អាមេរិក៖ មន្ត្រីជាន់ខ្ពស់អាមេរិកម្នាក់បានលើកឡើងថា កងយោធាអាមេរិកត្រូវតែរៀបចំខ្លួនឲ្យបានរួចរាល់នៅក្នុងពេលឥលូវនេះដើម្បីត្រៀមឆ្លើយតបទៅនឹងសកម្មភាពឈ្លានពាននៅលើទឹកដីកោះតៃវ៉ាន់ ដែលអាចកើតមានឡើងនៅក្នុងពេលដ៏ឆាប់ខាងមុខនេះ។​ បើយោងតាមការចុះផ្សាយរបស់បណ្តាញសារព័ត៌មាន Channel News Asia បានបញ្ជាក់ថា មន្ត្រីជាន់ខ្ពស់មេរិកដែលបានធ្វើសេចក្តីអះអាងនេះគឺឧត្តមនាវីឯក Michael Gilday ប្រធានប្រតិបត្តិការកងទ័ពជើងទឹកអាមេរិក​ ខណៈកា​របញ្ចេញទស្សនៈរបស់លោកគឺត្រូវបានធ្វើឡើងនៅក្នុងពិធីសន្និសិទ្ធផ្លូវការមួយដែលបានរៀបចំឡើងនៅក្នុងទីក្រុងវ៉ាស៊ីនតោនកាលពីពេលថ្មីៗនេះ។ ឧត្តមនាវីឯក Michael Gilday ប្រធានប្រតិបត្តិការកងទ័ពជើងទឹកអាមេរិករូបនេះបាននិយាយចំៗថា ប្រទេសចិនក្រោមការដឹកនាំរបស់លោកប្រធានាធិបតី Xi Jinping គឺកំពុងតែផ្តោតការយកចិត្តទុកដាក់យ៉ាង​ខ្លាំងចំពោះគម្រោងឈ្លានពានកោះតៃវ៉ាន់ ហើយប្រតិបត្តិការណ៍ឈ្លានពាននោះអាចនឹងកើតមានក្នុងពេលដ៏ខ្លីខាងមុខ ឬអាចនៅក្នុងឆ្នាំនេះតែម្តង។ ឧត្តមនាវីឯករូបនេះបានបន្តថា កត្តាដែលជំរុញឲ្យចិនកាន់តែចង់វាយដណ្តើមយកកោះតៃវ៉ាន់ក្នុងពេលនេះគឺដោយសារស្ថានពិភពលោកកំពុងមានភាពអំណោយផលសម្រាប់ចិន ពោលគឺពិភពលោកកំពុងជាប់ដៃដោះស្រាយបញ្ហាសង្គ្រាមរវាងរុស្ស៊ីនិងអ៊ុយក្រែន ខណៈប្រទេសចិនវិញកំពុងឈរមើលនិងរៀនសូត្រយុទ្ធសាស្រ្តពីរុស្ស៊ី ខណៈចិនក្នុងនាមជាប្រទេសសម្ព័ន្ធមិត្តជាមួយរុស្ស៊ីគឺមិនបានរងផលប៉ះពាល់ពីវិបត្តិនៃការឡើងថ្លៃថាមពល និងវិបត្តិសេដ្ឋកិច្ចផ្សេងៗទៀតនោះទេ៕ លោកប្រធានាធិបតីចិន Xi Jinping អត្ថបទ៖

អាមេរិក៖ ក្រុមហ៊ុនផលិតវ៉ាក់សាំងប្រឆាំងនឹងជំងឺកូវីដ-១៩ប្រភេទ Pfizer គ្រោងនឹងដំឡើងថ្លៃលើផលិតផលវ៉ាក់សាំងរបស់ខ្លួនសម្រាប់លក់ជូនរដ្ឋាភិបាលអាមេរិក នេះបើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃសុក្រ ទី២១ ខែតុលានេះ។ បើតាមអ្នកនាង Angela Lukin ដែលជានាយកប្រតិបត្តិនៃក្រុមហ៊ុន Pfizer បានបញ្ជាក់ថា ក្នុងគម្រោងនាពេលកន្លងមកគឺរដ្ឋាភិបាលអាមេរិកបានទិញវ៉ាក់សាំង