ចិន៖ ព្យុះភ្លៀងកំពុងវាយប្រហារខេត្តជាច្រើននៅជុំវិញទីក្រុងប៉េកាំង ប្រទេសចិន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃចន្ទ ទី២៨ ខែកក្កដា។ នៅចំពោះមុខគ្រោះធម្មជាតិបន្ទាន់នេះ អាជ្ញាធរចិនបានធ្វើការជម្លៀសពលរដ្ឋប្រមាណជា ៤,៤០០នាក់ ឱ្យទៅស្នាក់នៅកន្លែងមានសុវត្ថិភាពជាបណ្តោះអាសន្នសិន ដើម្បីបង្កាគ្រោះថ្នាក់ផ្សេងៗដែលអាចកើតឡើងដោយយថាហេតុ។ បើតាមអាជ្ញាធរចិនបានបញ្ជាក់ថា តំបន់ភាគខាងជើងនៃខេត្ត Hebei គឺជាកន្លែងដែលបានរងនូវឥទ្ធិអាក្រក់ខ្លាំងជាងនេះ ដោយនៅក្នុងតំបន់នេះសម្ពាធទឹកភ្លៀងបានបង្កឱ្យមានទឹកជំនន់ និងការបាក់ដីជាច្រើនកន្លែងផងដែរ​​ ខណៈជំនន់ទឹកភ្លៀងនិងការបាក់ដីនេះក៏បានបណ្តាលឱ្យមានមនុស្សចំនួន ៤នាក់ត្រូវស្លាប់បាត់បង់ជីវិត និងមនុស្សចំនួន ៨នាក់កំពុងបាត់ខ្លួនផងដែរ។ គិតត្រឹមពេលនេះអាជ្ញាធរចិនកំពុងដាក់ពង្រាយក្រុមអ្នកជួយសង្គ្រោះជាច្រើន ដើម្បីតាមស្វែងរកអ្នកបាត់ខ្លួនទាំងនោះហើយ ខណៈគេមិនមានសង្ឃឹមខ្ពស់ថា ពួកគេអាចមានសំណាងនៅរស់មានជិវិតនោះទេ៕ អត្ថបទ៖ ភក្តី ប្រភព៖ Channel News Asia

ថៃ៖​ យ៉ាងហោចណាស់មានមនុស្សចំនួន ៦នាក់បានស្លាប់បាត់បង់ជីវិតនៅក្នុងហេតុការបាញ់ប្រហារមួយនៅក្នុងប្រទេសថៃ នេះបើយោងតាមការចុះផ្សាយរបស់បណ្តាញសារព័ត៌មាន  South China Morning Post នៅក្នុងថ្ងៃចន្ទ ទី២៨ ខែកក្កដា។ ហេតុការណ៍បាញ់ប្រហារនេះបានកើតឡើងនៅផ្សារ Tor Kor ដែលស្ថិតនៅក្នុងទីក្រុងបាងកក។ ប្រភខាងលើបានបន្តថា នៅក្នុងចំណោមជនរងគ្រោះទាំង ៦នាក់នោះ គឺមានជនរងគ្រោះចំនួន ៥នាក់ជាសន្តិសុខប្រចាំការនៅផ្សារខាងលើនេះ ខណៈជនរងគ្រោះម្នាក់ទៀតគឺជាខ្មាន់កាំភ្លើង ដែលបាញ់សម្លាប់ខ្លួឯងក្រោយបើកការបាញ់ប្រហារទៅកាន់ក្រុមសន្តិសុខផ្សាររួច។ រហូតមកទល់នឹងពេលនេះគេនៅមិនទាន់បានដឹងច្បាស់ពីមូលហេតុ ដែលជម្រុញឱ្យខ្មាន់កាំភ្លើងសម្រេចចិត្តបើការបាញ់ប្រហារដូចនេះនៅឡើយទេ៕ អត្ថបទ៖ ភក្តី ប្រភព៖  South China Morning Post

