ព្យុះសង្ឃរា Ian បានបោកបក់ចូលដល់រដ្ឋផ្លរីដា ភាគខាងត្បូងសហរដ្ឋអាមេរិក ខណៈវាបានបណ្តាលឱ្យដាច់ចរន្តអគ្គិសនី និងទឹកជំនន់ ហើយមន្ត្រី​អាជ្ញាធរ​កំពុងអំពាវនាវឱ្យ​ប្រជាពលរដ្ឋ​មានការ​ប្រុង​ប្រយ័ត្ន​ខ្ពស់​​ដើម្បី​សុវត្ថិភាព​។ មន្ត្រីឧតុនិយមអាមេរិកបាននិយាយថា ព្យុះនេះបានបោកបក់ចូលដល់រដ្ឋនៅថ្ងៃពុធ ហើយវាគឺជាព្យុះប្រភេទទី៤ ដ៏គ្រោះថ្នាក់បំផុត។ វាមានកម្លាំងខ្យល់បក់រហូតដល់ ២៤១ គីឡូម៉ែត្រក្នុងមួយម៉ោង ហើយសម្ពាធស្នូលរបស់វាគឺ 940 hectopascals (ហេកតូប៉ាស្កាល់)។ អភិបាលរដ្ឋផ្លរីដា លោក Ron DeSantis បានប្រកាសដាក់រដ្ឋក្នុងគ្រាអាសន្ន និងបានជំរុញអ្នកស្រុកឱ្យគោរពតាមបទបញ្ជា និងការព្រមានអំពីការជម្លៀសខ្លួន ខណៈជើងហោះហើរជាច្រើនទៅកាន់រដ្ឋផ្លរីដាត្រូវបានលុបចោល ហើយសាលារៀនជាច្រើនត្រូវបានបិទ។ Walt Disney World នៅទីក្រុង Orlando បានប្រកាសថា ខ្លួននឹងបិទបរិក្ខាររបស់ខ្លួននៅថ្ងៃពុធ

យោងតាមរយៈសារព័ត៌មាន Channel News Asia បានរាយការណ៍អំពី យោធាកូរ៉េខាងត្បូងបាននិយាយកាលពីថ្ងៃពុធ ទី២៨ ឆ្នាំ២០២២ ថា៖ ប្រទេសកូរ៉េខាងជើងបានបាញ់មីស៊ីលផ្លោងរយៈចម្ងាយខ្លីចំនួនពីរគ្រាប់ចូលទៅក្នុងសមុទ្រនៅភាគខាងកើតនៃប្រទេស មួយថ្ងៃមុនអនុប្រធានាធិបតីអាមេរិក Kamala Harris នឹងមកដល់ទីក្រុងសេអ៊ូល។ ដោយការ​បាញ់​គ្រាប់​រ៉ុក្កែត​របស់​កូរ៉េ​ខាង​ជើង​បាន​កើត​ឡើង​តែ​២ថ្ងៃ ​បន្ទាប់​ពី​កូរ៉េ​ខាង​ត្បូង ​និង​សហរដ្ឋ​អាមេរិក ធ្វើការសមយុទ្ធយោធារួមគ្នានៅដែនទឹកភាគខាងកើតនៃប្រទេស ដែលត្រូវបានប្រើដោយនាវាផ្ទុកយន្តហោះ។ កាលពីថ្ងៃអាទិត្យ កន្លងមកកូរ៉េ​ខាងជើង​ក៏​បាន​បាញ់​មី​ស៊ី​ល​ចូល​សមុទ្រ​ជា​ការ​ឆ្លើយ​តប​នឹង​សមយុទ្ធ​ដែរ ។ នេះ​បើ​តាម​អគ្គសេនាធិការ​ចម្រុះ​កូរ៉េខាងត្បូងបានអោយដឹងថា៖ មីស៊ីល​ដែល​កូរ៉េ​ខាង​ជើង​បាន​បាញ់​កាល​ពី​ថ្ងៃ​ពុធ បាញ់​ពី​ស្រុក​ស៊ុនអាន នៅទីក្រុងព្យុងយ៉ាង ចន្លោះម៉ោង ១៨:១០នាទី ដល់ ១៨:២០នាទី ម៉ោងក្នុងស្រុក ធ្វើឱ្យកងទ័ពកូរ៉េខាងត្បូង បង្កើនការឃ្លាំមើល និងការរៀបចំផ្លូវអាកាស

