អាមេរិក៖ យ៉ាងហោចណាស់មានមនុស្សចំនួន ២៤នាក់បានស្លាប់បាត់បង់ជីវិតដោយសារទឹកជំនន់នៅក្នុងតំបន់ភាគខាងត្បូងរដ្ឋតិចសាស់ សហរដ្ឋអមេរិក នេះបើយោងតាមការចុះផ្សាយរបស់បណ្តាញសារព័ត៌មាន​​ The Strait Time នៅក្នុងថ្ងៃសៅរ៍ ទី៥ ខែកក្កដា។ សូមបញ្ជាក់ថា ទឹកជំនន់នេះគឺជាជំនន់ទឹកភ្លៀង ដែលបានកើតឡើងយ៉ាងលឿនបំផុតក្រោយតំបន់រងគ្រោះខាងលើនេះមានភ្លៀងធ្លាក់ខ្លាំង និងច្រើនថ្ងៃជាប់គ្នា។ បើតាមលោក Dan Patrick អភិបាលរដ្ឋតិចសាស់បានបញ្ជាក់ថា នៅក្នុងចំណោមអ្នកដែលបានស្លាប់បាត់បង់ជីវិតទាំងនោះគឺមានជ​នរងគ្រោះមួយចំនួនជាកុមារ ដែលស្លាប់ដោយសារតែលង់នៅក្នុងទឹកកំពុងហូរខ្លាំង។ អភិបាលរដ្ឋតិចសាស់រូបនេះបានបន្តថា ក្រៅតែពីបានបណ្តាលឱ្យមានអ្នកស្លាប់ហើយ គិតត្រឹមពេលនេះក៏នៅមានកុមារៗចំនួន ២៣នាក់កំពុងតែបាត់ខ្លួនពីជំរុំ Camp Mystic ផងដែរ ខណៈនៅក្នុងជំរុំដែលជាកន្លែងមានសុវត្ថិភាពសម្រាប់ស្នាក់នៅជាបណ្តោះអាសន្ននេះមានមនុស្សប្រមាណជា ៧៥០នាក់កំពុងស្នាក់នៅ៕ អត្ថបទ៖ ភក្តី ប្រភព៖ The Strait Time

ជប៉ុន៖​ ប្រទេសជប៉ុនកំពុងប្រឈមនឹងបញ្ហាខ្វះតែបៃតង Matcha សម្រាប់ផ្គត់ផ្គង់ក្នុងទីផ្សារ នេះបើយោងតាមការចុះផ្សយរបស់បណ្តាញសារព័ត៌មាន GMA News នៅក្នុងថ្ងៃសៅរ៍ ទី៥ ខែកក្កដា។ បញ្ហាខ្វះខាតតៃបងនេះបានកើតឡើងដោយសារតែកត្តាអាកាសធាតុមិនអំណោយផល ពោលគឺរលកកម្តៅដ៏ខ្ពស់ដែលធ្វើឱ្យដំណាំតែបៃតងប្រភេទ Matcha លូតលាស់មិនបានល្អ ខណៈនៅតាមចំការខ្លះដើមតែត្រូវងាប់តែម្តង។  ប្រភពខាងលើបានបន្តថា ស្របពេលដែលទិន្នផលដំណាំតែបៃតងប្រភេទ Matcha បានធ្លាក់ចុះយ៉ាងគំហុកហើយ នៅក្នុងទីផ្សារឯណោះវិញគឺភេសជ្ជៈតែបៃតង Matcha កំពុងផ្ទុះការគាំទ្រយ៉ាងខ្លាំងទាំងនៅក្នុងប្រទេសជប៉ុន និងនៅតាមបណ្តាលប្រទេសមួយចំនួននៅលើពិភពលោក។ តម្រូវការដ៏ខ្ពស់នេះក៏បានរួមចំណែកធ្វើឱ្យតែបៃតង Matcha នៅតាមហាងមួយចំនួនត្រូវលក់រហូតដល់អស់ពីស្តុកផងដែរ។ យ៉ាងណាក្តី កសិករជប៉ុនបានរំពឹងថា នឹងអាចដាំដុះតែបៃតងបានល្អនិងច្រើនឡើងវិញនៅពេលអាកាសធាតុត្រលប់ទៅរកភាពប្រក្រតី៕ អត្ថបទ៖ ភក្តី ប្រភព៖ GMA News

ចិន៖ ស្ថានទូតចិនប្រចាំនៅក្នុងប្រទេសថៃបានព្រមានពលរដ្ឋចិនឱ្យមានការប្រុងប្រយ័ត្នចំពោះករណីផ្តល់ជូនឱកាសការងារល្អៗជាមួយនឹងប្រាក់ខែខ្ពស់នៅក្នុងប្រទេសថៃ ដ្បិតករណីទាំងនោះអាចជាការបោកប្រាស់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី៤ ខែកក្កដា។ សេចក្តីព្រមានខាងលើនេះត្រូវបានផ្សព្វផ្សាយក្រោយមានករណីពលរដ្ឋចិនម្នាក់បានបាត់ខ្លួនក្រោយពេលមកទទួលយកឱ្យការងារថតរូបដាក់គម្របទស្សនាវដ្តីនៅក្នុងប្រទេសថៃកាលអំឡុងពេលដើមខែមិថុនាកន្លងទៅនេះ។ ពលរដ្ឋចិនដែលបានបាត់ខ្លួននេះត្រូវបានស្ថានទូតចិនឱ្យដឹងត្រឹមថា មានឈ្មោះ Zhong ភេទប្រុស និងមានអាយុ ២៣ឆ្នាំ។  យ៉ាងណាក្តី ការបាត់ខ្លួនរបស់លោក Zhong មិនត្រូវបានអ្នកណាម្នាក់ដឹងឡើយ ទើបកាលពីប៉ុន្មានសប្តាហ៍មុនគាត់នេះបានតេទូរស័ព្ទទៅកាន់ប្អូនស្រីរបស់គាត់នៅក្នុងប្រទេសចិន និងបានប្រាប់នាងពីស្ថានភាពរបស់គាត់ ខណៈលោក Zhong ខ្លួនឯងផ្ទាល់មិនបានដឹងថា រូបគាត់កំពុងនៅទីណានោះទេ។ ក្រោយទទួលបានដំណឹងនេះភ្លាម ប្អូនស្រីរបស់លោក Zhong ក៏បានរាយការណ៍ករណីនេះទៅកាន់ស្ថានទូតចិននៅក្នុងប្រទេសថៃ ដើម្បីស្វែងរកកិច្ចអន្តរាគមន៍។ បើតាមស្ថានទូតចិនបានញ្ជាក់ថា លោក Zhong ត្រូវបានគេចាប់​យកទៅប្រទេសមីយ៉ាន់ម៉ានិងបង្ខំឱ្យធ្វើការងារជាអ្នកឆបោកតាមប្រព័ន្ធអ៊ីនធឺណិតនៅទីនោះ ហើយគិតត្រឹមពេលនេះលោក  Zhong ត្រូវបានជួយសង្គ្រោះឱ្យមានសេរីភាពជាធម្មតាវិញហើយ៕ អត្ថបទ៖ ភក្តី

ឥណ្ឌា៖ យ៉ាងហោចណាស់មានមនុស្សចំនួន ៤០នាក់បានស្លាប់បាត់បង់ជីវិតនៅក្នុងហេតុការណ៍មានភ្លើងឆេះរោងចក្រមួយកន្លែងនៅក្នុងប្រទេសឥណ្ឌា នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍។ រោងចក្រដែលជាកន្លែងកើតហេតុនេះគឺជារោងចក្រគីមីមានទីតាំងស្ថិតនៅក្នុងរដ្ឋ Sangareddy ភាគខាងត្បូងប្រទេសឥណ្ឌា។ ប្រភពខាងលើបានបន្តថា ក្រៅតែពីបានបណ្តាលឱ្យមានអ្នកស្លាប់ហើយ ហេតុការណ៍អកុសលនេះក៏បានបណ្តាលមនុស្សចំនួន ៣៣នាក់ផ្សេងទៀតបានរងរបួសផងដែរ។ បើតាមអាជ្ញាធរឥណ្ឌាបានបញ្ជាក់ត្រឹមថា ក្រោយមានហេតុការណ៍ឆេះនេះរោងចក្រខាងលើនឹងត្រូវផ្អាកដំណើរការក្នុងរយៈ ៩០ថ្ងៃ ខណៈមូលហេតុដែលបណ្តាលឱ្យមានភ្លើងឆេះ និងអ្នកទទួលខុសត្រូវនៅមិនទាន់មានការបញ្ជាក់នៅឡើយទេ៕ អត្ថបទ៖ ភក្តី ប្រភព៖ បាងកកប៉ុស្តិ៍