ស្រីលង្កា៖ តុលាការកំពូលរបស់ប្រទេសស្រីលង្កាបានបង្គាប់ឱ្យក្រុមហ៊ុនដឹកជញ្ជូនមួយរបស់ប្រទេសសិង្ហបុរីត្រូវបង់ប្រាក់សំណងចំនួន ១ពាន់លានដុល្លារ ជុំវិញករណីដែលមាននាវាដឹកសារធាតុគីមីមួយគ្រឿងបានផ្ទុះឆេះនិងបានលិចនៅក្នុងដែនសមុទ្ររបស់ប្រទេសស្រីលង្កានាពេលកន្លងមក នេះយោងតាមការចុះផ្សាយរបស់បណ្តាញសារព័ត៌មាន Channel News Asia។ នាវាដឹកទំនិញដែលបានជួបគ្រោះអកុសលខាងលើនេះមានឈ្មោះថា MV X-Press Pearl ជាកម្មសិទ្ធរបស់ក្រុមហ៊ុនដឹកជញ្ជូនសិង្ហបុរី Xpress Feeders។ ប្រភពខាងលើបានបន្តថា កាលពី ៤ឆ្នាំមុន ពោលគឺនៅក្នុងឆ្នាំ២០២១ នាវាដឹកទំនិញ MV X-Press Pearl ដែលមានផ្ទុកទៅដោយសារធាតុគីមីយ៉ាងច្រើននោះ​ស្រាប់តែបានផ្ទុះឆេះនិងលិច ក្រោយចេញដំណើពីរកំពង់ផែ Colombo ក្នុងប្រទេសស្រីលង្កាបានបន្តិច។ គ្រោះថ្នាក់នេះមិនត្រឹមតែបានធ្វើឱ្យប៉ះពាល់អាយុជីវិតមនុស្សនោះទេ តែសារធាតុគីមីដែលបានធ្លាយទៅក្នុងសមុទ្របានទៅបំផ្លាញនិងបំពុលបរិស្ថានទាំងនៅក្នុងទឹកនិងនៅលើកោះមួយយ៉ាងខ្លាំង ហើយគ្រោះមហន្តរាយធម្មជាតិនេះក៏អាចបន្តឡើងមានក្នុងរយៈពេលវែងទៀតផង។ ព្រោះហេតុផលនេះហើយ ទើបតុលាការស្រីលង្កាតម្រូវឱ្យក្រុមហ៊ុន Xpress Feeders ត្រូវសងថ្លៃខូចខាតរហូតដល់ ១ពាន់លានដុល្លារ៕ អត្ថបទ៖

អាមេរិក៖ ក្រសួងការបរទេសអាមេរិកបានថ្លែងថា សហរដ្ឋអាមេរិកកំពុងជំរុញឱ្យកម្ពុជា និងថៃ ត្រូវបញ្ឈប់ជាបន្ទាន់នូវអរិភាពនៃជម្លោះរវាងភាគីទាំងពីរ នេះបើយោងតាមការចុះផ្សាយរបស់បណ្តាញសារព័ត៌មាន Bloomberg នៅក្នុងថ្ងៃទី២៥ ខែកក្កដា។ សេចក្តីថ្លែងការខាងលើនេះត្រូវបានធ្វើឡើងដោយ លោក ថូមមី ភីហ្គត (Tommy Pigott) ដែលជាអ្នកនាំពាក្យឱ្យក្រសួងការបរទេសអាមេរិក។ ថ្លែងនៅក្នុងសន្និសីទសារព័ត៌មាននៅក្នុងទីក្រុងវ៉ាស៊ីនតោន លោក ថូមមី ភីហ្គត បានបញ្ជាក់ផងដែរថា អាមេរិកកំពុងមានការព្រួយបារម្ភជាខ្លាំង ចំពោះស្ថានភាពជម្លោះដែលកំពុងកើនឡើងនៅតាមព្រំដែនកម្ពុជា-ថៃ និងមានការសោកស្ដាយយ៉ាងខ្លាំងចំពោះរបាយការណ៍គ្រោះថ្នាក់ចំពោះជនស៊ីវិល។ នៅចំពោះមុខស្ថានភាពគ្រោះថ្នាក់នេះ សហរដ្ឋអាមេរិកកំពុងជំរុញឱ្យភាគីជម្លោះបញ្ឈប់ជាបន្ទាន់នូវអរិភាព ត្រូវការពារជនស៊ីវិល និងដោះស្រាយជម្លោះដោយសន្តិវិធី ៕ អត្ថបទ៖ ភក្តី ប្រភព៖ Bloomberg 