Pfizer ក្នុងតម្លៃត្រឹមតែ ៣០ដុល្លារប៉ុណ្ណោះក្នុងមួយដូស ប៉ុន្តែរដ្ឋាភិបាលអាមេរិកបានយកវ៉ាក់សាំងអស់នោះទៅចាក់ជូនពលរដ្ឋដោយមិនគិតថ្លៃនោះទេ។ នាយកប្រតិបត្តិរូបនេះបានបន្តថា ឥលូវនេះគម្រោងចាស់សម្រាប់ការទិញ-លក់វ៉ាក់សាំង Pfizer រវាងក្រុមហ៊ុននិងរដ្ឋាភិបាលអាមេរិកបានបញ្ចប់ហើយ ខណៈគម្រោងថ្មីនឹងត្រូវបន្តក្នុងពេលឆាប់ៗខាងមុខនេះ ហើយនៅក្នុងគម្រោងថ្មីនោះគឺក្រុមហ៊ុនគ្រោងនឹងដំឡើងថ្លៃវ៉ាក់សាំងក្នុងតម្លៃចន្លោះពី ១១០ដុល្លារ ទៅ ១៣០ដុល្លារ សម្រាប់វ៉ាក់សាំងមួយដូស។ គួរបញ្ជាក់ជូនថា Pfizer គឺជាក្រុមហ៊ុនផលិតឱសថដ៏ធំដែលមានមូលដ្ឋាននៅសហរដ្ឋអាមេរិក

ថៃ៖ អាជ្ញាធរសុខាភិបាលនៃប្រទេសថៃនៅថ្ងៃពុធទី ១៩ ខែតុលានេះបានប្រកាសពីការរកឃើញអ្នកឆ្លងមេរោគបំប្លែងខ្លួនប្រភេទ BQ.1 លើកដំបូង ដែលមេរោគនេះគឺជាប្រភេទមេរោគអាចបង្កការចម្លងបានលឿនបំផុត។ តាមរយៈសេចក្តីជូនដំណឹងខាងលើនេះអាជ្ញាធរថៃក៏បានអំពាវនាវឲ្យប្រជាពលរដ្ឋត្រូវបន្ថែមការប្រុងប្រយ័ត្នចំពោះវត្តមាននៃមេរោគថ្មីនេះ ខណៈក្រុមអ្នកជំនាញបានព្យាករណ៍ថា វត្តមាននៃមេរោគបំប្លែងខ្លួន BQ.1 អាចនឹងបង្កបញ្ហាក្នុងសង្គមជាថ្មីម្តងទៀតផងដែរ​ ពោលគឺហានិភ័យនៃការរាតត្បាតមេរោគប្រភេទនេះមានកម្រិតខ្ពស់ណាស់។ គួរបញ្ជាក់ជូនថា មេរោគបំប្លែងខ្លួន BQ.1​ គឺជាវ៉ារ៉្យង់ដែលបានបំប្លែងខ្លួនចេញពីមេរោគកូវីដ-១៩ អូមីក្រុងប្រភេទ BA.5 ខណៈមេរោគ BQ.1 មានកម្រិតនៃការចម្លងលឿនជាងមេរោគអូមីក្រុងប្រភេទផ្សេងៗទៀតរហូតដល់ ១៥%ឯណោះ។ ជាងនេះទៅទៀតនាពេលកន្លងមក លោកវេជ្ជបណ្ឌិត Anthony Fauci នាយកវិទ្យាស្ថានជាតិអាឡែស៊ី និងជំងឺឆ្លងរបស់សហរដ្ឋអាមេរិកធ្លាប់បានលើកឡើងថា មេរោគ BQ.1 អាចបង្កគ្រោះថ្នាក់ចំពោះអ្នកជំងឺធ្ងន់ធ្ងរជាងមេរោគកូវីដ-១៩ទូទៅ ខណៈមេរោគប្រភេទបានចម្លងទៅកាន់ពលរដ្ឋអាមេរិកប្រមាណជា ១០%