ព្រះអង្គ​ម្ចាស់​ Mohammed bin Salman Al Saud ត្រូវបានតែងតាំងជានាយករដ្ឋមន្ត្រីថ្មីរបស់​អារ៉ាប៊ីសាអូឌីត។ រដ្ឋាភិបាលអារ៉ាប៊ីសាអូឌីត បានប្រកាសទៅទីភ្នាក់ងារសារព័ត៌មានរដ្ឋរបស់ខ្លួនកាលពីថ្ងៃអង្គារថា ស្តេច Salman bin Abdulaziz បានបញ្ជាឱ្យរុះរើគណៈរដ្ឋមន្ត្រី និងតែងតាំងព្រះរាជបុត្រារបស់ទ្រង់ គឺព្រះអង្គម្ចាស់ Mohammed ដើម្បីជំនួសតំណែងរបស់ទ្រង់ជានាយករដ្ឋមន្ត្រីថ្មី។ ក្រឹត្យ​នេះ​គឺជាការ​ផ្លាស់​ប្តូរ​អំណាច​ជា​បន្តបន្ទាប់ ​ពី​ព្រះមហាក្សត្រ​ដែល​មាន​ព្រះជន្ម ៨៦ ព្រះវស្សា ទៅ​ឱ្យ​ព្រះអង្គម្ចាស់​សំណព្វ ដែលកំពុងមាន​ព្រះជន្ម ៣៧ វស្សា។ ពោលគឺព្រះមហាក្សត្រ Salman bin Abdulaziz បាននិងកំពុងផ្តល់អំណាចបន្ថែមបន្ដិចម្ដងៗទៅឱ្យព្រះអង្គ​ម្ចាស់ Mohammed​ ខណៈដែលកន្លងមកព្រះអង្គ​ម្ចាស់​ក៏បានតំណាងឱ្យព្រះបិតា នៅក្នុង​រឿង​នយោបាយ និង​ការទូតផ្សេងៗ។ ចំណែកព្រះអង្គម្ចាស់

ស្ព្រៃបាញ់ចម្រុះប្រឆាំងនឹងជំងឺ COVID-19 ដែលជាការបង្កើតឡើងរួមគ្នាដោយវិទ្យាស្ថានស្រាវជ្រាវប្រព័ន្ធសុខាភិបាល (HSRI), មហាវិទ្យាល័យវេជ្ជសាស្ត្រនៅសាកលវិទ្យាល័យ Chulalongkorn, អង្គការឱសថរដ្ឋាភិបាល (GPO) និងក្រុមហ៊ុន Hibiocy ត្រូវបានប្រកាសថា នឹងមានលក់នៅតាមទីផ្សារចាប់ពីថ្ងៃទី០១ ខែតុលា ខែក្រោយនេះតទៅ នេះបើយោងតាមការចុះផ្សាយរបស់សារព័ត៌មាន Thai PBS world ។ លោកវេជ្ជបណ្ឌិត Nopporn Cheanklin នាយកអង្គការ PHRI កាលពីថ្ងៃអង្គារបាននិយាយថា ស្ព្រៃបាញ់ច្រមុះប្រឆាំងនឹងជំងឺ COVID-19 ដែលមានឈ្មោះពាណិជ្ជកម្មថា «Vaill CoviTRAP» ត្រូវបានអនុម័តរួចហើយ ដោយរដ្ឋបាលចំណីអាហារ និងឱសថថៃ។ លោកបានពន្យល់ថា ស្ព្រៃបាញ់ច្រមុះនេះមានសមត្ថភាពទប់ទល់នឹងមេរោគ