អាមេរិក៖ សាកលវិទ្យាល័យ Columbia បានយល់ព្រមបង់ប្រាក់សំណងចំនួន ២០០លានដុល្លារទៅកាន់រដ្ឋបាលរបស់លោក ដូណាល់ ត្រាំ ជុំវិញករណីដែលសាកលវិទ្យាល័យមួយនេះមិនបានជួយការពារនិស្សិតជនជាតិជ្វីហ្វ​ នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃទីព្រហស្បតិ៍​ ទី២៤ ខែកក្កដា។ ការទូទាត់ប្រាក់សំណងដ៏ច្រើននេះនឹងត្រូវធ្វើឡើងក្នុងទម្រង់ជាការបង់រំលស់បន្តិចម្តងៗក្នុងរយៈពេលកំណត់ ៣ឆ្នាំ។ សូមបញ្ជាក់ជូនថា សាកលវិទ្យាល័យ Columbia គឺជាសាកលវិទ្យាល័យមួយនៅក្នុងចំណោមសាកលវិទ្យាល័យជាច្រើនផ្សេងទៀត ដែលជាប់ពាក់ព័ន្ធយ៉ាងខ្លាំងទៅនឹងចលនាប្រឆាំងតវ៉ាសង្គ្រាមនៅតំបន់ហ្គាហ្សា ពោលគឺជាសង្គ្រាមរវាងអ៊ីស្រាអែលជាមួយនឹងកងកម្លាំងជ្រុលនិយម Hamas ប៉ាឡេស្ទីន។ នៅចំពោះសង្គ្រាមដ៏ធំនេះ ក្រុមនិស្សិតដែលមានដើមកំណើតជាជនជាតិជ្វីហ្វនៅសហរដ្ឋអាមេរិកត្រូវបានគេរើសអើង ឬធ្វើទុកបុកម្នេញ ដ្បិតមនុស្សជាច្រើនយល់ឃើញថា ប្រទេសអ៊ីស្រាអែលដែលត្រូវបានបង្កើតឡើងដោយក្រុមជនជាតិជ្វីហ្វ គឺជាអ្នកបង្កឱ្យមានសង្គ្រាមក៏ដូចជាបញ្ហាផ្សេងៗនៅលើពិភពលោក។ នៅក្នុងស្មារតីរក្សាសន្តិភាពនិងសុវត្ថិភាពចំពោះក្រុមនិស្សិតដែលមានដើមកំណើតជាជនជាតិជ្វីហ្វ នាពេលកន្លងមកអាជ្ញាធរអាមេរិកបានដាក់ចេញបទបញ្ជាយ៉ាងម៉ឹងម៉ាត់ឱ្យក្រុមសាកលវិទ្យាល័យនៅក្នុងបញ្ជីខាងលើនេះត្រូវតែខិតខំការពារសុវត្ថិភាពក្រុមនិស្សិតជនជនជាតិជ្វីហ្វឱ្យអស់ពីលទ្ធភាព ហើយបើសាកលវិទ្យាល័យណាមួយខកខានមិនបានអនុវត្តកាតព្វកិច្ចនេះទេនឹងត្រូវរងនូវការពិន័យតាមច្បាប់ជាធរមាន៕   អត្ថបទ៖ ភក្តី ប្រភព៖ BBC

តួគី៖ យ៉ាងហោចណាស់ណាស់មានមនុស្សចំនួន ១០នាក់បានស្លាប់បាត់បង់ជីវិតនៅក្នុងហេតុការណ៍ភ្លើងឆេះព្រៃដ៏ឆាប់រហ័សមួយនៅក្នុងប្រទេសតួគី នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃព្រហស្បតិ៍ ទី២៤ ខែកក្កដា។ តំបន់ព្រៃដែលកំពុងមានភ្លើងឆេះនេះគឺស្ថិតនៅក្នុងខេត្ត Eskisehir ភាគកណ្តាលនៃប្រទេសតួគី។ ប្រភពខាងលើបានបន្តថា ក្រៅតែពីបានបណ្តាលឱ្យមានអ្នកស្លាប់បាត់បង់ជីវិតហើយ អគ្គិភ័យក៏បានបណ្តាលឱ្យមានមនុស្សចំនួន ១៤នាក់ផ្សេងទៀតបានរងរបួសផងដែរ។ បើតាមអាជ្ញាធរតួគីបានបញ្ជាក់ថា ទាំងជនរងគ្រោះបានស្លាប់បាត់បង់ជីវិតនិងរងរបួស គឺសុទ្ធតែជាក្រុមអ្នកពន្លត់អគ្គិភ័យ ដែលអាជ្ញាធរបានដាក់ពង្រាយឱ្យជួយធ្វើអន្តរាគមន៍ពន្លត់ភ្លើង តែជាអកុសលភ្លើងបានឆាបឆេះយ៉ាងលឿនមកកាន់ទីតាំងរបស់ពួកគាត់រហូតធ្វើឱ្យពួកគាត់ត្រូវភ្លើងឆេះស្លាប់និងរបួសតែម្តង៕ អត្ថបទ៖ ភក្តី ប្រភព៖ The Strait Time

