វៀតណាម៖ តួលេខអ្នកស្លាប់បាត់បង់ជីវិតដោយសារព្យុះភ្លៀងនៅភាគកណ្តាលនៃប្រទេសវៀតណាមបានកើនឡើងដល់ ៤១នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃទី២១ ខែវិច្ឆិកា។ ជាមួយគ្នានេះ ក៏មានពលរដ្ឋវៀតណាមចំនួន ៩នាក់ផ្សេងទៀតកំពុងតែបាត់ខ្លួនផងដែរ។ សូមរម្លឹកជូនថា តំបន់ភាគកណ្តាលនៃប្រទេសវៀតណាមបានទទួលរងនូវភ្លៀងធ្លាក់ខ្លាំងនិងបន្តធ្លាក់ឥតឈប់ឈរអស់រយៈពេលជាង ១សប្តាហ៍មកហើយ ខណៈបរិមាណទឹកភ្លៀងដ៏ច្រើននេះក៏បានបណ្តាលឱ្យតំបន់មួយចំនួនត្រូវជន់លិច និងកើតមានបញ្ហាបាក់ស្រុតដីផងដែរ។ ចំពោះផលប៉ះពាល់ជាទូទៅវិញ គឺមានផ្ទះជាង ៥២,០០០ខ្នងត្រូវបានទឹកជន់លិច ហើយពលរដ្ឋប្រមាណជាកន្លះលាននាក់ត្រូវរស់នៅដោយគ្មានភ្លើងអគ្គិសនីប្រើប្រាស់ ឬខកខានមិនអាចធ្វើសកម្មភាពអាជីវកម្មបាន៕ អត្ថបទ៖ ភក្តី ប្រភព៖ BBC

ឥណ្ឌូណេស៊ី៖ តួលេខអ្នកស្លាប់បាត់បង់ជីវិតដោយសារបញ្ហាបាក់ដីនៅតំបន់ភាគកណ្តាលនៃខេត្ត Java ប្រទេសឥណ្ឌូណេស៊ី បានកើនឡើងដល់ចំនួន ៣០នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២១ ខែវិច្ឆិកា។ ទន្ទឹមគ្នានេះនៅមានមនុស្សចំនួន២១ នាក់ផ្សេងទៀតកំពុងបន្តបាត់ខ្លួន។ គួររម្លឹកជូនថា ហេតុការណ៍អកុសលខាងលើនេះបានកើតឡើងតាំងតែពីថ្ងៃទី១៧ ខែវិច្ឆិកាម្លេះ ហើយរហូតមកទល់នឹងពេលនេះប្រតិបត្តិការជួយសង្គ្រោះនិងតាមរកអ្នកបាត់ខ្លួននៅមិនទាន់បិទបញ្ចប់នៅឡើយទេ ដ្បិតភ្លៀងនៅតែបន្តធ្លាក់ ដែលជាឧបសគ្គដ៏ចម្បងមួយក្នុងការជីកកកាយរកមនុស្សដែលបានកប់នៅក្នុងដី។ បើតាមអាជ្ញាធរឥណ្ឌូណេស៊ីបានឱ្យដឹងថា ក្រុមមនុស្សដែលបានកំពុងបាត់ខ្លួននៅទាំងអស់នោះគឺទំនងជាបានកប់ជាប់នៅក្នុងដីជម្រៅចន្លោះពី ៣-៨ម៉ែត្រ៕ អត្ថបទ៖ ភក្តី ប្រភព៖ The Strait Time  

បង់ក្លាដែស៖ យ៉ាង​ហោចណាស់មានមនុស្សចំនួន ៣នាក់បានស្លាប់បាត់បត់ជីវិតនៅក្នុងហេតុការណ៍រញ្ជួយដីនៅក្នុងប្រទេសបង់ក្លាដែស នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២១ ខែវិច្ឆិកា។ គ្រោះរញ្ជួយដីបានកើតឡើងក្នុងកម្រិត ៥,៧រ៉ិចទ័រ​ និងបានវាយប្រហារទីតាំងសំខាន់ៗមួយចំនួនក្នុងទីក្រុង Dhaka រដ្ឋធានីរបស់បង់ក្លាដែស។ បើតាមអាជ្ញាធរបង់ក្លាដែសបានបញ្ជាក់ថា ជនរងគ្រោះដែលបានស្លាប់បាត់បង់ជីវិតទាំង ៣នាក់គឺបានស្លាប់ដោយសារតែមានអគារកម្ពស់ ៦ជាន់មួយខ្នង បានដួលសង្កត់ទៅលើពួកគេ ខណៈពួកគេកំពុងបំពេញការងារនៅក្បែរអគារដែលបានដួលរលំនោះ។ ប្រភពខាងលើបានបន្តថា ក្រៅតែពីបានបណ្តាលឱ្យមានអ្នកស្លាប់បាត់បង់ជីវិតហើយ ហេតុការណ៍គ្រោះថ្នាក់នេះក៏បានបណ្តាលឱ្យមានមនុស្សជាច្រើននាក់ផ្សេងទៀតបានរងរបួសធ្ងន់និងស្រាលផងដែរ៕ អត្ថបទ៖ ភក្តី ប្រភព៖ The Strait Time

ហ្វីលីពីន៖ តុលាការហ្វីលីពីនសម្រេចផ្តន្ទាទោសស្ត្រីជនជាតិចិនម្នាក់ដែលជាមេខ្លោងនៅក្នុងសំណុំរឿង ឧក្រិដ្ឋកម្មឆបោកអនឡាញ និងសកម្មភាពជួញដូរមនុស្សឱ្យជាប់ពន្ធនាគារអស់មួយជីវិត នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃទី២០ ខែវិច្ឆិកា។ ស្រ្តីចិនរូបនេះមានឈ្មោះថា Alice Guo អាយុ ៣៥ឆ្នាំ ធ្លាប់ជា Influencer ដ៏មានសក្តានុពលម្នាក់នៅលើបណ្តាញសង្គម ហើយរូបគាត់ក៏បានក្លែងបន្លំឯកសារដើម្បីទទួលបានសញ្ជាតិ​ហ្វីលីពីន​ផងដែរ។ ដោយសារតែភាពល្បីល្បាញ ស្រ្តីរូបនេះបានជាប់ឆ្នោតធ្វើជាមេឃុំ Bamban ដែលស្ថិតនៅភាគខាងជើងនៃរដ្ឋធានីម៉ានីល ចន្លោះពីឆ្នាំ២០២២ ដល់ឆ្នាំ​២០២៤។ នៅក្នុងអំឡុងពេលមានតួនាទីជាមេឃុំនោះហើយ ដែលលោកស្រី Alice Guo និងជនបរទេសជាច្រើននាក់ផ្សេងទៀត បាន​រួមដៃគ្នា​បើកបនល្បែងឆបោកអនឡាញ ​ និងធ្វើ​សកម្មភាពជួញដូរមនុស្ស ដោយមានទាំងសកម្មភាព​ឃុំឃាំង​មនុស្ស​ និងធ្វើទារុណកម្ម​បង្ខំឱ្យ​ធ្វើការ​ងារខុស​ច្បាប់​ផងដែរ។ ​ ​បើតាមអាជ្ញាធរហ្វីលីពីនបានបញ្ជាក់ថា ក្នុងពេលចុះបង្រ្កាបទីតាំង​បនល្បែង​ឆបោក​អនឡាញ

