មេរោគកូវីដ-១៩ដែលជាបុត្រសម្ព័ន្ធរបស់វ៉ារ្យ៉ង់អូមីក្រុងចំនួន ២ប្រភេទថ្មីទៀតកំពុងស្ថិតក្នុងការតាមដានយ៉ាងយកចិត្តទុកដាក់បំផុតពីសំណាក់ក្រុមអ្នកវិទ្យាសាស្រ្តក្នុងរយៈពេលនេះថ្មីៗ បើទោះជាគេនៅមិនទាន់មើលឃើញពីគ្រោះថ្នាក់ធ្ងន់ធ្ងររបស់ពួកវាក៏ដោយ។ មេរោគបំប្លែងខ្លួនថ្មីទាំង ២នោះគឺវ៉ារ្យ៉ង់ BA.4 និង BA.5 ដែលនាពេលបច្ចុប្បន្ននេះកំពុងបង្កការចម្លងនៅក្នុងប្រទេសអាហ្វ្រិកខាងត្បូង។ បើតាមការសិក្សារបស់ក្រុមអ្នកវិទ្យាសាស្រ្តបានបង្ហាញថា គិតត្រឹមពេលនេះគេនៅមិនទាន់រកឃើញថាវ៉ារ្យ៉ង់ BA.4 និង BA.5 អាចបង្កឲ្យមានជំងឺធ្ងន់ធ្ងរជាងវ៉ារ្យ៉ង់អូមីក្រុងធម្មតានោះទេ តែគេបានកត់សម្គាល់ថាមេរោគបំប្លែងខ្លួនថ្មីទាំង ២ប្រភេទនេះអាចបង្កការចម្លងបានលឿន។ បើតាមលោកវេជ្ជបណ្ឌិត Peter Chin-Hong ដែលជាអ្នកជំនាញផ្នែកជំងឺឆ្លងនៅសាកលវិទ្យាល័យ California សហរដ្ឋអាមេរិកបានបញ្ជាក់ថា វ៉ារ្យ៉ង់ BA.4 និង BA.5 នឹងបង្កការចម្លងបានយ៉ាងឆាប់រហ័សក្នុងចំណោមអ្នកដែលមិនបានចាក់វ៉ាក់សាំងបង្ការ។ គួររម្លឹកជូនផងដែរថា កាលពីចុងសប្តាហ៍កន្លងទៅនេះក្រុមអ្នកវិទ្យាសាស្រ្តក៏បានរកឃើញមេរោគបំប្លែងខ្លួនថ្មីមួយប្រភេទទៀតដែរគឺវ៉ារ្យ៉ង់ BA.2.12.1 ដែលជាបុត្រសម្ព័ន្ធរបស់មេរោគអូមីក្រុងផងដែរ។ ក្រោយរកឃើញវ៉ារ្យ៉ង់ថ្មីៗដែលជាមេរោគបំប្លែងខ្លួនចេញពីកូវីដ-១៩អូមីក្រុងនេះ ក្រុមអ្នកវិទ្យាបានបានបង្ហាញក្តីបារម្ភថា

ចិន៖ អ្នកជំងឺកូវីដ-១៩ ដែលទទួលបានសិទ្ធិព្យាបាលនៅតាមផ្ទះម្នាក់ក្នុងទីក្រុងសៀងហៃ ប្រទេសចិន ត្រូវបានគេច្រឡំបញ្ជូនទៅកាន់កន្លែងដាក់សព ខណៈពេលទៅដល់កន្លែងដាក់សពគឺរូបគាត់នៅរស់មានជីវិតនៅឡើយ នេះបើយោងតាមការចុះផ្សាយរបស់បណ្តាញសារព័ត៌មាន Straits Times នៅព្រឹកថ្ងៃពុធ ទី៤ ខែឧសភានេះ។ កំហុសការងារដ៏ធំមួយនេះបានធ្វើឲ្យក្រុមអ្នកប្រើប្រាស់បណ្តាញសង្គមនៅក្នុងទីក្រុងសៀងហៃផ្ទុះកំហឹង និងនាំគ្នាធ្វើការរិះគន់យ៉ាងខ្លាំង ចំពោះភាពខ្ជីខ្ជាក្នុងការបំពេញការងាររបស់ក្រុមបុគ្គលិកសុខាភិបាលជួរមុខ ដែលទទួលបន្ទុកតាមដានអ្នកជំងឺកូវីដ-១៩ ដែលកំពុងសម្រាកព្យាបាលនៅតាមផ្ទះ។ ភ្លាមៗក្រោយកើតមានរឿងចម្រូងចម្រាសខាងលើនេះ អាជ្ញាធរសុខាភិបាលក្រុងសៀងហៃបានសម្រេចផ្អាកការងារមន្ត្រីសុខាភិបាលចំនួន ៤នាក់ ដោយក្នុងនោះមានបុគ្គលិកពេទ្យចំនួន ៣នាក់ និងប្រធានផ្នែកត្រួតពិនិត្យការព្យាបាលអ្នកជំងឺនៅតាមផ្ទះម្នាក់។ ជាងនេះទៅទៀតអាជ្ញាធរក្រុងសៀងហៃក៏បានសម្រេចបើកការស៊ើបអង្កេតជាពិសេសមួយជុំវិញករណីនេះផងដែរ ដើម្បីស្វែងរកឲ្យឃើញការពិតថា ករណីនេះជាកំហុសបច្ចេកទេសការងារ ឬជាចេតនាទុច្ចរិតណាមួយ។ សូមបញ្ជាក់ជូនថា ក្រុមអ្នកប្រើប្រាស់បណ្តាញសង្គមក្នុងក្រុងហៃមួយចំនួនបាននាំគ្នារិះគាត់ថា ករណីនេះគឺជាករណីឃាតកម្មដោយមានគេចង់សម្លាប់ជនរងគ្រោះហើយក៏រាយការណ៍ប្រឌិដ្ឋថា គាត់បានស្លាប់ដោយជំងឺកូវីដ-១៩ តែសំណាងល្អជនរងគ្រោះបានដឹងខ្លួនវិញពេលបញ្ជូនទៅដល់កន្លែងដាក់សព៕ អត្ថបទ៖ ភក្តី

ថៃ៖ ថៃត្រៀមប្រកាសយកឈ្នះលើសមរភូមិកូវីដ-១៩ ក្រោយចំនួនអ្នកឆ្លងនិងស្លាប់ប្រចាំថ្ងៃបន្តធ្លាក់ចុះគួរឲ្យកត់សម្គាល់ នេះបើយោងតាមការចុះផ្សាយរបស់បណ្តាញសារព័ត៌មាន The Thaiger នៅព្រឹកថ្ងៃពុធ ទី៤ ខែឧសភានេះ។ តាមរបាយការណ៍របស់ក្រសួងសុខាភិបាលថៃបានបង្ហាញថា តួលេខអ្នកឆ្លងកូវីដ-១៩​ នៅទូទាំងប្រទេសថៃបានធ្លាក់ចុះក្រោម ១ម៉ឺននាក់ក្នុងមួយថ្ងៃ ហើយតួលេខអ្នកស្លាប់វិញបានធ្លាក់ចុះក្រោម ១០០នាក់ក្នុងមួយថ្ងៃ ខណៈការធ្លាក់ចុះនេះបន្តកើតមានក្នុងរយៈពេល​ ៣ថ្ងៃជាប់ៗគ្នាមកហើយ។ បើតាមលោក Kiattiphum Wongrajit ដែលជាមន្ត្រីជាន់ខ្ពស់នៃក្រសួងសុខាភិបាលថៃបានឲ្យដឹងថា ការធ្លាក់ចុះនៃចំនួនអ្នកឆ្លងនិងស្លាប់ដោយជំងឺកូវីដ-១៩នេះគឺជាលទ្ធផលមួយដែលផ្ទុយពីការព្យាករណ៍របស់ក្រុមអ្នកជំនាញមួយចំនួនដែលនាពេលកន្លងមកធ្លាប់បានលើកឡើងថា ក្រោយពេលចូលឆ្នាំប្រពៃណីថៃរួចគឺចំនួនអ្នកឆ្លងជំងឺកូវីដ-១៩ នឹងកើនឡើងខ្ពស់រហូតដល់កម្រិតប្រកាសអាសន្ន។ មន្ត្រីជាន់ខ្ពស់រូបនេះបានបន្តថា ហេតុផលដែលជំរុញឲ្យតួលេខអ្នកឆ្លងនិងស្លាប់ដោយកូវីដ-១៩ ធ្លាក់ចុះក៏ព្រោះតែ អាជ្ញាធរថៃបានសម្រេចការចាក់វ៉ាក់សាំងជូនពលរដ្ឋបានយ៉ាងច្រើននៅក្នុងសហគមន៍ ហើយអាជ្ញាធរក៏បានដាក់នូវចេញវិធានសំខាន់ៗជាច្រើនចំគោលដៅផងដែរ ទើបអាចទប់ស្កាត់ការរាតត្បាតមេរោគបានដោយមានប្រសិទ្ធិភាពដូចនេះ៕ អត្ថបទ៖ ភក្តី ប្រភព៖ The Thaiger