អាមេរិក៖ លោកប្រធានាធិបតីអាមេរិក ដូណាល់ ត្រាំ បានប្រកាសអំពីការចុះកិច្ចព្រៀងពាណិជ្ជកម្មក្នុងទំហំទឹកប្រាក់ដ៏ច្រើនបំផុតមួយជាមួយប្រទេសជប៉ុន ជាមួយនឹងការបញ្ចុះតម្លៃព​ន្ធគយមកសល់ត្រឹម ១៥% នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី២៣ ខែកក្កដា។ តាមរយៈបណ្តាញសង្គមផ្ទាល់ខ្លួន លោក ដូណាល់ ត្រាំ បានបញ្ជាក់ថា សហរដ្ឋអាមេរិកបានយល់ព្រមទទួលយកគម្រោងវិនិយោគធំមួយជាផ្លូវការពីប្រទេសជប៉ុនហើយ ដោយគម្រោងវិនិយោគនោះមានតម្លៃជាទឹកប្រាក់រហូតដល់ ៥៥០ពាន់លានដុល្លារ។ នៅក្នុងសារតាមបណ្តាញសង្គមដដែលនេះ លោក ដូណាល់ ត្រាំ ក៏បានបន្ថែមថា​ ចាប់ពីពេលនេះទៅប្រទេសជប៉ុនអាចបង្កើនការនាំចេញផលិតផលខ្លួនដូចជា គ្រឿងសម្ភារៈសម្រាប់ផលិតរថយន្ត​ជាលក្ខណៈគ្រួសារ រថយន្តធំ ផលិតផលកសិកម្ម និងផលិតផលផ្សេងៗជាច្រើនទៀតមកកាន់សហរដ្ឋអាមេរិកបាន ជាមួយនឹងអត្រាពន្ធគយត្រឹមតែ ១៥%

ហ្វីលីពីន៖ រដ្ឋធានីម៉ានីលរបស់ប្រទេសហ្វីលីពីនកំពុងទទួលឥទ្ធិអាក្រក់យ៉ាងខ្លាំងពីព្យុះភ្លៀងដ៏កម្រមួយ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃ អង្គារ ទី២២ ខែកក្កដា។ ភ្លៀងបានចាប់ផ្តើមធ្លាក់តាំងតែពីយប់ម្សិលមិញ និងបន្តធ្លាក់កាន់តែខ្លាំងឡើងៗ រហូតធ្វើឱ្យតំបន់សំខាន់ៗមួយចំនួនជន់លិចដោយជំនន់ទឹកភ្លៀងផងដែរ។ បើតាមអាជ្ញាធរហ្វីលីពីនបានឱ្យដឹងថា គ្រោះធម្មជាតិខាងលើនេះបានបង្ខំឱ្យអាជ្ញាធរសម្រេចបិទសាលារៀន និងការិយាល័យរបស់ស្ថាប័នរដ្ឋមួយចំនួនជាបណ្តោះអាសន្ន ខណៈពលរដ្ឋចំនួន ២នាក់កំពុងតែបាត់ខ្លួនដោយគ្មានតម្រុយនៃការតាមស្វែងរកទាល់តែសោះ។ ជាងទៅនេះទៀតថា អាជ្ញាធរហ្វីលីពីនក៏បានសម្រេចជម្លៀសពលរដ្ឋជាង ២៣,០០០នាក់ឱ្យទៅស្នាក់នៅក្នុងសាលារៀនមួយកន្លែង និងជម្លៀសពលរដ្ឋប្រមាណជា ២៥,០០០នាក់ផ្សេងទៀតឱ្យទៅស្នាក់នៅក្នុងស្ថានីយរថភ្លើងមួយកន្លែងជាបណ្តោះអាសន្នសិនផងដែរដើម្បីរក្សាសុវត្ថិភាពរបស់ពួកគេ៕ អត្ថបទ៖ ភក្តី ប្រភព៖ Channel News Asia