ព្យុះសង្ឃរា Ian (អៀន) កំពុងរំកិលខ្លួនទៅកាន់រដ្ឋផ្លរីដា ដែលធ្វើឱ្យទីភ្នាក់ងារអវកាសណាសារបស់អាមេរិក ត្រូវប្រមូលរ៉ុក្កែត និងយានអវកាស សម្រាប់ដំណើររុករកលើឋានព្រះចន្ទរបស់ខ្លួន ចេញពីកន្លែងបាញ់បង្ហោះនៅក្នុងរដ្ឋ ហើយបញ្ជូនវាត្រឡប់ទៅកន្លែងវិស្វកម្មវិញ ដោយនឹងពន្យារពេលបាញ់បង្ហោះរហូតដល់ពាក់កណ្តាលខែតុលា។ មន្ត្រីណាសា បាននិយាយកាលពីថ្ងៃអង្គារថា រ៉ុក្កែត Space Launch System និងយានអវកាស Orion បានត្រឡប់មកវិញដោយសុវត្ថិភាពនៅក្នុងអគារដំឡើងយាន នៅមជ្ឈមណ្ឌលអវកាស Kennedy ។ ពួកគេនិយាយថា ពួកគេនឹងជ្រើសរើសកាលបរិច្ឆេទចាប់ផ្តើមថ្មី បន្ទាប់ពីព្យុះសង្ឃរា Ian កន្លងផុតទៅ។ រំលឹកផងដែរថា ទីភ្នាក់ងារនេះត្រូវបង្ខំឱ្យមានការពន្យារពេលចេញដំណើររបស់ខ្លួន នៅក្នុងខែសីហា និងដើមខែកញ្ញា ដោយសារការលេចធ្លាយប្រេង និងបញ្ហាម៉ាស៊ីន

រដ្ឋាភិបាលថៃកាលពីថ្ងៃអង្គារ ទី២៧ ខែកញ្ញា បានឱ្យដឹងថា ប្រទេសថៃនឹងធ្វើឱ្យការរំលូតក្លាយជារឿងស្របច្បាប់ ដែលជាការបន្ធូរបន្ថយមួយកម្រិតចំពោះអ្នកផ្ទៃពោះចំពោះ ផ្ទុយនឹងនីតិវិធីវេជ្ជសាស្រ្តដែលបានដាក់កម្រិតកាលពីមុន។ កន្លងមក ការរំលូតកូនមិនមែនជារឿងស្របច្បាប់នោះទេ លើកលែងនៅក្រោមករណីរំលោភ ឬការគំរាមកំហែងដល់អាយុជីវិតរបស់ម្តាយ ប៉ុន្តែវាត្រូវបានបន្ធូរបន្ថយកាលពីខែកុម្ភៈឆ្នាំមុន សម្រាប់ស្ត្រីដែលមានគភ៌ក្នុងអំឡុងពេល ១២ សប្ដាហ៍។ យ៉ាងណាក៏ដោយ វានៅតែមានការមាក់ងាយយ៉ាងខ្លាំងជុំវិញនីតិវិធីនេះ ជាមួយនឹងករណីដ៏កក្រើកកាលពីឆ្នាំ២០១០ នៅពេលសពគភ៌ដែលត្រូវរំលូតដោយខុសច្បាប់ប្រហែល ២,០០០ ត្រូវបានរកឃើញនៅក្នុងវត្តមួយកន្លែង។ សេចក្តីថ្លែងការណ៍របស់រដ្ឋាភិបាលកាលពីថ្ងៃអង្គារបាននិយាយថា ការរំលូតនឹងត្រូវបានអនុញ្ញាត ចាប់តាំងពីពេលដែលស្ត្រីបានរកឃើញថាខ្លួនមានគភ៌ រហូតដល់រយៈពេល ២០ សប្ដាហ៍ ចាប់តាំងពីការស្វែងរកសេវាវេជ្ជសាស្ត្រដំបូង ដោយបន្ថែមថា ការរំលូតនេះនឹងមិនរាប់បញ្ចូលជាឧក្រិដ្ឋកម្មនោះទេ។ កាលពីមុន ការរំលូតកូនត្រូវផ្តន្ទាទោស ដោយពិន័យជាប្រាក់រហូតដល់ ១០,០០០