ឥណ្ឌា៖ រលកកម្តៅបានឆក់យកជីវិតពលរដ្ឋនៅក្នុងប្រទេសឥណ្ឌាចំនួន ២៥នាក់ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃពុធ ទី៤ ខែឧសភានេះ។ តួលេខអ្នកស្លាប់នេះត្រូវបានគេបូកសរុបចាប់តាំងពីចុងខែមីនាមក ខណៈទីកន្លែងកើតហេតុគឺស្ថិតនៅតាមតំបន់ដាច់ស្រយាលនៃរដ្ឋ Maharashtra ដែលស្ថិតនៅភាគខាងលិចនៃប្រទេសឥណ្ឌា។ ចំនួនអ្នកស្លាប់នេះក៏ត្រូវបានគេកត់សម្គាល់ឃើញថា គឺជាតួលេខអ្នកស្លាប់ដោយរលកកម្តៅច្រើនបំផុតមិនធ្លាប់មានផងដែរ សម្រាប់ឥណ្ឌាក្នុងរយៈពេល ៥ឆ្នាំចុងក្រោយនេះ ដែលតំបន់ខ្លះឡើងកម្តៅរហូតដល់លើ ៤០អង្សារឯណោះ។ បើតាមក្រុមអ្នកវិទ្យាសាស្រ្តបានព្យាករណ៍ថា សីតុណ្ហភាពនឹងបន្តកើនឡើងខ្លាំងនៅតំបន់អាស៊ីខាងត្បូង ហើយប្រទេសដែលរងឥទ្ធិពលខ្លាំងជាងគេនោះគឺប្រទេសឥណ្ឌានិងប៉ាគីស្ថាន ខណៈ រលកកម្តៅនឹងជះឥទ្ធិពលអាក្រក់ដោយផ្ទាល់និងប្រយោលចំពោះពលរដ្ឋរហូតដល់ ១ពាន់លាននាក់។ គួរបញ្ជាក់ជូនថា ជាច្រើនថ្ងៃកន្លងមកនេះសីតុណ្ហភាពនៅក្នុងតំបន់មួយចំនួនក្នុងប្រទេសឥណ្ឌានិងប៉ាគីស្ថានបានកើនឡើងរហូតដល់ ៤៥អង្សាសេ ហើយបញ្ហានេះបានបង្កឲ្យមានបញ្ហាខ្វះខាតទឹកស្អាតសម្រាប់ប្រើប្រាស់និងធ្វើឲ្យពលរដ្ឋមួយចំនួនត្រូវធ្លាក់ខ្លួនឈឺតែម្តង៕ អត្ថបទ៖ ភក្តី ប្រភព៖ Channel News

អ៊ុយក្រែន៖ លោកប្រធានាធិបតីអ៊ុយក្រែន Volodymyr Zelensky បានព្រមានពីការកើតមានវិបត្តិស្បៀងអាហារពិភពលោក​ ក្រោយកងព័ទរុស្ស៊ីបានទម្លាក់គ្រាប់បែក កម្ទេចឃ្លាំងដាក់គ្រាប់ធញ្ញជាតិនៅភាគអាគ្នេយ៍អ៊ុយក្រែន និងស្របពេលដែលភាពតានតឹងចំពោះការបិទច្រកកំពង់ផែរបស់អ៊ុយក្រែននៅសមុទ្រខ្មៅកំពុងកើនឡើងខ្លាំង។ បើតាមលោក Martin Frick ដែលជានាយកផ្នែកស្បៀងអាហារពិភពលោកនៃអង្គការសហប្រជាជាតិបានឲ្យដឹងថា