ឥណ្ឌូណេស៊ី៖ ភាពរីករាយនៅក្នុងពិធីមង្គលការមួយបានប្រែក្លាយជាទៅពេលវេលាយ៉ាងក្រៀមក្រំនិងទុក្ខសោកវិញសម្រាប់មនុស្សមួយចំនួនទៅវិញ ក្រោយពិធីមង្គលការដ៏អធិកអធមមួយនេះបានបណ្តាលឱ្យមានមនុស្សចំនួន ៣នាក់ត្រូវស្លាប់បាត់បង់ជីវិត និងមនុស្សចំនួន ២៧នាក់ផ្សេងទៀតបានរងរបួស។ យោងតាមការចុះផ្សាយរបស់បណ្តាញសារព័ត៌មាន The Strait Time កាលពីយប់ថ្ងៃទី ២១ ខែកក្កដាបានឱ្យដឹងថា ហេតុការណ៍អកុសលនេះបានកើតឡើងនៅក្នុងខេត្ត West Java នៃប្រទេសឥណ្ឌូណេស៊ី។ ប្រភពខាងលើបានបន្តថា​ ពិធីមង្គលការខាងលើនេះគឺមានកូនក្រមុំជាអភិបាលរងក្រុង Garut នៃខេត្ត West Java ដែលត្រូវរៀបការជាមួយកូនកំលោះជាកូនប្រុសរបស់អភិបាលខេត្ត West Java ពោលគឺទាំងគ្រួសារកូនកូនក្រមុំនិងគ្រួសារកូនកំលោះសុទ្ធជាអភិជន អ្នកមានមុខមាត់ខ្ពស់នៅក្នុងសង្គម និងមានទ្រព្យសម្បត្តិច្រើន។ ដោយហេតុនេះហើយទើបពិធីមង្គលការខាងលើនេះត្រូវបានរៀបចំឡើងដោយខុសពីពលរដ្ឋសាមញ្ញបន្តិច ពោលវាគឺជាពិធីមង្គលការ ដែលបើកឱ្យសាធារណជនអាចចូលរួមដោយសេរីតែម្តង។ យ៉ាងណាក្តី ពិធីមង្គលការដែលបានបើកជាសាធារណៈនេះបានជម្រុញឱ្យភ្ញៀវមួយចំនួនត្រូវប្រជ្រៀតគ្នាយ៉ាងខ្លាំងរហូតនាំឱ្យមានការរត់ជាន់គ្នាស្លាប់និងរបួសតែម្តង៕ អត្ថបទ៖ ភក្តី ប្រភព៖ The Strait

បង់ក្លាដេស៖ យ៉ាង​ហោចណាស់មានមនុស្សចំនួន ១៩នាក់បានស្លាប់បាត់បង់ជីវិតនៅក្នុងហេតុការណ៍មានយន្តហោះមួយគ្រឿងបានធ្លាក់ទៅលើសាកលវិទ្យាល័យនិងសាលារៀនមួយកន្លែងនៅក្នុងប្រទេសបង់ក្លាដេស នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia កាលពីយប់ថ្ងៃទី ២១ ខែកក្កដា។ ក្រៅតែពីបានបណ្តាលឱ្យមានអ្នកស្លាប់បាត់បង់ជីវិតហើយ ហេតុការណ៍អកុសលនេះក៏បានបណ្តាលឱ្យមនុស្សចំនួន ១៦៤ផ្សេងទៀតបានរងរបួសធ្ងន់និងស្រាលផងដែរ។ បើតាមអាជ្ញាធរបង់ក្លាដេសបានបញ្ជាក់ថា យន្តហោះដែលបានជួបឧប្បវហេតុធ្លាក់នេះគឺជាយន្តហោះយោធារបស់ក្រសួងការពាជាតិបង់ក្លាដេស សម្រាប់ប្រើប្រាស់នៅក្នុងមូលដ្ឋានកងទ័ពក្នុងតំបន់ Kurmitola ក្នុងទីក្រុង Dhaka។ ប្រភពខាងលើបានបន្តថា យន្តហោះខាងលើនេះគឺជាយន្តហោះប្រភេទ The F-7 BGI ដែលរដ្ឋាភិបាលបង់ក្លាសេសបានទិញមកពីប្រទេសចិន ហើយការធ្លាក់ខាងលើនេះគឺបានកើតឡើងនៅក្នុងអំឡុងពេលនេះនៃការហ្វឹកហាត់ហោះហើររបស់ក្រុមកងទ័ពជើងអាកាសបង់ក្លាដេស៕ អត្ថបទ៖ ភក្តី ប្រភព៖ Channel News Asia