អាមេរិក៖ លោកប្រធានាធិបតីអាមេរិក ដូណាល់ ត្រាំ បានសម្រេចហាមឃាត់ពលរដ្ឋមកពីប្រទេសចំនួន ១២ មិនឱ្យធ្វើដំណើរចូលមកក្នុងទឹកដីអាមេរិកឡើយ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី៥ ខែឧសភា។ សេចក្តីសម្រចនេះត្រូវបានធ្វើឡើងក្រោមហេតុផលដើម្បី “ការពារជនជាតិអាមេរិកពីតួអង្គបរទេសដ៏គ្រោះថ្នាក់”។ ប្រទេសទាំង ១២នោះរួមមាន៖ ១.អាហ្វហ្គានីស្ថាន ២.មីយ៉ាន់ម៉ា ៣.ឆាដ ៤.កុងហ្គោ ៥.អេក្វាទ័រហ្គីណេ ៦.អេរីទ្រា ៧.ហៃទី ៨.អ៊ីរ៉ង់ ៩.លីប៊ី ១០.សូម៉ាលី ១១.ស៊ូដង់ ១២.យេម៉ែន។ ក្រៅតែពីបានសម្រេចធ្វើការហាមឃាត់ទាំងស្រុងចំពោះពលរដ្ឋមកពីប្រទេសទាំង ១២ខាងលើនេះហើយ សហរដ្ឋអាមេរិកក៏បានសម្រេចរឹតបន្តឹងទិដ្ឋការចំពោះប្រទេសចំនួន ៧ផ្សេងទៀតផងដែរ រួមមាន៖

ឥណ្ឌា៖ យ៉ាងហោចណាស់មានមនុស្សចំនួន ៣៤នាក់បានស្លាប់បាត់បង់ជីវិតដោយសារបញ្ហាទឹកជំនន់នៅក្នុងតំបន់ភាគខាងជើង នៃប្រទេសឥណ្ឌា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២ ខែមិថុនា។ ទឹកជំនន់ខាងលើនេះបានកើតឡើងយ៉ាងឆាប់រហ័ស ក្រោយមានភ្លៀងធ្លាក់ក្នុងបរិមាណយ៉ាងច្រើន និងជាច្រើនថ្ងៃជាប់ៗគ្នា។ បើតាមអាជ្ញាធរគ្រប់គ្រងគ្រោះមហន្តរាយឥណ្ឌាបានបញ្ជាក់ថា ក្រៅតែពីបានបណ្តាលឱ្យមានអ្នកស្លាប់បាត់បង់ជីវិតអស់ជាច្រើននាក់ហើយ បញ្ហាទឹកជំនន់នេះក៏បានធ្វើឱ្យពលរដ្ឋប្រមាណជា ៥០០នាក់ផ្សេងទៀតត្រូវជាប់នៅក្នុងផ្ទះមិនអាចធ្វើដំណើរចេញទៅណាបានផងដែរ។ ប្រភពខាងលើបានបន្តថា គិតត្រឹមពេលនេះអាកាសធាតុនៅមិនទាន់ត្រលប់មករកភាពធម្មតាវិញនៅឡើយទេ ពោលគឺភ្លៀងនៅតែបន្តធ្លាក់ ហើយគ្រោះថ្នាក់ផ្សេងៗក៏អាចបន្តកើតមានបន្ថែមទៀតផងដែរ៕ អត្ថបទ៖ ភក្តី ប្រភព៖ The Strait Time

តួគី៖ ក្រុង Marmaris ដែលស្ថិតនៅភាគខាងត្បូង នៃប្រទេសតួគីបានទទួលរងការវាយប្រហារដោយគ្រោះរញ្ជួយដីកម្រិត ៥,៨រ៉ិចទ័រ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃអង្គារ ទី៣ ខែមិថុនា។ គ្រោះធម្មជាតិនេះបានបណ្តាលឱ្យយុវតីអាយុ ១៤ឆ្នាំម្នាក់ ឈ្មោះ Afranur Gunlu ត្រូវស្លាប់បាត់បង់ជីវិតក្រោយពេលបញ្ជូនទៅដល់មន្ទីរពេទ្យ។ ប្រភពខាងលើបានបន្តថា ក្រៅតែពីបានបណ្តាលឱ្យមានអ្នកស្លាប់ហើយ ហេតុការណ៍គ្រោះរញ្ជួយដីក៏បានបណ្តាលឱ្យមនុស្សចំនួន ៧០នាក់ផ្សេងទៀតបានរងរបួសផងដែរ ខណៈនៅក្នុងនោះមានមនុស្សចំនួន ៤៦នាក់បានរងរបួសធ្ងន់ធ្ងរនិងត្រូវបញ្ជូនទៅសង្គ្រោះបន្ទាន់នៅក្នុងមន្ទីរពេទ្យ។ បើតាមលោក Ali Yerlikaya រដ្ឋមន្ត្រីក្រសួងមហាផ្ទៃតួគីបានបញ្ជាក់ថា សម្រាប់ផលប៉ះពាល់ចំពោះទ្រព្យសម្បតិ្តសាធារណៈវិញគឺមានអគារមួយចំនួនបានរងនូវការខូតខាតកម្រិតស្រាល តែមិនមានអគារត្រូវដួលរលំទាំងស្រុងនោះទេ៕ អត្ថបទ៖ ភក្តី ប្រភព៖ Channel News