គិតត្រឹមពេលនេះគឺមានគ្រាប់ធញ្ញជាតិប្រហែលជា ៤,៥ លានតោនកំពុងជាប់គាំងនៅកំពង់ផែអ៊ុយក្រែន ហើយគេមិនអាចប្រើប្រាស់ឬចែកចាយស្បៀងអាហារទាំងនោះទៅកាន់ទីណាបាននោះទេ ដ្បិតវាកំពុងស្ថិតក្រោមការកាន់កាប់ដោយកងកម្លាំងរុស្ស៊ី។ បើតាមការចុះផ្សាយរបស់បណ្តាញសារព័ត៌មាន Daily Mail នៅថ្ងៃអង្គារ ទី៣ ខែឧសភានេះបានឲ្យដឹងផងដែរថា កងទ័ពរុស្ស៊ីក៏បានលួចយកត្រាក់ទ័ររបស់ក្រុមកសិករអ៊ុយក្រែនយ៉ាងច្រើនផងដែរ ដោយត្រាក់ទ័រទាំងអស់អាចមានតម្លៃរហូតដល់ ៤លានផោន។ ក្រោយបាត់បង់ត្រាក់ទ័រទាំងអស់នោះវាក៏បានធ្វើឲ្យខកខានដល់ការប្រមូលផលកសិកម្មមួយផ្នែកធំផងដែរ ពោលគឺបើគិតជាទឹកប្រាក់ផលដំណាំទាំងអស់អាចមានតម្លៃរហូតដល់ ២៤០,០០០ផោន។​ ព្រោះតែមានការរំខានដល់ចង្វាក់នៃការប្រមូលផលកសិកម្មនិងការចែកចាយផលិតផលកសិកកម្មទាំងនេះហើយ ទើបលោកប្រធានាធិបតិ Volodymyr Zelensky ចេញមកព្រមានពីការកើតមានវិបត្តិស្បៀងអាហារជាសកល ដ្បិតនាពេលកន្លងមកប្រទេសអេហ្ស៊ីបនិងទុយ​នីស៊ីធ្លាប់នាំចូលគ្រាប់ធញ្ញជាតិពីអ៊ុយក្រែននិងរុស្ស៊ីរហូតដល់ ៨០% សម្រាប់ផ្គត់ផ្គង់ក្នុងប្រទេសពួកគេ

អាមេរិក៖ សហរដ្ឋអាមេរិកនឹងចំណាយប្រាក់ជាង ៣ពាន់លានដុល្លារលើគម្រោងផលិតរថយន្តដើរដោយថាមពលអគ្គិសនី នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃអង្គារ ទី៣ ខែឧសភានេះ។ បើតាមមន្ត្រីជាន់ខ្ពស់អាមេរិកបានបញ្ជាក់ថាកញ្ចប់ថវិកាចំនួន ៣ពាន់លាននេះនឹងត្រូវផ្តល់ជូនទៅកាន់នាយកដ្ឋានថាមពលអាមេរិក ហើយវាគឺជាផ្នែកមួយនៃមូលធិនិចំនួន ១ទ្រីលានដុល្លារ ដែលលោកប្រធានាធិបតីអាមេរិកបានចុះហត្ថលេខាអនុម័តកាលពីឆ្នាំមុនសម្រាប់ប្រើប្រាស់លើគម្រោងអភិវឌ្ឍន៍ហេដ្ឋារចនាសម្ព័ន្ធនិងថាមពល។ ប្រភពខាងលើបានបន្តថា មូលហេតុដែលអាមេរិកសម្រេចចំណាយលុយយ៉ាងច្រើនលើគម្រោងអភិវឌ្ឍន៍រថយន្តដើរដោយតាមថាមពលអគ្គិសនីនេះ ព្រោះអាមេរិកមានគម្រោងចង់ឲ្យមានការដាក់លក់រថយន្តដើរដោយថាមពលអគ្គិសនី ៥០%នៃរថយន្តដាក់លក់ក្នុងទីផ្សារនៅអាមេរិកនៅត្រឹមឆ្នាំ ២០៣០ខាងមុខនេះ។ ជាងនេះទៅទៀតក្រុមអ្នកវិភាគបានមើលឃើញថា ឥរិយាបថរបស់អាមេរិកចំពោះការអភិវឌ្ឍន៍រថយន្តអគ្គិសនីនេះក៏ជាការប្រកួតប្រជែងមួយជាមួយនឹងប្រទេសចិនផងដែរ ដ្បិតក្នុងពេលនេះវិស័យបច្ចេកវិទ្យាលើការផលិតរថយន្តអគ្គិសនីរបស់ចិនកំពុងរីកចម្រើនយ៉ាងខ្លាំង៕ អត្ថបទ៖ ភក្តី ប្រភព៖ Channel News Asia  

អង់គ្លេស៖ ប្រទេសអង់គ្លេសបានសន្យានឹងផ្តល់ជំនួយផ្នែកយោធាដែលមានតម្លៃ ៣០០លានផោន (៣៧៥លានដុល្លារ) ទៅកាន់កងទ័ពអ៊ុយក្រែនបន្ថែមទៀត នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃអង្គារ ទី៣ ខែឧសភានេះ។ ជំនួយថ្មីនេះនឹងរួមបញ្ជូលទាំងឧបករណ៍សង្គ្រាមអេឡិចត្រូនិក ប្រព័ន្ធរ៉ាដា និងអាវុធសំខាន់ៗមួយចំនួនទៀត ខណៈកាលពីពេលថ្មីៗនេះ រដ្ឋាភិបាលនៃប្រទេសអង់គ្លេសធ្លាប់បានផ្តល់ចំនួយដែលមានទំហំទឹកប្រាក់ ២០០លានផោន (២៥០លានដុល្លារ) ទៅកាន់ប្រទេសអ៊ុយក្រែនរួចម្តងហើយ។ គួរកត់សម្គាល់ថា ចាប់តាំងពីថ្ងៃទី ២៤ ខែកុម្ភៈដែលជាថ្ងៃរុស្ស៊ីផ្តើមធ្វើការឈ្លានពានអ៊ុយក្រែនមក អ៊ុយក្រែនទទួលបានជំនួយជាបន្តបន្ទាប់ពីបណ្តាប្រទេសធំៗជាច្រើន ហើយក្នុងនោះអាមេរិកគឺជាប្រទេសដែលបានផ្តល់ជំនួយច្រើនជាងគេ។ គិតត្រឹមពេលនេះសហរដ្ឋអាមេរិកបានផ្តល់ជំនួយផ្នែកយោធា សេដ្ឋកិច្ច និងមនុស្សធម៌ទៅកាន់ប្រទេសអ៊ុយក្រែនក្នុងទំហំទឹកប្រាក់ ៣ពាន់លានដុល្លារហើយ ហើយកាលពីសប្តាហ៍មុននេះលោកប្រធានាធិបតីអាមេរិកក៏បានស្នើសុំកញ្ចប់ថវិកាជំនួយពីសភាអាមេរិកក្នុងទំហំទឹកប្រាក់ជាង​ ២០ពាន់លានដុល្លារសម្រាប់ជួយអ៊ុយក្រែនបន្ថែមទៀតផងដែរ៕ អត្ថបទ៖ ភក្តី

ចិន៖ យោងតាមការចុះផ្សាយរបស់បណ្តាញសារព័ត៌មាន Channel News Asia នៅព្រឹកថ្ងៃចន្ទ​ ទី២​ ខែឧសភានេះបានឲ្យដឹងថា អាជ្ញាធរចិនបានបន្ធូរដៃបន្តិចចំពោះការប្រយុទ្ធប្រឆាំងនឹងជំងឺកូវីដ-១៩ នៅក្នុងទីក្រុងសៀងហៃ តែអាជ្ញាធរត្រូវមកបន្ថែមសកម្មភាពនិងការងារជាច្រើនដើម្បីឆ្លើយតបនឹងរលកកូវីដ-១៩ នៅក្នុងរដ្ឋធានីប៉េកាំង។ បើតាមអាជ្ញាធរសុខាភិបាលចិនបានឲ្យដឹងថា​ តួលេខអ្នកឆ្លងកូវីដ-១៩នៅក្នុងទីក្រុងសៀងហៃបានធ្លាក់ចុះគួរឲ្យកត់សម្គាល់ ពោលគឺធ្លាក់ពីខ្ទង់រាប់ពាន់នាក់មកសល់ត្រឹម ៥៨នាក់ប៉ុណ្ណោះសម្រាប់របាយការណ៍នៅក្នុងថ្ងៃចន្ទ ទី២ ឧសភានេះ។ យ៉ាងណាក្តី ភាពតានតឹងបានបន្តកើតមាននៅក្នុងទីក្រុងប៉េកាំងដោយចំនួនអ្នកឆ្លងជំងឺកូវីដ-១៩ បានបន្តកើនឡើង ខណៈក្រុមបុគ្គលិកសុខាភិបាលកំពុងតែសម្រុកធ្វើតេស្តទ្រង់ទ្រាយធំចំពោះគ្រប់ពលរដ្ឋក្នុងទីក្រុងទាំងអស់ដែលមានចំនួនរហូតដល់ ២២លាននាក់។ ក្នុងអំឡុងពេលនេះ​ សកម្មភាពអាជីវកម្មមួយចំនួនក្នុងទីក្រុងប៉េកាំងត្រូវបានផ្អាកជាបណ្តោះអាសន្ន ហើយសេរីភាពក្នុងការធ្វើដំណើរនិងកំសាន្តរបស់ប្រជាពលរដ្ឋក៏ត្រូវកាត់បន្ថយផងដែរ។ សូមបញ្ជាក់ជូនផងដែរថា កាលពីថ្ងៃអាទិត្យម្សិលមិញនេះអាជ្ញាធរចិនបានរកឃើញអ្នកឆ្លងកូវីដ-១៩ សរុបទូទាំងប្រទេសចំនួន ៧,៨២២នាក់ និងស្លាប់សរុបចំនួន ៣២នាក់ផងដែរ៕ អត្ថបទ៖ ភក្តី

រថយន្តយោធានិងរថក្រោះមួយចំនួនរបស់កងទ័ពរុស្ស៊ីដែលកំពុងត្រូវបានគេប្រើប្រាស់ក្នុងសង្គ្រាមនៅអ៊ុយក្រែនត្រូវបានគេប្រទះឃើញជាប់គាំងនិងបែកកង់ជាញឹកញាប់ នេះបើយោងតាមការចុះផ្សាយរបស់បណ្តាញសារព័ត៌មាន Daily Mail កាលពីថ្ងៃអាទិត្យ ទី២ ខែឧសភាម្សិលមិញនេះ។ មូលហេតុដែលបង្កឲ្យមានបញ្ហាអសកម្មនេះកើតឡើងគឺបណ្តាលមកពីរថយន្តយោធានិងរថក្រោះរបស់កងទ័ពរុស្ស៊ីទាំងនោះត្រូវបានបំពាក់ដោយសម្បកកង់ផលិតនៅក្នុងប្រទេសចិនដែលមានតម្លៃថោកនិងគ្មានគុណភាពខ្ពស់តាមស្តង់ដាបច្ចេកទេសនោះទេ។ ប្រភពខាងលើបានបន្តថា សម្រាប់រថយន្តយោធានិងរថក្រោះរបស់អង្គការ NATO ត្រូវបានគេបំពាក់ដោយសម្បកកង់ម៉ាក Michelin XZL ផលិតដោយក្រុមហ៊ុននៅតាមបណ្តាប្រទេសលោកខាងលិច ដោយកង់រថយន្តទាំងនោះអាចមានតម្លៃរហូតដល់ ៣៦,០០០ដុល្លារអាមេរិកសម្រាប់កង់មួយឈុតមាន ៥០គ្រាប់។​​ យ៉ាងណាក្តី មន្ត្រីពុករលួយរុស្ស៊ីមួយចំនួនបានជ្រើសរើសប្រើប្រាស់សម្បកកង់រថយន្តម៉ាក Yellow Sea YS20 ផលិតក្នុងប្រទេសចិន ដែលមានតម្លៃត្រឹមតែ ២០៨ដុល្លារអាមេរិកប៉ុណ្ណោះសម្រាប់កង់មួយឈុតមាន ៥០គ្រាប់ដូចគ្នា។​ កត្តានេះហើយទើបធ្វើឲ្យរថយន្តយោធានិងរថក្រោះរុស្ស៊ីងាយជាប់គាំងពេលបើកកាត់ផ្លូវភក់និងងាយបែកពេលបើកផ្លូវឆ្ងាយឬត្រូវកម្តៅថ្ងៃខ្លាំង។ សូមបញ្ជាក់ជូនថា បញ្ហាខាងលើនេះក៏បានធ្វើឲ្យប៉ះពាល់ដល់ក្បួនយោធារបស់រុស្ស៊ីផងដែរ ពោលគឺបណ្តាលឲ្យមានភាពយឺតយ៉ាវក្នុងការចល័តទ័ពនិងការដឹកជញ្ជូនសម្ភារៈមួយចំនួន៕ អត្ថបទ៖ ភក្តី ប្រភព៖ Daily

ថៃ៖ តាមគម្រោងគឺថៃនឹងរៀបចំការបោះឆ្នោតជ្រើសអភិបាលនៃគណៈអភិបាលក្រុងបាងកក និងជ្រើសរើសសមាជិកក្រុមប្រឹក្សាក្រុងនៅក្នុងថ្ងៃទី ២២ ខែឧសភាខាងមុខនេះ ហើយវាក៏ជាការបោះឆ្នោតលើកទី ១១ សម្រាប់ថៃផងដែរ ខណៈការបោះឆ្នោតចុងក្រោយគ្រោងរៀបឡើងកាលពីឆ្នាំ២០១៣ តែត្រូវពន្យាពេលរហូតដល់មកដល់ឆ្នាំ២០១៤ ព្រោះឥទ្ធិពលនៃកម្លាំងយោធាថៃក្នុងការគ្រប់គ្រងរដ្ឋាភិបាល។ ការបោះឆ្នោតត្រូវបានគេមើលឃើញថា បានរៀបចំឡើងក្នុងបរិបថនៃការរាតត្បាតជំងឺកូវីដ-១៩ ខណៈសំឡេងឆ្នោតរបស់អ្នកជំងឺកូវីដ-១៩នៅតែជាធាតុផ្សំយ៉ាងចាំបាច់បំផុតសម្រាប់លទ្ធផលផ្លូវការនៃការបោះឆ្នោតទាំងមូល។ ដើម្បីឆ្លើយតបនឹងបញ្ហាប្រឈមនេះអាជ្ញាធរសុខាភិបាលថៃបានសម្រេចដាក់ចេញវិធានការចាំបាច់មួយចំនួនដើម្បីអនុញ្ញាតឲ្យអ្នកជំងឺកូវីដ-១៩ និងពលរដ្ឋដែលមិនបានចាក់វ៉ាក់សាំងបង្ការជំងឺកូវីដ-១៩ នៅតែអាចមកបោះឆ្នោតជ្រើសរើសបេក្ខភាពអភិបាលក្រុងដែលពួកគេគាំទ្របានដោយស្មើភាពគ្នាដូចពលរដ្ឋទូទៅដែរ។ បើតាមលោក Anutin Charnvirakul រដ្ឋមន្ត្រីក្រសួងសុខាភិបាលថៃបានបញ្ជាក់ថា វិធានការដែលអាជ្ញាធរថៃនឹងដាក់ឲ្យអនុវត្តនោះរួមមានរៀបចំការិយាល័យបោះឆ្នោតដាច់ដោយឡែកមួយសម្រាប់អ្នកជំងឺកូវីដ-១៩ ហើយក្នុងអំឡុងពេលមកបោះឆ្នោតនោះអ្នកជំងឺទាំងអស់នឹងតម្រូវឲ្យពាក់ម៉ាស់ពិសេសមួយដែលមានកម្រាស់រហូតដល់ ២ជាន់។ រដ្ឋមន្ត្រីសុខាភិបាលរូបនេះបានបន្តថា ខាងមន្ត្រីជំនាញក៏កំពុងពិចារណាដាក់ចេញវិធានការចាំបាច់មួយចំនួនទៀតផងដែរដើម្បីធានាថា ការបោះឆ្នោតត្រូវបានរៀបចំឡើងដោយសុវត្ថិភាពនិងស្មើភាពគ្នាក្នុងចំណោមពលរដ្ឋទាំងអស់៕ អត្ថបទ៖ ភក្តី ប្រភព៖ The Thaiger