អាមេរិក៖ មនុស្សចំនួន ២នាក់បានរងរបួស និង ៧កំពុងបាត់ខ្លួននៅក្នុងហេតុការណ៍ផ្ទុះឃ្លាំងកាំជ្រួចដ៏ធំមួយនៅសហរដ្ឋអាមេរិក នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃព្រហស្បតិ៍ ទី៣ ខែកក្កដា។ ឃ្លាំងកាំជ្រួចមួយកន្លែងនេះមានទីតាំងស្ថិតនៅក្នុងក្រុង Esparto ភាគខាងជើងនៃរដ្ឋ California។ បើតាមអាជ្ញាធរនៅតំបន់កើតហេតុបានបញ្ជាក់ថា សម្រាប់អ្នករងរបួសទាំង ២នាក់គឺត្រូវបានក្រុមគ្រូពេទ្យជួយសង្គ្រោះជីវិត ១០០%ហើយ តែសម្រាប់អ្នកដែលកំពុងបាត់ខ្លួនវិញ គិតត្រឹមពេលនេះគេនៅមិនទាន់អាចសន្និដ្ឋានបានថា ពួកគេអាចមានសំណាងនៅរស់មានជីវិត ឬក៏បានស្លាប់ហើយនោះទេ។ ចំពោះមូលហេតុជាក់ស្តែងដែលបង្កឱ្យការផ្ទុះ និងអ្នកទទួលខុសត្រូវវិញក៏នៅមិនទាន់មានការបញ្ជាក់នៅឡើយដែរ៕ អត្ថបទ៖ ភក្តី ប្រភព៖ The Strait Time

ជប៉ុន៖ គ្រោះរញ្ជួយដីកម្រិត ៥,៥ វ៉ិចទ័រ បានវាយប្រហារប្រទេសជប៉ុននៅរសៀលថ្ងៃព្រហស្បតិ៍ ទី៣ ខែកក្កដានេះ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia។ ទីតាំងដែលបានរងការគំរាមគំហែងដោយគ្រោះធម្មជាតិនេះគឺតំបន់ឆ្នេរនៃកោះ Tokara ដែលស្ថិតនៅក្នុងខេត្ត Kagoshima ភាគខាងត្បូងប្រទេសជប៉ុន។ បើតាមទីភ្នាក់ងារឧតុនិយមជប៉ុនបានបញ្ជាក់ថា គ្រោះរញ្ជួយដីខាងលើនេះបានបង្កឱ្យមានភាពរំញ័រនៅក្នុងផ្ទៃដីជម្រៅប្រមាណជា ២០គីឡូម៉ែត្រ។ យ៉ាងណាក្តី រហូតមកដល់នឹងពេលនេះនៅមិនទាន់មានសេចក្តីរាយការណ៍ពីសំណាក់អាជ្ញាធរប្រចាំតំបន់កើតហតុបញ្ជាក់ថា មានអ្នករងរបួសឬក៏អត់នៅឡើយទេ ហើយទំហំនៃការខូតខាតវិញក៏មិនមានការបញ្ជាក់ច្បាស់លាស់ដែរ៕ អត្ថបទ៖ ភក្តី ប្រភព៖ Channel News Asia

ឥណ្ឌូណេស៊ី៖ យ៉ាងហោចណាស់មានមនុស្សចំនួន ៤នាក់បានបាត់បង់ជីវិតនៅក្នុងហេតុការណ៍លិចសាឡាងមួយគ្រឿងនៅក្នុងប្រទេសឥណ្ឌូណេស៊ី ​នេះបើយោងតាមការចុះផ្សាយរបស់បណ្តាញសារព័ត៌មាន​ Channel News Asia នៅក្នុងថ្ងៃព្រហស្បតិ៍ ទី៣ ខែកក្កដា។ ក្រៅតែពីបានរកឃើញអ្នកស្លាប់ភ្លាមៗហើយ គិតត្រឹមពេលនេះក៏នៅមានមនុស្សចំនួន ៣៨នាក់កំពុងតែបាត់ខ្លួនផងដែរ។ បើតាមអាជ្ញាធរឥណ្ឌូណេស៊ីបានឱ្យដឹងថា សាឡាងមួយគ្រឿងមានទិសដៅធ្វើដំណើរចេញពីកោះចាវ៉ាឆ្ពោះទៅកាន់រមណីយដ្ឋានកោះបាលី ដោយមានផ្ទុកមនុស្សសរុបចំនួន ៦៥នាក់។ ប្រភពខាងលើបានបន្តថា សាឡាងបានលិចក្នុងពេលធ្វើដំណើរបានពាក់កណ្តាលផ្លូវ ហើយភ្លាមៗក្រោយពេលជួបហេតុការណ៍អកុសលមានមនុស្សចំនួន ២៣នាក់ត្រូវបានគេជួយសង្គ្រោះទាន់ពេលវេលា៕ អត្ថបទ៖ ភក្តី ប្រភព៖  Channel News Asia