បារាំង៖ ក្រុមកម្មករនៅក្នុងប្រទេសបារាំងរាប់ពាន់នាក់បាននាំគ្នាចុះថ្នល់ធ្វើបាតុកម្ម នេះបើយោងតាមការចុះផ្សាយរបស់បណ្តាញសារ​ព័ត៌មាន Channel News Asia នៅព្រឹកថ្ងៃពុធ ទី១៩ ខែតុលានេះ។ ហេតុផលចម្បងនៃសម្រេចនាំគ្នាធ្វើបាតុកម្មគឺក្រុមកម្មករចង់ទាមទារឲ្យមានការដំឡើងប្រាក់ឈ្មួលរបស់ពួកគេឲ្យខ្ពស់ជាងមុន ដើម្បីឆ្លើយតបនឹងកម្រិតអតិផរណានាពេលចប្ចុប្បន្ន ពោលគឺទាមទារប្រាក់ឈ្មួលឲ្យបានសមស្របទៅនឹងតម្លៃទំនិញនៅលើទីផ្សារដែលបានឡើងថ្លៃក្នុងកម្រិតដ៏ខ្ពស់មួយ។ ប្រភពខាងលើបានបន្តថា ក្រុមកម្មករបានប្រមូលផ្តុំគ្នានៅតាមដងផ្លូវសំខាន់ៗនៅទូទាំងប្រទេសបារាំង និងជាពិសេសនៅតំបន់ដែលមានស្ថានីយ៍ប្រេងឥន្ទនៈ ហើយសកម្មភាពនេះក៏បានផ្តល់ការរាំងស្ទះចំពោះការធ្វើដំណើររបស់ពលរដ្ឋរាប់លាននាក់ផ្សេងទៀតផងដែរ។ បាតុករម្នាក់ឈ្មោះ Laurent Leger អាយុ ៥៩ឆ្នាំ បានប្រាប់ឲ្យដឹងថា គាត់ចង់ទាមទារឲ្យមានការដំឡើងប្រាក់ឈ្មួល ១០% ដើម្បីទប់ទល់នឹងស្ថានភាពសេដ្ឋកិច្ចនាពេលបច្ចុប្បន្ន ដែលតម្លៃនៃម្ហូបអាហារនិងតម្លៃថាមពលបានកើនឡើងយ៉ាងខ្លាំង។ គួរបញ្ជាក់ជូនថា បញ្ហាសេដ្ឋកិច្ចដែលប្រទេសបារាំងកំពុងជួបប្រទះនៅពេលនេះបានកើតឡើងក្រោមហេតុផលសំខាន់ៗមួយចំនួនដូចជា វិបត្តិនៃការរាតត្បាតនៃជំងឺកូវីដ-១៩ និងឥទ្ធិពលនៃវិប​ត្តិសង្គ្រាមរវាងរុស្ស៊ីនិងអ៊ុយក្រែន៕   អត្ថបទ៖ ភក្តី ប្រភព៖

ទីក្រុងព្រុចសែល៖ ក្រុមរដ្ឋមន្ត្រីការបរទេសរបស់សហភាពអឺរ៉ុបបានយល់ព្រមគ្នាលើកគម្រោងមួយសម្រាប់ជួយគាំទ្រប្រទេសអ៊ុយក្រែន ដែលគម្រោងនោះគឹជាបេសកម្មបណ្តុះបណ្តាលកងទ័ពអ៊ុយក្រែនប្រមាណជា ១៥,០០០នាក់។ បើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃចន្ទ ទី១៧ ខែតុលានេះបានបញ្ជាក់ថា គម្រោងបណ្តុះបណ្តាលកងទ័ពអ៊ុយក្រែននោះនឹងត្រូវចាប់ផ្តើមនៅខែក្រោយនេះហើយ ខណៈគេបានដាក់ការរំពឹងទុកយ៉ាងខ្ពស់ថា​ ក្រោមបញ្ចប់វគ្គបណ្តុះបណ្តាលនេះរួចកងកម្លាំងអ៊ុយក្រែននឹងមានសមត្ថភាពខ្ពសជាងមុនក្នុងការប្រយុទ្ធតតាំងជាមួយកងកម្លាំងរុស្ស៊ី។ ប្រភពខាងលើបានបន្តថា ក្រៅតែសម្រេចផ្តល់វគ្គបណ្តុះបណ្តាលដល់ក្រុមទាហានហើយ សហភាពអឺរ៉ុបក៏គ្រោងនឹងផ្តល់ជំនួយផ្នែកយោធាទៅកាន់ប្រទេសអ៊ុយក្រែនផងដែរ ដោយជំនួយនោះនឹងមានតម្លៃចំនួន ៥០០លានអឺរ៉ូ (ជាង ៤៨៧លានដុល្លារអាមេរិក)។ សូមបញ្ជាក់ជូនថា ការសម្រេចផ្តល់ជំនួយចំនួន ៥០០លានអឺរ៉ូបន្ថែមទៀតនៅពេលនេះ គឺធ្វើឲ្យកញ្ចប់ជំនួយសរុបដែលសហភាពអឺរ៉ុបបានផ្តល់ទៅកាន់អ៊ុយក្រែនមានតម្លៃរហូតដល់ ៣ពាន់លានអឺរ៉ូ (ជាង ២,៩ពាន់លានដុល្លារអាមេរិក) ហើយ បើគិតចាប់តាំងពីភ្លើងសង្គ្រាមរវាងរុស្ស៊ីនិងអ៊ុយក្រែនបានចាប់ផ្តើមមក៕  អត្ថបទ៖ ភក្តី ប្រភព៖ The Strait

កូរ៉េខាងត្បូង៖ យោងតាមការចុះផ្សាយរបស់បណ្តាញសារព័ត៌មាន The Strait Times បានឲ្យដឹងថា ប្រទេសកូរ៉េត្បូងបានចាប់ផ្តើមធ្វើសមយុទ្ធយោធាទ្រង់ទ្រាយធំមួយនៅព្រឹកថ្ងៃចន្ទ ទី១៧ ខែតុលានេះ។ សមយុទ្ធយោធាដែលកូរ៉េខាងត្បូងកំពុងអនុវត្តនោះគឺជាយមយុទ្ធយោធាប្រចាំឆ្នាំ ដែលមានឈ្មោះថា Hoguk ជាសមយុទ្ធយោធាបែបការពារប្រទេសពីការឈ្លានពាន ហើយតាមគម្រោងគឺសមយុទ្ធមួយនេះនឹងត្រូវបន្តធ្វើរហូតដល់ថ្ងៃសោរ៍ ចុងសប្តាហ៍នេះ។ ប្រភពខាងលើបានបន្តថា ការធ្វើសមយុទ្ធយោធារបស់កូរ៉េខាងត្បូងនៅពេលនេះគឺស្របពេលដែលប្រទេសកូរ៉េខាងជើងបានបាញ់សាកល្បងមីស៊ីលជាបន្តបន្ទាប់ក្នុងរយៈពេលថ្មីៗនេះ ពោលវាគឺជាពេលដែលប្រទេសកូរ៉េខាងត្បូងនិងប្រទេសកូរ៉េខាងជើងកំពុងមានភាពតានតឹងជាមួយយ៉ាងខ្លាំង។ គួរបញ្ជាក់ជូនថា ការធ្វើសមយុទ្ធយោធារបស់កងកម្លាំងកូរ៉េខាងត្បូងនៅពេលនេះក៏មានការចូលរួមពីក្រុមយោធារបស់អាមេរិកផងដែរ ខណៈសមយុទ្ធរួមគ្នាគ្នានឹងត្រូវធ្វើឡើងទាំងយប់ទាំងថ្ងៃ ហើយវាគឺជាការបង្ហាញពីរបៀបនៃការការពារប្រទេសជាក់ស្តែងតែម្តង៕ អត្ថបទ៖ ភក្តី ប្រភព៖ The Strait Times  

ថៃ៖ យោងតាមការចុះផ្សាយរបស់បណ្តាញសារព័ត៌មាន National Thailand នៅព្រឹកថ្ងៃសៅរ៍ ទី១៥ ខែតុលានេះបានឲ្យដឹងថា អាជ្ញាធរថៃសម្រេចបង្កើនការប្រុងប្រយ័ត្នជាថ្មីចំពោះវត្តមាននៃមេរោគបំប្លែងខ្លួនថ្មីមួយប្រភេទ ដែលក្រុមអ្នកជំនាញបានហៅថា មេរោគប្រភេទ XBB ។ បើតាមនាយកដ្ឋានគ្រប់គ្រងជំងឺឆ្លងថៃបានបញ្ជាក់ថា វិធានការដែលអាជ្ញាធរថៃបានដាក់ចេញដើម្បីឆ្លើយតបនឹងវត្តមាននៃវ៉ារ៉្យង់ XBB នៅពេលនេះគឺការបំពាក់កាមេរ៉ាសុវត្ថិភាពបន្ថែមទៅតាមប្រលានយន្តហោះ ដើម្បីរឹតបន្តឹងការត្រួតពិនិត្យចំពោះអ្នកដំណើរអន្តរជាតិ និងជាពិសេសនោះគឺក្រុមអ្នកដំណើរដែលទើបត្រលប់មកពីប្រទេសសិង្ហបុរី និងហុងកុង ដែលជាកន្លែងបានរកឃើញករណីឆ្លងមេរោគ XBB ក្នុងចំនួនដ៏ច្រើន។ គួរបញ្ជាក់ជូនថា ការសម្រេចបង្កើនការប្រុងប្រយ័ត្នចំពោះវ៉ារ៉្យង់ XBB របស់អាជ្ញាធរថៃនៅពេលនេះគឺត្រូវបានធ្វើឡើងក្រោយពេលដែលអាជ្ញាធរសុខាភិបាលហុងកុងបានប្រកាសពីការរកឃើញ ករណីអ្នកឆ្លងមេរោគបំប្លែងខ្លួន XBB ជាច្រើនករណីកាលពីថ្ងៃពុធ ទី១២កន្លងទៅ ក្នុងនោះមានអ្នកជំងឺ ៣នាក់គឺជាអ្នកដំណើរមកពីប្រទេសថៃ អ្នកជំងឺ ១៣នាក់មកពីប្រទេសសិង្ហបុរី

អាមេរិក៖ មន្ទីរបញ្ចកោណអាមេរិកបានប្រកាសផ្តល់ជំនួយតម្លៃ ៧២៥លានដុល្លារបន្ថែមទៀតទៅកាន់ប្រទេសអ៊ុយក្រែន នេះបើយោងតាមការចុះផ្សាយរបស់បណ្តាញសារព័ត៌មាន The Strait Times នៅព្រឹកថ្ងៃសៅរ៍ ទី១៥ ខែតុលានេះ។ ជំនួយបន្ទាន់នេះត្រូវបានផ្តល់ជូនទៅកាន់ប្រទេសអ៊ុយក្រែន ក្រោយពេលដែលរុស្ស៊ីបានបន្តបាញ់មីស៊ីលជាច្រើនគ្រាប់ទៅកាន់ទីក្រុងសំខាន់ៗរបស់អ៊ុយក្រែនក្នុងរយៈជិតមួយសប្តាហ៍មកហើយ។ ប្រភពខាងលើបានបន្តថា ជំនួយរបស់សហរដ្ឋអាមេរិកនៅពេលនេះគឺមិនខុសពីជំនួយលើកមុនៗឡើយ ពោលវាគឺជាជំនួយផ្នែកយោធា ដែលមានរួមមានសម្ភារៈសំខាន់មួយចំនួនដូចជា គ្រាប់រំសេវ កាំភ្លើងធំ គ្រាប់រ៉ុកកែត យន្តហោះគ្មានមនុស្សបើក និងឧបករណ៍សំខាន់ៗមួយចំនួនទៀតសម្រាប់ប្រើប្រាស់នៅលើសមរភូមិ។ សូមបញ្ជាក់ជូនថា ជំនួយខាងលើនេះគឺកញ្ចប់ជំនួយ​មួយផ្នែកនៃកញ្ចប់ជំនួយតម្លៃ ១៨,៣ពាន់លានដុល្លារ ដែលអាមេរិកគ្រោងនឹងផ្តល់ជូនទៅកាន់អ៊ុយក្រែនចាប់ពីខែតុលានេះរហូតដល់ចុងឆ្នាំ ២០២២៕ អត្ថបទ៖ ភក្តី ប្រភព៖ The Strait Times

អាមេរិក៖ កម្រិតអតិផរណានៅសហរដ្ឋអាមេរិកបានកើតឡើងខ្ពស់លើសពីការព្យាករណ៍ទុក នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ កាលពីល្ងាចថ្ងៃព្រហស្បតិ៍ ទី១៣ ខែតុលានេះ។ តាមរយៈទិន្នន័យនៅក្នុងរបាយករណ៍របស់ការិយាល័យស្ថិតិការងារអាមេរិកបានបង្ហាញថា កម្រិតអតិផរណានៅអាមេរិកសម្រាប់នៅក្នុងខែកញ្ញាបានកើនឡើង ០,៤% ដែលជាកម្រិតខ្ពស់លើសពីការរំពឹងទុក ខណៈនៅក្នុងខែសីហាកន្លងទៅកម្រិតអតិផរណាមានត្រឹមកម្រិត ០,២% ប៉ុណ្ណោះ។ នៅក្នុងរបាយការណ៍ដដែលនោះបាន​បង្ហាញផងដែរថា គិតត្រឹមពេលនេះកម្រិតអតិផរណាប្រចាំឆ្នាំរបស់អាមេរិកបានកើនឡើងដល់កម្រិត ៨,២% រួចហើយ ខណៈនាពេលកន្លងមកគេបានព្យាករណ៍ថាកម្រិតអតិផរណាប្រចាំឆ្នាំរបស់អាមេរិក ពោលគិតរហូតដល់ចុងឆ្នាំអាចមានកម្រិត ៨,៣% ​​។ តាមរយៈទិន្នន័យនេះបានបង្ហាញថា គិតត្រឹមត្រីមាសទី ៣ ក្នុងឆ្នាំ ២០២២ កម្រិតអតិផរណារបស់អាមេរិកបានកើនឡើងជិតដល់កម្រិតអតិផរណាប្រចាំឆ្នាំរួចទៅហើយ ដូចនេះទម្រាំតែដល់រយៈចុងឆ្នាំគឺកម្រិតអតិផរណាប្រចាំឆ្នាំរបស់អាមេរិកក៏អាចកើនឡើងខ្ពស់លើសពីការរំពឹងទុកផងដែរ៕ អត្ថបទ៖ ភក្តី ប្រភព៖ បាងកកប៉ុស្តិ៍

ប៉ាគីស្ថាន៖ ពលរដ្ឋប៉ាគីស្ថានចំនួន ១៨នាក់ត្រូវបានរាយការណ៍ថា បានស្លាប់បាត់បង់ជីវិតនៅក្នុងហេតុការណ៍ភ្លើងឆេះរថយន្តក្រុងដ៏កម្រមួយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Times នៅថ្ងៃព្រហស្បតិ៍ ទី១៣ ខែតុលានេះ។ បើតាមអាជ្ញាធរប៉ាគីស្ថានបានបញ្ជាក់ថា នៅក្នុងចំណោមជនរងគ្រោះទាំងអស់នោះគឺមានជនរងគ្រោះចំនួន ១២នាក់ជាកូនក្មេង ខណៈមូលហេតុដែលបង្កឲ្យមានភ្លើងឆេះគឺដោយសារតែបញ្ហាបច្ចេកទេសគ្រឿងម៉ាស៊ីនរបស់រថយន្ត។ ប្រភពខាងលើបានបន្តថា រឿងមួយដែលគួរឲ្យកត់សម្គាល់បំផុតនោះគឺជនរងគ្រោះដែលបានស្លាប់ទាំងអស់នោះសុទ្ធតែជាជនរងគ្រោះពីគ្រោះទឹកជំនន់ ដែលត្រូវធ្វើដំណើរត្រលប់ពីជំរុំជនភៀសខ្លួនទៅកាន់លំនៅដ្ឋានរបស់ពួកគេវិញ តែជាអកុសលធ្វើដំណើរមិនទាន់ដល់ផ្ទះផងក៏ត្រូវភ្លើងឆេះស្លាប់ក្នុងរថយន្តតែម្តង។ គួរបញ្ជាក់ជូន ថ្មីៗនេះប៉ាគីស្ថានជួបប្រទះនឹងគ្រោះទឹកជំនន់ដ៏អាក្រក់បំផុតមួយ ដែលបានសម្លាប់មនុស្សជាង ១,៧០០នាក់​ បង្ខំឲ្យពលរដ្ឋ ៨លាននាក់ត្រូវធ្វើការជម្លៀសខ្លួន បង្កផលប៉ះពាល់ដល់ការរស់នៅរបស់ពលរដ្ឋជាង ៣៣លាននាក់ និងធ្វើឲ្យខាតបង់សេដ្ឋកិច្ចអស់ប្រមាណជា ២៨ពាន់លានដុល្លារ៕ អត្ថបទ៖ ភក្តី ប្រភព៖ The Strait Times