ព្យុះទីហ្វុង Noru នៅព្រឹកថ្ងៃពុធ ទី២៨ ខែកញ្ញានេះ បានបោកបក់ចូលឆ្នេរសមុទ្រភាគកណ្តាលរបស់ប្រទេសវៀតណាម ដោយបាននាំមកនូវខ្យល់បក់ និងភ្លៀងធ្លាក់យ៉ាងខ្លាំង ខណៈពលរដ្ឋរាប់សែននាក់ត្រូវភៀសខ្លួនរកទីជម្រកបណ្ដោះអាសន្ន។ នៅទីក្រុងដាណាង ដែលជាទីក្រុងធំជាងគេទី៣របស់ប្រទេសនេះ អគារខ្ពស់ៗ និងផ្ទះរបស់ប្រជាពលរដ្ឋត្រូវបានរងការខូចខាត ខណៈដើមឈើក៏បានដួលរលំ ហើយក្នុងនោះ ក៏មានការដាច់ចរន្តអគ្គិសនីទ្រង់ទ្រាយធំផងដែរ នេះបើតាមការចុះផ្សាយរបស់សារព័ត៌មាន Channel News Asia ។ មជ្ឈមណ្ឌលជាតិសម្រាប់ការព្យាករណ៍ឧតុនិយមបាននិយាយថា៖«ទីតាំងរបស់ព្យុះទីហ្វុងនៅម៉ោង ៤ ព្រឹកម៉ោងក្នុងស្រុក នៅថ្ងៃពុធ ទី២៨ ខែកញ្ញា គឺស្ថិតនៅចន្លោះទីក្រុងដាណាង និងក្វាងណាម ដោយបន្ថែមល្បឿនខ្យល់គឺពី ១០៣ គីឡូម៉ែត្រក្នុងមួយម៉ោង ទៅ  ១១៧ គីឡូម៉ែត្រក្នុងមួយម៉ោង»។ មនុស្សជាង

មនុស្សច្រើនជាង ៤,០០០ នាក់ បានប្រមូលផ្តុំគ្នានៅឯកីឡដ្ឋាន Nippon Budokan របស់ទីក្រុងតូក្យូ ដើម្បីប្រារព្ធពិធីបុណ្យសពថ្នាក់រដ្ឋជូនទៅដល់លោក អាបេ ស៊ីនហ្សូ ដែលជាអតីតនាយករដ្ឋមន្ត្រីជប៉ុនដែលកាន់តំណែងយូរជាងគេបំផុត។ នាយករដ្ឋមន្ត្រីលោក ហ្វ៊ុមិអុ គីស៊ីដា (Kishida Fumio) រួមជាមួយនឹងប្រធានសភាជាន់ខ្ពស់ និងថ្នាក់ក្រោម ព្រមទាំងប្រធានតុលាការកំពូល ក៏កំពុងមានវត្តមាននៅក្នុងពិធីនោះ ហើយអតីតនាយករដ្ឋមន្ត្រីលោក យ៉ូស៊ីហ៊ីដេ ស៊ូហ្កា (Suga Yoshihide) នឹងត្រូវថ្លែងសុន្ទរកថា ក្នុងនាមមិត្តភក្តិរបស់លោក អាបេ។ គួរឱ្យដឹងដែរថា ពិធីបុណ្យរបស់លោក អាបេ គឺជាពិធីបុណ្យថ្នាក់រដ្ឋលើកទី២ ប៉ុណ្ណោះ ចាប់តាំងពីជំនាន់សង្គ្រាមលោកលើកទី២