អូស្រ្តាលី៖  ក្រុមហ៊ុន Meta នឹងធ្វើការបិទមិនឱ្យពលរដ្ឋអូស្រ្តាលីអាយុក្រោម ១៦ឆ្នាំ ចូលប្រើប្រាស់បណ្តាញសង្គមរបស់ខ្លួនបាននោះទេ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២០ ខែវិច្ឆិកា។ តាមគម្រោងគឺវិធានការដ៏តឹងរឹងខាងលើនេះនឹងចាប់ផ្តើមអនុវត្តចាប់ពីថ្ងៃទី១០ ខែធ្នូខាងមុខនេះតទៅ។ ប្រភពខាងលើបានបន្តថា ការបិទមិនឱ្យពលរដ្ឋវ័យក្មេងនៅក្នុងប្រទេសអូស្រ្តាលីអាចចូលទៅប្រើប្រាស់បណ្តាញសង្គមរបស់ក្រុមហ៊ុន Meta ខាងលើនេះគឺត្រូវបានធ្វើឡើងស្របតាមការសម្រេចរបស់សភាអូស្រ្តាលី ដែលចង់ទប់ស្កាត់ការឆបោក ការគំរាមកំហែង  ការចែកចាយនូវព័ត៌មានអវិជ្ជមាន និងការកេងចំណេញក្នុងរូបភាពផ្សេងៗទៅលើក្រុមអ្នកប្រើប្រាស់បណ្តាញសង្គមវ័យក្មេង។ សូមបញ្ជាក់ជូនថា បណ្តាញសង្គមរបស់ក្រុមហ៊ុន Meta ដែលនឹងត្រូវបិទតាមវិធានការខាងលើនេះគឺមានចំនួន ៣ដូចជា Instagram, Facebook និង Threads៕ អត្ថបទ៖ ភក្តី ប្រភព៖ The Strait Time

វៀតណាម៖ តួលេខអ្នកស្លាប់បាត់បង់ជីវិតដោយសារទឹកជំនន់និងបញ្ហាបាក់ដីនៅក្នុងប្រទេសវៀតណាមបានកើនឡើងដល់ ១៦នាក់ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី២០ ខែវិច្ឆិកា។ តួលេខអ្នកស្លាប់បាត់បង់ជីវិតនេះគឺតួលេខជនរងគ្រោះនៅក្នុងករណីជំនន់ទឹកភ្លៀងនៅភាគកណ្តាលប្រទេសវៀតណាម ដែលបានផ្តើមកើតឡើងចាប់តាំងពីចុងខែតុលា។ ប្រភពខាងលើបានបន្តថា គិតរហូតមកទល់នឹងពេលនេះគ្រោះធម្មជាតិដ៏កម្រនេះនៅតែបន្តគំរាមកំហែងអាយុជីវិតមនុស្ស និងបង្កការរំខានដល់ការរស់នៅរបស់ប្រជាពលរដ្ឋវៀតណាមជាច្រើននាក់ ដ្បិតភ្លៀងនៅតែបន្តធ្លាក់ក្នុងបរិមាណយ៉ាងច្រើន។ បើតាមអាជ្ញាធរវៀតណាមបានបញ្ជាក់ថា គិតត្រឹមពេលនេះគឺមានផ្ទះប្រមាណជា ៤៣,០០០ខ្នងត្រូវបានជន់លិច ហើយផ្លូវសំខាន់ៗជាច្រើនត្រូវបានកាត់ផ្តាច់ទាំងស្រុងដោយសារបញ្ហាបាក់ដី៕ អត្ថបទ៖ ភក្តី ប្រភព៖ Channel News Asia  

វៀតណាម៖ ​​​តុលាការវៀតណាមសម្រេចផ្តន្ទាទោសអតីតជ័យលាភីបវរកញ្ញា Miss Grand International ម្នាក់ ឱ្យជាប់ពន្ធនាគាររយៈពេល ២ឆ្នាំជុំវិញករណីផ្សព្វផ្សាយលក់ផលិតផលក្លែងក្លាយនៅលើបណ្តាញសង្គម នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២០ ខែវិច្ឆិកា។ ស្ត្រីរូបនេះមានឈ្មោះថា Nguyen Thuc Thuy Tien ខណៈនៅលើបណ្តាញសង្គមក្នុងប្រទេសវៀតណាមរូបគាត់ត្រូវបានគេហៅថា “Queen Beauty” ឬ រាជនីសម្រស់។ បើតាមអាជ្ញាធរវៀតណាមបានបញ្ជាក់ថា នៅលើបណ្តាញសង្គម “រាជនីសម្រស់” រូបនេះបានធ្វើការផ្សព្វផ្សាយលក់ស្ករកៅស៊ូម៉ាក Kera Supergreens ដោយបានអះអាងថា ស្ករកៅស៊ូប្រភេទនេះមានផ្ទុកជាតិសរសៃច្រើនណាស់ ពោលគឺជាប្រភេទអាហារដ៏ល្អមួយសម្រាប់សុខភាពអ្នកទទួលទាន។ យ៉ាងណាក្តី តាមការត្រួតពិនិត្យរបស់អាជ្ញាធរជំនាញវៀតណាមបានរកឃើញថា ស្ករកៅស៊ូ Kera