ថៃ៖ ស្រុក Phrao ខេត្តឈៀងម៉ៃ ប្រទេសថៃ បានរងការវាយប្រហារដោយគ្រោះរញ្ជួយដីកម្រិត ៤,៥រ៉ិចទ័រ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅក្នុងរសៀលថ្ងៃចន្ទ ទី២ ខែមិថុនា។ គ្រោះរញ្ជួយដីបានបង្កើតឱ្យមានភាពញ័រនៅក្នុងដីជម្រៅប្រមាណជា ១គីឡូម៉ែត្រ និងបានកើតឡើងក្នុងរយៈពេលខ្លីមួយប៉ុណ្ណោះ។ ប្រភពខាងបានបន្តថា ក្នុងពេលកើតមានគ្រោះរញ្ជួញដីខាងលើនេះតំបន់មួយចំនួននៅក្បែរខេត្តឈៀងម៉ៃក៏បានទទួលរងភាពញ័រក្នុងកម្រិតស្រាលផងដែរ។ យ៉ាងណាក្តី រហូតមកទល់នឹងពេលនេះ នៅមិនទាន់មានរបាយការណ៍បង្ហាញថាមានជនរងគ្រោះឬផលប៉ះពាល់យ៉ាងណានៅឡើយទេ។ គួររម្លឹកជូនថា កាលពីប៉ុន្មានសប្តាហ៍មុនទីក្រុងបាងកករបស់ប្រទេសថៃក៏បានទទួលរងការរញ្ជួយដីកម្រិតមធ្យមមួយផងដែរ ដែលបានធ្វើឱ្យអគារមួយកន្លែងត្រូវដួលរលំនិងសម្លាប់មនុស្សអស់ជាច្រើននាក់៕ អត្ថបទ៖ ភក្តី ប្រភព៖ បាងកកប៉ុស្តិ៍

វៀតណាម៖ វៀតណាមគ្រោងសាងសង់រមណីយដ្ឋានកាស៊ីណូ ដែលមានតម្លៃជាទឹកប្រាក់រហូតដល់ ៥១,៥ ទី្រលានដុង (១,៩៧ពាន់ដុល្លារ) នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី១ ខែមិថុនា។ តាមគម្រោងរមណីយដ្ឋានកាស៊ីណូមួយកន្លែងនឹងត្រូវបង្កើតឡើងនៅក្នុងឃុំ Van Yen​ ស្រុក Van Don ខេត្ត Quang Ninh ភាគភាគឦសាន នៃប្រទេសវៀតណាម។ បើតាមក្រសួងហិរញ្ញវត្ថុវៀតណាមបានបញ្ជាក់ថា គិតត្រឹមនេះសំណើសុំបង្កើតរមណីយដ្ឋានកាស៊ីណូតម្លៃជិត ២ពាន់លានដុល្លារនេះត្រូវបានបញ្ជូនទៅដល់ខុទ្ទកាល័យនាយករដ្ឋមន្ត្រីវៀតណាមរួចរាល់ហើយ និងរង់ចាំតែថ្ងៃចុះហត្ថលេខាជាផ្លូវការតែប៉ុណ្ណោះ។ ប្រភពខាងលើបានបន្តថា អាជ្ញាធរវៀតណាមក៏គ្រោងបើកឱ្យពលរដ្ឋវៀតណាមចូលទៅលេងក្នុងរមណីដ្ឋានកាស៊ីណូមួយកន្លែងផងដែរ តែនៅក្នុងរយៈពេលសាកល្បងមួយ ហើយបន្ទាប់មករមណីដ្ឋានកាស៊ីណូនឹងទទួលស្វាគមន៍តែភ្ញៀវទេសចរអន្តរជាតិប៉ុណ្ណោះ៕ អត្ថបទ៖ ភក្តី ប្រភព៖ The Strait Time