អាមេរិក៖ ក្រុមហ៊ុនផលិតរថយន្ត Nissan បានប្រកាសប្រមូលយករថយន្តចំនួន ៤៣៣,៨៩៩គ្រឿងចូលរោងចក្រវិញ ក្រោយរកឃើញថារថយន្តទាំងនោះមានបញ្ហាគ្រឿងម៉ាស៊ីន នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃពុធ ទី២ ខែកក្កដា។ សូមបញ្ជាក់ជូនថា វិធានការខាងលើនេះត្រូវបានធ្វើឡើងសម្រាប់តែរថយន្ត Nissan ដែលកំពុងប្រើប្រាស់នៅក្នុងសហរដ្ឋអាមេរិកតែប៉ុណ្ណោះ។ បើតាមរដ្ឋបាលសុវត្ថិភាពចរាចរណ៍ផ្លូវជាតិរបស់សហរដ្ឋអាមេរិក (U.S. National Highway Traffic Safety Administration) បានបញ្ជាក់ថា រថយន្ត Nissan ដែលត្រូវបានក្រុមហ៊ុនប្រកាសឱ្យអ្នកប្រើប្រាស់យកចូលរោងចក្រវិញដើម្បីធ្វើការត្រួតពិនិត្យជាថ្មីនោះមានចំនួន ៤ម៉ូដែល ដូចជា៖ ១-Nissan Rogue ២-Nissan Altima ៣-Nissan Infiniti QX50

ថៃ៖ នាយករដ្ឋមន្ត្រីស្តីទីនៃប្រទេសថៃ គឺលោក Suriya Jungrungreangkit គ្រោងនឹងចូលកាន់ការងារដឹកនាំប្រទេសក្នុងរយៈពេលត្រឹមតែមួយថ្ងៃប៉ុណ្ណោះ គឺនៅក្នុងថ្ងៃពុធ ទី២ ខែកក្កដា នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia ។ ក្នុងរយៈពេលមួយថ្ងៃពេញនៃការទទួលបានសិទ្ធជានាយករដ្ឋមន្ត្រីនេះ លោក Suriya Jungrungreangkit នឹងដឹកនាំការងារសំខាន់ៗមួយចំនួន ដែលអាចឈានទៅជ្រើសរើសបេក្ខភាពថ្នាក់ដឹកនាំប្រទេសថៃជាផ្លូវការ។ សូមបញ្ជាក់ជូនថា​ លោក Suriya Jungrungreangkit គឺជារដ្ឋមន្ត្រីក្រសួងដឹកជញ្ជូន និងជាឧបនាយករដ្ឋមន្រ្តី ហើយរូបលោកបានក្លាយជានាយករដ្ឋមន្ត្រីស្តីទីនៃប្រទេសថៃ ក្រោយតុលាការធម្មនុញ្ញថៃសម្រេចព្យួរតំណែងនាយករដ្ឋមន្ត្រីរបស់លោកស្រី Paetongtarn Shinawatra ជាបណ្តោះអាសន្នសិនកាលពីម្សិលមិញនេះ។ ប្រភពខាងលើបានបន្តថា កាលចូលកាន់តំណែងជានាយករដ្ឋមន្ត្រីស្តីទីក្នុងរយៈពេលត្រឹមតែមួយថ្ងៃដូចនេះ គឺជារឿងដ៏កម្របំផុតនៅក្នុងប្រវត្តិសាស្ត្រនៃប្រទេសថៃ៕ អត្ថបទ៖ ភក្តី ប្រភព៖ Channel News Asia

ចិន៖ យ៉ាងហោចណាស់មានមនុស្សចំនួន ២នាក់បានស្លាប់បាត់បង់ជីវិតក្រោយមានភ្លៀងយ៉ាងខ្លាំងនៅក្នុងប្រទេសចិន នេះបើយោងតាមការចុះផ្សាយរបស់បណ្តាញសារព័ត៌មាន​ The Strait Time កាលពីយប់ថ្ងៃទី១ ខែកក្កដា។ ទីតាំងដែលកំពុងរងការគំរាមគំហែងដោយព្យុះភ្លៀងនៅពេលនេះមានតំបន់ចំនួន​២ គឺក្រុង Taiping និង ក្រុង Erlangping នៃខេត្ត Henan ។ ប្រភពខាងលើបានបន្តថា ក្រៅតែពីបានបណ្តាលឱ្យមានអ្នកស្លាប់បាត់បង់ជីវិតហើយ ព្យុះភ្លៀងដ៏អាក្រក់នេះក៏បានបណ្តាលឱ្យមនុស្សចំនួន ៦នាក់ផ្សេងទៀតកំពុងតែបាត់ខ្លួនផងដែរ ខណៈអាជ្ញាធរកំពុងព្យាយាមស្វែងរកពួកគេ​​​​​​​​​​​​​​​​​​​​​​​​​​​​​​​​​​​​​​​​​​​​​​​​សកម្មបំផុត។ បើតាមអាជ្ញាធរឧតុនិយមចិនបានបញ្ជាក់ថា បញ្ហាអាកាសធាតុអាក្រក់នេះអាចបន្តកើតមានជាច្រើនថ្ងៃបន្ថែមទៀត ហើយតំបន់ដែលរងផលប៉ះពាល់ក៏អាចរីករាលដាលកាន់តែច្រើនផងដែរ៕ អត្ថបទ៖ ភក្តី ប្រភព៖ The Strait Time