ចិន៖ ប្រទេសចិនបានជូនដំណឹងដល់ទីក្រុងតូក្យូថា ខ្លួននឹងហាមឃាត់ការនាំចូលគ្រឿងសមុទ្រជប៉ុនទាំងអស់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី១៩ ខែវិច្ឆិកា។ ចំណាត់ការខាងលើនេះត្រូវបានគេឃើញថា គឺជាការវាយប្រហារចុងក្រោយមួយពីសំណាក់អាជ្ញាធរក្រុងប៉េកាំងទៅកាន់ប្រទេសជប៉ុននៅក្នុងជម្លោះការទូត ដែលបានកើតឡើងកាលពីពេលថ្មីៗ​​នេះ។ គួររម្លឹកជូនថា កាលពីដើមសប្តាហ៍នេះប្រទេសចិនបានប្រកាសផ្អាកការចាក់បញ្ចាំងខ្សែភាពយន្តជប៉ុនចំនួន ២ ហើយជាការឆ្លើយតបនឹងសេចក្តីប្រកាសនេះ ស្ថានទូតជប៉ុននៅក្នុងប្រទេសចិនបានជូនដំណឹងឱ្យពលរដ្ឋជប៉ុនទាំងអស់ ដែលកំពុងមានវត្តមាននៅក្នុងប្រទេសចិនត្រូវបង្កើនការប្រុងប្រយ័ត្នចំពោះបញ្ហាសុវត្ថិភាព និងចៀសវាងទៅកាន់កន្លែងមានមនុស្សច្រើនកុះករ ដើម្បីចៀសវាងគ្រោះថ្នាក់ផ្សេងៗ ដែលអាចកើតមានឡើងដោយយថាហេតុ។ សូមបញ្ជាក់ជូនផងដែរថា វិបត្តិការទូតរវាងប្រទេសជប៉ុននិងប្រទេសចិនបានផ្តើមកើតមានឡើងក្រោយលោកស្រីនាយករដ្ឋមន្ត្រីជប៉ុន Sanae Takaichi បានថ្លែងទៅកាន់ក្រុមសមាជិកសភាជប៉ុនថា ការវាយប្រហាររបស់ចិនទៅលើតៃវ៉ាន់អាចបង្កការគំរាមកំហែងដល់អាយុជីវិតរបស់ពលរដ្ឋជប៉ុន ហើយក្នុងករណីចាំបាច់ជប៉ុននឹងធ្វើការឆ្លើយតបវិញដោយប្រើកម្លាំងយោធា៕ អត្ថបទ៖ ភក្តី ប្រភព៖ The Strait Time  