ថៃ៖ ​ថៃបានរកឃើញអ្នកឆ្លងជំងឺកូវីដ-១៩ ចំនួន ៦៥,៨៨០ករណីកាលពីសប្តាហ៍កន្លងមុន នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅក្នុងថ្ងៃចន្ទ ទី២ ខែមិថុនា។ របាយការណ៍ស្តីពីអ្នកឆ្លងជំងឺកូវីដ-១៩ថ្មីនេះ ត្រូវបានគិតចាប់ពីចន្លោះថ្ងៃទី២៥ រហូតដល់ថ្ងៃទី៣១ ខែឧសភា។ បើតាមលោក Somsak Thepsuthin រដ្ឋមន្ត្រីក្រសួងសុខាភិបាលថៃបានបញ្ជាក់ថា នៅក្នុងចំណោមអ្នកឆ្លងទាំងអស់នោះក៏មានអ្នកស្លាប់ចំនួន ៣ករណីផងដែរ ខណៈតួលេខអ្នកឆ្លងខាងលើនេះមានការកើនឡើងយ៉ាងច្រើន បើធៀបទៅនឹងតួលេខអ្នកឆ្លងក្នុងសប្តាហ៍មុននេះទៀត។ រដ្ឋមន្ត្រីរូបនេះបានបន្តថា នៅក្នុងចំណោមអ្នកឆ្លងទាំង ៦៥,៨៨០នាក់នេះ គឺភាគច្រើនជាពលរដ្ឋដែលមានអាយុចន្លោះពី ៣០ដល់៣៩ឆ្នាំ៕ អត្ថបទ៖ ភក្តី ប្រភព៖  បាងកកប៉ុស្តិ៍

អាឡឺម៉ង់៖ ស្រ្តីចំណាស់ចំនួន ២នាក់បានស្លាប់បាត់បង់ជីវិតនៅក្នុងហេតុការណ៍មានយន្តហោះខ្នាតតូចមួយគ្រឿងបានហោះទៅបុកដំបូលផ្ទះមួយខ្នងនៅក្នុងប្រទេសអាឡឺម៉ង់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី១ ខែមិថុនា។ ហេតុការណ៍អកុសលនេះបានកើតឡើងនៅក្នុងក្រុង​ Kleinenbroich​ ដែលស្ថិតនៅតំបន់ប៉ែកខាងលិចនៃប្រទេសអាឡឺម៉ង់។ បើតាមអាជ្ញាធរអាឡឺម៉ង់បានបញ្ជាក់ថា នៅក្នុងចំណោមជនរងគ្រោះដែលបានស្លាប់បាត់បង់ជីវិតទាំង ២នាក់នោះគឺមានជនរងគ្រោះម្នាក់ជាស្រ្តីវ័យ ៧១ឆ្នាំ និងជាអ្នកបើកបរយន្តហោះផ្ទាល់តែម្តង ខណៈជនរងគ្រោះម្នាក់ទៀតគឺជាស្រ្តីវ័យ ៨៤ឆ្នាំ និងជាម្ចាស់ផ្ទះ ដែលជាកន្លែងកើតហេតុ។ រហូតមកទល់នឹងពេលនេះអាជ្ញាធរអាឡឺម៉ង់នៅមិនទាន់អាចបញ្ជាក់អំពីមូលហេតុជាក់លាក់ ដែលបង្កឱ្យមានគ្រោះថ្នាក់នេះកើតឡើងនៅឡើយទេ ខណៈការស៊ើបអង្កេតកំពុងត្រូវបានធ្វើឡើងដោយក្រុមអ្នកជំនាញផ្នែកអាកាសចរណ៍៕ អត្ថបទ៖ ភក្តី ប្រភព៖  The Strait Time

ឥណ្ឌូណេស៊ី៖ អាជ្ញាធរកោះបាលី ដែលជាតំបន់ទេសចរណ៍ដ៏ល្បីល្បាញបំផុតមួយនៅលើពិភពលោកគ្រោងនឹងធ្វើការហាមឃាត់ការប្រើប្រាស់ទឹកសុទ្ធ ដែលមានចំណុះតិចជាង ១លីត្រក្នុងមួយដប​ ដើម្បីកាត់បន្ថយកាកសំណល់ប្លាស្ទិក​ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី៣១ ខែឧសភា។ បើគ្មានអ្វីជាឧបសគ្គនោះទេ ច្បា​ប់ស្តីពីការហាមឃាត់ការប្រើប្រាស់ទឹកសុទ្ធមានចំណុះតិចជាង ១លីត្រក្នុងមួយដបនេះនឹងត្រូវចូលជាធរមាននៅដើមឆ្នាំ ២០២៦។ បើតាមលោក I Wayan Koster ដែលជាអភិបាលខេត្តបាលីបានឱ្យដឹងថា គម្រោងខាងលើនេះគឺជាផ្នែកមួយនៃគោលនយោបាយថែរក្សាបរិស្ថានធម្មជាតិ តាមរយៈវិធានការទប់ស្កាត់កាកសំណល់ផ្សេងៗ និងជាពិសេសនោះគឺកាកសំណលប្លាសិក ដែលមិនអាចរលាយនៅក្នុងដីបាននោះទេ។ អភិបាលខេត្តរូបនេះបានបន្តថា បញ្ហាកាកសំណល់ប្លាសិ្ទកមិនត្រឹមតែអាចផ្តល់ផលប៉ះពាល់ដល់សោភ័ណ្ឌភាព អនាម័យ និងសណ្ឋាប់ធ្លាប់នៅលើកោះបាលីទាំងមូលនោះទេ តែវាក៏ជាកត្តាមួយដែលអាចជះឥទ្ធិពលអាក្រក់ដល់សុខភាពប្រជាពលរដ្ឋក្នុងកម្រិតធ្ងន់ធ្ង​រផងដែរ ប្រសិនបើបញ្ហានេះបន្តកើតមាននៅក្នុងរយៈពេលវែង៕ អត្ថបទ៖ ភក្តី ប្រភព៖ The Strait