ថ្មីៗនេះអ្នកប្រើប្រាស់ប្រព័ន្ធផ្សព្វផ្សាយសង្គមបានចែករំលែកវីដេអូឃ្លីបមួយ ដែលបង្ហាញពីបុរសដឹកជញ្ជូនម្នាក់ (Deliveryman) បានដឹកជញ្ជូនទំនិញទៅកាន់អគារខ្ពស់មួយ ក្នុងប្រទេសអារ៉ាប៊ីសាអូឌីត ដោយការហោះហើរទំនើបខ្លាំងមែនទែន! យោងតាមវីដេអូដែលបានចែកចាយនោះវាបានបង្ហាញថា បុរសនោះបានដឹកជញ្ជូនដោយប្រើប្រាស់យានម៉្យាងសម្រាប់ការហោះហើរ និងផ្លាស់ទីពីប៉មមួយទៅប៉មមួយទៀតយ៉ាងស្ទាត់ជំនាញ។ យ៉ាងណាក៏ដោយ គេនៅមិន​មាន​ព័ត៌មាន​លម្អិត​ច្បាស់​លាស់​អំពី​ក្រុមហ៊ុន​ដែលបម្រើសេវាកម្ម ឬ​ទីតាំង​ជាក់លាក់នៃ​ដឹកជញ្ជូននោះឡើយ។ រំលឹកដែរថា កន្លងមកយើងក៏ធ្លាប់បានឃើញវីដេអូនៃការប្រើប្រាស់យន្តហោះគ្មានមនុស្សបើក ដោយភោជនីយដ្ឋានមួយចំនួនជុំវិញពិភពលោក ដើម្បីចែកចាយភីហ្សា និងការបញ្ជាទិញអាហារ ព្រោះឧបករណ៍ទាំងនោះវាអាចកំណត់ទីតាំងអតិថិជនតាមរយៈ GPS និងកាមេរ៉ាវីដេអូ ដើម្បីធានាថា ពួកគេទៅដល់អ្នកទទួលត្រឹមត្រូវក្នុងរយៈពេលខ្លី តិចជាង ១ ភាគ ៤ បើប្រៀបនឹងការដឹកជញ្ជូនធម្មតា។ ប៉ុន្តែសម្រាប់លើកនេះវិញ គឺវាកាន់តែទំនើបជាងមុនទៅទៀត។ គួរឱ្យកត់សម្គាល់ដែរថា ឧស្សាហកម្មចែកចាយអាហារពិភពលោកកំពុងកើនឡើង ១០% ជារៀងរាល់ឆ្នាំ ហើយទំហំនៃទីផ្សារនេះត្រូវបានគេរំពឹងថា

បារាំង៖ យោងតាមការចេញផ្សាយរបស់សារព័ត៌មាន Thairath បានរាយការណ៍ថា កាលពីថ្ងៃទី ២៥ ខែកញ្ញា ឆ្នាំ ២០២២ អគ្គីភ័យបានឆាបឆេះឃ្លាំងស្តុកទំនិញមួយនៅខាងក្នុងផ្សារអន្តរជាតិ Rungis international market ដែលជាផ្សារលក់ដុំសាច់ស្រស់ បន្លែ ផ្លែឈើ អាហារសមុទ្រ និងផ្កាដ៏ធំបំផុតរបស់ពិភពលោក ដែលមានទីតាំងស្ថិតនៅភាគខាងត្បូងនៃទីក្រុងប៉ារីស ប្រទេសបារាំង។ ជាមួយនឹងផ្សែងខ្មៅឡើងលើអាកាស អាជ្ញាធរ​បាន​ព្រមានអោយ​អ្នក​ស្រុក​ដែលស្ថិតនៅជុំវិញ​ផ្សារ Rungis និង​កម្មករ​ជាង ១២,០០០ នាក់​ឲ្យ​ជម្លៀស​ទៅ​កន្លែង​មានសុវត្ថិភាព​បណ្ដោះអាសន្ន ខណៈ​ដែល​ក្រុម​ពន្លត់​អគ្គិភ័យ​បាន​ប្រញាប់​ទៅ​គ្រប់គ្រង​ភ្លើង​។ ទោះ​ជា​យ៉ាង​ណា​មក​ទល់​ពេល​នេះ​មិន​ទាន់​មាន​របាយការណ៍​អំពី​ការ​ស្លាប់​ឬ​របួស​នៅ​ឡើយ​ទេ ចំណែក​មូលហេតុ​នៃ​ការ​ឆេះ​នេះ​នៅ​មិនទាន់​ដឹង​នៅឡើយ​ទេ​ ដោយឡែក​តម្លៃ​នៃ​ការ​ខូចខាត​អគ្គិភ័យ​នេះ​ក៏មិន​ត្រូវ​បាន​គេ​បង្ហើប​ឱ្យ​ដឹង​ឡើយ៕ អត្ថបទ៖ Bee ប្រភព៖thairath