ហូឡង់៖ ពាក្យថា “ស្នាមថើបដំបូង” ត្រូវបានមនុស្សជាច្រើននៅជុំវិញពិភពលោកយកទៅប្រើប្រាស់នៅក្នុងទំនាក់ទំនងស្នេហារបស់ពួកគេ ហើយពាក្យប៉ុន្មានម៉ាត់នេះហាក់មានអត្ថន័យជ្រាលជ្រៅណាស់សម្រាប់នៅក្នុងខ្លឹមសារបទចម្រៀង ឬភាពយន្តបែបមនោសញ្ចេតនាស្នេហា។ បើទោះជាមនុស្សគ្រប់គ្នាសុទ្ធតែអាចនិយាយពាក្យនេះបានក៏ពិតមែន តែប្រហែលជាមិនមានមនុស្សច្រើននោះទេ ដែលអាចដឹងថា ស្នាមថើបដំបូងនៅលើពិភពលោក បានកើតឡើងនៅពេលណា និងបង្កើតឡើងដោយអ្នកណា? យោងតាមការសិក្សាមួយដែលត្រូវបានធ្វើឡើងដោយក្រុមអ្នកវិទ្យាសាស្រ្តនៅសាកលវិទ្យាល័យ Oxford រួមជាមួយនឹងវិទ្យាស្ថានបច្ចេកវិទ្យា Florida បានរកឃើញថា ស្នាមថើបដំបូងគេបំផុតនៅលើពិភពលោកបានកើតឡើងនៅក្នុងរយៈពេលប្រហែលជា ២១,៥លានឆ្នាំមុន។ លទ្ធផលនៃការសិក្សាដែលត្រូវបានចុះផ្សាយបន្តដោយបណ្តាញសារព័ត៌មាន The Strait Time នៅក្នុងថ្ងៃទី១៩ ខែវិច្ឆិកានេះបានបញ្ជាក់ផងដែរ អ្នកដែលបានបង្កើតស្នាមថើបដំបូងនៅលើពិភពលោកនេះមិនមែនជាមនុស្សជាតិឡើង តែគឺជាបុព្វបុរសរបស់សត្វស្វាមួយប្រភេទ ឈ្មោះ Apes ដោយនៅពេលនោះក្រុមសត្វស្វាប្រភេទនេះបានចាប់ផ្តើមអភិវឌ្ឍន៍សកម្មភាពថើបគ្នាជាលើកដំបូង៕ អត្ថបទ៖ ភក្តី ប្រភព៖  The Strait Time

អ៊ុយក្រែន៖ ប្រទេសអ៊ុយក្រែនគ្រោងទាមទារប្រាក់សំណងចំនួន ៤៤ពាន់លានដុល្លារពីរុស្ស៊ីចំពោះផលប៉ះពាល់នៃការបំភាយឧស្ម័នពុលទៅក្នុងបរិយាកាស នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី១៩ ខែវិច្ឆិកា។ អ៊ុយក្រែនបានអះអាងថា ការបំភាយ​ឧស្ម័នពុលទៅក្នុងបរិយាកាសគឺបានកើតឡើងដោយសារតែសកម្មភាពធ្វើសង្គ្រាមឈ្លានពានពីសំណាក់កងកម្លាំងរុស្ស៊ី ដូចនេះរុស្ស៊ីត្រូវតែទទួលខុសត្រូវចំពោះផលប៉ះពាល់ទាំងអស់។ ប្រភពខាងលើបានបន្តថា ការបំភាយ​ឧស្ម័នពុលទៅក្នុងបរិយាកាសនោះបានកើតឡើងពី ឥន្ធនៈហ្វូស៊ីល ស៊ីម៉ង់ត៍ និងដែកថែប ដែលរុស្ស៊ីបានប្រើប្រាស់នៅក្នុងការធ្វើសង្គ្រាម  និងកត្តាមួយចំនួនដូចជា ការឆេះព្រៃ ឬអគ្គិភ័យផ្សេងៗជាដើម។ បើតាមលោក Pavlo Kartashov អនុរដ្ឋមន្ត្រីក្រសួងសេដ្ឋកិច្ច បរិស្ថាន និងកសិកម្មអ៊ុយក្រែនបានបញ្ជាក់ថា ការបំភាយឧស្ម័នពុលចេញមកពីប្រភពជាច្រើនខាងលើនេះបានធ្វើឱ្យមានការផលប៉ះពាល់ជាច្រើន ដូចជាសុខភាពទូទៅរបស់មនុស្សជាតិ និងធ្វើឱ្យខូចគុណភាពដី ទឹក និងធនធានធម្មជាតិផងដែរ៕ អត្ថបទ៖ ភក្តី ប្រភព៖ The Strait Time