ឥណ្ឌា៖ យ៉ាងណោចណាស់មានមនុស្សចំនួន ៥នាក់បានស្លាប់​បាត់បង់ជីវិតដោយសារទឹកជំនន់ក្នុងប្រទេសឥណ្ឌា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី៣១ ខែឧសភា។ តំបន់ដែលកំពុងប្រឈមនឹងគ្រោះធម្មជាតិដ៏គ្រោះថ្នាក់នេះគឺរដ្ឋ Assam ដែលស្ថិតនៅប៉ែកខាងកើតនៃប្រទេសឥណ្ឌា។ បើតាមអាជ្ញាធរគ្រប់គ្រងគ្រោះមហន្តរាយឥណ្ឌាបានបញ្ជាក់ថា ទឹកទំនន់ខាងាលើនេះបានកើតក្រោយភ្លៀងមូសុងបានធ្លាក់ក្នុងបរិមាណយ៉ាងច្រើននិងជាច្រើនថ្ងៃជាប់ៗគ្នា រហូតបង្កទៅជាជំនន់ទឹកភ្លៀងយ៉ាងឆាប់រហ័សតែម្តង។ ប្រភពខាងបានបន្តថា គិតត្រឹមពេលនេះបញ្ហាអាកាសធាតុនៅក្នុងរដ្ឋ ហាក់មិនទាន់មានភាពល្អប្រសើរនៅឡើយទេ ហើយប៉ះពាល់ក៏អាចបន្តកើតមានបន្ថែមទៀតផងដែរ ដ្បិតភ្លៀងនៅតែបន្តធ្លាក់៕ អត្ថបទ៖ ភក្តី ប្រភព៖ The Strait Time

ឥណ្ឌូណេស៊ី៖ យ៉ាងហោចណាស់មានមនុស្សចំនួន ៨នាក់បានស្លាប់បាត់បង់ជីវិតនៅក្នុងហេតុការណ៍បាក់ផ្ទាំងថ្មដ៏កម្រមួយនៅក្នុងប្រទេសឥណ្ឌូណេស៊ី នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសុក្រ ទី៣០ ខែឧសភា។ ហេតុការណ៍អកុសលនេះបានកើតឡើងនៅក្នុងការដ្ឋានយកថ្មមួយកន្លែង មានទីតាំងស្ថិតនៅក្នុងតំបន់ Cirebon នៃខេត្ត West Java ដែលជាដែនដីកោះធំមួយស្ថិតភាគខាងលិចនៃប្រទេសឥណ្ឌូណេស៊ី។ បើតាមអាជ្ញាធរខេត្ត West Java បានបញ្ជាក់ថា ក្រៅតែពីបានរកឃើញមានអ្នកស្លាប់ភ្លាមៗហើយ គិតត្រឹមពេលនេះក៏នៅមានមនុស្សចំនួន ១០នាក់ផ្សេងទៀតកំពុងតែបាត់ខ្លួន ហើយក្រុមអ្នកជំនាញកំពុងតែព្យាយាមស្វែងរកពួកគេតាមមធ្យោបាយផ្សេងជាច្រើនតាមតែអាចធ្វើទៅបាន ខណៈក្តីសង្ឃឹមថាពួកគេអាចមានសំណាងនៅរស់មានជីវិតនោះគឺមានតិចតួចបំផុត។ ប្រភពខាងលើបានបន្តថា ទាំងជនរងគ្រោះដែលបានស្លាប់បាត់បង់ជីវិត និងកំពុងបាត់ខ្លួនទាំងអស់គឺសុទ្ធតែជាក្រុមកម្មករ ដែលកំពុងបំពេញការងារនៅក្នុងការដ្ឋាននេះផ្ទាល់តែម្តង៕ អត្ថបទ៖ ភក្តី ប្រភព៖  The Strait Time