជោគជ័យក្នុងការបញ្ជូនមនុស្សទៅកាន់ទីអវកាសក្នុងគន្លងផែនដីទាប។ ប្រភពខាងលើបានបន្តថា យានអវកាសដែលចិនបានបញ្ជូននៅពេលនេះគឺយានប្រភេទ Shenzhou-15 ឬហៅថា “Divine Vessel” ត្រូវបានបង្ហោះចេញមជ្ឈមណ្ឌលផ្កាយរណប Jiuquan នៅម៉ោង ១១ និង ៨នាទីយប់ថ្ងៃអង្គារម្សិលមិញនេះ ខណៈអាកាសយានិកទាំង ៣រូបនោះរួមមានលោក Fei Junlong អាយុ ៥៧ឆ្នាំ លោក Deng Qingming

អ៊ីតាលី៖ ក្រុមអ្នកជួយសង្គ្រោះពលរដ្ឋរងគ្រោះដោយហេតុការណ៍បាក់ស្រុតដីនៅក្នុងប្រទេសអ៊ីតាលីបានរងឃើញជនរងដែលបានស្លាប់បាត់បង់ជីវិតបន្ថែមម្នាក់ទៀតហើយ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅព្រឹកថ្ងៃអង្គារ ទី២៩ ខែវិច្ឆិកានេះ។ ជនរងគ្រោះចុងក្រោយគេនេះគឺជាកុមារាដែលមានអាយុ ១៥ឆ្នាំ ខណៈកាលពីម្សិលមិញបងប្អូនរបស់កុមារារូបនេះចំ​នួន ២នាក់ក៏ត្រូវបានគេរាយការណ៍ថា បានស្លាប់បាត់បង់ជីវិតផងដែរ។ ប្រភពខាងលើបានបន្តថា គិតត្រឹមពេលនេះតួលេខពលរដ្ឋអ៊ីតាលីដែលបានស្លាប់នៅក្នុងហេតុការណ៍បាក់ស្រុកដីដ៏កំណាចមួយនេះបានកើនឡើងដល់ចំនួន ៨នាក់ហើយ ខណៈចំនួនពលរដ្ឋដែលកំពុងបាត់ខ្លួនវិញគឺមានចំនួន ៤នាក់។ បើយោងតាមក្រុមអ្នកជួយសង្គ្រោះបានព្យាករណ៍ថា ជនរងគ្រោះទាំង ៤នាក់ ដែលកំពុងបាត់ខ្លួននោះទំនងជាគ្មានជីវិតនៅរស់នោះទេ តែទោះជាយ៉ាងណាក្តីក្រុមអ្នកជួយសង្គ្រោះនៅតែកំពុងដុតដៃដុតជើងព្យាយាមស្វែងរកក្រុមពលរដ្ឋដែលកំពុងបាត់ខ្លួនទាំងអស់នោះ បើទោះជាពួកគេនៅរស់ឬស្លាប់ក៏ដោយ៕ អត្ថបទ៖ ភក្តី ប្រភព៖ បាងកកប៉ុស្តិ៍

អង់គ្លេស៖ លោកជំទាវទីមួយនៃប្រទេសអ៊ុយក្រែនគឺលោកស្រី Olena Zelenska បានទាមទារឲ្យមាន “ការឆ្លើយតបជាសកល” ជុំវិញករណីប្រើប្រាស់អំពើហិង្សាផ្លូវភេទនៅក្នុងភ្លើងសង្គ្រាម ដែលកំពុងកើតមាននៅលើទឹកដីអ៊ុយក្រែន។  សេចក្តីអំពាវនាវខាងលើនេះត្រូវបានធ្វើឡើងនៅក្នុងអំឡុងពេលដែលលោកស្រីបានបញ្ជើញទៅចូលរួមនៅក្នុងសន្និសិទ្ធមួយស្តីពី “គំនិតផ្តួចផ្តើមក្នុងការទប់ស្កាត់អំពើហិង្សាផ្លូវភេទនៅក្នុងជម្លោះ” ដែលបានរៀបចំឡើងនៅក្នុងទីក្រុងឡុងដ៍ ប្រទេសអង់គ្លេស។ បើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃអង្គារ ទី២៩ ខែវិច្ឆិកានេះបានបញ្ជាក់ថា​ ករណីដែលទាហានរុស្ស៊ីប្រព្រឹត្តិអំពើហិង្សាផ្លូវភេទទៅលើពលរដ្ឋជាស្រ្តីអ៊ុយក្រែនបានកើតមានជារឿញៗ ខណៈគិតត្រឹមពេលនេះព្រះរាជអាជ្ញានៃទីក្រុងកំពុងបើកការស៊ើបអង្កេតករណីឧក្រិដ្ឋកម្មប្រភេទនេះជាង ១០០ករណីផងដែរ។ សម្រាប់ប្រទេសអ៊ុយក្រែនដែលជាជនរងគ្រោះបានចាត់ទុកថា សកម្មភាពដែលទាហានរុស្ស៊ីប្រើប្រាស់អំពើហិង្សាផ្លូវភេទធ្វើជាអាវុធនៅក្នុងសង្គ្រាមនោះគឺជារឿងដ៏ថោកទាបនិងឃោឃៅបំផុត ហើយពិភពលោកទាំងមូលត្រូវតែធ្វើការឆ្លើយតបចំពោះករណីនេះឲ្យបានខ្លាំងក្លាតាមតែអាចធ្វើទៅបាន៕ អត្ថបទ៖ ភក្តី ប្រភព៖ The Strait Times  

អ៊ីតាលី៖ រដ្ឋាភិបាលនៃប្រទេសអ៊ីតាលីបានសម្រេចប្រកាសដាក់រដ្ឋនៅក្នុងគ្រាមានអាសន្នជុំវិញករណីបាក់ស្រុតដីដ៍កំណាចមួយ នេះបើយោងតាមការចុះផ្សាយរបស់បណ្តាញព័ត៌មាន Channel News Asia នៅព្រឹកថ្ងៃចន្ទ ទី២៨ ខែវិច្ឆិកានេះ។ ហេតុការណ៍បាក់ស្រុតដីនេះបានកើតឡើងនៅក្នុងតំបន់ Casamicciola នៃទីក្រុង Naples ភាគខាងត្បូងប្រទេសអ៊ីតាលី និងបានផ្តើមកើតឡើងតាំងតែពីថ្ងៃអាទិត្យមកម្លេះ។ ប្រភពខាងលើបានបន្តថា គិតត្រឹមពេលហេតុការណ៍រញ្ជួញដីបានឆក់យកជីវិតពលរដ្ឋអ៊ីតាលីអស់ចំនួន ៧នាក់នាក់ហើយ ខណៈមានពលរដ្ឋមួយចំនួនផ្សេងទៀតកំពុងតែបាត់ខ្លួនផងដែរ។ បើតា​មលោក Claudio Palomba ដែលជាភិបាលក្រុង Naples បានឲ្យដឹងថា ភ្លាមៗក្រោយកើតមានហេតុការណ៍នេះខាងអាជ្ញាធរបានសម្រេចដាក់ពង្រាយក្រុមអ្នកជួយសង្គ្រោះចំនួន ២០០នាក់ ដើម្បីធ្វើអន្តរាគមន៍ជួយសង្គ្រោះប្រជាពលរដ្ឋឲ្យបានទាន់ពេលវេលា ខណៈរដ្ឋាភិបាលទើបបានអនុម័តកញ្ចប់ថវិកាចំនួន ២លានដុល្លារសម្រាប់ប្រើប្រាស់ក្នុងប្រតិបត្តិការណ៍ជួយសង្គ្រោះនេះផងដែរ៕ អត្ថបទ៖ ភក្តី ប្រភព៖ Channel News Asia